NDAK ခေါင်းဆောင်နေအိမ် လက်နက်ကြီးဖြင့် ပစ်ခံရ၊ ၂ ဦး သေဆုံး
ကချင်ပြည်နယ် မြစ်ကြီးနားမြို့ မြေမြင့်ရပ်ကွက်မှာရှိတဲ့ စစ်ကောင်စီ လက်အောက်ခံ ကချင်ဒီမိုကရေစီသစ် တပ်မတော် (NDAK) ခေါင်း ဆောင်ရဲ့နေအိမ် မေ ၆ ရက် ညပိုင်းက လက်နက်ကြီးနဲ့ အပစ်ခံခဲ့ရတဲ့အတွက် လုံခြုံရေးတာဝန်ကျသူ ၂ ဦး သေဆုံးခဲ့တယ်လို့ သိရပါတယ်။
“ည ၁၀ နာရီခွဲလောက်က လက်နှက်ကြီးနဲ့ နှစ်ချက်လှမ်းပစ်တာ။ သူ့အိမ်မှာကလည်း လုံခြုံရေးအစောင့်တွေ အမြဲရှိတယ်။ ခြံစည်းရိုးတံခါးတွေ အမြဲပိတ်ထားတာ။ ဘယ်အဖွဲ့က ပစ်လဲ ဆိုတာတော့ မသိဘူး၊ လုံခြုံရေးတာဝန်ကျသူ နှစ်ဦးသေတယ်” လို့ မြေမြင့်ရပ်ကွက်နေသူတဦးက ပြောပါတယ်။
နေအိမ်ကို လက်နက်ကြီးနဲ့ အပစ်ခံရတဲ့ ဦးစခုန်တိန့်ယိမ်းဟာ စစ်ကောင်စီလက်အောက်ခံ ကချင် ဒီမိုကရေစီသစ်တပ်မတော် ပြည်သူ့စစ်ခေါင်းဆောင်တဦးဖြစ်ပြီး ကချင်အထူးဒေသ (၁) အဖွဲ့ချုပ် ထာဝရငြိမ်းချမ်းရေးအဖွဲ့ရဲ့ ဥက္ကဋ္ဌတဦးဖြစ်ပါတယ်။
ဦးစခုန်တိန်ယိန်းဟာ ၁၉၈၉ ခုနှစ်က ဗမာပြည်ကွန်မြူနစ်ပါတီကနေ ခွဲထွက်ပြီး ပန်ဝါဒေသမှာ ကချင်ဒီမိုကရေစီသစ်တပ်မတော် (NDAK) အမည်နဲ့ အစိုးရနဲ့ အပစ်အခတ်ရပ်စဲခဲ့သူ ဖြစ်ပါတယ်။ ဒီနောက် ၂၀၀၉ ခုနှစ်မှာတော့ NDAK တပ်ဖွဲ့ကို နယ်ခြားစောင့်တပ်အဖြစ် ပြောင်းလဲဖွဲ့စည်းခဲ့ပြီး ၂၀၁၀ ရွေးကောက်ပွဲမှာ ဦးစခုန်တိန်ယိန်းက အမျိုးသားလွှတ်တော် ကိုယ်စားလှယ်အဖြစ် ရွေးကောက်ခံခဲ့သလို ၂၀၂၀ ရွေး ကောက်ပွဲမှာလည်းထပ်မံ ဝင်ပြိုင်ခဲ့သူ ဖြစ်ပါတယ်။ DVB
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 