မင်းကင်း-တန့်ဆည် အစပ်ရှိ တဲကြီးရွာကို စစ် တပ်က တိုက်လေယာဉ်ဖြင့် ဗုံးကျဲမှု သူနာပြု ၁ ဦးနှင့် အမျိုးသမီး ၁ ဦးသေဆုံး၊ ကျေးရွာ ၃ ရွာကိုလည်း စစ်တပ်က မီးရှို့ဖျက်ဆီးသဖြင့် နေအိမ် ၁ဝဝ ကျော် မီးလောင်ပြာကျ
စစ်ကိုင်းတိုင်း မင်းကင်းမြို့နယ်နှင့် တန့်ဆည်မြို့နယ် အစပ်ရှိ တဲကြီးရွာကို အကြမ်းဖက် စစ်တပ်က မေလ ၂ဝ ရက်နေ့တွင် တိုက်လေယာဉ်ဖြင့် ဗုံးကျဲတိုက်ခိုက်ခဲ့ပြီး ကျေးရွာနေ ကိုယ်ဝန်ဆောင်သည် ၁ ဦးနှင့် သူနာပြု ၁ ဦး သေဆုံးကာ ပြည်သူ ၁၅ ဦးထိခိုက် ဒဏ်ရာရရှိခဲ့ကြောင်း ဒေ သခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
အကြမ်းဖက် စစ်တပ်သည် တဲကြီးရွာကို ဂျက်ဖိုက်တာ ၂ စီးဖြင့် ဗုံးကျဲခဲ့ပြီးနောက် ကျေးရွာအတွင်း၌ ပြည်သူပိုင် နေအိမ်များကိုပါ ရဟတ် ယာဉ်ဖြင့် ပစ်ခတ်ခဲ့ပြီး သူနာပြု ၁ ဦးနှင့် လသားအရွယ် ကလေးငယ် မိခင် ၁ ဦးတို့ သေဆုံးကာ ပြည်သူ ၁၅ ဦးထိခိုက်ဒဏ်ရာရရှိခဲ့ပြီး အ ကြမ်း ဖက် စစ်တပ်က ရဟတ်ယာဉ် ၅ စီးဖြင့် ရွာအဝင် အထွက်လမ်းများတွင် လူချထားခဲ့ကြောင်း သိရသည်။
” အကြမ်းဖက် စစ်တပ် တိုက်လေယာဉ်နဲ့ ဗုံးလာကျဲလို့ ၂၁ အရွယ် ဆေးသူနာပြု တစ်ဦးနဲ့ ရွာထဲက လသား အရွယ် ကလေးမိခင်တို့ ပွဲချင်းပြီး သေဆုံးသွားတယ်။ တခြား သူနာပြု တစ်ယောက်မှာလည်း ထိခိုက်ဒဏ်ရာရရှိထားပါတယ်။ ထိခိုက်ဒဏ်ရာရရှိသူ ကလေးလူကြီး ၁၅ ဦးခန့်ရှိပါတယ်။ ရဟတ်ယာဉ်တွေက ပစ်ခတ်မှုတွေ ပြုလုပ်ပီး ပြန်လှည့်သွားပါတယ်။ ပြန်လှည့်သွားပြီးတော့ ရဟတ်ယာဉ် ၅ စီးထပ်ရောက်လာတယ်။ စစ်ကောင်စီ တပ်သား ၁ဝဝ ကျော်ကို ရွာထိပ်မှာ လာချသွားပြီး ရွာဦးကျောင်းမှာ တပ်စွဲထားပါတယ် ” ဟု ဒေသခံပြည်သူ တစ်ဦးကပြောဆိုသည်။
ကျေးရွာနေပြည်သူများသည် အကြမ်းဖက် စစ်တပ်၏ လူမဆန်သော လုပ်ရပ်ဆိုးကို ကြောက်ရွံ့နေကာ လက်ရှိချိန်ထိ ကျေးရွာကို မပြန်နိုင်သေးဘဲ ထွက်ပြေး ရှောင်တိမ်းနေရဆဲ ဖြစ်ကြောင်း သိရသည်။
အလားတူ မင်းကင်းမြို့နယ်အတွင်းရှိ နှင်းကြီး၊ လက်ချိတ်နှင့် ဖတ်ခက် ကျေးရွာတို့ကိုလည်း အကြမ်းဖက် စစ်တပ်က မေလ ၂၁ ရက်နေ့တွင် ဝင်ရောက် စီးနင်း မီးရှို့ခဲ့ပြီး ပြည်သူပိုင် နေအိမ် ၁၁၁ လုံး မီးလောင်ပြာကျခဲ့ကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ကျေးရွာ ၃ ရွာကို မီးရှို့ဖျက်ဆီးခဲ့သော အကြမ်းဖက် စစ်တပ်သည် ချင်းတွင်းမြစ်ကမ်းအတွင်း တိုက်ခိုက်ခံရသော မော်တော်အုပ်စုမှ စစ်သားများ ဖြစ်ကြောင်း သိရသည်။
” မနေ့က တိုက်ခိုက်ခံရတဲ့ စစ်တပ် ရေယာဉ် အုပ်စုက စစ်ခွေးတွေ နှင်းကြီး၊ လက်ချိတ်နဲ့ ဖတ်ခက်ရွာတွေကို မီးရှို့သွားတာ ပြည်သူတွေတော့ ထိခိုက်မှုရှိဘူးလို့ သိရတယ်။ ချင်းတွင်းမြစ်ကမ်းဘေးက ရွာတွေက စစ်ခွေး မော်တော်အုပ်စု လာပြီဆိုတာနဲ့ တောက်လျှောက်ကို ပြေးနေရတာ” ဟု ဒေသခံပြည်သူ တစ်ဦးကပြောဆိုသည်။
လက်ရှိချိန်တွင် ချင်းတွင်းမြစ်ကမ်းဘေးရှိ ကျေးရွာများမှ ပြည်သူများသည် ဘေးလွတ်ရာသို့ ထွက်ပြေးတိမ်းရှောင်နေရကြောင်း သိရသည်။ khit thit
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 