SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း ပုလဲမြို့နယ် နဂါးမတောင် အနီး အကြမ်းဖက် စစ်တပ် စစ်ကြောင်းကို ဒေသခံ ကာကွယ်ရေး တပ်ဖွဲ့များက ယနေ့ မေလ ၂၈ ရက်နေ့ မွန်းလွဲ ၁ နာရီခန့်တွင် ပစ်ခတ်တိုက်ခိုက်ခဲ့ပြီး စစ်သား ၃ ဦးသေဆုံးခဲ့ကြောင်း သိရသည်။

အကြမ်းဖက် စစ်တပ် စစ်ကြောင်းကို Pale People’s Defence Force-Headquarters ၊ပုလဲတပ်ရင်း(၂)၊God of Myaing ၊Myaing Hero Generation ၊လင်းယုန်အဖွဲ့နှင့် Monywa People Defence Force-mpdf အဖွဲ့များက ပူးပေါင်း တိုက်ခိုက် ခဲ့ခြင်းဖြစ်ပြီး မိနစ် ၃ဝ ခန့် အ ပြန်အလှန် ပစ်ခတ်မှု ဖြစ်ပွားခဲ့ပြီး စစ်သား ၃ ဦးသေဆုံးကာ ကာကွယ်ရေး တပ်ဖွဲ့များ အောင်မြင်စွာ ဆုတ်ခွာ နိုင်ခဲ့ကြောင်း သိရသည်။ khit thit

မကွေးတိုင်း၊ ဆိပ်ဖြူမြို့နယ်မှာ မေ ၂၈ ရက် မွန်းလွဲပိုင်းက စစ်ကောင်စီတပ်ဖွဲ့တွေ  လိုက်ပါလာတဲ့ ကားတစ်စီးကို မိုင်းဆွဲတိုက်ခိုက်ခဲ့တယ်လို့  ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့(NSP)က ပြောပါတယ်။

NSP ရဲ့ ပြန်ကြားရေးတာဝန်ခံ ဗိုလ်ဆိုင်မွန်က  “ဆိပ်ဖြူ-ပေါက်လမ်းပိုင်းမှာ ဒီကနေ့ မွန်းလွဲ ၁ နာရီ ၄၅ မိနစ် လောက်က စစ်(…)တွေမောင်းလာတဲ့ ကားတစီကို ကျနော်တို့ NSP က မိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၅ ယောက်သေဆုံးခဲ့တယ်”လို့  ပြောပါတယ်။

စစ်ကောင်စီတပ်သား ၅ ယောက်သေဆုံးခဲ့တာနဲ့ ပတ်သက်လို့ ဒီဗွီဘီအနေနဲ့ သီးခြားအတည်မပြုနိုင်သေးသလို တိုက်ပွဲတွေနဲ့ မိုင်းဆွဲခံရလို စစ်ကောင်စီတပ်ဖွဲ့တွေ ထိခိုက်သေဆုံးတဲ့အခြေနေတွေကို စစ်ကောင်စီဘက်က သတင်းထုတ်ပြန်တာ မတွေ့ရသေးပါဘူး။

မိုင်းဆွဲခံရပြီးနောက် စစ်ကောင်စီတပ်က လက်နက်ကြီးလက်နက်ငယ်တွေနဲ့ ရမ်းသန်းပစ်ခတ်ခဲ့ပေမဲ့ NSP ရဲဘော်တွေ အထိခိုက်အကျဆုံးမရှိဘဲ ဆုတ်ခွာနိုင်ခဲ့တယ်လို့လည်း ပြောပါတယ်။

ဆိပ်ဖြူ-ကျောက်ကြီး လမ်းပေါ်မှာလည်း မေ ၁၁ ရက် မနက် ၁၁ နာရီလောက်က ရဲကား ၃ စီးကို NSP က မိုင်းဆွဲတိုက်ခိုက်ရာ ရဲ ၃ ယောက် နေရာမှာတင်သေဆုံးပြီး ၅ ယောက်လောက် အပြင်းထန် ဒဏ်ရာရရှိခဲ့တယ်လို့ သိရပါတယ်။

NSP အနေနဲ့ ဘယ်လိုအခက်ခဲတွေရှိနေပါစေ ပြည်သူလူထုရဲ့ ခွန်အားတွေနဲ့ အကြမ်းဖက် စစ်ကောင်စီပြုတ်ကျတဲ့ အထိတိုက်ပွဲဝင်သွားမှာဖြစ် ကြောင်း မိဘပြည်သူတွေ အနေနဲ့လည်း တတ်နိုင်တဲ့နေရာကနေ ပူးပေါင်းပါဝင်ပေးကြဖို့နဲ့ စစ်အုပ်စုရဲ့ဒေါက်တိုင်တွေနဲ့ သူတို့နဲ့ နီးစပ်တဲ့နေရာတွေကို ရှောင်ရှားကြဖို့ကိုလည်း သတိပေးထားပါတယ်။ DVB

khit thit

တနင်္သာရီတိုင်း၊ ထားဝယ်မြို့၊ မြောက်ရွာရပ်၊ အာဇာနည်လမ်းမကြီးပေါ်ရှိ အမှတ် (၃) အထက်တန်းကျောင်းရှေ့မှာ မေ ၂၈ ရက် နေ့လယ် ၂ နာရီခွဲလောက်က ဗုံးပေါက်ကွဲမှု ၂ ကြိမ်ဆက်တိုက် ဖြစ်ပွားခဲ့ပါတယ်။

ဗုံးပေါက်ကွဲမှုကြောင့် လမ်းပေါ်ဖြတ်သန်းသွားလာနေတဲ့ သုံးဘီးယာဉ်မောင်းတယောက် ဝမ်းဗိုက်မှာ ဗုံးစထိမှန် ထိခိုက်ဒဏ်ရာရခဲ့တယ်လို့လည်း မျက်မြင်တွေ့ရှိသူတယောက်က ပြောပါတယ်။

စစ်ကောင်စီက ဖွင့်လှစ်ဖို့ စီစဉ်နေတဲ့ ကျောင်းအပ်နှံရေးသတင်းပတ်ဖြစ်လို့ ကျောင်းအပ်လက်ခံနေချိန်မှာ  ဗုံးပေါက်ကွဲခဲ့တာဖြစ်ပြီး ဒီပေါက် ကွဲမှုနဲ့ ပတ်သက်လို့ ဘယ်သူကမှ သူတို့လက်ချက်လို့ ထုတ်ဖော်ပြောဆိုတာ မရှိသေးပါဘူး။ 

ထားဝယ်မြို့ခံတစ်ဦးက “ကျောင်းအပ်နေတာလည်း  တော်တော်များတယ်ကြားတယ်။ ကျောင်းအပ်လက်ခံနေတော့ အစောင့်တွေရှိတယ်၊ ထင်ရောင်ထင်မှားဖြစ်စေချင်တာလားမသိဘူး” လို့ ပြောပါတယ်။

ကျောင်းသားမိဘတစ်ဦးကလည်း “အခုလိုမျိုး ဘယ်သူလာဖောက်လို့ ဖောက်မှန်းမသိတဲ့ ဗုံးတွေ ကျောင်းတွေမှာ ပေါက်ကွဲနေတာကတော့ ကလေးတွေကျောင်းတက်ရတာ မလုံခြုံဘူးဆိုတဲ့သဘောမျိုး သက်ရောက်စေတယ်”လို့  ပြောပါတယ်။

ဗုံးပေါက်ကွဲပြီးနောက် စစ်ကောင်စီတပ်တွေရောက်လာပြီး လုံခြုံရေးတင်းကျပ် စစ်ဆေးခဲ့သလို လမ်းပေါ်ထွက်ရပ်ကြည့်နေတဲ့ အသက် ၄၀ ကျော် အမျိုးသားတယောက်ကိုလည်း  ဖမ်းဆီးသွားတယ်လို့လည်း မျက်မြင်တွေ့တဲ့ ဒေသခံကပြောပါတယ်။

မြိတ်မြို့မှာလည်း ပြီးခဲ့တဲ့ရက်ပိုင်းက အထက်တန်းကျောင်းတွေရှေ့ သုံးရက်ဆက်တိုက် ဗုံးပေါက်ကွဲမှုတွေဖြစ်ခဲ့တယ်လို့ မြို့ခံတွေထံက သိရပါတယ်။ DVB

ရခိုင်ပြည်နယ်၊ မောင်တောခရိုင်ကနေ စစ်တွေတက္ကသိုလ်မှ တက်ရောက်ပညာသင်ယူမယ့် မွတ်ဆလင်ကျောင်းသူ/ကျောင်းသား ၁၀၀ ကျော်  ခရီးသွားလာခွင့် လက်မှတ်ပုံစံ (၄) ရရှိလို့ ကျောင်းအပ်နေကြပြီလို့  ကျောင်းသူ/ကျောင်းသားတွေထံက သိရပါတယ်။

တက္ကသိုလ်တက်ခွင့်ရတဲ့ မွတ်ဆင်ကျောင်းသားတဦးက “ကျနော်တို့ ဘူးသီးတောင်နဲ့ မောင်တောက ကျောင်းသူ/ကျောင်းသားတွေအားလုံး ခရီးသွားလာခွင့်ရရှိကြပါပြီ။ မနေ့က စလို့ ကျောင်းသွင်းကြပါတယ်။ ခရီးသွားလာခွင့် ပုံစံ(၄)က (၁၄) ရက်ပဲ ခွင့်ပြုချက်ပါတော့ ပြည်နယ် လဝက ရုံးမှာသွားရောက်အကြောင်းကြားထားရပါတယ်။”လို့  ပြောပါတယ်။

မောင်တောကနေ တက္ကသိုလ်တက်ရောက်မယ့် မွတ်ဆလင်ကျောင်းသူ/ကျောင်းသား ၂၂ ယောက်ကို  မေလ ၂၁ ရက်က မောင်တောခရိုင်လဝကကနေ စတင်ခွင်ပြုချက်ပေးခဲ့ပြီးနောက် ခရိုင်တစ်ခုလုံးရှိ ကျောင်းသူ/ကျောင်းသား ၁၀၀ ကျော်ကို ဆက်လက်ခွင်ပြုပေးခဲ့တာလည်းဖြစ်ပါတယ်။

မောင်တောခရိုင်လဝက တာဝန်ရှိသူ တဦးက “ခရီးသွားလာခွင့် ပုံစံ(၄)က ၁၄ ရက်သာထုတ်ပေးလို့ရတာ။ ကျန်းမာရေးအတွက် ဆေးကုသဖို့ သွားသူတွေဆိုရင်တော့ ဆရာဝန်ထောက်ခံချက်နဲ့ ရက်ထပ်တိုး လျှောက်ထားရတယ်။ အခုတက္ကသိုလ်တက်ရောက်မယ့် ကျောင်း/သူ​ကျောင်း သားတွေကတော့ ပြည်နယ်မှာ သွားရောက်အကြောင်းကြားပေးရင် ရပြီ။ ကျောင်းပိတ်လို့ ပြန်လာတဲ့အချိန်မှလည်း အဲ့ဒီပုံစံ (၄) စာရွက်နဲ့ ပြန် လာလို့ရပါတယ်။”လို့ ရှင်းပြပါတယ်။

စစ်တွေတက္ကသိုလ်ကျောင်းဝင်ခွင့်ကို မေလ ၁၇ ရက်မှ မေလ ၂၇ ရက်နောက်ဆုံး သတ်မှတ်ထားခဲ့ ပေမဲ့ ခရီးသွားလာခွင့်စောင့်ဆိုင်းနေတဲ့ ကျောင်းသူ/ကျောင်းသားတွေ ရှိနေတာကြောင့် လာမယ့် ဇွန်လ ၁၀ ရက်အထိ ထပ်တိုးထားပါတယ်။

ယခုပညာသင်နှစ်မှာ စစ်တွေတက္ကသိုလ်မှာ  ရခိုင်တစ်ပြည်နယ်လုံးမှ မွတ်ကျောင်းသူ/ကျောင်းသား ၃၀၀ ကျော် ကျောင်းဝင်ခွင့်ရရှိထားပြီး မောင်တောခရိုင်ကနေ ၁၀၀ ကျော်ရှိတယ်လို့ သိရပါတယ်။ DVB

အနောက်နိုင်ငံကြီးများက မြန်မာနိုင်ငံကို အပိုင်စီးတော့မည့်အပြင် အမျိုး ဘာသာ သာသနာ ပျောက်ကွယ်နိုင်သဖြင့် နိုင်ငံတော်ကာကွယ်ရေး စစ်မှုပြန်ထမ်းရန် စစ်မှုထမ်းဟောင်းများကို စစ်ကောင်စီက လျှို့ဝှက် ပြန်ခေါ်ထားကြောင်း စစ်မှုထမ်းဟောင်းအသိုင်းအ၀ိုင်းထံမှ သိရှိရသည်။

ဧပြီလနှောင်းပိုင်းမှစတင်ပြီး မြန်မာနိုင်ငံတစ်ဝန်းရှိ စစ်မှုထမ်းဟောင်းများကို သက်ဆိုင်ရာ မြို့နယ်စစ်မှုထမ်းဟောင်းများထံသို့ ပြန်လည် ဆက်သွယ်ပြီး စစ်မှုထမ်းရန် စစ်တပ်ဘက်က ညွှန်ကြားလာကြောင်း ၊ စစ်မှုထမ်းဟောင်းများကို တပ်ဖွဲ့ ၃ ဖွဲ့ ဖွဲ့စည်းထားပြီး အသက် ၅၀ နှစ်အောက် တပ်ဖွဲ့၊ အသက် ၅၀ နှင့် ၆၀ အကြား တပ်ဖွဲ့၊ အသက် ၆၀ နှင့် ၆၅ အကြားတပ်ဖွဲ့ဟူ၍ ၃ ဖွဲ့ ခွဲခြားထားကြောင်း၊ စစ်မှုထမ်း ဟောင်း၏ အသက်နှင့်ရာထူးကိုလိုက်၍ ရာထူးသတ် မှတ်ပြန်လည်ပေးအပ်ပြီး ကာကွယ်ရေးနှင့် လုံခြုံရေးတာဝန်ထမ်း ဆောင်ခိုင်းခြင်းဖြစ်ကြောင်း သိရှိရသည်။

“ကျန်းမာရေးမကောင်းတာကလွဲရင် ငြင်းပယ်ခွင့်မရှိဘူး။ ကိုယ့်သက်ဆိုင်ရာမြို့နယ် ၊ ရပ်ကွက်တွေမှာ စစ်မှုပြန်ထမ်း ရမယ်လို့ ပြောတယ်။ လက်နက်တွေ ကျည်တွေ ထုတ်ပေးမယ်” ဟု စစ်မှုထမ်းဟောင်းတစ်ဦးက ပြောသည်။

စစ်ကောင်စီက စစ်မှုထမ်းဟောင်းများကို တာဝန်ပြန်လည် ထမ်းဆောင်ရန် ပေးပို့သော လျှို့ဝှက် အကြောင်းကြားစာများတွင် လက်ရှိ အခြေ အနေများက စစ်တပ်ကို အင်အားချိနဲ့ပြီး တိုင်းပြည်ပြိုကွဲအောင် လုပ်နေကြောင်း၊ အမျိုး ဘာသာ သာသနာ ကွယ်ပျောက်စေရန် ဘာသာရေးအစွန်းရောက်များနှင့် နိုင်ငံကို အပိုင်စီးလိုသော အနောက်အုပ်စုများ အန္တရာယ်မှ ကာကွယ်ရန် လိုအပ်လျက်ရှိရာ စစ်မှုထမ်းဟောင်းများအနေ ဖြင့် တိုင်းပြည်ကို ကာကွယ်စောင့် ရှောက် ရမည်ဖြစ်ကြောင်း အကြောင်းကြား ရေးသားထားသည်။ khit thit

စစ်ကိုင်းတိုင်း၊ ပုလဲမြို့နယ်အနောက်ဘက်ခြမ်းရှိ ဝမ်းဘဲချိုင့်ကျေးရွာတွင် တပ်စွဲထားသည့် စစ်ကောင်စီရှေ့ပြေး တပ်နှင့် ဒေသခံပြည်သူ့ကာကွယ်ရေးတပ်ဖွဲ့များ မေလ ၂၈ ရက် မွန်းလွဲ ၁ နာရီခန့်က နဂါးမတောင်ခြေအနီးတွင် တိုက်ပွဲဖြစ်ပွားခဲ့သည်။

အဆိုပါတိုက်ပွဲတွင် စစ်ကောင်စီတပ်သား သေဆုံးမှုများရှိနိုင်ပြီး ဒေသခံ ကာကွယ်ရေးတပ်ဖွဲ့များဘက်မှ အထိအခိုက်မရှိ ဆုတ်ခွာနိုင်ခဲ့ကြောင်း MPDF တပ်ရင်း (၁) ကသိရသည်။

“ စစ်ကောင်စီတပ်က အင်အား ၁၅ဝ နဲ့ ၂ဝဝ ကြားမှာရှိမယ်။ ကျွန်တော်တို့ အနေနဲ့ ကပ်နိုင်သလောက်အထိ အနားကပ်ပြီး ပစ်ခဲ့ကြတာဗျ။ စခ(စစ်ကောင်စီတပ်သား) ဘက်က လက်နက်ကြီးတွေနဲ့ အဆက်မပြတ် ပြန်ထုတာမျိုးတွေ ရှိတယ်။ လက်ရှိအခြေအနေမှာတော့ တိုက်ပွဲက တင်းမာနေဆဲအခြေအနေပါ ” ဟု MPDF တပ်ရင်း (၁) မှ ရဲဘော် ဂျွန် က ပြောသည်။

အဆိုပါတိုက်ပွဲကို MPDF တပ်ရင်း (၁) မှ ဦးဆောင်၍ MHG ၊ God Of Myaing ၊ ပုလဲတပ်ရင်း (၂) နှင့် လင်းယုန် အဖွဲ့တို့က ပူးပေါင်းတိုက် ခိုက်ခဲ့ခြင်း ဖြစ်ကြောင်း သိရသည်။ mizzima

စစ်ကိုင်းတိုင်း၊၊ ယင်းမာပင်မြို့နယ်၊ လည်ငေါက်ကျေးရွာထဲက ပြည်သူလူထုတွေရဲ့ နေအိမ်တွေကို မေ ၂၈ ရက် မနက်ပိုင်းက စပြီး စစ်ကောင်စီတပ်ဖွဲ့တွေ မီးရှို့ဖျက်ဆီးနေတယ်လို့ ဒေသခံတွေက ပြောပါတယ်။

စစ်ကောင်စီတပ်ဖွဲ့တွေဟာ မေ ၂၇ ရက်သန်းခေါင်ကျော်  (မေ ၂၈ ရက် မနက်ပိုင်း အစောပိုင်း ၁ နာရီဝန်းကျင်)လောက်က စတင်မီးရှို့ခဲ့ကြပြီး လက်နက်ကြီး လက်နက်ငယ် ပစ်ခတ်သံတွေ ကြားရကြောင်း၊ မေ ၂၈ ရက် မွန်းတည့် ၁၂ နာရီဝန်းကျင်လောက်မှာလည်း ဒုတိယအကြိမ် ထပ်မံမီးရှို့ခဲ့ကြကာ မီးလောင်နေတဲ့မြင်ကွင်းကို အဝေးကနေ မြင်တွေ့ခဲ့ကြရတယ်လို့ ဒေသခံက  ဆိုပါတယ်။

မီးရှို့မှုကြောင့် လည်ငေါက်ကျေးရွာရဲ့ ဆုံးရှုံးမှုအခြေအနေကိုတော့ချက်ချင်း မသိရသေး သလို စစ်ကောင်စီတပ်ဖွဲ့တွေ ရွာအတွင်းမှာပဲ ရှိနေသေးတာကြောင့် ဒေသခံပြည်သူတွေ မကပ်ရဲ သေးပဲ ရှိနေကြောင်းနဲ့ ဖုန်းလိုင်းတွေပါ  ဆက်သွယ်မှု ခက်ခဲနေတယ်လို့ ဒေသခံတစ်ဦးက ပြော ပါတယ်။

မေ ၂၇ ရက် ညနေပိုင်းကလည်း စစ်ကောင်စီတပ်ဖွဲ့ဟာ ကောင်းဆင့်ကျေးရွာမှ ပြည်သူတွေ မွေးမြူထားတဲ့ ကြက်၊ဘဲတွေကိုလည်း ခိုးယူရိုက် သတ်ချက်စားခဲ့ကြသလို သေနတ် ပစ်ဖောက်သံတွေလည်းကြားရတယ်လို့ ဒေသခံတွေထံက သိရပါတယ်။

ယင်းမာပင်မြို့နယ်မှာ လက်ရှိအချိန်ထိ ဖုန်းလိုင်းဆက်သွယ်ရေး အဆင်မပြေသလို စစ်ကောင်စီ တပ်ဖွဲ့တွေကလည်း ခပ်စိပ်စိပ်စစ်ကြောင်းထိုး သွားလာလှုပ်ရှားနေကာ ဒေသခံတွေရဲ့ ပစ္စည်းတွေ ယူဆောင်တာ၊ နေအိမ်တွေကို မီးရှို့တာတွေ  လုပ်ဆောင်နေကြပြီး ဒေသခံ အများအပြားလည်း အိုးအိမ်စွန့်ခွာ ထွက်ပြေးနေကြရဆဲ ရှိပါတယ်။ DVB

မန္တလေးတိုင်း၊ မဟာအောင်မြေမြို့နယ်တွင် စစ်တပ်သတင်းပေးဟု သတ်မှတ်ခံထားရသည့် ရန်နိုင်ကျော်နှင့် အောင်ကျော်မိုးတို့ ၂ ဦး ယနေ့ ညနေ ၅ နာရီ ၃၀ မိနစ်အချိန် အရက်ဝယ်နေစဉ် ပစ်သတ်ခံလိုက်ရကြောင်း ဒေသသတင်းရင်းမြစ်များနှင့်ဒေသခံများထံမှ သိရှိရသည်။

မဟာအောင်မြေမြို့နယ်၊စိန်ပန်းစာတိုက်တန်းဘေး KK Liquor storeတွင် ရန်နိုင်ကျော်နှင့်အောင်ကျော်မိုးတို့ အရက်ဝယ်နေစဉ် လူတချို့က ဝင်ရောက် လာပြီး ပစ်ခတ်ကြောင်း၊ ပစ်ခတ်မှုကြောင့် နှစ်ဦးစလုံး ပွဲချင်းပြီး သေဆုံးသွားပြီး ပစ်ခတ်သူများအားလုံး ပြန်လည်ထွက်ခွာသွားကြကြောင်း၊ မိနစ် ၂၀ ခန့်အကြာတွင် စစ်တပ်နှင့်ရဲများ ရောက်ရှိလာပြီး ပိတ်ဆို့ စစ်ဆေးမှုများ လုပ်ဆောင်ကြောင်း သိရှိရသည်။

“အရက်ရောင်းဆိုင်ထဲမှာ ၂ ဦးစလုံး အပစ်ခံရတာ‌ သေတယ်။ မိနစ် ၂၀ လောက် ကြာတော့ ရဲတွေ စစ်သားတွေ ရောက်လာပါတယ်။ အ လောင်းသယ်သွားတယ်။ သေသူတွေကတော့ ဒလန်ဆိုတာတော့ ဟုတ်တယ်” ဟု‌ ဒေသခံတစ်ဦးက ပြောဆိုသည်။

စစ်ကောင်စီသတင်းပေး ၂ ဦး အသတ်ခံရပြီးနောက် မန္တလေးမြို့ နေရာအနှံ့ အပြားတွင် စစ်တပ်နှင့်ရဲများက ဂိတ်ချ စစ်ဆေးမှုတချို့ရှိနေပြီး စိန်ပန်းဘက်တွင်လည်း ရဲကားနှင့်စစ်ကားတချို့မြင်ရကြောင်း ဒေသခံများထံမှ သိရှိရသည်။ khit thit