SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း ကလေးမြို့မှတဆင့် ချင်းပြည်နယ် ဖလမ်းမြို့နယ် ရိဒ်ခေါဒါရ်မြို့သို့ ပြေးဆွဲနေသော ယာဉ် များနှင့် Non CDM များသည် စစ်ကောင်စီအား အထောက်ပံ့ဖြစ်စေရန်ကူညီလုပ်ဆောင်မှုများရှိနေ၍ ပြင်းပြင်းထန်ထန်အရေးယူသွားမည်ဖြစ်ကြောင်း ချင်းကာကွယ်ရေးတပ်ဖွဲ့ (ဟွားလ်ငိုးရမ်း) CDF -Hualngoram က မေလ ၂၈ ရက် ရက်စွဲဖြင့် ထုတ်ပြန်ကြေညာသည်။

“အခု ကျွန်တော်တို့အနေနဲ့ တော်လှန်ရေးအရှိန်မြှင့်ဖို့ လိုအပ်နေပါတယ်။ တော်လှန်ရေးစိတ်ဓာတ် ပြန်နိုး ထဖို့လိုအပ်နေပါတယ်။ အားလုံး ပြိုင်တူတွန်းလှန်ဖို့ အသစ်တဖန် ကြိုးစားဖို့လိုနေပါတယ်” ဟု CDF-Hualngoram ပြောရေးဆိုခွင့်ရှိသူက မဇ္ဈိမကိုပြောသည်။

က‌လေးမြို့မှမော်တော်ယာဉ်များသည် စစ်ကောင်စီတပ်ဖွဲ့အတွက် စားနပ်ရိက္ခာများ၊ စခန်းကာကွယ်ရန် သံကြိုးခွေစသဖြင့် အသုံးအဆောင်များ သယ်ယူပေးဆောင်နေသည်ကို သိရှိရကြောင်း၊ သို့ဖြစ်ပါ၍ နောက်နောင်အထောက်အပံ့ပြုခြင်း အကူအညီပေးခြင်းများ လုံးဝ(လုံးဝ) မပြုလုပ်ကြရန် ထပ်မံသတိပေး ကြောင်းဆိုသည်။

စီးပွားရေး လုပ်ကိုင်နေသူများနှင့် ပြည်သူများသည် စစ်ကောင်စီ၏ ခိုင်းစေမှုများအား ငြင်းဆန်ရဲသည့် သတ္တိများရှိရန်လိုအပ်ကြောင်း ကူညီမှုများအား လက်ပူးလက်ကြပ်ဖမ်းဆီးမိခဲ့ပါက ပြင်းပြင်းထန်ထန် အရေးယူဆောင်ရွက် သွားမည်ဖြစ်ကြောင်း ထုတ်ပြန်ချက်အရ သိရသည်။

Non CDMers များသည်လည်း စစ်ကောင်စီတပ်ဖွဲ့များနှင့် ပတ်သက်ဆက်နွယ်နေသည်ကို သိရှိရကြောင်း ၊ စစ်ကောင်စီအုပ်ချုပ်ရေးယန္တရားကို အရှင်သဖွယ် ဆောင်ရွက်ပေးနေမှုများရပ်တန့်ကြရန်နှင့် မည်သည့် ပုဂ္ဂိုလ်၊ မည်သည့်အဖွဲ့အစည်းကိုမဆို ပြင်းပြင်းထန်ထန် အရေးယူဆောင်ရွက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

Non CDM များသည် လစာနှင့် နေရာတည်မြဲရေးကိုသာ အလိုရှိနေကြကြောင်း၊ ၎င်းတို့အနေဖြင့် အရေးယူဆောင်ရွက်မှုများအား Public အား အသိပေးနိုင်ခြင်းမရှိသော ကိစ္စရပ်များ ပေါ်ပေါက်လာမည် ဖြစ်ကြောင်းဆိုသည်။

ရိဒ်ခေါဒါရ်မြို့သည် အိန္ဒိယ-မြန်မာ နှစ်နိုင်ငံနယ်စပ်ကုန်သွယ်ရေးလမ်းကြောင်းပေါ်ရှိသော မြို့တစ်မြို့ ဖြစ်ပြီး စစ်ကောင်စီတပ်နှင့် ကာကွယ် ရေးတပ်ဖွဲ့များအကြား မကြာခဏ တိုက်ပွဲများဖြစ်ပွားလေ့ရှိပြီး ဒေသခံပြည်သူအချို့သည် အိန္ဒိယနိုင်ငံ မီဇိုရမ်ပြည်နယ်ဘက်တွင် စစ်ဘေးရှောင်အဖြစ်နှင့် ခိုလှုံလျက် ရှိနေကြောင်း ဒေသတွင်း သတင်းအရင်းအမြစ်များထံမှ သိရသည်။ mizzima