SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ချင်းပြည်နယ်မြောက်ပိုင်း ၊ တီးတိန်မြို့ပေါ်တွင် ယနေ့ ဇွန်လ ၃ရက် မွန်းလွဲ၂နာရီဝန်းကျင်က အကြမ်းမဖက်အာဏာဖီဆန်ရေး (CDM ) လှုပ် ရှားမှုတွင် ပါဝင်သည့် ကျောင်းဆရာနှစ်ဦးကို စစ်ကောင်စီတပ်က ဖမ်းဆီးခဲ့ကြောင်း သိရသည်။

စစ်ကောင်စီတပ်သည် စစ်ကားနှစ်စီးဖြင့် CDM ကျောင်းဆရာ၊ ဆရာမများကို လိုက်လံ ဖမ်းဆီးနေခြင်းဖြစ်ပြီး တီးတိန်မြို့၊ စကော့လမ်းရပ်ကွက်နေ အလယ်တန်းပြ ကျောင်းဆရာ နှစ်ဦး ကိုဖမ်းဆီးခေါ်ဆောင်သွားခြင်း ဖြစ်သည်ဟု ရပ်ကွက်နေ ပြည်သူတစ်ဦးထံက သိရသည်။

“နေအိမ်အထိလာတာ။ မေးစရာရှိလို့ဆိုပြီး ခေါ်သွားတာဗျ။ ရပ်ကွက်ထဲမှာ စစ်ကားနှစ်စီး နဲ့ လိုက်ဖမ်းနေတာ။ စစ်သားတွေထဲမှာ တချို့က ဝတ်စုံဝတ်ပြီးတော့ တချို့က အရပ်ဝတ်နဲ့သွားနေတာကိုတွေ့တယ်။ ဖမ်းဆီးခံရတဲ့ ဆရာနှစ်ဦးကို ဘယ်နေရာ ခေါ်သွားလဲတော့မသိဘူး” ဟု စကော့လမ်းရပ်ကွက်တွင် နေထိုင်သူတစ်ဦးက ပြောသည်။

စစ်ကောင်စီ တပ်များ လိုက်လံ ဖမ်းဆီးချိန်တွင် အချိန်မီပုန်းအောင်းနိုင်သည့် CDM ဆရာ၊ဆရာမများမှာ ဖမ်းဆီးခံရခြင်း မရှိကြောင်းသိရသည်။

ပြီးခဲ့သည့် မေလ ၃၀ ရက်က တီးတိန်မြို့ အမှတ် (၁) အခြေခံပညာ အထက်တန်းကျောင်းမှ ကျောင်းအုပ်ကြီး ဒေါ်မန်းတူးလ်ကျိန် နှင့် အခြေခံ ပညာ အထက်တန်းကျောင်း (ခွဲ) တီးတိန် မှ ဒုကျောင်းအုပ်ကြီး ဦးကျင့်မွမ်းထန် တို့နှစ်ဦးကို စစ်ကောင်စီ လက်အောက်ခံကျောင်းများ မဖွင့်ရန် စစ်ကျွန်မခံလိုသည့် လက်နက်ကိုင် လူငယ်အဖွဲ့တစ်ဖွဲ့က လက်မှတ်ရေးထိုးခိုင်းခဲ့သည်။ mizzima

နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပေါ် စွဲဆိုထားတဲ့ ရွေးကောက်ပွဲအမှုကို ဇွန်လ ၃ ရက်နေ့က ဆက်လက်ရုံးထုတ်စစ်ဆေးရာမှာ စွဲချက်တင်ဖို့ အမိန့်ချလိုက်ပြီး စွပ်စွဲခံရသူတွေဘက်က အပြစ်မရှိဘူးလို့ ငြင်းဆိုခဲ့တယ်လို့  တရားရုံးနဲ့နီးစပ်တဲ့ အသိုင်းအဝိုင်းကနေ သိရပါတယ်။

ဒီအမှုနဲ့ပတ်သက်လို့ အစက စွဲချက်အမိန့်ချရင် CMP လုပ်မယ်လို့ ဆိုထားပေမယ့် CMP မလုပ်တော့ပဲ တရားလို အပါအဝင် သုံးယောက်ကို  ပြန်ခေါ်သက်သေတင်ခဲ့တယ်လည်း ပြောပါတယ်။

၂၀၂၀ ပြည့်နှစ် အထွေထွေရွေးကောက်ပွဲမှာ နိုင်ငံတော်သမ္မတ ဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပြည်ထောင် စုအစိုးရအဖွဲ့ရုံး၀န်ကြီးဌာန ပြည်ထောင်စု၀န်ကြီး ဦးမင်းသူတို့က ပြည်ထောင်စုရွေးကောက်ပွဲကော်မရှင်အပေါ်မှာ မလျော်သြဇာလွှမ်းမိုးခဲ့တဲ့ဆိုပြီး ရာဇတ်ကြီးပုဒ်မ ၁၃၀-က နဲ့ စွဲဆိုထားတဲ့ အမှုဖြစ်ပါတယ်။

၂၀၂၀ ပြည့်နှစ်အထွေထွေရွေးကောက်ပွဲမှာ ဒေါ်ဆောင်ဆန်းစုကြည် ဦးဆောင်တဲ့ အန်အယ်လ်ဒီ ပါတီကအပြတ်အသတ်အနိုင်ရရှိခဲ့ပြီး စစ်တပ် ထောက်ခံတဲ့ ကြံ့ခိုင်ရေးပါတီရှုံးနိမ့်သွားပြီးနောက်  မဲစာရင်းမှားယွင်းမှု စွပ်စွဲချက်နဲ့ စစ်တပ်က  အာဏာသိမ်းခဲ့တာဖြစ်ပါတယ်။ DVB

စစ်ကိုင်းတိုင်း ကန့်ဘလူမြို့နယ် ကိုးတောင်ဘို့ရွာတွင် တပ်စွဲထားသော အကြမ်းဖက် စစ်တပ်နှင့် ဒေသခံ ကာကွယ်ရေး တပ်ဖွဲ့များ ဇွန်လ ၂ ရက်နှင့် ၃ ရက်နေ့တို့တွင် တိုက်ပွဲများ ဆက်တိုက် ဖြစ်ပွားနေကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

အကြမ်းဖက် စစ်တပ်နှင့် ဒေသခံ ကာကွယ်ရေး တပ်ဖွဲ့များ ၂ ရက်ဆက်တိုက် တိုက်ပွဲ ဖြစ်ပွားနေခြင်း​ပြီး စစ်တပ်က ထိခိုက် သေဆုံးမှု များပြားသောကြောင့် ယနေ့ မွန်းလွဲပိုင်းတွင် တိုက်ခိုက်ရေး ရဟတ်ယာဥ် ၃ စီးဖြင့် လာရောက် ပစ်ခတ်နေကြောင်း သိရသည်။

” ရဟတ်ကတော့ ပစ်နေတုန်းပါပဲ။ နောက်ထပ် စစ်ကြောင်း ၂ ကြောင်း လာပြီးတော့ အင်အားဖြည့် တိုက်ခိုက်နေပါတယ်။ ရဟတ်ယာဥ်က လာပစ်ရုံတင် မဟုတ်ဘူး ဗုံးလည်းချပါတယ်။ ဗုံးအလုံးပေါင်း ၂၅ လုံး ၃၀ လောက် ချပါတယ်။ ပစ်ခတ်တာတွေလည်း လုပ်ပါတယ်။ ဖြစ်နေတာက အခုချိန်ထိ ဖြစ်တုန်းပါ နံနက် ၇ နာရီထိုးကနေ စဖြစ်နေကျတာ လေယာဥ်ကတော့ ၂ နာရီ ထိုးလောက်ကနေ စရောက်တာ အခုချိန်ထိ ပစ်နေပါတယ်။ မြေပြင် အခြေအနေကတော့ အသေးစိတ် မသိရသေးဘူး။ စစ်ခွေး သေစာရင်းကတော့ မသိသေးဘူး။ စစ်ခွေးတွေ အထိုင်ချထားတဲ့ နေရာကို ကာကွယ်ရေး အဖွဲ့တွေ သိမ်းဖို့တော့ လုပ်နေတယ်။ ရွာထဲမှာ တိုက်ပွဲဖြစ်နေတာ ကျွန်တော်တို့ရွာကို စစ်ခွေးတွေ ဝင်စီးတာ ၂ လကျော်သွားပြီ တပ်စွဲထားတာ အဲတာကို ဒေသခံ ကာကွယ်ရေး အဖွဲ့က တိုက်ထုတ်နေတာ မနေ့ကမှ စတင်ပြီး တိုက်ပွဲဖြစ်တယ်။ သူတို့ အထိုင်ချထားတဲ့ နေရာကို ကာကွယ် ရေး အဖွဲ့တွေက ဝင်သိမ်းဖို့ လုပ်နေတာဆိုတော့ စစ်ခွေးတွေ အထိနာလို့ လေယာဥ်ပါ သုံးလာတာ” ဟု ဒေသခံ ပြည်သူ တစ်ဦးကပြောဆိုသည်။

ကိုးတောင်ဘို့ရွာတွင် အကြမ်းဖက် စစ်တပ်က ၂ လ ကျော်ကြာ တပ်စွဲထားပြီး အနီးအနားဝန်းကျင်ရှိ ကျေးရွာများကိုပါ ဝင်ရောက် စီးနင်း ဖျက်ဆီးနေကြောင့် ဒေသခံကာကွယ်ရေး တပ်ဖွဲ့များက စစ်တပ် တပ်စွဲထားသော နေရာကို ဝင်ရောက် တိုက်ခိုက်နေခြင်း ဖြစ်ကြောင်း သိရသည်။ khit thit

ရှမ်းပြည်နယ်တောင်ပိုင်း ဓနုကိုယ်ပိုင်အုပ်ချုပ်ခွင့်ရဒေသ ပင်းတယမြို့နယ်တွင် စစ်ကောင်စီတပ်က အပြစ်မဲ့ပြည်သူများအား မတရားဖမ်းဆီးနှိပ်စက်မှုများ ဆက်တိုက်ပြုလုပ်နေရာ ဇွန်လ ၁ ရက် ညပိုင်းတွင် ဖမ်းဆီးခံရသူ စုစုပေါင်း ၁ဝ ဦး ခန့်ထိရှိနေကြောင်း သိရသည်။

ဖမ်းဆီးခံရသူများမှာ ကျောက်စုရွာမှ လေးဦး၊ ကျောက်တစ်လုံးရွာမှ တစ်ဦး၊ တောင်ပေါ်ကြီးရွာမှ တစ်ဦး၊ ထွက်နီရွာမှ တစ်ဦး၊ မြိုပေါ်ကုန်းရပ်ကွက်မှ တစ်ဦး၊ ဈေးတန်းမှတစ်ဦးနှင့် ရှမ်းရပ်မှ ဆရာမတစ်ဦး စုစုပေါင်း ၁၀ ဦး အဖမ်းခံထားရကြောင်း သိရသည်။

“ အဖမ်းခံရတဲ့သူတွေက လူလတ်ပိုင်းနဲ့ လူငယ်အများစု ပါဗျ။ အမျိုးသမီးနဲ့ အမျိုးသားက တစ်ဝက်စီ လောက်ပါပဲ။ လက်ရှိအချိန်အထိ ပြန်မလွှတ်သေးဘူးလို့ သိရပါတယ်။ အကြောင်းရာတိတိကျကျမရှိ။ ထင်ရာမြင်ရာဖမ်းတဲ့သဘောပါ။ အဲဒီထဲက တစ်ယောက် နှစ်ယောက်လောက်ကတော့ ရှေ့ရက်တွေ ကတည်းက အဖမ်းခံရတယ်ပြောတယ်။ အများစုကတော့ ဇွန်လ ၁ ရက်နေ့မှာ သူတို့ရဲ့နေအိမ်တွေမှာ အဖမ်းခံရတာပါ” ဟု ဒေသခံတစ်ဦးက မဇ္ဈိမကို ပြောသည်။

ဖမ်းဆီးခံရသူများထဲတွင် အသက် ၃၀ အရွယ် CDM ဆရာမတစ်ဦးနှင့် အသက် ၄၀ အရွယ် ပြင်ပတွင် ကျူရှင်သင်ကြားပေးနေသော ဆရာမတစ်ဦးတို့ပါဝင်ကြောင်း၊ ကျန်သူများမှာ မိမိကိုယ်ပိုင်လုပ်ငန်း လုပ်ကိုင်သူများဖြစ်ကြောင်း သိရသည်။

“ အဖမ်းခံရတဲ့ ဈေးတန်းရှမ်းရပ်က ဆရာမက အပြင်ကျူရှင်သင်တဲ့ဆရာမပါ။ အဆောင်လည်းဖွင့်ထား တယ်။ ကျောက်တစ်လုံးရွာက CDM ဆရာမက အသက် ၃၀ အရွယ်ပါ။ ကျန်တဲ့သူတွေကတော့ နယ်ဖက် ကဆိုတော့ ကိုယ့်အိမ်အလုပ်ကိုလုပ်ကြတဲ့သူတွေပါ” ဟု ဒေသခံတစ်ဦးက ဆိုသည်။

ဓနုဒေသတွင်းတော်လှန်ရေးလှုပ်ရှားမှု ခေတ္တငြိမ်သက်သွားချိန်တွင် ရွာငံ၊ ပင်းတယ နှစ်မြို့နယ်ရှိ အပြစ်မဲ့ ပြည်သူများအား စစ်ကောင်စီမှ ဆက်တိုက်ဖမ်းဆီးနှိပ်စက်မှုများ လုပ်ဆောင်လာနေသောကြာင့် ပြည်သူ များအနေဖြင့် အထူးဂရုစိုက်ကြရန်လိုအပ်ကြောင်း တပ်တွင်းသ တင်းပေးဖရဲသီးတစ်ဦးက ဒေသတွင်း မီဒီယာများသို့ ပြောကြားထားကြောင်းလည်း သိရသည်။ mizzima

ဧရာဝတီတိုင်း၊ ဟင်္သာတမြို့နယ်၊ ယုံသလင်းကျေးရွာ အထက်တန်းကျောင်းမှာ ဇွန် ၁ ရက် ည ၉ နာရီကျော်ကဖြစ်ပွားခဲ့တဲ့ ဗုံးပေါက်ကွဲမှုဟာ တော်လှန်ရေးအင်အားစုတွေ ဆောင်ရွက်ခဲ့တာမဟုတ်ဘူးလို့  ဟင်္သာတမြို့နယ် ပြည်သူ့ကာကွယ်ရေးအဖွဲ့က ပြောပါတယ်။

NUG အစိုးရ ချမှတ်ထားတဲ့ မူဝါဒလမ်းစဉ်တွေအတိုင်း အစဉ်တစိုက် လိုက်နာဆောင်ရွက်သွားမှာဖြစ်ပြီး အပြစ်မဲ့ပြည်သူတွေ ထိခိုက်မယ့်လုပ်ရပ်တွေကို လုပ်ဆောင်မှာမဟုတ်ကြောင်း ဟင်္သာတမြို့နယ် ပြည်သူ့ကာကွယ်ရေးတပ်ဖွဲ့က   ဇွန် ၂ ရက်က ပြည်သူတွေကို အသိပေး ထုတ်ပြန်ထားပါတယ်။

ဟင်္သာတမြို့နယ်၊ ယုံသလင်းကျေးရွာ အထက်တန်းကျောင်းမှာ ဇွန် ၁ ရက် ည ၉ နာရီကျော်က ၁၀ တန်း ကျောင်းအဆောင်ဘက်မှာ ဗုံးပေါက်ကွဲမှု ဖြစ်ပွားခဲ့တယ်လို့ ဒေသခံတွေက ပြောပါတယ်။

ဒေသခံတဦးက  “ဗုံးပေါက်ကွဲချိန်မှာ သူတို့လုံခြုံရေးတွေရှိတယ်။ လူတော့ ထိခိုက်တာ မကြားရဘူး။ ပေါက်တာ ၁၀ တန်းတွေသင်တဲ့အနားက နေရာမှာဖြစ်တာ” လို့ ဆိုပါတယ်။

ပြည်သူတွေနဲ့  တော်လှန်ရေးအင်အားစုတွေကြား သွေးခွဲတဲ့လုပ်ရပ်ကို အကြမ်းဖက်စစ်ကောင်စီနဲ့ လက်အောက်ခံအဖွဲ့တွေ ထပ်မံပြုလုပ်လာနိုင်တဲ့အတွက် ဟင်္သာတမြို့ ပြည်သူတွေ အထူးဂရုစိုက်နေထိုင်ဖို့ ဟင်္သာတပြည်သူ့ကာကွယ်ရေးတပ်ဖွဲ့က အသိပေး ထုတ်ပြန်ထားပါတယ်။

အခုဗုံးပေါက်ကွဲမှုဟာ ဧရာဝတီတိုင်းအတွင်း အထက်တန်းကျောင်းတွေမှာ ပထမဆုံးအကြိမ် ဖြစ်တယ်လို့ သိရပါတယ်။ DVB

စစ်ကိုင်းတိုင်း ဝက်လက်မြို့နယ် ကျောက်တိုင်ရွာကို အကြမ်းဖက် စစ်တပ်က ဇွန်လ ၁ ရက်နှင့် ၂ ရက်နေ့တို့တွင် ဝင်ရောက်စီးနင်း မီးရှို့ဖျက် ဆီးခဲ့ပြီး ပြည်သူပိုင် နေအိမ် ၁၀၀ ကျော် မီးလောင်ပြာကျခဲ့ကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

အကြမ်းဖက် စစ်တပ်သည် ကျောက်တိုင်ရွာကို ဇွန်လ ၁ ရက်နေ့ ညနေပိုင်းနှင့် ဇွန်လ ၂ ရက် နံနက်ပိုင်းတို့တွင် မီးရှို့ဖျက်ဆီး ခဲ့ခြင်းဖြစ်ကာ ကျေးရွာ အနောက်ခြမ်းရှိ ပြည်သူပိုင် နေအိမ် ၁၀၀ ကျော် မီးလောင် ပြာကျခဲ့ခြင်း ဖြစ်ကြောင်း သိရသည်။

“ဇွန်လ ၁ ရက်နဲ့ ၂ ရက်နေ့တွေမှာ စစ်ခွေးတွေ ဝင်စီးပြီး မီးရှို့သွားတာ ကျေးရွာ အနောက်ခြမ်းက နေအိမ် ၁၀၀ ကျော် မီးလောင်ပြာကျသွားတယ်” ဟု ဒေသခံ ပြည်သူဘတစ်ဦးကပြောဆိုသည်။

လက်ရှိချိန်တွင် ဒေသခံ ပြည်သူများသည် စားသောက်ကုန် ပစ္စည်းနှင့် အဝတ်အထည်များ လိုအပ် လျက်ရှိပြီး မိုးတွင်းကာလ ဖြစ်သောကြောင့် အမိုးအကာ ပစ္စည်းများလည်း အရေးပေါ် လိုအပ်လျက်ရှိကြောင်း သိရသည်။

စစ်ကိုင်းတိုင်း တန့်ဆည်မြို့နယ် ထန်းပင်ဆိပ် ရွာကိုလည်း အကြမ်းဖက် စစ်တပ်က ယနေ့ ဇွန်လ ၃ ရက်နေ့တွင် ရွာလုံးကျွတ် မီးရှို့နေကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

အကြမ်းဖက် စစ်တပ်သည် ထန်းပင်ဆိပ်ရွာကို ဇွန်လ ၂ ရက်နေ့က စတင် ဝင်ရောက် စီးနင်းခဲ့ပြီး ပြည်သူပိုင် ပစ္စည်းများကို ခိုးယူ လုယက်ကာ ဇွန်လ ၃ ရက်နေ့တွင် ရွာလုံးကျွတ် မီးတင်ရှို့နေ​ခြင်းဖြစ်ကြောင်း သိရသည်။

” စစ်ခွေးတွေက ထန်းပင်ဆိပ်ရွာမှာရှိတဲ့ ပြည်သူပိုင် ပစ္စည်းတွေကို အကုန် ခိုးယူပြီးမှ ရွာကို မီးရှို့ဖျက်ဆီးတာ ရွာလုံးကျွတ်ကို ရှို့တာ အိမ်ခြေ တော်တော်များလိမ့်မယ်။ အတိအကျတော့ မသိရသေးဘူး” ဟု ဒေသခံ ပြည်သူ တစ်ဦးကပြောဆိုသည်။ khit thit

စစ်ကိုင်းတိုင်း၊ မုံရွာမြို့သို့ဝင်ရောက်သည့် စစ်ဆေးရေးဂိတ်များတွင် စစ်ကောင်စီတပ်သားများသည် လမ်း သွားလမ်းလာအမျိုးသမီးများကို ကာယိန္ဒြေပျက်ပြားသည်အထိ ပြုမူပြောဆိုနေကြကြောင်း ဒေသခံများ ထံမှ သိရသည်။

“မုံရွာအထွက်ဂိတ်တွေအားလုံးထဲမှာ မုံရွာတောင် မအူမြို့ဝင်ဂိတ်ကအဆိုးဆုံးဗျ။ အထူးသဖြင့် ညနေပိုင်း မှာ ပိုဆိုးတယ်။ အဲဒီအချိန်ဆို သူတို့က မူးရူးနေကြပြီ” ဟု ဒီမိုကရေစီကိုကူညီကြသူများကွန်ယက် The Helper of perfect democracy တည်ထောင်သူ ကိုစိုးဝင်းဆွေမှ ပြော သည်။

စစ်ဆေးရေးဂိတ်များတွင် ဆိုင်ကယ်များကို ဆင်းတွန်းရပြီး ကားပေါ်မှလူများလည်း လမ်းဆင်းလျှောက်ရ ကြောင်း၊ ညနေစောင်း အမျိုးသမီးများအလုပ်ဆင်းချိန်တွင် စစ်ဆေးရေးဂိတ်ရှိ စစ်ကောင်စီတပ်သားများ မှာ မူးရူးနေကြပြီး မကြားဝံ့မနာသာ စကားလုံးများဖြင့် ပြောဆိုခံကြရကြောင်း၊ ယင်းအမျိုးသမီးများက ၎င်းထံ တိုင်ကြားထားကြောင်း သိရသည်။

“ကျွန်မဆိုင်ကယ် ဆင်းတွန်းနေတုန်း စခ(စစ်ကောင်စီတပ်သား) တစ်ကောင် အနားနား အတင်းကပ်လာ ပြီး ဒါမျိုးလေးမှကြိုက်တာလို့ ကပ်ပြောတယ်။ ကျွန်မဖြင့် စိတ်တိုလိုက်တာ အသားတွေပါတုန်တယ်” ဟု ကိုယ်တွေ့ကြုံရသူ အမျိုးသမီးတစ်ဦးက ဒီမိုကရေစီကို ကူညီကြသူ များကွန်ယက် The Helper of perfect democracy ထံ သတင်းပေး တိုင်းကြားထားသည်။

ကိုယ်တိုင်ကြုံခဲ့ရသူ အခြားအမျိုးသမီးတစ်ဦးကလည်း “ ညနေစောင်းအလုပ်ပြန်လို့ ဂိတ်ကိုဖြတ်ရင် သူတို့တွေ အမြဲမူးရူးနေကြတယ်။ ကိုယ့်ရှေ့ကမိန်းကလေးတွေဆိုလည်း နှောက်ယှက်ခံရတယ်၊ ကိုယ့် လည်း အနားအတင်းကပ်လာလို့ အမြန်ရှောင်ပြီး သွက်သွက်ထွက်လာရတယ်။ နောင်များတော့ ဝေးချင် ဝေးပါစေ၊ တခြားလမ်းကပဲ ကွင်းသွားတယ်။ အဲဒီဂိတ်ကို လုံးဝမဖြတ်တော့ဘူး” ဟု ဒီမိုကရေစီကိုကူညီ ကြသူများကွန်ယက် The Helper of perfect democracy ထံ အမျိုးသမီးတစ်ဦးက သတင်းပေး တိုင်ကြား ထားသည်။

အမျိုးသမီးအများစုမှာ ထိုသို့ နှောက်ယှက်ပြောဆိုခံကြရသော်လည်း အရှက်၊ အကြောက်ကြီးမားပြီး ထုတ်၍ မပြောဆိုသူများလည်းရှိကြောင်း သိရသည်။

ထို့အပြင် စစ်ဆေးရေးဂိတ်များတွင် ဆိုင်ကယ်ဦးထုတ်၊ လိုင်စင် စသဖြင့် ယာဉ်စည်းကမ်းများ အကြောင်း ပြ၍ ကိုယ်ထိလက်ရောက် ရိုက်နှက်ခြင်း၊ ငွေတောင်းခံခြင်းများလည်း တွေ့ကြုံနေရကြောင်း သိရသည်။

မုံရွာမြို့သို့ ဝင်ရောက်ရာတွင် တောင်ဘက်တွင် မအူဂိတ်၊ အနောက်ဘက်နှင့်မြောက်ဘက်မှဝင်ရောင် လျှင် အလုံသုံးမြှောင့်ချွန်းဂိတ်နှင့် အရှေ့ဘက်တွင် မိုးကောင်းဘုရားထိပ် ကျောက်ကာလမ်းနှင့် ရံဖန်ရံခါ ဆွမ်းအုပ်ကြီးအဝိုင်းတို့၌ စစ်ဆေးလေ့ရှိကြောင်းဆိုသည်။

ယခုကဲ့သို့ ကျူးလွန်မှုများအား အရေးယူတားမြစ်ခြင်း မပြုလုပ်ပါက ပို၍ အခြေအနေဆိုးလာနိုင်သည်ဟု The Helper of perfect democracy တည်ထောင်သူက သုံးသပ်ပြောဆိုသည်။ mizzima

စစ်အာဏာသိမ်းပြီးနောက်ပိုင်း ရခိုင်ပြည်နယ်ရှိ  စီးပွားရေးနဲ့ ဆောက်လုပ်ရေး လုပ်ငန်းရှင်တွေဟာ ဘဏ်တွေမှာအပ်နှံထားတဲ့ ငွေသားထုတ်ယူရာမှာ ဘဏ်ပွဲစားတွေကို ကော်မရှင်ကြေး ၄ ရာခိုင်နှုန်းအထိ ပေးနေရတယ်လို့ စီးပွားရေးလုပ်ငန်းရှင်တွေက ‌ပြောပါတယ်။

ရခိုင်ပြည်နယ်မှာ ဆောက်လုပ်ရေးလုပ်ငန်း လုပ်နေသူတဦးက “ဆောက်လုပ်ပြီးစီးသွားတဲ့ လမ်း၊ တံတား၊ အဆောက်အအုံ စတာတွေအတွက် သက်ဆိုင်ရာဝန်ကြီးဌာနကနေ ငွေထုတ်ယူရာမှာ မြန်မာ့စီးပွားရေးဘဏ်ကသာ ထုတ်ယူဖို့ ချလန်ထုတ်ပေးကြတာလေ။ ဘဏ်ကိုသွားထုတ်တော့ ငွေသားမရှိဘူးလို့ မန်နေဂျာက ပြောတယ်။ တပတ်မှာ ဘယ်လောက်သာ ထုတ်လို့ရမယ်လို့ပြောတယ်။ သူတို့နဲ့ချိတ်ထားတဲ့ ဘဏ်ပွဲစားနဲ့ဆို ငွေသားထောင်ဂဏန်းအထိ အလွယ်တကူထုတ်လို့ရတယ်။ သိန်း ၁,၀၀၀ ကို ပွဲစားခ သိန်း ၄၀ ပေးရတယ်” လို့ ပြောပါတယ်။

အဲဒီလို ငွေသားထုတ်ယူရာမှာ ရခိုင်ပြည်နယ်မှ မြန်မာ့စီးပွားရေးဘဏ်တွေသာမက ပုဂ္ဂလိဘဏ်တွေမှာပါ ပွဲစားတွေဆီကသာ ငွေသားအများအပြား ထုတ်ယူနိုင်တာကြောင့် ကုန်သည်တွေအနေနဲ့ အလွန်အခက်တွေ့နေရတယ်လို့ စီးပွားရေးလုပ်ငန်းရှင်တဦးက ပြောပါတယ်။

“ပုဂ္ဂလိကဘဏ်တွေကလည်း တရားဝင်ထုတ်မယ်ဆို ငွေသားမရှိပါ။ တပတ် ဘယ်လောက်ထုတ်ပါ။ ပွဲစားနဲ့ထုတ်ရင် ငွေသိန်း ၅၀၀ လောက်ကတော့ ချက်ချင်းထုတ်နိုင်တယ်။ ဒီလို ငွေသားတွေရဖို့ ကော်မရှင်တွေ ပေးနေရတော့ လုပ်ငန်းမှာ အမြတ်က မရှိတော့ဘူး။ လုပ်ငန်းလည် ပတ်ဖို့ကလည်း ငွေသားမရှိလို့ မဖြစ်ပြန်ဘူးဆိုတော့ တော်တော်လေး အခက်တွေ့နေရတယ်။”

လက်ရှိ ရခိုင်ပြည်နယ်အတွင်းက စီးပွားရေးနဲ့ ဆောက်လုပ်ရေးလုပ်ငန်းရှင်တွေဟာ ရခိုင်ပြည်နယ်အနှံ့ရှိ ဘဏ်ပွဲစားတွေနဲ့ ချိတ်ဆက်ကာ ငွေထုတ်ယူနိုင်တဲ့ မြို့နယ်ဘဏ်ခွဲတွေကို လွှဲ‌ပြောင်းထုတ်ယူနေကြရတယ်လို့ ဆိုပါတယ်။

လုပ်ငန်းရှင်တဦးက “ဟုတ်တယ်၊ စစ်တွေ ဘဏ်ပွဲစားက အဆင်မပြေရင် သူက ကျောက်တော်ဘဏ်ခွဲ၊ မြောက်ဦးဘဏ်ခွဲ၊ စသည် ရခိုင်ပြည် နယ်အနှံ့က ဘဏ်ပွဲစားတွေနဲ့ ချိတ်ဆက်ပေးတယ်။ ငွေသားကလည်း အရေးပေါ်လိုနေတော့ သူတို့ကို ကော်မရှင်ရာခိုင်နှုန်းတိုးပေးပြီး ထုတ်ရတာလည်းရှိတယ်” လို့ ပြောပါတယ်။

အဲဒီလို ဘဏ်မန်နေဂျာတွေနဲ့ ချိတ်ဆက်ပြီး ငွေထုတ်ရာမှာ ရာခိုင်နှုန်းအလိုက် ကော်မရှင်ရယူ လုပ်စားနေကြတဲ့ ပွဲစားတွေနဲ့ ဘဏ်မန်နေဂျာတွေကို ထိရောက်စွာ အရေးယူပေးဖို့လိုကြောင်း စီးပွားရေးလုပ်ငန်းရှင်တွေက လိုလားနေကြပါတယ်။ DVB

အကြမ်းဖက် စစ်ရာဇဝတ်ကောင် မင်းအောင်လှိုင် ဦးဆောင်တဲ့ စစ်ကောင်စီက ပြည်သူလူထုဘက်မှ တော်လှန် တိုက်ပွဲဝင်နေသော ရဲဘော်များကို ဖမ်းဆီး၍ ဥပဒေမဲ့ သေဒဏ်ချထားမှုများစွာ လုပ်ဆောင်လျက်ရှိသည်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စာရင်းများအရ ထိုပြစ်ဒဏ်ကျခံရသူထဲမှ အ သက် ၁၈ နှစ်အောက် ကလေး (၂) ဦး အပါအဝင် (၇၂) ဦးမှာ သေဒဏ်ချမှတ်ခံထားရသည်။ မျက်ကွယ် သေဒဏ်ချမှတ်ခြင်းခံထားရသူ (၄၁) ဦး အပါအဝင် (၁၂၀) ဦးမှာ မျက်ကွယ် ပြစ်ဒဏ်ချမှတ်ခြင်းခံထားရသည်။ ထိုကြောင့် သေဒဏ်ချမှတ်ခံထားရသူ စုစုပေါင်း (၁၁၃) ဦးရှိပြီဖြစ်သည်။

အကြမ်းဖက်စစ်ကောင်စီသည် နိုင်ငံတော်အာဏာကို ဥပဒေမဲ့ သိမ်းယူခဲ့ပြီး အပြစ် မဲ့ ပြည်သူထောင်ချီကို ပုံစံမျိုးနှင့် သတ်ဖြတ်ခဲ့သည်။ ယခုအခါ လူထုဘက်တော်သား တော်လှန်ရေး ညီနောင် ရဲဘော်များကို သေဒဏ်စီရင်ရန် ထုတ် ဖော်ပြောဆိုလာခြင်းမှာ တော်လှန်ရေး အင်အားစုများနှင့် ပြည်သူလူထုကို ထပ် မံစိန်ခေါ်ခြင်းပင်ဖြစ်သည်။

အကြမ်းဖက် ပြောခွင့်ရ ဇော်မင်းထွန်း၏ အဆိုအရ ကိုဂျင်မီ၊ ကိုဇေယျာသော်၊ ကိုလှမျိုးအောင်၊ ကိုအောင်သူရဇော်တို့ကို သေဒဏ်အတည်ပြုကြောင်း မီဒီယာများက ရေးသားကြသည်။ သေဒဏ်အတည်ပြုပြီး အကျဉ်းဦးစီးဌာနက သေ ဒဏ်ပေးလိမ့်မည်ဟု အကြမ်းဖက် ပြောခွင့်ရ ဇော်မင်းထွန်းက ဆိုသည်။

ဖမ်းဆီးထားသည့် လူထုဘက်တော်သား ရဲဘော်များကို သတ်ဖြတ်ခြင်းသည် တရားမဝင် အာဏာသိမ်းစစ်တပ်အနေဖြင့် စစ်ရာဇဝတ်မှုနှင့် လူသတ်မှုကို စိန်ခေါ် ကျူးလွန်ခြင်းပင်ဖြစ်သည်။

လူမျိုးတုန်းသတ်ဖြတ်နေသော စစ်ကောင်စီသည် တရားမဝင် လက်နက်ဖြင့် အာဏာရယူထားသော ရာဇဝတ်လူဆိုးဂိုဏ်းသာဖြစ်ရာ လူထုဘက်တော်သားများကို သတ်ဖြတ်ပါလျှင် စစ်ကောင်စီခေါင်းဆောင် မင်းအောင်လှိုင်၊ စိုးဝင်း၊ ခေါင်းဆောင်များ၊ မိသားစု၊ ဆွေမျိုးများ၏ အနာဂတ်လည်း အဆုံးသတ် မကောင်းနိုင်သည်မှာ အသေအချာပင်ဖြစ်သည်။

မင်းအောင်လှိုင်၊ စိုးဝင်း၊ စစ်ခေါင်းဆောင်အားလုံးအနေဖြင့် လူထုဘက် တော်သားများကို သတ်ဖြတ်မည်ဆိုလျှင် တစ်ချိန်က အီရတ်အာဏာ ရှင် ဆဒမ်ဟူစိန်၊ လစ်ဗျား အာဏာရှင်ဟောင်း ကဒါဖီတို့ကဲ့သို့ မလှမပ သေဆုံး အဆုံးသတ်မည်ကို ကြိုတွေးထားရန်လိုပါလိမ့်မည်။

မင်းအောင်လှိုင်၊ စိုးဝင်းနှင့်စစ်ခေါင်းဆောင်များ၏ မိသားစု ဆွေမျိုးများအနေ ဖြင့်လည်း ယင်းကဲ့သို့သော အသေဆိုးသည့် အနာဂတ်ဆိုးများ ရောက်လာမည်။ ဆွေစဉ်မျိုးဆက် လူထု၏ အမုန်းတရားနှင့် ကလဲ့စားချေမှုကို ရင်ဆိုင်ရမည်။

လူထုသည် သည်းခံနေမည်မဟုတ်သကဲ့သို့ ငြိမ်ခံနေမည်လည်းမဟုတ်ပါ။ မင်းအောင်လှိုင်၊ စိုးဝင်းနှင့် စစ်ခေါင်း ဆောင်များနှင့် စစ်တပ်အသိုင်းအ၀ိုင်းအတွက် တန်ပြန်သော သေဒဏ် ပြစ်ဒဏ်များကို လူထုက မလွဲမသွေ ယူဆောင်လာမည်မှာ အသေအချာပင်ဖြစ်သည်။ khit thit