Monthly Archives: Jun 2022

ရွှေဘို မြို့မရဲစခန်းကို ကာကွယ်ရေးပူးပေါင်းတပ်ဖွဲ့က ၄၀ မမ ဗုံးသီးများဖြင့် ပစ်ခတ်ရာ အထိအခိုက်ရှိနိုင်ဟုဆို

စစ်ကိုင်းတိုင်း၊ ရွှေဘိုမြို့နယ်ရှိ ရွှေဘို မြို့မရဲစခန်းကို ကာကွယ်ရေးပူးပေါင်းတပ်ဖွဲ့ က ၄၀ မမ ဖြင့် ပစ်ခတ်တိုက်ခိုက်ခဲ့ပြီး စခန်းတွင်းရှိ စစ်ကောင်စီတပ်ဖွဲ့ဝင်များ အထိအခိုက်ရှိနိုင်ကြောင်း Black Wolf PDF ထံမှ သိရသည်။

ရွှေဘိုမြို့မရဲစခန်းကို Black Wolf PDF မှ အထူးတပ်သားများနှင့် ရွှေဘိုခရိုင် တပ်ရင်း(၅) တပ်ခွဲ(၁) တို့ ပူးပေါင်းကာ မေလ ၇ ရက် နံနက်ပိုင်းက သွားရောက် တိုက်ခ်ိုက်ခဲ့ခြင်း ဖြစ်သည်။

“ရွှေဘို မြို့မရဲစခန်းကို မေလ ၇ ရက်နေ့ မနက် ၄ နာရီလောက်မှာ ကျွန်တော်တို့ ကာကွယ်ရေး ပူးပေါင်းတပ်ဖွဲ့တွေ သွားရောက်တိုက်ခိုက်ခဲ့တာဖြစ်ပါတယ်။ စခန်းနဲ့ မီတာတစ်ရာ အကွာအဝေးကနေ ၄၀ မမ ငါးလုံး နဲ့ ပစ်ခတ်တိုက်ခိုက်ခဲ့တာပါ။ စခန်းအတွင်း နေရာစုံကို ကျရောက်ခဲ့ပြီး အထိအခိုက်စာရင်းတော့ မသိရသေးပါဘူး” ဟု Black Wolf PDF မှ တာဝန်ရှိသူ တစ်ဦးက ပြောသည်။

၄၀ မမ ဗုံးသီး ငါးလုံးဖြင့် ပစ်ခတ်တိုက်ခိုက်မှုအတွင်း ရဲစခန်းတွင်းမှ ပြန်လည်ပစ်ခတ်မှုများ ပြုလုပ်နိုင်ခဲ့ခြင်း မရှိခဲ့ဘဲ ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။

ပစ်ခတ်တိုက်ခိုက်မှုကြောင့် စခန်းတွင်းရှိ စစ်ကောင်စီတပ်ဖွဲ့ဝင်များ၏ ထိခိုက်သေဆုံးမှုနှင့် အပျက်အစီး အခြေအနေများကို အသေးစိတ် မသိရှိရသေးကြောင်းလည်း Black Wolf PDF တာဝန်ရှိသူက ဆိုသည်။

ရွှေဘိုမြို့မရဲစခန်းတွင် စခန်းချနေထိုင်လျက်ရှိသည့် စစ်ကောင်စီတပ်နှင့် ရဲများသည် ရွှေဘိုမြို့နယ်အတွင်းရှိ ပြည်သူများကို ဖိနှိပ်ခြင်း နှင့် စစ် ဆေးမှုများတွင် ဖိအားပေးခြိမ်းခြောက်ခြင်းများ ပြုလုပ်နေသောကြောင့် တိုက်ခိုက်ရခြင်း ဖြစ်ကြောင်း ကာကွယ်ရေးတပ်ဖွဲ့များက သတင်းထုတ်ပြန်ထားသည်။

လက်ရှိအချိန်တွင် စစ်ကောင်စီတပ်က ရွှေဘိုမြို့အတွင်း လုံခြုံရေး တိုးမြင့်ချထားကာ စစ်ဆေးမှုများ တင်းကျပ်စွာ လုပ်ဆောင်နေကြောင်း ဒေသခံများထံမှ သိရသည်။ mizzima

ဗန်းမောက်မြို့နယ်၌ လောင်းကစားဝိုင်းများ ပိုမိုများပြားလာ

စစ်ကိုင်းတိုင်း၊ ကသာခရိုင်၊ ဗန်းမောက်မြို့နယ်မှာ လောင်းကစားဝိုင်းတွေ မပြုလုပ်ဖို့ ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့က ဇွန် ၄ ရက်က တားမြစ်စာထုတ်ထားပေမဲ့ ဆက်လက်ပြုလုပ်နေကြပြီး လောင်းကစားနည်းတွေ၊ ကစားဝိုင်းတွေ ပိုတိုးလာနေတယ်လို့ ဒေသခံတွေက ပြောပါတယ်။

ဒေသတွင်းနေထိုင်သူတဦးက “ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့က အသိပေးကြေညာချက် ထုတ်ထားတယ်လို့တော့ သိရတယ်။ ထိရောက်‌အောင် အရေးယူစေချင်တယ်” လို့ ဒီဗွီဘီကို ပြောပါတယ်။

ဗန်းမောက်မြို့နယ်အတွင်း ခိုးမှု၊ လုယက်မှု၊ လူသတ်မှု၊ ဓားပြတိုက်မှုတွေ မကြာခဏဖြစ်ပွားနေပြီး မူးယစ်ဆေးဝါး ရောင်းချသုံးစွဲသူတွေလည်း တနေ့တခြား များလာတယ်လို့ ဒေသခံတွေက ဆိုပါတယ်။

အသိပေးကြေညာစာထုတ်တဲ့နေ့ကစပြီး ပိတ်သိမ်းရမယ်၊ လိုက်နာဆောင်ရွက်ခြင်းမရှိရင် ပြင်းပြင်းထန်ထန် အရေးယူ ဆောင်ရွက်သွားမယ်လို့ ဗန်းမောက်မြို့နယ် ပြည်သူ့အုပ်ချုပ်ရေးအဖွဲ့က အသိပေး ကြေညာထားပါတယ်။

စစ်ကောင်စီက အာဏာသိမ်းပြီးနောက် နေရာဒေသအနှံ့အပြားမှာ ၆ ကောင်ဝိုင်း (ဂလုံး ဂလုံး)၊ ၄ ကောင်ဂျင်၊ ပေါက်စီ၊ ဖဲဝိုင်း၊ ကြက်ဝိုင်း၊ ဘော လုံး၊ နှစ်‌လုံး၊ သုံးလုံး လောင်းကစားနည်းမျိုးစုံကို ဒေသတွင်း သက်ဆိုင်ရာအဖွဲ့အစည်းတွေထံ ငွေပေးပြီး   ပြုလုပ်နေကြပါတယ်။ DVB

ပုလောမြို့နယ်တွင် ရွာ ၂ ရွာကို စစ်ကောင်စီဖွဲ့ စစ်ကြောင်းထိုး ပစ်ခတ်နေ၍ ဒေသခံများ တိမ်းရှောင်နေရ

တနင်္သာရီတိုင်း၊ မြိတ်ခရိုင်၊ ပုလောမြို့နယ်ရှိ ရွာ နှစ်ရွာကို စစ်ကောင်စီတပ်က ယနေ့ ဇွန်လ ၈ ရက်နေ့ နံနက်ပိုင်းက စစ်ကြောင်းထိုး ဝင်ရောက် ပစ်ခတ်မှုကြောင့် ဒေသခံများ ထွက်ပြေး တိမ်းရှောင်နေရကြောင်း ပြည်သူ့ကာကွယ်ရေးတပ်ဖွဲ့ဝင်များထံက သိရသည်။

ပုလောမြို့နယ် နန်းတောင်ကျေးရွာအုပ်စုရှိ KNU ထိန်းချုပ်နယ်မြေ ဂျင့်ဂါရွာကို အိမ်စီးကား နှစ်စီး၊ကျောက်တင်ကား တစ်စီးနှင့် စစ်ကောင်စီ တပ်ဖွဲ့ဝင် အင်အား ၈၀ နီးပါးဖြင့် လက်နက်ကြီး၊လက်နက်ငယ်များဖြင့် ပစ်ခတ်ဝင်ရောက်လာကြောင်း ပြည်သူ့ ကာကွယ်ရေး တပ်ဖွဲ့မှ ရဲဘော်တစ်ဦးက ပြောသည်။

ပြည်သူ့ ကာကွယ်ရေး တပ်ဖွဲ့မှ တာဝန်ရှိသူ တစ်ဦးက“စစ်တပ်က ရွာထဲကို စရောက်တာနဲ့ လက်နက်ကြီးတွေနဲ့ ပစ်တာတွေ လုပ်နေတာပါ ။ PDF တွေဘက်ကတော့ ပစ်ခတ်မှုတွေ စ မလုပ်သေးပါဘူး”ဟု ပြောသည်။

ထို့အပြင် ပုလောကုန်းကျေးရွာအုပ်စုရှိ ပုလောကုန်းကျေးရွာတွင် စစ်ကောင်စီနှင့် ပျူစောထီး အဖွဲ သည် ကင်းပုန်းဝပ်ပြီး ပစ်ခတ်မှုများ ပြု လုပ်နေကြောင်း ဒေသခံများထံက သိရသည်။

လက်ရှိတွင် အင်အား ၁၅၀ နီးပါးခန့်ရှိသည့် စစ်ကောင်စီတပ်ဖွဲ့က စစ်ကြောင်း နှစ်ကြောင်းထိုးလာပြီး လက်နက်ကြီး လက်နက်ငယ်များဖြင့် ပစ်ခတ်မှုပြုလုပ်သည့်အပြင် မြိတ်လေတပ်စခန်းမှ ကင်းထောက် လေယာဉ်ဖြင့် ပျံဝဲကာ ထောက်လှမ်းမှုများ ပြုလုပ်နေကြောင်းလည်း ပြည်သူ့ ကာကွယ်ရေး တပ်ဖွဲ့ဝင်များထံက သိရသည်။

“တိုက်ပွဲက အခုအခြေအနေ အရဆိုရင် ပြင်းထန်လာ နိုင်တဲ့ အနေအထား ရှိနေပါတယ်”ဟု ပြည်သူ့ ကာကွယ်ရေး တပ်ဖွဲ့မှ ရဲဘော် တစ်ဦးက ပြောသည်။

ပုလောမြို့နယ်အတွင်း ပြီးခဲ့သည့် ဇွန်လ ၁ ရက်နှင့် ၆ ရက်နေ့တို့တွင် မြိတ်-ထားဝယ် လမ်းပိုင်းရှိ ပုလောဘက်တွင် စစ်ကောင်စီ ယာဉ်တန်း နှစ်ကြိမ် မိုင်းဆွဲ တိုက်ခိုက်ရမှုကြောင့် စစ်ကောင်စီဘက်က ထိခိုက် ၊သေဆုံး ၊ပျက်စီးမှုများရှိကြောင်း ဒေသခံများထံမှ သိရသည်။

မြိတ်-ထားဝယ် လမ်းပိုင်း ပုလောမြို့နယ်ရှိ ကျေးရွာများတွင် စစ်ကောင်စီ ယာဉ်တန်းများသည် မကြာခဏ မိုင်းဆွဲတိုက်ခိုက်ခံရပြီး တိုက်ပွဲများ ဖြစ်ပွါးလေ့ရှိသည်။ mizzima

ရန်ကုန်တွင် စက်သုံးဆီဂယက်ကြောင့် CNG တက္ကစီအုံနာကြေးတိုးမြှင့်၊ တက္ကစီငှားခ မြင့်တက်

စက်သုံးဆီစျေးနှုန်း မြင့်တက်လာတဲ့ အကျိုးဆက်ကြောင့် CNG သုံး တက္ကစီ အငှားယာဉ်ပိုင်ရှင်တွေက အုံနာကြေးကို တရက်လျှင် ကျပ် ၂၀,၀၀၀ အထိ တိုးမြှင့်လာကြတယ်လို့ CNG နဲ့အသုံးပြုနေတဲ့ အငှားယာဉ်မောင်းတွေက ပြောပါတယ်။

ရန်ကုန်စက်သုံးဆီစျေးကွက်မှာ ဓာတ်ဆီအမျိုးအစားက အရောင်းဆိုင်တိုင်းမှာ ရောင်းချပေးနိုင်ခြင်း မရှိတဲ့အပြင် စျေးနှုန်းကလည်း တလီတာကို အမျိုးအစားအပေါ် မူတည်ပြီး ကျပ် ၂၂၀၀ ကျော် မှ ၂၃၀၀ ကျော်အထိ ရှိလာပါတယ်။

ဒါကြောင့် အငှားယာဉ်မောင်းတွေက စျေးကွက်မှာ စက်သုံးဆီစျေးနှုန်း မြင့်တက်လာမှုနဲ့အတူ ရှားပါးလာတဲ့ ပြဿနာ အခက်အခဲကြောင့် CN G သုံး အငှားယာဉ်တွေကို ဦးစားပေး လိုက်လံ ရှာဖွေလာတဲ့အတွက် CNG သုံး အငှားယာဉ်ပိုင်ရှင် တွေက အုံနာကြေးကို အရင်နှုန်းထားထက် တိုးမြှင့်လာတာပါ။

CNG သုံးအငှားယာဉ်မောင်းတဦးက “ဆီစျေးတွေ တက်သွားတော့ အုံနာကြေးကို တိုးတောင်းတာပေါ့။ အုံနာကြေးက ကားအပေါ်မှာတော့ မူတည်တယ်။ ကားကောင်းရင် ကောင်းသလို၊ ကားစုတ်ရင် စုတ်သလိုပေါ့။ CNG ကား အုံနာကြေးက အရင် တရက်ကို တသောင်း နဲ့ တသောင်းခွဲ ကြားပဲ ရှိတာ။ အခုတော့ တရက်ကို တသောင်းခွဲနဲ့ နှစ်သောင်းကြားမှာ ရှိတယ်။ တခုအားသာချက်က ဆီကားထက်စာရင် ခရီးသည်ကို တနေကုန်ပတ်ပြီး ရှာနေလို့ရတယ်။ ဒါပေမဲ့ ဂတ်စ်ကိုတော့ နှစ်ကြိမ် ခွဲထည့်ပေး ရတယ်။ တခါထည့်ရင် ကျပ် ၂၅၀၀ နဲ့ တကြိမ် ထည့်ထားလိုက်လို့ရှိရင် တမနက်တော့ ကောင်းကောင်းသုံးလို့ရတယ်။ ဒါကြောင့်ဘဲ အုံနာကြေးက ဆီကားနဲ့ယှဉ်ရင် နှစ်ဆကျော်လောက် ရှိနေတာ။ ဒါပေမဲ့ အုံနာကြေးကျေအောင်တော့ လောလောဆယ်ပြန်ရှာလို့ ရနေသေးတယ်။ ဆီကားကတော့ အုံနာကြေးက တရက်ကို ကျပ် ၇၀၀၀ နဲ့ ၈၀၀၀ ကြားပဲရှိတယ်” လို့ ဒီဗွီဘီကို ပြောပါတယ်။

တဘက်မှာ စက်သုံးဆီစျေး မြင့်တက်လာတဲ့အတွက် အငှားယာဉ်တွေရဲ့ စျေးနှုန်းကလည်း လိုက်ပါပြောင်းလဲလာတာကြောင့် တက္ကစီ အသုံးပြုသူတွေက ဆီကားထက် CNG ကားကို ဦးစားပေးရွေးချယ်ပြီး အသုံးပြုလာကြပါတယ်။

တက္ကစီကို ပုံမှန်အသုံးပြုနေရတဲ့သူ တဦးက “အရင်က ကျပ် ၁၀၀၀ ၊ ၁၅၀၀ သာရှိတဲ့ ခရီးကို အခုဆိုရင် ကျပ် ၂၅၀၀ တောင်းကြတာနော်။ ဆီစျေးတက်လို့ပါ ဆိုပြီးတော့လေ။ ဆီစျေးတက်တာလည်း သိပါတယ်။ ဒါပေမဲ့ ကိုယ့်မှာလည်း အတိုင်းအထွာနဲ့လေ။ အဲ့တော့ အရေးမကြီးဘူး။ အချိန်ပေးနိုင်တယ်ဆိုရင် ဂတ်စ်ကားကိုပဲ စောင့်ပြီး စီးတော့တယ်။ ဘာလို့လဲဆို ဂတ်စ်ကားနဲ့ ဆိုရင် ၆၀၀၀ တောင်းတဲ့ ခရီးကို ၄၀၀၀ နဲ့ သွားလို့ရတယ်။ သူ့အတွက်လည်း အဆင်ပြေသလို ကိုယ်လည်း အဆင်ပြေတယ်လေ”လို့ ဆိုပါတယ်။

အာဏာသိမ်းစစ်ကောင်စီခန့် ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းက ဆီသိုလှောင်ကန်တွေမှာ ဇွန်လ ၁၆ ရက်အထိ စက်သုံးဆီ အလုံ အလောက် ရှိတဲ့အကြောင်း ဇွန်လ ၁ရက်နေ့က နေပြည်တော်မှာ ပြုလုပ်ခဲ့တဲ့ သတင်းစာရှင်းလင်းပွဲမှာ ပြောဆိုခဲ့ပါတယ်။

ဒါပေမဲ့ ရန်ကုန်မြို့က စက်သုံးဆီအရောင်းဆိုင်တွေမှာ ဒီကနေ့အထိ ဓာတ်ဆီအမျိုးအစားအားလုံး ရောင်းချပေးနိုင်တဲ့ အရောင်းဆိုင်က ရှားပါးနေလို့ ဓာတ်ဆီအသုံးပြုတဲ့ယာဉ်ပိုင်ရှင်တွေဟာ ခက်ခက်ခဲခဲနဲ့ လိုက်လံရှာဖွေနေရဆဲ ရှိနေပါတယ်။ DVB

တရားလွှတ်တော်ရှေ့နေ ဒေါ်ရွက်နုအောင်ကို ၅၀(ည)အမှုအတွက် စတင်ရုံးထုတ် စစ်ဆေးမည်

တရားလွှတ်တော်ရှေ့နေ ဒေါ်ရွက်နုအောင်အား စစ်ကောင်စီက ဖမ်းဆီးစွပ်စွဲထားသော အကြမ်းဖက်ဥပဒေပါ ထောက်ပံ့ပေးခြင်းဆိုင်ရာ ဥပဒေပုဒ်မ ၅၀(ည)အမှုအတွက် ဇွန် ၉ ရက် (မနက်ဖြန်)တွင် စတင်ရုံးထုတ်စစ်ဆေးရန် ရှိနေသည်ဟု မန္တလေး၊ အိုးဘိုအကျဥ်းထောင်တွင်း သတင်းအရင်းအမြစ်က မဇ္စျိမကို ပြောသည်။

” သူ(ဒေါ်ရွက်နုအောင်)ကို မနက်ဖြန်မှာ ရုံးထုတ်စစ်ဆေးမယ်လို့ ကြားထားတယ်။ ဘယ်အချိန်ဘယ်နေရာမှာ ထုတ်မယ်ဆိုတာတော့ သေချာမသိသေးဘူး။ အိုးဘိုအကျဥ်းထောင်ထဲက အထူးတရားရုံးမှာပဲ ရုံးထုတ်ဖို့ များမှာပါ။ အမှုအတွက် စာရွက်စာတမ်းတွေလည်း မိတ္တူကူးဖို့လည်း ရှိနေသေးတော့ လောလောဆယ် ရုံးထုတ်အပြပဲ ရှိမယ်ထင်တယ်။”ဟု သတင်းအရင်းမြစ်က သုံးသပ်ပြောသည်။

ဒေါ်ရွက်နုအောင်က ယင်းအမှုအတွက် ရှေ့နေငှားရမ်းခြင်းမပြုဘဲ၊ ၎င်းကိုယ်တိုင် တရားခွင်အတွင်း ချေပလျှောက်လဲသွားမည်ဖြစ်သည်ဟု မေ၂၇ ရက်တွင် အမည်မဖော်လိုသည့် သတင်းအရင်းအမြစ်တစ်ဦးက မဇ္စျိမကို ပြောကြားထားသည်။

သူမအား ပြီးခဲ့သည့် မေ ၂၆ ရက် ညနေပိုင်းတွင် မန္တလေးမြို့ နန်းတွင်းစစ်ကြောရေးစခန်းမှ အိုးဘိုအကျဉ်းထောင်အတွင်းသို့ ပို့ဆောင်ခြင်း ခံထားရသည်။

တရားလွှတ်တော်ရှေ့နေ ဒေါ်ရွက်နုအောင်သည် မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်အမှုကို လိုက်ပါဆောင်ရွက်နေသူ တစ်ဦးဖြစ်ပြီး၊ ပြီးခဲ့သည့် ဧပြီ ၂၈ ရက်က ဝန်ကြီးချုပ်အမှုအတွက် သွားရောက်စစ်ဆေးခဲ့ပြီး အပြန်တွင် စစ်ကောင်စီက ဖမ်းဆီးခဲ့ခြင်း ဖြစ်သည်။

ထို့နောက် ဒေါ်ရွက်နုအောင်ကို မန္တလေးမြို့ နန်းတွင်းစစ်ကြောရေးသို့ ပို့ဆောင်စစ်ဆေးခဲ့ပြီး တစ်လအကြာတွင် မန္တလေး အိုးဘိုအကျဉ်းထောင်သို့ ပို့ဆောင်ခဲ့ခြင်း ဖြစ်သည်။

ဒေါ်ရွက်နုအောင်သည် ၂၀၁၉ ခုနှစ်အတွင်းက နေပြည်တော် ပုဂ္ဂလိက မူကြိုကျောင်း တစ်ခုတွင် ဖြစ်ပွားခဲ့သော သက်ငယ် လိင်ပိုင်းဆိုင်ရာ စော် ကားခံရသူ ဗစ်တိုးရီးယားကလေးငယ်ဘက်မှ အမှုလိုက်ပါ ဆောင်ရွက်ပေးခဲ့သည့် တရားလွှတ်တော် ရှေ့နေတစ်ဦးလည်း ဖြစ်သည်။

ထို့အပြင် သူသည် Myanmar Now သတင်းဌာန အယ်ဒီတာချုပ်ဖြစ်သူ ကိုဆွေဝင်းကို မန္တလေးရှိ အမျိုးသားရေး တက်ကြွလှုပ်ရှားသူများက တရားစွဲဆိုခဲ့ရာ၌ အမှုလိုက်ပါဆောင်ရွက်ပေးခဲ့သူဖြစ်ပြီး ၎င်းကိုယ်တိုင်တရားရုံး ရုံးချိန်းများတွင် ခြိမ်းခြောက် ပြောဆိုခံခဲ့ရသူလည်း ဖြစ် သည်။ mizzima

ရန်ကုန်နှင့် မြန်မာပြည်အထက်ပိုင်းကို ပြေးဆွဲသည့် ခရီးသည်တင်ယာဉ်လိုင်းများ ကားခ ဈေးတက်မည်

ရန်ကုန်နဲ့ မြန်မာပြည်အထက်ပိုင်းကို ပြေးဆွဲနေတဲ့ ခရီးသည်တင်ယာဉ်လိုင်းတွေ ဇွန် ၉ ရက်မှာ ကားခဈေးတက်ဖို့ရှိနေပြီး လုံခြုံရေးအခြေ အနေတွေကြောင့် သွားလာသူနည်းပါးသွားတယ်လို့ ယာဉ်လိုင်းတွေက ပြောပါတယ်။

စက်သုံးဆီဈေးတွေ အဆမတန်တက်နေတာ၊ လုံခြုံရေးအခြေအနေအရ ခရီးသည် နည်းပါးတာတွေကြောင့် ဇွန် ၉ ရက်ကစပြီး ရန်ကုန်နဲ့ မြန် မာပြည်အထက်ပိုင်းကို ပြေးဆွဲနေတဲ့ ခရီးသည်ယာဉ်လိုင်းတွေ ကားခဈေးတက်ဖို့ရှိတယ်လို့ ရန်ကုန်မြို့အဝေးပြေးယာဉ်လိုင်းတွေဆီက သိရပါတယ်။

ခရီးသည်တင်ယာဉ်လိုင်းတွေဟာ ရန်ကုန်ကနေ မြန်မာပြည်အထက်ပိုင်းကို သွားလာသူနည်းပါးတာကြောင့် ခါလီနီးပါးပြေးဆွဲနေရတဲ့အတွက် တွက်ခြေလုံးဝမကိုက်ဘူးလို့ဆိုပါတယ်။

မုံရွာ-ရေဦး-တန့်ဆည်၊ တောင်ကြီး-လားရှိုး၊ ပုဂံ-ညောင်ဦး စတဲ့လမ်းကြောင်းတွေကနေ ရန်ကုန်ဘက်ကိုဆင်းတဲ့ခရီးသည်တွေကိုပဲ အားကိုးပြီးရပ်တည်နေရတယ်လို့ဆိုပါတယ်။

ကားခဈေးတက်မယ်ဆိုတာကလည်း ဘယ်လောက်တက်မယ်ဆိုတာ အတိအကျမပြောနိုင်သေးဘဲ ခရီးသည်တွေရဲ့အခြေအနေကိုကြည့်ပြီး နှစ်ဖက်အဆင်ပြေမယ့်နှုန်းတစ်ခုကို သတ်မှတ်မယ်လို့ ရန်ကုန်-မုံရွာ-ရေဦး-တန့်ဆည် အဝေးပြေးယာဉ်လိုင်းတာဝန်ရှိသူ တယောက်ကပြောပါတယ်။

အဝေးပြေးခရီးသည်တင်ယာဉ်လိုင်းတွေဟာ ရပ်တည်ဖို့ခက်ခဲလာတယ်ဆိုပေမဲ့ လုံးဝရပ်ဆိုင်းသွားမှာတော့မဟုတ်ဘူးလို့ ယာဉ်လိုင်းတစ်ခုကပြောပါတယ်။

အဝေးပြေးခရီးသည်တင်ယာဉ်လိုင်းတွေဟာ ခရီးသည်ကိုပဲအားပြုတာမျိုးမဟုတ်ဘဲ ကုန်ပစ္စည်းပါဆယ်ပို့ဆောင်တာတွေပါပြုလုပ်ပြီး ရပ်တည်နေတာဖြစ်တဲ့အတွက် ကုန်ပစ္စည်းအသယ် အပို့ကတော့ ရှိနေဦးမယ်လို့ဆိုပါတယ်။

အင်တာနက်နဲ့ဖုန်းလိုင်းတွေမကောင်းတာကြောင့် လက်မှတ်ရောင်းတဲ့နေရာမှာတော့ အခက်အခဲတွေရှိနေတယ်လို့ အဝေးပြေးယာဉ်လိုင်းတာဝန်ရှိသူတယောက်ကလည်း ပြောပါတယ်။

မြန်မာပြည်အထက်ပိုင်း ချောင်းဦး-မုံရွာလမ်းပိုင်းကစပြီး တန့်ဆည်-လမ်းဆုံ-ရေဦး၊ ယာကြီး-ကလေး မြန်မာပြည်အထက်ပိုင်းလမ်းပိုင်းတွေကို ဧပြီ ၂၉ရက်ကစပြီး PDF တွေက ဖြတ်သန်းသွားလာခွင့် ပိတ်ပင်ခဲ့တာပါ။

ပြည်သူတွေရဲ့အိမ်စီးကား၊ ခရီးသည်တင်ကားတွေနဲ့ ကုန်တင်ကားတွေမှာ စစ်သားတွေ ကြားညှပ်လိုက်ပါလာလေ့ရှိတာကြောင့် PDF တွေက ကြားဖြတ်တိုက်ခိုက်ဖို့ခက်ခဲနေတဲ့အတွက် လမ်းပိုင်းတွေကို ယာယီပိတ်ဆို့ခဲ့တာဖြစ်ပါတယ်။

စစ်ကောင်စီဘက်ကလည်း ခရီးသွားမယ့်သူတွေကို မှတ်ပုံတင်နဲ့ရပ်ကွက်ထောက်ခံစာတောင်းခံတာ၊ ပါဆယ်ထုပ်တွေကိုစစ်ဆေးတာစတဲ့ စည်းကမ်းတင်းကျပ်နေပါတယ်။ PDF တွေကတော့ စစ်ကောင်စီရဲ့အကြမ်းဖက်လုပ်ရပ်တွေကို ကြိုတင်ဟန့်တားနိုင်ဖို့ လမ်းပိုင်းတွေကို ပိတ်တာလို့ ကနီ PDF တာဝန်ရှိသူတယောက်က ပြောပါတယ်။

မြန်မာပြည်အထက်ပိုင်းလမ်းပိုင်းတွေပိတ်ဆို့တာ၊ ခရီးသည်တင်ယာဉ်လိုင်းတွေ သွားလာရခက်ခဲတာတွေကြောင့် ဒေသခံပြည်သူတွေအတွက်လို အပ်တဲ့ရိက္ခာနဲ့အခြေခံအ သုံးအဆောင်ပစ္စည်းတွေ ဈေးအဆမတန်တက်တာ၊ ပစ္စည်းပြတ်တာတွေကြုံတွေ့နေရပါတယ်။

မြန်မာပြည်အထက်ပိုင်းက ပြည်သူအများအပြားဟာလည်း ဘေးလွတ်မယ့် အောက်ပိုင်းကို ဆင်းလာကြတာတွေလည်း ရှိပါတယ်။ DVB

မင်းတပ်နှင့် ကန်ပက်လက်မြို့မှ လူငယ်များ မလေးရှားနှင့် ထိုင်းသို့ ပွဲစားအောက်လမ်းဖြင့် သွားသည့်သူ များပြားနေ

ချင်းပြည်နယ် မင်းတပ်မြို့နှင့် ကန်ပက်လက်မြို့များမှ လူငယ်အများစု အောက်လမ်းခရီးဖြင့် မလေးရှားနှင့်ထိုင်းနိုင်ငံသို့ ထွက်ခွာသည့်သူ အများအပြားရှိနေကြောင်း သိရသည်။

အထူးသဖြင့် သွားရောက်သည့်သူအများစုမှာ ၁၈နှစ်ဝန်းကျင် မိန်းကလေးငယ်များဖြစ်ပြီး ယောက်ကျားလေး အနည်းအငယ်သာ ပါဝင်သည်ဟု သိရသည်။

”မင်းတပ်နှင့် ကန်ပက်လက်မှာရှိတဲ့ လူငယ်တွေက ကျောင်းလည်းမတက်နိုင်ကြတော့ဘူး၊ အလုပ်လည်းမရှိကြတော့ဘူး၊ အရင်ကတော့ တောင်ယာထဲမှာ ဝဥစိုက်တဲ့သူကစိုက်၊ ကော်ဖီစိုက်တဲ့သူက စိုက်ကြတယ်။ အခုတော့ ဘာအလုပ်အကိုင်မှ မရှိတော့ အားလုံးက နိုင်ငံခြားရောက်ရင်ပြီးရော၊ဘယ်လိုပဲသွားရသွားရတွေ ဖြစ်ကုန်ကြတယ်။ မိဘတွေလည်း ရွာမှာနေရင် အဖမ်းခံရမလား၊ အသတ်ခံရမလား စိုးရိမ်နေရတော့၊ နိုင်ငံခြားသွားတာ ထွက်ပေါက်တစ်ခုလို ဖြစ်လာနေတယ်’’ ဟု ကန်ပက်လက်မြို့ခံ တစ်ဦးကပြောသည်။

လက်ရှိတွင် မလေးရှားနိုင်ငံသို့ အောက်လမ်းဖြင့်သွားသည့်သူ တစ်ဦးလျှင်သိန်း ၃၀ ကျပ်ဝန်းကျင် ပေါက်ဈေးရှိ နေကြောင်းလည်း သိရသည်။

”ပခုက္ကူကားဂိတ်တွေမှာ ကြည့်လိုက်ရင် ပွဲစားတွေက ဂိတ်တွေနှင့်ချိတ်ထားကြတယ် ထင်တယ်။ ကားတစ်စီးမှာ ပါလာရင် မိန်းကလေးတွေ ၃၀ကျော်လောက်မှာ ယောက်ကျားလေးက တစ်ယောက်နှစ်ယောက်လောက် ပါကြတယ်။ တချို့ကလည်း ပြည်ပမှာရှိတဲ့ အမျိုးတွေက ငွေပေးတာရှိတယ်။ တချို့ကျတော့လည်း အကြွေးစနစ်ပေါ့၊ ခြောက်လနဲ့ အကြေဆပ်ရတာတွေ ရှိတယ်”ဟုလည်း ပခုက္ကူကားကြီးဂိတ်အနီး သုံးဘီးဆိုင်ကယ်ဆွဲနေသည့် ချင်းလူမျိုး တစ်ဦးက ဆိုသည်။

ပြည်ပပို့ဆောင်သည့် လူပွဲစားများအနေဖြင့် ရန်ကုန်မှ မလေးရှားအထိတိုက်ရိုက်ပို့ဆောင်ခြင်း ဖြစ်ပြီး လမ်းခရီးအတွင်း ဖမ်းဆီးခံရပါက တာ ဝန်ယူသည့်ပွဲစားများရှိသလို တာဝန်မယူဘဲ ရှောင်ပြေးသည့် ပွဲစားများလည်းရှိနေကြောင်း သိရသည်။ လမ်းခရီးချောမွေ့ပါက မလေးရှားနိုင်ငံသို့ တစ်ပတ်အတွင်း ရောက်ရှိကြောင်းလည်း သိရသည်။ mizzima

ကွမ်းခြံကုန်းမြို့နယ်အတွင်း ကင်းလှည့်ရာတွင် လူသားဒိုင်းအဖြစ်အသုံးပြုရန် တစ်လမ်းလျှင် လူ ၂ ဦး စစ်ကောင်စီတပ် တောင်းခံ

ရန်ကုန်တောင်ပိုင်းခရိုင် ကွမ်းခြံကုန်းမြို့နယ်တွင် လုံခြုံရေးလှည့်ကင်း၌ လူသားဒိုင်းအဖြစ်အသုံးပြုရန် လမ်းတစ်လမ်းလျှင် လူနှစ်ဦးနှုန်းဖြင့် စစ်ကောင်စီတပ်ကတောင်းခံထားကြောင်း ဒေသခံများထံမှ သိရ သည်။

“ရပ်ကွက်တစ်ခုချင်းစီရဲ့ လမ်းအလိုက် တစ်လမ်းကိုနှစ်ဦးစီ အသက် ၁၈ နှစ်ကနေ ၅၀ ကြားရှိတဲ့ အမျိုးသားရှိတဲ့ အိမ်ထောင်စုအလိုက် မဲနှိုက်ကြရပါတယ်။ တစ်လမ်းချင်းစီ ကောက်နေတာပါ။ မဲပေါက်တဲ့ သူတွေဟာ နေ့စဉ် ညဘက်စစ်ကားလှည့်တဲ့အချိန်မှာ လိုက်ခိုင်းမယ်ဆိုပြီး ပြောထားပါတယ်” ဟု ဒေသတွင်း သတင်းရင်းမြစ်က မဇ္စျိမကို ပြောသည်။

မဲနှိုက်ရွေးချယ်ခံရသူများသည် မြို့နယ်အတွင်း ကားဖြင့်လှည့်ကင်းဆောင်ရွက်ပါက ရှေ့ဆုံးမှလိုက်ပါ ရမည်ဖြစ်ပြီး လိုအပ်ပါကလည်း အချိန်မရွေးခေါ်ယူခိုင်းစေခံရမည်ဖြစ်ကြောင်း စစ်ကောင်စီတပ်က ပြောဆိုထားပြီး ရပ်ကွက်အတွင်းဖြစ်ပေါ်နေသည့် သတင်းများကို ၎င်းတို့ထံမှ ပြန်လည်ထောက်လှမ်းရန် စစ်ကောင်စီကပြင်ဆင်နေခြင်းဖြစ်ကြောင်း ဒေသခံများက ပြောသည်။

ကွမ်းခြံကုန်းမြို့နယ်အတွင်း စစ်ကောင်စီတပ်က တစ်လမ်းလျှင် လူနှစ်ဦးတောင်းခံမှုသည် ပြီးခဲ့သည့် အပတ်ကတည်းကပြီးစီးနေပြီဖြစ်သော် လည်း လက်ရှိအချိန်အထိ လှည့်ကင်းများတွင် လိုက်ပါရခြင်း မရှိ သေးကြောင်းလည်း ဒေသခံ သတင်းရင်းမြစ်က ဆိုသည်။

“ရပ်ကျေးအုပ်ချုပ်ရေးမှူးအိမ်တွေမှာ တစ်ညခြောက်ယောက် အလှည့်ကျ ကင်းစောင့်ဖို့ကိုလည်း စစ်ကောင်စီက ဖိအားပေးစေခိုင်းစေမှုတွေ ရှိနေပါတယ်။ လူထုကဘာမှလုပ်လို့မရတဲ့ အခြေအနေမှာ တောင် အခုလို အတင်းအကျပ်စေခိုင်းမှု၊ လူသားဒိုင်းလုပ်မှုဟာ လူ့အခွင့်အရေး ချိူးဖောက်မှုဖြစ်သလို စစ်ရာဇဝတ်မှုကျူးလွန်မှုလည်း မြောက်ပါတယ်” ဟု ကွမ်းခြံကုန်း ဒေသခံတစ်ဦးက ပြောသည်။

ထို့အပြင် ကွမ်းခြံကုန်းမြို့နယ်တွင် ကလေးများကျောင်းတက်ရောက်ရန်အတွက် စစ်ကောင်စီတပ်က ရပ်ကျေးအုပ်ချုပ်ရေးမှူးများမှတဆင့် မိဘများကို အတင်းအကျပ်ဖိအားပေးနေမှုများ ရှိနေကြောင်း သိရ သည်။

ကွမ်းခြံကုန်းမြို့နယ်ကို စစ်ကောင်စီတပ်က နည်းအမျိုးမျိုးဖြင့် အင်အားသုံး ဖိနှိပ်ရန် ပြင်ဆင်နေသော် လည်း မြို့နယ်ချင်းထိစပ်နေသည့် ကော့မှူး၊ တွံတေးနှင့် ဒလ မြို့နယ်များတွင် ကာကွယ်ရေးတပ်ဖွဲ့များ၏ တိုက်ခိုက်မှုကြောင့် စစ်ကောင်စီတပ်နှင့် ၎င်းတို့၏ ထောက်တိုင်များ သေဆုံးမှုနှင့် ထိခိုက်ဒဏ်ရာရမှုများ ရှိနေသည်။ mizzima

ပခုက္ကူမြို့နယ်၊ ကျတ်ထိုးရဲကင်းစခန်း တိုက် ခိုက်ခံရပြီး စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံး၊ ဂန့်ဂေါတွင် စစ်ကောင်စီစစ် ကြောင်း တိုက်ခိုက်ခံရပြီး ၃၈ ဦးသေဆုံး၊ မြောင်တွင် စစ်ကောင်စီတပ်ဖွဲ့ ၂ ကြိမ် တိုက် ခိုက်ခံရပြီး ၅ ဦး သေဆုံး

မကွေးတိုင်း၊ ပခုက္ကူမြို့နယ်၊ ကျတ်ထိုးရဲကင်းစခန်းကို ပခုက္ကူ PDFက ယနေ့ ဇွန်လ ၈ ရက် နံနက်တွင် ဝင်ရောက်တိုက်ခိုက်ရာ စစ်သား၊ ရဲနှင့် ပျူစောထီး ၂၀ ဦးထက်မနည်း သေဆုံးကြောင်း ပခုက္ကူ PDF က သတင်းထုတ်ပြန်သည်။

ယနေ့နံနက် ၆ နာရီခွဲခန့်တွင် ဒေသကာကွယ်ရေးတပ်က ၄၀ မမ ဗုံးပစ်လောင်ချာများ၊ လက်နက်ငယ်များဖြင့် ပစ်ခတ်တိုက်ခိုက်ပြီး အဆိုပါ စခန်းကို သိမ်းပိုက်ရန် ကြိုးပမ်းစဉ် စစ်ကား ၁ စီးဖြင့် စစ်ကူ ရောက်လာသောကြောင့် ဒေသကာကွယ်ရေးတပ်ဖွဲ့များ အရေးပေါ် ပြန်လည်ဆုတ်ခွာခဲ့ရသည်ဟု သိရှိရသည်။

တိုက်ပွဲတွင် PDF ၁ ဦး ကျဆုံးခဲ့ပြီး မြစ်ခြေဘက်မှ ထွက်လာသည့် စစ်ကား ၁ စီးနှင့် ကမ္မဘက်မှ ထွက်လာသည့် ရဲကား ၁ စီးကို ဒေသကာကွယ်ရေးတပ်ဖွဲ့များက မိုင်းခွဲတိုက်ခိုက်ခဲ့သည်ဟု ပခုက္ကူ PDF ကထုတ်ပြန်သည်။

အလားတူ မကွေးတိုင်း၊ ကျောမြို့မှ ဂန့်ဂေါမြို့ဘက်သို့ ထွက်ခွာလာသော စစ်ကောင်စီယာဉ်တန်း၏ ရှေ့ပြေး ခြေလျင်စစ်ကြောင်းကို Master People’s Defence Force Gangaw – MPDFနှင့် နဂါးနီ ပြည်သူ့ကာကွယ်ရေးတပ်ဖွဲ့မှ တပ်စိတ် ၁ စိတ်တို့ ပူးပေါင်းကာ စောင့်ကြိုတိုက်ခိုက်ခဲ့ရာ စစ်သား ၃၈ ဦးသေဆုံးပြီး ၁၃ ဦး ဒဏ်ရာရကြောင်း MPDF က သတင်းထုတ်ပြန်သည်။

အဆိုပါ စစ်ကောင်စီစစ်ကြောင်းသည် အင်အား ၈၀ ခန့်ရှိကြောင်းနှင့် တော်လှန်ရေးရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း MPDF က ဆိုသည်။

အလားတူစစ်ကိုင်းတိုင်း၊ မြောင်မြို့နယ်တွင် ကျေးရွာများကို မီးရှို့ဖျက်ဆီးသော စစ်ကောင်စီတပ်ဖွဲ့ကို ဒေသကာကွယ်ရေးတပ်ဖွဲ့များက လိုက်လံတိုက်ခိုက်ရာ စစ်ကောင်စီတပ်ဖွဲ့ဝင် ၅ ဦးသေဆုံးပြီး အများအပြား ဒဏ်ရာရကြောင်း ဒေသခံ ပြောက်ကျားတပ်ဖွဲ့များက သတင်းထုတ်ပြန်သည်။

ဇွန်လ ၅ ရက် နံနက်တွင် ဇီးကျွန်းမှ ထွက်ခွာလာသော စစ်ကောင်စီတပ်ဖွဲ့ကို ဒေသကာကွယ်ရေးတပ်ဖွဲ့များက လက်နက်ကြီးများဖြင့် ပစ်ခတ်ရာ စစ်သား ၁ ဦးသေဆုံးပြီး အများအပြား ဒဏ်ရာရကြောင်း၊ ၎င်းတု့ ဆေးကုသသွားသောနေရာ၌ သွေးစများကို တွေ့ရှိရကြောင်း သိရှိရသည်။

ဇွန်လ ၇ ရက်နေ့တွင် မြစ်သာနှင့် ရွှေလှံကြားတွင် Mytel အမြှောက် ၂ လုံးဖြင့် ပစ်ခတ်ရာ စစ်ကောင်စီစစ်ကြောင်းကို ထိမှန်ပြီး စစ်သား ၄ ဦးသေဆုံးကာ အများအပြား ဒဏ်ရာရကြောင်း၊ အဆိုပါ တိုက်ခိုက်မှု ၂ ခုကို ဗိုလ်နေတိုး အထူးပြောက်ကြားတပ်ဖွဲ့၊ ဗိုလ်တောက်ထွန်း (MBTT)၊ မြောင်မြို့နယ် T.G.R ပြည်သူ့ကာကွယ်ရေးတပ်၊ 11 Brothers၊ B.G.F(Myingan)၊ Saw Bwar Gyi အဖွဲ့တို့က ပူးပေါင်းတိုက်ခိုက်ခဲ့ကြောင်း သိရှိရသည်။ khit thit

« Older Entries