စစ်အာဏာရှင်ဟောင်း ဗိုလ်ချုပ်မှူးကြီးသန်းရွှေ၏ ကျောက်ဆည်မြို့ကနေအိမ် ဗုံးပစ်တိုက်ခိုက်ခံရ
စစ်အာဏာရှင်ဟောင်း ဗိုလ်ချုပ်မှူးကြီးသန်းရွှေ၏ ကျောက်ဆည်မြို့ကနေအိမ်ကို ယနေ့နံနက်ပိုင်းက ဗုံးပစ်တိုက်ခိုက်ခံလိုက်ရကြောင်း သိရသည်။
“ဆူးကုန်းရပ်က ဦးသန်းရွှေအိမ် ဗုံးပစ်ခံရတာပါ၊ ဒါနဲ့ဆို သုံးကြိမ်ရှိပါပြီ၊ ဒီတစ်ခေါက်က အစောင့်နှစ်ယောက်ထိတယ်လို့ သိရတယ်” ဟု ကျောက်ဆည်မြို့ခံ သတင်းရင်းမြစ်ကပြောသည်။
နေအိမ်တံခါးအစောင့်ဂိတ်ကို ဒီကနေ့ ဇွန် ၁၉ ရက် မနက် ၆ နာရီ ၄၅ မိနစ်ခန့်က လက်ပစ်ဗုံးဖြင့် ပစ်ပေါက်တိုက်ခိုက်သွားခြင်းဖြစ်ကြောင်း သိရပြီး၊ အဆိုပါတိုက်ခိုက်မှုကို ကျောက်ဆည်ခရိုင် ကာကွယ်ရေးတပ်ဖွဲ့(K.D.D.F) က လုပ်ဆောင်ခြင်းဖြစ်ကြောင်း သတင်းထုတ်ပြန်သည်။
အဆိုပါတိုက်ခိုက်မှုတွင် အစောင့်စစ်သားနှစ်ဦး ဒဏ်ရာရကြောင်း KDDF တပ်ဖွဲ့၀င်တစ်ဦးက ပြောသော်လည်း မဇ္ဈိမ အနေဖြင့် သီးခြားအတည်မပြုနိုင်သေးပါ။
စစ်အာဏာရှင်ဟောင်း ဗိုလ်ချုပ်မှူးကြီးသန်းရွှေ၏ ကျောက်ဆည်မြို့ကနေအိမ်သည် ကျောက်ဆည်မြို့ ဆူးကုန်းရပ်ကွက်တွင် ရှိပြီး၊ လူနေထိုင်ခြင်းမရှိဘဲ စစ်ကောင်စီတပ်ဖွဲ့က လုံခြုံရေးချထားခြင်းဖြစ်သည်။
အဆိုပါ လုံခြုံရေးဂိတ်သည် စစ်အာဏာသိမ်းပြီးနောက်ပိုင်း ယနေ့တစ်ကြိမ်နှင့်ဆိုလျှင် သုံးကြိမ် ဗုံးပစ်တိုက်ခိုက်ခံရခြင်းဖြစ်ကြောင်း သိရသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 