တစ်ပတ်အတွင်း ရန်ကုန်မြို့ပြပြောက်ကျားအဖွဲ့ဝင် ၁၀ ဦးထက်မနည်း သေဆုံး

ရန်ကုန်တွင် စစ်ကောင်စီထောက်တိုင်များကို ပစ်မှတ်ထားတိုက်ခိုက်ရင်း အပြန်အလှန်ပစ်ခတ်မှု၊ မိုင်း မတော်တဆပေါက်ကွဲမှုနှင့် စစ်ကြောရေးတွင် နှိပ်စက်ခံရမှုများကြောင့် ယခုရက်သတ္တပတ်အတွင်း မြို့ပြပြောက်ကျားအဖွဲ့ဝင် ၁၀ ဦးထက်မနည်း သေဆုံးခဲ့သည်ဟု သိရသည်။

ဇွန် ၁၇ ရက်က ရန်ကုန်မြို့အထွက် ထန်းတပင်မြို့နယ်ရှိ ပန်းတိုင်ဂိတ်စခန်းတွင် စစ်ကောင်စီတပ်ဖွဲ့ဝင်များနှင့် အပြန်အလှန်ပစ်ခတ်မှု ဖြစ်ပွားကာ မြို့ပြပြောက်ကျားတပ်ဖွဲ့ဝင် ၆ ဦး သေဆုံးခဲ့သည်ဟု အမည်မဖော်လိုသည့် မြို့ပြပြောက်ကျားအဖွဲ့ဝင်တစ်ဦးက ပြောသည်။ 

“ဒီပစ်ခတ်မှုကြောင့် သေဆုံးသူတွေထဲမှာ အရပ်သားတွေလည်း ပါနေတယ်လို့ သိရပါတယ်။ ဒီရက်ပိုင်းမှာ မြို့ပြပြောက်ကျားအဖွဲ့ဝင်တွေ တော်တော်များများ ကျဆုံးနေပြီးတော့ သတင်းတွေ ပျောက်နေတယ်။ ဒါက မြို့ပြပြောက်ကျားအဖွဲ့ဝင်တွေအတွက် စိုးရိမ်စရာ ဖြစ်လာနိုင်တယ်လို့ ယူဆပါတယ်” ဟု ၎င်းက ပြောသည်။ 

သေဆုံးသည့် အဖွဲ့ဝင်များနှင့် ပတ်သက်​၍ ရန်ကုန်အခြေစိုက် မြို့ပြပြောက်ကျားအဖွဲ့များက သတင်းထုတ်ပြန်ခြင်း မရှိသေးပေ။ 

ဇွန် ၁၆ ရက်ကလည်း မိုင်းမတော်တဆမှုကြောင့် မြို့ပြပြောက်ကျားအဖွဲ့ဝင်လေးဦး သေဆုံးကာ နောက်ထပ်တစ်ဦးမှာ စစ်ကောင်စီတပ်၏ ပစ်ခတ်မှုကြောင့် သေဆုံးခဲ့ရသည်။ 

ထိုနေ့က တောင်ဒဂုံမြို့နယ်တွင် ဖြစ်ပွားသော ပစ်ခတ်ဖမ်းဆီးခံမှုနှင့် ဒဂုံမြို့နယ် ဗိုလ်ရာညွန့်လမ်းတွင် မိုင်းမတော်တဆပေါက်ကွဲဖြစ်စဉ်တို့တွင် လူငယ်နှစ်ဦး သေဆုံးကြောင်း မြို့ခံများနှင့် ရဲတပ်ဖွဲ့သတင်းရင်းမြစ်တစ်ခုက အတည်ပြုထားသည်။ 

ထိုနေ့မွန်းလွဲပိုင်းက အခြားနေရာများတွင် ဖြစ်ပွားသော မိုင်းမတော်တဆမှုကြောင့် မြို့ပြပြောက်ကျားအဖွဲ့ဝင် ၄ ဦး ထပ်မံသေဆုံးခဲ့ပြီး လုံခြုံရေးအရ ထိုသတင်းကို မထုတ်ပြန်ခြင်းဖြစ်သည်ဟု ရန်ကုန်မြို့ပြပြောက်ကျားအဖွဲ့တစ်ခုမှ ခေါင်းဆောင်တစ်ဦးက ပြောသည်။ 

“ခုနောက်ပိုင်းမှာ ဖုန်းနဲ့ (မိုင်း) ဆင်တာတွေက အန္တရာယ်အရမ်းများတယ်။ စ.က.စ ဘက်ကလဲ နည်းပညာ တော်တော်အဆင့်မြင့်မြင့်သုံးလာတယ်ဗျ” ဟု ၎င်းက ပြောသည်။ 

၎င်းတို့အဖွဲ့ဝင်များ စစ်ကောင်စီ၏ အကျဉ်းထောင်ထဲတွင် ရောက်ရှိနေသည့်အတွက် အဖွဲ့အမည်ကိုလည်း မဖော်ပြရန် တောင်းဆိုသည်။ 

တွံတေးအခြေစိုက် Twantay Royal Defence Force – TRDF ခေါင်းဆောင် ၂ ဦး ဖမ်းဆီးခံခဲ့ရပြီး တစ်ဦးမှာ ယနေ့အချိန်ထိ အဆက်အသွယ်မရဖြစ်နေကြောင်း၊ စစ်ကြောရေးတွင် ဖမ်းဆီးနှိပ်စက်ခံခဲ့ရကာ သေဆုံးခဲ့သည်ဟု ယူဆကြောင်း ထိုအဖွဲ့နှင့် နီးစပ်သူများထံမှ သိရသည်။ 

ဇွန် ၁၁ က TRDF ၏ အသက် ၂၇ အရွယ် မြေပြင်အဖွဲ့ခေါင်းဆောင် စမ်းချောင်းမြို့နယ်တွင် ဖမ်းဆီးမိရာမှ ဒုအဖွဲ့ခေါင်းဆောင်ကိုပါ ဖမ်းဆီးခဲ့ပြီး စစ်ကြောရေးတွင် ညှဉ်းပန်းနှိပ်စက်စစ်ဆေးနေကြောင်း အဖွဲ့နှင့် နီးစပ်သူတစ်ဦးက ပြောသည်။ 

“မြေပြင်လှုပ်ရှားနေတဲ့ ခေါင်းဆောင်နှစ်ယောက် ပါသွားပြီ။ တစ်ယောက်ကတော့ စစ်ကြောရေးမှာ သေတယ်လို့ ယူဆရတယ်။ နောက်တစ်ယောက်ကတော့ စစ်ကြောရေးမှာပဲ ရှိသေးတယ်။ သူ့ကိုလည်း တော်တော်ညှဉ်းဆဲနှိပ်စက်ထားတယ်။ မိသားစုဝင်တွေလည်း အကုန်လုံး ပြေးနေရတယ်” ဟု ၎င်းက ပြောသည်။ 

ထို့ပြင် စစ်တပ်က အဖွဲ့နှင့် မသက်ဆိုင်သည့် TRDF မိသားစုဝင်များနှင့် တွံတေးဒေသခံများကို လိုက်လံဖမ်းဆီးနေရာ အများအပြား တိမ်း ရှောင် နေရပြီး ၉ ဦးကို ဖမ်းဆီးထားသည်ဟု ၎င်းက ဆက်ပြောသည်။  

ယခုလပိုင်းအတွင်း စစ်ကောင်စီတပ်က မြို့ပြပြောက်ကျားအဖွဲ့ဝင်များကို ရှာဖွေဖမ်းဆီးနေပြီး ပြောက်ကျားအဖွဲ့ဝင်များမှာ လူမသိသူမသိ သေဆုံးနေကြရသည်ဟု မြို့ပြပြောက်ကျားခေါင်းဆောင်တစ်ဦးက ပြောသည်။ 

“မြေပြင်အခြေအနေက တကယ့်မလွယ်ကြောပဲဗျာ။ အဓိကကတော့ UG ဆိုတာဘာလဲ ပြည်သူတွေက မသိကြသေးဘူး။ UG တွေကို ဖမ်းချင်တိုင်းဖမ်း၊ သတ်ချင်တိုင်း သတ်ဖြစ်နေတယ်” ဟု ၎င်းက ပြောသည်။ 

စစ်ကောင်စီ၏ အဓိကထောက်တိုင်များကို ပစ်ခတ်တိုက်ခိုက်မှုများ၊ အာဏာသိမ်းမှု ဆန့်ကျင်သည့် ဆန္ဒပြပွဲများ နေ့စဉ်ရှိနေသည့် ရန်ကုန်တွင် စစ်တပ်က ဧည့်စာရင်းအကြောင်းပြကာ နေ့စဉ် ဖမ်းဆီးနေသည်။

ဇွန် ၁၃ မှစ၍ ရန်ကုန်မြို့တွင် နေထိုင်သူ ၄၀ ဦးထက်မနည်းကို မြို့ပြပြောက်ကျားသပိတ်များတွင် ပါဝင်သည့် စွပ်စွဲချက်ဖြင့် ဖမ်းဆီးထားပြီး မည်သည့်နေရာတွင် ဖမ်းဆီးထိန်းသိမ်းထားသည်ကို မသိရှိရဘဲ အဆက်အသွယ်ပြတ်နေဆဲဖြစ်သည်။

စစ်ကောင်စီက ဖမ်းဆီးမှုများထဲမှ တချို့ကိုသာ သတင်းထုတ်ပြန်ထားသည်။

စစ်ကောင်စီတပ်၏ ပစ်ခတ်သတ်ဖြတ်မှုကြောင့် သေဆုံးသူ ၁၉၆၃ ဦးထိ ရှိနေပြီး ဆက်လက်ဖမ်းဆီးခံထားရသူ ၁၁၀၉၆ ဦးထိ ရှိနေပြီဖြစ် သည်ဟု နိုင်ငံရေးအကျဉ်းသားများ ကူညီစောင့်ရှောက်ရေး အဖွဲ့ (AAPP) က ဇွန် ၁၇ တွင် ထုတ်ပြန်ထားသည်။  myanmar now

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s