Monthly Archives: Jul 2022

မြန်မာနိုင်ငံရှိ Foodpanda Rider များ၏ အ လုပ်မဆင်းသပိတ် ၁ လပြည့်၊ တောင်းဆို ချက်များ မရမခြင်း ဆက်လက်တိုက်ပွဲဝင်သွားမည်ဟုဆို

အစားအသောက်ပို့ဆောင်သော ကုမ္ပဏီတစ်ခုဖြစ်သည့် Foodpanda Myanmar မှ အခြေခံအော်ဒါကြေးများ လျှော့ချလိုက်ခြင်းနှင့် အော်ဒါပို့ဆောင်ရမည့် ခရီးအကွာအဝေး တွက်ချက်မှုများ မမှန်ကန်ခြင်းကြောင့် Rider (ဒယ်လီပို့ဆောင်သူ)များ နစ်နာဆုံးရှုံးမှုရှိနေသည့်အတွက် အလုပ်မဆင်းသပိတ်ပြုလုပ်ခဲ့ရာ တစ်လတိတိ ပြည့်ခဲ့ပြီဖြစ်သည်။

ဇွန်လ ၆ ရက်နေ့မှ စတင်ကာ ဇူလိုင် ၆ ရက်နေ့အထိ Riderများ တစ်လကြာ အလုပ်မဆင်း သပိတ်မှောက်ခဲ့သော်လည်း လက်ရှိအချိန်ထိ ကုမ္ပဏီဘက်မှ တစ်စုံတစ်ရာတုံ့ပြန်ခြင်း မရှိသောကြောင့် Rider များဘက်မှ တောင်းဆိုချက်များ မရမချင်း ဆက်လက်တိုက်ပွဲဝင်သွားမည် ဖြစ်ကြောင်း မြန်မာနိုင်ငံလုံးဆိုင်ရာ Foodpanda သပိတ်မှောက် Riders များက ထုတ်ပြန်ထားသည်။

Riders များဘက်မှလည်း သပိတ်တိုက်ပွဲဝင်နေသည့် တစ်လအတွင်း နည်းလမ်းမျိုးစုံဖြင့် လှုပ်ရှားမှုများပြုလုပ်ခဲ့ကြပြီး တောင်းဆိုချက်များကို ကုမ္ပဏီဘက်မှ ကျေနပ်လောက်သည်ထိ လိုက်လျော ညှိနှိုင်းပေးရန်တောင်းဆိုခဲ့သော်လည်း ထူးခြားမှုမရှိသည့်အပြင် Riders အသစ်များကိုသာ ခေါ်ယူခန့်ထားမှုများ ပြုလုပ်ခဲ့ကြောင်း သိရသည်။

ထို့ကြောင့် Foodpanda လုပ်ငန်း လည်ပတ်သည့် မြို့နယ်ပေါင်း ၁၂ မြို့နယ်တွင် Foodpanda Myanmar ကုမ္ပဏီဘက်မှ အော်ဒါကြေးများလျှော့ချ ခေါင်းပုံဖြတ်ခြင်းနှင့် နည်းလမ်းအမျိုးမျိုးဖြင့် အမြတ်ထုတ်မှုများကို စားသုံးသူများအား အသိပေးသည့် လက်ကမ်းစာစောင် စောင်ရေ တစ်သောင်းအား ဖြန့်ဝေခဲ့သည်။

Foodpanda စားသုံးသူများ လုံးဝမရှိရေး “Zero Customer Campaign” ကိုလည်း နေ့စဉ် မြို့နယ်အနှံ့၌ လုပ်ဆောင်ကာ Foodpanda မသုံးစွဲရန် နှိုးဆော်မှုများ ပြုလုပ်ခဲ့ကြသည်။

ထိုသို့ လှုပ်ရှားမှုများ ပြုလုပ်ခဲ့သော်လည်း Riders များ၏ တောင်းဆိုချက် ရှစ်ချက်နှင့်ပတ်သက်ပြီး လိုက်လျောလုပ်ဆောင်ခဲ့ခြင်း မရှိသည့်အပြင် ယခင်ကထက်ပို၍ ကုမ္ပဏီဘက်မှ ပိုမိုစည်းကမ်းတင်းကျပ်ကာ အချို့ Riders များ၏ အကောင့်များကိုလည်း စည်းကမ်းချက်နှင့် မညီဟုအကြောင်းပြကာ ရပ်ဆိုင်းခဲ့ခြင်းများရှိသည်။

Riders များအား အသိမပေးသော လုပ်ဆောင်ချက်မှန်သမျှကိုလည်း Riders များဘက်မှ အသိအမှတ်မပြုကြောင်း ထုတ်ပြန်ချက်တွင် ထည့် သွင်းကြေညာထားသည်။

Riders များမှ အလုပ်မဆင်းသပိတ်ပြုလုပ်နေစဉ်အတွင်း Foodpandaကို အသုံးမပြုဘဲ ပို့ဆောင်သူများဘက်မှ ရပ်တည်ပေးသော စားသုံးသူများကိုလည်း ကျေးဇူးတင်ကြောင်းနှင့် Riders များမှလည်း တောင်းဆိုချက်များမရချင်း အောင်ပွဲရသည်အထိ ဆက်လက်တိုက်ပွဲဝင်မည်ဖြစ် ကြောင်း Riders များ၏ သပိတ် တစ်လပြည့်ထုတ်ပြန်ချက်မှတဆင့် သိရသည်။ mizzima

စစ်တပ်ကြောင့် မြစ်သာမြစ်တစ်လျှောက် ပြည်သူ့အသက် အိုးအိမ်များဆုံးရှုံးနေ

မကွေးတိုင်း ဂန့်ဂေါနှင့် စစ်ကိုင်းတိုင်း ကလေးမြို့နယ်စပ် မြစ်သာမြစ်တစ်လျှောက် ရွာစဉ်လှည့် စစ်ကြောင်းထိုးနေသည့် စစ်တပ်က ဒေသခံတစ်ဦးကို ညှဉ်းပန်းနှိပ်စက်သတ်ဖြတ်ခဲ့သလို ပြည်သူပိုင်ပစ္စည်းများကို ဖျက်ဆီးခဲ့သည်ဟု သတင်းရင်းမြစ်အချို့က အတည်ပြုသည်။

စစ်ကောင်စီက လက်နက်တပ်ဆင်ပေးထားပြီး မြစ်သာမြစ်အရှေ့ခြမ်း၊ ကလေးမြို့နယ်၊ ကျောက်ပြုတ်ရွာကို အခြေပြုသည့် အရပ်ဝတ်လက်နက်ကိုင် (ပျူစောထီး) နှင့် စစ်တပ် ပူးပေါင်းအင်အား ၁၀၀ ကျော်က ထိုဒေသအတွင်း ဇွန် ၃၀ ရက်မှ ယမန်နေ့ (ဇူလိုင် ၅) အထိ စစ်ရေးလှုပ်ရှားနေခြင်းဖြစ်ကြောင်း သိရသည်။

ထိုစစ်ကြောင်းသည် ဇူလိုင် ၄ ရက်နေ့တွင် စစ်ကိုင်းတိုင်းဘက်အခြမ်း မြစ်အနောက်ဘက်ကမ်းရှိ ရေရှင်ရွာကို ဝင်ရောက် စီးနင်းစဉ် အသက် ၃၅ နှစ်အရွယ် ကိုမုန်းဖေကို နှိပ်စက်သတ်ဖြတ်ခဲ့ကြောင်း၊ နှစ်ရက်အကြာ (ဇူလိုင် ၆) စစ်တပ် ပြန်ထွက်သွားချိန်မှ ရုပ်အလောင်းကို ကောက်ယူသင်္ဂြိုဟ်နိုင်ခဲ့ကြောင်း ဒေသခံတစ်ဦးက ပြောသည်။

“ရွာထဲမှာ မိပြီး (ဒေသကာကွယ်ရေးအဖွဲ့ PDF) စခန်းတွေဘာတွေကို မေးတဲ့အချိန်မှာ မဖြေလို့ သတ်တာထင်တယ်။ လည်ပင်းမှာ ပဝါစကို ဆွဲထားတာ။ မျက်နှာသုတ်ပဝါစကို လည်ပင်းမှာ တင်း‌နေအောင် ဆွဲပြီးတော့ စစ်မေးပြီးတော့ သေနတ်နဲ့ ပစ်သတ်သွားတဲ့ပုံရှိတယ်” ဟု အလောင်းကို ကိုယ်တိုင်တွေ့ခဲ့သည့် ထိုသူက ပြောသည်။

“ကျွန်တော်တို့ ရောက်သွားတော့ အနားကပ်ဖို့က သိပ်အဆင်မပြေဘူး။ အနံ့က တအားထွက်နေပြီ” ဟု အထက်ပါ ဒေသခံက ဆက်ပြောသည်။

စစ်ကောင်စီတပ်ဖွဲ့သည် ဇူလိုင် ၅ ရက်နေ့က ချောင်းခွရွာကို စီးနင်းပြီး နောက်တစ်ရက်တွင် တောင်ခင်ရန်းရွာရဲစခန်းသို့ ဝင်ရောက်သွားကြောင်း အမည်မဖော်လိုသည့် အခြားဒေသခံအချို့ကလည်း အတည်ပြုသည်။

စစ်ကောင်စီစစ်ကြောင်းသည် ကျေးရွာများကို စီးနင်းစဉ် မြင်သားရွာမှ နေအိမ်အချို့နှင့် နှမ်းခါးရွာမှ ဆိုင်ကယ် ၄ စီးကိုလည်း မီးရှို့ခဲ့ကြောင်း၊ နေအိမ်များကို မွှေနှောက်၊ ကြက်၊ ဝက်များကို သတ်ဖြတ် စားသောက်ရုံမျှမက စစ်ရှောင်များ စုဆောင်းထားသည့် ဆန်အိတ်များကိုပါ ဖျက်ဆီးခဲ့ကြောင်း‌ ၎င်းတို့က ပြောသည်။

“စစ်ဘေးရှောင်တွေက တစ်နှစ်စာ စုထားတာတွေ။ ဆန်တွေ တအားများလွန်းလို့ PDF တွေဟာ ထင်ပြီး ဖျက်ဆီးသွားတယ်။ ဆန်တွေ အိတ် ၄၀ လောက်ရှိတယ်။ တချို့ကျတော့ တောထဲက လွတ်ကင်းရာ တဲတစ်တဲကို သူ့အမျိုး၊ ကိုယ့်အမျိုးရယ်လို့ ပို့ထားတာရှိတယ်။ ရွာထဲမှာ အထားနည်းတယ်” ဟု စစ်ဘေးရှောင်များအရေးကူညီနေသည့် အသက် ၃၀ ဝန်းကျင်အရွယ် ဒေသခံက ပြောသည်။

စစ်ကောင်စီ တပ်စွဲထားသည့် တောင်ခင်ရန်းရွာရဲစခန်း ဇွန် ၂၉ ရက်က တိုက်ခိုက်ခံရပြီးနောက် PDF အားကောင်းသည်ဟု ယူဆသည့် မြစ်သာမြစ်တစ်ကြောကျေးရွာများကို စစ်တပ်က ဝင်မွှေခြင်းဖြစ်မည်ဟု အထက်ပါ သတင်းရင်းမြစ်များက သုံးသပ်သည်။

ကလေးနှင့် ဂန့်ဂေါနယ်ရှိ မြောက်ခင်ရန်း၊ ကုက္ကား၊ ဟံသာဝတီ၊ လယ်ကြီးနှင့် ကျောက်ပြုတ်ရွာတို့တွင် ပျူစောထီးအဖွဲ့ အားကောင်းပြီး အနီးအနားကျေးရွာများကို မကြာခဏ ဝင်ရောက်ဖျက်ဆီးတတ်၍ လူငယ်လူရွယ်များမှအပ သက်ကြီး ရွယ်အိုများမှာ နီးစပ်ရာတောများတွင် လွန်ခဲ့သည့် လေးလဝန်းကျင်ကတည်းက ရှောင်တိမ်းနေရသည်ဟု ၎င်းတို့ထံမှ သိရသည်။

စစ်ကောင်စီနှင့် ပျူစောထီးရန်ကြောင့် ဂန့်ဂေါမြို့နယ်မြောက်ပိုင်းမှ ကျေးရွာ ၁၂ ရွာမှ ဒေသခံ ထောင်နှင့်ချီပြီး ရှောင်တိမ်းနေရကြောင်း၊ ဆေးဝါးလိုအပ်ချက် အခက်အခဲသာမက ကုသပေးမည့် ကျန်းမာရေးဝန်ထမ်း ဆရာဝန်၊ ဆရာမများလိုအပ်နေကြောင်း စစ်ရှောင်များအရေး ကူညီနေသည့် အထက်ပါ သတင်းရင်းမြစ်က ပြောသည်။ 

“မနေ့ကဆို တော်တော်လေးဒုက္ခရောက်တယ်။ စစ်ကြောင်းက တောတောင်တွေထဲထိ လိုက်ပြီး ထိုး (စစ်ရေးလှုပ်ရှား) တော့ တော်တော်ဒုက္ခရောက်တယ်။ မိုးကလည်း ရွာတယ်။ တချို့ဆို လှည်းတွေ၊ ဆိုင်ကယ်တွေ ထားပြီး ပြေးရတယ်” ဟု ၎င်းက ပြောသည်။

“နောက်က လိုက်ပစ်တာဆိုတော့။ သူတို့က လူစုစုမြင်ရင် ပစ်တာပဲ။ ရှင်းလင်းရေးလုပ်တဲ့သဘော နေမှာ။ တောထဲဝင်တာနဲ့ တောက်လျှောက်ပစ်တာ” ဟု ထိုဒေသခံက ဆက်ပြောသည်။ 

အထက်ပါဖြစ်စဉ်များနှင့် ပတ်သက်၍ စစ်ကောင်စီက ထုတ်ပြန်ပြောဆိုခြင်း မရှိသေးသလို သီးခြားအတည်ပြု၍ မရသေးပါ။

အရပ်သားအစိုးရကို ဖြုတ်ချ၍ စစ်တပ်က အာဏာသိမ်းပြီးနောက် တစ်နှစ်ကျော်အတွင်း နိုင်ငံအနှံ့ ခုခံမှုများ မြင့်တက်နေရာ တော်လှန်ရေးနှင့် နှစ်ပေါင်းများစွာ အလှမ်းဝေးသည့် မြန်မာနိုင်ငံအလယ်ပိုင်းမှ စစ်ကိုင်းနှင့် မကွေးတိုင်းတို့သည်လည်း ရှေ့တန်းမှ ပါဝင်နေသည်။

ရရာလက်နက်ဖြင့် ခုခံနေသည့် ထိုဒေသများတွင် စစ်ကောင်စီက လေကြောင်းပါ သုံး၍ တုံ့ပြန်တိုက်ခိုက်နေသလို ရွာစဉ်လှည့် မီးရှို့မှုများ၊ အစုအပြုံလိုက်သတ်ဖြတ်မှုများ မကြာခဏ ပြုလုပ်နေသည်။

အရပ်ဘက်အချက်အလက်ကောက်ယူရေးအဖွဲ့ Data For Myanmar ၏ ဇွန်လဆန်းစာရင်းအရ နိုင်ငံအနှံ့တွင် စစ်ကောင်စီလက်ချက်ဖြင့် မီးလောင်သည့် ပြည်သူပိုင်အိုးအိမ် ၁၉,၀၀၀ နီးပါးရှိကာ ၁၇,၀၀၀ နီးပါးမှာ စစ်ကိုင်းနှင့် မကွေးတိုင်းတို့မှ ဖြစ်ကြောင်း တွေ့ရသည်။

မီးရှို့မှု၊ သတ်ဖြတ်မှုများမှာ ၎င်းတို့ လက်ချက်မဟုတ်ဟု စစ်ကောင်စီက ငြင်းလေ့ရှိသည်။ သို့သော် ၂၀၁၆၊ ၁၇ ခုနှစ်တွင် ရခိုင်ပြည်နယ်အတွင်း အလားတူကျူးလွန်မှုမျိုးဖြင့် စစ်ကောင်စီမှာ အပြည်ပြည်ဆိုင်ရာတရားရုံးတွင် အမှုရင်ဆိုင်နေရသည်။ myanmar now

ရန်ကုန် -မန္တလေးအမြန်လမ်းတွင် စစ်ကောင်စီက ခရီးသည်တစ်ဦးချင်းစီ၏ မှတ်ပုံတင်များကိုစစ်ဆေး ယာဥ်ကြောပိတ်ဆို့မှုဖြစ်ပွား

ရန်ကုန် -မန္တလေးအမြန်လမ်းတွင် စစ်ကောင်စီက ခရီးသည်တစ်ဦးချင်းစီ၏ မှတ်ပုံတင်များကို စစ်ဆေးနေခြင်းကြောင့် ယနေ့ဇူလိုင် ၆ ရက်နံနက်ပိုင်းတွင် အမြန်လမ်းမကြီးတစ်လျှောက်ယာဥ်ကြောများ ပိတ်ဆို့နေခဲ့ကြောင်း အဝေးပြေးယာဥ်မောင်းတစ်ဦးက ယနေ့ ညနေ ၄နာရီအချိန်တွင် မဇ္စျိမ ကိုပြောသည်။

စစ်ကောင်စီက ယာဥ်စစ်ဆေးမှုကို ယနေ့နံနက် ၁၀ နာရီအချိန်မှစတင်၍ ဘောနပ်ကြီးအလွန် ၄၁မိုင် အနီးရှိ စစ်ဆေးဂိတ်တွင် ရန်ကုန်ဘက်မှာလာသော ခရီးသည်တင်ကားများအပါအဝင် အိမ်စီးကားများကိုလည်း စစ်ဆေးနေခြင်းဖြစ်သည်ဟု ဆိုသည်။

“အိမ်စီးကားတွေလည်းစစ်တယ်။ ဒါပေမယ့်သူတို့ကတော့ လမ်းကြောင်းသက်သက်တစ်ခုဖွင့်ပြီးစစ်နေတာ။ မြန်တယ်။ အဓိက ယာဥ်ကြောရပ်တန့်နေတာက ခရီးတင်ကားကြီးတွေပေါ့။ မနက်ဘက်ထွက်တဲ့ကားတွေကို စစ်နေတာ။ ယာဥ်တန်းက မျက်စိတစ်ဆုံးပဲ။ တကယ်လို့ စစ် ဆေးတာမြန်ရင်ကောင်းတယ် မမြန်ဘဲ ရစ်နေရင်တော့ ညနေကားတွေ ညကားတွေပါဒုက္ခရောက်မှာ။ ကျွန်တော်တို့ကတော့ ကားသမားစကားအရ ရောက်တဲ့အချိန် ကိုယ့်အချိန်ပေါ့။ အချိန်နဲ့သွားရတဲ့ ခရီးသည်တွေဘဲ ဒုက္ခရောက်တာ။ လူအဖမ်းအဆီး ရှိမရှိတော့မကြားမိသေးဘူး။ အခုတော့ ကျွန်တော်တို့က ဂိတ်ကို ကျော်သွားပြီဆိုတော့ နောက်ဆုံးအခြေအနေ မသိရသေးဘူး”ဟု ဆိုသည်။

ယင်းအပြင် မန္တလေးမှ ရန်ကုန် ဘက်သို့လာသော ခရီးသည်ယာဥ်များကိုလည်း ၁၁၅မိုင်အနီးရှိ စစ်ဆေးရေးဂိတ် တစ်ခုတွင်လည်း စစ်ဆေးနေခြင်းများရှိသဖြင့် ယာဥ်ကြောရပ်တန့် ပိတ်ဆို့မှုများ ကြုံတွေ့နေရကြောင်း သိရသည်။

“အခုရက်ပိုင်း လမ်းဟောင်းရော လမ်းသစ်ရော အစစ်ဆေးများတယ်။ ဟိုအထောက်အထားပါရင် ဒီအထောက်အထားမပါဘူးလားဆိုပြီး ပြောတယ်။ မှတ်ပုံတင်ပြတော့လည်း ရပ်ကွက်နေထိုင်ကြောင်းပါရမယ် ဆိုပြီး ရစ်တယ်။ အဓိကလူငယ်တွေပါတဲ့ကားဆို ပြူးပြဲပြီးကို ရှာတာ” ဟု အဆိုပါလမ်းပိုင်းကို အမြဲအသုံးပြုနေသည့် နောက်ထပ်ယာဥ်မောင်းတစ်ဦးက ဆိုသည်။

လက်ရှိအချိန်အထိ ယာဥ်ကြောပိတ်ဆို့နေခြင်းရှိမရှိအတွက် အတည်ပြုနိုင်ရန် အမြန်လမ်းရဲတပ်ဖွဲထံ ဆက်သွယ်မေးမြန်သော်လည်း ဖုန်းလက်ခံဖြေဆိုခြင်းမရှိပေ။ mizzima

လောပိတ၊ ဘောလခဲနှင့် ဖယ်ခုံတွင် တိုက်ပွဲပြင်းထန်၊ ရွာသားများစစ်ဘေးရှောင်ထွက် ပြေး

ကရင်နီ(ကယား) ပြည်နယ်၊ လွိုင်ကော်မြို့နယ်၊ လောပိတမြို့အနီးမှာ ဇူလိုင် ၆ ရက် ဒီနေ့မနက်ကစပြီး စစ်ကောင်စီတပ်ဖွဲ့ဝင်တွေနဲ့ ကရင်နီပူးပေါင်းတပ်တို့ အကြားတိုက်ပွဲတွေ အပြင်းအထန် ဖြစ်ပွားနေပါတယ်။

ဒီမနက် ၇ နာရီလောက်ကတည်းကစပြီး စစ်ကောင်စီတပ်ဘက်က လက်နက်ကြီးတွေ၊ တိုက်လေယာဉ်၊ ရဟတ်ယာဉ်တွေနဲ့ ပစ်ခတ်တိုက်ခိုက်ခဲ့တာလို့ လောပိတဒေသခံတ ဦးက ပြောပါတယ်။

“မနက်ခင်းတုန်းကတော့ လက်ကြီးအသံကော၊ လက်နက်ငယ်အသံကော၊ လေယာဉ်ပျံကော၊ ဟတ်စကီးကောစုံနေတာပဲ။ တော်ရိုးကုန်းနားမှာ လက်နက်ကြီး နှစ်လုံးကျတယ်။ လေးအိမ်စု ရပ်ကွက်ထဲမှာ ကျတယ်။ အဲလိုမျိုးတော့ ကြားတယ်။ အပျက်အစီးတော့ မသိရပါဘူး။”

တိုက်ပွဲဖြစ်ပွားနေချိန်အတွင်း လောကထုကျေးရွာက ဒေသခံတယောက် ထွက်ပြေးရင်း လက်နက်ကြီးကျည်ထိမှန်သေဆုံးခဲ့တယ်လို့လည်း လောပိတဒေသခံက ပြောပါတယ်။

“မြို့ပေါ်ရပ်ကွက်ကလူတွေကတော့ ထွက်တော့မပြေးကြဘူး။ ဘုန်းကြီးကျောင်းတွေမှာ သွားပြီးသွားစုကြတယ်။ လောကထုမှာဖြစ်တဲ့နေရာမှာတော့ တချို့အိမ်တွေ ကျည်ဆန်ထိတယ်လို့ ကြားတယ်ဗျ။ ဘယ်သူမှလည်း အပြင်ထွက်မကြည့်ရဲဘူးလေ။ လောကထုမှာတော့ အရပ်သားတယောက် သေသွားတယ်လို့တော့ပြောတယ်။ တိုက်ပွဲက သေနတ်သံတွေကြား အိမ်ပေါ်ကဆင်းပြေးတာလား ဘယ်လိုမျိုးလည်းမသိဘူး။ ကြောက်ပြီးပြေးတဲ့အခါ ထိသွားတာ ထင်တယ်။”

တိုက်ပွဲကြောင့် ဒေသခံနေအိမ်တချို့ ကျည်ထိမှန် ပျက်စီးမှုတွေ ရှိနေတယ်လို့လည်း ဆိုပါတယ်။

ဒီကနေ့တိုက်ပွဲမှာ ကရင်နီပူးပေါင်းတပ်ဘက်က  တယောက်ကျဆုံးပြီး စစ်ကောင်စီဘက်က ၈ ယောက်ထက်မနည်းသေဆုံးကာ အများအပြား ဒဏ်ရာရရှိတယ်လို့ ဒေသ ကာကွယ်ရေးတပ်ဖွဲ့တွေဆီက သိရပါတယ်။

ဘောလဲခဲမြို့ပြင်ဘက်မှာလည်း  ဒီနေ့ညပိုင်းမှာလည်းတိုက်ပွဲတွေဖြစ်ပွားနေပြီး ည ၇ နာရီအထိ စစ်ကောင်စီဘက်က လက်နက်ကြီးတွေ ပစ် ခတ်နေကြောင်း ဒေသခံတွေက ပြောပါတယ်။ 

ဇူလိုင်လ ၄ ရက်ကလည်း  ရှမ်းပြည်တောင်ပိုင်း ဖယ်ခုံမြို့နယ်မှာ စစ်ကောင်စီရဲ့ လွယ်ပသာကုန်းစခန်းကို ကရင်နီပူးပေါင်းတပ်တွေက သွား ရောက်တိုက်ခိုက်ခဲ့ပြီး စစ်ကောင်စီဖက်က သာလွန်စစ်ကူနဲ့ လက်နက်ကြီး အသုံးပြုမှုကြောင့် ကရင်နီပူးပေါင်းတပ်ဖက် ၁၁  ယောက် ကျဆုံးခဲ့ရကြောင်း KNDF က ထုတ်ပြန်ထားပါတယ်။

အဲဒီတိုက်ပွဲမှာ စစ်ကောင်စီဖက်က ၄၀ ကျော်သေဆုံးခဲ့ပေမယ့် စခန်းသိမ်းမှုကို မအောင်မြင်ခဲ့ဘဲ ပြန်ဆုတ်ခွာခဲ့ရတယ်လို့ KNDF ဘက်က ဆိုပါတယ်။

ဖယ်ခုံမြို့နယ် ကုန်းဆုံနဲ့ လွယ်ပတာကျေးရွာအနီးရှိ စစ်ကောင်စီတပ်ရဲ့ လွယ်ပတာကုန်းစခန်းနဲ့ ရွှေပြည်အေးအနီးရှိ ကုန်းစခန်းတွေကို ဇူလိုင် ၄ ရက်၊ မနက် ၅ နာရီက ကရင်နီတပ်မတော် (KA)၊ KNDF၊ PDF (Phekhon)၊ SSRY အဖွဲ့တို့က ဝင်ရောက်တိုက်ခိုက်ခဲ့ပြီး  အပြန်အလှန်ပစ်ခတ်မှု ပြင်းထန်ခဲ့ကာ စစ်ကောင်စီတပ်ရဲ့ လွယ်ပတာကုန်းစခန်းကို သိမ်းပိုက်ရရှိလုနီးပါး ဖြစ်ခဲ့တယ်လို့ ထုတ်ပြန်ချက်အရ သိရပါတယ်။

တိုက်ပွဲမှာ စစ်ကောင်စီတပ်တွေထိခိုက်သေဆုံးဒဏ်ရာရတဲ့ အရေအတွက်အတိအကျ အတည်ပြုနိုင်ခြင်းမရှိသလို စစ်ကောင်စီသတင်းမှန်ပြန် ကြားရေးကလည်း တိုက်ပွဲမှာ ဒဏ်ရာရ သေဆုံးတဲ့ စစ်ကောင်စီတပ်တွေ သတင်းနဲ့ ပတ်သက်ပြီး အများပြည်သူသိအောင် အမှန်အတိုင်း ထုတ် ပြန်လေ့ မရှိပါဘူး။ DVB

တိုက်ပွဲဖြစ်ပွားပြီးနောက် မြောင်နယ် သူဌေးကုန်းရွာအား စစ်ကောင်စီမှ လေကြောင်းဖြင့် ဗုံးကြဲတိုက်ခိုက်

မကွေးတိုင်း၊ ရေစကြိုမြို့နယ်မှ မြောင်မြို့နယ်သို့ စစ်ကြောင်းထိုးလာသည့် အင်အား ၁၂၀ ဝန်းကျင်ရှိ စစ်ကောင်စီတပ်နှင့် ဒေသခံကာကွယ်ရေးတပ်ဖွဲ့များ ယနေ့နံနက် တိုက်ပွဲဖြစ်ပွားခဲ့ပြီးနောက် ထိုနေရာသို့ စစ်ကောင်စီတိုက်လေယာဥ် တစ်စီး လာရောက်ကာ ဗုံးကြဲချတိုက်ခိုက်ခဲ့ကြောင်း သိရသည်။

“တိုက်ပွဲဖြစ်တဲ့နေရာ တိတိကျကျကို လာချသွားတာ။ ကျွန်တော်လေယာဥ်သံကြားလို့ မော့ကြည့်လိုက်တဲ့အချိန်မှာ သူတို့ဒုံးနဲ့ပစ်တာပေါ့နော့။ ကျွန်တော်ကြည့်တဲ့အခါ ဟိုဘက်ဒုံးတစ်လုံး ဒီဘက်ဒုံးတစ်လုံး နှစ်လုံးယှဥ်ပစ်တာ ကျွန်တော်မြင်တယ်။ နောက်ထပ် နှစ်လုံးကတော့ အဲ့လေယာဥ်က ကျွန်တော်တို့ဘက်ကို ပြန်ပတ်လာလို့မလို့ သစ်ပင်အောက် ဝင်လိုက်တဲ့အချိန်မှာ နောက်ထပ်နှစ်လုံးကို ကျွန်တော်ကတော့ မမြင်တော့ဘူး။ အဲ့အချိန်ကျန်နေခဲ့တဲ့ ကျွန်တော့်ကင်းအဖွဲ့ကတော့ အားလုံးပေါင်း လေးလုံးချတယ်ဆိုပြီး သတင်းပို့တယ်” ဟု မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့ CDSOM ဦးဆောင်သူ ကိုနွေဦးက ပြောပြသည်။

တိုက်ပွဲဖြစ်ပွားခဲ့သည့် သူဌေးကုန်းရွာအား ယနေ့ ဇူလိုင်လ ၆ ရက် မွန်းလွဲ ၃ နာရီခန့်တွင် ဗုံးလေးလုံး ကြဲချတိုက်ခိုက်ရာ ပြည်သူနေအိမ် ငါးလုံးခန့် မီးလောင်ပျက်စီးခဲ့ရကြောင်းလည်း သိရှိရသည်။ ဒေသခံများမှာ တိုက်ပွဲရှောင်နေသည့်အတွက် အရပ်သားပြည်သူ ထိခိုက်မှုတော့ မရှိပေ။

ဖြစ်စဥ်မှာ ရေစကြိုမြို့နယ် ရွှေလှံရွာမှ မြောင်မြို့နယ် မြစ်သာရွာသို့ စစ်ကြောင်းထိုးလာသည့် အဆိုပါစစ်ကောင်စီတပ်အား သူဌေးကုန်းရွာနားအရောက်တွင် ကာကွယ်ရေးတပ်များက ကြားဖြတ်တိုက်ခိုက်ရာမှ အစပြုခြင်းဖြစ်သည်။

သူဌေးကုန်းရွာမှာ မြောင်မြို့နယ် တောင်ဘက်အစွန်းဆုံးရှိ ကျေးရွာဖြစ်ပြီး မြစ်သာရွာနှင့် ပေ ၁,၅၀၀ ခန့် ကွာဝေးသည်။

“မနက်တုန်းက ကျွန်တော်တို့တိုက်ပွဲဖြစ်တယ်။ အဲဒီမှာ သူတို့ ၃၀ ကျော်လောက်ကျတယ်။ ရွှေလှံရွာကနေပြီး အခုဗုံးကြဲခံရတဲ့ရွာ (သူဌေးကုန်းရွာ) လောက်အရောက်မှာ ကျွန်တော်တို့က ဖြတ်တိုက်တာ။ တကယ်က သူတို့က အဲဒီရွာကိုကျော်ပြီး မြစ်သာရွာကိုသွားတာ။ အဲဒီဖြတ်သွားတဲ့အချိန် တိုက်ပွဲဖြစ်တာ။ အဲဒီနောက်မှာ သူတို့မြစ်သာရွာကို ဝင်မီးရှို့တယ်။ မီးရှို့ပြီးတဲ့နောက် ညနေမှာ တိုက်ပွဲဖြစ်ခဲ့တဲ့နေရာကို ဗုံး လေးလုံးလာကြဲချတယ်” ဟု CDSOM ဦးဆောင်သူ ကိုနွေဦးက ပြောပြသည်။

ယနေ့ ဇူလိုင်လ ၆ ရက်၊ နံနက် ၇ နာရီ ၅၅ မိနစ် မှစ၍ အချိန်နှစ်နာရီခန့်ကြာအောင် ထိတွေ့တိုက်ပွဲဖြစ်ပွားခဲ့ကြောင်း CDSOM ဦးဆောင်သူထံမှ သိရသော်လည်း တိုက်ပွဲအကြောင်းအရာအသေးစိတ်ကိုမူ လုံခြုံရေးအရ ထုတ်ပြန်ခြင်း မရှိသေးပေ။

တိုက်ပွဲဖြစ်ပွားပြီးနောက် ၎င်းစစ်ကြောင်းမှာ မြစ်သာရွာသို့ ဆက်လက်ဝင်ရောက်ကာ နံနက် ၁၁ နာရီ ၅ မိနစ်တွင် နေအိမ်တချို့အား မီးရှို့မှု ပြုလုပ်ခဲ့သေးသည်။ လက်ရှိအချိန်ထိ မြစ်သာရွာထဲ တပ်စွဲထားဆဲဖြစ်၍ မီးရှို့ခံရသည့်နေအိမ်အရေအတွက်ကိုမူ မသိရသေးပေ။

ထို့နောက် မွန်းလွဲ ၃ နာရီ ၉ မိနစ်အချိန်မှစ၍ စစ်ကောင်စီ၏ Mi 35 တိုက်လေယာဥ်က တိုက်ပွဲဖြစ်ပွားခဲ့သည့် သူဌေးကုန်းရွာအား လာရောက်ဗုံးကြဲတိုက်ခိုက်ခြင်းဖြစ်သည်။

“လေယာဥ်က အများဆုံးကတော့ မုံရွာ နမခ (အနောက်မြောက်တိုင်းစစ်ဌာနချုပ်) ကပဲလာတယ်။ ကျွန်တော်တို့ဆီသတင်းပေးတာက Mi 35 တစ်စင်းတက်သွားပြီဆိုပြီး သတင်းပေးတာကတော့ မုံရွာဘက်ကပဲပေးတာ” ဟု သူက ဆက်ပြောသည်။

စစ်ကောင်စီတပ်သားများမှ မြောင်နယ် မြစ်သာရွာတွင်ရှိနေဆဲဖြစ်၍ တိုက်ပွဲအချိန်မရွေး ပြန်လည်ဖြစ်ပွားနိုင်သည့် အနေအထားလည်းဖြစ်သည်။

တိုက်ပွဲပြီးနောက် ပခုက္ကူဘက်မှ အင်အားအပြည့်ပါသည့် စစ်ကောင်စီတပ် ခြောက်ဘီးကား ငါးစီးထွက်ခွာလာကာ ရေစကြိုနယ်သို့ နှစ်စီးဝင်ရောက်လာပြီး နောက်ထပ် ရေလယ်ကျွန်းဒေသမှ အင်အားအပြည့်ပါသည့် စက်လှေတစ်စီးလည်း ရေစကြိုသို့ရောက်ရှိနေပြီဖြစ်ကြောင်း သိရသည်။ mizzima

တင်သားကျေးရွာက ဒေသခံ ၃ ဦးကို စစ်ကောင်စီတပ် ဖမ်းဆီး

စစ်ကိုင်းတိုင်း၊ ကလေးမြို့၊ အောင်သစ္စာရပ်ကွက်မှာ အိမ်ငှားနေထိုင်တဲ့ စစ်ဘေးရှောင် အမျိုးသမီးတယောက်ကို ဇူလိုင် ၄ ရက်က စစ်ကောင် စီတပ်တွေ ဖမ်းဆီးခေါ်ဆောင်သွားတယ်လို့ မြို့ခံတဦး‌က ပြောပါတယ်။

ဖမ်းဆီးခံအမျိုးသမီးဟာ ကလေးမြို့နယ် တင်သားကျေးရွာနေ အသက် ၄၀ ဝန်းကျင်အရွယ် ဒေါ်စစ်တိုဖြစ်ပြီး PDF ကို ထောက်ပံ့မှုနဲ့ သူ့ကို စစ်ကောင်စီတပ်က ဖမ်းဆီးခေါ်ဆောင်သွားတာလို့ နီးစပ်သူတဦးက ဒီဗွီဘီကို ပြောပါတယ်။

မေလနှောင်းပိုင်းကလည်း ကလေးမြို့နယ် တင်သားကျေးရွာကို စစ်ကောင်စီတပ်တွေ စစ်ကြောင်းထိုးဝင်ရောက်စဉ်က အခုဖမ်းဆီးခံရတဲ့ ဒေါ်စစ်တိုရဲ့ နေအိမ်ကို မီးရှို့ဖျက်ဆီးခဲ့ပါသေးတယ်။

ဇူလိုင် ၁ ရက်ကလည်း ကလေးမြို့ပေါ်မှာ ကလေးမြို့နဲ့ တင်သားကျေးရွာကို ပြေးဆွဲနေတဲ့ ကိုဇော်မင်းသန်းနဲ့ မနုနုဝေတို့ ဇနီးမောင်နှံကို စစ်ကောင်စီတပ်တွေက PDF ကို ထောက်ပံ့မှုနဲ့ ဖမ်းဆီးခဲ့ပါသေးတယ်။

အဆိုပါ ဖမ်းဆီးခံရတဲ့ မနုနုဝေဟာ စစ်ကောင်စီတပ်တွေက စစ်ကြောရေးမှာ ရိုက်နှက်တာကြောင့် ကိုယ်ဝန်ပျက်ကျကာ ဆေးရုံတင်ထားရတယ်လို့ နီးစပ်သူတွေက ပြောပါတယ်။

တင်သားရွာဒေသခံတယောက်က “မနာလို အကောက်ကြံ သတင်းပေးတဲ့သူတွေရှိလို့ ဖမ်းဆီးခံရတာ၊ ဖမ်းခံရတဲ့သူတွေက ဘယ်အဖွဲ့အစည်းမှ ပါဝင်ခြင်းမရှိသလို ဘယ်သူ့ကိုမှ ထောက်ပံ့ခြင်းလည်း မရှိဘူး” လို့ ပြောပါတယ်။

စစ်တပ်ကအာဏာသိမ်းပြီးနောက်ပိုင်း ကလေးမြို့နယ် တင်သားကျေးရွာမှာ မှန်တောကျေးရွာ CDM ကျောင်းအုပ်ဆရာကြီး ဦးကျော်မင်းနိုင် အပါအဝင် စစ်ကောင်စီတပ်ရဲ့ ဖမ်းဆီးခြင်းခံထားရသူ ၃၀ ဝန်းကျင်ရှိပြီး စစ်ကြောရေးမှာ သတ်ဖြတ်ခံရသူ ၄ ဦးအထိ ရှိလာပြီဖြစ်ပါတယ်။ DVB

ရန်ကုန်မြို့ရှိ UG အဖွဲ့များ၏သတင်း လိုက်လံစုံစမ်းနေသည့် လင်မယားပစ်ခတ်ခံရ

ရန်ကုန်မြို့ရှိ မြေအောက်တော်လှန်ရေးလုပ်ဆောင်နေသော UG အဖွဲ့များ၏ သတင်းကို လိုက်လံစုံစမ်း၍ စစ်ကောင်စီထံသတင်းပေးနေသည့်လင်မယားနှစ်ဦးကို ပစ်ခတ်ရှင်းလင်းခဲ့သည်ဟု SOULS TAKERS-YANGON UNDERGROUND FORCE အဖွဲ့မှ ထုတ်ပြန်ထားသည်။

သာကေတမြို့နယ်၊ ၄ တောင်ရပ်ကွက်၊ ကန်ဘောင် ၉ လမ်းအတွင်းနေထိုင်သည့် ရာအိမ်မှူး ဦးသိန်းအောင်နှင့် ၎င်း၏အမျိုးသမီးဖြစ်သူတို့ဖြစ်ပြီး ဇူလိုင် ၅ ရက် ည ၈နာရီ ၂၅ မိနစ်အချိန်တွင် ပစ်ခတ်ခံခဲ့ရခြင်း ဖြစ်သည်။

၎င်းတို့နေထိုင်ရာ အိမ်အတွင်း ဝင်ရောက်ရှင်းလင်းခဲ့ခြင်းဖြစ်ပြီး ရာအိမ်မှူးဦးသိန်းအောင် သေဆုံးခဲ့ကာ မိန်းမဖြစ်သူမှာ ပြင်းထန်ဒဏ်ရာရရှိခဲ့ကြောင်း သိရသည်။

SOULS TAKERS-YANGON UNDERGROUND FORCE အဖွဲ့မှ ရဲဘော်များအနေဖြင့် ည ၁၀ နာရီအချိန်တွင် အထိအခိုက်မရှိပြန်လည်ဆုတ်ခွာနိုင်ခဲ့သော်လည်း စစ်ကောင်စီမှနေရာအနှံ့လိုက်လံ စစ်ဆေးမှုများ ပြုလုပ်ခဲ့ကြောင်း ထုတ်ပြန်ချက်တွင် ဖော်ပြထားသည်။

ထို့ကြောင့် ရန်ကုန်မြို့ရှိ တော်လှန်ရေးရဲဘော်များနှင့် မိဘပြည်သူများအနေဖြင့် သတိထားသွားလာကြရန်နှင့် ဧည့်စာရင်းစစ်ခံရခြင်းများအပေါ် ဂရုတစိုက်နေထိုင်ကြရန် အသိပေးထားသည်။ mizzima

မြောင်တိုက်ပွဲတွင် စစ်ကောင်စီတပ်ရင်းမှူးနှင့် ဗိုလ်ကြီး ၂ ဦးသေဆုံး

စစ်ကိုင်းတိုင်း၊ မြောင်မြို့နယ်ကို စစ်ကြောင်းထိုးနေတဲ့ စစ်ကောင်စီတပ်ဟာ ဇူလိုင် ၆ ရက် ဒီနေ့မနက်ပိုင်းက ဒေသခံပြည်သူ့ကာကွယ်ရေးတပ်တွေနဲ့ တိုက်ပွဲဖြစ်ပွားခဲ့တယ်လို့ CDSOM တပ်ဖွဲ့က  ‌ပြောပါတယ်။

မြောင်မြို့နယ် ပြည်သူ့ကာကွယ်ရေးနဲ့ လုံခြုံရေးတပ်ဖွဲ့ (CDSOM) တပ်ဖွဲ့ဝင်တဦးက “မနက်ကတော့ အပြန်အလှန်ပစ်ခတ်တယ်။ တိုက်ပွဲအ ခြေအနေက အတည်ပြုလို့ မရသေးဘူးဗျ။ တပ်ရင်းမှူးတကောင်နဲ့ ၃ ပွင့် ၂ ကောင်ကျတယ် ကြားထားတယ်ဗျ။ ကျနော်တို့ဘက်က ကျည်ရှပ်မှန်တာ ဘာညာပဲ ရှိတယ်ဗျ။ နည်းနည်းပါးပါးပေါ့၊ ပါးကို ကျည်ရှပ်မှန်တာပေါ့။ မနက်ပိုင်းက တိုက်ပွဲကြာချိန် တနာရီလောက်ကြာတယ်” လို့ ပြောပါတယ်။

အဆိုပါစစ်ကောင်စီတပ်ဟာ မြောင်မြို့နယ်နဲ့ ရေစကြိုမြို့နယ်ကို စစ်ကြောင်းထိုးနေတာဖြစ်ပြီး မနက်ပိုင်းစစ်ပွဲအပြီး နေ့လယ်ပိုင်းမှာ မြောင်မြို့နယ်နဲ့ ရေစကြိုမြို့နယ် အစပ်ကြားက မြစ်သာကျေးရွာနဲ့ အနီးတဝိုက် ကျေးရွာတွေကို လေယာဉ်နဲ့ ပစ်ခတ်ခဲ့တယ်လို့ ဒေသခံတွေက ပြောပါတယ်။

မြောင်မြို့နယ် ဒေသခံတဦးက “လေယာဉ်နဲ့ပစ်နေတယ်၊ အခုဆုတ်သွားပြီဗျ။ မြစ်သာရွာထဲမှာ မီးရှို့နေတယ်ဗျ။ လတ်တလောတော့ မြစ်သာရွာထဲမှာ တပ်စွဲထားတုန်းဗျ။ ရွာထဲ သက်ကြီးရွယ်အိုလောက်ပဲ ကျန်တာဗျ။ ကျန်တဲ့သူတွေက အကုန်စစ်ဘေးရှောင်ရတာပေါ့ဗျာ။ သက်ကြီးရွယ်အိုတွေကျ ဘုန်းကြီးကျောင်းမှာပဲ နေတယ်ဗျ။ ရွာအထိခိုက်ကို မသိရသေးဘူး။ မြစ်သာရွာဘေး ပတ်ပတ်လည်တွေကိုရော ပစ်သွားတယ်ဗျ” လို့ ပြောပါတယ်။

လေယာဉ်ပေါ်တင်ပစ်ရတဲ့ MI-35 စက်လက်နက်အကြီးစားမျိုးနဲ့ ပစ်ခတ်ခဲ့တာလို့ ဒေသခံ ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။

ရေစကြို-မြောင် နယ်စပ်အနီးက ကျေးရွာဒေသခံတဦးက “ရေစကြိုနဲ့ မြောင်နယ်စပ် မြစ်သာရွာနဲ့၊ မြစ်ဆုံရွာကြားမှာ ကြဲနေတာပါ၊ အထက်ရော အောက်ရော အသံတွေ ဆူညံသွားတာပဲ။ မနက်က ကာကွယ်ရေးတပ်ဖွဲ့တွေနဲ့ တိုက်ပွဲဖြစ်တာ စစ်(–) တွေ သေကြတယ်ကြားတယ်” လို့ ပြောပါတယ်။

လေယာဉ်နဲ့ ပစ်ခတ်တိုက်ခိုက်တာဟာ မြောင်နယ်မှာ ဒုတိယအကြိမ်မြောက် ပစ်ခတ်ခံရတာဖြစ်ပြီး လွန်ခဲ့တဲ့ တလနီးပါးလောက်ကလည်း တကြိမ်ပစ်ခတ်ခံခဲ့ရတယ်လို့ သိရပါတယ်။ DVB

ရန်ကုန် ဆူးလေလမ်းနှင့် ကမ်းနားလမ်းထောင့် ညစျေးအနီးတွင် လုံခြုံရေးယူ ထားသည့် စစ် တပ်နှင့်ရဲကင်းကို ဗုံးဖြင့် ပစ်၊ ဗုံးပေါက်ကွဲမှုကြောင့် စစ်သားများ သေဆုံး ထိခိုက်မှုများနိုင်

ရန်ကုန် ဆူးလေလမ်းနှင့် ကမ်းနားလမ်းထောင့် ညစျေးအနီးတွင် လုံခြုံရေးယူထားသည့် စစ်တပ်နှင့်ရဲကင်းကို လက်ပစ်ဗုံးဖြင့် ပစ်ပေါက်တိုက်ခိုက်ပြီး စစ်သား သေဆုံး ထိခိုက်မှုရှိနိုင်ကြောင်း ဒေသခံများနှင့် ဒေသပျောက်ကျားတပ်ဖွဲ့ထံမှ သိရှိရသည်။

ယနေ့ ညနေ ၆ နာရီ ၂၀ မိနစ်အချိန် ရန်ကုန်မြို့ ကျောက်တံတား မြို့နယ် ဆူးလေ ဘုရားလမ်းနှင့် ကမ်းနား လမ်းထောင့် ကမ်းနားလမ်း၊ ညစျေး The Box နှင့် Hiso Heaven Bar နှစ်ခုအကြားတွင် စစ်သားနှင့်လုံခြုံရေးရဲကင်းစခန်းကို လက်ပစ်ဗုံးဖြင့် ပစ်ခတ်တိုက်ခိုက်ခဲ့ကြောင်း၊ ဗုံးမပေါက်ကွဲခဲ့ဘဲ စစ်တပ်က လာရောက်စစ်ဆေးနေချိန်ညနေ ၆ နာရီ ၅၅ မိနစ်တွင် ဗုံးပေါက်ကွဲသွားပြီး စစ်သား သေဆုံးမှုများပြားနိုင်ကြောင်း ၊ အဆိုပါတိုက်ခိုက်မှုကို Mother Son Yangon Force တပ်ရင်း ၁ နှင့် UG.47 အဖွဲ့မှ ပူးပေါင်းတိုက် ခိုက်ခြင်းဖြစ်ကြောင်း Mother Son Yangon Force တော်လှန်ရေးအဖွဲ့ မှ ဗိုလ်နိုင်က ရန်ကုန်ခေတ် သစ် မီဒီယာသို့ ပြောဆိုသည်။

” ကျောက်တံတားမြို့နယ် ဆူးလေ ဘုရားလမ်းနဲ့ ကမ်းနားလမ်းထောင့်မှာ ဘားနှစ်ခု ကြားထဲက ရဲကင်းကို ဗုံးနဲ့ ပစ်ပေါက်တယ်။ ဗုံးက မကွဲဘူး။ ပစ်ပေါက်တာက ၆ နာရီ ၂၀ မိနစ်အချိန်။ အဲဒီမှာ ညနေ ၆ နာရီ ၅၅ မိနစ်မှာ စစ်ခွေးကား ၂ စီးနဲ့လာစစ်တယ်။ စစ်တဲ့အချိန်မှာ ဗုံးက ထကွဲတာ။ စစ်ခွေးအသေတော့ တော် တော်များနိုင်တယ်။ ကမ်းနားလမ်းကိုတော့ ပိတ်စစ်တာတွေရှိတယ်။ ပြည်သူတွေ အနေနဲ့လည်း စစ်ခွေးတွေပိုင်တဲ့နေရာတွေ အဆောက်အအုံတွေနဲ့ ခပ်ခွာခွာနေပေးဖို့ တောင်းဆိုပါတယ်။ အဲဒီ The Box ဘားနဲ့Hiso Heaven Bar ကြားမှာ စစ်ခွေးရဲကင်းက အမြဲစောင့်ပေးနေတာပါ “ဟု Mother Son Yangon Force တပ်ရင်း ၁ မှ ဦးစီးမှူး ဗိုလ်နိုင်က ပြောဆိုသည်။

ဓာတ်ပုံ- ဗုံးပေါက်ကွဲမှုဖြစ်ပွားသော နေရာအနီးရှိ The Box ဘားဖြစ်ပြီး The Boxနှင့်Hiso Heaven Barအကြားတွင် ရဲနှင့်စစ်တပ် ကင်းစခန်း ချထားခြင်း ဖြစ်သည်။ khit thit

နွားထိုးကြီး ပြည်သူ့ကာကွယ်ရေးတပ်ဖွဲ့ စခန်း စီးနင်းခံရ

မန္တလေးတိုင်း၊ နွားထိုးကြီးမြို့နယ် အခြေစိုက် ပြည်သူ့ကာကွယ်ရေးအဖွဲ့တစ်ခုဖြစ်သည့် Natogyi People Defence Force ၏ စခန်းတစ်ခုကို စစ်ကောင်စီတပ်က ဝင်ရောက်စီးနင်းခဲ့ကြောင်း ၎င်းတို့၏ လူမှုကွန်ရက်စာမျက်နှာမှ တစ်ဆင့် ယနေ့ ဇွန်လ ၆ ရက်နေ့တွင် သတင်းထုတ်ပြန် သည်။

ဇူလိုင်လ ၃ ရက်နေ့တွင် စစ်ကောင်စီတပ်က စခန်းဝင်ရောက်စီးနင်းခဲ့ခြင်းဖြစ်ပြီး လက်နက်ခဲယမ်းများ ဆုံးရှုံးရကာ စားဖိုမှူးတစ်ဦးလည်းဖမ်း ဆီးခံရကြောင်း Natogyi-PDF မှတာဝန်ရှိသူက ပြောသည်။

“ ရွာထဲက ရွာသားတစ်ယောက် တောထွက်တဲ့အချိန် သူတို့ (စစ်ကောင်စီတပ်)နဲ့ တိုးတော့ ဖမ်းပြီးတော့ရိုက်တဲ့အခါကျတော့ ရွာသားကဖော်လို့ပါ။ အင်အား ၅၀လောက်နဲ့ဝင်တာ။ သူတို့က စခန်းကို အတိကျသိပြီးတော့ ဝင်တာဆိုတော့လေ သုံးပတ်ကိုဝိုင်းပြီးတော့ ဝင်တာ။ လွတ်တဲ့တစ်ဖက်ကနေ ကျွန်တော်တို့က ဖောက်ထွက်လာရတာ” ဟု NPDF မှ တာဝန်ရှိသူတစ်ဦးက ပြောသည်။

စစ်ကောင်စီတပ်၏ ဖမ်းဆီးခြင်းခံရသည့် စားဖိုမှူးကို ဝက်လူးမြို့နယ်ရဲစခန်း စစ်ကြောရေးတွင် စစ်ဆေးနေကြောင်း ၎င်းကဆက်လက်ပြော သည်။

ပြည်သူလူထုမှ ထောက်ပံ့ပေးထားသည့် လက်နက်ခဲယမ်းများကို ဆုံးရှုံးခဲ့ရသည့်အတွက် NPDF အဖွဲ့မှ တောင်းပန်ကြောင်း၊ မိမိတို့အဖွဲ့အ နေဖြင့် တော်လှန်ရေးပြီးဆုံးသည်အထိ ဆက်လက် ရပ်တည်‌နိူင်ရေးအတွက် ထောက်ပံ့ပေးကြပါရန် အကူအညီ တောင်းခံအပ်ပါကြောင်း ထုတ်ပြန်ထားသည်။ mizzima

« Older Entries