Monthly Archives: Jul 2022

ရေးတွင် မူးယစ်ဆေးဝါးဖြန့်ချိနေသည့် အဖွဲ့ကို YGF ဝင်ရောက်ဖမ်းဆီး၊ ငွေ သိန်း ၇၀ ကျပ်၊ ဆိုင်ကယ်၊ ကားများကို ဖမ်းဆီးရမိပြီး မူးယစ်ဆေးဝါးများကို မီးရှို့ဖျက်ဆီး

မွန်ပြည်နယ်၊ ရေးမြို့တွင် မူးယစ်ဆေးဝါး သုံးစွဲ၊ ဖြန့်ချိနေသော အဖွဲ့ ၁ ဖွဲ့ကို ရေး ပြောက်ကျားတပ်ဖွဲ့ YGF က ဇူလိုင်လ ၅ ရက်နေ့တွင် ဝင်ရောက်ဖမ်းဆီးပြီး ဖမ်းဆီးရမိသည့် မူးယစ်ဆေးဝါးများကို မီးရှို့ဖျက်ဆီးလိုက်ကြောင်း သတင်းရရှိသည်။

ဝင်ရောက်ဖမ်းဆီးရာတွင် အမျိုးသား ၁၂ ဦးနှင့်အတူ WY စိတ်ကြွဆေးပြား ၂၆၄ ပြား၊ ဘိန်းစာရွက်များထည့်ထားသော ကြွပ်ကြွပ်အိတ် ၅၀ အိတ်၊ ဆိုင်ကယ် ၇ စီး၊ ကား ၁ စီးနှင့် ငွေ သိန်း ၇၀ ကျပ်တို့ကို ဖမ်ဆီးရမိခဲ့ခြင်းဖြစ်သည်။

“ပြည်သူတွေ သတင်းပေးချက်အရ ဝင်ဖမ်းတာပါ၊ မူးယစ်ဆေးတွေကို မီးရှို့လိုက်တယ်၊ ပစ္စည်းတွေ သိမ်းလိုက်တယ်၊ လူတွေကိုတော့ နောက် ထပ်မလုပ်ဖို့ သတိပေးပြီး ပြန်လွှတ်လိုက်ပါတယ်” ဟု YGF တပ်ခွဲ၃ တပ်ခွဲမှူး ဗိုလ်ရန်ပိုင် က ရန်ကုန်ခေတ်သစ်သို့ ပြောဆိုသည်။

ရေးပြောက်ကျားတပ်ဖွဲ့ YGF သည် ရှေ့ဆက်ပြီး အကြမ်းဖက်စစ်ကောင်စီကို တိုက်ခိုက်သွားမည်ဖြစ်သလို လက်ရှိကာလတွင် အနာဂါတ်လူ ငယ်များကို ဖျက်ဆီးနေသည့် မည်သည့်မူးယစ်ဆေးဖြန့်ဖြူးသည့်အဖွဲ့ကိုမဆို အခါအားလျော်စွာ ရှာဖွေဖမ်းဆီးအရေးယူသွားမည်ဟု YGF က ထုတ်ပြန်ထားသည်။ khit thit

Hyundai ကားစက်ရုံကို စစ်ကောင်စီက ထုတ်လုပ်ခွင့်လိုင်စင် ပါမစ်ရပ်ဆိုင်း

ပြည်တွင်းမှာ SKD (Semi Knocked Down)စနစ်နဲ့ တပ်ဆင်ထုတ်လုပ်နေတဲ့ Hyundai  ကားစက်ရုံကို စစ်ကောင်စီက ထုတ်လုပ်ခွင့်လိုင်စင် ပါမစ် ရပ်ဆိုင်းထားတာကြောင့် ကားအရောင်းပြခန်းတွေအားလုံး အရောင်းရပ်နားထားတယ်လို့ အရောင်းတာဝန်ခံတွေက ပြောပါတယ်။

Hyundai motor dealership လိုင်စင်ရရှိထားတဲ့ အရောင်းပြခန်းတာဝန်ခံတဦးက  “အခုလောလောဆယ်မှာ ပါမစ်က ပိတ်ထားတဲ့အပြင် showroom တွေမှာလည်း လက်ကျန်ကားက မရှိလို့ အရောင်း ရပ်ထားပါတယ်။ ဘယ်တော့လောက် ပြန်ရနိုင်မလဲ ဆိုတာကတော့ မသိရသေးလို့ မပြောနိုင်သေးပါဘူး။ နောက်ဆုံး ရောင်းလိုက်တဲ့ ဈေးက Hyundai Accent အမျိုးအစား 2022 model ကို ဒေါ်လာ ၂၂,၆၀၀ ပါ။ အခုတော့ အပြင်မှာ ဘယ်လောက်နဲ့ အရောင်းအဝယ်ဖြစ်လည်းတော့ မသိဘူးနော်။ ပါမစ် ပြန်ရပြီး ထုတ်လုပ်မှုတွေ ပြန်စပြီဆိုတာနဲ့ showroom တွေမှာ အရင်လို ပြန်ရောင်းပေးမှာပါ” လို့ပြောပါတယ်။

ဂျပန်ကားကုမ္ပဏီကြီး  Suzuki အမှတ်တံဆိပ် မော်တော်ယာဉ်ထုတ်လုပ်ရေးစက်ရုံကလည်း ပစ္စည်းတင်သွင်းရ ခက်ခဲလာလို့ လတ်တလောမှာ ကားထုတ်လုပ်မှုကို ယာယီရပ်ဆိုင်းထားတဲ့အကြောင်း Suzuki Myanmar Motor ကုမ္ပဏီက တရားဝင် ပြောဆိုထားပါတယ်။

ဒီအကျိုးဆက်ကြောင့် ကားဝယ်ရောင်းဈေးကွက်မှာ SKD ထုတ်ကားဈေး နဲ့ ဂျပန်(used)ကားဈေးတွေက အပြိုင်အဆိုင် ဈေးတက်လာပါတယ်။

ဝယ်ရောင်းလုပ်ကိုင်နေသူတဦးက “SKD ထုတ်ဈေးကွက်ထဲမှာဆိုရင် Hyundai က Suzuki ပြီးရင် သူက ဒုတိယ လိုက်တာနော်။ Hyundai brand ထဲမှာဆိုရင် Accent နဲ့  Tuscon ဒါတွေက လူကြိုက်များတယ်။ Suzuki brand မှာဆိုရင်လည်း Ertiga နဲ့ Ciaz က လူကြိုက်များတယ်။ အဲ့လို ရှိတယ်။ ဈေးအရဆိုရင်လည်း Suzuki Ciaz  က သိန်း ၃၅၀ ပေါက်ရင် Hyundia Accent ကလည်း သိန်း ၃၄၀ နဲ့ ၃၅၀ ကြား သွားတယ်နော်။ ရန်ကုန် Q -အက္ခရာ တန်းပေါ့။ ဒါပေမဲ့ ယှဉ်ရောင်းရင်တော့ Hyundai Accent က Suzuki Ciaz ရဲ့ ဈေးနည်းနည်း အောက်မှာ ခွာပြီး ရောင်းရတယ်။ အဲ့ဒီ့ကားတွေရဲ့ စက်ရုံထုတ်ဈေးက သိန်း ၂၈၀ လောက်ဘဲ ရှိခဲ့တာ။ model ကတော့ ၂၀၂၀ ဝန်းကျင်ပေါ့နော်” လို့ ပြောပါတယ်။

ဂျပန်(used)ကားတွေကိုသာ ဝယ်ရောင်းလုပ်ကိုင်နေသူကလည်း “အခုအချိန်က ဘယ်သူ့မျှ ထုတ်မရောင်းတော့ဘူး။ ငွေလိုတဲ့ သူလောက်ဘဲ ထုတ်ရောင်းတဲ့ ပုံစံ ဖြစ်နေတာ။ ဈေးကတော့ မာတယ်နော်။ အရောင်းအဝယ်က အရမ်းကြီး သွက်တဲ့ အထဲမှာ မရှိဘူး။ ဒါပေမဲ့ အားလုံးက စောင့်ကြည့်နေတဲ့ ကာလဖြစ်နေတယ်။ ဈေးက ပြီးခဲ့တဲ့ တပတ် နဲ့ ယှဉ်ရင် ပြန်တက် လာတယ်။ အရင်က ကျပ်သိန်း ၁၈၀ ခေါ်တဲ့ကားက အခုဆိုရင် သိန်း ၁၉၀ နဲ့ ၁၉၅ အထိ ဈေးခေါ်နေကြတာ။ သူက မရောင်းရရင်လည်း နေပေါ့။ ဈေးကို နည်းနည်းဟပြီး ဖွင့်ထား လိုက်တယ်။ တကယ်လို့ အဲ့ဒီ့ဈေးနဲ့ လာဝယ်ရင် ရောင်းပေးလိုက်တယ်” လို့ ဒီဗွီဘီကို ပြောပါ တယ်။

ကိုရီးယားအခြေစိုက် Hyundai ကားထုတ်လုပ်ရေးကုမ္ပဏီကြီးက မြန်မာနိုင်ငံမှာ SKD (Semi Knocked Down)စနစ်နဲ့ လာရောက်တပ်ဆင်ထုတ်လုပ်ဖို့အတွက် ပြီးခဲ့တဲ့ ၂၀၁၉ ခုနှစ်ကတည်းက ဝင်ရောက်ခဲ့တာပါ။

ထုတ်လုပ်ရေးအတွက် ရန်ကုန်မြို့ ရွှေပြည်သာမြို့နယ်ရှိ သာဓုကန် စက်မှုဇုန်မှာ စက်ရုံတည်ထားပြီး ပြည်တွင်းဈေးကွက်အတွက် Accent ၊ Sonata ၊ Reina ၊ Creta ၊ Tuscon ၊ H-1 နဲ့ H-100 ဆိုပြီး အိမ်သုံး နဲ့ လုပ်ငန်းသုံး ယာဉ်အမျိုးအစားတွေကို ထုတ်လုပ်နေတာ ဖြစ်ပါတယ်။ ဒီ့အတွက်လည်း  အမေရိကန်ဒေါ်လာ ၉ ဒသမ ၈ သန်းကျော် ရင်းနှီးမြှုပ်နှံထားပါတယ်။ DVB

မြန်မာတိုက်လေယာဉ်ကျူးကျော်ဝင်လာသည့်ကိစ္စ ထိုင်းနှင့် မြန်မာစစ်တပ် ပူးပေါင်းကြံစည်ခြင်း ရှိ မရှိ လွှတ်တော်က စစ်ဆေးပေးရန် တောင်းဆို

ပြီးခဲ့တဲ့ ဇွန်လကုန်ပိုင်းက  မြန်မာစစ်တပ်ရဲ့ တိုက်လေယာဉ်တစီး ထိုင်းဘက်ခြမ်း တာ့ခ်ခရိုင် ဖုပ်ဖရမြို့နယ်ထဲကို နယ်ကျွံဝင်ရောက်လာတဲ့ကိစ္စနဲ့ပတ်သက်လို့ မြန်မာဘက်က တောင်းပန်ပြီးဖြစ်လို့ ကြီးမားတဲ့ ပြဿနာမဟုတ်ကြောင်း ထိုင်းဝန်ကြီးချုပ်က ပြောကြားခဲ့ပေမဲ့ ထိုင်းပြည်သူတွေကြားမှာတော့ ဝေဖန်မှုတွေ ဆက်လက် မြင့်တက်နေပါတယ်။

နွန်ထပူရီခေတ်သစ်လူငယ်အဖွဲ့နဲ့ ဒီမိုကရေစီလို့ အမည်ပေးထားတဲ့အဖွဲ့ နှစ်ဖွဲ့ရဲ့ ကိုယ်စားလှယ်တွေဟာ မကြာသေးခင်ရက်ပိုင်းတွေက ထိုင်းအမျိုးသားလွှတ်တော်ဆီ အသီးသီးသွားရောက်ခဲ့ပြီး မြန်မာတိုက်လေယာဉ်ကိစ္စနဲ့ ပတ်သက်လို့ ပြည်သူတွေ ရှင်းရှင်းလင်းလင်း သိရအောင် စုံစမ်းဖော်ထုတ်ပေးဖို့ တောင်းဆိုခဲ့ကြပါတယ်။ 

တောင်းဆိုတဲ့အဖွဲ့တဖွဲ့မှ နန်းဆောင်အားထစ်ယာ ဖွန်းဖရူမ်းက “ပြီးခဲ့တဲ့ ဇွန်လ ၃၀ ရက် မနက် ၁၁ နာရီ ၁၆ မိနစ်က မြန်မာဘက်က တိုက် လေယာဉ် MIG 16 ထိုင်းဘက်ကို လာရောက်ဝဲပျံသွားတယ်။ ထိုင်းရွာသားတွေ အထိတ်တလန့် ပုန်းရှောင်ပြီး စာသင်ကျောင်းလည်း အရေးပေါ်ပိတ်ခဲ့ရတယ်။ မြန်မာဘက်ခြမ်းက စစ်ဘေးရှောင် ၅၇၆ ဦး ထိုင်းဘက် ထွက်ပြေးလာရတယ်၊။ ဒဏ်ရာရသူတွေလည်းရှိပြီး ထိုင်းမှာ ဆေးလာကုရတယ်၊ အဲဒီကိစ္စကို ဇူလိုင် ၁ ရက်နေ့မှာ ဝန်ကြီးချုပ်ပရယုဒ်က မြန်မာဘက်က လေယာဉ်နောက်ပြန်ချိုးကွေ့စဉ် ထိုင်းဧရိယာထဲ နည်းနည်းကျွံဝင်လာတာ၊ သူတို့ တောင်းပန်ပြီးပြီ ကြီးမားတဲ့ပြဿနာမဟုတ်ဘူးလို့ ပြောခဲ့တယ်။ ကျမတို့ပြည်သူတွေအနေနနဲ့ကတော့ ဒါဟာ ထိုင်းအချုပ်အခြာအာဏာကို ထိပါးတယ်လို့ ယူဆတယ်။ ပြီးတော့ မြန်မာစစ်တပ်ဟာ ထိုင်းနယ်မြေကို အသုံးချပြီး   ကရင်တော်လှန်ရေးအဖွဲ့ တွေ၊ ကရင်တိုင်းရင်းသားတွေကို ချေမှုန်းတဲ့နေတဲ့ စစ်ရာဇဝတ်မှု ကျူးလွန်တာကို ထိုင်းစစ်တပ်က အားပေးတယ်လို့ယူဆတယ်” လို့ သတင်း ထောက်တွေကို ပြောပါတယ်။ 

နိုင်းဆုမ်ယုဒ် ဖိုတ်စဖားကဆဲမ်ဆုခ်ကလည်း မြန်မာ့တိုက်လေယာဉ် မလာခင်ရှေ့ ဇွန်လ ၂၉ ရက်နေ့မှာ ထိုင်းအမှတ် ၃ စစ်ဌာနချုပ် တိုင်းမှူး ဗိုလ်ချုပ်ကြီး အဖိချိတ်ဆုဆတ်က နေပြည်တော်သွားပြီး မြန်မာ့တပ်မတော်အကြီးအကဲတွေနဲ့ တွေ့ခဲ့သေးတယ်၊ ဒါကြောင့် မြန်မာစစ်တပ်ကထိုင်းပိုင်နက်ကို အသုံးပြုခွင့်တောင်းခဲ့တာလား၊ နယ်စပ်လက်နက်ကိုင်အဖွဲ့တွေကို ပူးပေါင်း ချေမှုန်းဖို့ အတူကြံရွယ်ခဲ့တာလားလို့ သံသယရှိကြောင်း ပြောပါတယ်။

ဒါ့ကြောင့် လွှတ်တော်ကိုယ်စားလှယ်တွေအနေနဲ့ အောက်ပါ အချက် ၅ ချက်ကို စုံစမ်းစစ်ဆေးပြီး ပြည်သူတွေကို ချပြစေလိုကြောင်း ပြောပါတယ်။

အဆိုပါ ၅ ချက်ထဲမှာ နိုင်ငံတော်ရံပုံငွေကိုများစွာသုံးစွဲပြီ နိုင်ငံတော်ရဲ့အချုပ်အခြာကို မကာကွယ်တဲ့ ထိုင်းလေတပ်ရဲ့ ၂၀၂၃ ဘတ်ဂျက်အသုံး စရိတ်ကို စိစစ်ဖို့၊   ကရင်လက်နက်ကိုင်တော် လှန်ရေးအဖွဲ့တွေကို နှိမ်နင်းဖို့အတွက် ထိုင်းပိုင်နက်ကို အသုံးပြုတာဟာ ထိုင်း၊ မြန်မာ နှစ်ဘက် စစ်တပ်ပူးပေါင်းကြံရွယ်မှု ဟုတ်မဟုတ် စစ်ဆေးဖို့၊ ပြီးခဲ့တဲ့ ဇွန်လ ၂၇ ရက်နေ့က မြန်မာစစ်သား ၁၀၀ လောက် လက်နက်အပြည့်အစုံနဲ့ ထိုင်းဘက်ခြမ်းကနေပတ်ပြီး ကရင်ပြည်နယ်ဆုံဆည်းမြိုင် ဘက်ဝင်ရောက်သွားတာဘာကြောင့်လဲ၊ မြန်မာဘက်ကတိုက်လေယာဉ်ဝင်လာတဲ့အတွက် ထိုင်းရွာသားတွေအပေါ် ထိခိုက်နစ်နာမှုကို စစ်ဆေးပြီး တာဝန်ယူ၊ တာဝန်ခံပေးဖို့နဲ့  တိုက်လေယာဉ်ဝင်လာတဲ့အပေါ် နှုတ်နဲ့တောင်း ပန် ရုံနဲ့ ကျေအေးလိုက်တာဟာ ထိုင်းနိုင်ငံသိက္ခာ ကျဆင်းစေလို့ မြန်မာအစိုးရနဲ့ မြန်မာ့တပ်မတော်ကာကွယ်ရေးဦးစီးချုပ်အနေနဲ့ စာနဲ့တရား ဝင်ထုတ်ပြန်တောင်းပန်ဖို့လိုအပ်ပြီး နှစ်ဘက်စစ်တပ်ပူးပေါင်း ကြံရွယ်ခြင်းမရှိ တဲ့အကြောင်းကိုလည်းတရားဝင်ထုတ်ပြန်ပေးဖို့တွေ ပါဝင်ပါတယ်။ 

တောင်းဆိုချက်တွေရေးထားတဲ့စာကို Move Forward Party ပါတီမှ လွှတ်တော်ကိုယ်စားလှယ် နိုင်းရန်းဆီမတ်ရုန်းက လာရောက်လက်ခံယူခဲ့ပြီး ဒီကိစ္စနဲ့ပတ်သက်လို့ သူတို့ ကော်မတီအစည်းအဝေးလုပ်ဖို့ ရှိကြောင်းပြောပါတယ်။

အဲဒီအစည်းအဝေးမှာ ထိုင်းလေတပ်ဘက်က တာဝန်ရှိသူ၊ ထိုင်းအမျိုးသားလုံခြုံရေးတပ်ဖွဲ့၊ နိုင်ငံခြားရေးဝန်ကြီးဌာနနဲ့ တာ့ခ်ခရိုင်အုပ်ချုပ်ရေးမှူးတို့ကိုလည်း ဖိတ်ကြားထားကြောင်း၊ သူ့အနေနဲ့ ဒီပြဿနာဟာ ကြီးမားတဲ့ပြဿနာလို့ ယူဆကြောင်း၊ ဘာကြောင့်လဲဆိုတော့ နယ်မြေထဲက ပြည်သူတွေရဲ့ လုံခြုံရေးကိုထိပါးနေကြောင်း၊ နှစ်နိုင်ငံနယ်စပ်နေ ပြည်သူတွေဟာ ဆွေမျိုးသားချင်းတွေလည်းဖြစ်လို့ မြန်မာဘက်ခြမ်းမှာ ဖြစ်ပွါးနေတဲ့ပြဿနာဟာ ထိုင်းဘက်ကိုလည်း သက်ရောက်မှုရှိနေတယ်လို့  ပြောသွားတယ်လို့ ထိုင်းသတင်းမှာ ဖော်ပြပါတယ်။  DVB

မအူပင်တက္ကသိုလ်ကျောင်းသားများသမဂ္ဂ ဒုဥက္ကဌဟောင်း ထောင်ဒဏ် ၅ နှစ်ချမှတ်ခံရ

မအူပင်တက္ကသိုလ်ကျောင်းသားများသမဂ္ဂတွင် ဒုဥက္ကဌအဖြစ် တာဝန်ထမ်းဆောင်ခဲ့သည့် သင်္ချာတတိယ နှစ်ကျောင်းသူတစ်ဦးကို စစ်ကောင်စီလက်အောက်ခံတရားရုံးက ဇူလိုင်လ ၅ ရက်နေ့တွင် ထောင်ဒဏ် ငါးနှစ် ချမှတ်ခဲ့ကြောင်း သိရသည်။

အဆိုပါ သမဂ္ဂကျောင်းသူမှာ မမျိုးသန္တာကျော်(ခ)အသေးလေးဖြစ်ပြီး ပြီးခဲ့သောနှစ် အောက်တိုဘာလက အကြမ်းဖက်စစ်ကောင်စီ၏ မတရားဖမ်းဆီးခြင်းခံခဲ့ရကာ အကြမ်းဖက်မှုတိုက်ဖျက်ရေးဥပဒေ ပုဒ်မ ၅၂ (ည)ဖြင့် စစ်ကောင်စီက ဖျာပုံအကျဉ်းထောင်အတွင်း ချုပ်နှောင်ထားပြီးနောက် ယခုကဲ့သို့ အမိန့်ချမှတ်ခဲ့ ခြင်းဖြစ်သည်။

မမျိုးသန္တာကျော်မှာ လက်ရှိတွင် ကျန်းမာရေးကောင်းမွန်လျက်ရှိနေပြီး ကိုဗစ်စည်းကမ်း ကန့်သတ်ချက် များကြောင့် မိသားစုနှင့်တွေ့ဆုံနိုင်ခြင်းမရှိသေးကြောင်း မိသားစုဝင်များနှင့်နီးစပ်သူက ပြောသည်။

၂၀၂၁ ခုနှစ် ဒီဇင်ဘာလအတွင်း၌လည်း မအူပင်တက္ကသိုလ်ကျောင်းသားများသမဂ္ဂ ဥက္ကဋ္ဌဟောင်းဖြစ်သူ ကိုသုတဇော်ကို စစ်ကောင်စီက သ ဘာဝဘေးအန္တရာယ်စီမံခန့်ခွဲမှုဥပဒေ ပုဒ်မ ၂၅ ဖြင့် ထောင်ဒဏ် ချမှတ် ခဲ့သည်။

မမျိုးသန္တာကျော် ထောင်ဒဏ်ချမှတ်ခံရမှုနှင့် ပက်သက်၍ မအူပင်တက္ကသိုလ်ကျောင်းသားများသမဂ္ဂမှ လည်း သတင်းထုတ်ပြန်ထားပြီး စစ်အာဏာရှင်စနစ်အား တွန်းလှန်တိုက်ထုတ်ရင်းဖြင့် အမျိုးမျိုးသော ဘဝများ ဆုံးရှုံးနေရချိန်တွင် စစ်ကောင်စီ လက်အောက်တွင် ကျွန်စိတ် ဓာတ်ဖြင့် ကျောင်းတက်နေသူများ ကိုလည်း အထူးပင်ရှုတ်ချကြောင်း ထည့်သွင်းထုတ်ပြန်ထားသည်။mizzima

ရန်ကုန် ပညာရေး တက္ကသိုလ် သမဂ္ဂ ဥက္ကဋ္ဌဟောင်း ကိုစိုးသူရကျော်ကို စစ်တပ်က ထောင် ဒဏ် ၈ နှစ်ချမှတ်၊ ရတနာပုံ တက္ကသိုလ် ကျောင်းသူ မကြည်ပြာကိုလည်း စစ်တပ်က ထောင်ဒဏ် ၃ နှစ် ချမှတ်

အကြမ်းဖက် စစ်တပ်က မတရား ဖမ်းဆီးထားသော ရန်ကုန် ပညာရေး တက္ကသိုလ် ကျောင်းသားများ သမဂ္ဂ ဥက္ကဋ္ဌဟောင်း ကိုစိုးသူရကျော် (ခ) ကဗျာဆရာသာသျှားကို ဇွန်လ ၂၇ရက်နေ့က ပုဒ်မ ၅၂ (က) ၊ ၅၀၅(က) တို့ဖြင့် ထောင်ဒဏ် ၈ နှစ် ချမှတ်ခဲ့ကြောင်း ဗမာနိုင်ငံလုံးဆိုင်ရာ ကျောင်းသား သမဂ္ဂများ အဖွဲ့ချုပ် ထံမှ သိရသည်။

ကိုစိုးသူရကျော်ကို အကြမ်းဖက် စစ်တပ်က ပုဒ်မ ၅၂ (က)အတွက် ထောင်ဒဏ် ၅ နှစ်၊ ပုဒ်မ ၅၀၅ (က)အတွက် ထောင်ဒဏ် ၃ နှစ်ကို မန္တလေး အိုးဘိုထောင်တွင် ချမှတ်ခဲ့ပြီး ရန်ကုန်တွင် ချမှတ်မည့် အမှုများ ကျန်ရှိနေသေးကြောင်း သိရသည်။

အကြမ်းဖက် စစ်တပ်က ကိုစိုးသူရကျော်ကို ၂၀၂၁ ခုနှစ် စက်ဘာလ ၂၄ ရက်နေ့တွင် အဖမ်းဆီး ခဲ့ခြင်းဖြစ်ပြီး ကိုစိုးသူရကျော်သည် ရန်ကုန်ပညာရေးတက္ကသိုလ်ကျောင်းသားများသမဂ္ဂ (ဗကသများအဖွဲ့)၏ ဥက္ကဋ္ဌဟောင်း တစ်ဦးဖြစ်ကာ စစ်အာဏာရှင်စနစ် ဆန့်ကျင်ရေး ပညာရေး သပိတ်စစ်ကြောင်းများကို ဦးဆောင်ခဲ့ပြီး အခြေခံပညာ ပညာရေးဝန်ထမ်းများအထွေထွေသပိတ်ကော်မတီ(BEGSC)၏ အလုပ်အမှုဆောင်ကော်မတီဝင်အဖြစ် တာဝန်ထမ်းဆောင်သူတစ်ဦးလည်းဖြစ်ကြောင်း ဗမာနိုင်ငံလုံး ဆိုင်ရာ ကျောင်းသား သမဂ္ဂများ အဖွဲ့ချုပ်မှ ထုတ်ပြန်ထားသည်။

အလားတူ ရတနာပုံ တက္ကသိုလ် အဝေးသင် ကျောင်းသူ မကြည်ပြာ(‌ခ)မကြည်ကြည်ဝင်းကို အကြမ်းဖက် စစ်တပ်က အလုပ်ကြမ်းနှင့် ထောင် ဒဏ် ၃ နှစ် အမိန့်ချမှတ်ခဲ့ကြောင်း ရတနာပုံ တက္ကသိုလ် ကျောင်းသားများ သမဂ္ဂထံမှ သိရသည်။ khit thit

ကျောင်းသူကျောင်းသားများ၏ အချက်အ လက်ပေါက်ကြားမှုအပေါ် Kaung For You Edication မှ ရှင်းလင်းချက် ထုတ်ပြန်

ဖက်ဒရယ်ကျောင်းတစ်ခုဖြစ်သည့် Kaung For You Education မှ ကျောင်းသား၊ ကျောင်းသူများ၏ ကိုယ်ရေးအချက်အလက်ပေါက်ကြားမှုနှင့်ပတ်သက်၍ ၎င်းတို့တွင်တာဝန်ရှိကြောင်း ဇူလိုင် ၈ ရက်တွင် ကြေညာချက် ထုတ်ပြန်လာသည်။

အချက်ပေါင်း ၁၂ ချက် ပါဝင်သော ၎င်းတို့၏ကြေညာချက်တွင် ကျောင်းနှင့်ပတ်သက်၍ ဖြစ်ပွားခဲ့သော ပြဿနာများအပေါ်တွင် ပြန်လည်ဖြေရှင်းချက်များ ပါဝင်သည်ကိုတွေ့ရသည်။

၎င်းတို့ဖြေရှင်းချက်တွင် ကျောင်းအပ်လက်ခံရေးကိစ္စတွင် ငွေကြေးကောက်ခံမှုမရှိခြင်းများနှင့် အဆိုပါ အချက်များပေါ်တွင် လိမ်လည်မှုများရှိနိုင်ကြောင်း သုံးသပ်ထားသည်ကို တွေ့ရသည်။

“ကျောင်း၏ သတင်းအချက်အလက်များပေါက်ကြားမှုသည် ၎င်းတို့ကိုယ်တိုင် ကျောင်းတာဝန်ရှိသူများ အဖြစ်ဟန်ဆောင်၍ Google Form ကောက်ယူခြင်းနည်းနှင့် ကျောင်း၏အတွင်းလူမှတဆင့် သတင်း အချက်အလက်များရယူခြင်းနည်း နှစ်မျိုးဖြင့် ပူးပေါင်းကြံစည်ခံရခြင်းဖြစ် ကြောင်း သုံးသပ်ပါသည်” ဟု ကြေညာချက်တွင် ဖော်ပြထားသည်။

ထုတ်ပြန်ကြေညာချက်နှင့်ပတ်သက်၍ တိတိကျကျသိရှိနိုင်ရန် Kaung For You Education မှ တာဝန်ရှိများထံသို့ မဇ္ဈိမအနေဖြင့် ဆက်သွယ်ခဲ့သော်လည်း တုံ့ပြန်ဖြေကြားခြင်း မရှိသေးပေ။

“သို့သော် ကျောင်းအနေဖြင့် စုံစမ်းစစ်ဆေးမှုများပြုလုပ်ခဲ့သည့်နောက် KBZ pay account များ၊ ဖုန်း နံပါတ်များ၊ မှတ်ပုံတင်များ၊ ကျူးလွန်သူများ၏ ဓာတ်ပုံများနှင့် နေရပ်လိပ်စာများကို အတိအကျရရှိထား ပြီး ဆက်စပ်ပူးပေါင်းကြံစည်သူများအား ဆက်လက်ဖော်ထုတ်အရေးယူနိုင်ရန် သက်ဆိုင်ရာသို့ အမှုဖွင့် တရားစွဲဆို တင်ပြသွားမည်” ဟုဆိုသည်။

“အခုလို ထုတ်ပြန်ချက်အပေါ်မှာ သူတို့အနေနဲ့ ဘယ်လောက်ထိလက်တွေ့ကျကျ ဆောင်ရွက်ပေးနိုင် မလဲ။ ကျောင်းသားမိဘတွေ၊ ကျောင်း သားတွေရဲ့လုံခြုံရေးကို ဘယ်လောက်ဆောင်ရွက်ပေးနိုင်မလား ဆိုတာ စောင့်ကြည့်ရဦးမယ်” ဟု CDM ကျောင်းဆရာတစ်ဦးဖြစ်သူ ကိုဝေယံစိုးက သုံးသပ်သည်။

ထို့အပြင် သတင်းအချက်အလက် ပေါက်ကြားမှုများနှင့်ပတ်သက်၍ အမျိုးသားညီညွတ်ရေးအစိုးရ၊ ပညာ ရေးဝန်ကြီးဌာနအနေဖြင့်လည်း စုံစမ်းစစ်ဆေးအရေးယူမှုတစ်စုံတရာ ပြုလုပ်သင့်ကြောင်းဆိုသည်။

Kaung For You Education သည် တော်လှန်ရေးကာလအတွင်းတည်ထောင်ခဲ့သော ဖက်ဒရယ် ကျောင်းတစ်ခုဖြစ်ပြီး ယခုပညာသင်နှစ်ဖြစ်သည့် ဇွန်လဆန်းပိုင်းတွင် ကျောင်းအပ်ရန် ကြေညာခဲ့သည်။ ထိုစဉ်က ကျောင်းသား၊ ကျောင်းသူ ဦးရေ ၂၀၀,၀၀၀ နီးပါး ကျောင်းအပ်ရန် ဆက် သွယ်ခဲ့သည်အနက် ကျောင်းသား ဦးရေ ၃၀,၀၀၀ကို လက်ခံသွားမည်ဖြစ်ကြောင်း ကြေညာထားသည်။

လက်ရှိအချိန်တွင် ဖြစ်ပေါ်နေသည့် နိုင်ငံရေးအခင်းအကျဉ်းများအရ CDM လှုပ်ရှားမှုတွင်ပါဝင်သော ကျောင်းသား၊ ကျောင်းသူများသည် သက် ဆိုင်ရာဖက်ဒရယ်ကျောင်းများသို့ ဆက်သွယ်တက်ရောက်ကြ ရန်ရှိနေသည်။

၎င်းတို့၏အချက်အလက်များကို ကျောင်းများအနေဖြင့် သတိကြီးစွာမထိန်းသိမ်းဘဲ ချို့ယွင်းချက်များ ရှိလာပါက ကလေးငယ်များအပါအဝင် မိဘများအနေဖြင့် အချိန်မရွေးဖမ်းဆီးနှိပ်စက်ခံနိုင်ရချေလည်းရှိ နေကြောင်း CDM အသိုင်းအဝိုင်းမှသုံးသပ်ကြသည်။ mizzima

စစ်ဘေးရှောင် နှင့် တာဝန်ထမ်းဆောင်နေကြသည့် အမျိုးသမီးများကို လှူဒါန်းမည့် “ကမ်းလက်လွှမ်းခြုံ ဇွန်ပန်းရုံ” ပါဝင်လှူဒါန်းရန် ဖိတ်ခေါ်

ဂျပန်ရောက် မြန်မာများနှင့် အမျိုးသားညီညွတ်ရေးအစိုးရတို့ ပူးပေါင်း စီစဉ်သော စစ်ဘေးရှောင်အမျိုးသမီးများနှင့် တာဝန်ထမ်းဆောင်နေကြသည့် အမျိုးသမီးများကို လှူဒါန်းမည့် “ကမ်းလက်လွှမ်းခြုံ ဇွန်ပန်းရုံ” ပရောဂျက်တွင် ပြည်သူများ ပါဝင်လှူဒါန်းရန် စီစဉ်သူများက ဖိတ်ခေါ်လိုက်သည်။

အမျိုးသမီး၊ လူငယ်၊ ကလေးသူငယ်ရေးရာဝန်ကြီးဌာန Ministry of Women, Youths and Children Affairs (MOWYCA) နှင့် Revolution Tokyo Myanmar (R.T.M) အဖွဲ့တို့ ပူးပေါင်းပြီး မိုးတွင်းကာလ အခက်အခဲပေါင်းစုံကြုံတွေ့နေရတဲ့စစ်ဘေးရှောင် အမျိုးသမီးများအတွက် စားနပ်ရိက္ခာနှင့် တစ်ကိုယ်ရည်သုံးပစ္စည်းများ၊ လိုအပ်သောဆေးဝါးများထောက်ပံ့ခြင်းနှင့် ပြည်တွင်းအနှံ့မှာ အခက်အခဲများ၊ဘေးအန္တရာယ်များကြားမှ ကျရာတာဝန်ထမ်းဆောင်နေကြသည့် အမျိုးသမီးများအတွက် “ကမ်းလက်လွှမ်းခြုံ ဇွန်ပန်းရုံ”အမည်ရှိ ရန်ပုံငွေ ကံစမ်းမဲလက်မှတ်အစီအစဉ်ကို ဇူလိုင် ၁ ရက်နေ့မှ ဇူလိုင် ၁၄ ရက်နေ့အထိ ပြုလုပ်လျက်ရှိကြောင်း Revolution Tokyo Myanmar (R.T.M) အဖွဲ့ထံမှ သိရှိရသည်။

“ကမ်းလက်လွှမ်းခြုံ ဇွန်ပန်းရုံ”အမည်ရှိ ရန်ပုံငွေ ကံစမ်းမဲတွင် မဲဖောက်ပေးမည့် ပစ္စည်းများမှာ အလှူရှင်များ လာရောက်လှူဒါန်းထားသည့် တန်ဖိုးကြီးကံစမ်းမဲ ပစ္စည်းပေါင်း (၇)မျိုးနှင့် CDM သူရဲကောင်းများ ကိုယ်တိုင်ပြုလုပ်ထားသည့် အထူးဆု ၆ မျိုးပါဝင်မည် ဖြစ်သည်။

အမျိုးသမီးအချင်းချင်းဖေးမကူညီလိုသော အမျိုးသမီးထုကြီးနှင့် အမျိုးသမီးများကို တန်ဖိုးထားလေးစားသောအမျိုးသားများအားလုံး လှူဒါန်းရင်း ပါဝင်ကံစမ်းနိုင်မည်ဖြစ်ကြောင်းလည်း Revolution Tokyo Myanmar (R.T.M) ၏ ထုတ်ပြန်ချက်တွင် ပါရှိသည်။

လက်မှတ်များကို ဂျပန်၊ စင်ကာပူ၊ ကိုရီးယား၊ ထိုင်း၊ အမေရိကား၊ သြစတြေးလျနှင့် ဥရောပနိုင်ငံများမှ ဝယ်ယူနိုင်မည်ဖြစ်ပြီး ကံစမ်းမဲလက် မှတ်တစ်စောင်စျေးနှုန်းများမှာ ယန်း ၂၀၀၀၊ စင်ကာပူဒေါ်လာ ၂၀ ၊ ဝမ် ၂၀၀၀၀ ၊ ဘတ် ၄၅၀ ၊ အမေရိကန်ဒေါ်လာ ၁၅ ၊ ဩစတြေးလျဒေါ်လာ ၂၁ နှင့် ယူရို ၁၄ကျသင့်မည် ဖြစ်ကြောင်း သိရှိရသည်။

လက်မှတ်ဖိုးငွေပေးချေပြီး ၃ ရက်အတွင်း လက်မှတ်ထုတ်ပေးသွားပါမည်ဖြစ်ပြီး လက်မှတ်ဝယ်ယူရန်အတွက် Revolution Tokyo Myanmar (R.T.M) ၏ Messenger https://www.facebook.com/RevolutionTokyoMyanmar/ တွင် စုံစမ်းဝယ်ယူနိုင်ကြောင်း သိရှိရသည်။ khit thit

ကလေးမြို့တွင် ပြည်သူ ၂ ဦးကို စစ်ကောင်စီတပ်က ပစ်သတ်

စစ်ကိုင်းတိုင်း၊ ကလေးမြို့၊ အောင်မင်္ဂလာရပ်ကွက် အေးမြဝေစည်ဘုန်းကြီးကျောင်းရဲ့ ဘုရားရင်ပြင်ပေါ်မှာ ဇူလိုင် ၃ ရက်နေ့က  အမျိုးသမီး တယောက်  ပစ်သတ်ခံခဲ့ရတယ်လို့ ဒေသခံတွေက ပြောပါတယ်။

ဒေသခံတယောက်က “သူတို့မောင်နှမ သုံးယောက်က ဘုရားရင်ပြင်မှာ ဘုရားဖူးရင်း ထိုင်နေကြတာ။ အဲ့ဘုရားက စည်ကားတယ်။ ညနေ စောင်းဆို လာရောက်ဖူး‌မြော်သူ များပြားတယ်။ ဘုးရားအပေါ်ကနေ သေနတ်နဲ့ သုံးချက်ပစ်သွားတယ်။ ပစ်သတ်ပြီး ဘုရားပေါ်ကနေ လယ် ကွင်းပြင်ဘက် ထွက်ပြေးသွားတယ်။ အဲ့ဒီ သေဆုံးတဲ့ကောင်မလေးက အရင်က PDF ထဲဝင်ဖူးတယ်။ အခင်းဖြစ်ပွားပြီး စစ်သားတွေက‌ လာရောက်ရှာဖွေကြတယ်။ ဘုရားရင်ပြင်‌‌ပေါ်မှာ အတူထိုင်နေတဲ့ သူ့ရဲ့ခဲအိုကို ဖမ်းဆီးခေါ်ဆောင်သွားတယ်။ ဘာကြောင့်ဖမ်းဆီးသွားလဲ မသိဘူး” လို့ ဒီဗွီဘီကို ပြောပါတယ်။

ကလေးမြို့၊ အောင်မင်္ဂလာရပ်ကွက်၊ အေးမြဝေစည် ဘုန်းကြီးကျောင်းဝန်းအတွင်းရှိ အေးကမ္ဘာပြည်လုံးချမ်းသာ ဘုရားရင်ပြင်ပေါ်မှာ ဘု ရားဖူးလာတဲ့ မယွန်းဝတီမွှေး အောင်မင်္ဂလာရပ်ကွက်၊ ကလေးမြို့နေသူကို PDF တွေက သေနတ်နဲ့ ပစ်သတ်သွားတယ်လို့ စစ်ကောင်စီဘက်က ထုတ်ပြန်ထားပြီး ဒေသခံ PDF တွေကလည်း သူတို့လုပ်တာမဟုတ်ကြောင်း ငြင်းဆိုထားပါတယ်။

ကလေးမြို့မှာ ဇူလိုင် ၁ ရက် ညအစောပိုင်းကလည်း မင်္ဂလာ ဥယျာဉ်ရပ်ကွက်အတွင်း ဆိုင်ကယ်မောင်းနှင် ဖြတ်သန်းလာတဲ့ အမျိုးသားတယောက်ကို စစ်ကောင်စီတပ်သားတွေက ပစ်သတ်လိုက်တယ်လို့ မြို့ခံတွေက ပြောပါတယ်။

“ည ၈ နာရီဝန်းကျင်လောက် လူခြေတော့တိတ်နေပြီ။ ဆိုင်ကယ်သံ‌လည်း‌ ကြားလိုက်တယ်။ ညတိုင်ဆိုရင် သူတို့က ကင်းလှည့်တယ်။ စစ်သားတွေအော်သံကြားလိုက်တယ်။ ရပ် ရပ် လို့ပြောတာ။ ဆိုင်ကယ်မောင်းတဲ့သူက မရပ်ဘဲဆက်စီးတာ၊ အဲဒါမှာ သေနတ်သံ ကြားလိုက်ရတာပဲ။”

အဆိုပါအမျိုးသား ပစ်သတ်ခံရတာနဲ့ပတ်သက်ပြီး စစ်ကောင်စီဘက်က “ကလေးမြို့၊ မင်္ဂလာဥယျာဉ်ရပ်ကွက်တွင် စစ်ဆေးခြင်းများဆောင် ရွက်နေစဉ် ဘုရင့်နောင်လမ်းအတိုင်း တောင်မှမြောက်သို့ မောင်းနှင်လာတဲ့ New Anbo 125 အမျိုးအစားဆိုင်ကယ်အား လုံခြုံရေးတပ်ဖွဲ့ဝင်တွေက မသင်္ကာလို့ ရပ်တန့်စစ်ဆေးခံဖို့ တားဆီးခဲ့ရာ မောင်းနှင်ထွက်ပြေးလို့ ပစ်ခတ်ဖမ်းဆီးခဲ့ရာ PDF တယောက်ကို  လက်လုပ်မိုင်း ၁ လုံးနဲ့အတူ အသေဖမ်းဆီရမိတယ်လို့ သတင်းထုတ်ပြန်ပါတယ်။

ပစ်ခတ်ခံရပြီး သေဆုံးသူအမျိုးသားကို စစ်ကောင်စီတပ်သားတွေက ကလေးမြို့ ကုတင် ၁၀၀ တပ်မတော်‌စစ်ဆေးရုံကို သယ်ဆောင်သွားကြတယ်လို့ သိရပြီး သေဆုံးသူအမျိုးသားဟာ အမှန်တကယ် PDF မဟုတ်ဘူးလို့လည်း ကလေး PDF တပ်ဖွဲ့ဝင်တွေက ငြင်းဆိုထားပါတယ်။ စစ်ကောင်စီတပ်အနေနဲ့ ဒေသခံတွေကို အကြမ်းဖက်ပစ်သတ်ပြီးတဲ့အခါတိုင်း PDF လို့ တံဆိပ်ကပ် ရမ်းသန်း‌စွပ်စွဲကာ မမှန်မကန်လုပ်ကြံသတင်းထုတ်လေ့ရှိပါတယ်။

စစ်ကောင်စီတပ်သား‌တွေဟာ ကလေးမြို့ပေါ်မှာ ရှောင်တခင် ဝင်ရောက်စစ်ဆေးတာတွေ မကြာခဏ ပြုလုပ်နေပြီး ဒေသခံတွေကို စစ်ဆေးဖမ်းဆီး ခြိမ်းခြောက်တာတွေ ခံနေရတာကြောင့် မြို့နေပြည်သူတွေဟာ စိုးရိမ်ကြောက်လန့်နေပါတယ်။

စစ်ကောင်စီတပ်တွေက လတ်တလော ကလေးနယ်တောင်ပိုင်းမှာ သာလွန်အင်အားသုံးကာ ကုန်းကြောင်းကသာမက လေကြောင်းကပါ ထိုး စစ်ဆင်နေပြီး ‌ကျေးရွာတွေက ဒေသခံနေအိမ်တွေကိုလည်း မီးရှို့ဖျက်ဆီးနေပါတယ်။

စစ်တပ်ကအာဏာသိမ်းပြီး ကလေးမြို့မှာ ဖမ်းဆီးထိန်းသိမ်းခံရသူ ၅၀၀‌ ဝန်းကျင်ရှိ‌ပြီဖြစ်ပြီး ပစ်ခတ်သတ်ဖြတ်ခံခဲ့ရသူ ၁၀၀‌ ‌ကျော်ပြီလို့ သ ပိတ်အဖွဲ့ဝင်တွေရဲ့ စာရင်းအရ သိရပါတယ်။ DVB

တကောင်း အမြောက်တပ်ရင်း ၃၈၄ မှ တပ် သား မောင်ကောင်းညိမ်း PDF တပ်ဖွဲ့ထံ CDM ပြုလုပ်

မန္တလေးတိုင်း တကောင်းမြို့ အမြောက်တပ်ရင်း ၃၈၄ မှ တပ်သား မောင်ကောင်းညိမ်းသည် တကောင်းမြို့ ပြည်သူ့ကာကွယ်ရေးတပ်ဖွဲ့ (Tagaung PDF)ထံ CDM လာရောက် ပြုလုပ်ခဲ့​ပြီး Tagaung PDF တပ်ဖွဲ့က ပြောသည်။

လက်ရှိချိန်တွင် CDM ပြုလုပ်ခဲ့သော တပ်သား မောင်ကောင်းညိမ်းကို တ ကောင်းမြို့ ပြည်သူ့ ကာကွယ်ရေးတပ်ဖွဲ့မှ ပြည်သူ့ရင်ခွင်သို့ ပို့ ဆောင်ပေးသွားမည် ဖြစ်ပြီး လိုအပ်သည်များကို လုပ်ဆောင်ပေးကာ အဖွဲ့လိုအပ်ချက်များစွာရှိ‌နေသဖြင့် ဆုကြေးငွေများကို မထောက်ပံ့နိုင်သော်လည်း ‌ထိုက်သင့်သည်များကိုသာ လုပ်ဆောင်ပေးသွားမည်ဖြစ်ကြောင်း Tagaung PDF တပ်ဖွဲ့၏ အဆိုအရ သိရှိရသည်။ khit thit

« Older Entries