Monthly Archives: Jul 2022

ဘီးလင်း NLD ဥက္ကဋ္ဌ အပါအဝင် ၃ ဦးကို နွေ ဦးအာဇာနည်သူရဲကောင်းအဖြစ်မှတ်တမ်းတင်ဟု KNU သထုံခရိုင်ထုတ်ပြန်

ဘီးလင်းမြို့နယ် အမျိုးသားဒီမိုကရေစီအဖွဲ့ချုပ် (NLD) ပါတီ ဥက္ကဋ္ဌ ဦးကျော်မျိုးမင်းအပါအဝင် သုံးဦးကို နွေဦးအာဇာနည်သူရဲကောင်း အဖြစ်မှတ်တမ်းတင်ကြောင်း KNU သထုံခရိုင် မိတ်ဖက်ရေးရာ ကော်မတီမှ ထုတ်ပြန်သည်။

ဦးကျော်မျိုးမင်း အပါအဝင်လေးဦးကို စစ်ကောင်စီက ဘီးလင်းမြို့အနီးတွင် ဇွန်လ ၂၂ ရက်နေ့က ပစ်ခတ်ဖမ်းဆီးခဲ့ခြင်းဖြစ်သည်။ ဖြစ်စဉ်အ တွင်း တစ်ဦးမှာအဆိုပါနေရာတွင် ကျဆုံးခဲ့ရပြီး ဦးကျော်မျိုးမင်းနှင့် အခြားနှစ်ဦးကို စစ်ကောင်စီတပ်က ဖမ်းဆီးခေါ်ဆောင်ကာ ဇွန်လ ၃၀ ရက်တွင် နှိပ်စက်သတ်ဖြတ်၍ အလောင်းကို စွန့်ပစ်ခဲ့သည်ဟုဆိုသည်။

နွေဦးအာဇာနည်သူရဲကောင်းအဖြစ် မှတ်တမ်းတင်ခံရသည့် ဦးပန်းမြင့်နှင့် ဦးကိုကိုမောင်တို့ နှစ်ဦး၏ ရုပ်အလောင်းကို ဇူလိုင်လ ၂ ရက်က ဖမ်းဆီးခံခဲ့ရသည့် နေရာအနီးတွင်တွေ့ရပြီး ဦးကျော်မျိုးမင်းဦး၏ ရုပ်အလောင်းကို ဇူလိုင်လ ၆ ရက်တွင် ထပ်မံတွေ့ရှိခဲ့ခြင်း ဖြစ်သည်။

စစ်ကောင်စီတပ် ဖမ်းဆီးသတ်ဖြတ်ခဲ့သည့် ဦးကျော်မျိုးမင်း၊ ဦးကိုကိုမောင် နှင့် ဦးပန်းမြင့်တို့ ကျဆုံးခဲ့ရခြင်းနှင့်ပတ်သက်၍ KNU တပ်မဟာ (၁) ခေါင်းဆောင်၏ ညွှန်ကြားချက်အရ ရုပ်အလောင်းများ( Dead bodies) ကို တောနင်းရှာဖွေခြင်း၊ တူးဖော်ခြင်း၊ အတည်ပြုခြင်း၊ စနစ် တကျ ပြန်လည်သင်္ဂြိုဟ်ပေးခြင်းနှင့် အမိန့်ပြန်ခြင်းလုပ်ငန်းများ ယနေ့ ဇူလိုင်လ ၉ ရက်နေ့တွင် ဆောင်ရွက်ခဲ့ခြင်းဖြစ်သည်။

အဆိုပါလုပ်ငန်းကို မိတ်ဖက်ရေးရာကြီးကြပ်ကွပ်ကဲရေးကော်မတီ၏ အတွင်းရေးမှူးအဖွဲ့ဝင် တစ်ဦး ဦးဆောင်၍ မိတ်ဖက်တော်လှန်ရေးအဖွဲ့အစည်းဖြစ်သည့် ”People’s Force” မှ ဆေးတပ်ဗိုလ်ကြီးပါသော တပ်စိတ် တစ်စိတ်ဖြင့်လုပ်ဆောင်ခဲ့ခြင်းဟု သိရသည်။

” ဦးကျော်မျိုးမင်းသည် မြန်မာနိုင်ငံတွင်း ထာ၀ရငြိမ်းချမ်းရေးနှင့် စစ်မှန်သောဖက်ဒရယ်ဒီမိုကရေစီ ပြည်ထောင်စုပေါ်ထွန်းလာရေးအတွက် စစ်အာဏာရှင်နှင့် အပေါင်းအပါများအား ဖြုတ်ချရေး လက်နက်ကိုင် တော်လှန်စစ်ဆင်နွှဲရာ၌ ကျရာတာဝန်ကို ကျေပွန်စွာထမ်းဆောင်ရင်း ကျဆုံးခဲ့ခြင်းဖြစ်ကြောင်း ” KNU သထုံခရိုင် မိတ်ဖက်ရေးရာ ကော်မတီက ထုတ်ပြန်ခဲ့သည်။

ဦးကျော်မျိုးမင်းသည် ဘီးလင်းမြို့နယ် အမျိုးသားဒီမိုကရေစီအဖွဲ့ချုပ် (NLD) ပါတီ ဥက္ကဋ္ဌ ဖြစ်သည့်အပြင် ပြီးခဲ့သည့် ၂၀၂ဝ အထွေထွေ ရွေး ကောက်ပွဲတွင် ဘီးလင်းမြို့နယ် ပြည်နယ်လွှတ်တော်မဲဆန္ဒနယ် အမှတ် (၂) ၌ ရွေးကောက်တင်မြှောက်ခြင်း ခံခဲ့ရသူဖြစ်သည်။

ထို့အပြင် KNU သထုံခရိုင် မိတ်ဖက်ရေးရာကော်မတီ၏ အတွင်းရေးမှူး (၂) တာဝန်ယူထားသူ ဖြစ်သည်။ ဦးပန်းမြင့်နှင့် ဦးကိုကိုမောင် တို့နှစ်ဦးသည်လည်း KNU သထုံခရိုင် မိတ်ဖက်ရေးရာကော်မတီ၏ အဖွဲ့ဝင်များဖြစ်သည်ဟု သိရသည်။ mizzima

မြန်မာ့အရေးဖြေရှင်းရန် မှော်အစွမ်းမရှိဟု အာဆီယံအထူးကိုယ်စားလှယ် ညည်း

မြန်မာနိုင်ငံဆိုင်ရာ အာဆီယံအထူးကိုယ်စားလှယ် မစ္စတာပရက်ဆော့ခွန်က ဒုတိယအကြိမ် နေပြည်တော်ခရီးစဉ်အပြီး သတင်းထုတ်ပြန်ချက်တွင် မြန်မာ့အရေးနှင့် ပတ်သက်ပြီး ညည်းတွားပြောဆိုလိုက်သည်။

“သက်တမ်း ၆ လသာ ကျန်တော့တဲ့ အာဆီယံအထူးကိုယ်စားလှယ် တစ်ယောက်အနေနဲ့ မြန်မာ့အကျပ်အတည်းပြေလည်ဖို့ ကျွန်တော့်မှာ မှော်အစွမ်းမရှိပါဘူး” ဟု ဇူလိုင်လ ၇ ရက် ရက်စွဲဖြင့် ထုတ်ပြန်ချက်တွင် ကမ္ဘောဒီးယား ဒုဝန်ကြီးချုပ်နှင့် နိုင်ငံခြားရေးဝန်ကြီး ပရက်ဆော့ခွန်က ရေးသားဖော်ပြထားသည်။

ဒေါ်အောင်ဆန်းစုကြည်သည် နိုင်ငံ၏အရေးပါဆုံးသူတစ်ယောက်အဖြစ် ကမ္ဘောဒီးယားသာမက လေ့လာသူများကပါ လက်ခံထားကြသော် လည်း သူ၏ ခရီးစဉ်အတွင်း တွေ့ခွင့်မရခဲ့ဟုလည်း ဖော်ပြထားသည်။

အလားတူ ဒေါ်အောင်ဆန်းစုကြည်၏ ရှေ့နေများအပါအဝင် အမျိုးသားဒီမိုကရေစီအဖွဲ့ချုပ် အရန်ဗဟိုအလုပ်အမှုဆောင် ဒေါ်စုစုလွင်တို့နှင့်လည်း တွေ့ခွင့်မရခဲ့ကြောင်း ပရက်ဆော့ခွန်က အစီရင်ခံသည်။

ပရက်ဆော့ခွန်သည် စစ်ခေါင်းဆောင်အပြင် နိုင်ငံရေးပါတီများ၊ တိုင်းရင်းသားလက်နက်ကိုင်အဖွဲ့အစည်းအချို့နှင့်လည်း သူ၏ ခရီးစဉ်အတွင်း တွေ့ဆုံခဲ့သည်။ တွေ့ဆုံမှုတွင် ဖွဲ့စည်းပုံအခြေခံဥပဒေ အသစ်ပြန်လည်ရေးဆွဲရေး၊ ၂၀၂၃ တွင် ကျင်းပမည့် ရွေးကောက်ပွဲနှင့် ပတ်သက်၍ ဆွေး နွေးခဲ့သည်ဟု ဆိုသည်။

ဖွဲ့စည်းပုံပြင်ဆင်ရေး သို့မဟုတ် အသစ်ရေးဆွဲရေးနှင့် ပတ်သက်၍ ပရက်ဆော့ခွန်က ထိုအချက်သည် သူလုပ်နိုင်သည့် အခွင့်အာဏာတွင်မရှိဘဲ မြန်မာပြည်သူများကသာ ဆုံးဖြတ်ရမည်ဟု ဆိုသည်။

ထို့အတူ ၂၀၂၃ တွင် အာဏာသိမ်းစစ်အစိုးရက ဦးစီးကျင်းပမည့် ရွေးကောက်ပွဲ၏ အားလုံးပါဝင်နိုင်မှု၊ လွတ်လပ်ပြီးတရားမျှတမှုတို့နှင့် ပတ် သက်ပြီးလည်း ပရက်ဆော့ခွန်က သူ့အစီရင်ခံစာထဲတွင် မေးခွန်းထုတ်ထားသည်။

သို့သော် ခြေဥအသစ်ရေးခြင်း၊ ရွေးကောက်ပွဲလုပ်ခြင်း မလုပ်ခြင်းတို့သည် မြန်မာနိုင်ငံသားများကသာ ဆုံးဖြတ်ရမည်ဟုဆိုကာ အခြားသူများအနေဖြင့် အကြံဉာဏ်များသာ ပေးနိုင်လိမ့်မည်ဟု သူက ဆိုသည်။ သူ့အနေဖြင့်မူ အားလုံးပါဝင်သည့် ငြိမ်းချမ်းရေးဆွေးနွေးပွဲများ ဖြစ်လာရန်သာ ကူညီနိုင်လိမ့်ဟုလည်း ဆိုသည်။

အာဆီယံအထူးကိုယ်စားလှယ်သည် သူ၏ ဒုတိယအကြိမ် မြန်မာနိုင်ငံခရီးစဉ်တွင် စစ်ခေါင်းဆောင်နှင့် ၂ နာရီကြာ ဆွေးနွေးခဲ့သည်ဟု ထုတ်ပြန်ချက်တွင် ပါရှိသည်။ သို့သော် မည်သည့်အချက်များ ပြောဆိုကြသည်ကို အသေးစိတ်ဖော်ပြထားခြင်းမရှိပါ။

သူ့ခရီးစဉ်သည် အာဆီယံဘုံသဘောတူညီချက်များထဲမှ လူသားချင်းစာနာထောက်ထားမှု အကူအညီများပေးနိုင်ရန်၊ အကြမ်းဖက်မှုများရပ်ရန်၊ နိုင်ငံရေးဆွေးနွေးမှုများ စတင်ရန် စသည့်အချက်များ ရှေ့ဆက်နိုင်ရန် ရည်ရွယ်သည်ဟု ဆိုသည်။

သို့သော် အာဆီယံဘုံသဘောတူညီချက် ၅ ရပ်သည် ပြီးခဲ့သည့်နှစ် မေလကတည်းက ချမှတ်ခဲ့သော်လည်း ထင်ရှားသည့် တိုးတက်မှုမရှိသည်ကို တွေ့ရသည်။

အဆိုပါအခြေအနေများကြောင့် ဇူလိုင်လကုန်ပိုင်းတွင် ကျင်းပမည့် ၅၅ ကြိမ်မြောက် အာဆီယံနိုင်ငံခြားရေးဝန်ကြီးအစည်းအဝေးသို့ စစ်ကောင် စီကို မဖိတ်တော့ဟု ပရက်ဆော့ခွန်က ခမာတိုင်းမ်သတင်းဌာနသို့ ထုတ်ဖော်ပြောဆိုထားသည်။

ဇွန်လ ၃၀ ရက်မှ ဇူလိုင်လ ၂ ရက်နေ့အထိ မြန်မာနိုင်ငံသို့ ဒုတိယအကြိမ် သွားရောက်ခဲ့သည့် ခရီးစဉ်တွင် စစ်ခေါင်းဆောင်အပါအဝင် အာဏာ သိမ်းစစ်အစိုးရ၏ နိုင်ငံခြားရေးဝန်ကြီး၊ အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီး ဦးကိုကိုလှိုင်၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုကော်မတီ ဥက္ကဋ္ဌ ဗိုလ်ချုပ်ကြီးရာပြည့်တို့နှင့် တွေ့ဆုံခဲ့သည်။

အလားတူ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် NCA လက်မှတ်ထိုးထားသည့် တိုင်းရင်းသားလက်နက်ကိုင်အဖွဲ့ ၁၀ ဖွဲ့ထဲမှ ၇ ဖွဲ့နှင့် တွေ့ဆုံခဲ့သည်။ မတွေ့ဖြစ်သည့် ၃ ဖွဲ့မှာ ကရင်အမျိုးသားအစည်းအရုံး KNU, ချင်းအမျိုးသားတပ်ဦး CNF, ဗမာနိုင်ငံလုံးဆိုင် ရာ ကျောင်းသားများ ဒီမိုကရက်တစ်တပ်ဦး ABSDF တို့ ဖြစ်သည်။

ပရက်ဆော့ခွန်သည် သူ၏ခရီးစဉ်အတွင်း နိုင်ငံရေးပါတီ ၇ ခုနှင့်လည်း တွေ့ဆုံခဲ့သည်၊ သို့သော် အမျိုးသားဒီမိုကရေစီအဖွဲ့ချုပ် NLD, ရှမ်းတိုင်း ရင်းသားများဒီမိုကရေစီအဖွဲ့ချုပ် SNLD တို့ တွေ့ဆုံမှုတွင် မပါဝင်ပေ။

အဆိုပါ အခြေအနေများကြောင့် အာဆီယံဘုံသဘောတူညီချက်တွင် ပါဝင်သည့် အားလုံးပါဝင်သော တွေ့ဆုံဆွေးနွေးမှုများ ပေါ်ပေါက်လာရန် ပရက်ဆော့ခွန်အားထုတ်သည့် မြန်မာနိုင်ငံခရီးစဉ်များမအောင်မြင်ဟုလည်း ဝေဖန်ခံနေရသည်။

အာဆီယံအထူးကိုယ်စားလှယ်အဖြစ် ခန့်အပ်ခံရပြီး သူ၏ အားထုတ်မှု မအောင်မြင်ခြင်းကြောင့်လည်း ပရက်ဆော့ခွန် မကြာခဏ ညည်းတွားလေ့ရှိသည်။ အာဆီယံ၏ ကြားဝင်ဖြေရှင်းရေးကြိုးပမ်းချက် အရာမရောက်သေးဟု ဖေဖော်ဝါရီ ဒုတိယပတ်က ပြောဆိုခဲ့ပြီး အာဏာသိမ်းစစ်အစိုးရက လမ်းပိတ်ထားသည်ဟု ပြောဆိုခဲ့သည်။

အထူးကိုယ်စားလှယ်သက်တမ်း ၆ လသာ ကျန်တော့သည့် ပရက်ဆော့ခွန်သည် အာဏာသိမ်းစစ်ခေါင်းဆောင်ထံ မြန်မာနိုင်ငံဆိုင်ရာ ကုလသ မဂ္ဂအတွင်းရေးမှူးချုပ်၏ အထူးကိုယ်စားလှယ် Noeleen Heyzer နှင့် ပူးပေါင်းလုပ်ဆောင်ရန် တိုက်တွန်းထားသည်ဟု ဇူလိုင် ၇ ရက် ထုတ်ပြန်ချက်တွင် ဖော်ပြသည်။ myanmar now

ပြင်ဦးလွင်ခရိုင်အတွင်းရှိ ကာကွယ်ရေးတပ်ဖွဲ့ ၄ ဖွဲ့ပူးပေါင်း၊ လွတ်မြောက်နယ်မြေရရှိရန် တိုက်ခိုက်မှုပြုလုပ်မည်ဟုဆို

မန္တလေးတိုင်း၊ ပြင်ဦးလွင်ခရိုင်အတွင်းရှိ ကာကွယ်ရေးတပ်ဖွဲ့ လေးဖွဲ့ မဟာမိတ်အဖြစ် ပူးပေါင်းလိုက်ပြီး လွတ်မြောက်နယ်မြေများ ရရှိအောင် တိုက်ခိုက်မှုများ လုပ်ဆောင်သွားမည်ဖြစ်ကြောင်း People’s Defence Force (Singu) အဖွဲ့မှ တာဝန်ရှိသူက မဇ္စျိမကို ပြောသည်။

ပြင်ဦးလွင်ခရိုင်အတွင်း အခြေစ်ိုက်ကာ လှုပ်ရှားနေသည့် RED WOLVES OF MOGOK၊ People’s Defence Force Thabeikkyin၊ People’s Defence Force Singu၊ People Defence Force Pyin Oo Lwin အစရှိသည့် ကာကွယ်ရေးတပ်ဖွဲ့လေးဖွဲ့ မဟာမိတ်အဖြစ် ပူးပေါင်းကြောင်း ယနေ့ ဇူလိုင်လ ၉ ရက် ရက်စွဲဖြင့် သတင်းထုတ်ပြန်ထားသည်။

“မိုးကုတ်၊ သပိတ်ကျင်း၊ ပြင်ဦးလွင် စတဲ့ ဒေသကာကွယ်ရေးတပ်ဖွဲ့က တာဝန်ရှိသူတွေနဲ့ လွတ်မြောက်နယ်မြေတစ်ခုမှာ တွေ့ကြတယ်။ အဲ့ဒီ့မှာ လေးဖွဲ့တွေ့ပြီး တိုင်ပင်ဖြစ်တယ်။ စစ်ကောင်စီကို တိုက်ခိုက်ဖို့အတွက်က တပ်ရင်းတစ်ခုထဲနဲ့တော့ မဖြစ်ဘူး။ ပေါင်းတိုက်ကြမယ် ဗျူဟာအနေနဲ့ ဖွဲ့မယ်ဆိုပြီးတဲ့နောက်မှာ အခုလို ပူးပေါင်းလိုက်ကြတာ ဖြစ်ပါတယ်” ဟု People’s Defence Force (Singu) တပ်ဖွဲ့ ခေါင်းဆောင် ကိုနွယ်နီက ပြောသည်။

ကာကွယ်ရေးမဟာမိတ် ပူးပေါင်းတပ်ဖွဲ့များက တိုင်းရင်းသားလက်နက်ကိုင် အဖွဲ့အစည်းများ၊ အခြားအဖွဲ့အစည်းများနှင့် ချိတ်ဆက်ကာ လွတ်မြောက်နယ်မြေများ ရရှိအောင် ဆောင်ရွက်သွားမည်ဖြစ်ကြောင်းလည်း ၎င်းကဆိုသည်။

“ကျွန်တော်တို့ရဲ့ လွတ်မြောက်နယ်မြေကို ရအောင်ပြန်ယူမယ်။ ပြင်ဦးလွင် ခရိုင်အတွင်းက စဉ့်ကူး ၊သပိတ်ကျင်း ၊မိုးကုတ်ပေါ့ အဲ့ဘက်ခြမ်းတွေကို လွတ်မြောက်နယ်မြေဖြစ်အောင် လုပ်မယ်။ EAOs တွေနဲ့ ချိတ်ဆက်မယ် တခြားအဖွဲ့တွေနဲ့လည်း ချိတ်ထားတယ်။ ကျွန်တော်တို့နယ်မြေ ကျွန်တော်တို့ရဲ့ ကတ္တရာလမ်းမကြီးကို ပြန်မရမချင်း တိုက်ပွဲဝင်မှာပါ”ဟု စဉ့်ကူး PDF ခေါင်းဆောင် ကိုနွယ်နီက ဆက်ပြောသည်။

မဟာမိတ်အဖြစ် ပူးပေါင်းလိုက်သည့် တော်လှန်ရေးအစုအဖွဲ့ လေးဖွဲ့ အနေဖြင့် တစ်ဖွဲ့နှင့်တစ်ဖွဲ့လိုအပ်သည့် အကူအညီများ ပေးအပ်ကာ စစ်အာဏာရှင်ကျဆုံးပြီး ဖက်ဒရယ်ဒီမိုကရေစီ ရရှိသည်အထိ သစ္စာရှိရှိ လက်တွဲပူးပေါင်းတိုက်ပွဲဝင်မည်ဟု ကတိပြုကြောင်းလည်း ထုတ်ပြန်ချက်တွင် ရေးသားထားသည်။

ထို့အပြင် အဆိုပါ မြို့နယ်များအတွင်းရှိ စစ်ကောင်စီတပ်ဖွဲ့၏ အင်အား၊ လှုပ်ရှားမှု အခြေအနေများကို ကာကွယ်ရေးတပ်ဖွဲ့၏ လူမှုကွန်ရက်စာမျက်နှာများထံ ပေးပို့ပေးခြင်းဖြင့် တော်လှန်ရေးတွင် ပါဝင်ကြရန်လည်း ပြည်သူလူထုကို တိုက်တွန်းထားသည်။

“ဘယ်ရွာမှာ ဘယ်လောက်ရှိတယ်။ အင်အားက ဘယ်လောက်ပေါ့။ အဲ့လိုလေးတွေ သတင်းပေးစေချင်တယ်။ သတင်းမရှိဘဲ တော်လှန်ရေးကို ဘယ်လိုမှ လုပ်မရဘူး။ အတိအကျလေးရချင်တယ်။ အဲ့တော့ သတင်းပေးခြင်းနဲ့ တော်လှန်ရေးမှာ ပြည်သူတွေ ပူးပေါင်းပါဝင်ကြဖို့ ပြောချင်တယ်” ဟု ကိုနွယ်နီက ဆိုသည်။

စစ်ကောင်စီတပ်က ပြင်ဦးလွင်ခရိုင်အတွင်းရှိ စဉ့်ကူးမြို့နယ်တွင် စစ်ကောင်စီတပ် အင်အား ၅၀၀ကျော်၊ သပိတ်ကျင်းမြို့နယ်တွင် အင်အား ၆၀၀ကျော်၊ မိုးကုတ်မြို့နယ်တွင် အင်အား ၈၀၀ကျော်ဖြင့် အင်အားအများအပြား အသုံးပြုကာ မြို့နယ်များအတွင်းရှိ တောတောင်များကို ပိတ်ဆို့ထားကြောင်း ကာကွယ်ရေးတပ်ဖွဲ့များထံက သိရသည်။ mizzima

JW(ADK) အထည်ချုပ်စက်ရုံအလုပ်သမားများ၏ တောင်းဆိုချက်များ အပြည့်အဝ မရသေး

ရန်ကုန်၊ မင်္ဂလာဒုံမြို့နယ်၊ ဇေကမ္ဘာဝင်းထဲက JW(ADK) အထည်ချုပ်စက်ရုံ အလုပ်သမားတွေရဲ့ တောင်းဆိုချက်တွေ အပြည့်အဝမရသေးဘူးလို့ အလုပ်သမားတွေက ပြောပါတယ်။

JW(ADK) စက်ရုံအလုပ်သမားတွေဟာ လုပ်ခလစာလျှော့ချခံရတာ အပါအဝင် အလုပ်သမား အခွင့်အရေး ချိုးဖောက်ခံရတာတွေအတွက် ဇူလိုင် ၇ ရက်က အဲဒီစက်ရုံအတွင်း ဆန္ဒပြတောင်းဆိုခဲ့ကြတာပါ။

အဲဒီလိုဆန္ဒပြတောင်းဆိုမူကြောင့် စစ်ကောင်စီတပ်တွေရောက်လာပြီး စက်ရုံတာဝန်ရှိသူတွေနဲ့ အလုပ်သမားဘက်က ကိုယ်စားလှယ်တွေ ညှိနှိုင်းဆွေးနွေးစေခဲ့တယ်လို့ သိရပါတယ်။

အလုပ်သမားခေါင်းဆောင်တဦးက “ဆွေးနွေးမှုအရတော့ ဇွန်လက လစာနှုန်းအတိုင်း စက်ရုံက ပြန်ဖြည့်ပေးတယ်။အဲဒီတချက်ကတော့ ပြေလည်သွားတယ်ပေါ့။ အလုပ်သမားတွေက စက်ရုံဝင်းထဲ ကိုယ့်အခွင့်အရေးကိုယ် တောင်းဆိုတာ။ နိုင်ငံရေးကိစ္စမဟုတ်တဲ့အတွက် အရေးယူတာတော့ မရှိဘူး” လို့ ပြောပါတယ်။

အဲဒီစက်ရုံအလုပ်သမားတွေဟာ နေ့ကြေး တိုးပေးဖို့၊ ထုတ်လုပ်မှုဆုကြေးပုံမှန် ပေးဖို့၊ ကျွမ်းကျင်ကြေးပေးဖို့၊ ရက်မှန်ကြေးတိုးဖို့၊ စနေနေ့  ၄ နာရီ လွှတ်ပေးဖို့၊ တနင်္ဂနွေ အချိန်ပိုကြေး လက်ငင်းပေးဖို့၊ ဆေးခွင့်၊ ရှောင်တခွင်ခွင့်၊ လုပ်သက်ခွင့်ပေးဖို့၊ စက်ရုံတရုံလုံးလစာ ၆ လပိုင်းအတွက် တွက်ချက်ပေးဖို့ ဆိုတဲ့အချက်တွေ တောင်းဆိုခဲ့ကြတာပါ။

ဒါ့အပြင် အလုပ်သမားအဖွဲ့ အသစ်ဖွဲ့စည်းဖို့၊  အလုပ်ကြီးကြပ်သူတွေ ဆဲဆိုခြင်းမပြုဖို့၊ ၃ ရက်ပျက်လျှင် အလုပ်မဖြုတ်ဖို့၊ အခုလအတွက် လစာချက်ချင်းပြန်တွက်ပေးဖို့၊ ဆန္ဒပြအလုပ်သမားတွေကို လုပ်အားခမဖြတ်ဖို့၊ အလုပ်မထုတ်ဖို့၊ ဘယ်လိုအရေးယူမှုမှမလုပ်ဖို့ စတဲ့အချက်တွေလည်း တောင်းဆိုခဲ့ကြပါတယ်။

အလုပ်သမားခေါင်းဆောင်က “ကျန်တောင်းဆိုချက်တွေကတော့ ဆက်စောင့်ကြည့်ရဦးမယ်။ စက်ရုံဘက်က အချိန်ယူ ပြင်ဆင်လုပ်ရမှာတွေ ဖြစ်နေတာဆိုတော့လေ” လို့ ပြောပါတယ်။

JW အထည်ချုပ်စက်ရုံဟာ (ADK) စက်ရုံခွဲတခု ဖြစ်ပြီး အလုပ်သမားပေါင်း ၂၀၀၀ ကျော်နဲ့ လည်ပတ်နေတဲ့ စက်ရုံဖြစ်ပါတယ်။

ဇူလိုင် ၇ ရက်က JW(ADK) စက်ရုံလုပ်သားတွေရဲ့ဆန္ဒပြမှုဟာ စစ်အာဏာသိမ်းကာလအတွင်း အလုပ်သမားတွေအခွင့်အရေးအတွက် တောင်းဆိုတဲ့ ပထမဆုံးဆန္ဒပြမှုလည်း ဖြစ်ပါတယ်။ DVB

တပ်ဖွဲ့ဝင်များဖမ်းဆီးခံရပြီးနောက် လုံခြုံရေးအရ ရပ်တည်ရန် ခက်ခဲလာသည့် မြေအောက်တော်လှန်ရေး အဖွဲ့ ရန်ကုန်မြို့ကို စွန့်ခွာ

ရန်ကုန်မြို့တွင် အခြေစိုက်၍ မြေအောက်တော်လှန်ရေး လှုပ်ရှားမှုများ ပြုလုပ်နေသည့် Dictator Revolt Front (အာဏာရှင်တော်လှန်ရေးတပ် ဦး) အဖွဲ့သည် လုံခြုံရေး အခြေအနေအရ ဆက်လက်ရပ်တည်ရန်ခက်ခဲလာသည့်အတွက် မြို့ကိုစွန့်ခွာတော့မည် ဖြစ်ကြောင်း အဖွဲ့တာ ဝန်ရှိသူက မဇ္ဈိမကို ပြောသည်။

ပြီးခဲ့သည့် လအတွင်းက D.R.F (အာဏာရှင်တော်လှန်ရေးတပ်ဦး)တပ်ဖွဲ့ဝင် ရဲဘော်အချို့နှင့်လက်နက်ပစ္စည်းများ စစ်ကောင်စီတပ်၏ ဖမ်းဆီးခြင်းခံရပြီးနောက် ကျန်ရှိနေသည့်တပ်ဖွဲ့ဝင်များပါ လုံခြုံရေးအခက်အခဲများ ကြုံတွေ့လာခြင်းဖြစ်သည်။

“ ပြီးခဲ့တဲ့ မတ်လ ၉ ရက်နေ့က မစ်ရှင်နေရာသွားကြည့်တဲ့အချိန် အဖမ်းခံရတာ။ ကားနဲ့တားစစ်တဲ့အချိန် ကားပေါ်မှာသုံးယောက်ပါတယ်။ စစ် ဆေးတော့ ဖုန်းထဲကနေ တော်လှန်ရေးနဲ့ ပတ်သက်တာတွေ တွေ့သွားတာ။ အဲ့ကနေ ဆက်လိုက်ရင်း မန္တလေးကို ပြန်သွားတဲ့ သုံးယောက်ပါ အဖမ်းခံရတယ်။ အားလုံးပေါင်း ခြောက် ယောက် အဖမ်းခံ လိုက်ရတယ်” ဟု DRF တပ်ဖွဲ့ တာဝန်ရှိသူက ပြောသည်။

စစ်ကောင်စီတပ်၏ ဖမ်းဆီးမှုကြောင့် D.R.F (အာဏာရှင်တော်လှန်ရေးတပ်ဦး) မှ တပ်ဖွဲ့ဝင် ခြောက်ဦး ဖမ်းဆီးခံခဲ့ရပြီး ပုဒ်မများစွာဖြင့် တရား စွဲဆိုခံထားရကာ ၎င်းတို့နှင့် ဆက်စပ်ပတ်သက်သူများကို စစ်ကောင်စီက လိုက်လံရှာဖွေခြင်းများ ပြုလုပ်နေကြောင်း သိရသည်။

စစ်ကောင်စီတပ်၏ ဖမ်းဆီးခံရမှုကြောင့် DRF တပ်ဖွဲ့၏ မြို့ပြတိုက်ပွဲများ ဖော်ဆောင်ရာတွင် အသုံးပြုသည့် လိုင်စင်ပါသည့် မော်တော်ယာဉ်တစ်စီး၊ သေနတ်အတိုနှစ်လက်၊ ၄၀ မမဗုံးသီးများ၊ ကျည်နှင့်မိုင်းများအပါအဝင် ငွေကျပ် သိန်း ၅၀၀ ကျော် ဆုံးရှုံးခဲ့ရသည်။

“ပစ္စည်းတန်ဖိုး ကျပ်သိန်း ၂၅၀ ဖိုးလောက်ပါသွားတယ်။ ကားက လိုင်စင်နဲ့ဆိုတော့ အားလုံးပေါင်း သိန်း ၅၀၀ ကျော်ပါသွားတယ်။ ကျန်နေတဲ့ ရဲဘော်တွေကတော့ ထွက်ပြေးရင်းနဲ့ အခုတော့ အကုန်လွတ်မြောက်နယ်မြေရောက်နေပါပြီ” ဟု DRF တပ်ဖွဲ့ တာဝန်ရှိသူက ဆက်ပြောသည်။

စစ်ကောင်စီတပ်က ကျန်ရှိသည့် တပ်ဖွဲ့ဝင်များ၏ အချက်အလက်များကို ရရှိထားသည့်အပြင် ဆုံးရှုံးသွားသည့် ပစ္စည်းများကို ပြန်လည်ရှာဖွေရန် မလွယ်သည့် အတွက် လုံခြုံရေး အခြေအနေအရ မြို့ပြစစ်ဆင်ရေးလှုပ်ရှားမှုကို ရပ်ဆိုင်းလိုက်ရခြင်း ဖြစ်ကြောင်း ၎င်းက ဆိုသည်။

လက်ရှိအချိန်တွင် DRF အဖွဲ့မှ ကျန်တပ်ဖွဲ့ဝင်ရဲဘော်များအားလုံး လွတ်မြောက် နယ်မြေတွင် ဘေးကင်းစွာ ရောက်ရှိခိုလှုံနေပြီဖြစ်၍ အရေး တော်ပုံအောင်မြင်သည့်အထိ ဆက်လက်တိုက်ပွဲဝင်သွားမည်ဟု DRF က မိဘပြည်သူများကို အသိပေးထားသည်။

Dictator Revolt Front (အာဏာရှင်တော်လှန်ရေးတပ်ဦး) သည် ရန်ကုန်တိုင်း ခရိုင်လေးခရိုင်အတွင်းရှိ စစ်ကောင်စီတပ်ဖွဲ့ဝင်များနှင့် ၎င်းတို့၏ စီးပွားရေးလုပ်ငန်းများ၊ ထောက်တိုင်များကို တိုက်ခိုက်မှုများစွာ ပြုလုပ်ထားသည့် ရန်ကုန်မြို့ပြ မြေအောက် ပြောက်ကျား တော်လှန် ရေးတပ်ဖွဲ့တစ်ခု ဖြစ်သည်။ mizzima

မြိုင်မြို့ ဒေသခံ ၆ ဦး သတ်ဖြတ်ခံရပြီး ရေနံ တွင်းများ မီးရှို့ခံရဟု PDF ပြေ

မကွေးတိုင်း မြိုင်မြို့နယ်အတွင်း စစ်ကြောင်းထိုးနေသည့် စစ်ကောင်စီတပ်က အရပ်သား ၆ ယောက်ကို သတ်ဖြတ်ကာ လက်ယက်ရေနံတွင်းပေါင်း ၁၀၀ ခန့်ကို မီးရှို့ဖျက်ဆီးခဲ့သည်ဟု မြို့နယ်ပြည်သူ့ကာကွယ်ရေးတပ်ဖွဲ့ PDF တပ်ရင်းမှူးက ပြောသည်။

ယမန်နေ့ (ဇူလိုင် ၈) ရက် နံနက်ပိုင်းက ဆူးဝင်းရွာအနီး ထိုရုပ်အလောင်းများကို တွေ့ရှိခဲ့သည်ဟု မြိုင်PDFမှ တပ်ရင်းမှူးတစ်ဦးဖြစ်သူ ဗိုလ်လက်ယာက ပြောသည်။

“ရွာအလယ်မှာ ၂ နှစ်လောင်း၊ အနောက်ဘက် ရွာအစပ်မှာ ၄ လောင်း တွေ့တယ်၊ နာမည်တွေကတော့ အတည်ပြုလို့မရသေးဘူး” ဟု ပြောသည်။ 

သေဆုံးသူများအနက် အချို့မှာ မျက်နှာတွင် ဒဏ်ရာများ တွေ့ရကြောင်း၊ စစ်ကောင်စီတပ်သားတို့က ၎င်းတို့ ဖမ်းဆီးထားသူတို့၏ မျက်နှာနှင့် ဦးခေါင်းကို စစ်ဦးထုပ်များနှင့် ရိုက်နှက်ခဲ့သည်ဟု ဒေသခံတို့ထံမှ သိရကြောင်း ဗိုလ်လက်ယာက ပြောသည်။

ဆူးဝင်းရွာရှိ နေအိမ် ၄ လုံးကိုလည်း မီးရှို့ဖျက်ဆီးခဲ့သည်ကို တွေ့ရကြောင်း သူက ဆက်ပြောသည်။

စစ်ကောင်စီတပ်နှင့် မြိုင် PDF တို့ ဆူးဝင်းရွာမြောက်ဘက် ၁ မိုင်ခန့်အကွာတွင် ဇူလိုင် ၅ နံနက် ၈ နာရီမှ ညနေ ၆ နာရီဝန်းကျင်အထိ နှစ်ဖက်တိုက်ပွဲဖြစ်ပွားခဲ့သေးသည်။  

အဆိုပါတိုက်ပွဲအတွင်း စစ်ကောင်စီတပ်သား ၁၂ ဦး သေဆုံးသလို ၎င်းတို့ဘက်ကလည်း ၂ ဦး သေဆုံးသည်ဟု မြိုင် PDF က ပြောသည်။

သေဆုံးသွားသည့် စစ်ကောင်စီတပ်သားများကို ရွာအတွင်းမီးရှို့ သင်္ဂြိုဟ်ခဲ့ကြသည်ဟု ဆိုသည်။

“ရွာထဲမှာ အမိန့်ပြန်တာတွေ လုပ်ပြီးမှ မီးရှို့သွားတာလို့ ပြောတယ်။ ရွာထဲက အိမ်ထဲမှာ အလောင်းတွေ ပုံရှို့သွားတာ။ ခြေထောက်ရိုး၊ လက်ရိုး၊ မေးရိုးခွံတွေပဲ တွေ့ရတော့တယ်” ဟု သူက ဆိုသည်။  

လက်ရှိတွင် စစ်ကောင်စီတပ်သည် ကျောက်ခွက်ရွာ၌ တပ်စွဲလျက်ရှိပြီး ထိုနေရာသို့ အင်အား ၈၀ ကျော်ပါသည့် စစ်ကြောင်းတစ်ကြောင်း လာနေသည်ဟု သတင်းရကြောင်း ဗိုလ်လက်ယာက ပြောသည်။

ဆူးဝင်းရွာအပါအဝင် မြိုင်မြို့နယ်အနောက်ပိုင်းရှိ ကျောက်ခွက်၊ ဆူးဝင်း၊ ဝယ်တောင် (တောင်)၊ သရက်ကန်၊ ရေခါး၊ နယ်သတ်၊ တဲကြီး၊ တောင် ရိုး၊ ဝက်ဖိုး၊ ညောင်ပင်ဇောက်၊ မှန်ရင်း၊ မကြီးကန်၊ နန်းတောရာတို့မှ ထောင်နှင့်ချီသော ရွာသားများမှာ ဇူလိုင် ၂ ကတည်းက စစ် ကြောင်းထိုးနေသည့် စစ်ကောင်စီတပ်ကြောင့် ဘေးလွတ်ရာသို့ တိမ်းရှောင်နေကြရသည်။

ရေနံတူးဖော်ရေးလုပ်ငန်းမှာ မြိုင်မြို့နယ်တွင် နေထိုင်သူများ၏ အဓိကလုပ်ငန်းကြီးတစ်ခုဖြစ်သည်။

ဒေသခံတို့၏ လုပ်ငန်းများ မီးရှို့ဖျက်ဆီးခံရမှုကြောင့် မည်မျှဆုံးရှုံးသည်ကို လေ့လာထုတ်ပြန်မှုမျိုး မရှိသေးပေ။

ဒေသခံတို့က PDF တို့ကို ထောက်ပံ့နိုင်ခြင်း မရှိစေရန် လုပ်ငန်းများ၊ နေအိမ်များကို စစ်ကောင်စီတပ်က မီးရှို့ဖျက်ဆီးနေခြင်းဖြစ်သည်၊ ဖြတ်လေးဖြတ်စစ်ဆင်ရေး၏ အစိတ်အပိုင်းတစ်ခုဖြစ်သည်ဟု လေ့လာသူတို့က ပြောသည်။

နိုင်ငံအနှံ့အပြား နေအိမ်များ မီးရှို့ခံနေရသော်လည်း စစ်ကောင်စီက ထိုဖြစ်ရပ်များမှာ ၎င်းတို့၏လက်ချက်မဟုတ်ဟု ရံဖန်ရံခါ တုံ့ပြန်တတ် သည်။

ပြည်သူတို့၏ အိုးအိမ်ပေါင်း ၁၈,၈၈၆ လုံးကို စစ်ကောင်စီတပ်သားတို့က မီးရှို့ဖျက်ဆီးခဲ့ကြကြောင်း Data For Myanmar အဖွဲ့က ဇွန်လ ၇ ရက်တွင် ထုတ်ပြန်သည်။ ထိုအထဲတွင် မကွေးတိုင်းအတွင်းမှ အိုးအိမ်ပေါင်း ၃,၀၅၅ လုံးပါဝင်ပြီး မြိုင်မြို့နယ်အတွင်း ကျေးရွာပေါင်း ၁၁ ရွာမှ အိမ်ခြေ ၇၄၂ လုံး ပါဝင်သည်ကို Myanmar Now က လေ့လာတွေ့ရှိရသည်။

စစ်ကောင်စီသည် ၁ လလျှင် ၂ ကြိမ် သတင်းစာရှင်းလင်းပွဲများ ပြုလုပ်ဝါဒဖြန့်နေသည်။ ပြည်သူအများ သတ်ဖြတ်ခံရခြင်း၊ နေအိမ်များ မီးရှို့ခံရခြင်း၊ လူ့အခွင့်အရေးချိုးဖောက်မှုများအတွက် သတင်းစာရှင်းလင်းပွဲများတွင် မေးခွန်းထုတ်သူ မရှိပေ။

နိုင်ငံတွင်း မတည်ငြိမ်မှုများတွက် ပြည်သူပါဝင်သော လုံခြုံရေးအဖွဲ့အစည်းများ ဖွဲ့စည်းကာ PDF များကို ချေမှုန်းသွားမည်ဟု စစ်ကောင်စီ ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းက ဇူလိုင် ၁ သတင်းစာရှင်းလင်းပွဲတွင် ပြောသွားသည်။ myanmar now

တမူးမြို့တွင် အိန္ဒိယလူမျိုး ၂ဦးကို ပစ်ခတ်သည့်ပျူစောထီးဆိုသူများအား စစ်ကောင်စီတပ် စောင့်ရှောက်ထားဟုဆို

စစ်ကိုင်းတိုင်း၊ တမူးမြို့ ၊စော်ဘွားရပ်ကွက် အမှတ် (၄) အမက ကျောင်းအနီးတွင် အိန္ဒိယနိုင်ငံသား နှစ်ဦးအား ပစ်ခတ်လိုက်သည့် ပျူစောထီး အဖွဲ့ဝင်များကို စစ်ကောင်စီတပ်က ခေါ်ယူပြီး ကာကွယ်စောင့်ရှောက်ထားကြောင်း ဒေသခံထံက သိရသည်။

အိန္ဒိယနိုင်ငံသားများဖြစ်သော Mr. P. Mohan (၂၈နှစ်) နှင့် Mr.Aiyanar (၃၅နှစ်) တို့ အား သတ်ဖြတ်ခဲ့သူများမှာ ပျူစောထီးခေါင်းဆောင် မောင်လေးဝင်း ဆိုသူ၏ ညွှန်ကြားမှု လက်အောက်ရှိ ကိုဖိုးစိန်နှင့် ကိုဇော်ရဲ ဆိုသူတို့ ဖြစ်ကြောင်း သက်ဆိုင်ရာမြို့နယ် တာဝန်ရှိသူ အဖွဲ့အစည်းများ တင်ပြချက်ကို ကိုးကားပြီး အမျိုးသားညီညွတ်ရေးအစိုးရ NUG က ယမန်နေ့ ဇူလိုင်လ ၈ရက်နေ့တွင် ထုတ်ပြန်ထားသည်။

“အခု လေးဝင်း၊ ဖိုးစိန်နဲ့ ဇော်ရဲ တို့ကို စစ်ကောင်စီဘက်ကခေါ်သွားပြီ စစ်ခွေးတပ်ထဲမှာ ပုန်းနေကြတယ်” ဟု လုံခြုံရေးအရ အမည်မဖော်လိုသော တမူးမြို့ခံ တစ်ဦးက မဇ္စျိမ ကိုပြောသည်။

အဆိုပါ ပျူစောထီးဆိုသူများအား စစ်ကောင်စီတပ်ဖွဲ့က ခေါ်ယူထားပြီး ကာကွယ်ပေးထားကာ အခြားပျူစောထီးအဖွဲ့ဝင်များလည်း တောနယ်ဘက်သို့ ထွက်ပြေးတိမ်းရှောင် နေကြောင်း သိရသည်။

တမူးမြို့မှ ပျူစောထီးခေါင်းဆောင်မှာ ဦးချမ်းမြေ့ (ပန်းချီချမ်းမြေ့)ဖြစ်ပြီး ဦးလေးဝင်းဆိုသူက ဒုတိယ ခေါင်းဆောင်ဖြစ်ကာ ဦးဝင်းမော်ဆိုသူမှာ လည်း ဒေသအတွင်း နာမည်ကြီးသူဖြစ်ကြောင်း ဆိုသည်။

“ဦးချမ်းမြေ့က NLD အစိုးရခေတ်က ဒေါ်အောင်ဆန်းစုကြည်ကို ဂုဏ်သိက္ခာ ညှိုးနွမ်းစေရန် ရေးသားမှုနဲ့ အပြစ်ပေးခံရဖူးတယ်။ အခုအမုန်းအာဃာတနဲ့ ခံစားချက်ရှေ့တန်းတင်ပြီး အပြစ်မဲ့ ပြည်သူများကို ရက်ရက်စက်စက် ပစ်သတ်တာတွေ လုပ်နေတာ “ဟု ဒေသခံက ဆိုသည်။

အိန္ဒိယနိုင်ငံသားနှစ်ဦးကို ပစ်သတ်ရန်အမိန့်ပေးညွှန်ကြားခဲ့သူမှာ ဦးလေးဝင်းဆိုသူဖြစ်ကြောင်း၊ အလုပ်အကိုင်မရှိကြောင်း၊မည်သည့် အသက် မွေးဝမ်းကြောင်းအလုပ် လုပ်ကိုင်သည်ကို မသိရှိရကြောင်း၊ မိဘအိမ်တွင် ခိုကပ်နေသူဖြစ်ကာ ယခင်က မဘသအဖွဲ့ဝင်ဖြစ်ပြီး ထိုမှ ကြံ့ခိုင်ရေး ပါတီသို့ဝင်ကာ ကြံ့ခိုင်ရေးပါတီမှတဆင့် လက်ရှိပျူစောထီး ဖြစ်သွားကြောင်း အဆိုပါဒေသခံမှ ဆက်ပြောသည်။

ထို့အပြင် ဦးလေးဝင်းဆိုသူသည် တပ်ထောက်ခံပွဲများတွင် တောရော မြို့ပါမကျန် မဲဆွယ်စည်း ရုံးခြင်း၊ အကြိုအပို့များ လုပ်ဆောင်ပေးတတ်ပြီး ၎င်းသည် မိသားစုဝင် ညီအကိုသုံးယောက်တွင် အလတ်ဖြစ်ကြောင်း သိရသည်။

အိန္ဒိယနိုင်ငံသား နှစ်ဦးအား ပစ်သတ်ခဲ့သူ နှစ်ဦးဖြစ်သော ဦးဖိုးစိန်နှင့် ဦးဇော်ရဲ ဆိုသူတို့သည် ကြံ့ခိုင်ရေးပါတီဝင်များ ဖြစ်ပြီး ယခု လက်ရှိတွင် ပျူစောထီး အဖွဲ့ဝင်များဖြစ်ကြောင်း ၊တမူးမြို့ပေါ်တွင်လည်း ပြည်သူများထံမှ အတင်းအကျပ် ငွေကြေးတောင်းခံမှုများ ပြုလုပ်နေသူများဖြစ်ကြောင်း သိရသည်။

ဦးဖိုးစိန် ဆိုသူမှာ ပျူစောထီးခေါင်းဆောင် ဦးချမ်းမြေ့ဆိုသူနှင့် ခမည်းခမက်များဖြစ်ပြီး အသက် ၅၀ ဝန်းကျင်ရှိကာ အလုပ်အကိုင် အတည်တ ကျမရှိဘဲ ရံဖန်ရံခါ ရေတွင်းတူး အငှါးလိုက် ကြောင်းနှင့် ဦးဇော်ရဲဆိုသူမှာ အသက် ၃၀ ဝန်းကျင်ရှိပြီး သုံးဘီးမောင်းသူ ဖြစ်ကြောင်းဆိုသည်။

တမူးမြို့တွင် ပျူစောထီး အရေအတွက် ရာဂဏန်းခန့်ရှိပြီး ကြံ့ခိုင်ဖွံ့ဖြိုးရေးပါတီဝင် အများစုမှာ ပျူစောထီးအဖွဲ့ဝင်များဖြစ်၍ ခါးချိုး နှင့် AK 47 သေနတ်အမျိုးအစားများကို ကိုင်ဆောင်ကြကြောင်း ဒေသခံ၏ သတင်းပေးပို့ပြောဆိုချက်အရ သိရသည်။

ဇူလိုင်လ ၅ရက်နေ့က တမူးမြို့တွင် အိန္ဒိယနိုင်ငံသား နှစ်ဦီးအား ပစ်သတ်ပြီးနောက် ဆေးရုံတွင်ထားကာ ၆ရက်နေ့ နံနက်တွင် အလောင်းများအား စစ်ကောင်စီတပ်မှ မီးရှို့ဖျောက်ဖျက်ခဲ့ခြင်းဖြစ်ကြောင်း သိရသည်။

စစ်ကောင်စီ ပြန်ကြားရေးမှ ဗိုလ်ချုပ်ဇော်မင်းထွန်းက အဆိုပါ နှစ်ဦးအား PDF အကြမ်းဖက်များ မှ သတ်ဖြတ်ခြင်းဖြစ်ကြောင်း စွပ်စွဲထား သည်။

ယင်းသတ်ဖြတ်မှုနှင့် ပတ်သက်ပြီး အိန္ဒိယနိုင်ငံ မိုးရေးမြို့ မှ သေဆုံးသူများ၏ မိသားစုဝင် များအပါအဝင် ဒေသခံပြည်သူများက အလောင်းပြန်ရရှိရေးနှင့် တရားခံများ ဖော်ထုတ်နိုင်ရေး အတွက် ရဲစခန်းတွင် ဆန္ဒပြခဲ့ကြသည်။

အဆိုပါ ဆန္ဒပြလူအုပ်သည် ရဲစခန်းမှတဆင့် မြန်မာနိုင်ငံဘက်ခြမ်းသို့ ဝင်ရောက်ကာ ရဲကင်းစခန်းနှစ်ခုကို မီးရှို့ခဲ့ပြီး ကျောက်ခဲများဖြင့် ပစ်ပေါက်ခြင်းများ ပြုလုပ်ခဲ့ကြသေးသည်။

စစ်ကိုင်းတိုင်း တမူးမြို့နှင့် အိန္ဒိယနိုင်ငံ မိုးရေးမြို့သည် နယ်မြေချင်းထိစပ်နေသည့် ကုန်သွယ်ရေးမြို့ဖြစ်ပြီး အဆိုပါဖြစ်ရပ်များကြောင့် နှစ်နိုင်ငံ အသွားအလာများ ရပ်ဆိုင်းကာ ကုန်သွယ်စီးဆင်းမှုများရပ်တန့်နေကြောင်း ဒေသခံများထံက သိရသည်။

ဒေသတွင်းရှိ ပြည်သူ့ကာကွယ်ရေးတပ်ဖွဲ့များ နှင့် ဒီမိုကရေစီအရေးလှုပ်ရှားသည့် အဖွဲ့အစည်းအသီးသီးက ပျူစောထီး၏ ယခုကဲ့သို့ သတ် ဖြတ် မှုအပေါ် ရှုတ်ချကြောင်း မိသားစုများနှင့်အတူဝမ်းနည်းရကြောင်းနှင့် တရာမျှတမှုအတွက် ပူးပေါင်းဆောင်ရွက်သွားကြမည်ဖြစ်ကြောင်း ထုတ်ပြန်ချက်များ ထုတ်ပြန်ထားကြသည်။ mizzima

မော်လိုက်မြို့နယ် ဝဲဒေါင့်ကျေးရွာတွင် စစ်ကောင်စီတပ် တိုက်မိုင်းမိ၍ ၄ ဦးသေဟုဆို

စစ်ကိုင်းတိုင်းဒေသကြီး၊ မော်လိုက်မြို့နယ် ဝဲဒေါင့်သစ်ထုတ်ရေးမှ လောင်စာဆီလာသယ်သည့် စစ်ကောင်စီတပ်သားများ တိုက်မိုင်းမိ၍ လေးဦးသေဆုံးကြောင်း မော်လိုက်မြို့နယ် ပြည်သူကာကွယ်ရေးတပ်ဖွဲ့ထံမှ သိရသည်။

ဇူလိုင်လ ၈ ရက် ညနေ ၃ နာရီခန့်တွင် မော်လိုက်မြို့ အရှေ့ဘက် မိုင် ၂၀ အကွာရှိ ဝဲဒေါင့်သစ်စခန်းရှိ အင်အား ၄၀ ကျော်သည့် စစ်ကောင်စီတပ်သားများ PDF များထောင်ထားသည့် တိုက်မိုင်းမိခဲ့ခြင်း ဖြစ်သည်။

” ကျွန်တော်တို့က သတင်းကြိုရလို့ အဲ့သစ်စခန်းမှာ တိုက်မိုင်းတွေတော်တော်များများ ဆင်ထားခဲ့တာ။ မနေ့ကတော့ လေးယောက်သေတယ်လို့ တပ်နဲ့ နီးစပ်သူက သတင်းပေးပို့လာတာ။ အပြန်အလှန်ပစ်တာမျိုးတော့မရှိဘူး။ စစ်ရေးကတော့ တင်းမာနေတယ် ” ဟု မော်လိုက် PDF မှ တာဝန်ခံ ကိုမိုးဒီက မဇ္ဈိမသို့ပြောသည်။

ဝဲဒေါင့်သစ်ထုတ်လုပ်ရေးစခန်းတွင် သစ်များ၊ လောင်စာဆီများထားရှိခြင်းဖြစ်ကာ ဇူလိုင်လ ၇ ရက် ကတည်းက အဆိုပါနေရာသို့ မော်လိုက်မြို့မှ စစ်ကောင်စီတပ်သားများ ရောက်ရှိစခန်းချ နေထိုင် နေသည်ဟုသိရသည်။

မော်လိုက် PDF အနေဖြင့် မော်လိုက်မြို့ တစ်ဘက်ခြမ်း ၄၀ ရာခိုင်နှုန်းကို နယ်မြေစိုးမိုးထားနိုင်သော်လည်း စစ်ကောင်စီတပ်များမှ မကြာခန စစ်ကြောင်းထိုးလာခြင်းမျိုး ရှိသောကြောင့် အခြေချ နေထိုင်နိုင်ခြင်းမျိုး မရှိဘူးဟုသိရသည်။

ယနေ့တွင်လည်း အဆိုပါ ဝဲဒေါင့်ကျေးရွာဘက်သို့ စစ်ကောင်စီတပ်သားများ ထပ်ရောက်လာနေပြီး တိုက်ပွဲများ ဆက်ဖြစ်လာနိုင်သည့် အခြေ အနေ ရှိနေသည်ဟု ဆိုသည်။

” ကျွန်တော်တို့အနေနဲ့က နဂိုကနဲ့ မတူဘူး။ စစ်ရေးအခြေအနေက မြင့်လာတယ်။ စစ်ကြောင်းထိုးလာတာလည်း များလာတယ်။ စစ်ရှောင်တွေလည် များလာတဲ့အတွက် အခက်အခဲတွေ အများကြီးနဲ့ ရင်ဆိုင်နေရတယ်။ အင်တာနက်လဲ ဖြတ်တောက်ခံထားရတယ်။ ကူညီပေးနိုင်တဲ့သူတွေ ကူညီပေးကြဖို့ တောင်းဆိုပါတယ်” ဟု တာဝန်ခံ ကိုမိုးဒီက ပြောသည်။

ဇူလိုင်လ ၇ ရက် နေ့လယ် ၁ နာရီ ၃၀ မိနစ်အချိန်ကလည်း အဆိုပါ ဝဲဒေါင့်သစ်စခန်းသို့ လာရောက်ခဲ့သည့်စစ်ကောင်စီတပ်သားများ တိုက်မိုင်းမိ၍ ရှစ်ဦးသေဆုံးကာ အများအပြား ဒဏ်ရာရခဲ့သေးကြောင်း သိရသည်။

အဆိုပါ စစ်ကောင်စီတပ်သည် ဝဲဒေါင့်သစ်စခန်းသို့မရောက်မှီ ဝဲဒေါင့်ကျေးရွာ တစ်ဖက်ကမ်းရှိ ဝဲကသာကျေးရွာသို့ အရင်ဝင်ရောက်ကာ နေ အိမ်နှစ်လုံးကို မီးရှို့ဖျက်ဆီးခဲ့သည်။

မော်လိုက်မြို့နယ်အတွင်း ကျေးရွာအများစုမှဒေသခံများမှာ ကျေးရွာများအတွင်း နေထိုင်နိုင်သည့် အခြေအနေမရှိဘဲ နီးစပ်ရာတောစပ်များနှင့် စစ်ရှောင်စခန်းများတွင် နေထိုင်နေကြရသည်။ mizzima

ပင်လည်ဘူး၊ မြိုင်နှင့်ရေစကြိုတို့တွင် တိုက်ပွဲဖြစ်ပြီး စစ်ကောင်စီတပ်ဖွဲ့ဝင် ၁၀ ဦးသေဆုံး

စစ်ကိုင်းတိုင်း၊ပင်လည်ဘူး၊ မကွေးတိုင်း၊ မြိုင်နှင့်ရေစကြိုတို့တွင် တိုက်ပွဲဖြစ်ပြီး စစ်ကောင်စီတပ်ဖွဲ့ဝင် ၁၀ ဦးသေဆုံးကြောင်း ဒေသကာကွယ်ရေးတပ်ဖွဲ့များ၏ သတင်းထုတ်ပြန်ချက်အရ သိရှိရသည်။

မကွေးတိုင်း၊မြိုင်တွင် စစ်သား ၂ ဦးသေဆုံး

=========================

မကွေးတိုင်း မြိုင်မြို့နယ် ဝက်ပုတ်ရွာ တောင်ဘက်တွင် ဇူလိုင်လ ၈ ရက်နေ့ နံနက် ၁၁ နာရီခန့်က အကြမ်းဖက် စစ်တပ် စစ်ကြောင်း မိုင်းဆွဲ တိုက်ခိုက်ခံရပြီး စစ်သား ၂ ဦးသေဆုံးခဲ့ကြောင်း မြိုင်မြို့နယ် PDF တပ်ဖွဲ့ထံမှ သိရသည်။

အကြမ်းဖက် စစ်တပ် စစ်ကြောင်းသည် ကျောက်ခွက်ရွာ၊ မန်ကျည်းကုန်းရွာမှ စက်မှု-၂ သို့ ပြန်လာစဥ် မြိုင်မြို့နယ်ပြည်သူ့ကာကွယ်ရေးတပ်ဖွဲ့မှ တိုက်မိုင်း ၄ လုံးဖြင့် ဖောက်ခွဲ တိုက်ခိုက်ရခဲ့ခြင်းဖြစ်ပြီး စစ်သား ၂ ဦးသေဆုံးပြီး ၃ ဦး အပြင်း အထန် ဒဏ်ရာ ရရှိခဲ့ကြောင်း သိရသည်။

ပင်လည်ဘူးတွင် စစ်သား ၃ ဦးသေဆုံး

==============================

စစ်ကိုင်းတိုင်း ပင်လည်ဘူးမြို့နယ် စေတီဦးကျေးရွာတွင် အထိုင်ချ တပ်စွဲထားသော အကြမ်းဖက် စစ်တပ်ကို ဇူလိုင်လ ၈ ရက်နေ့ ညပိုင်းက ဒေသခံကာ ကွယ်ရေး တပ်ဖွဲ့များ လက်နက်ကြီး လက်နက်ငယ်များဖြင့် ပစ်ခတ် တိုက်ခိုက်ခဲ့ပြီး စစ်သား ၃ ဦးထက်မနည်း သေဆုံးခဲ့ကြောင်း ပင်လည်ဘူးမြို့နယ် PDF တပ်ဖွဲ့ထံမှ သိရသည်။

အကြမ်းဖက် စစ်တပ် တပ်စွဲထားသော နေရာကို ပင်လည်ဘူးမြို့နယ် PDF နှင့် ဒေသခံ ကာကွယ်ရေး တပ်ဖွဲ့များ လက်နက်ကြီး၊ လက်နက်ငယ်များဖြင့် ဝင်ရောက် ပစ်ခတ် တိုက်ခိုက် ခဲ့ခြင်း ဖြစ်ကြောင်း သိရသည်။

လက်ရှိအချိန်တွင် ပင်လည်ဘူး မြို့နယ်အတွင်းရှိ အင်ကုန်း၊ ဆိုင်ရာကြီး၊ ပလူသာ၊ ပင်းကြိုင်း၊ ပင်လောင်၊ ပဒဲကော၊ စေတီဦး စသည့်ကျေးရွာများမှ ပြည်သူ ၉ ထောင်ကျော်ခန့်သည် အကြမ်းဖက် စစ်တပ် ဝင်ရောက်စီးနင်း ဖျက်ဆီးနေသောကြောင့် ဘေးလွတ်ရာသို့ ထွက်ပြေး တိမ်းရှောင်နေရကြောင်း သိရသည်။

ရေစကြိုတွင် စစ်သား ၅ ဦးသေဆုံး

====================

အလားတူ မကွေးတိုင်းအတွင်းရှိ ပခုက္ကူ၊ မြိုင်၊ ရေစကြို နယ်နမိတ်အစပ်ရှိ ကျေးရွာများက ပြည်သူပိုင် ပစ္စည်းများကို ခိုးယူ လုယက်နေသော အကြမ်းဖက် စစ်တပ် စစ်ကြောင်း ပြန်လည် ဆုတ်ခွာ လာစဥ် ဇူလိုင်လ ၈ ရက်နေ့ နံနက်ပိုင်းတွင် ဒေသခံ ကာကွယ်ရေး တပ်ဖွဲ့များက စောင့်ကြို တိုက်ခိုက်ခဲ့ပြီး စစ်သား ၅ ဦးသေဆုံးခဲ့ကြောင်း ကာကွယ်ရေး တပ်ဖွဲ့များထံမှ သိရသည်။

အကြမ်းဖက် စစ်တပ် စစ်ကြောင်း ပြန်လည် ဆုတ်ခွာလာစဥ် Southern yso (pdf)၊ Urban Underground Revolution force-yso(UURF)၊ Shwe Nyar Myae (pdf)၊ Yesagyo revolution group(YRG)၊ ပခုက္ကူမြို့ပြ ပြောက်ကျား တပ်ဖွဲ့၊ Young Force (UG)၊ သခင်မြ (လ/န ကြီးတပ်ဖွဲ့)၊ Black Crobaနှင့် ကျောက်ထု PDF တပ်ရင်း(၂) တို့က ပူးပေါင်း စောင့်ကြို တိုက်ခိုက်ခဲ့ပြီး အပြန် အလှန် ပစ်ခတ်မှု ၁ နာရီခန့် ကြာမြင့်ခဲ့ပြီး စစ်သား ၅ ဦးသေဆုံးကာ အများအပြား ထိခိုက် ဒဏ်ရာ ရရှိခဲ့ကြောင်း သိရသည်။

စစ်တပ်ဘက်မှ အထိနာပြီး စစ်ကူများ ထပ်မံ ရောက်ရှိလာသောကြောင့် ယာ ယီ ဆုတ်ခွာခဲ့ချိန်တွင် တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာ နိုင်ခဲ့သော်လည်း ဆုံးရှုံးမှု တချို့ရှိခဲ့ကြောင်း၊ လက်နက် ခဲယမ်းလို အပ်ချက် များ ရှိနေသောကြောင့် ဆက်လက်ထောက်ပံ့ကြရန် မေတ္တာ ရပ်ခံအပ် ကြောင်း ကာကွယ်ရေး တပ်ဖွဲ့များမှ ထုတ်ပြန်ထားသည်။ khit thit

« Older Entries