Monthly Archives: Jul 2022

မြောင်မြို့နယ် ဆူးလေကုန်းရွာ တိုက်ပွဲအတွင်း စကစဗိုလ်ကြီး အပါအဝင် ၇ ဦး သေဆုံး

မကွေးတိုင်း၊ ရေစကြိုမြို့မှ ရေကြောင်းလမ်းအသုံးပြုကာ မြောင်မြို့နယ်၊ နနွင်းကိုင်းကျေးရွာသို့ အင်အား ၁၅၀ ခန့်ဖြင့် စစ်ကြောင်းထိုးလာသည့် စစ်ကောင်စီတပ်နှင့် ပြည်သူ့ကာကွယ်ရေးတပ်ဖွဲ့များ ဇူလိုင်လ ၄ ရက်နေ့တွင် တိုက်ပွဲဖြစ်ပွားရာ ဗိုလ်ကြီးတစ်ဦးအပါအဝင် ခုနစ်ဦး ကျဆုံးကြောင်း 27 Revolution Force- မြင်းခြံခရိုင် တပ်ရင်း (၁)မှ ထုတ်ပြန်သည်။

စစ်ကောင်စီတပ်မှ မြောင်နယ်အတွင်း ဆက်လက်စစ်ကြောင်းထိုးကာ တိုက်ပွဲဖြစ်ပွားနေသည့်အတွက် လုံခြုံရေးအရ ယခုအချိန်မှသာ တိုက်ပွဲသတင်းထုတ်ပြန်လာခြင်းဖြစ်ကြောင်း သိရသည်။

ဖြစ်စဥ်မှာ ဇူလိုင်လ ၄ ရက် နံနက် ၉ နာရီခန့်တွင် စစ်ကောင်စီတပ်သားများမှာ စက်လှေ သုံးစီးအသုံးပြု၍ ရေစကြိုမြို့မှ နနွင်းကိုင်းကျေးရွာသို့ အသုတ်များခွဲကာ လာရောက်တပ်စွဲရာမှ အစပြုခြင်း ဖြစ်သည်။

“၉ နာရီခွဲလောက်မှာ နနွင်းကိုင်းကျေးရွာကိုစပြီး ပစ်ဝင်လာတယ်။ ကျွန်တော်တို့က သတင်းနောက်ကျသွားလို့ ဆိပ်ကမ်းက စီးပြီးပစ်မယ့်အ ချိန် မရလိုက်ဘူး။ သူတို့ရွာထဲကို မြောက်ဖျားက ဝင်လာတဲ့အခါ ကျွန်တော်တို့ တောင်ဖျားကနေ သွားစောင့်တယ်။ ရွာခံတွေ မရှင်းလို့မလို့ ကျွန်တော်တို့နောက်တစ်ရွာဆုတ်ပြီး ဆူးလေကုန်းရွာကို ရွေ့လိုက်ရတယ်ဗျ”ဟု မြင်းခြံခရိုင် တပ်ရင်း (၁) မှ တပ်ရင်းမှူးက ပြောပြသည်။

ယင်းစစ်ကောင်စီတပ်မှာ ထိုနေ့ မွန်းတည့် ၁ နာရီအချိန်ခန့် နနွင်းကုန်းရွာမှတစ်ဆင့် ဘေးချင်းကပ်ဖြစ်သည့် ဆူးလေကုန်းရွာသို့ ထွက်ခွာလာရာ ကာကွယ်ရေးတပ်ဖွဲ့များနှင့် တိုက်ပွဲစတင်ဖြစ်ပွားခဲ့သည်။

“အဓိကက သူတို့ရှေ့ကင်းပေါ့၊ အဖွဲ့အလယ်ခေါင်ရောက်မှ ပစ်မယ်ဆိုပြီး နေရာယူထားတာ။ အဖွဲ့အသီးသီးပေါ့၊ ဆိပ်ကမ်းဘေးတွေရော ခွဲပြီးနေရာယူထားတာ။ သူတို့က ကျွန်တော်တို့ယူထားတဲ့နေရာအတိုင်း ဒဲ့တက်လာတာပဲ။ အဲ့မှာ အဖွဲ့ထဲက ကလေးတစ်ယောက်ရဲ့ သေနတ်က ကျည်ထွက်သွားတာ။ အဲ့အခါ ကျွန်တော်တို့ထင်သလို မဖြစ်လာဘဲ သူတို့က ကျွန်တော်တို့ကို ပတ်ပစ်တာပေါ့နော့။ ကျွန်တော်တို့ ခေါင်းတောင် မဖော်နိုင်ဘူး။ သူတို့ပစ်တာရပ်ပြီဆိုမှ ကျွန်တော်တို့ကလည်း RPG 7 နှစ်လုံး ပစ်တယ်။ ၄၀ မမနဲ့ပစ်တယ်။ နောက်ပြီး လက်နက်ငယ်တွေနဲ့ ဝိုင်းပစ်တယ်” ဟု မြင်းခြံခရိုင် တပ်ရင်း (၁) မှ တပ်ရင်းမှူးက ဆက်ပြောသည်။

နှစ်ဖက်အပြန်အလှန်ပစ်ခတ်ကြပြီး တိုက်ပွဲကြာချိန် နှစ်နာရီခန့်အတွင်း စစ်ကောင်စီဘက်မှ ဗိုလ်ကြီး တစ်ဦး အပါအဝင် စုစုပေါင်း ခုနစ်ဦးသေ ဆုံးကြောင်း ကာကွယ်ရေးတပ်ဘက်က ထုတ်ပြန်ထားသည်။

“သူတို့ အရာရှိကို မှန်ပြီးနောက် သူတို့ဘက်က ၆၀ မမ တွေနဲ့ စပစ်တာ။ ငါးလုံးလောက် ဆက်တိုက်ပစ်တာ။ အဲ့အချိန် ကျွန်တော်တို့ ကျည်အင် အားနဲ့ လျော့နည်းလာတော့ နောက်ရွာကို ပြန်ဆုတ်ခဲ့လိုက်တာ”ဟု သူက ရှင်းပြသည်။

အဆိုပါတိုက်ပွဲအား 27 Revolution Force- မြင်းခြံခရိုင်တပ်ရင်း(၁)မှ ဦးဆောင်၍ မြင်းခြံခရိုင်တပ်ရင်း (၂)၊ မြောင်မြို့နယ် ကျေးရွာတပ်ပေါင်းစု၊ MSPDF- စစ်ကိုင်းခရိုင်တပ်ရင်း (၄)၊ Thway Thaut Revolution Force စသည့် မဟာမိတ်တပ်ဖွဲ့များက ပူးပေါင်းတိုက်ခိုက်ခဲ့ခြင်းဖြစ်သည်။

တိုက်ပွဲပြီးနောက် ကာကွယ်ရေးတပ်ဖွဲ့များ ဆုတ်ခွာသွားချိန် စစ်ကောင်စီတပ်က ဆူးလေကုန်းကျေးရွာရှိ နေအိမ် ၂၃ လုံးနှင့် ဘာသာရေးအဆောက်အအုံ တစ်လုံးကို မီးရှို့ဖျက်ဆီးကာ မြောင်နယ်၊ မြေစွန်းကျေးရွာသို့ ထွက်ခွာခဲ့ကြောင်း သိရသည်။mizzima

ကနီမြို့တွင် ကျဆုံးပြည်သူ ၁၆ ဦး ၁ နှစ်ပြည့်နှင့် စစ်အာဏာရှင်ဆန့်ကျင်ရေးသပိတ် ပြု လုပ် 

စစ်ကိုင်းတိုင်း ကနီမြို့နယ်မှာ အကြမ်းဖက်စစ်ကောင်စီက သတ်ဖြတ်လို့ ကျဆုံးခဲ့တဲ့ ဒေသခံပြည်သူ ၁၆ ဦးရဲ့ ၁ နှစ်ပြည့် အခမ်းအနားနဲ့ စစ်အာဏာရှင် အမြစ်ပြတ် ကျဆုံးရေး လူထုသပိတ်ကို ဇူလိုင် ၁၀ ရက်‌နေ့ မနက်ပိုင်းက ကျင်းပပြုလုပ်ခဲ့ပါတယ်။

၂၀၂၁ ခုနှစ် ဇူလိုင် ၉ နဲ့ ၁၀ ရက်နေ့တွေက ကလေးမြို့ အခြေစိုက်  အကြမ်းဖက် စစ်‌ကောင်စီတပ်ဖွဲ့ တပ်ရင်း-၂၂၈၊ တပ်မ ၄၄ နဲ့ တပ်မ ၉၉ တပ်ရင်း ၂ ရင်းတို့က ကနီမြို့နယ်ထဲရှိ ကျေးရွာတွေကို မွှေနှောက်လုယက်ပြီး ခင်တန်းရှည်ကုန်းအနီးမှာ ပြည်သူ ၁၆ ဦးအား ဖမ်းဆီး သတ် ဖြတ်ခဲ့တာပါ။

“အကြမ်းဖက် စစ်အုပ်စုက ပြည်သူ ၂၆ ဦးကို ဖမ်းဆီးညှဉ်းပန်းခဲ့ပြီး အမျိုးသမီးတွေကို ပြန်လွှတ်ပေးကာ အမျိုးသား ၁၆ ဦးကို အစု လိုက်အပြုံလိုက် သတ်ဖြတ်ခဲ့တာ” လို့ ကနီမြို့နယ် လူထုသပိတ်ကော်မတီက ပြောပါတယ်။

ဦးစိုးအောင်၊ ဦလှပို၊ ဦးကျော်ငွေ၊ ဦးတင့်၊ ဦးအေးကို၊ ဦးဇော်ထွန်း၊ ဦးခင်မောင်မြင့်၊ ကိုတင်ကျော်အောင်၊ ကိုဇင်သူအောင်၊ ကိုဇော်ဌေး၊ ကိုသန်းမင်းဦး၊ ကိုမင်းချစ်ဦး၊ ကိုချစ်ဆူ၊ ကိုဇော်မင်းဌေး၊ ကိုဉာဏ်ထွန်း၊ ကိုသာပြည့်စုံတို့ အသတ်ခံရတာလို့ ဆိုပါတယ်။

ကနီမြို့နယ် ယင်းရွာက ၁၃ ဦး၊ ကုန်းသာရွာက ၁ ဦး၊ ထောက်ကြံ့ကုန်းရွာက ၁ ဦးနဲ့ ရေဦးမြို့နယ် ပလူဇဝရွာက ၁ ဦး ဖြစ်တယ်လို့ ကနီမြို့နယ် လူထုသပိတ်ကော်မတီက ထုတ်ပြန်ထားပါတယ်။ DVB

အမေရိကန်နိုင်ငံခြားရေးဝန်ကြီးနှင့် နွေဦးတက္ကသိုလ်တို့ တွေ့ဆုံပြီး ပညာရေး ပူးပေါင်းဆောင်ရွက်မည့် အစီအစဥ်များဆွေးနွေး

အမေရိကန်နိုင်ငံခြားရေးဝန်ကြီးနှင့် နွေဦးတက္ကသိုလ်တို့ တွေ့ဆုံပြီး ပညာရေးအတွက်ပူးပေါင်းဆောင်ရွက်မည့်အစီအစဥ်များဆွေးနွေးခဲ့သည်ဟု နွေဦးတက္ကသိုလ်က သတင်းထုတ်ပြန်သည်။

အရှေ့တောင်အာရှခရီးစဥ်အဖြစ်လာရောက်နေသည့် အမေရိကန်နိုင်ငံခြားရေးဝန်ကြီးအန်တိုနီဘလက်ကင်သည် ဇူလိုင် ၁၀ ရက်က ထိုင်းသို့ရောက်ရှိစဥ် မြန်မာ့အရေးတက်ကြွလှုပ်ရှားသူ လူငယ်များနှင့်တွေ့ဆုံခဲ့သည်။

ယင်းသို့ တွေ့ဆုံရာတွင် နွေဦးတက္ကသိုလ်မှ ကိုယ်စားလှယ်လူငယ်တစ်ဦးလည်းပါဝင်ခဲ့ပြီး ဆွေးနွေးခဲ့သည်ဟု နွေဦးတက္ကသိုလ်က ထုတ်ပြန် သည်။

ယင်းသို့ဆွေးနွေးရာတွင် ၂၀၂၁ အာဏာသိမ်းမှုအပြီး ပညာရေးအခြေအနေများ၊ ယခုထိအားကောင်းနေဆဲ ပညာရေး CDM ဆရာ ဆရာမများ၊ ကျောင်းသားများနှင့် ဝန်ထမ်းများ၏ အခြေအနေများ၊ အမေရိကန်ပြည်ထောင်စုနှင့် ပူးပေါင်းဆောင်ရွက်နိုင်မည့် ပညာရေးအစီအစဉ်များအ ကြောင်းကို ဆွေးနွေးခဲ့ကြသည်။

ထို့ပြင် မကြာမီကာလများတွင် မြန်မာနိုင်ငံတွင်းမှ အင်တာနက် မရရှိသော နေရာဒေသများ၌ မြေပြင်ပညာရေးသင်ကြားနိုင်မည့် နည်းလမ်း များကိုလည်း ဆွေးနွေးခဲ့ပြီး အမေရိကန် နိုင်ငံခြားရေးဝန်ကြီးနှင့် မိတ်ဖက်များမှ ကူညီနိုင်သည်များကို အားဖြည့်ပေးသွားမည်ဖြစ်ကြောင်း ပြောကြားခဲ့သည်ဟု နွေဦးတက္ကသိုလ်က ထုတ်ပြန်သည်။

နွေဦးတက္ကသိုလ်မှာ စစ်ကောင်စီလက်အောက်တွင် ပညာသင်ကြားလိုခြင်းမရှိသူများ၊ CDM ဆရာ ဆရာမအချို့က ပညာသင်ကြားပေးနေသည့် တက္ကသိုလ်တစ်ခု ဖြစ်သည်။

စီးပွားရေးစီမံခန့်ခွဲမှုဘာသာရပ်များ၊ နိုင်ငံခြားဘာသာများ၊ လူမှုစီးပွားဘာသာရပ်များကိုလည်း သင်ကြားပေးနေပြီး ရရှိသည့် ရန်ပုံငွေများကို CDM ဆရာ၊ ဆရာမများကို ထောက်ပံ့ပေးလျက် ရှိသည်။mizzima

“ဖိလေကြွလေ ရန်ကုန်မြေ” ဘန်နာစာတန်းကိုင်စွဲကာ လူငယ်များ ဆန္ဒပြ 

စစ်ကောင်စီတပ်ဖွဲ့တွေ လုံခြုံရေးတင်းကြပ်နေတဲ့ကြားက ရန်ကုန်မြို့တနေရာမှာ စစ်အာဏာရှင် ဆန့်ကျင်ရေး ဆန္ဒပြသပိတ် ပြုလုပ်ခဲ့ကြပါတယ်။

သပိတ်ကို စမ်းချောင်းပင်မသပိတ်စစ်ကြောင်း (Sc Strike) က ဦးဆောင်ကာ တော်လှန်သွေးမကုန် တောင်ဒဂုံသပိတ်အင်အားစု၊ ရေဘဝဲ(ပြည်သူ့အကျိုးပြုလူငယ်အဖွဲ့အစည်း)၊ Labour Alliance အဖွဲ့ဝင် (CTUM)၊ အခြေခံပညာကျောင်းသားလူငယ်များအစည်းအရုံး(အကလ-ဗဟို)၊ Revolution Force(RF)၊ စစ်အာဏာရှင်ဆန့်ကျင်ရေးရန်ကုန်အင်အားစု (AJAY) တို့ ပူးပေါင်းပြုလုပ်ခဲ့ကြတာပါ။

ပြီးခဲ့တဲ့ ဇူလိုင် ၇ ရက်နေ့က “ဆဲဗင်းဂျူလိုင်” အထိမ်းအမှတ်အဖြစ်နဲ့ ရန်ကုန်လူငယ်များသပိတ်ကို စစ်ကောင်စီတပ်သားတွေက ကားနဲ့တိုက်ပြီး ဗုံးနဲ့တိုက်ခိုက်ဖြိုခွင်းမှုတွေရှိနေခဲ့ပေမယ့် ဆန္ဒပြလူငယ်တွေဟာ အကြမ်းဖက်စစ်တပ်ကို ရရာနည်းနဲ့ တော်လှန်နေကြောင်း သိစေလိုတဲ့ ရည်ရွယ်ချက်နဲ့ သပိတ်ကို ဆင်နွှဲခဲ့ကြတာလို့ သပိတ်အင်အားစုတွေက ဆိုပါတယ်။DVB

မိုးကောင်းတွင် စစ်ခွေး၊ ရဲခွေး ဟု စာရေးထားသော PDF အလံကို ခြေဖြင့် ပြေးကန်သည့် မိုးကောင်း နယ်ထိန်းရဲ တွတ်ပီ မိုင်းကွဲ ထိမှန် ပွဲချင်းပြီးသေဆုံး

ကချင်ပြည်နယ်၊ မိုးကောင်းမြို့တွင် စစ်ခွေး၊ ရဲခွေးဟု စာရေးထားသော PDF အလံ စိုက်ထူထားမှုကို ခြေဖြင့် ပြေးကန် သည့် မိုးကောင်းနယ်ထိန်းရဲ တပ်ကြပ် တွတ်ပီ အလံနှင့်အတူ တွဲဖက်ထားသော မိုင်း ပေါက်ကွဲ ထိမှန်၍ သေဆုံးသွားကြောင်း PDF သတင်းရင်းမြစ်က ပြောဆိုသည်။

ယနေ့ နံနက် ၄ နာရီ ၃၀ မိနစ်အချိန် ကချင်ပြည်နယ်၊ မိုးကောင်းမြို့ ၊ မီးပွိုင့်အနီးတွင် မိုင်းကွဲမှု ဖြစ်ပွားကြောင်း၊ မိုင်းကွဲမှုကြောင့် မိုးကောင်းနယ်ထိန်းရဲတပ်ကြပ် တွတ်ပီ ပွဲချင်းပြီးသေဆုံးကြောင်း၊ ဖြစ်စဉ်မှာ မီးပွိုင့်အနီးတွင် PDF အလံပေါ်တွင် စစ်ခွေးရဲခွေး ရေးသားထားပြီး အလံကို မိုင်းထည့်ထားသော ခြင်းတောင်းဘေးတွင် စိုက်ထူထားကြောင်း၊ ရဲတပ်ကြပ် တွတ်ပီက ယင်းအလံကို ပြေးကန်စဉ် မိုင်းကွဲ၍ ခြေပြတ် လက်ပြတ်ဖြစ်ပြီး ပွဲချင်းပြီး သေဆုံးသွားကြောင်း သိရှိရသည်။

“ကျနော်တို့က မိုးကောင်းသတင်းမီဒီယာတွေကြောက်တယ်ဗျ။ မိုင်းကွဲတော့ နယ်ထိန်းရဲတွတ်ပီကတော့ ပွဲချင်းပြီး သေတယ်။ ဖြစ်တာက ဒီမနက် ၄ နာရီခွဲမှာဖြစ်တာ။ ကျနော်တို့ PDF တွေက တိုက်ရိုက် ပေးပို့တာပါ” ဟု မိုးကောင်း PDF ရဲဘော်တစ်ဦးက ပြောဆိုသည်။khit thit

မြိုင်နှင့် ပေါက်မြို့နယ်က ပြည်သူ ၇ ဦးကို စစ်ကောင်စီတပ် ဖမ်းဆီးသတ်ဖြတ်

မကွေးတိုင်း မြိုင် နဲ့ ပေါက်မြို့နယ်က ဒေသခံပြည်သူ ၇ ယောက်ကို ဇူလိုင် ၉ ရက်မနက်ပိုင်းမှာ စစ်ကောင်စီတပ်တွေက ဖမ်းဆီးသတ်ဖြတ်လိုက်ကြတယ်လို့ ဒေသခံတွေဆီကနေ သိရပါတယ်။

ပေါက်မြို့နယ် ကမ္ဘားဖြူရွာနဲ့ မြိုင်မြို့နယ် တောင်ရိုးရွာဘက်ကို ဇူလိုင် ၉ ရက် မနက် ၁၀ နာရီလောက်မှာ စစ်အင်အား ၁၀၀ လောက် စစ် ကြောင်းထိုး ဝင်ရောက်ပြီး ဒေသခံပြည်သူ ၇ ယောက်ကို ဖမ်းဆီးသွားကြတာလို့ ကမ္ဘားဖြူဒေသခံတယောက်က ပြောပါတယ်။

ကမ္ဘားဖြူရွာက ဒေသခံပြည်သူ ၅ ယောက်နဲ့ တောင်ရိုးရွာက ဒေသခံပြည်သူ ၂ ယောက်ကို ဖမ်းဆီးပြီး လည်ပင်းကြိုးနဲ့ချည်ကာ မြိုင်စက်မှု ၂ ထဲကို ဖောကားနဲ့ ဆွဲခေါ်သွားလို့ ၇ ယောက်လုံး သေဆုံးသွားတယ်လို့ ဆိုပါတယ်။

ကမ္ဘားဖြူဒေသခံက “စစ်(…)တွေ ဝင်လာတော့ ကျနော်တို့လည်း အသက်လုပြီး ဘေးလွတ်ရာကို ထွက်ပြေးခဲ့ကြရတာ။ မပြေးနိုင်လို့ ကျန်ခဲ့တဲ့သူတွေ ဖမ်းဆီး သတ်ဖြတ်ခံလိုက်ရတာပဲ”လို့ ဆိုပါတယ်။

ကျေးရွာ ၂ ရွာက နေအိမ်တွေကို တစ်အိမ်တက်ဆင်း ဝင်ရောက် မွှေနှောက်ပြီး ပြည်သူတွေရဲ့ လက်ဝတ်ရတနာတွေ၊ ငွေကြေးတွေနဲ့ ပစ္စည်းတွေ ကျပ်သိန်း ၃၇၀ ကျော်ဖိုးလောက်ကို ခိုးယူ သွားကြပြီး ပြည်သူတွေရဲ့ ဆိုင်ကယ်အများအပြားကိုလည်း မီးရှို့ဖျက်ဆီးခဲ့ကြတယ်လို့ ပြောပါတယ်။

စစ်ကောင်စီက နိုင်ငံတော်အာဏာကို မတရားသိမ်းပိုက်တဲ့ ဖေဖော်ဝါရီ ၁ ရက်ကနေ ဇူလိုင် ၈ ရက်အထိ နွေဦးတော်လှန်ရေးမှာ ကျဆုံးခဲ့ရတဲ့ ပြည်သူ ၂၀၇၄ ယောက်ရှိပြီး နိုင်ငံတဝန်း မတရားဖမ်းဆီးချုပ်နှောင်ခံထားရသူ ၁၁၄၅၁ ယောက်ရှိအနက်  ၁၂၂၄ ယောက် ထောင်ဒဏ် ချမှတ်ခံထားရတယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း (AAPP) ဇူလိုင် ၈ ရက်ထုတ်ပြန်ချက်အရ သိရပါတယ်။ DVB

မြိုင်၊ ကျောက်ခွက်ကျေးရွာအနီးရှိ ပြည်သူပိုင် ရေနံကျင်းများကို စစ်တပ်က ၃ ရက် ဆက် တိုက် မီးရှို့ဖျက်ဆီး၊ ဆုံးရှုံးမှု ပမာဏ သိန်းထောင်ချီရှိ

မကွေးတိုင်း၊ မြိုင်မြို့နယ်အနောက်ပိုင်း ကျောက်ခွက်ရွာအနီးရှိ ပြည်သူပိုင် ရေနံကျင်းများကို စစ်တပ်က ၃ ရက်ဆက်တိုက် မီးရှို့ဖျက်ဆီးလျက်ရှိပြီး ယနေ့ ဇူလိုင်လ ၁၀ ရက်နေ့ ညနေ ၅ နာရီအချိန်တွင်လည်း ရေနံကျင်းများကို ထပ်မံ မီးရှို့ဖျက်ဆီးလျက်ရှိကြောင်း We Love Myaing တာဝန်ခံ မြိုင်ဒေသခံက ပြောသည်။

အကြမ်းဖက်စစ်ကောင်စီတပ်များသည် ဝက်ပုတ်ရွာမှ တစ်ဆင့် တောင်ရိုးရွာ၊ ယင်းနောက် ဇူလိုင်လ ၇ ရက်နေ့တွင် ကျောက်ခွက်ကျေးရွာသို့ ရောက်ရှိလာကြောင်း၊ ကျောက်ခွက်ရွာသို့ ရောက်ရှိပြီးနောက် ကျေးရွာပတ်ပတ်လည်ရှိ ရေနံကျင်းများကို ဇူလိုင်လ ၇ ရက်နေ့မှ ယနေ့ အထိ ၃ ရက်ဆိုက်တိုက် မီးရှို့ဖျက်ဆီးလျက်ရှိကြောင်း သိရှိရသည်။

“ကျောက်ခွက်ရွာအနီးမှာရှိတဲ့ ပြည်သူပိုင်ရေနံကျင်းတွေကို လိုက်လံပြီး မီးရှို့ဖျက်ဆီးနေတာ ဒီနေ့ဆို ၃ ရက်မြောက်နေ့ ရှိပြီဖြစ်ပါတယ်။ ဇူ လိုင်လ ၈ ရက်နေ့ မနက်ပိုင်းကလည်း ကျောက်ခွက်ရွာအနောက်ပိုင်းက ပြည်သူပိုင် နေအိမ်

၇ လုံးကို မီးရှို့ဖျက်ဆီးခဲ့တယ်။ ကျောက်ခွက်ရွာဆိုတာက မြိုင်နယ်နဲ့ ပေါက်နယ်အစပ်မှာရှိပြီး ရွာပတ်ပတ်လည်မှာ ရေနံကျင်းတွေ ရှိနေတာပါ။ ကင်းပုန်းတွေချထားပြီးရွာတွေထဲမှာ တပ်စွဲထားတော့ ရေနံတွင်းတွေကို လိုက်ဖျက်ဆီးနေတာ။ ပေ တစ်ထောင်ကျော်နက်တဲ့ရေနံကျင်းတွေဆိုရင် အရင်းအနှီးက သိန်းရာကျော် အနည်းဆုံးကုန်တာဆိုတော့ ဖျက်ဆီးခံရတဲ့ ရေနံကျင်းတွေ များတယ်။ သိန်းထောင်ချီတန်ဖိုး ဆုံးရှုံးနိုင်ပါတယ်” ဟု မြိုင်ဒေသခံက ဆိုသည်။

ဖျက်ဆီးခံရသည့် ရေနံကျင်း အရေအတွက် မသိရှိရသော်လည်း ၃ ရက်ဆိုက် မီးရှို့နေသည့်အတွက် ဆုံးရှုံးတန်ဖိုး ပိုမိုမြင့်မားလာမည်ဟု ၎င်းက ဆိုသည်။

“ရေနံကျင်းက တချို့တွင်းတွေဆိုရင် ပေ တစ်ရာကျော် နှစ်ရာ သုံးရာ လေးရာ။ အဲဒီလိုအမျိုးမျိုးရှိတာပေါ့။ ပေနက်ရင်နက်သလို ဆီထွက်များရင် များသလို ကုန်ကျစာရိတ်ပိုများတာပေါ့။ ဆုံးရှုံးမှုတန်ဖိုးကတော့ ပိုများလာဖို့ပဲရှိတယ်” ဟု မြိုင်ဒေသခံက ရှင်းပြသည်။

ကျေးရွာသူ ကျေးရွာသားများမှာလည်း စစ်တပ်က ကျေးရွာထဲတွင် ဝင်ရောက်တပ်စွဲနေသဖြင့် တောထဲတောင်ထဲတွင် ထွက်ပြေးတိမ်းရှောင်နေရကြောင်း ၊ မိုးတွင်းကာလဖြစ်၍ စားဝတ်နေရေးဆိုင်ရာ အခက်အခဲများ ကြုံတွေ့နေရ ကြောင်း သိရှိရသည်။ khit thit

မိုးမိတ်မြို့နယ်တွင် တော်လှန်ရေးတပ်ဖွဲ့နှင့် စစ်ကောင်စီတပ်တို့အကြား တိုက်ပွဲထပ်မံဖြစ်ပွား

ရှမ်းပြည်မြောက်ပိုင်း၊ မိုးမိတ်မြို့နယ်၊ ညောင်နီကျေးရွာအနီးတွင် ယနေ့ ဇူလိုင်လ ၁၀ ရက်နေ့ နံနက် ၆ နာရီခန့်က တော်လှန်ရေးတပ်ဖွဲ့တစ်ဖွဲ့နှင့် စစ်ကောင်စီတပ်တို့အကြား တိုက်ပွဲထပ်မံဖြစ်ပွားခဲ့ကြောင်း သိရသည်။

တိုက်ပွဲအတွင်းလက်နက်ကြီး၁၀လုံးထက်မနည်းပစ်ခတ်သည်ကိုကြားခဲ့ရသည်ဟု မိုးမိတ်မြို့ခံတစ်ဦး က ပြောသည်။

မြို့ခံတစ်ဦးက “မြို့ထဲကနေတောင် လက်နက်ကြီးသံတွေ ကြားနေရတယ်။ အသေးစိတ်ကတော့ သေချာ မသိဘူး။ တိုက်ပွဲဖြစ်တဲ့နေရာက အရင်ရွာဘက်တော့ မဟုတ်တော့ဘူး။ မြို့နဲ့အရမ်းနီးတဲ့ ညောင်နီရွာ ဖက်မှာဖြစ်တာ” ဟု ပြောသည်။

ညောင်နီကျေးရွာတွင် စစ်ကောင်စီ၏တပ်စခန်းတည်ရှိပြီး လက်နက်ကြီးသံကြားရပြီးနောက် စစ်ကောင်စီ တပ်ဖွဲ့က ကားတစ်စီးဖြင့်မြို့ထဲမှထွက်သွားကာ ညောင်နီတပ်စခန်းဘက်သို့ အင်အားဖြည့်နေကြောင်း ၎င်းက ဆိုသည်။

တိုက်ပွဲဖြစ်ပွားသည့် နေရာတဝိုက်တွင် ရှမ်းပြည်တပ်မတော် SSPP ၊ တအာင်းတပ်မတော် TNLA တို့ လှုပ်ရှားရာဖြစ်ပြီး တိုက်ပွဲသည် စစ်ကောင်စီတပ်နှင့် ကချင်တပ်မတော် KIA ၊ PDF ပူးပေါင်းတပ်တို့ အကြား ဖြစ်ပွားခဲ့သည်ဟု ပြောဆိုကြသော်လည်း သီးခြားအတည်မပြုနိုင်သေးပေ။

ပြီးခဲ့သည့် ဇူလိုင်လ ၅ ရက်နေ့ကလည်း စဥ့်ကင်းနှင့် ပင်ရှားကျေးရွာဘက်တွင် SSPP နှင့် စစ်ကောင်စီ တပ်တို့ တိုက်ပွဲဖြစ်ပွားခဲ့သည်။ mizzima

အမ်းမြို့နယ်တွင် ကျောင်းသားတဦး မြေမြှုပ်မိုင်းနင်းမိပြီး သေဆုံး

ရခိုင်ပြည်နယ် အမ်းမြို့နယ် ကဇိုင်းကိုင်းကျေးရွာက ရှစ်တန်းကျောင်းသားတဦး ဇူလိုင် ၉ ရက်နေ့က ရွာအနီးကတောင်မှာ မျှစ်သွားချိုးစဉ် မြေမြှုပ်မိုင်းနင်းမိပြီး သေဆုံးသွားတယ်လို့ ကျေးရွာသားတဦးက ပြောပါတယ်။

အသက် ၁၅ နှစ်အရွယ် ရှစ်တန်းကျောင်းသား မောင်စည်သူကျော်လင်းဟာ ဇူလိုင် ၉ ရက်နေ့ စနေနေ့ ကျောင်းပိတ်ရက်မှာ ရွာအနီးက တောင်မှာ မျှစ်သွားချိုးစဥ် မြေမြှုပ်မိုင်းနင်းမိပြီး သေးဆုံးခဲ့ကာ ဇူလိုင် ၁၀ နေ့မနက်မှာမှ အလောင်းကို ရှာတွေတာလို့ ဆိုပါတယ်။

ရွာသားတဦးက “သူက ရှစ်တန်း ကျောင်းသားလေးပါ။ စနေနေ့ ကျောင်းပိတ်ထားတော့ ရွာအနီးက တောင်မှာ မျှစ်သွားချိုးဖို့ဆိုပြီးသွားခဲ့တာ အဲဒီမှာ မိုင်နင်းသွားတာပါ။ မနေ့က ၉ နာရီလောက်မှာဖြစ်တာပါ။ ရွာသားတွေက ရှာဖို့လုပ်ကြပေမဲ့ စစ်တပ်က ဟန့်တားခဲ့တာတွေ ရှိတယ်။ အဲဒီတောင်မှာက စစ်တပ်က တပ်စွဲထားတာတွေရှိတော့ အလောင်းကိုလည်း နောက်ထပ်မြေမြှုပ်မိုင်း ပေါက်ကွဲမှာစိုးလို့ သိပ်လည်း အရဲစွန့်ပြီး မရှာရဲကြဘူး။ ဒီနေ့ မနက်ပိုင်းကတော့ သူအဖေက အလောင်းကို တွေ့ခဲ့တာပါ။ ခြေတဖက်ပြတ်သွားတယ်။ နောက်လက်မောင်းမှာ ဒဏ် ရာတွေရသွားတယ်။ သွေးထွက်လွန်ပြီး သေသွားတာ ဖြစ်နိုင်တယ်” လို့ ပြောပါတယ်။

မိုင်းပေါက်ကွဲတဲ့ တောင်မှာ ရွာနဲ့ ၂ ဖာလုံလောက်သာ ကွာဝေးပြီး စစ်ကောင်စီက တပ်စွဲထားတာတွေရှိသလို မကြာခဏ မိုင်းပေါက်ကွဲလည်းရှိတာကြောင့် လူသူသွားရောက်တာ နည်းပါးတယ်လို့ ကျေးရွာသားတွေက ပြောပါတယ်။

ဇူလိုင် ၈ ရက်နေ့ကလည်း မြောက်ဦးမြို့နယ် ပေါင်းတုတ်ကျေးရွာက ကလေး ၄ ဦး ခမရ ၃၇၇နဲ့ ၃၇၈ တပ်ရင်းကြားက တောင်အနီးမှာ နွား ကျောင်းနေစဥ် မြေမြှုပ်မိုင်ပေါက်ကွဲကာ တဦး ခြေတဖက်ပြတ်သွားပြီး ကျန် ၃ ဦး ဒဏ်ရာတွေ ရရှိခဲ့ကြပါတယ်။

ဇူလိုင် ၂ ရက်နေ့နဲ့ ၄ ရက်နေ့တွေကလည်း ကျောက်တော်မြို့နယ်က ရွာသား နှစ်ဦး မြေမြှုပ်မိုင်းပေါက်ကွဲမှုကြောင့် သေးဆုံးသွားခဲ့သလို ဇူလိုင် ၃ ရက်နေကလည်း မင်းပြားမြို့နယ်က ရွာသားတဦး မြေမြှုပ်မိုင်ထိပြီး ခြေတဖက်ပြတ်သွားကာ ဆေးကုသမှု ခံယူနေရပါတယ်။

ရခိုင်ပြည်နယ်မှာ ဇူလိုင်လအတွင်း မြေမြှပ်မိုင်း ပေါက်ကွဲပြီး သေဆုံးသူ ၃ ဦးနဲ့ ဒဏ်ရာရရှိသူ ၅ ဦးအထိ ရှိဖြစ်လို့ ဒေသခံတွေက ပြောပါတယ်။

ရခိုင်ပြည်နယ်မှာ ၂၀၂၂ ခုနှစ်အတွင်း မြေမြှုပ်မိုင်းပေါက်မှုကြောင့် သေဆုံးသူနဲ့ ဒဏ်ရာရရှိသူ  ၃၀ နီးပါအထိ ရှိလာပြီဖြစ်ပါတယ်။DVB

« Older Entries