SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း ယင်းမာပင်မြို့နယ် ဘန့်ဘွေးရွာမ (ဒေသခေါ် ပျူစောထီးရွာ) မှာ တပ်စွဲနေထိုင်တဲ့ စစ်ကောင်စီတပ်ဖွဲ့ဟာ ဒေသခံပြည်သူ ၇၀ ကျော်ကို လူသားဒိုင်းအဖြစ် ဖမ်းဆီးခေါ်ဆောင်ပြီး နေအိမ်တွေကို ဖျက်ဆီးကာ  ပြည်သူပိုင်ပစ္စည်းတွေ ယူသွားကြတယ်လို့ ဒေသခံတွေက ပြောပါတယ်။

ဇူလိုင် ၁၆ ရက်နေက  ဘန့်ဘွေးရွာမ(ဒေသခေါ် ပျူစောထီးရွာ) ရဲ့ တောင်ဘက် ပေပင် တောရဘုန်းကြီးကျောင်းမှာ ရှောင်တိမ်းနေတဲ့ အမျိုး သား ၃၀ ကျော်နဲ့ အမျိုးသမီး ၄၀ ကျော်တို့ကို စစ်ကောင်စီတပ်က ဖမ်းဆီးခေါ်ဆောင်သွားတာလို့ ဆိုပါတယ်။ 

သူတို့ကို ဘန့်ဘွေးရွာဦးကျောင်းနဲ့ စာသင်ကျောင်းထဲတို့မှာ တိုက်ပိတ်ထားပြီး မသန်စွမ်း ၂ ဦးနဲ့ အဘိုး အဘွားတွေလည်း ပါဝင်တယ်လို့ ဆိုပါတယ်။

ဖမ်းဆီးခံရတဲ့သူတွေထဲက ဒေသခံလူငယ် မောင်သုတ(အမည်လွှဲ) ကိုတော့ ငွေကျပ် ၅ သိန်းနဲ့ ရွေးထုတ်ခဲ့တာကြောင့် ပြန်လွတ်လာပြီး ကျန်ရှိတဲ့ ပြည်သူ ၇၀ ကျော်ကတော့ ဒီနေ့အထိ မလွတ်မြောက်သေးဘူးလို့ ဒေသခံတဦးက ပြောပါတယ်။

ဒါ့အပြင် အဲဒီစစ်ကောင်စီတပ်ဖွဲ့ဟာ ဇူလိုင် ၁၇ ရက်ကလည်း အနီးနားရှိ ပြည်သူတွေရဲ့ နေအိမ်တွေအတွင်း ဝင်ရောက်မွှေနှောက်ယူဆောင်တာ တွေရှိခဲ့သလို ဇူလိုင် ၁၈ ရက်နေ့ကလည်း လက်ပန်ကျေးရွာက နေအိမ် ၃၀ လောက်နဲ့ ထန်းဇင်ကျေးရွာက နေအိမ် ၃ လုံးတို့ကို ဖျက်ဆီးခဲ့ကြပြီး နေအိမ်တွေအတွင်းရှိ ပစ္စည်းတွေနဲ့ မွေးမြူထားတဲ့ ကြက်၊ ဝက်တွေကို သတ်ဖြတ်ယူဆောင်သွားကြတယ်လို့ ဆိုပါတယ်။

စစ်ကောင်စီတပ်ရဲ့ ရန်ကိုကြောက်တာကြောင့် နေအိမ်တွေကိုစွန့်ခွာပြီး ဘုန်းကြီးကျောင်းမှာ နေထိုင်ကြတဲ့ ဒေသခံ ၇၀ ကျော်ကို စစ်ကောင်စီတပ်က ဇူလိုင် ၁၆ ရက်နေ့ကတည်းက လူသားဒိုင်းအဖြစ် ဖမ်းဆီးခေါ်ဆောင်သွားတာဖြစ်ပြီး ဒီနေ့ထိ ပြန်မလွတ်လာသေးဘူးလို့ ဒေသခံတွေက ပြောပါတယ်။ DVB

တရုတ်နိုင်ငံခြားရေးဝန်ကြီး ဝမ်ယိနှင့် စစ်ကောင်စီ၏နိုင်ငံခြားရေးဝန်ကြီး ဦးဝဏ္ဏမောင်လွင်တို့ လန်ချန်း-မဲခေါင်ပူးပေါင်းဆောင်ရွက်မှုအ စည်းအဝေး၌ တွေ့ဆုံရာတွင် တရုတ်က မြန်မာနိုင်ငံအတွင်းမှ ဒီမိုကရေစီ လိုလားသောဆန္ဒပြသူများအပေါ် ရက်စက်ကြမ်းကြုတ်မှုများကို မသိကျိုးကျွံပြုနေခဲ့သည်။

တရုတ်သည် မြန်မာ့ငြိမ်းချမ်းရေးလုပ်ငန်းစဉ်တွင် အဖျက်သမားအဖြစ်ပါဝင်နေပြီး ဒီမိုကရေစီဟူသော အသုံးအနှုန်းကို စိတ်ဝင်းစားခြင်း သို့မ ဟုတ် နှစ်သက်ခြင်း မရှိကြောင်း မူဝါဒသုတေသနအဖွဲ့ Poreg ၏ အစီရင်ခံစာတွင် ဖော်ပြထားသည်။

မြန်မာနိုင်ငံအလယ်ပိုင်း ရှေးဟောင်းပုဂံမြို့တွင် စစ်ကောင်စီက လက်ခံကျင်းပသည့် ၇ ကြိမ်မြောက် လန်ချန်း-မဲခေါင်းပူးပေါင်းဆောင်ရွက်ရေးဆိုင်ရာ နိုင်ငံခြားရေးဝန်ကြီးများအစည်းအဝေးမတိုင်ခင်က တရုတ်သည် အာဆီယံက ချမှတ်ထားသည့် ငြိမ်းချမ်းရေးလုပ်ငန်းစဉ်ကို ရိုးသားစွာ အကောင်အထည်ဖော်ခြင်းဖြင့် မြန်မာနိုင်ငံ ကို မူလလမ်းကြောင်းပေါ်ရောက်အောင် တွန်းအားပေးလိမ့်မည်ဟု မျှော်လင့်ချက်များစွာထားခဲ့ကြ သည်။

သို့သော် တရုတ်သည် ၎င်း၏ မဟာဗျူဟာမြောက်အကျိုးစီးပွားများကို အလေးထားကာ ခါးပတ်လမ်းရပ်ဝန်း စီမံကိန်း (BRI) ကို အကောင် အထည်ဖော်နေပြီး မြန်မာ၏ ဒီမိုကရေစီလမ်းစဉ်နှင့် ငြိမ်းချမ်းရေးတွင် အနှောင့်အယှက်တစ်ခုဖြစ်သည်။

တရုတ်သည် ဒေသတွင်းနှင့် နိုင်ငံတကာ၏သဘောထားများအပေါ် ထောက်ထားညှာတာခြင်းမရှိဘဲ စစ်အုပ်စုကိုယ်စား အာဆီယံနိုင်ငံများနှင့် ရင်ဆိုင်ရန် အသင့်ဖြစ်နေသည်။

အရိုးရှင်းဆုံး ဆိုရပါက တရုတ်သည် ၎င်း၏အစီအစဉ်များ ရှေ့ဆက်နိုင်ရန် မြန်မာက တစ်ကမ္ဘာလုံးနှင့် သက်ဆိုင်သည့် လက်ရှိ အကျပ်အ တည်းများကို အခွင့်ကောင်းယူနေသည်ဟု Poreg ကဖော်ပြသည်။

နှစ်နိုင်ငံ နိုင်ငံခြားရေးဝန်ကြီးများသည် တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်းများ လုပ်ငန်း ချောမွေ့ စေရန်နှင့် နယ်စပ်ဖြတ်ကျော် မဟာဓာတ်အားလိုင်း သဘောတူညီချက်ကို အကောင်အထည်ဖော်ရန် ဆုံးဖြတ်ခဲ့ကြသည်။

နှစ်နိုင်ငံပူးပေါင်းဆောင်ရွက်ရေးကို တိုးမြှင့်ရေးအတွက် သင့်လျော်သောအချိန်၌ တရုတ်-မြန်မာ စီးပွားရေးစင်္ကြံကို ပူးပေါင်းဆောင်ရွက်မှုအတွက်လည်း ဆွေးနွေးဖြေရှင်းခဲ့ကြသည်။

ဤသို့ ဆွေးနွေးမှုများသည် ကမ္ဘာ့လေ့လာစောင့်ကြည့်သူများအပြင် အခြားသော လန်ချန်း-မဲခေါင် ပူးပေါင်းဆောင်ရွက်ရေးအဖွဲ့ဝင်နိုင်ငံများ၏ မျှော်လင့်ချက်များကို ဖောက်ဖျက်ရာရောက်သည်ဟု Poreg က ဖော်ပြခဲ့သည်။

မြန်မာနိုင်ငံတွင် ၂၀၂၂ ခုနှစ် ဇွန်လအထိ ဆန္ဒပြသူပေါင်း ၂ ၀၀၀ ကျော်သေဆုံးခဲ့ပြီး ဒီမိုကရေစီအရေးလှုပ်ရှားသူ ၁၁ ၀၀၀ ခန့်မှာ အကျဉ်း ထောင် များတွင် ဆင်းရဲဒုက္ခခံနေကြရသည်။ mizzima

မကွေးတိုင်း ဆောမြို့နယ် လောင်းရှည်ဒေသမှာ ဇူလိုင် ၁၈ ရက်နေ့ မွန်းလွဲပိုင်းက စစ်ကောင်စီစစ် ကြောင်းနဲ့ လောင်းရှည် LSR PDF(YRPA) တို့ တိုက်ပွဲဖြစ်ပွားပြီး စစ်ကောင်စီဘက်က ၇ ယောက်လောက် သေဆုံးကာ အများအပြား ဒဏ်ရာရရှိခဲ့တယ်လို့ LSR-PDF က ပြောပါတယ်။

ပြီးခဲ့တဲ့ရက်ပိုင်းအတွင်းကစတင်ကာ ဆိပ်ဖြူမြို့နယ် ပိုင်း၊ ရှားလှ၊ ဝန်ကြီးကုန်းရွာတွေဘက်ကို အင်အား ၂၀၀ ကျော်လောက်နဲ့ စစ်ကြောင်းထိုးလာပြီး  ဇူလိုင် ၁၈ ရက်နေ့ မွန်းလွဲ ၂ နာရီခွဲလောက်မှာ ယောနယ်ထဲက စစ်ဘေးရှောင်တွေရှိတဲ့နေရာတွေကို ရောက်လာတဲ့ စစ်ကောင်စီစစ် ကြောင်းနဲ့ ထိတွေ့တိုက်ပွဲ ဖြစ်ပွားခဲ့တာလို့ LSR-PDF ရဲ့ ပြန်ကြားရေးတာဝန်ခံ ဗိုလ်မာဂ က ဒီဗွီဘီကို ပြောပါတယ်။

“ရေဘုတ်ကျေးရွာနဲ့ မိုင်တိုင်အမှတ် ၄၄ နားအရောက်မှာ ကျနော်တို့ LSR-PDF က ပဒေသာမိုင်း ၄ လုံးတိုက်ခိုက်ခဲ့ရာ စစ်ကောင်စီတပ်သား ၇ ယောက်လောက်ပွဲချင်းပြီး သေဆုံးကာ အများအပြားဒဏ်ရာရရှိခဲ့တယ်။ စစ်(…)အလောင်းတွေ သယ်သွားတာကိုတော့ ကျနော်တို့ သေသေ ချာ ချာ မကြည့်လိုက်နိုင်ဘူး။ နှစ်ဖက်အပြန်အလှန် လက်နက်ကြီးလက်နက်ငယ်တွေနဲ့ ပစ်ခတ်တိုက်ခိုက်သလို သူတို့ဘက်က အနီးနားပတ်ဝန်းကျင်တွေကိုပါ လက်နက်ကြီးတွေနဲ့ ရမ်းသမ်းပစ်ခတ်လို့ ကျနော်တို့လူတွေ အထိခိုက်အကျဆုံးမရှိဘဲ နေရာရွှေ့ပြောင်းလိုက်ရလို့ သေချာမစောင့်ကြည့်နိုင်ခဲ့ဘူး။ တိုက်ပွဲအတွင်းမှာတော့ အသက်နဲ့ရင်းပြီး စောင့်ကြည့်ရတာဖြစ်လို့ ထိခိုက်၊ သေဆုံးတဲ့ အရေအတွက်ကို တိတိကျကျ သိရဖို့မလွယ်ကူပေမယ့် ပစ်လိုက်တဲ့ အနေထားအပေါ်မှာကြည့်ပြီး အတတ်နိုင်ဆုံးခန့်မှန်းနိုင်တယ်။” 

စစ်ဘေးရှောင်ပြည်သူတွေကိုတော့ ဘေးကင်း လုံခြုံမယ့် နေရာတွေကို ပြောင်းရွှေ့တာတွေ လုပ်ပေးနေကြောင်း၊ နဂါးပွက်တောင်ထိပ်မှာ တပ်စွဲထားတဲ့ စစ်ကောင်စီတပ်ကို ပြောက်ကျားနည်း ဗျူဟာနဲ့ ဆက်လက်တိုက်ခိုက်သွားမယ်လို့ ဆိုပါတယ်။

နှစ်ဖက်တိုက်ပွဲအတွင်းမှာ တပ်ဖွဲ့ဝင်တွေ ထိခိုက်သေဆုံးတဲ့ အခြေနေကိုတော့ စစ်ကောင်စီက သတင်းထုတ်ပြန်ထားတာ မတွေ့ရသေးပါဘူး။

ဆောမြို့နယ် လောင်းရှည်ဒေသအတွင်းမှာ ဆိပ်ဖြူမြို့နယ်ဘက်က စစ်ဘေးရှောင်ပြည်သူ ၅၀၀ ကျော် ခိုလှုံနေကြပြီး စားနပ်ရိက္ခာ၊ အဝတ်အ ထည်၊စောင်၊ ခြင်ထောင်၊ ဆေးဝါးနဲ့ ကျန်မာရေးစောင့်ရှောက်မှု အရေးပေါ်အကူညီတွေ လိုအပ်နေတယ်လို့ သိရပါတယ်။

ပြည်သူတွေအနေနဲ့ ဆော-ဆိပ်ဖြူလမ်းပိုင်းကို လုံးဝ အသုံးမပြုကြဖို့၊ နဂါးပွက်တောင်နဲ့ နီစပ်တဲ့ ကျေးရွာတွေက ပြည်သူတွေ အထူးသတိ ထား နေထိုင်ကြဖို့ သတိပေးချက်ထုတ်ပြန်ထားပါတယ်။ DVB

တနင်္သာရီတိုင်း မြိတ်ခရိုင် ပုလောမြို့နယ် နန်းတောင်ကျေးရွာအုပ်စု ပိန္နဲတောင်ရွာကို ယနေ့ ဇူလိုင်လ ၁၉ ရက်နေ့ နံနက် အစောပိုင်းတွင် အ ကြမ်းဖက် စစ်တပ်က လက်နက်ကြီးဖြင့် ပစ်ခတ်ခဲ့ပြီး ကျေးရွာနေ ပြည်သူ ကိုဇင်ဝိုင်း ပွဲချင်းပြီး သေဆုံးခဲ့ကြောင်း နယ်မြေခံ သတင်းရင်းမြစ်ဖြစ်သော Dawei Information Center အဖွဲ့ထံမှ သိရသည်။

ပိန္နဲတောင်ရွာကို ပုလော အခြေစိုက် အမှတ် ၂၈၅ တပ်ရင်းမှ နံနက် ၁ နာရီ ၃၀ မိနစ်ခန့်တွင် လက်နက်ကြီးများဖြင့် ရမ်းသမ်း ပစ်ခတ်ခဲ့ခြင်းဖြစ်ပြီး ကျေးရွာထဲသို့ ကျရောက် ခဲ့ခြင်းဖြစ်ကြောင်း သိရသည်။

အဆိုပါ ပုလောမြို့နယ်အတွင်း အကြမ်းဖက် စစ်တပ်နှင့် ပြည်သူ့ကာကွယ်ရေး တပ်ဖွဲ့များ တိုက်ပွဲများ ဆက်တိုက် ဖြစ်ပွားနေပြီး အကြမ်းဖက် စစ်တပ်က ပြည်သူများနေထိုင်သည့် ကျေးရွာများကိုပါ လက်နက်ကြီးများဖြင့် ရမ်းသမ်း ပစ်ခတ်လေ့ရှိကြောင်း ဒေသခံ ပြည်သူများထံမှ သိရသည်။ khit thit

မန္တလေးတိုင်း၊  ပြည်ကြီးတံခွန်မြို့နယ်အတွင်းရှိ မြို့ပြပြောက်ကျားတပ်ဖွဲ့ (MPR) ရဲ့ Safe House ၂ ခု ကို ဇူလိုင်  ၁၇ ရက် မွန်းလွဲ ၂ နာရီခွဲလောက်က စီးနင်းခံလိုက်ရပြီး လက်နက်ခဲယမ်းတွေ သိမ်းဆည်းခံလိုက်ရတယ်လို့ MPR က ပြောပါတယ်။

မန္တလေးမြို့ပြပြောက်ကျားတပ်ဖွဲ့ဝင်တွေ ခိုလှုံနေတဲ့ Safe House ၂ လုံးကို စစ်ကောင်စီတပ်ဖွဲ့ဝင်တွေက ကားအသေး ၂ စီးနဲ့ နေရာအတိအ ကျရောက်လာပြီး စီးနင်းခဲ့တာကြောင့် ပစ္စတို ၄ လက်၊ 9mm ကျည် ၂၃၀ တောင့်၊ 5.56 ကျည် ၁၆ တောင့်၊  လက်ပစ်ဗုံးက ၂ လုံး၊ ရိက္ခာနဲ့အ၀တ်စားတွေ သိမ်းဆည်းခံလိုက်ရတယ်လို့ ဆိုပါတယ်။

MPR အဖွဲ့မှ တာဝန်ရှိသူက “အိမ် အတိအကျနဲ့ လာတာဆိုတော့ သတင်း အတိအကျ ပေးတဲ့သူရှိလို့ပေါ့။ ပစ္စည်းတွေက တစစီဖြုတ်ထားတာ ခုခံချိန်မရလိုက်ဘူး။ လူတွေအဖမ်းခံရတာ မရှိပါဘူး အားလုံးလွတ်မြောက်ပါတယ်။ အခု ဘေးကင်းလုံခြုံတဲ့နေရာ ရောက်နေပါပြီ။ လက်နက်ခဲယမ်း ဆုံးရှုံးမှုက သိန်း ၁၅၀ လောက်ရှိပါတယ်။ အခုချိန် စျေးတွေကလည်း တက်နေတော့ မစ်ရှင်တခုလုပ်ဖို့ မလွယ်ကူဘူး” လို့ ဒီဗွီဘီကို ပြောပါတယ်။ 

ပြီးခဲ့တဲ့ ဇွန်လကုန်ပိုင်းလောက်ကလည်း မန္တလေးမြို့ပြပြောက်ကျားတပ်ဖွဲ့ဝင်တချို့ စစ်ကောင်စီရဲ့ ဖမ်းဆီးခြင်းခံခဲ့ရပါတယ်။ 

စစ်ကောင်စီတပ်က မန္တလေးမြို့မှာ မြေပြင်သပိတ်အဖွဲ့ဝင်တွေ၊ မြို့ပြပြောက်ကျားတပ်ဖွဲ့ဝင်တွေနဲ့ တော်လှန်ရေးအင်အားစုတွေကို နည်းလမ်းမျိုးစုံ သုံးကာ ဖမ်းဆီးနေတာကြောင့် မြို့ပြပြောက်ကျားတပ်ဖွဲ့ဝင်တချို့ဟာ မြို့ကို ခေတ္တ စွန့်ခွာခဲ့ကြရတာရှိသလို  စစ်ဆေးဖမ်းဆီးမှု တွေ များပေမဲ့ မစ်ရှင်တွေကို အန္တရာယ်တွေကြားထဲက အကောင်အထည်ဖော်နေတဲ့ အဖွဲ့တွေ လည်း ရှိနေပါတယ်။ DVB

အာဇာနည်နေ့တွင် မန္တလေးမြို့တစ်မြို့လုံး နေရာအနှံ့အပြား၌ စစ်ကောင်စီက စစ်ဆေးရေးတင်းကြပ် ထားသည်ကိုတွေ့ရသည်။

အလယ်ပိုင်းတိုင်းစစ်ဌာနချုပ်တည်ရှိရာ မန္တလေးနန်းတွင်း၌ စစ်ကောင်စီအကြီးအကဲတစ်ဦး ရောက်ရှိနေ ခြင်းကြောင့် လုံခြုံရေးတင်းကြပ်ထားခြင်းဖြစ်နိုင်ကြောင်း ရဲသတင်းရင်းမြစ်များထံမှသိရသည်။

“အခြေအနေတွေက ခြောက်ခြားစရာကြီး၊ မနက်မိုးလင်းကတည်းက လမ်းဆုံလမ်းခွတွေမှာရော၊ တချို့ အတွင်းလမ်းတွေမှာပါ ဝပ်ကင်းတွေချထားတာ တွေ့ရတယ်။ တစ်ခုခုဖြစ်တော့မယ့် အနေအထားမျိုး” ဟု မြို့ခံတစ်ဦးက ပြောသည်။

ယနေ့ကျရောက်သည့် (၇၅)နှစ်မြောက် အာဇာနည်နေ့အခမ်းအနားကို အာဏာသိမ်းစစ်ကောင်စီက ယခင်နှစ်ကလို ပြည်သူပါဝင်သည့်အခမ်းအ နားမျိုးပြုလုပ်နိုင်ခြင်းမရှိဘဲ မြို့အဝင်အထွက်ဂိတ်များအပါ အဝင် မြို့တွင်းလမ်းများ၌ စစ်ဆေးရေးတင်းကြပ်စွာပြုလုပ်နေသည်ကို တွေ့ရသည်။

တစ်ဘက်တွင်လည်း စစ်အာဏာရှင်တော်လှန်ရေးမြို့ပြပြောက်ကျားတပ်ဖွဲ့များက ပြည်သူသို့ သတိပေး ထုတ်ပြန်ချက်များ နာရီနှင့်အမျှထုတ်ပြန်နေသည်ကို တွေ့ရသည်။

လမ်းသွားလမ်းလာပြည်သူများအနေဖြင့် ပတ်ဝန်းကျင်အခြေအနေကိုဂရုစိုက်လေ့လာပြီး သတိနှင့်သွား လာနေထိုင်ကြရန်၊ ပစ်ခတ်မှုများပေါက်ကွဲမှုများဖြစ်လာလျှင် လွတ်အောင်ရှောင်ကြရန် မြို့ပြပြောက် ကျားတပ်ဖွဲ့များက သတိပေးချက်ထုတ်ပြန်ထားသည်။ mizzima

စစ်ကိုင်းတိုင်း အရာတော်မြို့နယ်မှာ ဇူလိုင် ၁၈ ရက်နေ့ မနက်ပိုင်းက အရာတော် – ဝါးတောမ လမ်းအတိုင်း ဆိုင်ကယ်မောင်းနှင်လာတဲ့ လူငယ် ၁ ဦးကို စစ်ကောင်စီတပ်ဖွဲ့က ဆိုင်ကယ် ရပ်မပေးလို့ဆိုကာ သေနတ်နဲ့ ပစ်ခတ်သတ်ဖြတ်ခဲ့တယ်လို့ ဒေသခံတွေက ပြောပါတယ်။

အရာတော်မြို့နယ် ကမ်းဖြူအုပ်စု၊ စိန်သာကျေးရွာနေ ၂၀ အရွယ်ရှိ ကိုပြည့်စုံဦးဟာ  အရာတော် – ဝါးတောမလမ်းအတိုင်း ဆိုင်ကယ်မောင်းနှင်လာစဉ် ကျွဲခြံကျေးရွာနားအရောက် စစ်ကောင်စီ တပ်ဖွဲ့က စစ်ဆေးရန် တားဆီးချိန်  ဆိုင်ကယ်ရပ်မပေးတဲ့အတွက် ပစ်ခတ်ခဲ့တာလို့ ဆိုပါတယ်။

ဒေသခံကျေးရွာသားတဦးက “ကျွဲခြံရွာထိပ်မှာ စစ်ကောင်စီတပ်ဖွဲ့က စစ်ဆေးနေတာ။ ဆိုင်ကယ် ရပ်မပေးလို့ ဆိုပြီး အတွဲလိုက်ပစ်တယ်။ သေ သွားတော့ ဖုန်းနဲ့ ဆိုင်ကယ်ကို သိမ်းယူသွားပြီး အလောင်းကိုတော့ လမ်းဘေးမှာ ဒီအတိုင်းပစ်သွားတာ” လို့ ပြောပါတယ်။

စိန်သာကျေးရွားသား ကိုပြည့်စုံမှာ ရင်ဘတ်နဲ့ပေါင်အနှံ့ ကျည်ထိမှန်ဒဏ်ရာတွေ ရရှိခဲ့ပြီး နေရာမှာပဲ သေဆုံးသွားခဲ့တယ်လို့ ဆိုပါတယ်။

အခုရက်ပိုင်းအတွင်း အရာတော်မြို့နယ်က ကျေးရွာတွေကို စစ်ကောင်စီတပ်ဖွဲ့တွေက စစ်ကြောင်းထိုး ဝင်ရောက်တာတွေ ဆက်တိုက်ရှိနေတယ်လို့ သိရပါတယ်။ DVB

လှိုင်သာယာအရှေ့ပိုင်းမြို့နယ် အမှတ် ၆ ရပ်ကွက်မှာ မနေ့ညပိုင်းက စစ်ကောင်စီခန့် အုပ်ချုပ်ရေးမှူးနဲ့ ရာအိမ်မှူးတို့ သေနတ်နဲ့ ပစ်ခတ်ခံရတယ်လို့ မြို့ခံတွေက ပြောပါတယ်။

မနေ့ည ၉ နာရီခွဲက အမှတ် ၆ ရပ်ကွက် ကျန်စစ်သားလမ်း စျေးလေးမှတ်တိုင်အနီးမှာ စစ်ကောင်စီခန့် ရပ်ကွက်အုပ်ချုပ်ရေးမှုးနဲ့ရာအိမ်မှုးကို ဆိုင်ကယ်‌တစီးပေါ်ကနေ သေနတ်နဲ့ ပစ်ခတ်သွားတာလို့ ရပ်ကွက်နေသူတဦးက ပြောပါတယ်။

“ထင်ကျော်လင်း လက်ဖက်ရည်ဆိုင်နားမှာ ပစ်သွားတာ။ သေ၊ မသေတော့ မသိဘူး။ ထွက်ကြည့်လို့ မရဘူး။ ပစ်ပြီး ခဏကြာတော့ စစ်တပ်နဲ့ရဲတွေ ရောက်နေပြီ” လို့ ပြောပါတယ်။

သေနတ်နဲ့ ပစ်ခတ်ခံရသူမှာ စစ်ကောင်စီခန့် ရပ်ကွက်အုပ်ချုပ်ရေးမှူး ဦးကျော်စိုးထွန်းနဲ့ ရာအိမ်မှူး ဖိုးထူးတို့ဖြစ်ပြီး သေနတ်နဲ့ပစ်ခတ်ခံရပြီး စိုး ရိမ်ဒဏ်ရာတွေ ရရှိခဲ့တယ်လို့ အုပ်ချုပ်ရေးနဲ့ နီးစပ်သူ တဦးက ပြောပါတယ်။

ပစ်ခတ်မှုဖြစ်ပြီးနောက် စစ်ကောင်စီတပ်တွေနဲ့ ရဲတွေဟာ အောင်ဇေယျတံတားအဆင်းမှာ ကားတွေ၊ လူတွေကို စစ်ဆေးခဲ့သလို ကျန်စစ်သားလမ်းတောက်လျှောက် သေနတ် ပစ်ခတ်သူကို လိုက်လံရှာဖွေခဲ့တယ်လို့ ၁၅ ရပ်ကွက်မှာ နေထိုင်သူတဦးက  ပြောပါတယ်။

“ရွှေလင်ဗန်းတံတားနားမှာ  ပစ်ခတ်သံတွေ ကြားရတယ်။ အိမ်က အသံပဲကြားရတာ ထွက်မကြည့်ဘူး”

စစ်ကောင်စီခန့်အုပ်ချုပ်ရေးမှူး ဦးကျော်စိုးထွန်းနဲ့ ရာအိမ်မှူး ဦးဖိုးထူး သေနတ်နဲ့ပစ်ခံရပြီး သေဆုံး သွားတယ်လို့ မြို့ခံတွေရဲ့ ပြောပြချက်အရ သာ သိရပြီး သီးခြားအတည်ပြုနိုင်ခြင်း မရှိပေ။ ဘယ်အဖွဲ့ ပစ်ခတ်သွားတယ်ဆိုတာလည်း မသိရသေးပါဘူး။

လှိုင်မြိုနယ် အမှတ် ၂ ရပ်ကွက် ဘုရင့်နောင် ၉ လမ်းမှာလည်း မနေ့မနက်ပိုင်း အမည်မသိအဖွဲ့က ပစ်ခတ်ခဲ့လို့ ဗိုလ်ကြီး အောင်နိုင်ဖြိုးနဲ့ဇနီးဖြစ်သူ သေဆုံးခဲ့ပါသေးတယ်။ DVB

ရန်ကုန်တိုင်း၊ လှိုင်သာယာမြို့နယ်၊ ကျန်စစ်သားလမ်းမကြီး၊ ရွှေလင်ပန်းတံ တား အဆင်းတွင် ဇူလိုင်လ ၁၈ ရက်နေ့ ည ၁၁ နာရီအချိန်တွင် စစ်ဆေးရန် ရပ်ခိုင်းသော်လည်း မရပ်တန့်ဘဲ မောင်းနှင်သွားသော ဆိုင်ကယ်တစ်စီးကို စစ်တပ်က လိုက်လံပစ်ခတ်ရာ ဆိုင်ကယ်ပေါ်တွင် လိုက်ပါလာသူ ကိုဝေယံနှင့် ကိုတိုးကြီးတို့ ၂ ဦး သေဆုံးသွားကြောင်း ဒေသခံများက ရန်ကုန်ခေတ်သစ်သတင်းဌာနထံပြောဆိုသည်။

ယမန်နေ့ ည ၉ နာရီ အချိန် လှိုင်သာယာမြို့နယ် အမှတ် ၆ ရပ်ကွက် အုပ်ချုပ်ရေးမှူး ကျော်စိုးထွန်းနှင့်ရာအိမ်မှူး ဖိုးထူးတို့ ပစ်သတ်ခံရပြီးနောက် စစ်တပ်က ညတွင်းချင်းပင် လှိုင်သာယာတစ်မြို့နယ်လုံးကို ပိတ်ဆို့စစ်ဆေးကြောင်း၊ ယင်းသို့စစ်ဆေးနေစဉ် ည ၁၁ နာရီအချိန် ကိုဝေယံ၊ ကိုတိုးကြီးနှင့်သူငယ်ချင်း ၁ ဦး စုစုပေါင်း ၃ ဦးသည် ဆိုင်ကယ် စီးပြီး လာစဉ် စစ်တပ်က စစ်ဆေးရန် ရပ်တန့်ခိုင်းကြောင်း၊သို့ရာတွင် ဆိုင်ကယ်ကို မရပ်တန့်ဘဲ မောင်းနှင်သဖြင့် စစ်တပ်က ကားဖြင့် လိုက်လံပစ်ခတ်ရာ ကိုဝေယံသည် ဦးခေါင်းထိမှန်၍ ပွဲချင်းပြီး သေဆုံးကြောင်း၊ ကိုတိုးကြီးမှာ ဝမ်းဗိုက်ထိမှန်၍ ဆေးရုံတွင် သေဆုံးသွားကြောင်း၊ အခြားသူတစ်ဦးမှာမူ ထွက်ပြေးလွတ်မြောက်သွားကြောင်း သိရှိရသည်။

“ဆိုင်ကယ်ကို ၃ ယောက်စီးလာတော့ စစ်ခွေးတွေ တားတဲ့အချိန် မရပ်ပေးရဲကြဘူး။ လှိုင်သာယာမှာ ဆိုင်ကယ်ကို လူ ၂ ဦးတောင်မစီးဖို့ ကန့်သတ်ထားတာလေ။ စစ်ခွေးတွေ တားတာ မရပ်ပေးလ်ု့ ပစ်သတ်တာ ၃ ယောက်မှာ ၁ ယောက် ကလွတ်သွားတယ်။ ကိုဝေယံကတော့ ဦးခေါင်းကျည်ထိပြီး ဆိုင်ကယ်ပေါ်ကနေ ပြုတ်ကျပြီး နေရာမှာ ဆုံးသွားပါတယ်။ ကိုတိုးကြီးက တော့ ဗိုက်ကိုထိပြီး ဆိုင်ကယ်ပေါ်က ကျတယ်။ ဒီမနက်တော့ ပြန်ကြားရတာ ဆေးရုံမှာ ဆုံးတယ်။ ၁ ဦးကတော့ လွတ်ပါတယ်။ ကိုဝေယံအလောင်းကို တစ်ညလုံး ရွှေလင် ပန်း မီးသတ်စခန်းထဲမှာ ထားတာ ဒီမနက်တော့ ရေခဲတိုက်ပို့လိုက်ပြီ။ မိသားစုကို ပြန်ပေးတယ်ပြောတယ်” ဟု ဒေသခံတစ်ဦးက ပြောသည်။

ယမန်နေ့ညပိုင်း စစ်တပ်၏ ပစ်ခတ်မှုကြောင့် သေဆုံးသွားသူ ၂ ဦးကို PDF ဟု စစ်လော်ဘီများက တယ်လီဂရမ် လူမှုကွန်ရက်စာမျက်နှာများတွင် မဟုတ်မမှန်စွပ်စွဲမှုများရှိပြီး ယင်းစွပ်စွဲမှုများမှာ မှန်ကန်မှုမရှိဟု ကိုဝေယံ၏မိတ်ဆွေတစ်ဦးကပြောသည်။

“ကိုဝေယံက ဘိလိယက်ခုံဖွင့်ထားတယ်။ လူအေး။ အရမ်းကိုခင်ဖို့ကောင်းတဲ့သူ။ PDF လည်းမဟုတ်ပါဘူး။ မနေ့ညက သူတို့က ၁၂၇ ဘက်ကို သွားကြတာ။ ဆိုင်ကယ်တစ်စီး လူ ၃ ဦး။ ဖြစ်ချင်တော့ ၆ ရပ်ကွက်အုပ်ကြီးနဲ့ရာအိမ်မှူး အသတ်ခံရတဲ့အချိန်နဲ့ သွားတိုက်ဆိုင်ပြီး စစ်ခွေးတွေ ရမ်းကားတာနဲ့သွားတိုးတာပါပဲ” ဟု ကိုဝေယံ၏ မိတ်ဆွေက ရှင်းပြသည်။khit thit