SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ ကလေးမြို့ မြစ်အရှေ့ဘက် ကင်းမွန်ခြုံရွာ၏ အရှေ့ဘက် ဘုရားတောင်ကုန်း အနီးတွင်ဖြစ်ပွားသည့် တိုက်ပွဲတွင် စစ်ကောင်စီ တပ်သား ၁၅ ဦးခန့် သေဆုံးပြီး ဒဏ်ရာရရှိသူ များပြားကြောင်း People’s Defence Force (Kalay)က ဇူလိုင် ၂၂ ရက်စွဲဖြင့် သတင်းထုတ် ပြန်သည်။

စစ်ကောင်စီတပ်ကို ဇူလိုင်လ ၂၁ ရက်၊ နံနက် ၈ နာရီခန့်မှ စတင်၍ ကလေးပြည်သူ့ ကာကွယ်ရေး ပူးပေါင်းတပ်ဖွဲ့များက အသင့်စောင့်ဆိုင်း တိုက်ခိုက်ခဲ့ခြင်း ဖြစ်ပြီး တနေကုန် တိုက်ပွဲပြင်းထန်ခဲ့ကြောင်း သိရသည်။

”တိုက်ပွဲက ညနေ ၆ နာရီမှ ပြီးတယ်။ ခွေးတွေ(စစ်ကောင်စီတပ်သား)ကတော့ အကျများပြီး လက်နက်ကြီးပစ်ကူတောင်းခံခဲ့ရတယ်။ နှောညောင်ပင်ရွာက စစ်ခွေးနဲ့ပျူတွေက ပစ်ကူပေးခဲ့ပေမယ့်လည်း ထိခိုက်ကျဆုံးမှုများပြီး ပြန်လည်ဆုတ်ခွာသွားတယ်။ သွားရာလမ်းကနေ အင်းကျော်ကျေးရွာကို ပတ်ရမ်းပြီးပြည်သူလူထု နေအိမ်တွေကို မီးရှို့ ဖျက်ဆီးသွားတယ်။ ကျွန်တော်တို့ ရဲဘော်တွေကတော့ ဘေးကင်းစွာရှိနေပါပြီ။ တိုက်ပွဲ တစ်ပွဲပြီးတာနဲ့ နောက်ထပ် ထပ်တိုက်ဖို့ ကျည်ဆန် တွေလိုအပ်နေပါတယ်” ဟု ကလေးပြည်သူ့ ကာကွယ်ရေးတပ်ဖွဲ့မှ ရဲဘော်တစ်ဦးက ပြောသည်။

အကြမ်းဖက် စစ်ကောင်စီတပ်သည် ဇူလိုင်လ ၁၈ ရက်နေ့မှ စတင်၍ အင်အား ၁၀၀ ခန့်ဖြင့် ကလေး-ကလေးဝအကြား ကျောက္ကာကျေးရွာမှတဆင့် မြစ်သာမြစ်ကိုဖြတ်ကူး၍ အရှေ့ဘက်တောင်ကြောများအတိုင်း တောင်ဘက်သို့ ဦးတည်စစ်ကြောင်း ထိုးလာခဲ့ခြင်းဖြစ်သည်။

တိုက်ပွဲအတွင်း မြစ်သာမြစ်အနောက်လက်ကမ်း ကံပုလဲရွာဘက်မှ အကြမ်းဖက် စစ်ကောင်စီ တပ်ဖွဲ့များသည် လက်နက်ကြီးပစ်ကူဖြင့် တနေကုန် ရမ်းသန်း ပစ်ခတ်ခဲ့သည်။ ဇူလိုင်လ ၂၁ ရက်၊ မွန်းလွဲ ၄ နာရီခန့်တွင် ကင်မွန်းခြုံရွာ အတွင်းသို့ ဝင်ရောက်ပြီး နေအိမ်များကို မီးရှို့ဖျက်ဆီးခဲ့သဖြင့် နေအိမ် ခုနစ် လုံး မီးလောင်ပျက်စီးခဲ့သည်။ ည ၉ နာရီခန့်တွင် ကလေးမြို့အရှေ့ဘက် ပြင်သာရွာမှ စက်လှေ နှစ် စင်းဖြင့် စစ်ကောင်စီ တပ်သားအလောင်းများနှင့် ဒဏ်ရာရရှိသူများကို လာရောက် တင်ဆောင်သွားကြောင်း ထုတ်ပြန်ချက်တွင်ဖော်ပြထားသည်။

ထို့အပြင် ပြည်သူများအနေဖြင့် ကလေးပြည်သူ့ကာကွယ်ရေးတပ်ဖွဲ့People’s Defence Force (Kalay)က တရားဝင်ထုတ်ပြန်ထားသည့် ထုတ် ပြန်ချက်များကို လိုက်နာရန်၊ အထူးသဖြင့် စစ်ကောင်စီတပ်ဖွဲ့ဝင်များနှင့် ကင်းကင်းရှင်းရှင်းနေထိုင်ကြရန်နှင့် ၎င်းတို့အနီးအနားမှ ရှောင် ရှားကြရန်၊ စစ်ကောင်စီထုတ် ကုန်ပစ္စည်းများအား ရောင်းချသုံးစွဲခြင်းမပြုရန် ကလေးပြည်သူ့ကာကွယ်ရေးတပ်ဖွဲ့က သတိပေးပြောကြား ထားသည်။

အကြမ်းဖက်စစ်ကောင်စီတပ်ဖွဲ့များသည် ဇူလိုင်လ ၂၂ ရက် နံနက် ၉ နာရီခန့်တွင် ကင်မွန်းခြုံရွာမှ ကလေးမြို့ဘက်သို့ဦးတည်၍ ဆုတ်ခွာခဲ့သည်။ ထို့နောက် ကင်မွန်းခြုံရွာ အနီးဝန်းကျင်တွင် အကြမ်းဖက်စစ်ကောင်စီတပ် မြှုပ်နှံခဲ့သည့် မြေမြှုပ်မိုင်းများအား သွားရောက်ရှင်းလင်းစဉ် ပေါက်ကွဲမှုဖြစ်ပွားပြီး PDF (Kalay) တပ်ဖွဲ့ဝင် တစ်ဦး ထိခိုက်ဒဏ်ရာရရှိခဲ့ကြောင်း သိရသည်။

ယခုစစ်ဆင်ရေးကို PDF ( Kalay) တပ်ရင်း (၁)၊ (၂)၊ (၅)၊ (၆)၊ (၇)၊ ပ.က.ဖ (ကလေး)၊ CNDF (Vakok)၊ CDF- KKG နှင့် RKDF ပူးပေါင်းတပ်ဖွဲ့များက ပူးပေါင်း လုပ်ဆောင်ခဲ့ခြင်းဖြစ်သည်။ mizzima

စစ်ကိုင်းတိုင်း၊ ကနီမြို့နယ်၊ ငါးဖျက်ကျေးရွာကို မီးရှို့ပြန်လာတဲ့ စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးပူးပေါင်းတပ်ဖွဲ့တွေ အကြား ဇူလိုင် ၂၃ ရက် ဒီနေ့ မနက်ပိုင်းက တိုက်ပွဲဖြစ်ပွားခဲ့ ပါတယ်။

စစ်ကောင်စီတပ်ဖွဲ့ဝင်တွေက ငါးဖျက်ကျေးရွာမှာ ဇူလိုင် ၂၂ ရက်က တပ်စွဲနေရာယူထားချိန် ထိတွေ့တိုက်ပွဲတွေ ပြင်းပြင်းထန်ထန်ဖြစ်ခဲ့တာလို့  ကာကွယ်ရေးတပ်ဖွဲ့ဝင်တွေက ပြောပါတယ်။ 

ဇူလိုင် ၂၃ ရက်မှာတော့ စစ်ကောင်စီတပ်ဖွဲ့ဝင်တွေက ကျေးရွာအတွင်းကနေ ပြန်မဆုတ်ခင်မှာ လူနေအိမ်တချို့ကို မီးရှို့သွားခဲ့လို့  နေအိမ် ၁၀ လုံးနီးပါး မီးလောင်ဆုံးရှုံးခဲ့တယ်လို့ ဆိုပါတယ်။ 

အဲဒီနောက်မှာတော့ မီးရှို့ပြန်လာတဲ့ စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တို့ကြား တိုက်ပွဲဖြစ်ပွားခဲ့ကြတာဖြစ်ပြီး စစ်ကောင်စီတပ်ဖွဲ့ဝင်တချို့ သေဆုံးမှု ရှိနိုင်တယ်လို့လည်း ကာကွယ်ရေးတပ်ဖွဲ့ဝင်တွေက ပြောပေမဲ့ အတိအကျမသိရသေးပါဘူး။  

ကနီမြို့နယ်မှာ ဇူလိုင် ၁၈ ရက်မှ ၂၃ ရက်အထိ စစ်ကောင်စီတပ်ဖွဲ့ဝင်တွေနဲ့ ပြည်သူ့ ကာကွယ်ရေးတပ်ဖွဲ့တွေကြား နေ့စဉ် တိုက်ပွဲတွေ ဆက် တိုက်ဖြစ်နေပါတယ်။ DVB

ပဲခူးတိုင်း၊ ပြည်ခရိုင် ၊နတ်တလင်းမြို့နယ်ရှိ ကျေးရွာတရွာတွင် စခန်းချတပ်စွဲနေသည့် စစ်ကောင်စီတပ်ဖွဲ့ကို နတ်တလင်းပြည်သူ့ကာကွယ်ရေးတပ်ဖွဲ့က ဝင်ရောက်ပစ်ခတ်ခဲ့ကြောင်း သိရသည်။

နတ်တလင်းမြို့နယ် အရှေ့ဘက် ကြက်မနက်ကျေးရွာတွင် စခန်းချလျက်ရှိသော စစ်ကောင်စီစစ်ကြောင်းကို ဇူလိုင်လ၂၃ရက်နေ့ နံနက်၁နာရီတွင် နတ်တလင်းပြည်သူ့ကာကွယ်ရေးတပ်ဖွဲ့ (၃၈၀၁ )တပ်ခွဲ (၂)( Phoenix D F(Nattalin PDF))က ဝင်ရောက်ပစ်ခတ် တိုက်ခိုက်ခဲ့ကြောင်း သိရသည်။

ထိုတိုက်ခိုက်မှုကြောင့် စစ်ကောင်စီဘက်မှ သုံးဦးသေဆုံးပြီး နှစ်ဦးဒဏ်ရာရရှိခဲ့ကြောင်းသိရသည်။

“နတ်တလင်းအရှေ့ဘက်မှာ သူတို့(စစ်ကောင်စီတပ်ဖွဲ့)က စစ်ကြောင်းထိုးလာတာ။ အရင်လည်းထိုးတယ်။ ဆက်တိုက်ထိုးတယ် အင်းအားတော့ မများဘူး ၂၀ ၊၃၀ပဲရှိတယ် ဆက်တိုက်ထိုးနေတာပဲရှိတယ် အရင်တစ်ခေါက်ကလည်း သူတို့ထိုးပြီးတော့ ရွာထဲကို လက်နက်ကြီးတွေနဲ့ ရမ်းသန်းပစ်ခတ်တာ ရှိတယ်။ အခုအရင်က ဟိုဘက်က ပျဉ်းမခေါင်ဆိုတဲ့ ရွာမှာနေရင်းနဲ့မှ ကြက်မနက် ဆိုတဲ့ရွာဘက်ကို ပြောင်းပြီးတော့ စခန်းချတယ် အဲ့ဒါကို ကျနော်တို့က အလစ်အငိုက်ဝင်ပစ်တာ”ဟု နတ်တလင်းပြည်သူ့ကာကွယ်ရေးတပ်ဖွဲ့မှ ပြောရေးဆိုခွင့်ရှိသူက မဇ္ဈိမကိုပြောသည်။

ကာကွယ်ရေးတပ်ဖွဲ့နှင့် အဆက်အသွယ်ရှိသည်ဟုဆိုကာ စစ်ကောင်စီတပ်ဖွဲ့က ကြက်မနက်ရွာက ရွာခံတစ်ဦးထံမှ ဖုန်းသိမ်းယူခြင်းနှင့် နေ အိမ်ရှိ ငွေသား ၁၂သိန်းကို သိမ်းယူသွားခဲ့သေးသည်ဟု ၎င်းကပြောသည်။

တိုက်ခိုက်မှုမှာ မိနစ်၂၀ကြာ ဖြစ်ပွားခဲ့ပြီး နတ်တလင်းပြည်သူ့ကာကွယ်ရေးတပ်ဖွဲ့က အောင်မြင်စွာ ဆုတ်ခွာနိုင်ခဲ့ကြောင်း သိရသည်။

နတ်တလင်း ပြည်သူ့ကာကွယ်ရေး တပ်ဖွဲ့က ပြည်သူများအနေဖြင့် စစ်ကောင်စီတပ်ဖွဲ့ဝင်များနှင့် အနီးကပ်နေထိုင်ခြင်း၊ ၎င်းတို့သွားရာ စစ်ကြောင်းနှင့် အတူတကွသွားလာခြင်းများ မပြုလုပ်ကြရန် မေတ္တာရပ်ခံထားကြောင်း သိရသည်။ mizzima

ရန်ကုန်မြို့၊ အင်းစိန်ထောင်ရောက် ကျောင်းသားခေါင်းဆောင် ကိုခန့်သူအောင်ကို ထောင်အာဏာပိုင်များက ရိုက်နှက်ခဲ့ကြောင်း ၎င်း၏ လုပ်ဖော်ကိုင်ဖက်များထံမှ သိရသည်။

ရန်ကုန်စီးပွားရေးတက္ကသိုလ်ကျောင်းသားများသမဂ္ဂ (ရွာသာကြီးနယ်မြေ) ဥက္ကဋ္ဌ ကိုခန့်သူအောင် ရိုက်နှက်ခံရသည့်အချိန်မှာ ဇူလိုင် ၁၈ နေ့လယ်ပိုင်းတွင် ဖြစ်သည်ဟု သမဂ္ဂပြန်ကြားရေးမှ တာဝန်ရှိသူတစ်ဦးက ဆိုသည်။

“နေ့လယ်တန်းပိတ်တဲ့ အချိန်မှာ တန်းစီခိုင်းတယ်။ တန်းစီတာ မညီဘူးဆိုပြီး စည်းကမ်းထိန်းက တမင်ဝင်ရိုက်တယ်။ ပြီးတော့ သူ့ကို စောင့်ကြည့်နေတယ်။ စကားပြောတာ သွားတာလာတာလည်း မျက်စိဒေါက်ထောက် ကြည့်ခံနေရတယ်။ စကားနဲ့လည်း ခဏ ခဏ ရန်စနေတယ်” ဟု ထိုသူက ပြောသည်။

ကိုခန့်သူအောင်နှင့် အခြားနိုင်ကျဉ်းများ ရင်ဆိုင်နေရသည့် အခြေအနေကို ထောင်တွင်းမှ သတင်းပေးပို့သဖြင့် သိရခြင်း ဖြစ်သည်ဟု သူက ပြောသည်။

စစ်အာဏာရှင်စနစ် ဆန့်ကျင်ဆန္ဒပြခဲ့သည့် အသက် ၂၂ နှစ်အရွယ် ကိုခန့်သူအောင်သည် ဆူပူလှုံ့ဆော်မှုဆိုင်ရာ ပုဒ်မ ၅၀၅-က ဖြင့် ထောင်တွင်းတရားရုံးက မတ် ၃၁ တွင် ထောင်သုံးနှစ် ချမှတ်ခဲ့ပြီးနောက် ပြစ်ဒဏ်ကျ အကျဉ်းသားအများစုထားရာ အင်းစိန်ထောင် အဆောင် ၅ သို့ ပြောင်းရွှေ့ခံရသည်။ 

ထိုသို့ပြောင်းရွှေ့ရာတွင် အကျဉ်းသားပုံစံထိုင်ရန် ငြင်းဆန်ခဲ့၍ နှစ်ကြိမ် ရိုက်နှက်ခံရဖူးသည်။ ပထမအကြိမ် ရိုက်နှက်ခံရမှုတွင် ဒဏ်ရာပိုပြင်းထန်သည်ဟုဆိုသော်လည်း အသေးစိတ်အခြေအနေ မသိရပေ။

၎င်းအပြင် တစ်ဆောင်တည်းနေ အခန်း ၁ နှင့် ၄ တို့ရှိ နိုင်ငံရေးအကျဉ်းသားနှစ်ဦးလည်း ရိုက်နှက်ခံရသည်ဟု သိရသည်။

အခန်း ၁ ရှိ လက်နက်မှုဖြင့် ထောင်ကျနေသော နိုင်ကျဉ်းတစ်ဦးကိုလည်း ညနေတန်းပိတ်ချိန် မညီကြောင်း၊ အသက် ၆၀ ကျော်အရွယ် အမျိုးသားဒီမိုကရေစီအဖွဲ့ချုပ် တောင်ဒဂုံမြို့နယ် ဥက္ကဋ္ဌဟောင်း ဦးကြည်လင်းဆိုသူကို အခန်းကူးကြောင်း အကြောင်းပြကာ အကျဉ်းဦးစီးဌာနဝန်ထမ်းများက ရိုက်နှက်ခဲ့သည်ဟု သိရကြောင်း သူက ပြောသည်။

ယခု ရိုက်နှက်ခံရသည့်ဖြစ်စဉ်များကို ထောင်အာဏာပိုင်များထံ အသိပေးပြောကြားသော်လည်း တုံ့ပြန်မှုမရှိဟု သမဂ္ဂပြန်ကြားရေးတာဝန်ရှိသူက ပြောသည်။

ကိုခန့်သူအောင် အင်းစိန်ထောင် အဆောင် ၅ တွင် ရှိနေစဉ် အခန်း သုံးကြိမ်ပြောင်းခဲ့ရပြီး ထောင်အာဏာပိုင်တို့က အခန်းသူကြီးအဖြစ် ခန့်ထားသော နှစ်ရှည်ထောင်ကျ ရာဇဝတ်အကျဉ်းသားများက ၎င်းကို မကြာခဏရိုက်နှက်လေ့ရှိသည်၊ လူအများအပြားကို ပြွတ်သိပ်ထည့်ထားသည့် အခန်းများတွင် အနံ့အသက်ဆိုးရွားပြီး သန့်ရှင်းမှုနည်းပါးသည့် နေရာများတွင်သာ နေထိုင်ရသည်ဟု သိရကြောင်း သူက ဆိုသည်။

“တန်းစီတာ မညီဘူးဆိုပြီး အဲဒီလို ခဏ ခဏ လုပ်ခံရတယ်။ ထောင်သူကြီးကလည်း ရာဇဝတ်သားတွေကိုထားတာ အခန်း တစ်ခါခါရွှေ့ရတိုင်းမှာ သူ့ကို အိမ်သာနားမှာရှိတဲ့ နေရာတွေထားတယ်” ဟု သူက ဆက်ပြောသည်။

အထက်ပါဖြစ်စဉ်များနှင့် ပတ်သက်၍ အကျဉ်းဦးစီးဌာနတာဝန်ရှိသူကို မေးမြန်းရန် ကြိုးစားသော်လည်း ဖုန်းအဆက်အသွယ် မရသေးပေ။

ရန်ကုန်စီးပွားရေးတက္ကသိုလ်-ရွာသာကြီးနယ်မြေ ကျောင်းသားသမဂ္ဂ၏ ဥက္ကဋ္ဌ ကိုခန့်သူအောင်၊ ဘဏ္ဍာရေးမှူး မယဉ်မြတ်နိုးဦး၊ အဖွဲ့ဝင် ကိုဖြိုးကျော်နိုင်၊ အဖွဲ့ဝင်ဟောင်း ကိုမင်းဟိန်းခန့်တို့ ယမန်နှစ် ဧပြီ ၁၃ ညနေက တာမွေမြို့နယ်၊ ကျောက်မြောင်းဈေးရှေ့တွင် အဖမ်းခံခဲ့ရသည်။

အင်းစိန်ထောင်အာဏာပိုင်တို့သည် နိုင်ငံရေးအကျဉ်းသားများကို ပစ်မှတ်ထားကာ နည်းမျိုးစုံဖြင့် ဖိနှိပ်၊ ဆေးကုသခွင့် လုံလောက်စွာမပေးသဖြင့် နာမည်ဆိုးဖြင့် ကျော်ကြားသည်။

ယင်းသို့ အခက်အခဲများကို ဖြေရှင်းပေးရန် တောင်းဆိုသည့် အင်းစိန်ထောင်အတွင်း ဆန္ဒပြပွဲများ ပေါ်ပေါက်ဖူးရာ စစ်ကောင်စီက ရက်စက်စွာ ဖြိုခွင်းခဲ့သည်။

ဇူလိုင်လအတွင်း အင်းစိန်ထောင်တွင် အာဇာနည်နေ့အထိမ်းအမှတ် ဂါရဝပြုရန် ခွင့်တောင်းခဲ့သည့် နိုင်ငံရေးအကျဉ်းသား လူငယ်နှစ်ဦး အပြင်းအထန် ရိုက်နှက်ခံရပြီး တစ်ဦး တိုက်ပိတ်ခံရကာ တစ်ဦး ဆေးကုသနေရသလို မန္တလေး အိုးဘိုထောင်တွင် ဆဲဗင်းဇူလိုင်အထိမ်းအမှတ်ပြုလုပ်သော နိုင်ကျဉ်းတချို့ ရိုက်နှက်ခံရသည်။

စစ်ကောင်စီက ဆန့်ကျင်သူအများအပြားကို ဖမ်းဆီးပြီး ရည်ရွယ်ချက်ရှိရှိ နှိပ်ကွပ်နေခြင်း ဖြစ်သည်ဟု နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ တွဲဖက်အတွင်းရေးမှူး ဦးဘိုကြည်က ပြောသည်။

“စစ်အုပ်စု က မတရားတဲ့ဥပဒေတွေနဲ့ အကျဉ်းထောင်တွေကို သုံးချပြီး သူတို့ကို ဆန့်ကျင်နေတဲ့သူတွေကို မတရားသဖြင့် နှိပ်စက်နေတာကို တွေ့ရပါတယ်။ အကျဉ်းထောင်ကို ဖိနှိပ်ရေးကရိယာအဖြစ် သုံးနေတာပါ” ဟု ဦးဘိုကြည်က ပြောသည်။

“ခေတ်အဆက်ဆက်မှာ ဒီနည်းလမ်းကို သုံးပြီး သူတို့ကို မတော်လှန်ရဲအောင် ကျင့်သုံးနေခဲ့တာပါ၊ သို့သော်လည်း ဒီနေ့ထိ သူတို့ကို တော်လှန်နေတဲ့ မျိုးဆက်တွေ က ဆက်ရှိနေသလို အခုလည်း တော်လှန်နေဆဲပါ”

ဆန့်ကျင်သူဟု ယူဆရသူတို့ကို စစ်ကောင်စီက နေ့စဉ် ဖမ်းဆီးနေရာ ၁၁၇၅၉ ဦးထက်မနည်း ဆက်လက် ထိန်းသိမ်းခံနေရသည်ဟု လက် လှမ်းမီသမျှ ပြုစုထားသည့် မှတ်တမ်းအရ သိရကြောင်း AAPP က ဇူလိုင် ၂၁ ရက်စွဲဖြင့် ထုတ်ပြန်ထားသည်။ myanmar now

ကရင်ပြည်နယ်၊ ဘားအံမြို့နယ်၊ ကျုံမသွယ်ကျေးရွာအုပ်စု၊ ညောင်ကုန်းကျေးရွာမှာ တပ်စခန်းတိုးချဲ့တည်ဆောက်ဖို့ နယ်ခြားစောင့်တပ် (BGF)က  ဒေသခံပြည်သူတွေဆီကနေ သစ်လုံးတွေကို  အတင်းအဓမ္မတောင်းယူခဲ့တယ်လို့ ကေအန်ယူက သတင်းထုတ်ပြန်ပါတယ်။

ဇူလိုင် ၁၇ ရက်က အမှတ် ၁၀၁၄ နယ်ခြားစောင့်တပ်(BGF) လက်အောက်ခံတပ်ဖွဲ့ဝင်တွေက သစ်လုံးတွေကို ကျုံမသွယ်ကျေးနယ်အုပ်စု၊ ဘန့်ဘွေးကုန်း၊ ရွှေလူနဲ့ တော်သလေးခိုကျေးရွာတွေ က ဒေသခံပြည်သူတွေဆီကနေ  အတင်းအဓမ္မတောင်းယူခဲ့တာလို့ ဆိုပါတယ်။

၂ ထွာပတ်လည်၊ အရှည်  ၆ တောင်ရှိတဲ့ သစ်လုံးတွေကို တစ်အိမ်ထောင် သစ်တစ်လုံးပေးဖို့ BGF က တောင်းခံခဲ့သလို အရင်ကလည်း သစ်၊ ဝါးတွေ အကြိမ်ကြိမ်တောင်းခံခဲ့ရာ  စုစုပေါင်း ၄ ကြိမ် ရှိပြီလို့ ဆိုပါတယ်။

ဒေသခံပြည်သူတွေဟာ  ကုန်ဈေးနှုန်းကြီးမြင့်မှုတွေကြောင့် စားဝတ်နေရေး အခက်အခဲတွေနဲ့ ရင်ဆိုင်နေရသလို BGF တပ်ဖွဲ့ဝင်တွေကို ကြောက် လန့်နေရတဲ့အတွက် ခိုင်းတဲ့အတိုင်း သစ်တွေ ကို သွားရောက်ပို့ဆောင်ပေးခဲ့ရပါတယ်။

စစ်ကောင်စီလက်အောက်ခံ BGF တပ်ဖွဲ့ဝင်တွေဟာ ဒေသခံပြည်သူတွေကို  အမျိုးမျိုး ခြိမ်းခြောက်တာ၊ ဖမ်းဆီးသတ်ဖြတ်တာ၊ အတင်းအဓမ္မခိုင်းစေတာ၊ လူ့အခွင့်အရေးချိုးဖောက်တာ၊ လူသာားဒိုင်းအဖြစ်အသုံးပြုတာတွေ ပိုမိုလုပ်ဆောင်လာတယ်လို့ ကေအန်ယူက ထုတ်ပြန်ထား ပါတယ်။ DVB

စစ်ကိုင်းတိုင်း၊ ရေဦးမြို့နယ်မှ ခင်ဦးမြို့နယ်ရှိ ကျေးရွာများအတွင်း စစ်ကြောင်းထိုး နေသည့် စစ်ကောင်စီစစ်ကြောင်းမှာ ဇူလိုင်လ ၂၂ ရက်၊ ညနေပိုင်းတွင် မိုင်းဆွဲ တိုက်ခိုက်ခံခဲ့ရပြီး ထိခိုက်သေဆုံးမှု များပြားကြောင်း ဒေသခံသတင်းရင်းမြစ်များထံမှ သိရသည်။

အင်အား ၉ဝ ဝန်းကျင်ပါ စစ်ကောင်စီခြေလျင်စစ်ကြောင်းသည် ခင်ဦးမြို့နယ်၊ အင်းပတ် ကျေးရွာအုပ်စုရှိ မြင်းဒေါင်းရွာစာသင်ကျောင်းအနီး ပတ်ဝန်းကျင်တွင် ခင်ဦးဒေသ ကာကွယ်ရေးပူးပေါင်းအဖွဲ့များ ထောင်ထားသည့် မိုင်းနင်းမိ၍ ထိခိုက်သေဆုံး မှုများပြားခဲ့ခြင်းဖြစ်သည်ဟု Khin U Support Organization (KSO) အဖွဲ့ခေါင်းဆောင် ဗိုလ်လင်းရောင်က မဇ္ဈိမကို ပြောသည်။

“လာတာက ရေဦးမြို့နယ်ဘက်ကနေ ခင်ဦးမြို့နယ်ဘက်ကို လာတာပါ။ သူတို့က ရွာစဉ်လိုက်သွားပြီးတော့ အခုဟာက အပြန်လမ်းမှာ ဖြစ်တာ။ အဲ့ဒီလမ်းက သူတို့ သွားနေကျဖြစ်တဲ့အတွက် ကြိုတင်ပြင်ဆင်ပြီး မိုင်းထောင်ထားတာပါ။ မိုင်းကွင်း သဘောမျိုး ဖော်ထားတာပေါ့။ အဲ့ဒီနားက သတင်းပို့ချက်အရတော့ ၉ဝ ကနေ အကောင်း ပကတိနဲ့ ၃ဝ လောက်ပဲ ထွက်လာတော့တယ်ပြောပါတယ်” ဗိုလ်လင်းရောင်က ပြော သည်။

အဆိုပါ မိုင်းဆွဲတိုက်ခိုက်မှုကို Khin U Support Organization (KSO)၊ ခင်ဦးမြို့နယ် ပကဖအပါအဝင် ဒေသကာကွယ်ရေးအဖွဲ့များ ပူးပေါင်းကာ လုပ်ဆောင်ခဲ့ခြင်း ဖြစ်ကြောင်း သိရသည်။

မိုင်းပေါက်ကွဲမှု ဖြစ်ပွားပြီးနောက် ရေဦးမြို့ဘက်မှ စစ်ကား လေးစီးဖြင့် စစ်ကောင်စီ တပ်သားအလောင်းများနှင့် ဒဏ်ရာရသူများကို သယ် ဆောင်၍ ပြန်သွားကြောင်း Khin U Support Organization (KSO) အဖွဲ့ခေါင်းဆောင် ဗိုလ်လင်းရောင် ထံကသိရသည်။

အင်တာနက်ဖြတ်တောက်ခံထားရသည့် ခင်ဦးနယ်တွင် အာဏာသိမ်း စစ်ကောင်စီ တပ်များသည် အင်အားအလုံးအရင်းဖြင့် စစ်ကြောင်းထိုးကာ ကျေးရွာများကို ဝင်ရောက်မီးရှို့ အကြမ်းဖက်မှုများ ဆက်လက်လုပ်ဆောင်နေကြောင်း ဒေသခံများနှင့် ဒေသ ကာကွယ်ရေး အဖွဲ့များထံက သိရသည်။ mizzima

စစ်ကိုင်းတိုင်း၊ ကလေးမြို့လယ်ရှိ ဒေသကွပ်ကဲရေးဌာနချုပ်အနီး အကြမ်းဖက်စစ်ကား ၁ စီး မိုင်းခွဲခံရပြီး စစ်သား ၅ ဦး သေဆုံးကြောင်း သ တင်းရရှိသည်။

ကလေးမြို့ ဒကစ အတွင်းမှ ထွက်လာသော စစ်ကားကို ယနေ့ ဇူလိုင်လ ၂၃ ရက် နံနက် ၇ နာရီဝန်းကျင်တွင် Operation MoMo အဖွဲ့က မိုင်း ၂ ကြိမ် ဖောက် ခွဲတိုက်ခိုက်ရာ ကားပေါ်ပါ စစ်သား ၅ ဦးပွဲချင်းပြီးသေဆုံးခဲ့ပြီး ဒဏ်ရာရသူများလည်း ရှိကြောင်း သိရှိရသည်။

အဆိုပါ စစ်ကားသည် မိုင်း ၂ ကြိမ်ဖောက်ခွဲတိုက်ခိုက်ခံရပြီးနောက် သစ်ပင်ကိုဝင်တိုက်မိပြီး အဆိုပါကားကို ဒကစအတွင်းသို့ ပြန်လည် တွန်းယူသွားကြောင်း ဒေသခံများက ဆိုသည်။

မိုင်းခွဲတိုက်ခိုက်ခံရပြီးနောက် အကြမ်းဖက်စစ်တပ်သည် အိမ်စီးကားများဖြင့် ကလေးမြို့တွင်းလှည့်ပတ်ကာ ရမ်းသန်းပစ်ခတ်ခဲ့ကြောင်း သိရှိရသည်။

အလားတူ ပဲခူးတိုင်း၊ နတ်တလင်းမြို့နယ်အရှေ့ဘက်ရှိ ကြက်မနက်ကျေးရွာတွင် စခန်းချတပ်စွဲထားသော အကြမ်းဖက်စစ်ကောင်စီတပ်ဖွဲ့ကို Bago Region PDF တပ်ရင်း ၃၈၀၁၊ တပ်ခွဲ ၂ (Phoenix DF နတ်တလင်း) က ယနေ့ ဇူလိုင်လ ၂၃ ရက် နံနက် ၁ နာရီခန့်တွင် ဝင်ရောက်ပစ် ခတ်တိုက်ခိုက်ရာ စစ်သား ၃ ဦးသေဆုံးပြီး ၂ ဦး ဒဏ်ရာရကြောင်း၊ မိနစ် ၂၀ ခန့်တိုက်ပွဲဖြစ်ပွားခဲ့ပြီးနောက် PDF များ အထိအခိုက်မရှိ ဆုတ်ခွာနိုင်ခဲ့ကြောင်း Phoenix D-F နတ်တလင်းက သတင်းထုတ်ပြန်သည်။

ပြည်သူများအနေဖြင့် အကြမ်းဖက်စစ်တပ် တပ်ဖွဲ့ဝင်များနှင့် အနီးကပ်နေထိုင်ခြင်း၊ ၎င်းတို့သွားရာ စစ်ကြောင်းများနှင့် အတူတကွ သွားလာခြင်း မပြုလုပ်ကြရန် Phoenix D-F နတ်တလင်း က မေတ္တာရပ်ခံထားသည်။ khit thit

ဇူလိုင် ၂၂ ရက် တရက်တည်း ဖြစ်ပွားခဲ့တဲ့တိုက်ပွဲတွေမှာ စစ်ကောင်စီ အကြမ်းဖက်တပ်ဖွဲ့ဝင်အ ယောက် ၁၃၀ နီးပါးသေဆုံးခဲ့တယ်လို့ အ မျိုးသားညီညွတ်ရေးအစိုးရ (NUG) က ထုတ်ပြန်ပါတယ်။

ခုထုတ်ပြန်ထားတဲ့ အချက်အလက်ဟာ မြေပြင်အခြေအနေမှာ ပိုများနိုင်ပြီး တရက်တည်း ထိခိုက်ဒဏ်ရာရရှိတဲ့သူ အရေအတွက်ကတော့ ၂၁ ယောက် ရှိခဲ့တယ်လို့ ဆိုပါတယ်။

NUG အစိုးရ ကာကွယ်ရေးဝန်ကြီးဌာနကတော့ မြန်မာနိုင်ငံတဝန်း ပြည်သူ့ခုခံတော်လှန်စစ် အရှိန်မြှင့်နေပြီး ပြီးခဲ့တဲ့ ဇွန် ၇ ရက်ကနေ ဇူလိုင် ၆ ရက်အထိ ၁ လတာကာလအတွင်း စစ်ကောင်စီဘက်က ၁,၉၇၅ ယောက် သေဆုံးခဲ့ပြီး ထိခိုက်ဒဏ်ရာရရှိတဲ့သူ အရေအတွက်က အယောက် ၈၉၀ ထိ ရှိခဲ့တယ်လို့ ထုတ်ပြန်ထားပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြပါတယ်။

လူထုသပိတ်တိုက်ပွဲတွေအနေနဲ့ မနေ့က တရက်တည်း ကချင်ပြည်နယ်နဲ့ မကွေးတိုင်းတို့မှာ ၁ ကြိမ်စီ၊ စစ်ကိုင်းတိုင်းမှာ ၉ ကြိမ်နဲ့ အများဆုံး ဖြစ်ပွားခဲ့တယ်လို့ ထုတ်ပြန်ချက်မှာ ဖော်ပြပါတယ်။

ဒါ့အပြင် ပြည်သူ့ခုခံတွန်းလှန်စစ် ၁ နှစ်တာ ကာလအတွင်း စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော် ရှိခဲ့တယ်လို့ NUG အစိုးရ ကာကွယ်ရေးဝန်ကြီးဌာနက ဆိုပါတယ်။

ဒါဟာ ပြီးခဲ့တဲ့ ၂၀၂၁ ခုနှစ်၊ ဇွန် ၁ ရက်ကနေ အခုနှစ် မေ ၁၇ ရက်အထိ စုဆောင်းရရှိထားတဲ့ အချက်အလက်တွေအရ ဖော်ပြထားတာဖြစ်ပြီး မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်းလမ်းပိုင်းတွေရဲ့ ၉၀ ရာ ခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အ ကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။ DVB