သေဒဏ်ချမှတ်ခံထားရသူပေါင်း ၁၁၈ ဦးရှိ၊ အသက်မပြည့်သေးသူ ၂ ဦး အမှုပြန်ရင်ဆိုင်နေရ

စစ်ကောင်စီက မတရားသေဒဏ်ချမှတ်ထားသူပေါင်း   ၁၁၈ ယောက်ရှိပြီး သေဒဏ်ချခံထားရတဲ့ အသက်မပြည့်သေးသူ ၂ ယောက်ကတော့ အမှုပြန်ရင်ဆိုင်နေရတယ်လို့ နိုင်ငံရေး အကျဥ်းသားများ ကူညီစောင့်ရှောက်ရေးအသင်း ( AAPP) က ဇူလိုင် ၂၈ ရက် ဒီနေ့ ထုတ်ပြန်ပါတယ်။

သေဒဏ် ချမှတ်ခံရသူ ၄ ယောက်ရဲ့ အချက်အလက်တွေကို  ဒီနေ့မှာ ထပ်ပြီး အတည်ပြုနိုင်ခဲ့တာကြောင့် နွေဦးတော်လှန်ရေးနဲ့ ဆက်စပ်လို့ သေဒဏ် ချမှတ်ခံထားရပြီး အကျဥ်းထောင်တွေမှာ ထိန်းသိမ်းခံနေရသူ စုစုပေါင်း ၇၆ ယောက် ရှိပြီလို့ ဆိုပါတယ်။ နောက်ထပ် ၄၂ ယောက်ကတော့ မျက်ကွယ်မှာ သေဒဏ်ချခံထားရတာဖြစ်ပါတယ်။

စစ်ခုံရုံးက သေဒဏ် ချမှတ်ထားတဲ့ အသက် ၁၈ နှစ်အောက် ကလေး ၂ ယောက်ဟာ ကလေးသူငယ်တရားရုံးမှာ အမှု ပြန်ရင်ဆိုင်နေရသလို သေဒဏ် ချမှတ်ခံထားရတဲ့ အမျိုးသားတယောက်နဲ့ အမျိုးသမီးတယောက်တို့ဟာ သေဒဏ်ကနေ အယူခံအောင်ပြီး ထောင်ဒဏ်တသက် ပြောင်းလဲချမှတ်ခံထားရပါတယ်။

စစ်တပ်က အာဏာသိမ်းခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်ကနေ အခု ၂၀၂၂ ခုနှစ် ဇူလိုင် ၂၈ ရက်နေ့အထိ ဖမ်းဆီးချုပ်နှောင်ခံထားရသူ ၁၁၈၁၅ ယောက် ရှိပြီး အယောက် ၁၃၆၀ ကို ထောင်ဒဏ် ချမှတ်ထားပါတယ်။

မနေ့က မကွေးတိုင်း ပေါက်မြို့နယ်က  ကျားပစ်ကန်ကျေးရွာကို စစ်သားတွေနဲ့ ပျူစောထီးတွေက လက်နက်ကြီးနဲ့ ပစ်ခတ်တာကြောင့် နေအိမ်ခြံဝင်းထဲမှာ ဆော့ကစားနေတဲ့ အသက် ၄ နှစ်ခွဲအရွယ် မသိမ့်သိမ့်ဖြူဟာ ကျည်ထိမှန်ပြီး နေရာမှာပဲ သေဆုံးခဲ့လို့ နွေဦးတော်လှန်ရေးကာလအတွင်း ပြည်သူ ၂၁၃၃ ယောက် ကျဆုံးခဲ့ပြီလို့ AAPP က ထုတ်ပြန်ထားပါတယ်။

ဒါဟာ AAPP ကောက်ယူရရှိထားတဲ့စာရင်းတွေပဲ ဖြစ်ပြီး အမှန်တကယ် မြေပြင်မှာ ကျဆုံးခဲ့သူအရေအတွက်ဟာ ဒါထက် ပိုများနိုင်တယ်လို့လည်း ဆိုပါတယ်။ DVB

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s