SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မကွေးတိုင်း၊ ရေစကြိုမြို့နယ်မှ အင်အား ၈၀ နီးပါးရှိ စစ်ကောင်စီတပ်သည် စစ်ကိုင်းတိုင်း၊ မြောင်မြို့နယ်သို့ ယနေ့ ဩဂုတ်လ ၃၁ ရက် နံနက်အစောပိုင်းက စစ်ကြောင်းထိုးဝင်ရောက် လာကြောင်း မြောင်မြို့နယ်ပြည်သူ့ကာကွယ်ရေးနှင့်လုံခြုံရေးတပ်ဖွဲ့ – CDSOM ဦးဆောင်သူ ကိုနွေဦးထံမှ သိရသည်။

အဆိုပါစစ်ကြောင်းမှာ မြောင်နယ်သို့ ယနေ့ နံနက် ၃ နာရီဝန်းကျင်တွင် ဝင်ရောက်လာခြင်းဖြစ်ပြီး လက်ရှိ တွင် ကျောက်ရစ်ကျေးရွာအနောက်ဘက်ရှိ ဘုရား၌တပ်စွဲအထိုင်ချလျှက်ရှိသည်။

လွန်ခဲ့သည့် ဩဂုတ်လ ၂၇ ရက်နေ့ကလည်း ကျောက်ရစ်ကျေးရွာသို့ မုံရွာနမခမှ လေကြောင်းဖြင့် စစ်ကောင်စီတပ်သား ၄၀ ကျော် လာရောက်ချထားကာ အင်အားဖြည့်တင်းမှုပြုလုပ်ခဲ့သေးသည်။

ယနေ့ ရေစကြိုမှဝင်ရောက်လာသည့်စစ်ကြောင်းမှာ ၎င်းတို့နှင့်အတူ ၆၀ မမ၊ ၈၀ မမ၊ စက်လတ်များနှင့် လက်နက်ငယ်များပါယူဆောင်လာကြောင်း ကာကွယ်ရေးတပ်ဖွဲ့ထံမှ သိရသည်။

ယင်းစစ်ကောင်စီတပ်ဖွဲ့မှာ ၎င်းတို့အထိုင်ချရာ ကျောက်ရစ်ကျေးရွာနှင့် တစ်မိုင်ခန့်အကွာရှိ ဇီးကျွန်းကျေး ရွာသို့ ယနေ့ နံနက် ၁၁ နာရီခွဲဝန်းကျင်တွင် ၆၀ မမ လက်နက်ကြီးနှင့် နှစ်ကြိမ်ပစ်ခတ်ရာ ရွာမြောက်ပိုင်း နှင့် ရွာလယ်သို့ကျရောက်ပေါက်ကွဲခဲ့သည်။

“အဲဒီဘုရားကနေ ဇီးကျွန်းရွာထဲက လှမ်းပစ်လိုက်တာ။ ပထမတစ်လုံးပစ်တာ ဆေးခန်းနားမှာကျတယ်။ ရွာသားတွေထွက်ပြေးကြတဲ့အချိန်မှာ နောက်တစ်လုံးထပ်ပစ်တယ်။ ရွာလယ်ခေါင်မှာကျတာ နှစ်ယောက် ကပွဲချင်းပြီးသေသွားတယ်။ ခြေထောက်တွေအောက်ပိုင်းတွေထိတာ။ ခြေထောက်တွေလည်း ပြတ်တယ်” ဟု CDSOM ဦးဆောင်သူ ကိုနွေဦးက ပြောသည်။

ထိုသို့ပစ်ခတ်မှုကြောင့် အသက် ၃၀ ဝန်းကျင်အရွယ် ကိုကျော်စွာသိန်းနှင့် အသက် ၄၀ ဝန်းကျင်ရှိ ဦးခင်မောင်ဦး တို့ ခန္ဓာကိုယ်အနှံ့အသားပွင့်ထွက် ပေါက်ပြဲဒဏ်ရာများနှင့် နေရာမှာပင် သေဆုံးခဲ့ရသည်။ အသက် ၅၅ နှစ်အရွယ် ဒေါ်နွဲ့ရီမှာလည်း တင်ပါးဆုံထိခိုက်ဒဏ်ရာဖြင့် ဆေးကုသမှု ခံယူနေရသည်။

ဇီးကျွန်းကျေးရွာမှာ အိမ်ခြေ ၂၇၀ ၊ လူဦးရေ ၁၀၀၀ ဝန်းကျင်နေထိုင်ပြီး လတ်တလောတွင် အခြားရွာများမှ စစ်ဘေးရှောင် ဦးရေ ၂၀၀ ခန့်ပါ မှီခိုနေထိုင်နေကြသည့်ကျေးရွာဖြစ်သည်။

လက်ရှိ မြောင်မြို့နယ်၌ ကျောက်ရစ်ကျေးရွာစခန်းတွင် ကနဦးအထိုင်ချထားသည့်တပ်ဖွဲ့၊ မုံရွာ နမခမှ ထပ်တိုးတပ်ဖွဲ့၊ ရေစကြိုမှဝင်လာသည့်တပ်ဖွဲ့အပြင် မြောင်မြို့ပေါ်မှစစ်ကောင်စီတပ်များလည်း တပ်စွဲ လျှက်ရှိသည်။

ထို့ပြင် မြင်းမူမြို့နယ် ဂွေးပင်တောနှင့် လတ္ထုတ်တောကျေးရွာဘက်မှလည်း စစ်ကောင်စီအင်အား ၅၀ ကျော်ခန့် မြောင်နယ်သို့ စစ်ကြောင်းထိုးရန် ဟန်ပြင်လျှက်ရှိကြောင်း ကိုနွေဦးက ပြောသည်။

သို့ဖြစ်၍ မြောင်နယ်အတွင်း ထိတွေ့တိုက်ပွဲများ အချိန်မရွေးဖြစ်ပွားနိုင်သည့်အနေအထားဖြစ်၍ ပြည်သူ များသတိပြုနေထိုင်ကြရန် ကာကွယ် ရေးတပ်ဘက်က အသိပေးပြောဆိုထားသည်။ mizzima

ချင်းပြည်နယ်၊ ဟားခါးမြို့နယ်၊ ပြည်နယ်လမ်းဦးစီးဌာနဝင်းအတွင်းရှိ ဆောက် လုပ်ရေးဧည့်ရိပ်သာ ယနေ့ နံနက် အစောပိုင်း မီးလောင်ကျွမ်းသွားပြီး Non-CDM လမ်းဦးစီးဌာန အရာရှိများအပါအဝင် ဝန်ထမ်း အမျိုးသား ၁၁ ဦး ဖမ်းဆီးခံရကြောင်း ဆောက်လုပ်ရေးဝန်ကြီးဌာန အသိုင်းအ၀ိုင်းထံမှ သိရှိရသည်။

ဩဂုတ်လ ၃၁ ရက်နေ့ နံနက် ၂ နာရီခွဲအချိန် ချင်းပြည်နယ် ဟားခါးမြို့ ပြည်နယ်လမ်းဦးစီးဌာန ဝင်းအတွင်းရှိ ဧည့်ရိပ်သာ မီးလောင်ကျွမ်းမှု ဖြစ်ပေါ်ခဲ့ကြောင်း၊ နံနက် ၄ နာရီခန့်တွင် မီးညွန့်ကျိုးသွားခဲ့ပြီး ဧည့်ရိပ်သာတွင် ခေတ္တ

နေထိုင်လျက်ရှိသော ဟားခါးခရိုင် လမ်းဦးစီးဌာနမှ AD-ဦးလင်းအောင်၊ AD-ဦးဉာဏ်ဟိန်းအောင်၊ စက်မှု AE-ဦးဝင်းမော်၊ အခြားဝန်ထမ်းများ၊ လုပ်သား(၈)ဦး စုစုပေါင်း ဌာနမှ အမျိုးသား ၁၁ ဦး ပျောက်ဆုံးလျက်ရှိကြောင်း သတင်းရရှိပါသည်။

ဆောက်လုပ်ရေးဝန်ကြီးဌာန၏သုံးသပ်ချက်တွင် ဒေသခံပြည်သူ့ကာကွယ်ရေး တပ်ဖွဲ့များက ဆောက်လုပ်ရေးဧည့်ရိပ်သာကို မီးရှို့ပြီး အရာရှိများနှင့်ဝန်ထမ်း အမျိုးသား ၁၁ ဦးကို ဖမ်းဆီးသွားခြင်း ဖြစ်နိုင်သည်ဟု သုံးသပ်ထားကြောင်း သိရှိရသည်။

ရန်ကုန်ခေတ်သစ်အနေဖြင့် အဆိုပါဖြစ်စဉ်နှင့်ပတ်သက်ပြီး မြေပြင် အခြေ အနေကို ဆက်လက်စုံစမ်းနေဆဲဖြစ်သည်။ khit thit

ပြည်ထောင်စု တရားလွှတ်တော်ရုံးချုပ်က ချေဖျက်အမိန့်ချမှတ်ထားတဲ့ မွန်ပြည်နယ် ဝန်ကြီးချုပ် ဒေါက်တာ အေးဇံ ရဲ့ ရွေးကောက်ပွဲအမှုတွေကို စစ်ကောင်စီက တရားပြန်စွဲပြီး သြဂုတ် ၃၀ ရက်နေ့မှာ ရုံးထုတ်ခဲ့တယ်လို့ တရားရုံးနဲ့ နီးစပ်သူတွေက DVB ကို ပြောပါတယ်။

ဝန်ကြီးချုပ်ဒေါက်တာအေးဇံဟာ ပြီးခဲ့တဲ့ ရွေးကောက်ပွဲမှာ မလျော်သြဇာသုံးခဲ့တယ်ဆိုတဲ့ စွပ်စွဲချက်နဲ့ စစ်ကောင်စီက ရာဇသတ်ကြီး ဥပဒေ ပုဒ်မ ၁၇၁(စ) နဲ့ အမှု ၂ မှု ဖွင့်လှစ်ခဲ့တာပါ။

အဲဒီအမှုအတွက် တရားစွဲအဖွဲ့အစည်း ခွင့်ပြုမိန့်မပါတာကြောင့် ပြီးခဲ့တဲ့ ဇွန် ၂၉ ရက်နေ့မှာ ပြည်ထောင်စု တရားလွှတ်တော်ရုံးချုပ်ကနေ အမှုတစ်ခုလုံးကို ချေဖျက်ကြောင်း အမိန့်ချမှတ်ခဲ့တာပါ။

ဒါပေမဲ့ စစ်ကောင်စီက အဲဒီအမှု ၂ မှုလုံးကို တရားစွဲအဖွဲ့အစည်း ခွင့်ပြုမိန့် လျှောက်ထားပြီး ဖမ်းဆီးထိန်းသိမ်းထားတဲ့ ကျိုက်မရောဗဟိုအ ကျဉ်း ထောင်မှာ ရုံးပြန်ထုတ်ခဲ့တာ ဖြစ်ပါတယ်။

“ဝန်ကြီးချုပ်ကို ရုံးပြန်ထုတ်ခဲ့တယ်၊ ဒီနေ့မှာတော့ ရှေ့နေပါဝါတင်တယ်လို့ သိရတယ်၊ စစ်ဆေးတာတော့ မရှိဘူး၊ ရုံးချိန်းထပ်ပေးတယ်၊ ဝန် ကြီးချုပ်ကတော့ ကျန်းကျန်းမာမာပဲ”လို့ တရားရုံးနဲ့နီးစပ်သူ တစ်ဦးက ပြောပါတယ်။စစ်ကောင်စီက တရားပြန်စွဲထားတဲ့ ဝန်ကြီးချုပ် ဒေါက် တာအေးဇံရဲ့ ရွေးကောက်ပွဲအမှုတွေကို လာမယ့် စက်တင်ဘာ ၆ ရက်နေ့ကို ထပ်မံချိန်းဆိုခဲ့တာ ဖြစ်ပြီး အဲဒီရုံးချိန်းမှာတော့ တရားလိုကို စစ် ဆေးသွားမှာ ဖြစ်ပါတယ်။

မွန်ပြည်နယ်ဝန်ကြီးချုပ် ဒေါက်တာအေးဇံရဲ့ ရွေးကောက်ပွဲအမှုတွေကို စစ်ကောင်စီ မော်လမြိုင်ခရိုင် အထွေထွေရွေးကောက်ပွဲ ကော်မရှင်အဖွဲ့ခွဲ အတွင်းရေးမှူး ဦးထင်ကျော်က တရားလိုအဖြစ် ဆောင်ရွက်နေတာပါ။

ဝန်ကြီးချုပ် ဒေါက်တာအေးဇံဟာ စစ်တပ် အာဏာသိမ်းပြီးနောက် စစ်ကောင်စီက စွဲဆိုထားတဲ့ အဂတိမှု ၉ မှုအတွက် ထောင်ဒဏ် ၂၁ နှစ်၊ ပုဒ်မ ၁၃၀(က)အတွက် ထောင်ဒဏ် ၂ နှစ်၊ ၅၀၅(ခ)နဲ့ ထောင်ဒဏ် ၂ နှစ် စုစုပေါင်း ထောင်ဒဏ် ၂၅ နှစ် အမိန့်ချမှတ်ခံထားရတာ ဖြစ်ပါတယ်။DVB

khit thit

မန္တလေးတိုင်း၊ ပြည်ကြီးတံခွန်မြို့နယ်၊ ဇီးအုပ်ကွက်သစ်အတွင်းရှိ နေအိမ်များအား ပျူစောထီးအဖွဲ့က လာရောက်ဖျက်ဆီးရာမှ ရပ်ကွက်နေပြည်သူများနှင့် အပြန်အလှန်တိုက်ခိုက်မှု ဖြစ်စဉ်တစ်ခု ယမန်နေ့ကဖြစ်ပွားခဲ့ကြောင်း သတင်းရရှိသည်။

“ရပ်ကွက်လူကြီးနဲ့ ပျူစောထီးတွေရောက်လာပြီး၊ အိမ်တွေကိုဖျက်ဖို့အမိန့်ပါတယ်၊ ဖယ်ပေးကြ၊ မဖယ်ရင် ငါတို့အစီအစဉ်နဲ့ ဖျက်ဆီးပစ်မယ်ဆိုပြီး ခြိမ်းခြောက်တာပေါ့နော်၊ ပထမတော့ကြောင်ကြည့်နေကြတာပေါ့၊ နောက်တော့မှ ဒါမဟုတ်သေးဘူးဆိုပြီး၊ ရပ်ကွက်ကပြန်ပြောတော့ နှစ်ဘက်အခြေအတင်ဖြစ်ကြတာ၊ အဲဒီမှာ ပျူစောထီးတွေက လက်နက်တကားကားနဲ့ခြိမ်းခြောက်တယ်၊ ဘတ်ဟိုးမောင်းတဲ့ကောင်က ဘတ်ဟိုးနဲ့ဝှေ့ရမ်းတယ်၊ မခံနိုင်တော့တဲ့အဆုံးရပ်ကွက်က တုတ်တွေနဲ့ ပြန်ချတော့မှ ပျူစောထီးတွေက ဘတ်ဟိုးသမားနှစ်ကောင်ကိုထားပြီး ထွက် ပြေးကြတယ်” ဟု ဖြစ်စဉ်နှင့်ပတ်သက်ပြီး ဒေသခံတစ်ဦးကရှင်းပြသည်။

ပြည်ကြီးတံခွန်မြို့နယ် ၁၃၁ လမ်း၊ ၄၉ လမ်းနှင့် လမ်း ၅၀ ကြား ၊ ဇီးအုပ်ကွက်သစ် (ဋ)ရပ်ကွက်အတွင်းရှိ နေအိမ်များကို ယမန်နေ့ ဩဂုတ်လ ၃၀ ရက် နေ့လယ်ပိုင်းက ကံကြီးကုန်းရပ်ကွက် အုပ်ချုပ်ရေးမှူးနှင့် ပျူစောထီးဆိုသူ အယောက် ၃၀ခန့်က စက်ယန္တရားများဖြင့် ဖျက်ဆီးရန်ရောက်လာခြင်းဖြစ်ကြောင်း ဒေသခံများက ဆိုသည်။

ဖြစ်စဉ်နှင့်ပတ်သက်၍ ယမန်နေ့ ဩဂုတ်လ ၃၀ ရက် နေ့လယ်ပိုင်းက အဆိုပါနေအိမ်များအား အောင်ဆန်းဦး (နေရပ်လိပ်စာမသိ)ဆိုသူက ၎င်း ပိုင်မြေဟုဆိုကာ ပျူစောထီးများနှင့် လူမိုက်များကိုငှားပြီး စက်ယန္တရားဖြင့် လာရောက်ဖျက်ဆီးကြောင်း၊ ထို့အပြင် လူဆိုးလူမိုက်များကိုပါ ခေါ်လာပြီး ရပ်ကွက်နေပြည်သူများအား ကိုယ်ထိလက်ရောက် ရိုက်နှက်ခဲ့ကြောင်း၊ ပြည်သူကပြန်လည် ခုခံရာတွင် ပျူစောထီးနှင့်လူဆိုးလူ မိုက်များ ထွက်ပြေးသွားကြောင်း၊ စက်ယန္တရားမောင်းသူနှစ်ဦးအား စက်ယန္တရားနှင့်အတူ ဖမ်းဆီးနိုင်ခဲ့ပြီး စက်ယန္တရားအား ဖျက်ဆီးခဲ့ကြောင်း၊ စက်ယန္တရားမောင်းသူနှစ်ဦးကို ကံကြီးကုန်းရပ်ကွက် အုပ်ချုပ်ရေးမှူးနှင့်အဖွဲ့က လာခေါ်သွားကြောင်း ပြည်ကြီးတံခွန်မြို့နယ် သပိတ်အင်အား စု(မန္တလေး)ထံက သိရသည်။

လက်ရှိတွင် ဇီးအုပ်ကွက်သစ်နှင့် အနီး၀န်းကျင် တွင် စစ်ကောင်စီတပ်ဖွဲ့ရောက်ရှိ စောင့်ကြည့်နေကြောင်းလည်း သိရသည်။ mizzima

ပြည်တွင်းစီးပွားရေးစျေးကွက်တွင် ယနေ့ ဩဂုတ်လ ၃၁ ရက်နေ့ အမေရိကန်တစ်ဒေါ်လာလျှင် ငွေကျပ် ၅၀၀၀ ကျပ်နီးပါး ကပ်နေပြီး အ ခေါက်ရွှေတစ်ကျပ်သား ၃၇ သိန်း စျေးပေါက်လျက်ရှိကြောင်း စျေးကွက်အတွင်းမှ စုံစမ်းသိရှိရသည်။

“ဆိုင်မှာတော့ လတ်တလော ပစ္စည်းမရှိပါဘူး” ဟု ရန်ကုန်မြို့၏ နာမည်ကျော် မီးလင်းရွှေ ရောင်းဝယ်ရေး ဆိုင်မှ အရောင်းဝန်ထမ်းက ပြော သည်။

အလားတူ ဒေါ်လာစျေးနှုန်းမှာလည်း အမေရိကန်တစ်ဒေါ်လာလျှင် ၄၅၀၀ မှ ၅၀၀၀ ကျပ်အကြား စျေးပေါက်နေပြီး ရောင်းသူထက် ဝယ်သူသာ ပိုများကြောင်း၊ လက်ဝယ်ရှိသူများကလည်း ထုတ်မရောင်းကြသဖြင့် အဝယ်သာများ ပြားကြောင်း သိရှိရသည်။

“မနေ့ညကတည်းက တစ်ဒေါ်လာ ၄၀၀၀ စျေးတန်းရောက်သွားတာပါ။ အခြေ အနေကတော့ တက်ဖို့ပါပဲ။ အကျတော့ မရှိဘူး” ဟု ရန်ကုန်ဒေါ်လာဝယ်ရောင်းတစ်ဦးက ဆိုသည်။

ယနေ့ နံနက်ပိုင်း စျေးကွက်ဖွင့်ချိန်တွင် အမေရိကန်တစ်ဒေါ်လာ ၄၁၀၀ ကျပ်ဝန်းကျင်၊ ရွှေစျေးမှာ အခေါက်ရွှေတစ်ကျပ်သား ၃၂ သိန်းကျော်ဖြင့် စျေးဖွင့်ခဲ့ခြင်းဖြစ်ကြောင်း သိရှိရသည်။ khit thit

မကွေးတိုင်း၊ ဂန့်ဂေါမြို့နယ်၊ မြစ်သာဆည် ဘုရားကုန်းမှ EPC ရုံးဘက် ကင်းလှည့်လာတဲ့ စစ်ကောင်စီတပ်သား ၃ ယောက် ဩဂုတ် ၂၉ ရက် မနက် ၁၀ လောက်မှာ ပစ်သတ်ခံခဲ့ရတယ်လို့ သိရပါတယ်။   

အဆိုပါပစ်ခတ်မှုကို CDF-KKG တပ်ရင်း ၅၊ YDF တပ်ရင်း၁၄၊ ထီးလင်းမြောက်ပိုင်း PDF တပ်ခွဲ ၇ (တပ်ပေါင်းစု) တို့က နှစ်ရက်ကြာ ကင်းပုန်းဝပ်ပြီး သုတ်သင်ရှင်းလင်းခဲ့တာလို့ CDF-KKG အဖွဲ့က ထုတ်ပြန်ထားပါတယ်။

လက်နက်အပြည့်အစုံပါတဲ့ အရပ်ဝတ် စစ်ကောင်စီတပ်ဖွဲ့ဝင် ၃ ယောက်ဟာ EPC ရုံးအတွင်းကို ဆိုင်ကယ်နှစ်စီးနဲ့ ကင်းလှည့်ရာမှ ရုံးပေါက်ဝမှာ ပစ်ခတ်ရှင်းလင်းခဲ့ပြီး လက်နက်သွားကောက်စဥ် စစ်ကူကားကြောင့် ပြန်လည်ဆုတ်ခွာခဲ့ရကာ CDF-KKG ရဲဘော်တွေ ထိခိုက်ဒဏ်ရာရသူ မရှိဘူးလို့ ဆိုပါတယ်။

အခုတိုက်ခိုက်မှုဟာ မြစ်သာဆည်အနီးက ရိပ်သာကုန်းမှာ ကျဆုံးသွားတဲ့ CDF-KKG ရဲဘော်တွေအတွက် ပြန်လက်စားချေတာလို့ ထုတ်ပြန်ချက်မှာ ဖော်ပြထားပါတယ်။

စစ်ကောင်စီတပ်ဟာ မေ ၂၆ ရက်ကစတင်ကာ ဂန့်ဂေါ်မြို့နယ်ကို စစ်ကြောင်းထိုးလာတာဖြစ်ပြီး ဂန့်ဂေါ PDF တပ်ဖွဲ့ဝင်တွေရှိရာ မြစ်သာဆည်နားမှာကို ကုန်းကြောင်း၊ လေကြောင်းတွေနဲ့ တိုက်ခိုက်ခဲ့တာကြောင့် ပြည်သူ့ကာကွယ်ရေးတပ်က တပ်ဖွဲ့ဝင် ၇ ယောက် သေဆုံးခဲ့တယ်လို့ ဆိုပါတယ်။  

ဇွန် ၁၉ ရက်မှာတော့ မြစ်သာဆည်က ထွက်လာတဲ့ စစ်ကြောင်းကို  PDF-ဂန့်ဂေါ (တောင်ပိုင်း) နဲ့ ပူးပေါင်းအဖွဲ့တွေက တန်ပြန်တိုက်ခိုက်ခဲ့သလို ဇွန် ၁၈ ရက်က စစ်ကြောင်းတခုကိုလည်း PDF-ဂန့်ဂေါ (၇၀၁) တပ်ရင်း (YRPA) က မိုင်းခွဲ တိုက်ခိုက်ခဲ့တာကြောင့် စစ်သား ၅ ယောက် သေဆုံးခဲ့တယ်လို့ သိရပါတယ်။ DVB

မကွေးတိုင်း၊ ဂန့်ဂေါမြို့အတွင်း ထိုးစစ်ဆင်လာသော စစ်ကောင်စီတပ်များကို HYPER UAV FORCE အဖွဲ့က သြဂုတ်လ ၁၉ ရက်နေ့မှ သြဂုတ် ၂၉ ရက်အထိ ၁၁ ရက်ကြာ ကင်းထောက်ခြင်း၊ ဗုံးကြဲခြင်းများ လုပ်ဆောင်ခဲ့ကြောင်း သိရသည်။

အဆိုပါ ၁၁ ရက်ကြာ Drone ဖြင့် တိုက်ခိုက်မှုကြောင့် စစ်ကောင်စီတပ်သား သုံးဦးသေဆုံးပြီး ခုနစ်ဦးအပြင်းအထန်ဒဏ်ရာရရှိခဲ့ကြောင်း HYPER UAV FORCE အဖွဲ့မှ ပြန်ကြားရေးတာဝန်ခံက မဇ္ဈိမကို ပြောသည်။

သြဂုတ်လ ၁၉ ရက်နေ့တွင် ဂန့်ဂေါမြို့နယ်၊ တောင်ခင်ရမ်းမှ ထွက်လာသော စစ်ကောင်စီတပ်သား အင်အား ၁၅၀ခန့်သည် နေ့လယ်၂ နာရီအချိန်တွင် တောင်ခင်ရမ်းရဲစခန်းမှ ၁၂၀မမ လက်နက်ကြီးဖြင့် ခြောက်ချက် ပစ်ကူပေးပြီး ထိုးစစ်ဆင်လာချိန်တွင် HYPER UAV FORCE မှ ဗုံးကြဲတိုက်ခိုက်မှုကြောင့် စစ်ကောင်စီဘက်မှ နှစ်ဦးထိမှန် လဲကျခဲ့ပြီး တစ်ဦးသေဆုံးခဲ့ကြောင်း သိရသည်။

ထို့အပြင် တောင်ခင်ရမ်းရဲစခန်း၏ ၁၂၀ မမ လက်နက်ကြီးအား ပစ်ကူပေးယန္တရား မလည်ပတ်စေရန် Droneဖြင့် ဗုံးကြဲတိုက်ခိုက်ခဲ့ရာ လက်နက်ကြီး ထိခိုက်ပျက်စီးခဲ့ပြီး လက်နက်ကြီးပစ်ခတ်သူ သုံးဦးထိခိုက်ဒဏ်ရာရရှိကာ၂ နာရီခွဲကြာ ပစ်ခတ်မှုရပ်တန့်သွားခဲ့ပြီး ၄ နာရီခွဲအချိန်တွင် နှမ်းခါးရွာထဲသို့ စစ်ကောင်စီတပ်များ ဝင်သွားကာ ၁၂၀ မမ ဖြင့် နှစ်ချက်ဖြင့် ပြန်လည်ပစ်ခတ်ခဲ့ကြောင်း သိရသည်။

သြဂုတ်လ ၂၀ ရက်မှ ၂၅ ရက် အတွင်းတွင် HYPER UAV FORCE မှ ဗုံးကြဲတိုက်ခိုက်မှုမပြုလုပ်ဘဲ စစ်ကောင်စီတပ်များ၏ လှုပ်ရှားမှုများကို ကင်းထောက်ခဲ့ကြောင်း HYPER UAV FORCE မှ ရဲဘော်များက ဆိုသည်။

ထို့နောက် ထယ်လှော်ကျေးရွာအနီး၌ သြဂုတ်လ ၂၆ ရက်နေ့က စစ်ကောင်စီတပ်ကို HYPER UAV FORCE မှ ဒရုန်းဖြင့် နှစ်ကြိမ် ဗုံးကြဲတိုက်ခိုက်ရာ ဒုတိယအကြိမ်တွင် စစ်ကောင်စီတပ်၏ Jammer ထိပြီး HYPER UAV FORCE ၏ ကာလတန်ဖိုး သိန်း ၅၀ တန် ဒရုန်းတစ်စီး ဆုံးရှုံးခဲ့ကြောင်း သိရသည်။

သြဂုတ်လ ၂၇ ရက်နေ့တွင် စစ်ကောင်စီတပ်ကို HYPER UAV FORCE မှ နှစ်ကြိမ် ဗုံးကြဲတိုက်ခိုက်ခဲ့ပြီး သြဂုတ်လ ၂၈ ရက်နေ့တွင် ကင်းထောက်ခြင်းများ ပြုလုပ်ခဲ့ကြောင်း HYPER UAV FORCE မှ ရဲဘော်များထံက သိရသည်။

သြဂုတ်လ ၂၉ ရက်နေ့တွင် ကျော်ရွာမှထွက်လာသော စစ်ကောင်စီတပ် စစ်ကြောင်းကို ထပ်မံဗုံးကြဲတိုက်ခိုက်ရာ စစ်ကောင်စီတပ်သားများ၏ ဦးခေါင်းပေါ်တည့်မတ်စွာကျပြီး နှစ်ဦးသေဆုံးကြောင်း HYPER UAV FORCE အဖွဲ့ တာဝန်ရှိသူက ဆိုသည်။

ထိုသို့ စစ်ကြောင်းထိုးလာသော စစ်ကောင်စီ စစ်ကြောင်းသည် ဂန့်ဂေါမြို့နယ်မြောက်ပိုင်းရှိ ပြည်သူပိုင်ပစ္စည်းများနှင့် လူနေအိမ် ၇၉ လုံးကို မီးရှို့ ဖျက်ဆီးသွားခဲ့ကြောင်း ပြည်သူ့အုပ်ချုပ်ရေးအဖွဲ့(ဂန့်ဂေါမြို့နယ်) က ဩဂုတ်လ ၂၉ရက်နေ့တွင် ထုတ်ပြန်ထားသေးသည်။

နောက်ဆုံးသိရှိရသော သတင်းများအရ မီးရှို့ဖျက်ဆီးမှုကျူးလွန်ခဲ့သော စစ်ကောင်စီ စစ်ကြောင်းမှာ ဂန့်ဂေါမြို့ရှိ ခလရ (၅၀) တပ်ထဲသို့ ရောက်ရှိသွားပြီဖြစ်ကြောင်း HYPER UAV FORCE အဖွဲ့ထံက သိရသည်။

ဂန့်ဂေါမြို့အတွင်းရှိ စစ်ကောင်စီ အခြေစိုက်တပ်ရင်းတစ်ခုဖြစ်သော ခလရ (၅၀) တပ် နှင့် နယ်မြေရှင်းလင်းရေးထွက်လာသော စစ်ကောင်စီ စစ်ကြောင်းတို့ကို HYPER UAV FORCE မှ ဇွန်လ အတွင်း Drone ဖြင့် အကြိမ်ရေ ၃၀ တိုက်ခိုက်ခဲ့သေးသည်။

အဆိုပါ ဇွန်လအတွင်း Drone mission ထဲတွင် စစ်ကောင်စီတပ်သား လေးဦးသေဆုံးပြီး ကိုးဦးခန့် ဒဏ်ရာရရှိခဲ့သည်။

ယခုကဲ့သို့ Drone Mission များကို ကောင်းမွန်စွာ လုပ်ဆောင်နိုင်ရန်နှင့် HYPER UAV FORCE တပ်ဖွဲ့အတွက် လိုအပ်သော လက်နက်ရိက္ခာများကို ဖြည့်တင်းနိုင်ရန် အများပြည်သူမှ တတ်နိုင်သည့်ဘက်မှ ပါဝင်ကူညီလှူဒါန်းကြရန်နှင့် ပါဝင်ကူညီလှူဒါန်းနိုင်ရန်အတွက် အသေးစိတ်အချက်လက်များကို HYPER UAV FORCE ၏ Page Messenger တွင် မေးမြန်းနိုင်ကြောင်းလည်း HYPER UAV FORCE အဖွဲ့က အသိပေးထားသည်။

HYPER UAV FORCE သည် ဖက်ဒရယ် ပြည်ထောင်စု ပေါ်ပေါက်ရေး၊ စစ်အာဏာရှင် ပြုတ်ကျရေး အတွက် တိုက်ခိုက်နေသော NUG အစိုးရ ကာကွယ်ရေးဝန်ကြီးဌာနက ဖွဲ့စည်းထားသော အနောက်ပိုင်းတိုင်း စစ်ဌာနချုပ် တပ်မဟာ (၇)၊ တပ်ရင်း(၇၀၆) PDF ဒရုန်းတပ်ရင်း တစ်ခု ဖြစ်သည်။ mizzima

ရှမ်းပြည်မြောက်ပိုင်း၊ လားရှိုးခရိုင်၊လောက်ကိုင်မြို့တွင် ဩဂုတ်လ ၂၉ နှင့် ၃၀ ရက်နေ့များတွင် ကြံ့ဖွတ် အမတ်ဟောင်း ဦးခင်မောင်လွင်မှ ကိုးကန့်ပြည်သူ့စစ်တပ်ဖွဲ့ဝင်များ၊ စစ်ကောင်စီလက်ပါးစေ ရဲများနှင့် ပူးပေါင်းကာ ဈေးဟောင်းအနီးရှိ နေအိမ်များကို အင်အားသုံး ဘူဒိုဇာနှင့် ထိုး၍ ဖြိုခွင်းကာ မြေအပိုင်သိမ်းယူရန် ကြိုးပမ်းနေသည့်အတွက် လူဦးရေ ၈၀ ကျော် နေစရာမဲ့ ဖြစ်သွားကြောင်း ဒေသခံများထံမှ သိရှိရသည်။

“သြဂုတ်လ ၂၉ နဲ့ ၃၀ ရက်တွေမှာ ကြံဖွတ်အမတ်ဟောင်း ဦးခင်မောင်လွင်နဲ့ ကိုးကန့်အဖွဲ့တွေ ပေါင်းပြီး ပြည်သူတွေ နေထိုင်တဲ့ နေအိမ်တွေကို အင်အားသုံးဖြိုခွင်းပြီး အပိုင်သိမ်းယူဘို့ ကြိုးစားခဲ့တာပါ။ အိမ်ခြေကနည်းတယ်၊ ဒါပေမယ့် လက်ရှိအခြေအနေမှာ လူဦးရေ ၈၀ ကျော်နေစရာမဲ့ ဖြစ်ပါတယ်၊ အိမ်ကတော့ ၅ ထပ်အိမ် သုံးအိမ်ပါ” ဟု ဒေသခံတစ်ဦးက ရန်ကုန်ခေတ်သစ်သို့ ပြောသည်။

အဆိုပါ မြေကွက်များသည် ၂၀၁၈ /၂၀၁၉ ခုနှစ်ဝန်းကျင်ကတည်းက ကြံ့ခိုင်ရေးပါတီဝင် အမတ်ဟောင်း ဦးခင်မောင်လွင်နှင့် တရုတ်လူမျိုးများ ပူးပေါင်း သိမ်းယူရန်ကြိုးစားခဲ့ဖူးပြီး နေပြည်တော်ကောင်စီ သက်ဆိုင်ရာအဖွဲ့သို့ တင်ပြကာ ညှိနှိုင်း၍ ပြီးပြတ်ခဲ့ပြီး ဖြစ်ကြောင်း အဆိုပါနေရာ အငြင်းပွားမှုကိစ္စနှင့် ပတ်သက်ပြီး ကူညီဆောင်ရွက်နေသူတစ်ဦးက ရန်ကုန်ခေတ်သစ်သို့ ရှင်းပြသည်။

လက်ရှိအချိန်တွင်မူ ကြံ့ခိုင်ရေးအမတ်ဟောင်း ဦးခင်မောင်လွင်နှင့် ပူးပေါင်းအဖွဲ့က သက်ဆိုင်ရာ တရားရုံး၏ အမိန့် သို့မဟုတ် ဒီဂရီ ချမှတ်ခြင်း မရှိဘဲ တရားမဲ့ လုပ်ဆောင်ခြင်းဖြစ်ကာ ရဲတပ်ဖွဲ့ပါ လိုက်ပါ လုပ်ဆောင်သည်ကို မြင်တွေ့ရကြောင်း၊ မြန်မာနိုင်ငံတွင် တရုတ်လူမျိုးများနှင့် ပူးပေါင်းကာ တိုင်းရင်းသားများကို မတရား အနိုင်ကျင့်နေခြင်းဖြစ်ကြောင်း အဆိုပါ မြေနေရာနှင့် ပတ်သက်၍ ကူညီဆောင်ရွက်ပေးသူ တစ်ဦးက ဆက်ပြောသည်။

အဆိုပါ မြေကွက်များမှာ ကိုးကန့်ကိုယ်ပိုင်အုပ်ချုပ်ခွင့်ရ ဒေသ၊ လောက်ကိုင်မြို့၊ အမှတ် ၂ ရပ်ကွက် ဈေးဟောင်းအနီးရှိ အိမ်ခန်းများဖြစ်ပြီး အဆိုပါ ငါးထပ်အောက်အဦး ၃ လုံးတွင် လူပေါင်း ၈၀ ခန့် နေထိုင်သည်။

ယခုလို လာရောက်ကာ နေအိမ်များကို ဖျက်ဆီးနေခြင်းမှာ ဖျက်ဆီးခွင့် စာရွက်စာတမ်း တစ်စုံတစ်ရာ မပါဘဲ အတင်းအဓမ္မလာရောက် ဖျက် ဆီးခြင်းဖြစ်ပြီး အရပ်ဝတ် ပြည်သူစစ်တပ်ဖွဲ့ဝင်များကပါ လာရောက် ခြိမ်းခြောက်နေခြင်းဖြစ်ကြောင်း ဒေသခံများထံမှ သိရှိရသည်။khit thit

စစ်ကိုင်းတိုင်း ရွှေဘို – မန္တလေး မြို့ရှောင်လမ်းမှာရှိတဲ့ စစ်ကောင်စီတပ်ဖွဲ့ စစ်ဆေးရေးဂိတ်ကို ဩဂုတ် ၃၀ ရက်နေ့ မနက် ၁၁ နာရီခွဲမှာ ဒေသကာကွယ်ရေးတပ်ဖွဲ့တွေက ဒရုန်းနဲ့ ဗုံးချတိုက်ခိုက်ခဲ့တယ်လို့ သိရပါတယ်။

ဗုံးချတိုက်ခိုက်မှုအတွင်း စစ်ဆေးရေးဂိတ်မှာရှိတဲ့ စစ်ကောင်စီတပ်ဖွဲ့ဝင် ၃ ဦး သေဆုံးသွားပြီး အနီးရှိ အပြစ်မဲ့ပြည်သူ ၂ ဦးလည်း ဒဏ်ရာရသွားခဲ့တယ်လို့ Black Wolf – PDF က ထုတ်ပြန်ထားပါတယ်။

“ဗုံးချတဲ့အချိန်မှာ ရန်သူရှိတဲ့နေရာအနီးက ပြည်သူ ၂ ယောက်လည်း အနည်းငယ် ထိသွားတယ်။ စိုးရိမ်ဒဏ်ရာမဟုတ်ဘူးလို့တော့ သိရပါတယ်။ ဂိတ်က ရန်သူ ၃ ကောင် သေဆုံးသွားပေမယ့် ပြည်သူကို မတော်တဆထိခိုက်သွားတာတော့ ‌စိတ်မကောင်းဖြစ်ရတယ်။ ‌ပြည်သူတွေအနေနဲ့လည်း စစ်ကောင်စီတပ်ဖွဲ့ရှိနေတဲ့ နေရာတွေနဲ့ ဝေးဝေးနေပေးကြပါလို့ မေတ္တာရပ်ခံချင်ပါတယ်” လို့ Black Wolf – PDF တာဝန်ရှိသူတဦးက ပြောပါတယ်။

အဲ့ဒီမြို့ရှောင်လမ်းစစ်ဆေးရေးဂိတ်မှာရှိတဲ့ စစ်ကောင်စီတပ်ဖွဲ့ဝင်တွေဟာ ဖြတ်သန်းသွားတဲ့ ပြည်သူတွေကို ဖမ်းဆီးခြိမ်းခြောက်ငွေတောင်းခံတာတွေ အမြဲပြုလုပ်လေ့ရှိကြောင်း အခိုင်အမာသိရှိရတဲ့အတွက် တိုက်ခိုက်ရတာလို့ ဒေသကာကွယ်ရေးအဖွဲ့က ဆိုပါတယ်။

အပြစ်မဲ့ပြည်သူ ၂ ဦးထိခိုက်မှုအတွက် အထူးပင်ဝမ်းနည်းမိကာ အဆိုပါ ပြည်သူနှစ်ဦးအား  တောင်းပန်အပ်ကြောင်း ထုတ်ပြန်ချက်မှာ ဖော်ပြထားပါတယ်။

အဲဒီတိုက်ခိုက်မှုကို ရွှေဘိုခရိုင် တပ်ရင်း ၅ မှ တပ်ခွဲ ၁ နဲ့ Black Wolf – PDF တို့ ပူးပေါင်း လုပ်ဆောင်ခဲ့တာလို့ သိရပါတယ်။

ပြီးခဲ့တဲ့ ဇူလိုင် ၃၀ ရက်နေ့ကလည်း ရွှေဘိုမြို့အဝင် တက္ကသိုလ်စစ်ဆေးရေးဂိတ်မှာရှိတဲ့ စစ်ကောင်စီတပ်ဖွဲ့ဝင်တွေကို ဒေသကာကွယ်ရေးတပ်ဖွဲ့များက ဒရုန်းနဲ့ ဗုံးချတိုက်ခိုက်ခဲ့တယ်လို့ သိရပါတယ်။ DVB