SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ချင်းပြည်နယ်အခြေစိုက် ချင်းတော်လှန်ရေးအဖွဲ့အစည်း တစ်ခုဖြစ်သည့် Zomi Federal Union (PDF Zoland) က တိုက်ခိုက်ရေးဒရုန်းကို တီထွင်အောင်မြင်ကြောင်း သြဂုတ်လ ၉ ရက်နေ့တွင် ၎င်းတို့၏ လူမှုကွန်ရက်စာမျက်နှာ၌ ထုတ်ပြန်ကြေညာသည်။

” အခုထုတ်ပြထားတဲ့ဒရုန်းက ကျွန်တော်တို့နည်းပညာအသင်းက ကိုယ်ပိုင်တီထွင်ထားတဲ့ တိုက်ခိုက်ရေးဒရုန်းပါ။ အလေးချိန် ၁၂ ကီလိုဂရမ်ကနေ ၁၅ ကီလိုဂရမ်သယ်နိုင်ပါတယ်။ ဘတ်ဂျက်အရရယ်၊ ဘက်ထရီပိုင်း အားနည်းချက်တစ်ခုကြောင့် ခုဒရုန်းက ကိုးမိုင်အထိ ထိန်းချုပ်လို့ရပါတယ်။ ကိုယ်ပစ်ချချင်တဲ့ ပစ်မှတ်နေရာကို Google ကနေ Target ရွေးပြီး အော်တိုပစ်ချရင်လည်းရတယ်။ ပြီးတော့ ကျွန်တော်တို့ Manual အနေနဲ့ ဒီအတိုင်းဒရုန်းကိုပျံခိုင်းပြီး ကိုယ်ပစ်ချချင်တဲ့နေရာကို ပစ်ချလို့လည်းရတယ်ဆိုတော့ နှစ်မျိုးသုံးလို့ရတယ် ” ဟု PDF Zoland မှ ပြန် ကြားရေးတာဝန်ခံက မဇ္ဈိမသို့ပြောသည်။

ကုန်ကျစရိတ်မှာ တီထွင်သည့်ဒရုန်းအမျိုးအစားအလိုက် ကွာခြားချက်ရှိပြီး 15 Kg သယ်ယူနိုင်သည့် ဒရုန်းမှာ ပုံမှန်အားဖြင့် ငွေကျပ် ၉,၀၀ ၀,၀၀၀ (သိန်း ၉၀) မှ ကျပ် ၁၀,၀၀၀,၀၀၀ (သိန်း၁၀၀ )ကြားကုန်ကျနိုင်သော်လည်း ကိုယ်ပိုင်နည်းပညာအသုံးပြုတီထွင်ထား၍ ပုံမှန်ဈေးနှုန်းထက် ငွေကျပ် ၂,၀၀၀,၀၀၀(ကျပ်သိန်း ၂၀ )ဝန်းကျင်သက်သာကြောင်း PDF Zoland မှ ရဲဘော်များကဆိုသည်။

ZFU/ PDF Zoland ၏ ဒရုန်းတပ်ရင်း Engineering & Innovation ဌာနမှ ကင်းထောက် Drone၊ တိုက်ခိုက်ရေး Drone နှင့် သယ်ယူပိုဆောင်းရေး Drone ဟူ၍ ဒရုန်းကို အမျိုးအစားသုံးမျိုးခွဲကာ တီထွင်ထားနိုင်ပြီး အခြားကာကွယ်ရေးတပ်ဖွဲ့များအတွက်ကိုပါ ကူညီတပ်ဆင်ထားပေးခြင်းမျိုး ရှိကြောင်းလည်း သိရသည်။

” အဓိက ဘတ်ဂျတ်ပေါ့။ ဘတ်ဂျက်လိုက်နိုင်ရင် လိုက်နိုင်သလို မိုင် ၁၀၀၊ မိုင် ၄၀၀၊ မိုင် ၅၀၀ အထိ ပျံသန်းနိုင်ပြီး ပြန်လှည့်လာနိုင်တဲ့ ဒရုန်းတွေတီထွင်ဖို့ နည်းပညာတွေ ကျွန်တော်တို့မှာရှိတယ်။ နည်းပညာရှိပေမယ့် ငွေကြေးမရှိသေးတော့ ခုလောလောဆယ်တော့ ကိုယ့်အခြေအနေနဲ့ ကိုက်ညီမယ့် တိုက်ခိုက်ရေးဒရုန်းအဆင့်လောက်ပဲ လုပ်နိုင်သေးတာပေါ့ ” ဟု PDF Zoland မှ ပြန်ကြားရေးတာဝန်ခံက ဆိုသည်။

PDF Zoland ၏ လက်ရှိ ရေးဆွဲထားသော ပရောဂျက်မှာ မိုင်ပေါင်းများစွာပျံသန်းနိုင်သော ဒရုန်းများတီထွင်ပြီး အာဏာသိမ်းစစ်ကောင်စီတပ်အား တိုက်စစ်ဆင် တိုက်ခိုက်နိုင်ရန်ဖြစ်ကြောင်း သိရသည်။

” အရေးကြီး စစ်ဆင်ရေးမျိုးဖြစ်တဲ့ ဥပမာ- နေပြည်တော်လိုနေရာမျိုး၊ စခန်းအကြီးကြီးတွေ တိုက်ခိုက်မယ့်နေရာမျိုးမှာ မိုင်အများကြီးပျံသန်းနိုင်တဲ့ Suicide Bomb တွေ၊ Suicide Drones လို့ခေါ်တဲ့ ဒရုန်းတွေအများကြီးကို ပစ်မှတ်နေရာတွေမှာ တစ်ခါတည်းပစ်လွတ်မယ်။ ဒါက ဘတ် ဂျက်ရှိတဲ့အခါ လုပ်မယ့် ပရောဂျက်ပါ ”ဟု အဆိုပါ PDF Zoland မှ ပြန်ကြားရေးတာဝန်ခံက မဇ္ဈိမကို ပြောသည်။

ထို့အပြင် အနာဂတ်တွင် ငွေကြေးအင်အားတောင့်တင်းခိုင်မာလျှင် ဒရုန်းနှင့်သက်ဆိုင်သည့် Frequency နှင့် Rader ဖြတ်သန်းနိုင်မည့် ဒရုန်းများကို နိုင်ငံတကာရှိကောလိပ်၊ တက္ကသိုလ်များမှ ကျောင်းသားများနှင့် ပညာရှင်များပူးပေါင်းကာ နည်းပညာများတိုးတက်စေရန်ပြုလုပ်ပြီး မိမိတို့နေရာဒေသနှင့် ကိုက်ညီမည့်ဒရုန်းများ ဆက်လက်တီထွင်သွားမည်ဖြစ်ကြောင်းလည်း ZFU/ PDF Zoland ၏ ဒရုန်းတပ်ရင်း Engineering & Innovation ဌာနထံက သိရသည်။ mizzima

ရန်ကုန်တိုင်း သာကေတမြို့နယ်တွင် ဆိုင်ကယ်ကယ်ရီသမား အယောင်ဆောင်ပြီး သတင်းထောက် လှမ်းနေသော ရဲတပ်ကြပ် အရှည်ကြီး ယနေ့ ပစ်ခတ်ခံရပြီး သေဆုံးသွားကြောင်း တော်လှန်ရေးအဖွဲ့များထံမှ သိရှိရသည်။

သာကေတ နယ်မြေစခန်းမှ ဆိုင်ကယ် ကယ်ရီ(Taxi) သမားအသွင်ယူထားသော ရဲတပ်ကြပ် အရှည်ကြီး ကို ရန်ကုန်မြေအောက်တော်လှန်ရေးအဖွဲ့ က သာကေတမြို့နယ် ၊ ၁၀တောင် ရပ်ကွက်၊ အဝိုင်းကြီးထိပ်၊ ၁၀၈ တောာင်စေတီတော်အနီး ဆုထူးပန် ဘုန်းကြီးကျောင်း အရှေ့၌ ယနေ့ နေ့လည်ပိုင်း အချိန် ပစ်ခတ်ခဲ့ခြင်းဖြစ်ကြောင်း သိရှိရသည်။

“ခေါင်းကိုချည်းပဲ ၃ ချက်ပစ်ခတ်ခဲ့ပါတယ်။ ဆိုင်ကယ်သမားအယောင်ဆောင်တဲ့ရဲတပ်ကြပ်ပါ” ဟု တော်လှန်ရေးအဖွဲ့မှ တာဝန်ရှိသူတစ်ဦးကပြောသည်။

လက်ရှိတွင် စစ်တပ်နှင့်ရဲတပ်ဖွဲ့က သာကေတမြို့နယ်တစ်ခုလုံးကို ပိတ်ဆို့ရှာဖွေမှုများ လုပ်ဆောင်နေကြောင်း သိရှိရသည်။

အလားတူ မန္တလေးတိုင်း၊ ငါန်းဇွန်မြို့နယ် မိုးတောင်ကျေးရွာ စစ်တပ် သတင်းပေးဟု သတ်မှတ် ခံထား ရသူ ဘအေးကို ယနေ့နံနက် ၇ နာရီ ၃၀ မိနစ်ဝန်းကျင်က နောင်ရိုး အထူးပြောက်ကျားတပ် -NYSGF က ရှင်းလင်းခဲ့ကြောင်း သတင်းထုတ်ပြန်သည်။

” နောင်ရိုးအထူးပြောက်ကျားတပ် -NYSGF က မိုးတောင်ကျေးရွာ လက်ဖက်ရည် ဆိုင်ထဲတွင် သတင်း ပေး ဒလန် ဘအေး အား ငရုပ်သီး ၁ တောင့်ဖြင့် အကြွေးပြန်တောင်းခဲ့သည်” ဟု NYSGF က ယနေ့ထုတ်ပြန်ထားပြီး စစ်တပ်သတင်းပေး ဘအေးသည် မိုးတောင်ကျေးရွာ မြောက်ဘက်ရှိ ဆေးရိုးစက်မှနေ၍ PDF များ၏ အသွားအလာကိုစောင့်ကြည့် သတင်းပေးနေသူတစ်ဦးဖြစ်ကြောင်း၊ ဩဂုတ်လ ၆ ရက်နေ့ညတွင် PDF များမိုင်းဆင်နေကြောင်းကို ဘအေးသည် စစ်ကောင်စီတပ်ထံ ဖုန်းဆက်သတင်းပေးမှုကြောင့် ချက်ချင်းရောက်လာပြီး ပစ်ခက်ရှာဖွေမှုများပြုလုပ်ခဲ့ရာ PDF ရဲဘော်များမှာ အသက်လု​ရှောင်တိမ်းခဲ့ရပြီး ပစ္စည်းများ ဆုံးရှုံးပျက်စီးစေခဲ့သည်ဟု ထုတ်ပြန်ချက်တွင် ဖော်ပြထား သည်။ khit thit

ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်က စတင်ပြီး အကြမ်းဖက်စစ်အုပ်စုက မတရား အာဏာသိမ်းယူထားတဲ့ ကာလဟာ ၅၅၅ ရက် ရှိလာခဲ့ပြီဖြစ်ကာ အောင်ပွဲဆီ မရောက်မချင်း ပိုပြီးတော့ သွေးစည်းညီညွတ်ကြဖို့၊ ဇွဲရှိကြဖို့၊ အခက်အခဲတွေ၊ အကျပ်အတည်းတွေကို ခံနိုင်ရည်ရှိကြဖို့၊ သတ္တိစိတ်ကို ပိုပြီးတော့ မွေးမြူကြဖို့ ဒဂုံတက္ကသိုလ် ကျောင်းသားများသမဂ္ဂက ပြည်သူတွေကို တိုက်တွန်းလိုက်ပါတယ်။

စစ်အုပ်စုက ပြောင်ပြောင်တင်းတင်း တိုင်းပြည်အာဏာသိမ်းယူခဲ့ပြီး နောက်ပိုင်းမှာ နိုင်ငံတဝန်း အကြမ်းဖက်သတ်ဖြတ်မှုတွေ၊ ရာဇဝတ်မှုတွေကို အချိန်ပြည့်ကျူးလွန်နေပြီး လူထုတရပ်လုံးကလည်း ၅၅၅ ရက် ပြည့်ခဲ့ပြီဖြစ်တဲ့ လတ်တလောအချိန်အထိ တော်လှန်ရေးနည်းနာပေါင်းစုံနဲ့ မတရားမှုကို ဆန့်ကျင်တွန်းလှန် တိုက်ပွဲဝင်နေကြတာပါ။

ဒါကြောင့်မို့ ဒီကနေ့အချိန်အထိ ခံယူချက်မပျောက်ပျက်ဘဲ ဆက်လက်တိုက်ပွဲဝင်နေဆဲ ရဟန်းရှင်လူ ကျောင်းသားပြည်သူ အပေါင်းကိုလည်း ဒဂုံတက္ကသိုလ် ကျောင်းသားများသမဂ္ဂက ဂုဏ်ပြုဦးညွှတ်ပြီး တော်လှန်ရေးခရီး လမ်းခုလတ်မှာ အသက်ပေးခဲ့၊ ဘဝပေးခဲ့ကြရတဲ့ သူရဲ ကောင်း အပေါင်းကိုလည်း လေးမြတ်စွာ အလေးပြုလိုက်တယ်လို့ ထုတ်ပြန်ထားပါတယ်။

“လွတ်လပ်ခွင့်ကို ကျွန်ုပ်တို့၏လက်ဖြင့်သာ ကိုယ်တိုင်ရယူရမည် ဖြစ်သည်။ တရားမျှတမှုကို ကျွန်ုပ်တို့ကိုယ်တိုင် ဆောင်ကြဉ်းရမည်သာ ဖြစ် သည်။ ခက်ခဲရှည်လျားသော တော်လှန်ရေးခရီးကြမ်းကို ကျွန်ုပ်တို့ အတူတကွ ဖြတ်ကျော်ပြီးအခါတွင် နိုင်ငံတော်သစ်တရပ် မွေးဖွားခြင်းဆိုသည့် သမိုင်းစာမျက်နှာကို အတူတကွ ဖွင့်လှစ်ရမည်သာ ဖြစ်သည်။”

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ ဒေသခံ ပြည်သူ့ကာ ကွယ်ရေးတပ်တွေ၊ တိုင်းရင်းသား လက်နက်ကိုင် တပ်တွေကြား တိုက်ပွဲတွေလည်း ပြင်းထန်နေတာပါ။

NUG အစိုးရ ကာကွယ်ရေးဝန်ကြီးဌာနကတော့ ပြည်သူတွေနဲ့ ပြည်သူ့ကာကွယ်ရေးတပ်ဖွဲ့တွေကို မတရားဖိနှိပ် တိုက်ခိုက်ဖြိုခွင်းနေတဲ့ စစ်ကောင်စီတပ်တွေရဲ့ စစ်ဘက်လေယာဉ်တွေကို ပစ်ချနိုင်ရေးအတွက် Project Dragonfly က ရရှိတဲ့ ရန်ပုံငွေတွေကို စစ်ရေးမဟာဗျူဟာတွေနဲ့အညီ အသုံးချနေပြီး ကနဦး ပစ္စည်းတချို့ကတော့ စတင်တာဝန်ထမ်းဆောင်နေပြီ ဖြစ်တယ်လို့ နောက်ဆုံး ထုတ်ပြန်ထားပါတယ်။

မြန်မာနိုင်ငံမှာတော့ အာဏာသိမ်း ၁ နှစ်ခွဲအကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၁၇၁ ယောက်နဲ့ ဖမ်းဆီးထိန်းသိမ်းခံရသူပေါင်း ၁၅,၀၇၈ ယောက်ထိ ရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။ DVB

စစ်ကောင်စီတပ် စစ်ကြောင်းထိုးကာ မီးရှို့ဖျက်ဆီးမှုကြောင့် ထွက်ပြေးတိမ်းရှောင်နေရသည့် ဒီပဲယင်းမြို့နယ် ကိုင်းကန်ကျေးရွာရှိ ပြည်သူများ အကူအညီလိုအပ်နေကြောင်း ဒီပဲယင်းပြည်သူ့ကာကွယ်ရေးတပ်ဖွဲ့ထံမှ သိရသည်။

စစ်ကိုင်းတိုင်း ဒီပဲယင်းမြို့နယ် ကိုင်းကန်ကျေးရွာကို သြဂုတ်လ ၆ ရက်နေ့တွင် စစ်ကောင်စီတပ်က လေကြောင်းမှ တိုက်ခိုက်ပြီးနောက် စစ်ကောင်စီတပ်ဖွဲ့ဝင်များ ချထားခဲ့ကာ ကျေးရွာအတွင်း ဝင်ရောက်စီးနင်းမီးရှိ့ခဲ့ခြင်း ဖြစ်သည်။

“ ၆ ရက်နေ့မှာ ကိုင်းကန်ကျေးရွာကို လေကြောင်းကနေ လာတိုက်ခိုက်ပြီး စကစ တပ်တွေ ချသွားတာဖြစ်လို့ ပြည်သူတွေအနေနဲ့လည်း ဘာပစ္စည်းမှ ယူချိန် မရခဲ့ဘဲ အဝတ်တစ်ထည် ကိုယ်တစ်ခု ထွက်ပြေးခဲ့ကြရတာပါ။ အိမ်ခြေ ၁၄၅ အိမ် နဲ့ ဆိုင်ကယ်အစီးပေါင်း ရာနဲ့ချီပြီး မီးရှို့ဖျက်ဆီးခံခဲ့ရပါတယ်” ဟု ရွှေဘိုခရိုင် တပ်ရင်း (၁၂) ဒီပဲယင်းပြည်သူ့ကာကွယ်ရေးတပ်ဖွဲ့ တာဝန်ရှိသူတစ်ဦးက မဇ္စျ်ိမကို ပြောသည်။

စစ်ကောင်စီတပ်က ကိုင်းကန် ကျေးရွာအတွင်း စီးနင်းဝင်ရောက်ကာ မီးရှိ့ဖျက်ဆီးမှုကြောင့် ဒေသခံပြည်သူအများအပြား ထွက်ပြေးတိမ်းရှောင်ခဲ့ရပြီး ပြည်သူ ၇၀၀ ခန့် အိုးမဲ့ အိမ်မဲ့ ဖြစ်ခဲ့ရကြောင်း သိရသည်။

ဒီပဲယင်းမြို့နယ်နှင့် အနီးတစ်ဝ်ိုက် ကျေးရွာများကို စစ်ကောင်စီတပ်က စစ်ကြောင်းထိုးခြင်းများ ပြုလုပ်နေသည်မှာ တစ်လကျော် ကြာမြင့်နေပြီဖြစ်ပြီး လက်ရှိမြေပြင်တွင်လည်း စစ်ကြောင်းသုံးကြောင်းဖြင့် ထိုးစစ်ဆင်နေဆဲဖြစ်ကြောင်း ဒီပဲယင်းပြည်သူ့ကာကွယ်ရေးတပ် တာဝန်ရှိသူက ဆိုသည်။

“ဒီက ပြည်သူတွေက ပြေးပေါက်မရှိသလိုကို ဖြစ်နေတာဗျ၊ မိုးတွေရွာထားတော့ လမ်းတွေကလည်း ပျက်စီးနေတယ်၊ သက်ကြီးရွယ်အိုတွေ ကလေးတွေ နားမကျန်းသူတွေက ပိုဒုက္ခရောက်တယ်၊ ပြီးတော့ အခုက စိုက်ပျိုးရေးကာလဖြစ်တော့ စိုက်ပျိုးရေးလုပ်ငန်းတွေ လုပ်လို့ မရဖြစ်ကုန်ကြတယ်” ဟု ၎င်းက ဆက်ပြောသည်။

ထို့အပြင် မိုးရာသီကာလဖြစ်ခြင်းကြောင့် စစ်ဘေးတိမ်းရှောင်နေရသည့် ပြည်သူများအတွက် အဝတ်အစား၊ အမိုးအကာ၊ အသုံးအဆောင်၊ ဆေးဝါးနှင့် ရိက္ခာများ လိုအပ်မှုများ ရှိနေကြောင်း သိရသည်။

ယင်းသို့ စစ်ဘေးရှောင်ပြည်သူများ လိုအပ်သည့် အခက်အခဲများကို ဖြည့်ဆည်းပေးန်ိုင်ရန်နှင့် ပြန်လည်ထူထောင်ရေးလုပ်ငန်းများ လုပ်ဆောင်နိုင်ရန် ဒီပဲယင်းပြည်သူ့ကာကွယ်ရေးတပ်ဖွဲ့က ပြည်သူများထံ အကူအညီတောင်းခံထားသည်။

“ဒီကပြည်သူတွေကတော့ စိတ်ဓာတ်ပျက်စီးမသွားကြပါဘူး၊ စစ်အာဏာရှင်စနစ်ဆိုးကြောင့်ဆိုတာ နားလည်ကြတယ်။ ဒီတိုက်ပွဲအောင် အောင် တိုက်ကြမယ်ဆိုတဲ့ စိတ်ပိုင်းဖြတ်မှု ရှိကြတယ်။ အဲလို စိတ်ဓာတ်တွေအရ ခံနိုင်ရည် ရှိကြပေမယ့် ကလေးငယ်တွေ သက်ကြီးရွယ်အိုတွေ၊ နာမကျန်းသူတွေအတွက်ကျတော့ သူတို့ခံနိုင်ရည်နဲ့ မမျှတဲ့ ဒုက္ခတွေ ခံစားနေကြရတယ်။ တော်လှန်ရေးကာလဖြစ်လို့ တစ်ဦးတစ်ယောက်ချင်းရဲ့ ဒုက္ခရယ်လို့ မရှိပါဘူး။ သူ့ဒုက္ခဟာ ကိုယ့်ဒုက္ခ ဆိုတဲ့စိတ်နဲ့ ကူညီပေးကြဖို့ မေတ္တာရပ်ခံချင်ပါတယ်။” ဟု ဒီပဲယင်းပြည်သူ့ကာကွယ်ရေးတပ်ဖွဲ့ တာဝန်ရှိသူက ဆက်ပြောသည်။

ရရှိလာသည့် အလှူငွေများကို စစ်ကောင်စီတပ် မီးရှို့ဖျက်ဆီးမှုကြောင့် ရွာအိမ်ခြေ တစ်ဝက်ကျော် မီးလောင်ကျွမ်းခဲ့သည့် ကိုင်းကန် ကျေးရွာပြန်လည်ထူထောင်ရေး ကော်မတီထံ အပ်နှံကာ လှူဒါန်းမှုများကို ပြုလုပ်သွားမည်ဖြစ်ကြောင်း သိရသည်။

ယနေ့ သြဂုတ်လ ၁၀ ရက်နေ့ နံနက်ပ်ိုင်းတွင်လည်း စစ်ကောင်စီတပ်က စစ်ကြောင်း နှစ်ကြောင်း ဖြင့် ဒီပဲယင်းမြို့နယ်အတွင်းရှိ ကျေးရွာ ခုနစ်ရွာကို စစ်ကြောင်းထိုးကာ မီးရှို့ဖျက်ဆီးခြင်းများ ပြုလုပ်နေခြင်းကြောင့် ဒေသခံ ပြည်သူရာချီ ဘေးလွတ်ရာကို ထွက်ပြေးတိမ်းရှောင်နေရကြောင်း ဒေသခံများထံမှ သိရသည်။ mizzima

တနင်္သာရီတိုင်း ကော့သောင်းမြို့တွင် သြဂုတ်လ ၈ ရက်နေ့ ည ၇ နာရီ ၃၀ မိနစ် အချိန် အလုပ်မှ ပြန်လာသည့် နက်သီရီရွာသား ကိုလွင်ဇော်စိုးနှင့် အမည်မသိ ပြည်သူ ၁ ဦးကို အကြမ်းဖက် စစ်တပ်က ပစ်သတ်ခဲ့ကြောင်း နယ်မြေခံ သတင်းရင်းမြစ်များထံမှ သိရသည်။

အကြမ်းဖက် စစ်တပ်က ပစ်သတ်ခဲ့သော ကိုလွင်ဇော်စိုးနှင့် အမည်မသိ ပြည်သူ ၁ ဦးသည် အလုပ်မှ ဆိုင်ကယ်ဖြင့် ပြန်လာစဥ် ပစ်ခတ် ဖမ်း ဆီးခံ ရခြင်းဖြစ်ကြောင်း၊ ကိုလွင်ဇော်စိုးသည် သွေးထွက်လွန်ကာ သေဆုံးခဲ့ကြောင်း သိရသည်။

” အလုပ်ပြန် တဲ့ အချိန်မှာ ပစ်ခံရပြီး ဆိုင်ကယ် လဲသွားတဲ့အချိန် စစ်ခွေးတွေ ဖမ်းခေါ် သွားတယ်။ ကိုလွင်ဇော်စိုးကတော့ ကျည်ထိဒဏ်ရာနဲ့ သွေးထွက်လွန် ပြီး ဆုံးသွားတယ်။ အမည်မသိသူ တစ်ဦးကတော့ ရုပ်အလောင်းလည်း ပြန်မရ ဘာသတင်းမှကို မကြားရသေးဘူး” ဟု ဒေ သခံ ပြည်သူတစ်ဦးကပြောဆိုသည်။

သြဂုတ်လ ၉ ရက်နေ့ မွန်းလွဲပိုင်းတွင် သေဆုံးသူ ကိုလွင်ဇော်စိုးကို မိသားစုက မီးသင်္ဂြိုလ်ခဲ့ကာ ၎င်းနှင့်အတူ ပစ်သတ်ခံရသည့် အမည်မသိ ပြည်သူ ၁ ဦး၏ ရုပ်အလောင်းနှင့် နောက်ဆက်တွဲ သတင်းများကို ထပ်မံ မသိရသေးကြောင်း နယ်မြေခံ သတင်းရင်းမြစ်များက ပြောဆိုသည်။

အလားတူ ချင်းပြည်နယ် ဟားခါးမြို့ ဝန်ကြီးအိမ်ယာနှင့် ခရိုင်ရုံးအနီး သြဂုတ် လ ၁၀ ရက်နေ့ နံနက် ၉ နာရီခန့်တွင် တိုက်ပွဲဖြစ်ပွားပြီး အကြမ်း ဖက် စစ်တပ် က နှီယာလောန်‌ကျေးရွာရှိ လူနေအိမ်များကို လက်နက်ကြီးဖြင့် ပစ်ခတ်ခဲ့ ကြောင်း၊ လက်နက်ကြီး ထိမှန်၍ အသက် ၅၅ နှစ်အရွယ် အမျိုးသမီး တစ်ဦး သေဆုံးခဲ့ကြောင်း ဒေသခံ ပြည်သူများထံမှ သိရသည်။

အကြမ်းဖက် စစ်တပ် ပစ်ခတ်သော လက်နက်ကြီးကျည်သည် ကျေးရွာ အတွင်း နေအိမ် တစ်လုံးပေါ် ကျရောက်ခဲ့ခြင်းဖြစ်ပြီး အသက် ၅၅နှစ်ခန့် အမျိုးသမီးတစ်ဦး သေဆုံးကာ အမျိုးသားတစ်ဦး ထိခိုက် ဒဏ်ရာရရှိ​ခဲ့ကြောင်း၊ လက်ရှိချိန်တွင် ကျေးရွာနေပြည်သူများ ထွက်ပြေး တိမ်း ရှောင်နေရကြောင်း သိရသည်။

ထို့ပြင် ပဲခူးတိုင်း ကျောက်ကြီးမြို့နယ် KNU တပ်မဟာ ၃ ထိန်းချုပ်နယ်မြေရှိ ထိုးဝါးစိုက်ရွာကို အကြမ်းဖက် စစ်တပ်က သြဂုတ်လ ၁၀ ရက်နေ့ နံနက် ၁၁ နာရီ ၃၀ မိနစ်တွင် လက်နက်ကြီးဖြင့် ပစ်ခတ် ခဲ့ပြီး ကျေးရွာနေ ဦးမောင် ဝင်းကြည် ၏ ဇနီးဖြစ်သူ လက်တစ်ဖက်ကို ထိမှန်ကာ အပြင်းအထန် ထိခိုက် ဒဏ်ရာရရှိခဲ့ကြောင်း ဒေသခံ ပြည်သူများထံမှ သိရသည်။ khit thit

စစ်ကိုင်းတိုင်း၊ ဗန်းမောက်မြို့နယ်၊ မံစီကြီးရွာမှာ ဩဂုတ် ၈ ရက်က ရှမ်းနီတပ်မတော် (SNA) ရဲ့ ပစ်ခတ်ဖမ်းဆီးသွားတာကို ခံခဲ့ရတဲ့ မံစီကြီးရွာသား သေဆုံးသွားပြီလို့ ဗန်းမောက်ဒေသခံတွေက ပြောပါတယ်။

ရှမ်းနီတပ်မတော်ရဲ့ ဖမ်းဆီးတာကို ခံရသူဟာ ကိုကျော်သက် ဆိုသူဖြစ်ကာ ဖမ်းဆီးစဉ်က သေနတ်တွေနဲ့ ပစ်ခတ်ဖမ်းဆီးတာဖြစ်ပြီး ဩဂုတ် ၉ ရက်နေ့မှာ သေဆုံးတယ်ဆိုတာ အတည်ပြုနိုင်ခဲ့တယ်လို့ ဗန်းမောက်ဒေသခံတဦးက ပြောပါတယ်။

“ကိုကျော်သက် သေဆုံးတယ်ဆိုတာ သတင်းအတည်ပြုလို့ရတယ်။ SNA က မိသားစုကို ဖုန်းဆက်လာတယ်လို့ သိရပါတယ်။ အလောင်းကိုတော့ မပေးနိုင်ဘူးလို့ ပြောလာပါတယ်။” 

ဒါ့အပြင် လွန်ခဲ့တဲ့ ရက်သတ္တပတ်ကလည်း နားယကာကျေးရွာက ကဒူးလူမျိုး ကျင်းသားတဦးကိုလည်း ရှမ်းနီတပ်မတော် (SNA) က ရိုက်နှက်ဖမ်းခေါ်သွားပြီး ကျပ်ငွေ သိန်း ၂၀ နဲ့ ပြန်ရွေးခဲ့ရတယ်လို့ သိရပါတယ်။ DVB

အိန္ဒိယ-မြန်မာနယ်စပ် ၊ ချင်းပြည်နယ် ၊ဖလမ်းမြို့နယ် ၊ ရိဒ်ခေါဒါရ်မြို့ရှိ စစ်ကောင်စီ တပ်စခန်းအား တိုက်ခိုက်ခဲ့ရာ ဒုဗိုလ်မှူးကြီး ဝေမျိုးပိုင် အပါအဝင် စစ်ကောင်စီတပ်သား ငါးဦး သေဆုံးသွားကြောင်း CDM–Siyin ရှေ့တန်းတိုက်ခိုက်ရေးတာဝန်ခံက အတည်ပြုပြောသည်။

“တိုက်ပွဲမှာ ဒုဗိုလ်မှူးကြီး ဝေမျိုးပိုင် အပါအဝင်ငါးယောက်သေသွားတယ်။ ရဟတ်ယာဉ်နဲ့ ရုပ်အလောင်းကို လာသယ်မယ်လို့သိရတယ်”ဟု ၎င်းကပြောသည်။

ယင်းတိုက်ပွဲတွင် စစ်ကောင်စီတပ်သား အများအပြား ဒဏ်ရာရရှိသွားကာ လက်နက်မဲ့ စစ်ကောင်းစီတပ်သားလေးဦး အလင်းဝင်ရောက်လာကြောင်း Civic Defense Militia – CDM – Siyin တပ်ဖွဲ့မှ ယနေ့ ဩဂုတ်လ ၁၀ရက်နေ့တွင် ထုတ်ပြန်သည်။

“ကျနော်တို့မဟာမိတ်တွေနဲ့ ပူးပေါင်းစစ်ဆင်ရေးဆွဲပြီး စစ်ကောင်စီတပ်စခန်းကို ဝင်တိုက်ခဲ့တာပါ အလင်းဝင်လာတဲ့သူတွေနဲ့ပတ်သက်ပြီး စစ်သုံ့ပန်း ဥပဒေများနဲ့အညီ ထိန်းသိမ်းထားပြီး မဟာမိတ်များနဲ့ဆွေးနွေးပြီး သူတို့အတွက် ကူညီလုပ်ဆောင်ပေးဖို့ ရှိပါတယ်” ဟု CDM–Siyin ရှေ့တန်းတိုက်ခိုက်ရေးတာဝန်ခံ ကိုဆွီးက မဇ္စျိမ ကိုပြောသည်။

ယနေ့နံနက် ၂ နာရီမှစတင်ကာ အင်အား ၅၀ခန့်ရှိသော စစ်ကောင်စီတပ်စခန်းအား တိုက်ခိုက်ခဲ့ခြင်းဖြစ်ပြီး မနက် ၇နာရီ အထိ အပြင်းအထန် အပြန်အလှန် ပစ်ခတ်တိုက်ခဲ့ခြင်းဖြစ်ကြောင်းဆိုသည်။

ယင်းတိုက်ပွဲအား CDF CDM-Siyin တပ်ဖွဲ့နှင့်အတူ PDF – Zoland ၊ CNDF နှင့် MEDF တို့မှ ပူးပေါင်းတိုက်ခိုက်ခဲ့ခြင်းဖြစ်ပြီး CDF CDM-Siyin မှ ရဲဘော်တစ်ဦး ဒဏ်ရာရရှိထားကာ ကျန်ရဲဘော်များ ဘေးကင်းလုံခြုံစွာ ဆုတ်ခွာနိုင်ခဲ့ကြောင်း သိရသည်။

“မနက်မိုးမလင်းခင်ကတည်းက ကြားနေရတာ လက်နက်ကြီးငယ် ပစ်ခတ်သံတွေ ဂျက်တိုက်လေယာဉ်ကလည်း လာဝဲနေတော့ ပြည်သူတွေကတော့ ထွက်ပြေးနေကြပြီ” ဟု အမည်မဖော်လိုသည့် ဒေသခံတစ်ဦးက ပြောသည်။

လွန်ခဲ့သော ငါးရက်ခန့်မှစ၍ အဆိုပါတပ်စခန်းအား ကာကွယ်ရေးတပ်ဖွဲ့များက ဒရုန်းများဖြင့် ဗုံးကြဲတိုက်ခိုက်ခဲ့ပြီး ယနေ့ နံနက်တွင် ကာကွယ် ရေးတပ်ဖွဲ့ များက တိုက်ခိုက်ခဲ့ခြင်းဖြစ်ကြောင်းဆိုသည်။

စစ်ကောင်စီတပ်ဖွဲ့၏ ပစ်ခတ်လိုက်သော လက်နက်ကြီးကျည်သည် အမှတ်(၂) ရပ်ကွက်အတွင်း ကျရောက်ပေါက်ကွဲကာ ပြည်သူတစ်ဦး အ သက် ဆုံးရှုံးခဲ့ပြီး နှစ်ဦးထိခိုက်ဒဏ်ရာ ရရှိထားကြောင်း သိရသည်။

ယင်းတိုက်ပွဲအပြီး စစ်ကောင်စီ ဂျက်တိုက်လေယာဉ်တစ်စီး လေးခေါက် ပျံဝဲခဲ့ပြေီး ယနေ့နံနက်၁၀နာရီ ၃၅မိနစ်တွင် နောက်ဆုံးတစ်ခေါက်ပျံဝဲကာ ထန်တလန် မြို့ဘက်သို့ ပျံသန်းသွားကြောင်း ဒေသခံက ပြောသည်။

အဆိုပါတိုက်ပွဲဖြစ်ပွားခဲ့သောကြောင့် ရိခေါဒါရ်မြို့မှ ပြည်သူ ဦးရေ ၁,၀၀၀ ကျော်သည် အိန္ဒိယနိုင်ငံ မီဇိုရမ်ပြည်နယ် ဇိုးခွားထားလ် ရွာဘက်သို့ ထွက်ပြေးတိမ်ရှောင်နေကြရကြောင်း အဆိုပါဒေသခံက ဆက်လက်ပြောသည်။ mizzima

ပဲခူးတိုင်း၊ ကျောက်ကြီးမြို့နယ်တွင် ဩဂုတ်လ ၇ ရက်နေ့က KNU နှင့် စစ်ကောင်စီ တပ်များအကြား ဖြစ်ပွားခဲ့သော တိုက်ပွဲတွင် စစ်တပ်ဘက်မှ ရွှေကျင် ခြေမြန်တပ်ရင်း ၃၅၀ (ခ.မ.ရ-၃၅၀)၏ ဒုတိယတပ်ရင်းမှူး ဗိုလ်မှူး ဝေမျိုးအောင် ဒဏ်ရာရရှိပြီး သေဆုံးခဲ့ကြောင်း သိရှိရသည်။

ဩဂုတ်လ ၇ ရက်နေ့ ညနေ ၄ နာရီအချိန် အကြမ်းဖက် စစ်ကောင်စီတပ်က ဒိုးဒါးတာစုံမှ ကျောက်စရစ်ကျေးရွာသို့ ဝင်ရောက်လာခဲ့သော ကြောင့် ကရင် အမျိုး သား လွတ်မြောက်ရေးတပ်မတော် (KNLA)၊ တပ်ရင်း(၉)နှင့် ထိပ်တိုက် တိုက်ပွဲဖြစ်ပွားခဲ့ကြောင်း၊ တိုက်ပွဲ ဖြစ်ပွားခဲ့သည့်နေရာမှာ လိန်ပင်ကျေးရွာနှင့် ပဲသောင်ကျေးရွာကြားတွင် ဖြစ်ပြီး ယင်းတိုက်ပွဲတွင် စစ်တပ်ဘက်မှ ဗိုလ်မှူး ဝေမျိုးအောင် အပါအဝင် အများအပြား ဒဏ်ရာ ရရှိကြောင်း၊ ဒဏ်ရာရရှိသူ ဗိုလ်မှူးဝေမျိုးအောင်မှာ ဩဂုတ်လ ၈ ရက်နေ့တွင် သေဆုံးခဲ့ပြီး ၎င်း၏ အလောင်း ကို စစ်ရဟတ်ယာဉ်ဖြင့် လာရောက် သယ် ဆောင် သွားခဲ့ကြောင်း သိရှိရသည်။

ထိုတိုက်ပွဲတွင် အထိနာသွားသော စစ်တပ်သည် ဩဂုတ်လ ၈ ရက်နေ့ နံနက် ၁၀ နာရီကျော်အချိန် စစ်ရဟတ်ယာဉ် ၂ စီးဖြင့် ကျောက်ကြီးမြို့ နယ် ပဲသောင် ကျေးရွာ၊ စာသင်ကျောင်းအနီးတဝိုက်တွင် (၅)ကြိမ် ပစ်ခတ်ခဲ့ပြီး ယင်းပစ်ခတ် မှုတွင် သစ်ပင်များကိုသာ ထိခိုက်ပျက်စီးကြောင်း၊ ထိုသို့လာရောက် ပစ်ခတ် သည့် လေယာဉ်တစ်စင်းကို ကရင်အမျိုး သား လွတ်မြောက်ရေးတပ်မတော် (KNLA)၊ တပ်ရင်း(၉)မှ ပြန်လည်ပစ်ခတ်ခဲ့သဖြင့် စက်ချို့ ယွင်းပြီး ကညင်ကျိုး ကျေးရွာ စာသင်ကျောင်းဝန်းအတွင်းသို့ အမြန်ဆင်းသက်ခဲ့ရကြောင်း KNU က တ ရားဝင် သတင်းထုတ်ပြန်ထားသည်။ khit thit

နေပြည်တော် သမ္မတအိမ်တော်ဝင်းအတွင်းရှိ အဆောက်အဦတချို့ကို ပြင်ဆင်မွမ်းမံတာ၊ ဧည့်တွေ့ဆောင်အသစ် ဆောက်နေတာအပြင် ဗိုလ်ရှုသဘင် အဆောက်အဦကိုပါ ပြင်ဆင်မွမ်းမံနေတယ်လို့ အာဏာသိမ်းစစ်ကောင်စီနဲ့ နီးစပ်တဲ့ အသိုက်အဝန်းက ပြောပါတယ်။

စစ်ကောင်စီနဲ့ နီးစပ်သူတဦးက “အိမ်တော်ထဲက အဆောက်အဦတခုကို ပုံမှန်ပြင်ဆင်တာမျိုး မဟုတ်ဘဲ သေချာပြင်ဆင်မွမ်းမံနေတယ်။ အဲဒီအဆောက်အဦမှာ ခု အာဏာသိမ်းခေါင်းဆောင် မင်းအောင်လှိုင် နေမယ်လို့ ပြောနေကြတယ်။ ပြီးတော့ ရှိပြီးသား ဧည့်တွေ့ဆောင်တွေအပြင် နောက်ထပ် ဧည့်တွေ့ဆောင်တခုလည်း အသစ်ထပ်ဆောက်နေတယ်” လို့ ပြောပါတယ်။

ဒါ့အပြင် သမ္မတအိမ်တော်အနီးမှာရှိပြီး ဦးသိန်းစိန်လက်ထက်မှာ ဆောက်လုပ်ခဲ့တဲ့ ဗိုလ်ရှုခံ အဆာက်အဦကိုလည်း ပြင်ဆင်မွမ်းမံတာတွေ ပြု လုပ်နေတယ်လို့ အဆိုပါနီးစပ်သူက ပြောပါတယ်။

အာဏာသိမ်းစစ်ကောင်စီအနေနဲ့ အာဏာသိမ်းပြီးနောက် ၂၀၂၂ ခုနှစ်အတွင်းမှာ အဆိုပါ ဗိုလ်ရှုခံအဆောက်အဦမှာပဲ ဗိုလ်ရှုခံအခမ်းအနားကို ကျပ်ဘီလီယံများစွာ သုံးစွဲပြီး ပြုလုပ်ခဲ့ပါသေးတယ်။

စစ်ကောင်စီဟာ အာဏာသိမ်းပြီး သမ္မတအိမ်တော်မှာ နေထိုင်တဲ့ နိုင်ငံတော်သမ္မတ ဦးဝင်းမြင့်ကို ဖမ်းဆီးတရားစွဲဆိုကာ လက်ရှိအချိန်ထိ ဘယ်နေရာမှာ ထိန်းသိမ်းထားမှန်း မသိရသလို စစ်ကောင်စီဘက်ကလည်း ထုတ်ပြန်ပြောဆိုတာ မရှိခဲ့ပါဘူး။

ဦးဝင်းမြင့်ဟာ ၂၀၁၈ ခုနှစ် ဧပြီ ၆ ရက်နေ့မှာ နိုင်ငံတော်သမ္မတရာထူးကို စတင်ထမ်းဆောင်တဲ့ အထိမ်းအမှတ် ဧည့်ခံပွဲကို အိမ်တော်ဝင်းအ တွင်းရှိ မြက်ခင်းပြင်မှာ ပြုလုပ်ခဲ့ပြီး အဆိုပါဧည့်ခံပွဲကို လက်ရှိ အာဏာသိမ်းစစ်ခေါင်းဆောင် မင်းအောင်လှိုင်လည်း တက်ရောက်ခဲ့ပါတယ်။DVB