SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကောင်စီသည် ပြီးခဲ့သည့် ဩဂုတ် ၁၂ ရက်နေ့ နံနက်ပိုင်းက မကွေးတိုင်း၊ တောင်တွင်းကြီးမြို့၊ နဂါးနီ ကြက်ဆိုင် ရှေ့တွင် လူငယ်တစ်ဦးကို PDF အဖွဲ့ဝင်ဟု စွပ်စွဲ၍ ဖမ်းဆီးခေါ်ဆောင်သွားကြောင်း ဒေသခံများထံက သိရသည်။

စစ်ကောင်စီ၏ စွပ်စွဲဖမ်းဆီးခံရသူ လူငယ်သည် မကွေးတိုင်း၊ မြို့သစ်မြို့နယ်၊ မထွဲကျေးရွာတွင်နေထိုင်ပြီး တောင်သူအလုပ် လုပ်ကိုင်သည့် ကိုပြည့်ဖြိုးဦး(ခ) ကိုစေတန်(ခ)ကိုအရှည်ကြီး ဖြစ်ကြောင်းသိရသည်။

စစ်ကောင်စီသည် ကိုပြည့်ဖြိုးဦးကို ဖမ်းဆီးခဲ့ပြီးနောက် မထွဲကျေးရွာရှိ ၎င်း၏ အမေနှင့်ညီမ ဖြစ်သူတို့ကိုပါ ထပ်မံဖမ်းဆီးခဲ့သည်။

“တစ်နေ့တည်း အဖမ်းခံရတာပါ။ သားဖြစ်သူက မနက်ပိုင်း တောင်တွင်းကြီးမှာ အဖမ်းခံ ရတာပါ။ နေ့လယ်ကျမှ သူ့အိမ်က အမေနဲ့ ညီမကို ထပ်ဖမ်းတာ။ တောင်သူ အလုပ်ပဲ လုပ်ကြတာ” ဟု ကိုပြည့်ဖြိုးဦး၏ မိသားစုဝင်များနှင့် နီးစပ်သူတစ်ဦးက မဇ္ဈိမကို ပြောသည်။

ကိုပြည့်ဖြိုးဦးအပါအဝင် ၎င်း၏အမေနှင့်ညီမတို့ကို ဖမ်းဆီးခေါ်ဆောင်သွားကတည်းက ယနေ့ ဩဂုတ် ၁၄ရက်နေ့ အထိ မည်သည့်နေရာတွင် ဖမ်းဆီးခေါ်ဆောင်ထား သည်ကို မသိရှိရသေးသည့်အတွက် အသက်အန္တရာယ်ကို စိုးရိမ်နေကြောင်း မိသားစုဝင်များနှင့် နီးစပ်သူများက ဆို သည်။

“မိသားစုဝင် ညီအစ်ကိုမောင်နှစ်မတွေနဲ့ သူငယ်ချင်းမိတ်ဆွေတွေက ကိုပြည့်ဖြိုးဦးနဲ့ တွေ့ခွင့်ရဖို့အကြိမ်ကြိမ်ကြိုးစား ဆက်သွယ်ခဲ့ပေမယ့် အခုအချိန်အထိ တွေ့ခွင့်မရေ သးဘူး။ သူ့တို့ရဲ့ အသက်အန္တရာယ်အတွက် စိုးရိမ်နေရတယ်” ဟု ကိုပြည့်ဖြိုးဦး၏ မိသားစုဝင် တစ်ဦးကပြော သည်။

စစ်ကောင်စီသည် မကွေးတိုင်း၊ မြို့သစ်မြို့နယ်အတွင်းရှိ လူငယ်အချို့ကို PDF အဖွဲ့ဝင်ဟု စွပ်စွဲ၍ ဖမ်းဆီးထားပြီး စစ်ကောင်စီ၏ ဖမ်းဆီးခြင်းခံထားရသူ လူငယ် ၂၀ ဦးထက် မနည်း ရှိကြောင်းသိရသည်။ mizzima

ချင်းပြည်နယ်၊ ဖလမ်းမြို့နယ်၊ ရိမြို့နယ်ခွဲနှင့် တီးတိန်မြို့နယ် အနီးရှိ အိန္ဒိယ-မြန်မာ ကုန်သွယ်ရေးစခန်း၊ ဟိုင်မွလ်ကျေးရွာကို အကြမ်းဖက်စစ်တပ်က ယနေ့ ဩဂုတ်လ ၁၄ ရက်နေ့ ညနေ ၄ နာရီ ၄၅ မိနစ်အချိန်တွင် ရမ်းကား မီးရှို့ဖျက်ဆီးနေကြောင်း ဒေသခံများထံမှ သိရှိရသည်။

“စစ်တပ်က ချင်းပြည်နယ် ကုန်သွယ်ရေးစခန်း ဟိုင်မွလ်ကျေးရွာကို အခု မီးရှို့နေပါတယ်။ ဖလမ်းနဲ့ တီးတိန်မြို့နယ်အစပ် ဟိုင်မွလ်ကျေးရွာပါ။ တိုက်ပွဲမဖြစ်ဘူး။ ဟိုနေ့က ဒုဗိုလ်မှူးကြီး ဝေမျိုးပိုင် သေတဲ့ကိစ္စနဲ့ ပတ်သက်ပြီး ရမ်းကားတာ။ အိန္ဒိယ-မြန်မာ ကုန်သွယ်ရေးစခန်း” ဟု ဒေသခံတစ်ဦးက ပြောသည်။

ဩဂုတ်လ ၁၀ ရက်နေ့ နံနက်ပိုင်း၊ ချင်းပြည်နယ်၊ ဖလမ်းမြို့နယ်၊ အိန္ဒိယ-မြန်မာနယ်စပ်၊ ရိဒ်ခေါဒါရ်မြို့နယ်ခွဲတွင် စစ်ကောင်စီတပ်မှ တပ်ရင်း မှူး ဒုတိယဗိုလ်မှူးကြီး ဝေမျိုးပိုင် သည် ဒရုန်းဖြင့် ဗုံးကျဲ ခံရသဖြင့် ထိမှန်သေဆုံးခဲ့ရခြင်းဖြစ်ပြီး ချင်းပူးပေါင်းတပ်ဖွဲ့များက ဝင်ရောက်တိုက် ခိုက်ခဲ့မှုကြောင့် ၎င်းအပါအဝင် စစ်သား ၅ ဦးသေဆုံးခဲ့ကြောင်း ချင်းကာကွယ်ရေးပူးပေါင်းတပ်များက သတင်းထုတ်ပြန်ထားသည်။khit thit

ရှမ်းပြည်နယ်မြောက်ပိုင်း မူဆယ်ခရိုင်၊ ကြူကုတ် (ပန်ဆိုင်း)မြို့မှာ အမည်မသိအဖွဲ့ရဲ့ ဖမ်းဆီး‌တာ ခံရပြီး ကျည်ထိမှန် ဒဏ်ရာနဲ့ ထွက်ပြေးလွတ်မြောက်ခဲ့တဲ့ အသက် ၂၀ အရွယ် ဆိုင်းနော်ဟာ ဩဂုတ် ၁၃ ရက်က မိသားစုနဲ့အဆက်အသွယ် ပြန်ရပြီး လုံခြုံတဲ့နေရာမှာ ဆေးကုသမှု ခံနေတယ်လို့ ဆိုင်းနော်ရဲ့အကိုက ပြောပါတယ်။

ဆိုင်းနော်ကို လယ်ကွင်းထဲမှာ တွေ့တာကြောင့် လယ်ကွက်ပိုင်ရှင်က ကယ်ထားတာဖြစ်ပြီး လုံခြုရေးအရ တွေ့ရှိတဲ့နေရာနဲ့ ဆေးကုသမှု ခံယူနေတဲ့ နေရာကို ပြောလို့ မရ‌သေးဘူးလို့ သူက ဆက်ပြောပါတယ်။

“ဆိုင်းနော်က သေနတ်ကျည် ထိထားတာ။ လက်မှာရော၊ ဗိုက်မှာရော၊ ပေါင်မှာရော၊ ခြေသလုံးမှာရော ၄ ချက်ပေါ့။” 

တခြားမြို့ကနေ ညီအစ်ကိုနှစ်ယောက်လုံး ကြူကုတ်(ပန်ဆိုင်း)မြို့မှာ သွားရောက် အလုပ်လုပ်ကြတာဖြစ်ပြီး ဩဂုတ် ၉ ရက် ညနေ ၃ နာရီခွဲခန့်က ပန်ဆိုင်းဈေးထိပ်မှာ စားစရာ ဝယ်ပြီး အပြန် သေနတ်အရှည်၊ ပစ္စတိုတွေပါတဲ့ အမည်မသိ လူ ၄ ယောက်က သေနတ်ထောက် ဖမ်းဆီးကာ ကားနဲ့ ခေါ်ဆောင်သွားခံရတာ ဖြစ်ပါတယ်။ 

အခုလို ဖမ်းဆီးခေါ်ဆောင်ချိန် မြို့အထွက်အရောက် လူငယ် ၁ ယောက်ကို ထပ်မံဖမ်းဆီးခဲ့ပြီး နမ့်တောင်းဘက်သွားလမ်းမှာ လက်နက်ကိုင်အဖွဲ့ တဖွဲ့က လှမ်းတားရာ မရပ်ပေးတာကြောင့် သေနတ်နဲ့ပစ်ခတ်လို့  သေနတ်ကျည် ထိမှန်ခဲ့ပြီး ၂နာရီလောက်အကြာ ကားခဏရပ်ချိန် ညအမှောင်မှာ ထွက်ပြေးလွတ်မြောက်ခဲ့ကာ လယ်ကွင်းထဲရောက်သွားတာ ဖြစ်ပါတယ်။

ထွက်ပြေး လွတ်မြောက်ခဲ့တဲ့ ဒဏ်ရာရထားတဲ့ဆိုင်းနော်ဟာ ဩဂုတ် ၉ ရက် ည ၁၀နာရီလောက်မှာ အကိုဖြစ်သူထံ ဖုန်း ဆက်သွယ်ပြောဆိုခဲ့ပြီးနောက် အဆက်အသွယ်ပြတ်ကာ ၄ ရက်ကြာမှ အဆက်အသွယ် ပြန်ရခဲ့တာဖြစ်တယ်လို့ မိသားစုဝင်တွေက ပြောပါတယ်။  

မူဆယ်ခရိုင်မှာ အခုနှစ်အတွင်း ကွတ်ခိုင်နဲ့နမ်းခမ်းဘက်မှာ မူလတန်းကလေးငယ်တချို့ ပြန်ပေးဆွဲ ခံ ရပြီးငွေပေး ပြန်ရွေးယူရတဲ့ဖြစ်စဉ် တချို့ ရှိခဲ့ဖူးတယ်လို့ ဒေသခံတွေက ပြောပါတယ်။ 

ပြန်ပေးဆွဲမှု နဲ့ လူသတ်မှုတွေဟာ ရှမ်းပြည်နယ်မြောက်ပိုင်း ကျောက်မဲ၊ သီပေါ၊ လားရှိုး၊ ကွတ်ခိုင်၊ တာမိုးညဲ၊ မူဆယ်မြို့နယ်၊ နမ့်ခမ်းမြို့တွေမှာ ၂၀၂၁ နောက်ပိုင်း အများဆုံး ဖြစ်ပွားလာတာပါ။ DVB

အိန္ဒိယနိုင်ငံ၊ မီဇိုရမ်ပြည်နယ်အစိုးရနှင့် မြန်မာစစ်ကောင်စီတို့ကြား၌ လျှို့ဝှက်ဆက် သွယ်ဆောင်ရွက်မှုမရှိဘဲ ဇွန်လ ၂၃ ရက်နေ့က ကာလကတ္တားရှိ မြန်မာကောင်စစ်ဝန်ရုံးမှပေးပို့သည့် စာကိုပြန်လည်ပေးပို့ခြင်းသာရှိသည်ဟု မီဇိုရမ်ပြည်ထဲရေးဝန်ကြီး Pu Lalchamliana က ဆိုသည်။

မြန်မာစစ်ကောင်စီ၏ နိုင်ငံခြားရေးဝန်ကြီး ဦးဝဏ္ဏမောင်လွင် လက်မှတ်ဖြင့် သြဂုတ်လ ၅ ရက်နေ့က ထွက်ပေါ်လာသည့် မီဇိုရမ်ရောက် စစ်ဘေးရှောင်များ နေရပ်ပြန်လည်ပို့ဆောင်ရေးနှင့်ပတ်သက်ပြီး ကာချုပ်ထံတင်ပြထားသည့် ရုံးတွင်းစာပေါက်ကြားပြီးနောက် စစ်ဘေးရှောင်ဒုက္ခသည်များအကြား စိုးရိမ်မှု မြင့်တက်လာသည်ဟုလည်း သိရသည်။

“ ကျွန်တော်တို့ မီဇိုရမ်ပြည်နယ်အစိုးရအဖွဲ့ဆီကို မြန်မာပြည်ကနေရောက်ရှိလာတဲ့ စစ်ဘေးရှောင် ဒုက္ခ သည်တွေကိုပြန်ပို့ပါဆိုတဲ့ ဗဟိုပြည်ထဲ ရေးဝန်ကြီးဌာနက အမိန့်စာရခဲ့တယ်။ ဒါပေမယ့် ကျွန်တော်တို့ ဝန်ကြီးချုပ်က ပြန်မပို့နိုင်ဘူးလို့ တုံ့ပြန်ခဲ့ပြီးပြီ။ ပြီးတော့ ပြီးခဲ့တဲ့ ဇွန်လ ၂၃ ရက်နေ့မှာ ကာလကတ္တားမှာ ရှိတဲ့ မြန်မာစစ်ကောင်စစ်ဝန်ရုံးကနေ ကျွန်တော်တို့ မီဇိုရမ်အစိုးရထံကို ပထမဆုံး စာတစ်စောင်လာပေး တယ်။ စစ်ဘေးရှောင်တွေ နေရပ်ပြန်လည်ပို့ဆောင်ဖို့ကိစ္စတွေပေါ့။ ကျွန်တော်တို့ကလည်း ပြန်မေးလိုက် တယ်။ စစ်ဘေးရှောင်တွေ မြန်မာပြည်ထဲပြန်ဝင်ရင် သူတို့အတွက် လုံခြုံရေးတာဝန်ယူပေးနိုင်မလား၊ ဘယ်လိုအတိုင်းအတာ ဘယ်လိုပုံစံနဲ့လက်ခံမလဲဆိုတာကို ဇူလိုင် ၁၄ ရက်နေ့က စာရေးပြီးပြန်မေးလိုက် တာဖြစ်တယ်။ ဘာမှ လျှို့ဝှက်တွေ့ဆုံတာမရှိဘူး” ဟု မီဇိုရမ်ပြည်ထဲရေးဝန်ကြီး Pu Lalchamliana က ဆိုသည်။

လက်ရှိတွင် အိန္ဒိယနိုင်ငံ၊ မီဇိုရမ်ပြည်နယ်အတွင်း၌ မြန်မာနိုင်ငံမှ ချင်းလူမျိုး စစ်ဘေးရှောင်များအပါအဝင် ဒုက္ခသည်ပေါင်း ၄၀,၀၀၀ ကျော် ရှိနေကြောင်းသိရသည်။ mizzima

မကွေးတိုင်း ပေါက်မြို့နယ် ရှားစေးချက်ရွာကို အကြမ်းဖက် စစ်တပ်က သြဂုတ်လ ၁၁ ရက်နေ့တွင် ဝင်ရောက် စီးနင်းပြီးနောက် ကျေးရွာသား ကိုရဲဝင်းနိုင်ကို နှိပ်စက် သတ်ဖြတ်ပြီး နေအိမ် ၂၀ လုံးကျော်ကို မီးရှို့ဖျက်ဆီးသွားကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

အကြမ်းဖက် စစ်တပ်က ကျေးရွာကို ဝင်ရောက် စီးနင်းပြီး ပြန်လည် ထွက်ခွာသွားစဥ် ဒေသခံ ပြည်သူများက ရွာထဲကို ပြန်လည် ဝင်ရောက် လာချိန်တွင် စစ်တပ် စစ်ကြောင်းက ထပ်မံ ရောက်ရှိလာပြီး ပြည်သူ ၁၀ ဦးခန့်ကို ဖမ်းဆီး လူသားဒိုင်းပြုလုပ်ကာ လမ်းပြအဖြစ် ဖမ်းဆီး ခေါ်ဆောင်သွားကြောင်း သိရသည်။

” စစ်ခွေးရိုက်သတ်သွားတဲ့သူက ကိုရဲဝင်းနိုင်ပါ ခေါင်းတွေကို ကြေအောင် ရိုက်နှက်ပြီး လက်ဖြားတွေကိုလည်းချိုး မျက်လုံးတွေလည်း ဖောက်ခံထားရတယ်။ မီးလောင်နဲ့ အိမ်ခြေက ၂၀ ကျော်လောက်ရှိတယ်။ ရွာထဲကိုမဝင်ရဲ့တော့ အတိအကျ မပြောနိုင်သေးဘူး။ ရွာထဲဝင်တဲ့ သူတွေလည်း စစ်ခွေးတွေက လာပြီး ထပ်ဖမ်းသွားတယ်။ ၁၀ ဦးထက်မနည်း ဖမ်းသွားပါတယ်။ စစ်တတ်က မနေ့က တစ်ဖွဲ့ ဒီနေ့တစ်ဖွဲ့ပါ။ ရွာထဲမှာ ရှိနေသေးတယ်။ ဖမ်းခံရတဲ့ သူတွေကို လူသားဒိုင်းလုပ်ပြီး လမ်းပြအဖြစ် ခေါ်သွားကျတယ်” ဟု ဒေသခံပြည်သူ တစ်ဦးကပြောဆိုသည်။

ရှားစေးချက်ရွာကို သြဂုတ်လ ၁၁ ရက်နေ့ ဝင်ရောက် စီးနင်း ဖျက်ဆီးခဲ့သော အကြမ်းဖက် စစ်တပ် စစ်ကြောင်းသည် ဒေသခံ ပြည်သူ ၁၀ ဦးခန့်ကို လူသားဒိုင်း အဖြစ် ဖမ်းဆီးသွားပြီး အနီးအနားကျေးရွာများကို ဝင်ရောက်စီးနင်းနေပြီး ယနေ့တွင် ထပ်မံ ရောက်ရှိလာသော စစ်ကြောင်းမှာ ကျေးရွာအတွင်း ရှိနေသေးကြောင်း ဒေသခံ ပြည်သူများက ပြောဆိုသည်။ khit thit

တနင်္သာရီတိုင်း မြိတ်ခရိုင်၊ ပုလောမြို့နယ် ကျောင်းနိမ့်ရွာမှာ စစ်တပ်က ပစ်လိုက်တဲ့ လက်နက်ကြီး ထိမှန်ပေါက်ကွဲခဲ့တာကြောင့် နေအိမ် တလုံး ပျက်စီးသွားတယ်လို့ ဗိုလ်မိုးကြိုး ပြည်သူ့ကာကွယ်ရေးတပ်ဖွဲ့တာဝန်ရှိသူက ပြောပါတယ်။

ဩဂုတ် ၁၃ ရက် ည ၁၂ နာရီလောက်မှာ ပုလောအခြေစိုက် ခလရ ၂၈၅ တပ်ရင်းက  ပစ်ခတ်ခဲ့တာဖြစ်ပြီး ကျေးရွာအုပ်ချုပ်ရေးမှူးဟောင်း ဦးမင်းဇော်ရဲ့ နေအိမ်ပျက်စီးသွားတာလို့ သိရပါတယ်။

ဗိုလ်မိုးကြိုးပြည်သူ့ကာကွယ်ရေးတပ်ဖွဲ့တာဝန်ရှိသူက “၂၈၅ က ပစ်တာ။ တချက်တည်း။ လက်နက်ကြီးထိတဲ့ အိမ်က လူ မနေတာ‌ကြာပြီဆိုတော့ လူထိခိုက်မှုတော့ မရှိဘူး” လို့ ဆိုပါတယ်။

ပြီးခဲ့တဲ့ ၂ လလောက်က စစ်ကောင်စီတပ်တွေ ကျောင်းနိမ့်ရွာကို စစ်ကြောင်းထိုး ဝင်ရောက်ကာ နေအိမ် ၃ လုံး မီးရှို့ခံခဲ့ရပြီးတဲ့နောက် ရွာလုံးကျွတ်စစ်ဘေးရှောင်နေရတယ်လို ဆိုပါတယ်။

လက်ရှိအချိန်အထိ ကျောင်းနိမ့်ရွာမှာ စစ်ကောင်စီက မီးရှို့ဖျက်ဆီးခဲ့တဲ့အိမ် ၁၂ လုံးနဲ့ လက်နက်ကြီးထိမှန် ပျက်စီးခဲ့တဲ့အိမ် ၄ လုံးရှိပြီလို့လည်း သိရပါတယ်။

ဇူလိုင် ၁၉ ရက် မနက် ၂ နာရီလောက်ကလည်း ပုလောအခြေစိုက် ခလရ ၂၈၅ က လက်နက်ကြီးတွေနဲ့  ဆက်တိုက်ပစ်ခတ်ခဲ့လို့ ပိန္နဲတောင်ရွာက ဒေသခံ အိမ်တလုံး ထိမှန် ပေါက်ကွဲပြီး အသက် ၂၀ အရွယ် မောင်ဇင်ဝိုင်းဆိုသူ လူငယ်တယောက် သေဆုံးခဲ့ပါတယ်။ DVB

ကချင်ပြည်နယ်၊ တနိုင်းဟူးကောင်းဒေသ ရှဒူးဇွပ်ကျေးရွာရှိ ဝါရာဇွပ် ပြည်သူ့စစ်စခန်းကို ကချင်လွတ်မြောက်ရေးတပ်မတော်(KIA) မှ တစ်ဖန် ပြန်လာတိုက်မည်ဆိုပါက စံပြအနေဖြင့်ပြည်သူလူထုကို ငဲ့ညှာသွားမည်မဟုတ်ကြောင်း ပြောဆိုခဲ့သည်ကို ဝါရာဇွပ်ပြည်သူ့ စစ်ခေါင်းဆောင်က ငြင်းဆိုခဲ့သည်။

ယမန်နေ့ သြဂုတ်လ ၁၃ ရက်နေ့ နံနက် ၁၀ နာရီဝန်းကျင်ခန့်တွင် ဝါရာဇွပ်ပြည်သူ့စစ်ခေါင်းဆောင် မင်းဇေသန့်နှင့်အဖွဲ့သည် စံပြနှင့် အောင်ရာကျေးရွာမှ ကျေးရွာအုပ်ချုပ်ရေးမှူးများ အပါအဝင် ရပ်မိရပ်ဖအချို့ကို ၎င်းတို့၏ ပြည်သူ့စစ်စခန်းသို့ ခေါ်ယူတွေ့ဆုံခဲ့ပြီး ယခုကဲ့သို့ သတိပေးပြောဆိုခဲ့ခြင်းဖြစ်သည်ဟု ခိုင်မာသည့် သတင်းရင်းမြစ်များထံက သိရသည်။

“ရွာဘက်ကို KIA တွေဝင်လာတာကိုမပြောဘူး။ နောက်ပြီး နောက်တစ်ခါ ဒီလိုမျိုး သူတို့စခန်းကို လာတိုက်ရင် ရွာလည်းထိခိုက်နိုင်မယ်။ အဲ့အခါကျရင်တော့ သူတို့ကို အဆိုးမဆိုနဲ့လို့ သတိပေးလိုက်တယ်” ဟု သတင်းရင်းမြစ်က ပြောကြားခဲ့သည်။

ပြီးခဲ့သည့် ဩဂုတ်လ ၁၁ ရက်နေ့ နံနက်ပိုင်းက KIA တပ်ရင်း (၁၄) မှဦးဆောင်သည့် ပြည်သူ့ကာကွယ်ရေးပူးပေါင်းအဖွဲ့သည် ဝါရာဇွပ်ပြည်သူ့စစ်စခန်းကို လာရောက် တိုက်ခိုက်ခဲ့သည့်အတွက် ယခုကဲ့သို့ ကျေးရွာနေလူကြီးအချို့ကို ခေါ်ယူ သတိပေးခြင်းဖြစ်ကြောင်း သိရသည်။

သတင်းရင်းမြစ်များက အခိုင်အမာပြောဆိုသော်လည်း ဝါရာဇွပ်ပြည်သူ့စစ်ခေါင်းဆောင် မင်းဇေသန့်က ထိုသို့ပြောဆိုချက်က မဟုတ်မှန်ကြောင်း ငြင်းဆိုသည်။

“ဒီလိုစကားမျိုးကို ကျွန်တော်မပြောခဲ့ဘူးဆိုတာ တကယ်သေချာတယ်။ ပြည်သူလူထု ထိခိုက်အောင် ကျွန်တော်တို့အဖွဲ့အနေနဲ့ ဘာမှမလုပ်ခဲ့သလို အဲ့ဒီလိုပြည်သူလူထုကို ထိခိုက်စေမယ့်စကား မပြောခဲ့ဘူးဆိုတာကတော့ သေချာတယ်” ဟု စစ်ခေါင်းဆောင် မင်းဇေသန့်က ဆိုသည်။

ကချင်ပြည်နယ်အခြေစိုက် သတင်းဌာနအချို့ကလည်း ပြည်သူ့စစ်ခေါင်းဆောင် အနေဖြင့် ယခုကဲ့သို့ သတိပေးစကားပြောဆိုခဲ့ကြောင်းကို ရေးသားဖော်ပြခဲ့သည့် အတွက် ဝါရာဇွပ်ပြည်သူ့ စစ်ခေါင်းဆောင် မင်းဇေသန့်က ၎င်း၏လူမှုကွန်ရက် Facebook စာမျက်နှာပေါ်မှနေ၍ ဒေသခံများနှင့်တွေဆုံပြောဆိုခဲ့ကြသည့် ဗီဒီယိုဖိုင်နှင့် အသံဖိုင်များကို ပြန်လည်ဖွင့်ပြထားကာ ငြင်းဆိုသည်။

ဝါရာဇွပ်ပြည်သူ့စစ်စခန်းသည် ကျေးရွာများနှင့် မီတာ ၃၀၀ အကွာတွင် အခိုင်အမာ တည်ဆောက်ထားသည့် စစ်ကောင်စီလက်အောက်ခံ ပြည်သူ့စစ်စခန်းတစ်ခု ဖြစ်သည်။ mizzima

မြန်မာနိုင်ငံတွင် စစ်ကောင်စီက စက်သုံးဆီတင်သွင်းမှုများအတွက် အမေရိကန်ဒေါ်လာကို လိုသလောက်‌ ရောင်းမပေးတော့သဖြင့် စက်သုံးဆီတင်သွင်းမှုများ အခက်အခဲကြုံတွေ့ကာ စက်သုံးဆီပြတ်လပ်ခြင်းများ ဆက်တိုက်ဖြစ်ပေါ်နေပြီး ပြင်ပ စက်သုံးဆီစျေးကွက်မှာလည်း ကြီးထွားလာနေကြောင်း စျေးကွက်အတွင်းမှ စုံစမ်းသိရှိရသည်။

အကြမ်းဖက်စစ်ကောင်စီက ပြည်တွင်းရှိ စီးပွားရေးလုပ်ငန်းများရှိ ဒေါ်လာ ငွေကြေးများကို တစ်ဒေါ်လာလျှင် ငွေကျပ် ၁၈၅၀ ကျပ်ဖြင့် သိမ်းယူလိုက်ပြီး ဒေါ်လာသုံးစွဲမှုများကို ထိန်းချုပ်ခဲ့ကြောင်း၊ စစ်ကောင်စီ နိုင်ငံခြားငွေ သုံးစွဲမှု ကြီးကြပ်ရေးအဖွဲ့က သွင်းကုန်အတွက်‌ ဒေါ်လာများကို စိစစ်၍ ပြန်လည် ချပေးနေရာ ယခုအခါ စက်သုံးဆီ လုပ်ငန်းရှင်များအတွက် စက်သုံးဆီတင်သွင်းရန် ဒေါ်လာ လိုသလောက် ရောင်းမပေးတော့ကြောင်း၊ စက်သုံးဆီ တင်သွင်းသူများမှာလည်း ဒေါ်လာမရှိ၍ ဆီပြတ်လပ်မှုများ ဖြစ်ပေါ်လာခြင်းဖြစ်ကြောင်း သိရှိရသည်။

“စက်သုံးဆီ ပြတ်လပ်တယ်ဆိုတာ ဆီတင်သွင်းသူတွေမှာ ဒေါ်လာ မရှိတာ။ ရှိတဲ့ဒေါ်လာတွေကို ၁၈၅၀ နဲ့ စကစ က အကုန်သိမ်းသွားတာ။ စကစ က အခု တစ်ဒေါ်လာ ၂၁၀၀ ပြန်ရောင်းပေးမယ့် လိုသလောက် မပေးဘူး။ မပေးတော့ အပြင်က ဒေါ်လာ ဝယ်ပြီးတော့လည်း ဆီတင်သွင်းလို့မရဘူး။ မကိုက်ဘူး။ အခုက အပြင်မှာ တစ်ဒေါ်လာ ၃၀၀၀ ရောက်နေပြီ။ ဆီပြတ်တယ်ဆိုတာ ကိုယ့်မှာ ဝယ်ဖို့ ငွေမရှိတာ။ ငွေရှိရင် ငွေချေလိုက်ရင် ဆီသင်္ဘောတွေ ရောက်လာမှာပဲ။ ကျနော်တို့က ပြင်ပဒေါ်လာ ဝယ်ပြီး စက်သုံးဆီတင်သွင်းရင် စျေးနှုန်းကို ကုန်ကျစရိတ်နဲ့ချိန်ပြီး ကြိုက်သလို ရောင်းခွင့်ပေးရင် သွင်းတာပေါ့။ အခုက စျေးနှုန်းက ကော်မတီက သတ်မှတ်တဲ့စျေးနှုန်းနဲ့ပဲ ရောင်းရတာ” ဟု စက်သုံးဆီတင်သွင်းသူတစ်ဦးက ပြောသည်။

လက်ရှိတွင် စက်သုံးဆီစျေးနှုန်းများသည် 92 တစ်လီတာလျှင် ကျပ် ၂၃၂၀ မှ ၂၈၅၅ အထိ နေရာအလိုက် စစ်တပ်၊ စက်သုံးဆီ‌ကြီးကြပ်ရေးကော်မတီက သတ်မှတ်ထားပြီး ယင်းစျေးနှုန်းဖြင့်သာ တစ်နိုင်ငံလုံး တပြေးညီ ရောင်းချရခြင်းဖြစ်သည်။

စက်သုံးဆီ ပြတ်လပ်နေသဖြင့် ဆီပြင်ပစျေးကွက်ပေါ်ထွန်းလာပြီး အဆိုပါ ပြင်ပစျေးကွက်တွင် ဓာတ်ဆီ 92 တစ်လီတာ နေရာဒေသကိုလိုက်၍ ငွေကျပ် ၅၀၀၀ မှ တစ်သောင်းကျော်အထိ စျေးပေါက်လျက်ရှိကြောင်း သိရှိရသည်။

“ဆီသွားတိုးပြီး ဆီရောင်းမလားဆိုပြီး လာကောက်တယ်။ တစ်လီတာကို ၃၅၀၀ ပေးတယ်။ မရောင်းနိုင်ဘူး။ ဆီကောက်တဲ့သူတွေမေးကြည့်တော့ အပြင်မှာ ၄၀၀၀၊ လောက်နဲ့ ပြန်ရောင်းတယ်ပြောတယ်။ တချို့နေရာတွေလည်း တစ်ဘူး ၅၀၀၀ လောက်ရောင်းတာတွေ့တယ်” ဟု စစ်ကိုင်းဒေသခံတစ်ဦးက ပြောသည်။

ပဲခူးဒေသခံတစ်ဦးကလည်း ပဲခူးတွင် ရေသန့်ဘူးများဖြင့် ရောင်းချသည့် ပြင်ပ ဆီဆိုင်လေးများ ပေါ်ထွန်းနေပြီး တစ်ဘူးလျှင် ငွေကျပ် ၃၅၀၀ မှ ၆၀၀၀ အကြား ရောင်းချသည်ဟု ပြောဆိုသည်။

ရှမ်းပြည်နယ်၊ ကချင်ပြည်နယ်တို့တွင်မူ ဓာတ်ဆီ 92 တစ်လီတာ ငွေကျပ် ၁၀၀၀၀ ကျော်အထိ ပြောဆိုရောင်းချမှု များရှိကြောင်း သိရှိရသည်။ khit thit

စစ်ကိုင်းတိုင်း ကလေးခရိုင်၊ မင်းကင်းမြို့နယ်ပြည်သူ့ကာကွယ်ရေးတပ်ဖွဲ့ရဲ့  RPG ပရောဂျက်မှာ ပြည်သူတွေပါဝင်ပေးဖို့ မေတ္တာရပ်ခံ ဖိတ်ခေါ်ထားတယ်လို့ မင်းကင်းမြို့နယ်ပြည်သူ့ကာကွယ်ရေး တပ်ဖွဲ့ (မြစ်ရိုးအောက်ဒေသ) ခေါင်းဆောင် ဗိုလ်သံလုံးက ပြောပါတယ်။

ကုန်းလမ်းနဲ့ ရေလမ်းကြောင်းတွေကို အသုံးပြုနေတဲ့ စစ်ကောင်စီတပ်ကို တိုက်ခိုက်ရာမှာ ပိုမို ထိရောက်စေဖို့ ရည်ရွယ်ပြီး RPG ပရောဂျက်ကို ဇူလိုင် ၂၆ ရက်က စတင် အကောင်အထည် ဖော်ခဲ့တာဖြစ်ပြီး ပရောဂျက်ဟာ သြဂုတ် ၃၁ ရက်အထိ ဖြစ်တယ်လို့ သိရပါတယ်။ 

ဗိုလ်သံလုံးက “မင်းကင်းမြို့နယ်မှာ အခုနောက်ပိုင်း စစ်ကောင်စီတပ်တွေက ရေကြောင်းကနေ ထိုးစစ်ဆင်လာတာတွေ ရှိလာတယ်။ သူတို့ရဲ့ ရေယာဥ်တွေကို လက်နက်ငယ်တွေနဲ့ ပစ်ခတ်တာ၊ လက်လုပ်ပြောင်းတွေနဲ့ တိုက်ခိုက်တာတွေဟာ ထိရောက်မှု နည်းလို့  ပိုမိုထိရောက်တဲ့ RPG လက်နက် ဝယ်ယူနိုင်ရေး လုပ်ဆောင်နေတာပါ”လို့ ပြောပါတယ်။

အခုအချိန်ထိ ပြည်သူတွေရဲ့ လှူဒါန်းငွေ ကျပ်သိန်း ၂၀၀ ကျော် ရရှိထားပြီး အလှူငွေ ထပ်မံ လိုအပ်နေတာကြောင့် ပြည်တွင်း၊ ပြည်ပအလှူရှင်တွေအနေနဲ့ ဝိုင်းဝန်းကူညီပေးကြဖို့ မေတ္တာရပ်ခံတယ်လို့ သူက ဆက်ပြောပါတယ်။

မင်းကင်းမြို့နယ်မှာ စစ်ကောင်စီတပ်ဟာ မကြာခဏ စစ်ကြောင်းထိုးနေပြီး  သတ်ဖြတ်မှုကြောင့် ဒေသခံတွေ အသက်ဆုံးရှုံးခဲ့တာတွေ ရှိသလို  မီးရှို့မှုကြောင့် နေအိမ် ၁,၀၀၀ ကျော် မီးလောင် ပြာကျ ခဲ့ရပြီး စစ်ဘေးသင့်ပြည်သူ ၂၀,၀၀၀ ဝန်းကျင်လောက်ရှိနေပါတယ်။ DVB