ပြည်တွင်း၌ လောင်စာဆီဈေး မြင့်တက်ခြင်းနှင့် ဆန်ဈေး ကြီးမြင့်ခြင်းကြောင့် ပို၍ ကျပ် တည်းလာ
မြန်မာနိုင်ငံ၏ စီးပွားရေး အချက်အချာ ရန်ကုန်မြို့တွင် မုတ်သုံမိုး စိုစိုစွတ်စွတ်အောက်တွင် လူ ဒါဇင်များစွာသည် ဟင်းချက်ဆီ ရရှိရေးအ တွက် တန်းစီတိုးနေကြသည်။ စီးပွားရေးဒုက္ခ ကျရောက်နေသော ရန်ကုန်တွင် ကုန်စည်များစွာနည်းတူ ဈေးကြီးမြင့်နေသည့် ဟင်းချက်စီအတွက် သက်သာဖူလုံ လျှော့ဈေးဖြင့် ရောင်းချပေးသည်ကို ယခုကဲ့သို့ တန်းစီစောင့်ဆိုင်း ဝယ်ယူနေကြခြင်းပဲ ဖြစ်သည်။
ပြီးခဲ့သည့်နှစ် စစ်အာဏာသိမ်းမှုနောက် နိုင်ငံ၏ စီးပွားရေး ထိခိုက်လာနေခဲ့ပြီး စစ်အာဏာသိမ်းအုပ်စု၏ နိုင်ငံခြားငွေကို သိမ်းဆည်းနိုင်ရေး ကြိုးစားခြင်းအပြင် စီးပွားရေးလုပ်ငန်းများနှင့် သွင်းကုန်လုပ်ငန်းများတွင် ခုတစ်မျိုး တော်ကြာတစ်မျိုး စည်းမျဉ်းများ ထုတ်ခြင်းအားဖြင့် တိုင်းပြည်စီးပွားရေးမှာ အကျပ်အတည်း ပိုဆိုက်လာနေသည်။
ယူကရိန်းအား ရုရှကျူးကျော်စစ်ကြောင့် ဖြစ်ပွားသော ကမ္ဘာလုံးဆိုင်ရာ ကုန်စည်ဈေးနှုန်း မြင့်တက်မှုသည် မြန်မာနိုင်ငံက ပြည်သူများ၏ နေ ထိုင်မှုဘဝများကို ရိုက်ခတ်နေပြီး တော်တော်များများမှာ ရုန်းကန်နေကြရကာ စားပွဲပေါ် ထမင်းနှင့် ဟင်း တည်ခင်းနိုင်ရန်အတွက် သက်သာဈေး ရောင်းချသော သို့မဟုတ် အလှူအတန်းများကို အားထားနေရသည်။
“အစားအသောက်အတွက် လူတွေက ဝင်ငွေရဲ့ တော်တော်များများကို မသုံးနိုင်တော့ဘူး၊ ဘာကြောင့်လည်းဆိုတော့ ကုန်ဈေးနှုန်းတွေ တက် နေလို့ပဲ”ဟု ပြည်တွင်းအဖွဲ့အစည်းတစ်ရပ်က သက်သာဈေးဖြင့် ရောင်းချသော ဆီကို ပလတ်စတစ်ဘူးဖြင့် ဝယ်ယူရန် စောင့်ဆိုင်းနေသော အသက် ၅၅ နှစ်အရွယ် အိမ်ရှင်မ ဒေါ်ခင်ခင်သန်းက ပြောသည်။
ဟင်းချက်ဆီဈေးသည် ဈေး၌ ၁ ဒသမ ၆ ကီလိုဂရမ်ကို ကျပ် ၅၀၀၀ မှ ကျပ် ၉၀၀၀ သို့ ထိုးတက်သွားကြောင်း ၎င်းက ပြောသည်။
“တစ်ယောက်တည်း အလုပ်လုပ်တယ်ဆိုရင်တော့ မိသားစု တစ်စု စားလောက်အောင် ရမှာ မဟုတ်ဘူး”ဟု ဒေါ်ခင်ခင်သန်းက ပြောသည်။
နိုင်ငံလူဦးရေ၏ ၄၀ ရာခိုင်နှုန်းနီးပါးသည် အမျိုးသား ဆင်းရဲမှုမျဉ်းအောက် နေထိုင်နေရကြောင်း ကမ္ဘာ့ဘဏ်က ဇူလိုင်လအတွင်းက ပြောထားသည်။
စားသုံးသူဈေးနှုန်းအညွှန်းကိန်း ဖောင်းပွမှုသည် မတ်လ၌ တစ်နှစ်ကထက် ၁၇ ဒသမ ၃ ရာခိုင်နှုန်းထိ ရှိခဲ့ကြောင်း ကမ္ဘာ့ဘဏ်က ဆိုသည်။
နိုင်ငံ၏ နယ်မြေတော်တော်များများသည် စစ်တပ်နှင့် စစ်အာဏာသိမ်းမှု ဆန့်ကျင်ရေး တော်လှန်ရေးသမားများ၏ တိုက်ပွဲနယ်မြေများအဖြစ် ပြောင်းလဲသွားချိန်မှာပင် ဆန်ဈေးနှုန်းသည် သယ်ယူပို့ဆောင်ရေးစရိတ် များပြားခြင်းကြောင့် ထိုးတက်နေသည်။
နိုင်ငံပိုင် Global New Light of Myanmar သတင်းစာကပင် ဆန်၊ ကြက်ဥ၊ ဟင်းသီးဟင်းရွက်၊ ကားခနှင့် အိမ်ငှားခများ မြင့်တက်နေသည်ကို နေ့စဉ်နီးပါးမျှ ဖော်ပြနေသည်။
ပြီးခဲ့သည့်သီတင်းပတ်က ဒီဇယ် တစ်လီတာ ဈေးနှုန်းသည် ညတွင်းချင်းပင် အမေရိကန်ဒေါ်လာ ခြောက်ဆင့်နီးပါး မြင့်တက်ပြီး တစ်လီတာ ကျပ် ၂၄၄၀ (အမေရိကန်ဒေါ်လာ ၁ ဒသမ ၁၅ ဒေါ်လာ) ရှိသည်ဟု နိုင်ငံပိုင် မီဒီယာက ဖော်ပြသည်။
ပြီးခဲ့သည့်နှစ် အာဏာမသိမ်းခင်က ရန်ကုန်နေ ဝယ်ယူသူများသည် ဆီတစ်လီတာအတွက် ၆၉၅ ကျပ်သာ ပေးခဲ့ရခြင်းဖြစ်ကြောင်း လုပ်ငန်းဆိုင်ရာ အချက်အလက်များအရ သိရသည်။
မဟာမိတ် ရုရှဆီမှ လောင်စာဝယ်ယူရေးအတွက် ကြီးကြပ်ကော်မတီ တစ်ရပ်ကို ဖွဲ့စည်းကြောင်း ယခုသီတင်းပတ်အတွင်း စစ်အာဏာသိမ်းအုပ်စုက ကြေညာသော်လည်း မည်သည့်အချိန်နှင့် မည်သို့ အစပြုမည်ဆိုခြင်းကို အသေးစိတ် မထုတ်ပြန်ပေ။
လူတော်တော်များများမှာ ဝမ်းဖြည့်တင်းနိုင်ရေးအတွက် အလှူအတန်းများကို မှီခိုနေရတော့သည်။
“ကျွန်မတို့ အိမ်မှာ ချက်မယ်ဆို လျှပ်စစ်မီးလည်း မရှိဘူး၊ ဆန်ဝယ်ဖို့ကလည်း ဈေးကြီးတယ်”ဟု ဟင်းနှင့် ထမင်း အခမဲ့ ဝေသော ဘုန်းကြီး ကျောင်းတစ်ကျောင်းတွင် စီတန်းနေသူ ရာပေါင်းများစွာမှ အသက် ၆၈ နှစ်အရွယ် ဒေါ်လေးလေးက ပြောသည်။
“ပင်စင်စားတွေအတွက်ဆို စားဖို့ ချက်ရပြုတ်ရမှာ အရမ်း ဈေးကြီးတယ်”ဟု ၎င်းက ဆိုသည်။
အဆိုပါ ထမင်းနှင့် ဟင်း လှူဒါန်းသော ဘုန်းကြီးကျောင်းတွင် ဘုန်းကြီးများက ၎င်းတို့အား လှူဒါန်းထားသည်များကို ချက်ပြုတ်ပြီး နေ့စဉ် လူ ၅၀၀ အား ကူပွန်ပေးကာ ပြန်လည်ဝေငှမှု ပြုနေခြင်း ဖြစ်သည်ဟု အလှူအား ကြီးကြပ်သည့် အရှင် ဥတ္တမသီရိက ပြောသည်။
“ဒါပေမဲ့ တစ်ချို့နေ့တွေမှာဆိုရင် လူ ခြောက်ရာလောက်ကို ကျွေးမွေးရတယ်၊ ထမင်းနဲ့ ဟင်း ကုန်သွားရင် ကိတ်မုန့်တွေ၊ မုန့်ပဲသရေစာတွေနဲ့ သစ်သီးတွေ ဝေပါတယ်”ဟု ၎င်းက မိန့်သည်။
“လူတွေ အများကြီးကို ကိုယ်တော်က ခိုလှုံရာ မပေးနိုင်ပါဘူး၊ ဒါပေမဲ့ ကိုယ်တော် စားရသလိုပဲ လူတွေကို အစားအစာအတွက် လှူဒါန်းဝေမျှပါတယ်”ဟု အရှင် ဥတ္တမသီရိက မိန့်ကြားခဲ့သည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 