SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

Bago Weekly ဂျာနယ်သတင်းထောက်ရဲ့ ဇနီးဖြစ်သူ မဝေဝေလွင်ကို သြဂုတ် ၁၉ ရက်နေ့ နေ့လယ်ပိုင်းက သာယာဝတီအကျဥ်းထောင်အထူးတရားရုံးကနေ အကြမ်းဖက်တိုက်ဖျက် ရေးဥပဒေပုဒ်မ ၅၀ (ည) နဲ့ ထောင်ဒဏ် ၁၀ နှစ်ချမှတ်လိုက်တယ်လို့ တရားလွှတ်တော်ရှေနေတဦးက ဒီဗွီဘီကို ပြောပါတယ်။

“ဖမ်းပြီး ကိုးလလောက်ကြာမှ အခုအမိန့်ချတာပေါ့။ အမိန့်ချတာများတယ်၊ သူ့ယောကျ်ား ကိုငြိမ်းချမ်းဝေကိုလည်း ထောင်ဒဏ် ၁၄ ချထားတာ စိတ်ထဲမကောင်းဘူး။”

ထောင်ဒဏ် ၁၀ နှစ် အမိန့်ချခံရတဲ့ မဝေဝေလွင်ဟာ ပြီးခဲ့တဲ့နှစ် နိုဝင်ဘာ ၂၇ ရက်နေ့က လက်ပံတန်းမြို့နယ် တရားရုံးကို ခင်ပွန်းဖြစ်သူရဲ့ ရုံး ချိန်းလာရာမှ စစ်ကောင်စီတပ်ရဲ့ ဖမ်းဆီးခံခဲ့ရတာပါ။

“အဲ့တုန်းက ကိုငြိမ်းချမ်းဝေ ရုံးချိန်းမှာ စရဖတွေနဲ့ စစ်တပ်နဲ့ဖမ်းသွားတာ၊ မိသားစုနဲ့လည်း အဆက်အသွယ်မရဘူး၊ သာယာဝတီထောင်ကိုပို့မှ သိတာ” လို့ ပြောပါတယ်။

ခင်ပွန်းဖြစ်သူ  Bago Weekly ဂျာနယ်သတင်းထောက် ကိုငြိမ်းချမ်းဝေကိုလည်း ၂၀၂၁ ခုနှစ်   မတ် ၁၉ ရက်က စစ်ကောင်စီတပ်တွေက ဖမ်း ဆီးခဲ့ပြီး ပြီးခဲ့တဲ့လပိုင်းက သာယာဝတီအကျဥ်းထောင်ရှိ အထူးတရားရုံးမှာပဲ ပုဒ်မ  ၁၂၄ (ဂ) ပုဒ်မ – ၅၀၅ (က) နဲ့ ထောင်ဒဏ် ၁၄ နှစ်ချမှတ်ခဲ့တာဖြစ်ပါတယ်။

စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ သတင်းရယူရင်း ဖမ်းဆီးခံရတဲ့ သတင်းထောက် ၁၁၂ ဦးရှိပြီလို့ Myanmar Press Freedom in-Depth ရဲ့ ထုတ်ပြန်ချက်အရ သိပါတယ်။  DVB

စစ်ကိုင်းတိုင်း ခင်ဦးမြို့နယ် မဒေါင်းလှရွာတွင် တပ်စွဲထားသော အကြမ်းဖက် စစ်တပ်ကို ဒေသခံ ကာကွယ်ရေးတပ်ဖွဲ့များက ယနေ့ သြဂုတ်လ ၂၀ ရက်နေ့ မွန်းလွဲ ၂ နာရီခန့်တွင် ဒရုန်းဖြင့် ဗုံးသီးချပြီး ဝင်ရောက် ပစ်ခတ် တိုက်ခိုက်ခဲ့ကြောင်း Royal Tiger Guerrilla Force အဖွဲ့မှ တာ ဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

အဆိုပါ အကြမ်းဖက် စစ်တပ် တပ်စွဲထားသော မဒေါင်းလှရွာကို Royal Tiger Guerrilla Force အဖွဲ့နှင့် မဟာမိတ် အဖွဲ့ တစ်ဖွဲ့မှ တိုက်ခိုက်ခဲ့ခြင်းဖြစ်ပြီး စစ်သားများ ထိခိုက်သေဆုံးမှုရှိသော်လည်း အရေအတွက် အတည်မပြုနိုင်သေးကြောင်း သိရသည်။

” စစ်တပ် အခိုင်အမာချထားပြီး ပျူတွေကို အဓိကမွေးထုတ်ပေးနေတဲ့ မဒေါင်းလှ ပျူရွာကို ကျွန်တော်တို့ Royal Tiger Guerrilla Force အ ဖွဲ့ နဲ့ အခြားသော မဟာမိတ် တစ်ဖွဲ့များမှ မြေပြင်ရော ဝေဟင်ရော တိုက်ခိုက်ခဲ့ပါတယ်။ တိုက်ပွဲက မိနစ် ၃၀ ခန့်ကြာခဲ့တယ်။ သူတို့ဘက်က လက်နက်ကြီး အဆမတန် ပစ်ခတ်လို့ အထိအခိုက်မရှိ ပြန်လည် ဆုတ်ခွာခဲ့ရပါတယ်။ စစ်ခွေးတွေ အကျအဆုံးများနိုင်ပါတယ်ဗျ Drone ချတာတွေက သူတို့ရှိနေတဲ့ ပစ်နေတဲ့ နေရာတွေကို ချနိုင်ခဲ့လို့ အများအပြားထိနိုင်ပါတယ်” ဟု ဒေသခံ Royal Tiger Guerrilla Force အဖွဲ့မှ တာဝန်ရှိသူ တစ်ဦးက ပြောဆိုသည်။ khit thit

ရခိုင်ပြည်နယ်၊ စစ်တွေမြို့မှ ပရဟိတ အသင်းတစ်ခုဖြစ်သည့် မေတ္တာရောင်ခြည်မှ လူငယ်များကို ခွင့်ပြုချက်မရရှိဘဲ အလှူငွေကောက်ခံခြင်းမလုပ်ရန် စစ်ကောင်စီလက်အောက်ခံရဲက ခေါ်ယူ သတိပေးခဲ့ကြောင်း သိရသည်။

စစ်တွေမြို့ ဘီးလူးမတံတားအနီး လမ်းမထက်မှ နေ၍ အလှူငွေကောက်ခံနေသည့် လူငယ် ၂၀ကျော်ကို စစ်တွေမြို့ အမှတ်(၁)ရဲစခန်းကို ခေါ်ယူခဲ့ခြင်းဖြစ်ကာ နောက်ထပ် အလှူငွေမကောက်ခံရန် ခြိမ်းခြောက်ပြောဆို၍ လက်မှတ်ထိုးခိုင်းခဲ့ကြောင်း မေတ္တာရောင်ခြည်အသင်းမှ တာဝန်ရှိသူတစ်ဦးက ပြောသည်။

“ဘီလူးမ တံတားနားက ပိတ်ရပ်ပြီးတော့ စခန်းကို လိုက်ခဲ့ဖို့ခေါ်တယ်။ ရဲဝတ်စုံနဲ့က လေးယောက်၊ အရပ်ဝတ်နဲ့ သုံးယောက်ပါတယ်။ ကြည့်ရတာ ကျနော်တို့ကို နောက်က စောင့်ကြည့်နေတယ်လို့ ထင်တာပဲ။ ကျနော်တို့ကို ဖမ်းပြီးတော့ နောက်ထပ် အလှူထပ်မခံဖို့ ပြောတယ်။ နောက်တစ်ခေါက်အလှူခံရင် ကားတွေကိုလည်း သိမ်းမယ်လို့ပြောတယ်။ အခုတော့ ကျနော်တို့ကို လက်မှတ်ထိုးခိုင်းပြီးတော့ ပြန်လွှတ်လိုက်ပါတယ်” ဟု ၎င်းက ဆိုသည်။

လက်ရှိဖြစ်ပွားနေသည့် ရက္ခိုင့်တပ်တော်(AA) နှင့် စစ်ကောင်စီတပ်တို့ တိုက်ပွဲကြောင့် အရေးပေါ် အကူအညီလိုအပ်နေသည့် စစ်ဘေးရှောင်များကို ကူညီရန်အတွက် အရေးပေါ် အလှူငွေ ကောက်ခံခြင်းကို ယခုကဲ့သို့ ရဲစခန်းမှ ဖမ်းဆီး၊ သတိပေးခြင်းမှာ မဖြစ်သင့်ကြောင်း ၎င်းက ဆက်လက်ပြောသည်။

“ကျနော်တို့ကို အားကိုးနေတဲ့ စစ်ဘေးရှောင်တွေကလည်း ရှိနေတော့ တစ်ခုမဟုတ် တစ်ခုကတော့ ကျနော်တို့ လုပ်ရမှာပါပဲ၊ အခု ဘူးသီးတောင်ဖက်က အရေးပေါ် ဆန်တွေ၊ စားနပ်ရိက္ခာတွေ အကူညီတောင်းနေတာရှိတယ်။ ကျနော်တို့လည်း သွားဖို့လုပ်နေတာတွေရှိတယ်။ ခုလိုအရေးပေါ် အကူညီတောင်းနေတဲ့အချိန်မှာ စာတင်ရမယ့်ဟာတွေ စာကျလာမယ့်ဟာတွေကို ကျနော်တို့ စောင့်နေဖို့ အချိန်မရှိပါဘူး” ဟု ၎င်းက ဆိုသည်။

ရသေ့တောင်၊ပလက်ဝ၊ မောင်တောဖက်မှ စစ်ဘေးရှောင်လာသူများမှာ စစ်ကောင်စီထံမှ အကူညီမရရှိသည့်အတွက် ပရဟိတ အသင်းများထံမှ အကူညီတောင်းခံလာသည့်အတွက် အလှူငွေကောက်ခံကာ စစ်ဘေးရှောင်များကို ကူညီနေခြင်းဖြစ်ကြောင်း သိရသည်။

မေတ္တာရောင်ခြည်အသင်းအနေဖြင့် စစ်ကောင်စီထံသို့ စာတင်ရသည်မှာ အချိန်ကြန့်ကြာနေမည်ဖြစ်သည့်အတွက် အရေးပေါ်စစ်ဘေးရှောင်များအတွက် အလှူခံခဲ့ခြင်းဖြစ်ကြောင်း သိရသည်။

ဆက်လက်ပြီး ယင်းတာဝန်ရှိသူက “ကျနော်တို့က ကိုယ်ကျိုးကိုစွန့်ပြီး ပရဟိတလုပ်နေကြတဲ့လူတွေကိုမှ လာပြီးတော့ မျက်စိကျတာမျိုးက လုံးဝမဖြစ်သင့်ဘူး။ နောက်ပြီး အခုက လူနာတင်ကားတွေကိုပါ လိုက်ပြီးတော့ သိမ်းမယ်ဆိုတာက ကျနော်တို့ ကားတွေအတွက် မနည်းလုပ် ဆောင်ထားရတာ။သူတို့က အဲဒါကို သိမ်းမယ်ပြောတော့ ကျနော်တို့က ဒေါသ တအားဖြစ်တယ်။ စစ်တွေမြို့က ဒုစရိုက်မှုတွေကို တစ်ခုမှ မလုပ်ဘဲ ပရဟိတ လုပ်နေတဲ့လူတွေကို မျက်စိကျတာ မဖြစ်သင့်ဘူး၊ သူတို့အတွက်လည်း တစ်ခုမှ ထိခိုက်နစ်နာတာမရှိဘူး။ အခုလို အဖျက်လုပ်တာကို စိတ်မကောင်းလည်းဖြစ်တယ်၊ ဒေါသလည်းထွက်တယ် ”ဟု ဆိုသည်။

သို့သော် မေတ္တာရောင်ခြည်အသင်းအနေဖြင့် ဆက်လက်ပြီး စားဝတ်နေရေး အခက်အခဲဖြင့် ရင်ဆိုင်နေရသည့် စစ်ဘေးရှောင်များအတွက် online မှတစ်ဆင့် အလှူငွေကောက်ခံသွားမည်ဖြစ်ကြောင်း သိရသည်။

ရက္ခိုင့်တပ်တော် နှင့် စစ်ကောင်စီတို့ ပလက်ဝ၊ မောင်တော၊ ရသေ့တောင်စသည့် မြို့နယ်များတွင် တိုက်ပွဲဖြစ်ပွားနေသည့်အတွက် စစ်ဘေးရှောင်များ တိုးလာနေခြင်းဖြစ်သည်။

ရခိုင်ပြည်နယ်တွင် ၂၀၁၈ခုနှစ်မှ ၂၀၂၀ ခုနှစ်အထိ တိုက်ပွဲများကြောင့် နေရပ်မပြန်နိုင်ခဲ့သည့် စစ်ဘေးရှောင်ဦးရေ ၄၀,၀၀၀ ကျာ် ကျန်ရှိနေခြင်းဖြစ်ကာ လက်ရှိ ၂၀၂၂ခုနှစ်၊ မေလမှ စတင်ကာ ဖြစ်ပွားလာသည့် တိုက်ပွဲများကြောင့် စစ်ဘေးရှောင်ဦးရေ ၄,၀၀၀ ကျော်ခန့် တိုးလာနေပြီး လက်ရှိတွင်စစ်ဘေးရှောင် ၅၀,၀၀၀ ခန့်အထိရှိနိုင်ကြောင်း သိရသည်။ mizzima

မွန်ပြည်နယ်  ရေးမြို့နယ်ရှိ  မြို့ပေါ်ရပ်ကွက်တချို့တွေမှာ အခုရက်ပိုင်း လုံခြုံရေးယူနေတဲ့ စစ်ကောင်စီတပ်ဖွဲ့ဝင်က ဒေသခံတချို့အား မ သင်္ကာမှုနဲ့ ခေါ်ယူရိုက်နှက် စစ်ဆေးတာတွေ ပြုလုပ်နေတယ်လို့ မြို့ခံတွေက ပြောပါတယ်။

“ညဘက်ဆိုပေမဲ့ အလုပ်က ပြန်လာတာ နောက်ကျတယ်။ လမ်းမှာ စစ်ကောင်စီတပ် ရဲ့လှည့်ကင်းသမားတွေနဲ့ဆုံရင် ညက ၇ နာရီကျော်ပဲ ရှိသေးတယ်၊ ဒါလည်း မသင်္ကာရင် စစ်တယ် ရိုက်တယ်။ အခုချိန်မှာ ဘယ်သူ့ကို ကြောက်ရမှန်းမသိ၊ ၀မ်းစာရေးကလည်းရှိတော့ ဒါကို နားမလည်နိုင်ကြဘူး” လို့ ဒေသခံတားက ပြောပါတယ်။

စစ်ကောင်စီတပ်တွေ အဓိက ရေး -ချောင်းတောင်မြစ်ကူးတံတားလုံခြုံရေး ကင်းစခန်းနဲ့ အနီးနားနေရာတွေဖြစ်တဲ့ ရွှေ့ပြောင်းလုပ်သားတွေ သာမန်လက်လုပ်လက်စားတွေ နေထိုင်တဲ့ အရပ်ဒေသဘက်တွေမှာ ပိုမိုလုံခြုံရေး တင်းကျပ်ပြီး အခုလို ပြုလုပ်နေတာလို့  ဆိုပါတယ်။ 

စစ်ကောင်စီတပ်ဖွဲ့ဝင်တွေဟာ PDF တွေရဲ့ မကြာခဏ အလစ်ငိုက် ဝင်ရောက်တိုက်ခိုက်တာ ခံရလေ့ရှိတာကြောင့် ည ၇ နာရီကျော်တာနဲ့  အရင်ကထက်လုံခြုံရေး တင်းကျပ်ထားတာကြောင့် ဘယ်သူမှ နေအိမ်အပြင်ဘက်တွေ မသွားရဲမလာရဲကြဘူး ဖြစ်နေတယ်လို့ ဒေသခံတွေက ပြောပါတယ်။ 

ရေးမြို့နယ်မှာ ညမထွက်ရ အမိန့်ကို ည ၈ နာရီကနေ မနက် ၄ နာရီအထိ သတ်မှတ်ထားပြီး ဌာနဆိုင်ရာ ရုံးရှိတဲ့ လမ်းနေရာတွေမှာ ကင်းစခန်းတွေထားရှိကာ ဆိုင်ကယ်စီးနင်းပါက အမျိုးသား ၂ ဦး မစီးရ၊ မလိုက်နာသူတွေကို ရာဇေသတ်ကြီး ပုဒ်မ ၁၈၈ အရ အရေးယူသွားမယ်လို့ စစ်ကောင်စီက ဒေသန္တရအမိန့်ကို ထုတ်ပြန်ထားပါတယ်။ DVB

မကွေးတိုင်းတွင် စစ်ကောင်စီက စေလွှတ်လိုက်သော စစ်ထောက်လှမ်း ရေးတစ်ဦးကို ကို မြိုင်-ပခုက္ကူလမ်းပိုင်းတွင် ဖမ်းဆီးရမိပြီး ခုခံသဖြင့် ပစ်ခတ်ဖမ်းဆီးရာမှ သေဆုံးကြောင်း မြိုင်ပြည်သူ့ကာကွယ်ရေးတပ်ဖွဲ့က သတင်းထုတ်ပြန်သည်။

မြိုင်မြို့နယ်ပြည်သူ့ကာကွယ်ရေးတပ်ဖွဲ့သည် ယနေ့ တွင် စစ်ကောင်စီက စေလွှတ်လိုက်သော စစ်ထောက်လှမ်းရေးတစ်ဦးကို ဩဂုတ်လ ၂၀ ရက် ညနေ ၅ နာရီခန့်အချိန်တွင် မြိုင်-ပခုက္ကူလမ်းပိုင်း၌ ဖမ်းဆီးရမိခဲ့ကြောင်း၊ ယင်းစစ်ထောက်လှမ်းရေးထံမှ သိမ်းဆည်းရမိသောပစ္စည်းများမှာ စာရွက်စာတမ်းများ၊ Gopro Hero 9 ကင်မရာ (၁)လုံးနှင့် စပ်ဆက်ပစ္စည်းများ၊ 4k video camera (၁)လုံး၊ BOYA M1 မိုက်ကရိုဖုန်း (၁)ခု၊ DJI OM4 (၁)ခု၊ Spy camera glass (၁)ခု၊ Tripod (၁)ခု၊ Gopro Hero 9/10 waterproof (၁)ခု၊ အားသွင်းကြိုးမျိုးစုံ၊ ပိုက်ဆံအိတ် (၁)အိတ်၊ ဖုန်း (၁)လုံး နှင့် ကင်မရာစပ်ဆက်ပစ္စည်းများ သိမ်း ဆည်းရမိခဲ့ကြောင်း သိရှိရသည်။

စာရွက်စာတမ်းများတွင် ကြာအင်းဆိပ်ကြီး၊ အမှတ် ၃၂ ခြေလျင်တပ်ရင်းမှ ဗိုလ်ဆန်းဝင်းအောင်ဆိုသော စာရွက် စာတမ်းများကို ဖမ်းဆီးရိကြောင်း သိရှိရသည်။

ယင်းစစ်ထောက်လှမ်းရေးသည် ပြည်သူ့ကာကွယ်ရေးရဲဘော်များကို ပြန်လည်ခုခံထွက်ပြေးသဖြင့် ပစ်ခတ်ဖမ်းဆီးရာမှ အသေဖမ်းဆီးမိကြောင်း သတင်းထုတ်ပြန်ထားသည်။ khit thit

သစ္စာဦးခရီးသည်တင်ကား (Express)ပေါ်တွင်M-4သေနတ်အပါအဝင် လက်နက်များတွေ့ရှိခဲ့သည်ဟုဆိုကာ စစ်ကောင်စီက ကားယာဥ်မောင်း၊ယာဉ်နောက်လိုက်(စပယ်ယာ)နှင့် ကားဂိတ်စာရေးမ နှစ်ဦးကိုပါ ဖမ်းဆီးထားကြောင်း သိရသည်။

ယမန်နေ့ သြဂုတ်လ ၁၉ရက်နေ့က ရန်ကုန်-ရေဦး ပြေးဆွဲနေသည့် သစ္စာဦးခရီးသည်တင်ယာဥ်ကို မုံရွာမြို့နယ်၊ရေအိုးစင်ကျေးရွာအနီးတွင် စစ်ကောင်စီတပ်ဖွဲ့က တားမြစ်စစ်ဆးခဲ့ရာ M-4သေနတ်တစ်လက်၊ပစ္စတို လေးလက်၊၉-မမ ကျည်ဆန် အတောင့် ၅၀၀ ကျော်၊ဒရုန်းတစ်စီးတို့ကို ဖမ်းဆီးရမိခဲ့သည်ဟု စစ်ကောင်စီဘက်က ထုတ်ပြန်ခဲ့သည်။

ယာဉ်မောင်းအချို့၏ ပြောကြားချက်အရ ယမန်နေ့ သြဂုတ်လ ၁၉ရက်နေ့က စစ်ကောင်စီသည် ရန်ကုန်-ရေဦးပြေးဆွဲနေသည့် ခရီးသည်တင်ကား ငါးစီးကို တားဆီး၍ မုံရွာ နမခစစ်တိုင်း ဘောလုံးကွင်းအတွင်းတွင် စစ်ဆေးခဲ့ကြောင်း သိရသည်။

ညနေ ၆နာရီခန့်တွင် ကျန်ကားလေးစီးကို ပြန်လွှတ်ခဲ့ပြီး သစ္စာဦးမော်တော်ယာဉ်မောင်းသူ နှင့် ယာဉ်နောက်လိုက်(စပယ်ယာ)တို့ကို ဖမ်းဆီးထားကြောင်း သိရသည်။

ထို့အပြင် သစ္စာဦးရန်ကုန်ဂိတ်မှ စာရေးမ အမျိုးသမီးနှစ်ဦးကိုလည်း စစ်ကောင်စီက ဖမ်းဆီးသွားကြောင်း နီးစပ်သူများထံက သိရသည်။

စစ်ကောင်စီက လတ်တလောတွင် စစ်ကိုင်းတိုင်းအတွင်း ခရီးသည်တင်ကားများ အပါအဝင် အိမ်စီးကားများကိုပါ အတင်းအကျပ်စစ်ဆေးမှုများ ပြုလုပ်နေပြီး ပြီးခဲ့သည့်ရက်ပိုင်းကလည်း စစ်ကိုင်းတံတားထိပ်တွင် အာကာသယာဥ်ပေါ်မှ လက်နက်များမိသည်ဟု စစ်ကောင်စီဘက်က ကြေညာထားသည်။

အဆိုပါဖြစ်စဥ်တွင် စစ်ကောင်စီတပ်ဘက်က ပစ်ခတ်မှုကြောင့် ခရီးသွားပြည်သူတချို့ သေဆုံးသည့်ဖြစ်ရပ် ဖြစ်ပွါးခဲ့သေးသည်။ mizzima

မကွေးတိုင်း ဆိပ်ဖြူမြို့နယ်အခြေစိုက် စစ်ကောင်စီရဲ့ ကာကွယ်ရေးနှင့် စစ်လက်နက်ပစ္စည်း ထုတ်လုပ်ရေး စက်ရုံ က.ပ.စ ၂၁ မှာ သြဂုတ် ၁၄ ရက် ညနေပိုင်းက ပေါက်ကွဲမှု ဖြစ်ပွားပြီး အဆောက်အအုံ ၂ ခု မီးလောင်ခဲ့တယ်လို့ ဒေသခံကာကွယ်ရေးတပ်ဖွဲ့တွေ က ပြောပါတယ်။

“က.ပ.စ ၂၁ မှာ သြဂုတ် ၁၄ ရက် ညနေ ၄ နာရီလောက်မှာ ပေါက်ကွဲသံ တချက်ကြားလိုက်ပြီး မီးခိုးလုံးတွေ တက်လာတယ်။ အဲဒီနားမှာက လေ ကြောင်းရန်ကာကွယ်ရေးတပ်တွေရော၊ စစ်ကောင်စီတပ်တွေရော အများကြီးရှိတော့ စစ်ကားတွေ အများကြီး ရောက်လာတယ်။ အဲဒီနယ်​မြေက ကျနော်တို့ ဆိပ်ဖြူဘာမထီးပြောက်ကျားတပ်ဖွဲ့ စိုးမိုးနယ်မြေဖြစ်ပေမဲ့ ကျနော်တို့ဘက်က တိုက်ခိုက်တာတော့ မဟုတ်ဘူး။ သူတို့ဘက်ကတော့ ပေါ့ဆမီးကြောင့် မီးလောင်တယ်လို့ပဲ သတင်းထွက်လာတယ်။ ဒါပေမယ့်လည်း သူတို့တပ်တွင်းထဲမှာတော့ အတွင်းလူက လုပ်တယ်ဆိုပြီး စုံခုံဖွဲ့ပြီး စစ်ဆေးနေတယ်လို့တော့ ကြားတယ်” လို့ ဆိပ်ဖြူ ဘာမထီပြောက်ကျားတပ်ဖွဲ့ရဲ့ တပ်ခွဲမှူး ကိုပိုင်က ဒီဗွီဘီကိုပြောပါတယ်။

အဲဒီပေါက်ကွဲမှုကြောင့် အဆောက်အအုံ ၂ လုံး မီးလောင်ကျွမ်းတယ်လို့ သိရပြီး ထိခိုက်သေဆုံးတဲ့ အခြေနေကိုတော့ အတွင်းလူကို ဆက်သွယ်ချိတ်ဆက်နေပေမဲ့ အဆက်သွယ်မရသေးဘူးလို့ ဆိုပါတယ်။

ကန်ဇွန်းမကျေးရွာ ဒေသခံ တယောက်က “ပေါက်ကွဲသံ တချက်အကျယ်ကြီး ကြားလိုက်ရပြီး ကပစ ၂၁ စက်ရုံဘက်ကနေ မီးခိုးလုံးတွေ မီး တောက်တွေ တက်လာတာ တွေ့ရတယ်။ ညနေ ၄ နာရီလောက်ကနေ မိုးချုပ်တဲ့အထိ လောင်ခဲ့တာ။ ညမိုးချုပ်တဲ့ အချိန်မှာတော့ လက် နက်ကြီးပစ်သံ ၇ ချက်လောက် ကြားရတယ်” လို့ ပြောပါတယ်။

အဲဒီ က.ပ.စ ၂၁ ဟာ လေယာဥ်နဲ့ပစ်ရတဲ့ ဗုံးတွေ၊လက်နက်တွေနဲ့ကျည်ဆန်တွေ ထုတ်လုပ်တဲ့ စက်ရုံ တခုလို့ သိရပြီး မီးလောင်ဆုံးရှုံးခဲ့တဲ့ အခြေနေတွေကိုတော့ ဒီဗွီဘီက သီးခြားအတည် မပြုနိုင်သေးဘဲ ဆက်လက်စုံစမ်းနေပါတယ်။ DVB

မကွေးတိုင်း ပေါက်မြို့နယ် မြောက်ပိုင်းရှိ ညောင်ရင်း၊ စသိန်း၊ ဂွေးဂုံ ကျေးရွာတို့ကို အကြမ်းဖက် စစ်တပ်က ယနေ့ သြဂုတ်လ ၂၀ ရက်နေ့တွင် မီးရှို့ဖျက်ဆီးနေပြီး ပြည်သူပိုင် နေအိမ် ၂၄ လုံး မီးလောင်ပြာကျခဲ့ကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

အကြမ်းဖက် စစ်တပ် စစ်ကြောင်းသည် သြဂုတ်လ ၁၉ ရက်နေ့တွင် အင်အား ၁၅၀ ခန့်ဖြင့် ညောင်ရင်းရွာကို ဝင်ရောက် စီးနင်းခဲ့ပြီး ပြည်သူပိုင် ပစ္စည်းများကို ခိုးယူပြီးနောက် စသိန်းရွာနှင့် ဂွေးဂုံရွာတို့ကိုလည်း ထပ်မံ စီးနင်းခဲ့ကာ ပစ္စည်းများကို ခိုးယူခဲ့ပြီး ယနေ့ သြဂုတ်လ ၂၀ ရက်နေ့တွင် အဆိုပါ ကျေးရွာ ၃ ရွာကို မီးရှို့ဖျက်ဆီးခဲ့ခြင်းဖြစ်ကြောင်း သိရသည်။

ညောင်ရင်းရွာကို အကြမ်းဖက် စစ်တပ်က သြဂုတ်လ ၂၀ ရက်နေ့ နံနက် ၉ နာရီခန့်တွင် မီးရှို့ဖျက်ဆီးခဲ့ပြီး စသိန်းရွာနှင့် ဂွေးဂုံရွာကို အကြမ်း ဖက် စစ်တပ်က ယနေ့ မွန်းလွဲပိုင်းတွင် ထပ်မံ မီးရှို့ဖျက်ဆီးခဲ့ကာ ပြည်သူပိုင် ပစ္စည်းများကို စစ်တပ်က ခိုးယူပြီး ရဟတ်ယာဥ်ဖြင့် သယ်ဆောင်သွားကြောင်း သိရသည်။

” စစ်ခွေးတွေက သြဂုတ်လ ၁၉ ရက်နေ့တည်းက စစ်သား ၁၀၀ လောက်နဲ့ ညောင်ရင်းရွာ ထဲကို စစ်ကြောင်းထိုးလာတာပါ။ စစ်ကြောင်းထိုးပြီးနောက်မှာ နံနက်ပိုင်းကနေ စပြီး ညနေပိုင်းအထိ စစ်သားတွေက ညောင်ရင်း၊ စသိန်းနဲ့ဂွေးဂုံ ရွာထဲက ပြည်သူပိုင် ပစ္စည်းတွေ အကုန်လုံးကို ခိုးယူသွားကြတယ်။ အဲလို ခိုးယူပြီးတဲ့နောက် သြဂုတ်လ ၂၀ ရက်နေ့ နံနက် ၉ နာရီကစပြီး ညောင်ရင်းရွာထဲကို စစ်သားတွေ မီးရှို့တာပါ။ စသိန်းနဲ့ ဂွေးဂုံရွာတွေကို သြဂုတ်လ ၂၀ ရက် မွန်းလွဲပိုင်းမှာ မီးဆက်ရှို့တယ်။ ရွာထဲမှာ ကျန်နေခဲ့တဲ့ လူ ၁ ဦးဖမ်းခံရတယ်လို့တော့ သိရတယ်။ အတည်မပြုနိုင်သေးဘူး။ အခု ညနေပိုင်းမှာလည်း စစ်ခွေးတွေ ခိုးယူသွားတဲ့ ကျန်တဲ့ ပစ္စည်းတွေကို ရဟတ်ယာဥ်နဲ့ ထပ်သယ်နေတယ်။ စစ်​ခွေးတွေ ရွာထဲဝင်ပြီးဆို လူတွေက မနေရဲလို့ ထွက်ပြေးကြရပါတယ်။ ရွာထဲကလူတွေထွက်ပြေးကြတော့ စစ်ခွေးတွေက ပြည်သူတွေ ကျန်ခဲ့တဲ့စား နပ်ရိက္ခာတွေ ပစ္စည်းတွေ အကုန်သယ်တာပါ။ ပစ္စည်းသယ်ပြီးမှ ရွာကို မီးရှို့တာပါ။ ဆုံးရှုံးမှုများနိုင်ပါတယ်” ဟု ဒေသခံပြည်သူ တစ်ဦးကပြောဆိုသည်။

အကြမ်းဖက် မီးရှို့ဖျက်ဆီးခြင်းကြောင့် ညောင်းရင်းရွာထဲရှိ ပြည်သူပိုင် နေပိမ် ၁၈ အိမ်ပြာကျခဲ့ပြီး ဂွေးဂုံရွာထဲတွင်လည်း ပြည်သူပိုင်နေအိမ် ၆ လုံးပြာကျသွားကြောင်း ဒေသခံ ပြည်သူများကပြောဆိုသည်။ khit thit

စစ်ကောင်စီသည် မြစ်ကြီးနားမြို့အခြေစိုက် မြောက်ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ် မြသက်ဦးကို အရှေ့တောင်တိုင်းစစ်ဌာနချုပ် တိုင်းမှူးအဖြစ်ပြောင်းလဲ ခန့်အပ်လိုက်ကြောင်း တပ်တွင်း သတင်းရင်းမြစ်များထံက သိရသည်။

ဗိုလ်ချုပ်မြတ်သက်ဦးသည် စစ်တပ်မှ အာဏာသိမ်းခဲ့သည့် ၂၀၂၁ခုနှစ်၊ ဖေဖော်ဝါရီလ ဆန်းပိုင်းတွင် မြောက်ပိုင်းတိုင်းစစ်ဌာနချုပ်၏ တိုင်းမှူးဖြစ်လာခဲ့သူဖြစ်ပြီး စစ်ကောင်စီ၏ မြောက်ပိုင်းစစ်မျက်နှာကို အဓိကတာဝန်ခံရသူဖြစ်သည်။

သို့သော်လည်း မြောက်ပိုင်းစစ်မျက်နှာတွင် ကချင်လွတ်မြောက်ရေးတပ်မတော် (KIA) ဦးဆောင်သည့် ပြည်သူ့ကာကွယ်ရေး ပူးပေါင်းတပ်ဖွဲ့ဝင်များ၏ ပူးပေါင်းတိုက်ခိုက်မှုကြောင့် စစ်ကောင်စီတပ်များ ထိခိုက်ကျရှုံးမှုများပြားခဲ့သည်။

ထို့ပြင် စစ်ကောင်စီ၏ထောက်ပို့ရေးလမ်းကြောင်း၊ နယ်မြေခံတပ်ရင်းများအပါအဝင် စစ်သင်တန်းကျောင်းများနှင့် မြစ်ကြီးနားလေတပ်ဌာနချုပ်တို့မကြာခဏ ပစ်ခတ်တိုက်ခိုက် ခံရသည့်အတွက် ယခုကဲ့သို့ စစ်တိုင်းမှူး အပြောင်းအလဲပြု လုပ်ရခြင်း ဖြစ်ကြောင်း တပ်တွင်းသတင်းရင်းမြစ်များက ဆိုသည်။

ယခုအခါ လစ်လပ်သွားသည့် မြောက်ပိုင်းတိုင်းစစ်ဌာနချုပ် တိုင်းမှူးနေရာတွင် ကရင်ပြည်နယ်နှင့် မွန်ပြည်နယ်တို့တွင် စစ်ဆင်ရေးများ တာဝန်ယူ ဆောင်ရွက်လျက်ရှိသည့် အရှေ့တောင်တိုင်း စစ်ဌာနချုပ်တိုင်းမှူး ဗိုလ်ချုပ်ကိုကိုမောင်အား ပြောင်းလဲခန့်အပ် တာဝန်ပေးခဲ့ကြောင်း တပ်တွင်းသတင်းရင်းမြစ်များထံက သိရသည်။

အရှေ့တောင်တိုင်း စစ်ဌာနချုပ်တိုင်းမှူးအဖြစ် တာဝန်ယူမည့် ဗိုလ်ချုပ်မြတ်သက်ဦးသည် စစ်တက္ကသိုလ် အပတ်စဉ် ( ၃၈ ) ကျောင်းဆင်း ကိုယ်ပိုင်အမှတ် ကြည်း – ၂၀၂၇၈ ဖြစ်ပြီး တပ်မ (၇၇) တပ်မမှူး တာဝန် ထမ်းဆောင်ခဲ့သူလည်း ဖြစ်သည်။

လက်ရှိ မြောက်ပိုင်းတိုင်းစစ်ဌာနချုပ် တိုင်းမှူးဖြစ် လာခဲ့သူ ဗိုလ်ချုပ်ကိုကိုမောင်သည် ယခင်က သိန္နီအခြေစိုက် အမှတ် (၁၆) စစ်ဆင်ရေးကွပ်ကဲမှုဌာနချုပ်တွင် ဗိုလ်မှူးချုပ်အဆင့်မှ ၂၀၂၀ မတ်လတွင် အရှေ့တောင်တိုင်းစစ်ဌာနချုပ်၏ တိုင်းမှူးဗိုလ်ချုပ် ရာထူးကို အချိန်တိုအတွင်း ရရှိခဲ့သူ ဖြစ်သည်။

ဗိုလ်ချုပ်ကိုကိုမောင်သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တည်ရှိနေချိန်တွင် မွန်ပြည်နယ်နှင့် ကရင် ပြည်နယ်များ၏ ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီနှစ်ခု၏ ဥက္ကဋ္ဌ တာဝန်များကိုလည်း ယူခဲ့သူဖြစ်သည်။

ဗိုလ်ချုပ်ကိုကိုမောင်တာဝန်ယူခဲ့ရသည့် အရှေ့တောင်တိုင်းစစ်ဌာနချုပ်တိုင်းမှူး လက်အောက်တွင် အမှတ် (၂၂) ခြေမြန်တပ်မဌာနချုပ်နှင့် အ မှတ် (၄၄) ခြေမြန်တပ်မဌာနချုပ် နှစ်ခုအပြင် အမှတ် (၁၂) စစ်ဆင်ရေးကွပ်ကဲမှုဌာနချုပ် နှင့် အမှတ် (၁၉) စစ်ဆင်ရေးကွပ်ကဲမှု ဌာနချုပ် နှစ် ခုလည်း ရှိသည်။

လက်ရှိအချိန်တွင် တပ်မ (၂၂) နှင့် တပ်မ (၄၄) လက်အောက်ခံတပ်ရင်း တပ်ဖွဲ့များကို ကရင်နှင့် မွန်အပြင် အနောက်မြောက်စစ်ဒေသများသို့ စေ လွတ်ထားပြီး အဆိုပါ တပ်ရင်း တပ်ဖွဲ့များသည် ပြည်သူ့ကာကွယ်ရေးတပ်များ၏ တိုက်ခိုက်မှုအောက်တွင် လွန်စွာ အထိနာ၍ ကျရှုံးလျက်ရှိနေသည်။ mizzima