SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မြန်မာနိုင်ငံတွင် ယမန်နှစ် စစ်တပ်အာဏာသိမ်းပြီးနောက်ပိုင်း အလုပ်သမား အစည်းအရုံးများနှင့် အရပ်ဘက်လူမှုအဖွဲ့အစည်းများသည် ပျောက်ကွယ်မည့် ခြိမ်းခြောက်မှုနှင့် ရင်ဆိုင်ရလျက် ရှိကြောင်း ကုလသမဂ္ဂ အစီရင်ခံစာတစ်ရပ်က ဖော်ပြသည်။

ဗိုလ်ချုပ်မှူးကြီး မင်းအောင်လှိုင် ဦးဆောင်သော စစ်တပ်က ၂၀၂၁ ဖေဖေါ်ဝါရီလတွင် အာဏာသိမ်းပြီးနောက် အလုပ်သမား အသင်းအဖွဲ့များနှင့် အခြားသော အရပ်ဘက် လူမှုအဖွဲ့အစည်းများသည် အကြမ်းဖက်ခံရမှု၊ အတင်းအဓမ္မ ဖမ်းဆီးခံရမှုများ၊ စီးနင်းခံရမှုများ၊ သိမ်းဆည်းခံရခြင်းများ၊ ခြိမ်းခြောက်သော ဖုန်းခေါ်ဆိုမှုများနှင့် စောင့်ကြည့်ခံရမှုတို့နှင့် ရင်ဆိုင်ထားခဲ့ရကြောင်း အပြည်ပြည်ဆိုင်ရာ အလုပ်သမားရေးရာအဖွဲ့ (ILO) က ဩဂုတ် ၂၄ ရက်တွင် ထုတ်ပြန်သည့် အစီရင်ခံစာတစ်ရပ်တွင် ဖော်ပြသည်။

အလုပ်သမားများနှင့် ရွှေ့ပြောင်းသွားလာသူများကို အကူအညီပေးနေသည့် အဖွဲ့များကို “ပစ်မှတ်ထား နှိပ်ကွပ်ခြင်း” က ထိုအဖွဲ့များ၏ စီမံခန့်ခွဲ လည်ပတ်လုပ်ကိုင်နိုင်စွမ်းအပေါ် အများအပြား အကန့်အသတ်ဖြစ်စေခဲ့သလို စီစဉ်သူများအနေဖြင့်လည်း ၎င်းတို့၏ လုံခြုံရေးနှင့် ဘေးကင်းရေးအတွက် ၎င်းတို့၏ လုပ်ငန်းဆောင်ရွက်မှုများတွင် အဓိက အပြောင်းအလဲများကို မဖြစ်မနေ လုပ်ကြရကြောင်း ILO က ပြောသည်။

အာဏာသိမ်းမှုနောက်ပိုင်း ပိတ်ပင်ခံရသည့် အဖွဲ့အစည်းများသာမက နာမည်ပျက်စာရင်းတွင် တရားဝင် အသွင်းမခံရသည့် အဖွဲ့များမှာပါ အန္တရာယ်များနှင့် ရင်ဆိုင်နေခဲ့ရပြီး အာဏာသိမ်းစစ်အုပ်စုသည် တစ်ခါတစ်ရံ “အကြောက်တရား ဖြစ်စေခြင်း၊ သတင်းမှား ဖြန့်ခြင်း သို့မဟုတ် လှုံ့ဆော်ခြင်း” စသည့် မူမမှန်သော အကြောင်းပြချက်အောက်တွင် ခေါင်းဆောင်များကို ဖမ်းဆီးမှုများလည်း ရှိခဲ့ကြောင်း ကုလ အေဂျင်စီက ပြောသည်။

မြန်မာနိုင်ငံတွင် အလုပ်သမား အဖွဲ့အစည်းများကို ထိထိရောက်ရောက် ဖွဲ့စည်းနိုင်ခြင်း မရှိတော့သလို အလုပ်သမား အစည်းအရုံးတစ်ခုအဖြစ် တရားဝင် မှတ်ပုံတင်နိုင်မည့် နည်းလမ်းလည်း မရှိကြောင်း အမည်မဖော်လိုသူ အလုပ်သမား အစည်းအရုံး ခေါင်းဆောင်တစ်ဦးက ပြောသည်။

“ပြီးခဲ့တဲ့ ဆယ်စုနှစ်အတွင်း မြန်မာနိုင်ငံမှာ အလုပ်သမား အခွင့်အရေး ကာကွယ်မှုကို တိုးမြင့်စေဖို့ လုပ်ဆောင်ထားနိုင်ခဲ့တဲ့ တိုးတက်မှု အများအပြားအတွက် အလုပ်သမား အစည်းအရုံးတွေနဲ့ အရပ်ဘက်လူ့အဖွဲ့အစည်းတွေက အခြေခံအုတ်မြစ်ကို ထောက်ပံ့ပေးထားခဲ့တာပါ။ လက်ရှိအခြေအနေအရတော့ သူတို့ရဲ့ ဖြစ်တည်မှုအပေါ် ခြိမ်းခြောက်မှုတစ်ခု ဖြစ်နေပါတယ်” ဟု ILO ၏ အာရှ၊ ပစိဖိတ်ဒေသဆိုင်ရာ လက်ထောက် ညွှန်ကြားရေးမှူး ပန်နက်ဒါ ဘွန်းပါလာက ပြောသည်။

“ဒီ အဖွဲ့အစည်းတွေ ဆက်လက်ရှင်သန်ရပ်တည်နိုင်ပြီး သူတို့ရဲ့ အရေးပါတဲ့ အလုပ်ကို ဆက်လုပ်နိုင်စေအောင် နိုင်ငံတကာ အသိုင်းအဝိုင်းအ နေ နဲ့ သူတို့နဲ့အတူ ရပ်တည်သွားရပါလိမ့်မယ်” mizzima

တနင်္သာရီတိုင်း၊ မြိတ်ခရိုင်၊ မြိတ်မြို့နယ်၊ စစ်‌ကောင်စီခန့် ကန်ကြီးရပ်ကွက်ရာအိမ်မှူး သန်းဦး ကို ဩဂုတ်လ ၂၃ ရက်နေ့၊ ညနေ ၃ နာရီဝန်းကျင်အချိန် ကလွင်ကျေးရွာအုပ်စု၊ ကမ်းသာယာရွာ၊ MFDကုမ္ပဏီအနီးတွင် မြိတ်ခရိုင်တပ်ရင်း ၂ က ပစ်ခတ်ရှင်းလင်းကြောင်း အဆိုပါတပ်ရင်းထံမှ သိရှိရသည်။

စစ်ကောင်စီလက်အောက်ခံ ကန်ကြီးရာအိမ်မှူးသန်းဦးကို မြိတ်ခရိုင် တပ်ရင်း(၂)နှင့် မြိတ်ပြည်သူ့ကာကွယ်ရေးအဖွဲ့(ပကဖ)တို့ ပူးပေါင်ရှင်း လင်းခြင်းဖြစ်ကြောင်း တရားဝင် အသိပေးထားသည်။

အလားတူ စစ်ကိုင်းတိုင်းဒေသကြီး၊ ကလေးမြို၊သဇင်ရပ်ကွက်၊ ယာဉ်ထိန်းရဲတပ်စုရုံးရှေ့တွင် ဩဂုတ်လ ၂၄ ရက် နံနက် ၇ နာရီကယာဉ်ထိန်းရဲတပ်သားအောင်မြင့်မောင် ပစ်ခတ်ခံရပြီး သေဆုံးသွားကြောင်း သိရှိရသည်။

ယာဉ်ထိန်းရဲ ရုံးရှေ့လမ်းတစ်ဘက်ခြမ်းရှိ ကောင်းဆက်သွေးဆိုင်မှ မုန့်ဝယ်ပြီးပြန်အထွက်တွင် ရဲတပ်သား အောင်မြင့်မော်ကို ဗိုလ်ချုပ် လမ်းအတိုင်းမောင်းလာသောကားပေါ်မှ သေနတ်ဖြင့် ပစ်ခတ်သွားခြင်းဖြစ်ပြီး ပွဲချင်းပြီး သေဆုံးသွားကြောင်း သိရှိရသည်။

ထို့ပြင် ဧရာ၀တီတိုင်း၊ ဖျာပုံမြို့မှာ ယနေ့ သြဂုတ်လ ၂၃ ရက်နေ့ ​နေ့လည် ၂ နာ ရီ ၁၀ မိနစ်အချိန်က စစ်ကောင်စီ သတင်းပေးနှင့် ရပ်ကွက်ရုံး ဝန်ထမ်း စာရေးမနှင့် သူငယ်ချင်း အမျိုးသမီး ၂ ဦး ပစ်ခတ်ခံရပြီး ​သေဆုံးသွားကြောင်း၊ သေဆုံးသွားသူ ၂ ဦးသည် ဖျာပုံမြို့၊ အမှတ် ၁၅ ရပ် ကွက် အုပ်ချုပ်ရေးမှုးရုံး စာရေး မနှင်းဝေခိုင်နှင့် သူငယ် ချင်းဖြစ်သူ မနိုးနိုးဝေတို့ဖြစ်ကြောင်း သိရှိရသည်။

အဆိုပါ ရှင်းလင်းမှုကို Black Dragon Force Pyapon က လုပ်ဆောင်ခဲ့ခြင်းဖြစ်ကာ စစ်တပ် သတင်း​ပေး မလုပ်ရန် သတိပေးမှု အကြိမ်ကြိမ်ပြုလုပ် ခဲ့ကြောင်း၊ မလိုက်နာသဖြင့် ရှင်းလင်းခြင်းဖြစ်ကြောင်း တရားဝင် သတင်းဝင် သတင်းထုတ်ပြန်ထားသည်။

“၁၅ ရပ်ကွက်ရုံးစာရေးမ နှင်းဝေခိုင်နဲ့သူ့သူငယ်ချင်း နိုးနိုးဝေ။ သူတို့ တွဲဖော်တွဲဖက်တွေ။နှင်းဝေခိုင် တပ်က ဗိုလ်တွေနဲ့ ပိုင်ပြီး ဧည့်စာရင်းစစ်ရင် ပြည်သူ​တွေကို ပါးရိုက်နားရိုက် လုပ်တယ်”ဟု ​ဒေသခံတစ်ဦးက ​ပြောသည်။ khit thit

စစ်ကိုင်းတိုင်း၊ အင်းတော်မြို့နယ် နဘားလမ်းဆုံအနီးမှာ ဩဂုတ် ၂၃ ရက်နေ့ မနက် ၈ နာရီလောက်က စစ်ကောင်စီတပ်ဖွဲ့နဲ့ ကချင်လွတ် မြောက်ရေးတပ်မတော် (KIA)၊ ဒေသကာကွယ်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့တယ်လို့ သိရပါတယ်။

စစ်ကောင်စီတပ်ဖွဲ့အင်အား ၇၀ လောက်ဟာ နဘားကျေးရွာထဲမှ နဘားလမ်းဆုံဘက်ကို ပစ်ခတ်ပြီး ခြေလျင်စစ်ကြောင်းတက်လာစဉ် ထိတွေ့တိုက်ပွဲ ဖြစ်ပွားခဲ့တာလို့ ဒေသကာကွယ်ရေးတပ်ဖွဲ့ Indaw Revolation – IR က ဩဂုတ် ၂၄ ရက်မှာ ထုတ်ပြန်ထားပါတယ်။

“နဘားရွာကနေ လမ်းဆုံဘက်ထိ ရမ်းပစ်ပြီး တက်လာတာ။ အဲ့ဒီမှာ တိုက်ပွဲဖြစ်ကြတယ်။ ရန်သူဘက်က လက်နက်ကြီးတော်တော်သုံးတယ်။ တိုက်ပွဲဖြစ်ပြီး နဘားလမ်းဆုံဘက်မှာရှိတဲ့ ဆိုင်တွေနဲ့ အိမ်တွေကနေ သယ်လို့ရတဲ့ အဖိုးတန်ပစ္စည်းနဲ့ အသုံးအဆောင်မှန်သမျှ အကုန်မွှေယူ သွားတယ်။ ရန်သူဘက်က ထိခိုက်သေဆုံးတာတွေရှိပေမဲ့ လောလောဆယ် စုံစမ်းနေဆဲပဲ။ ကျနော်တို့ မဟာမိတ်တပ်ဖွဲ့တွေဘက်ကတော့ အ ထိအခိုက်မရှိခဲ့ဘူး” လို့ Indaw Revolation – IR တပ်ဖွဲ့မှ တာဝန်ရှိသူတဦးက ပြောပါတယ်။

တိုက်ပွဲအတွင်း စစ်ကောင်စီတပ်ဖွဲ့က ရမ်းသန်းပစ်ခတ်မှုကြောင့် နားရခေါင်ကျေးရွာရှိ နေအိမ် ၂ လုံး လက်နက်ကြီးကျည်ထိမှန် ပျက်စီးသွားတယ်လို့ ဆိုပါတယ်။

ဒါ့အပြင် အဲ့ဒီမနက် ၁၁ နာရီလောက်ကလည်း အင်းတော်မြို့နယ် ပိန္နဲကုန်းကျေးရွာဘက်ကို စစ်ကောင်စီတပ်ဖွဲ့က လက်နက်ကြီးနဲ့ ရမ်းသန်းပစ် ခတ်ခဲ့တာကြောင့် အသက် ၄၀ ကျော်အရွယ်‌ ကျေးရွာသားပြည်သူတဦး ဦးခေါင်းကျည်စထိမှန် သေဆုံးခဲ့တယ်လို့ သိရပါတယ်။

နဘားလမ်းဆုံအနီး စစ်ကောင်စီတပ်ဖွဲ့နဲ့ ဖြစ်ပွားခဲ့တဲ့ ထိတွေ့တိုက်ပွဲမှာတော့ ကချင်လွတ်မြောက်ရေးတပ်မတော် (KIA)၊ Indaw Revolation – IR နဲ့ ကျောင်းသားတပ်ဖွဲ့တို့ ပူးပေါင်းတိုက်ခိုက်ခဲ့တာလို့ ထုတ်ပြန်ချက်မှာ ‌ပါရှိပါတယ်။

ဩဂုတ် ၂၀ ရက်နေ့ကလည်း အင်းတော် – ကျောင်းကုန်းလမ်းမှာ ထီးချိုင့်ဘက်မှ ခြေလျင် စစ်ကြောင်းတက်လာတဲ့ စစ်ကောင်စီတပ်ဖွဲ့အင် အား ၅၀ ကျော်နဲ့ KIA အပါအဝင် ဒေသကာကွယ်ရေး ပူးပေါင်းတပ်ဖွဲ့တွေအကြား ထိတွေ့တိုက်ပွဲ ၂ ကြိမ် ဖြစ်ပွားခဲ့တယ်လို့ သိရပါတယ်။DVB

ရှမ်းပြည်နယ်တောင်ပိုင်း၊ တောင်ကြီးမြို့တွင် ဆေးဝါးနှင့် ဆေးပစ္စည်းဈေးနှုန်းများ နေ့စဉ် မြင့်တက်လျက်ရှိကြောင်း ဒေသခံများထံမှ သိရသည်။

ဗဟိုဘဏ်က နိုင်ငံခြားငွေကန့်သတ်ပြီးနောက်ပိုင်း နိုင်ငံခြားမှတင်သွင်းသည့် ဆေးဝါးအများစုမှ ၄၀ ရာခိုင်နှုန်းမှ ၆၀ ရာခိုင်နှုန်းအထိ ဈေးနှုန်းမြင့်တက်နေပြီး အချို့ဆေးဝါးများ ပစ္စည်းပြတ်လပ်မှုများရှိ ကြောင်း ပြည်တွင်းဆေးကုမ္ပဏီ တစ်ခုထံကသိရသည်။

ယခင်က ဆေးနှင့်ဆေးပစ္စည်းတင်သွင်းခွင့်ပါမစ်များအား စီးပွားရေးနှင့်ကူးသန်းရောင်းဝယ်ရေးဝန်ကြီး ဌာနသို့သာ တင်ပြရသော်လည်း ပြီးခဲ့သည့်ဧပြီလမှစပြီး စစ်ကောင်စီ၏ ကုန်သွယ်မှုနှင့်ကုန်စည်စီးဆင်းမှု များမှန်ကန်မြန်ဆန်စေရေး ဗဟိုကော်မတီ၊ လုပ်ငန်းကော်မတီနှင့် ကျန်းမာရေးဝန်ကြီးဌာန စသည်ဖြင့် သွင်းကုန်ပါမစ်များအား အဆင့်ဆင့်တင်ပြရပြီး ထိုမှတစ်ဆင့် နိုင်ငံခြားသုံးငွေကြီးကြပ်မှုကော်မတီထံ တင်ပြထားသော သွင်းကုန်လိုင်စင်များကို ခွင့်ပြုပေးမည်ဖြစ်ကြောင်း စစ်ကောင်စီမှအသိပေးကြေညာ ထားသည်။

ယင်းကြေညာချက်ကြောင့် ဆေးဝါးနှင့်ဆေးပစ္စည်း သွင်းကုန်လိုင်စင်ရရှိသူများအနေဖြင့် မိမိအစီအစဉ် ဖြင့်သာ နိုင်ငံခြားသုံးငွေ (အမေရိကန်ဒေါ်လာ)ကို ရှာဖွေဝယ်ယူရမည်ဖြစ်ပြီး လိုင်စင်ထုတ်ပေးလိုက်ခြင်း ကြောင့် ဆေးဝါးပြတ်လပ်မှုမဖြစ်ပေါ်သော်လည်း ဈေးနှုန်းများမှာ အမြင့်မှာတွင်သာရှိနေမည်ဖြစ်ကြောင်း ဆေးဝါးရောင်းချသူများက ဆိုသည်။

“ဆေးဝါးဈေးတက်တာကတော့ ဖြစ်လာမှာပဲလေ။ ကန့်သတ်ကုန်လို ဖြစ်နေတာကိုး။ ဒေါ်လာ ကိုယ့် ဘာသာဝယ်ပြီး ကိုယ့်ဘာသာတင်သွင်းခွင့်တောင်းဆိုတော့ ပြင်ပဒေါ်လာပေါက်ဈေးက ၃၀၀၀ လောက်ရှိ တာကိုး။ ဆီးချိုသမား၊ သွေးတိုးသမား၊ ကျောက်ကပ်သမားတွေတော့ နောက်ဆို ဝယ်သောက်နိုင်ဖို့မလွယ် ဘူး။ ဒေါ်လာဈေးက ထပ်တက်ဖို့ပဲရှိတာကိုး။ အရင်က တစ်လ ဆေး ၃၀,၀၀၀ ဖိုးလောက်ကုန်တဲ့သူက အခု ၈၀,၀၀၀ ဖိုးလောက်ကုန်မယ်” ဟု တောင်ကြီးဒေသခံတစ်ဦးက မဇ္ဈိမကို ပြောသည်။

“နိုင်ငံခြားကုမ္ပဏီနဲ့ဆက်သွယ်တဲ့ ဆေးကုမ္ပဏီတိုင်းက ဆေးဝါးတွေကို အကြွေးနဲ့ယူတယ်။ ကျွန်မတို့ ကုမ္ပဏီဆိုရင် ခြောက်လတဖြတ်အ ကြွေးယူ၊ အကြွေးရှင်းတဲ့စနစ်နဲ့ လည်ပတ်နေတာ။ ဆေးဝါးတွေ ဈေး တက်တာက ဒေါ်လာဈေးကြောင့်ပါ။ ကုမ္ပဏီက အကြွေးပြန်ဆပ်ရမယ့်အချိန်နဲ့ဒေါ်လာဈေးနဲ့တွက်ပြီး ဈေးကွက်ပြန်ညှိရတယ်။ ဆေးဝါးတွေကတော့ ဒီလကုန် ဆိပ်ကမ်းကနေပြန်ဝင်လာဖို့ရှိတယ်။ ဆေးဝါး ပြတ်လတ်မှုမရှိပေမယ့် ဒေါ်လာဈေးကတော့တက်နေဦးမှာဆိုတော့ ဆေးဝါးဈေးနှုန်းတွေကတော့ မြင့် တက်နေဦးမှာပါ” ဟု ဆေးကုမ္ပဏီမှ ဝန် ထမ်းတစ်ဦးက ပြောသည်။

ပြည်တွင်းဆေးဝါးဈေးကွက်ရှိ ဆေးဝါးအများစုသည် အိန္ဒိယ၊ တရုတ်၊ ပါကစ္စတန်နှင့် ထိုင်းနိုင်ငံတို့မှ တင်သွင်းခြင်း ဖြစ်ကြောင်း သိရသည်။mizzima

စစ်ကိုင်းတိုင်း မုံရွာ-ယာကြီး-ကလေးဝ လမ်းပိုင်း မိုင်တိုင် ၃၁ အင်တိုင်းတောရွာတွင် ရောက်ရှိနေသော အကြမ်းဖက် စစ်တပ်နှင့် ကာကွယ်ရေး တပ်ဖွဲ့များ သြဂုတ်လ ၂၃ ရက်နေ့တွင် ထိတွေ့တိုက်ပွဲ ဖြစ်ပွားခဲ့ပြီး စစ်သား ၂၀ ခန့်သေဆုံးခဲ့ကြောင်း ရွှေတြိဂံပြည့်သူ့ကာကွယ်ရေးတပ်ရင်း GTF တပ်ဖွဲ့ထံမှ သိရသည်။

အဆိုပါ အကြမ်းဖက် စစ်တပ် စစ်ကြောင်းကို ရွှေတြိဂံတပ်ရင်း(GTF) ၊B21 ၊ DGF၊နဂါးညီနောင် ၊ CGYDF၊ KLG၊အမိမြေတော်လှန်ရေးအဖွဲ့၊ မြောက်ယမားတပ်ရင်း၊ ဆားလင်းကြီး မဟာမိတ်တပ်ပေါင်းစုနှင့် ညီနောင်မဟာမိတ်များပူးပေါင်း တိုက်ခိုက်ခဲ့ခြင်းဖြစ်ကြောင်း သိရသည်။

အကြမ်းဖက် စစ်တပ် စစ်ကြောင်းသည် ဒေသခံ ပြည်သူများ၏ နေအိမ် ၅ လုံးကိုလည်း မီးရှို့ ဖျက်ဆီးခဲ့ပြီး ကာကွယ်ရေး ရဲဘော် ၂ ဦး လက် နက်ကြီး ကျည်စထိမှန်ကာ မစိုးရိမ်ရ ဒဏ်ရာရရှိခဲ့ကြောင်း သိရသည်။

အလားတူ စစ်ကိုင်းမှ မုံရွာဘက်သို့ မောင်းနှင်လာသည့် အကြမ်းဖက် စစ်တပ် ယာဥ်တန်းကို သြဂုတ်လ ၂၄ ရက်နေ့ နံနက် ၄ နာရီ ၁၅ မိနစ်ခန့်တွင် မြင်းမူမြို့ ရှောင်လမ်းတွင် ပဒေသာမိုင်း(၅) လုံးဖြင့် ဖောက်ခွဲတိုက်ခိုက်ခဲ့ပြီး စစ်သားများ ထိခိုက် သေဆုံးမှုရှိကြောင်း ZERO ပြောက် ကျားတပ်ဖွဲ့ (မြင်းခြံ)ထံမှ သိရသည်။

မိုင်းဆွဲ တိုက်ခိုက်မှုကြောင့် ယာဥ်တန်း၏ နောက်ဆုံး ကား ထိမှန်ခဲ့ပြီး မိုင်းကွင်းနှင့် မလှမ်းမကမ်းတွင် ထိုးရပ်သွားကာ စစ်သားများ ထိခိုက်သေဆုံးသူ အများအပြားရှိသော်လည်း အရေအတွက် အတည်မပြုနိုင် သေးကြောင်း သိရသည်။

ယင်း တိုက်ခိုက်မှုကို ZERO ပြောက်ကျားတပ်ဖွဲ့ (မြင်းခြံ)၊ ZERO Power တော်လှန်ရေးအင်အားစု (စစ်ကိုင်းတိုင်း) တော်လှန်ရေး ရဲဘော်များမှ ” တောကျီးကန်း စစ်ဆင်ရေး” ဖြင့် တိုက်ခိုက်ခဲ့ခြင်း ဖြစ်ကြောင်း သိရသည်။ khit thit

စစ်ကိုင်းတိုင်း၊ ကလေးမြို့နယ်အ‌ခြေစိုက်၊ က‌လေး PDF တပ်ရင်း ၇ က တိုက်ပွဲမှာ အသုံးပြုဖို့ AK ကျည် 5000 Challenge ကို ပြုလုပ်ထားရာမှာ ၆၀ ရာခိုင်နှုန်းကျော် ရရှိထားပြီလို့ တပ်ဖွဲ့ဝင်တဦးက ပြောပါတယ်။

အဆိုပါ Challengeကို ဩဂုတ် ၁ ရက်ကနေ ဩဂုတ်လကုန်အထိ ပြုလုပ်ထားတာလို့ ဆိုပါတယ်။

ကလေး PDF ရဲဘော်တဦးက “AK ကျည် ၁ တောင့်ရဲ့ တန်ဖိုးမှာ မြန်မာငွေ ၁ သောင်းကျပ်အထိရှိပြီး မိဘပြည်သူများအနေဖြင့် တတ်နိုင်သ လောက် အားဖြည့် ပါဝင်လှူဒါန်းပေးကြဖို့ အထူးပင် မေတ္တာရပ်ခံအပ်ပါတယ်။ ဆက်လက်ပြီး AK ကျည် ၅၀၀၀ ပြည့်မီအောင် လှူဒါန်းပေးကြပါအုံး” လို့ တိုက်တွန်းထားပါတယ်။

ကလေးမြို့နယ်မှာ လတ်တလော တိုက်ပွဲတွေ ခပ်စိတ်စိတ်ဖြစ်ပွားနေတာကြောင့် ပြည်သူတွေအနေနဲ့လည်း စစ်ကောင်စီတပ်နဲ့ ဝေးရာမှာ နေ ထိုင်ကြဖို့၊ ကလေး-ဂန့်ဂေါ လမ်းကြောင်းကို အသုံးမပြုကြဖို့လည်း ကလေး PDF က မေတ္တာရပ်ခံထားပါတယ်။ DVB

ရန်ကုန်တိုင်း၊ တောင်ပိုင်းခရိုင် တွံတေးမြို့နယ်တွင် ကျေးရွာအုပ်ချုပ်ရေးအဖွဲ့ဝင် ခြောက်ဦး ပစ်ခတ်ခံရကာ သေဆုံးခဲ့ပြီးသည့်နောက် ဇီးဖြူကုန်းကျေးရွာအတွင်းရှိ ပြည်သူများကို စစ်ကောင်စီတပ်က ဖမ်းဆီးနှိပ်စက်မှုများ ပြုလုပ်နေကြောင်း ဒေသတွင်း သတင်းရင်းမြစ်ထံမှ သိရသည်။

တွံတေးမြို့နယ်၊ ဇီးဖြုကုန်းကျေးရွာအတွင်းကို စစ်ကောင်စီတပ်များက ယမန်နေ့ သြဂုတ်လ ၂၃ ရက်၊ ညနေပိုင်းအချိန်တွင် ဝင်ရောက်လာကာ ကျေးရွာအတွင်း နေထိုင်သူများကို ဖမ်းဆီးခြင်းနှင့် ရိုက်နှက်စစ်မေးခြင်းများ ပြုလုပ်နေခြင်း ဖြစ်သည်။

“မနေ့က ညနေ ၄ နာရီခွဲလောက်ကတည်းက ဇီးဖြူကုန်းကျေးရွာထဲကို စစ်ကား ငါးစီးနဲ့ စစ်ကောင်စီတပ် အင်အားအများအပြား ဝင်လာတယ်၊ ပြီးတော့ ကျေးရွာသားတွေကို ကြိုးတုပ်ရိုက်နှက်တာတွေ လုပ်နေတယ်၊ ဖမ်းဆီးခံထားရသူတွေလည်း ရှိနေပါတယ်” ဟု တွံတေးမြို့နယ် ဒေသတွင်း သတင်းရင်းမြစ်က မဇ္စျိမကို ပြောသည်။

ဇီးဖြူကုန်းကျေးရွာအတွင်းကို ရောက်ရှိနေသည့် စစ်ကောင်စီတပ်တွင် စစ်ကောင်စီတပ်သားများအပြင် ပျူစောထီးများကို စစ်ဝတ်စုံဝတ်ဆင်ပေးထားသူများလည်းပါဝင်ကာ အင်အား ၆၀ နီးပါးရှိကြောင်း သိရသည်။

အဆိုပါ စစ်ကောင်စီတပ်သားများနှင့်ပျုူစောထီးများကို ဇီးဖြူကုန်းကျေးရွာရှိ စစ်ကောင်စီခန့် ရာအိမ်မှူးများနှင့် သတင်းပေးဒလန်များက ကျေးရွာအတွင်းရှိ ရွာသားများကို လိုက်လံပြသမှုများ ပြုလုပ်နေကြောင်း ဒေသတွင်း သတင်းရင်းမြစ်က ဆိုသည်။

“ ရွာထဲရောက်နေတဲ့ စစ်ကောင်စီတပ်တွေက်ို ဒလန်ရာအိမ်မှူး ကုလားနဲ့ ရွာထဲက သတင်းပေး ဒလန်လေးဦးက ရွာသားတွေကို လိုက်ပြနေတာပါ။ ကျေးရွာအလယ်ပိုင်းနဲ့ အနောက်ပိုင်းက လူတွေကို PDF တွေ NLD တွေခေါင်းစဉ်တပ်ထားပြီး လိုက်ပြနေတာမို့ ကြိုးတုပ်ခံရတာတွေ၊ ဝမ်းလျားမှောက်ရတာတွေ ရှိပြီး ရိုက်နှက်ခံရတာတွေလည်း ရှိနေပါတယ်” ဟု ၎င်းက ဆက်ပြောသည်။

စစ်ကောင်စီတပ်က ဖမ်းဆီးနှိပ်စက်ကာ စစ်ဆေးမှုများ ပြုလုပ်နေသူများသည် အပြစ်မဲ့ ပြည်သူများသာ ဖြစ်ပြီး တိုက်ခိုက်မှုဖြစ်စဉ် ဖြစ်ပွားပြီးကတည်းက ရဲဘော်များသည် လုံခြုံသည့် နေရာကို ရောက်ရှိနေပြီး ဖြစ်ကြောင်း တွံတေးမြို့ပြပြောက်ကျားတပ်ဖွဲ့ တာဝန်ရှိသူက ပြောကြားထားသည်။

“ ကျွန်တော်တို့ ရဲဘော်တွေက ဖြစ်စဉ်ပြီးကတည်းက တွံတေးမြို့နယ် နယ်နမိတ်အပြင်ဘက်ကို အေးအေးဆေးဆေးရောက်သွားပါပြီ၊ အခုနှိပ်စက်ခံနေရတာက အပြစ်မဲ့ ပြည်သူတွေပါ၊ လက်နက်ကိုင်ထားတဲ့ Standard Army လို့ ကြွေးကြော်နေတဲ့ စစ်ခွေးတပ်(စကစတပ်)ကြီးက လက်နက်မဲ့ ပြည်သူတွေကို နှ်ိပ်စက်နေတာ အင်မတန်ရှက်ဖို့ကောင်းပါတယ်၊ အပြစ်မဲ့ ပြည်သူတွေ အခုလို နှိပ်စက်ခံရမှုတွေအတွက် ကျွန် တော်တို့ ပြန်ပြီး တော်လှန်တိုက်ပွဲဝင်သွားမယ်ဆိုတာ ကတိပြုပါတယ်။” ဟု မြို့ပြပြောက်ကျားတပ်ဖွဲ့(တွံတေး) တာဝန်ရှိသူက ဆိုသည်။

မဇ္စျိမက ရရှိထားသည့် အချက်အလက်များအရ ဇီးဖြူကုန်းကျေးရွာ၊ မြဂိုးကျေးရွာ၊ မြကန်သာကျေးရွာအပြင် အနီးဝန်းကျင်ကျေးရွာများမှ အ ပြစ်မဲ့ပြည်သူ ၁၇ ဦး စစ်ကောင်စီတပ်၏ ဖမ်းဆီးခြင်းခံထားရပြီး အသက် ၁၈ နှစ်နှင့် အသက် ၄၀ကြား အမျိုးသမီး သုံးဦးလည်း ဖမ်းဆီးခံရမှုတွင် ပါဝင်နေသည်။

ယနေ့ သြဂုတ်လ ၂၄ ရက်နေ့ နံနက်ပိုင်းအထိ စစ်ကောင်စီတပ်သည် တွံတေးမြို့နယ် ဇီးဖြူကုန်းကျေးရွာ ကျောင်းသစ်ဘုန်းတော်ကြီးကျောင်းတွင် တပ်စွဲထားကာ ဖမ်းဆီးထားသူများကို ၎င်းတို့ တပ်စွဲထားသည့် နေရာတွင်ပင် ရိုက်နှက်နှိပ်စက်မှုများ ပြုလုပ်နေကြောင်း သိရသည်။

သြဂုတ်လ ၂၂ ရက်နေ့၊ ညနေပိုင်းက တွံတေးမြို့ပေါ်တွင် အစည်းအဝေးတက်ပြီးပြန်လာသည့် ဇီးဖြူကုန်းကျေးရွာ အုပ်ချုပ်ရေးမှူးအပါအဝင်၊ ရာအိမ်မှူး၊ ဆယ်အိမ်မှူးများ စီးနင်းလာသည့် မော်တော်ယာဉ်ကို ဇီးဖြူကုန်းကျေးရွာအနီးရှိ မြကန်သာ၊ သဝန်းတောလမ်းဆုံတွင် မြို့ပြပြောက် ကျားတပ်ဖွဲ့ (တွံတေး)က စောင့်ဆိုင်း ပစ်ခတ်ခဲ့ခြင်း ဖြစ်သည်။

ထိုသို့ ပြောက်ကျားတပ်ဖွဲ့၏ ပစ်ခတ်ရှင်းလင်းအရေးယူမှုအတွင်း ဇီးဖြူကုန်းကျေးရွာ အုပ်ချုပ်ရေးမှူး ဦးခင်ညွန့်အပါအဝင် ရာအိမ်မှူးနှစ်ဦး၊ ဆယ်အိမ်မှူးတစ်ဦး နှင့် စစ်ကောင်စီလက်ပါးစေ နှစ်ဦး စုစုပေါင်း ခြောက်ဦး သေဆုံးခဲ့ပြီး ဆယ်အိမ်မှူးတစ်ဦး ပြင်းထန်ဒဏ်ရာရရှိခဲ့ကြောင်း မြို့ပြပြောက်ကျားတပ်ဖွဲ့ (တွံတေး) က သတင်းထုတ်ပြန်ထားသည်။ mizzima

စစ်ကိုင်းတိုင်း၊ ကန့်ဘလူ-ကောလင်းမြို့နယ်အစပ်တွင် ယမန်နေ့က တိုက်ပွဲများ ပြင်းထန်စွာဖြစ်ပွားပြီး စစ်တိုက်လေယာဉ်များက ညသန်း ခေါင်ယံအချိန် ဗုံးကျဲပြီးနောက် ဖုန်းလိုင်းများ ဖြတ်တောက်ထားကြောင်း ဒေသခံများထံမှ သိရှိရသည်။

ဩဂုတ်လ ၂၃ ရက်နေ့ တိုက်ပွဲတွင် စစ်တပ်ဘက်မှ ၄၀ ဦးထက်မနည်းသေဆုံးပြီး အရာရှိ ၃ ဦး အဖမ်းခံရခြင်း၊ လက်နက်များ သိမ်းဆည်းရမိခြင်းတို့ကြောင့် ယမန်နေ့ညသန်းခေါင်ယံအချိန်တွင် တိုက်ပွဲဖြစ်ပွားခဲ့သည့် ကျေးရွာ ပတ် ဝန်းကျင် ဗုံးကျဲချကြောင်း၊ ယင်းနောက် ဖုန်းလိုင်းများ ပြတ်တောက်သွားကြောင်း သိရှိရသည်။

“တိုက်ပွဲဖြစ်တဲ့ စစ်ကိုင်းတိုင်း ကန့်ဘလူနယ်က ချမ်းသာလက်ခုပ်ပင်ကကျွန်းလှနဲ့ပိုနီးပါတယ်။ အင်တာနက်လိုင်းတွေအရင်ကတည်းကဖြတ်တောက်ခံထားရပြီး တိုက်ပွဲဖြစ်ပွားတဲ့အချိန်တွေမှာဆိုဖုန်းလိုင်းတွေပါပြတ်တောက်ပါတယ်။ လက်ခုပ်ပင်နဲ့အောင်ချမ်းသာတစ်ဝိုက်ကို မနေ့ညက ဗုံးကျဲအပြီးမှာဖုန်းလိုင်းတွေပါပြတ်တောက်နေပါတယ်။ အဲ့ဒီနယ်တွေဟာ အရင်ကတည်းက အင်တာနက် ဖြတ်တောက်ခံထားရပြီး ဖုန်းလိုင်းတစ်ခုတည်း ရပါတယ်။ စစ်တပ်က ထိုးစစ်ဆင်ပြီဆိုရင်ဖုန်းလိုင်းပါဖြတ်တောက်ခံရလေ့ရှိပါတယ်။ အခုလည်း ဖိုက်တာဂျက်တွေဗုံးကျဲအပြီးမှာဖုန်းလိုင်းဖြတ်တောက်ခံထားရပါတယ်” ဟု ဒေသခံတစ်ဦးက ပြောဆိုသည်။

ကန့်ဘလူခရိုင် တပ်ရင်း ၂ မှ ပြန်ကြားရေးတာဝန်ခံ ဗိုလ်ရောင်နီကလည်း ယမန်နေ့ တိုက်ပွဲဖြစ်ပွားသော ကန့်ဘလူ၊ ကျွန်းလှ၊ ကောလင်း မြို့ နယ် ၃ ခု အစပ်နေရာတွင် ဖုန်းလိုင်းများ ဖြတ်တောက်ခံထားရသည်မှာ မှန်ကန်သည်ဟု ရန်ကုန်ခေတ်သစ်သတင်းဌာနထံသို့ ပြောဆိုသည်။

လက်ရှိတွင် စစ်တပ်က ကန့်ဘလူနှင့်ကောလင်းဘက်သို့ စစ်ကြောင်းများကို ရဟတ်ယာဉ်များဖြင့် သွားရောက်ချထား ပြီး စစ်အင်အားတိုးချဲ့လျက်ရှိကြောင်း သိရှိရသည်။ khit thit

ပြီးခဲ့တဲ့ ၂၀၂၂ ခုနှစ် တက္ကသိုလ်ဝင်စာမေးပွဲ ကျရှုံးသူတွေနဲ့ အကြောင်းအမျိုးမျိုးကြောင့် ဝင်ရောက်ဖြေဆိုခြင်းမရှိတဲ့ ကျောင်းသား၊ ကျောင်းသူတွေအတွက် တက္ကသိုလ်ဝင်စာမေးပွဲကို ပြန်ကျင်းပပေးသွားဖို့ အကြမ်းဖက်စစ်ကောင်စီအာဘော် သတင်းစာတွေကတဆင့် ထုတ်ပြန်ထားပါတယ်။

ဒီစာမေးပွဲကတော့ စနစ်ဟောင်း၊ သင်ရိုးဟောင်းစာမေးပွဲအနေနဲ့ နောက်ဆုံးအကြိမ် ကျင်းပသွားမှာဖြစ်ပြီး ၂၀၂၃ ခုနှစ်၊ တက္ကသိုလ်ဝင်စာမေးပွဲ ဖြေဆိုခွင့်လျှောက်လွှာတွေကိုတော့ လာမယ့် စက်တင်ဘာ ၁ ရက်ကနေ ၃၀ ရက်နေ့အတွင်း လျှောက်ထားရမှာဖြစ်ကာ တယောက်ကို ပညာရေးဝန်ကြီးဌာန ငွေသွင်းတံဆိပ်ခေါင်းဖိုး ကျပ် ၇၀၀ နဲ့ လျှောက်လွှာဖိုး ၂၀၀၊ စုစုပေါင်း ကျပ် ၉၀၀ ကျမယ်လို့ ဆိုပါတယ်။

စစ်တပ်အာဏာသိမ်းပြီးနောက် ပထမဆုံး ပြန်လည်ကျင်းပတဲ့ ၂၀၂၁-၂၀၂၂ ပညာသင်နှစ် တက္ကသိုလ်ဝင်စာမေးပွဲမှာ ဝင်ရောက်ဖြေဆိုဖို့ ကျောင်း သား ၃ သိန်းကျော် စာရင်းပေးခဲ့ပေမဲ့ နှစ်သိန်းရှစ်သောင်းကျော်သာ ဝင်ရောက်ဖြေဆိုခဲ့တယ်လို့ စစ်ကောင်စီလက်အောက်ခံ ပညာရေးဝန်ကြီးဌာနက ထုတ်ပြန်ပါတယ်။

စစ်တပ်အာဏာမသိမ်းခင် ၂၀၂၁ ခုနှစ်ရဲ့ တက္ကသိုလ်ဝင်စာမေးပွဲကိုတော့ ကျောင်းသားကျောင်းသူ ၁၀ သိန်းနီးပါးအထိ ဝင်ရောက်ဖြေဆိုဖို့ စာရင်းပေးသွင်းခဲ့တာပါ။

အခုစစ်ကောင်စီက စီစဉ်ကျင်းပတဲ့ ပြီးခဲ့တဲ့ တက္ကသိုလ်ဝင်စာမေးပွဲမှာတော့ ကျောင်းသား ကျောင်းသူအများစုက စစ်ကျွန်ပညာရေးကို သ ပိတ်မှောက်ထားတဲ့အတွက် ဖြေဆိုသူအရေအတွက်ဟာ အရင်နှစ်တွေနဲ့ယှဉ်ရင် သုံးပုံတပုံလောက်သာရှိတာ ဖြစ်ပါတယ်။

NUG အစိုးရ ပညာရေးဝန်ကြီးဌာနကတော့ စစ်ကောင်စီက စီစဉ်ကျင်းပတဲ့ တက္ကသိုလ်ဝင်စာမေးပွဲကို မဖြေဆိုဘဲ စစ်ကျွန်ပညာရေးကို သ ပိတ် မှောက်ခဲ့တဲ့ ကျောင်းသူကျောင်းသား ၇ သိန်းကျော်ကို သမိုင်းတွင်မယ့် ကျောင်းသားတွေအဖြစ် အမျိုးသားညီညွတ်ရေးအစိုးရအနေနဲ့ အသိအမှတ်ပြု၊ အလေးပြု၊ ဂုဏ်ပြုလိုက်တယ်လို့ ပြောကြားထားပါတယ်။

အကြမ်းဖက်စစ်ကောင်စီဟာ တိုင်းပြည်အေးချမ်းတည်ငြိမ်နေတာကို ပြသချင်တာကြောင့် ပညာရေးနဲ့ပတ်သက်ပြီး တက္ကသိုလ် မဟာဘွဲ့သင် တန်းတွေကစပြီး ဖွင့်လှစ်ခဲ့ပါတယ်။ အခုနောက်ပိုင်း တက္ကသိုလ်ဝင်စာမေးပွဲ ကျင်းပပြီးတဲ့နောက် မေလ ၁၂ ရက်မှာ  တက္ကသိုလ်နဲ့ ကောလိပ် သင်တန်းတွေနဲ့ အဝေးသင် သင်တန်းတွေ အားလုံးကို ဖွင့်လှစ်ဖို့ ကြေညာထားပါတယ်။ DVB