ဆန္ဒဖော်ထုတ်ရာတွင်လူသိများခဲ့သည့် ရန်ကုန်လူထု၏ ၈၈၈၈ ထီးသပိတ်တွင် ပါဝင်သူနှင့် အ လွတ်တန်း ဓာတ်ပုံဆရာ ဖမ်းဆီးခံရ
ရန်ကုန်လူထုသပိတ်မှပြုလုပ်သော “Umbrella Cooperation” ဟု အမည် ပေးထားသည့် ၈၈၈၈ အရေးတော်ပုံ ထီးသပိတ်တွင်ပါဝင်ခဲ့သူလေးဦးအနက် တစ်ဦးနှင့် အလွတ်တန်း ဓာတ်ပုံဆရာတို့ စစ်ကောင်စီ၏ ဖမ်းဆီးခြင်းခံရကြောင်း ရန်ကုန်လူထုသပိတ်က အတည်ပြုသတင်းထုတ် ပြန်သည်။
စစ်ကောင်စီတပ်သည် “Umbrella Cooperation” တွင်ပါဝင်ခဲ့သည့် ရန်ကုန်လူထုသပိတ်အဖွဲ့ဝင်အား ဩဂုတ်လ ၂၀ ရက်၊ ည ၁၀ နာရီ ၃၀ မိနစ်တွင် ရန်ကုန်မြို့၊ တာမွေမြို့နယ်ရှိ နေအိမ်တွင် အရပ်ဝတ်ဖြင့် လာရောက် ဖမ်းဆီးခဲ့ခြင်းဖြစ်သည်။
စစ်ကောင်စီတပ်သည် ရန်ကုန်လူထုသပိတ်အဖွဲ့ဝင်အား ဖမ်းဆီးပြီးနောက် ယင်းနေ့ ည ၁၂ နာရီဝန်း ကျင် တွင် မရမ်းကုန်းမြို့နယ်(၁)ရပ်ကွက်၌ အလွတ်တန်းဓာတ်ပုံဆရာ ကိုစစ်မင်းနိုင်ကို ထပ်မံဖမ်းဆီးခဲ့သည်။ ကိုစစ်မင်းနိုင်နှင့်အတူ ကင်မရာတစ်လုံး၊ Desktop နှစ်လုံးနှင့် ငွေသား သိန်း ၂၀ ခန့်ကိုပါ စစ်ကောင်စီ တပ်ကယူဆောင်သွားကြောင်း ထုတ်ပြန်ချက်အရသိရသည်။
ရန်ကုန် လူထုသပိတ်အဖွဲ့ဝင်နှင့် အလွတ်တန်းဓာတ်ပုံဆရာတို့နှစ်ဦးကို မြို့နယ်ရဲစခန်းမှတဆင့် ရေကြည် အိုင်စစ်ကြောရေးသို့ပြောင်းရွှေ့၍ စုံစမ်းစစ်ဆေးမှုများလုပ်ဆောင်နေပြီး ဖမ်းဆီးခံရပြီးငါးရက်မြောက်နေ့ ဖြစ်သော ယနေ့အထိ အဆက်အသွယ် ပြတ်တောက်လျက်ရှိကြောင်း သိရသည်။
“အခုလောက်ဆို ရေကြည်အိုင်မှာ ရေတောင်မနည်းမြိုချနေရတဲ့ဘဝရောက်နေပြီပေါ့။ လွတ်နေတဲ့ ကောင်တွေရှိသေးတယ်။ လွတ်အောင်ပြေးထားကြပေါ့ကွာ။ နေရာတိုင်းမှာ ဟန်ငြိမ်းဦးတွေရှိတယ်ဆိုတာ မမေ့နဲ့” ဟု စစ်ကောင်စီသတင်းပေး ဟန်ငြိမ်းဦးအမည်ရှိ တယ်လီဂရမ်ချန်နယ်လ်တွင် ရေးသားထားပြီး ဖမ်းဆီးထားသည့် ဓာတ်ပုံကိုလည်း တင်ထားသည်။
အဆိုပါပုံတွင် သွေးစွန်းနေသည့်အင်္ကျီနှင့် လူငယ်နှစ်ဦးကိုလက်ပြန်ကြိုးတုပ်ကာ ဒူးထောက်ခိုင်းထား သည်ကိုတွေ့မြင်ရသည်။
ရန်ကုန်လူထုသပိတ်အနေဖြင့် အဆိုပါလူငယ်နှစ်ဦး၏အသက်အန္တရာယ်ကိုစိုးရိမ်ကြောင်းနှင့် စစ်ကောင်စီ သည် ကျန်ရှိသည့်အဖွဲ့ဝင်များကိုပါ ဆက်လက်ဖမ်းဆီးရန် စုံစမ်းဖော်ထုတ်နေသဖြင့် အဆက်အသွယ် ပြုလုပ်ဖူးသူများအားလုံး သတိထားနေထိုင်ကြရန် အသိပေးထားသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 