SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

အရှေ့တောင်အာရှ မြန်မာနိုင်ငံမှ ရိုဟင်ဂျာ အသိုင်းအဝိုင်းကို ထောက်မကူညီခြင်းနှင့် မြန်မာစစ်တပ်၏ လက်နက်နှင့် ဘဏ္ဍာငွေ ရရှိခြင်းကို ကန့်သတ်နိုင်ရန် ကြိုးပမ်းခြင်းအဖြစ် မြန်မာနိုင်ငံတွင် စစ်တပ်နှင့် ဆက်နွယ်သော စီးပွားရေးလုပ်ငန်းများအား ပစ်မှတ်ထားသည့် ဒဏ်ခတ်ပိတ်ဆို့မှုသစ်များကို ချမှတ်ကြောင်း ဗြိတိန်နိုင်ငံက ကြာသပတေးနေ့တွင် ကြေညာသည်။ 

“ကျွန်မတို့အနေနဲ့ ရိုဟင်ဂျာပြည်သူတွေနဲ့ တသားတည်းရှိကြောင်း ဆက်လက်ရပ်တည်နေပြီး မြန်မာစစ်တပ်ရဲ့ လူမျိုးစုရှင်းလင်းရေး ကြောက် မက်ဖွယ် လုပ်ဆောင်မှုကို ရှုတ်ချပါတယ်”ဟု အာရှဆိုင်ရာ ဗြိတိသျှဝန်ကြီး အမ်မန်ဒါ မဲလ်လင်းက ထုတ်ပြန်ချက်၌ ဆိုသည်။ 

မြန်မာနိုင်ငံတွင် ၂၀၂၁ အစောပိုင်းက ရွေးကောက်ခံ အစိုးရအား စစ်တပ်က ဖြုတ်ချပြီး အာဏာသိမ်းလိုက်ချိန်မှစကာ နိုင်ငံရေးနှင့် စီးပွားရေး ဝရုန်းသုန်းကားအခြေအနေ ဆိုက်နေသည်။  mizzima

စစ်ကောင်စီခေါင်းဆောင် မင်းအောင်လှိုင်ရဲ့သား အောင်ပြည့်စုံ ပိုင်ဆိုင်တဲ့ Sky One ဆောက်လုပ်ရေးလုပ်ငန်းအပါအဝင် လက်နက်ပွဲစားတွေဖြစ်တဲ့ International Gateways Group နဲ့ Star Sapphire Group ကုမ္ပဏီတွေအပေါ် ပစ်မှတ်ထားပိတ်ဆို့ အရေးယူလိုက်ကြောင်း ယူကေအစိုးရက ဆုံးဖြတ်လိုက်တဲ့အပေါ် အရပ်ဘက်အဖွဲ့အစည်းတွေက ကြိုဆိုထောက်ခံလိုက်ပါတယ်။

Justice For Myanmar ရဲ့ အဆိုအရ International Gateways Group နဲ့ Star Sapphire Group ကုမ္ပဏီလုပ်ငန်းစုတို့ဟာ အကြမ်းဖက်မြန်မာစစ်တပ်အတွက် စစ်လက်နက်ပစ္စည်းတွေကို အဓိကဝယ်ယူ တင်သွင်းပေးနေတာပါ။ ဒီ့အပြင် သတိထားစောင့်ကြည့်ရမယ့်အချက်က Star Sapphire Group ကုမ္ပဏီလုပ်ငန်းစုအောက်မှာရှိတဲ့ သတ္တူတူးဖော်ရေးလုပ်ငန်း အပါအဝင် ဟိုတယ်နဲ့ လောင်းကစားရုံတွေ စတဲ့ လုပ် ငန်းအမျိုးမျိုးတို့မှ ရရှိတဲ့ ဝင်ငွေတွေဟာ အကြမ်းဖက်မြန်မာစစ်တပ်အတွက် ဝင်ငွေရလမ်းကြောင်းကြီး တခုအနေနဲ့ ရှိနေတယ်လို့ Justice For Myanmar က စုံစမ်းဖော်ထုတ်ထားပါတယ်။

အဆိုးဝါးဆုံးအချက်ကတော့ ပြီးခဲ့တဲ့ ၂၀၁၇ ခုနှစ်က ရခိုင်ပြည်နယ်မှာ ဖြစ်ပွားခဲ့တဲ့ ရိုဟင်ဂျာ လူမျိုးစုတွေအပေါ် အကြမ်းဖက်မြန်မာစစ်တပ်က လူမျိုးတုံး သတ်ဖြတ်ခဲ့ရာမှာ မင်းအောင်လှိုင်ရဲ့သား အောင်ပြည့်စုံ ပိုင်ဆိုင်တဲ့ Sky One ဆောက်လုပ်ရေးလုပ်ငန်း အပါအဝင် စစ်လက် နက်ပွဲစားတွေဖြစ်တဲ့ International Gateways Group နဲ့ Star Sapphire Group ကုမ္ပဏီလုပ်ငန်းစုတို့က အထောက်အပံ့တွေ များစွာ ပံ့ပိုးပေးခဲ့တာ တွေ့ရှိရတဲ့အကြောင်း ကုလသမဂ္ဂ၏ လွတ်လပ်သော နိုင်ငံတကာဆိုင်ရာ အချက်အလက်ရှာဖွေရေးအဖွဲ့က ဖော်ထုတ်ထားပါတယ်။

Justice For Myanmar မှ ပြောရေးဆိုခွင့်ရှိသူ ရတနာမောင်က ယူကေအစိုးရရဲ့ အခုလိုပစ်မှတ်ထား ပိတ်ဆို့ အရေးယူလိုက်တာဟာ မြန်မာစစ်ကောင်စီဆီ စစ်လက်နက် နဲ့ ဘဏ္ဍာငွေတွေ စီးဆင်းမှုကို ရပ်တန့်သွားဖို့ အထောက်အကူ ဖြစ်စေပါတယ်။ ဒါဟာ ဒီအကြမ်းဖက်အဖွဲ့အ စည်း ကြီးရဲ့ ရက်စက်ကြမ်းကြုတ်တဲ့ ရာဇဝတ်မှုတွေကို အပြစ်ပေး အရေးယူဖို့ ပို့ဆောင်ပေးလိုက်တဲ့ လုပ်ရပ်တခုလည်း ဖြစ်တယ်လို့ ဆိုပါတယ်။

ဒါပေမဲ့ မြန်မာစစ်တပ်မှ ရိုဟင်ဂျာလူမျိုးစုတွေအပါ် လူမျိုးတုံးသတ်ဖြတ်ခဲ့မှုနဲ့ပတ်သတ်ပြီး နိုင်ငံတကာအသိုင်းအဝန်းက ဒီအပေါ်မှာ အရေးယူပူးပေါင်းဆောင်ရွက်ဖို့ ပျက်ကွက်ခဲ့တာဟာ မြန်မာစစ်တပ်အဖို့ ၂၀၂၁ ခုနှစ် ဖေဖော်ဝါရီ ၁ရက်မှာ အာဏာသိမ်းဖို့ နဲ့ ရက်စက်ကြမ်းကြုတ်တဲ့ ရာ ဇဝတ်မှုတွေ ဆက်လက် ကျူးလွန်ဖို့ လမ်းစ ဖြစ်ခဲ့ရတယ်လို့ Justice For Myanmar က ထောက်ပြထားပါတယ်။

ဒါကြောင့် ကုလသမဂ္ဂအဖွဲ့ကြီးနဲ့ အဖွဲ့ဝင်နိုင်ငံတွေဟာ မြန်မာစစ်တပ်အပေါ် အရေးယူဖို့ ပျက်ကွက်ခဲ့ရတဲ့ ဒီအမှားကို သင်ခန်းစာယူတတ်ဖို့ လိုပါပြီ။ ဒီ့နောက် မြန်မာစစ်ကောင်စီထံ စီးဆင်းနေတဲ့ စစ်လက်နက်နဲ့ ဝင်ငွေတွေ ရပ်တန့်သွားဖို့ အတွက် အခုချိန်မှာ ညှိနှိုင်းပူးပေါင်းပြီး အရေး ယူ ဆောင်ရွက်သွားကြဖို့နဲ့ ရက်စက်ကြမ်းကြုတ်တဲ့ ရာဇဝတ်မှုတွေထဲမှာ ပါဝင်ပတ်သတ်တဲ့ သူတွေကိုလည်း နိုင်ငံတကာရာဇဝတ်မှုစာရင်းထဲ ထည့်သွင်းထား ရှိပေးဖို့ တိုက်တွန်းထားပါတယ်။

လတ်တလောမှာတော့ မြန်မာ့ရေနံနှင့် သဘာဝဓာတ်ငွေ့လုပ်ငန်း (MOGE)ကို ပိတ်ဆို့ အရေယူတဲ့စာရင်းထဲ ထည့်သွင်းဖို့နဲ့ ဂျက်လေယာဉ်သုံး စက် သုံးဆီလောင်စာတွေ မြန်မာစစ်တပ်ဆီ မရောက်အောင် တားမြစ်ပေးဖို့တွေကတော့ အရေးတကြီး လုပ်ဆောင်ပေးဖို့ လိုနေပါတယ်။

မြန်မာစစ်ကောင်စီအား ဒဏ်ခတ်ပိတ်ဆို့ဖို့ ပျက်ကွက်နေတဲ့ သြစတြေးလျ၊ အိန္ဒိယ၊ ဂျပန်နဲ့ တောင်ကိုရီးယား အပါအဝင် ဒေသတွင်း ဒီမိုကရေစီနိုင်ငံတွေကို ရှုတ်ချကြောင်း၊ အဆိုပါနိုင်ငံတွေအနေနဲ့ နိုင်ငံတကာမှာ ကျင့်သုံးနေတဲ့ ဒီမိုကရေစီစံတန်ဖိုးတွေဖြစ်တဲ့ တာဝန်ယူမှု၊ တာဝန်ခံမှုရှိတဲ့ ဥပဒေတွေနဲ့အညီ လိုက်နာကြဖို့အတွက်လည်း Justice For Myanmar က တောင်းဆိုထားပါတယ်။ DVB

တရုတ်နိုင်ငံနှင့် နယ်စပ်ဖြတ်ကျော်ကုန်စည်ကူးသန်းရောင်းဝယ်နေသည့် မြန်မာကုန်သည်များက နိုင်ငံ၏ ကျပ်ငွေတန်ဖိုးမှာ တရုတ်ယွမ်နှင့် နှိုင်းယှဉ်ပါက များစွာ ကျဆင်းနေသဖြင့် လုပ်ငန်းများ ဆက်လက် မလုပ် ကိုင်နိုင်တော့ကြောင်း ပြောသည်။

ကုန်သည်များသည် ပုံမှန်အားဖြင့် လယ်ယာထွက်ကုန်နှင့် ရေထွက်ကုန်များကို တရုတ်နိုင်ငံသို့ တင်ပို့ကြပြီး တရုတ်လူသုံးကုန်ပစ္စည်း၊ စက်မှုလုပ်ငန်းသုံး ကုန်ပစ္စည်းများနှင့် စားသောက်ကုန်များ မြန်မာနိုင်ငံသို့ တင်သွင်းကြသည်။

သို့သော် နယ်စပ်တွင် မကြာသေးမီ သီတင်းပတ်များအတွင်း ကျပ်ငွေတန်ဖိုး သိသိသာသာ ကျဆင်းခဲ့သည်။ ယခုလအစအပိုင်းက ၁ ယွမ် (အမေရိကန် ၁ ဒေါ်လာ = ၆.၈၃ ယွမ်) တန်ဖိုးမှာ ၃၀၀ ကျပ်ခန့် ဈေးပေါက်သည်။

ဩဂုတ် ၂၃ ရက်က ၁ ယွမ်သည် မြန်မာငွေ ၄၂၀ ကျပ်ဝန်းကျင်ရှိလာကြောင်း ကုန်သည်များက ပြောသည်။ 

 “နယ်စပ်မှာ ကုန်စည်ရောင်းလို့ရတဲ့ ပိုက်ဆံနဲ့ ထပ်မဝယ်နိုင်တော့ဘူး။ ငွေကြေးတန်ဖိုး မတည်ငြိမ်လို့ ကုန်သည်တွေက ပြီးခဲ့တဲ့ ၁၀ ရက်အတွင်းမှာ အဝယ်အရောင်းတွေ မလုပ်ကြဘူး” ဟု ရွှေလီနယ်စပ်မြို့၌ အလုပ်လုပ်နေသော ကုန်သည်တစ်ဦးဖြစ်သည့် မနေခြည်က RFA သို့ ပြောသည်။

ကုန်သွယ်ရေးကုမ္ပဏီပိုင်ရှင် ကိုဇော်မင်းကလည်း ကျပ်ငွေမတည်ငြိမ်မှုကြောင့် ပိုမိုကောင်းမွန်သည့် လဲလှယ်နှုန်း ကို စောင့်နေကြောင်းနှင့် ငွေကြေးမတည်ငြိမ်မှုက ကုန်သည်များကိုသာမက ကုန်စည်များကို ပို့ဆောင်ပေးသော ကုန်တင်ယာဉ်မောင်းများကိုပါ ထိခိုက်စေသည်ဟု ဆိုသည်။

နယ်စပ်၌ ကုန်စည်ပို့ဆောင်ခနှုန်းမှာ လက်ရှိငွေလဲလှဲနှုန်းအရ ၁ ကီလိုဂရမ်လျှင် ၂ ဒသမ ၅ ယွမ်ခန့် ရှိကြောင်းနှင့် ပင်လယ်ရေကြောင်းဖြင့် ပို့ဆောင်ခထက် ၄ ဆပိုများသည်ဟု ကိုဇော်မင်းက ဆိုသည်။

မူဆယ်နယ်စပ်ဇုန်တွင် ၁၀ နှစ်ကျော်ကြာ လုပ်ကိုင်နေသည့် ကုန်သည်တစ်ဦးက ယင်းအခြေအနေအတိုင်း ဆက်လက်ရှိနေပါက ရေရှည်တွင် စားသုံးသူများနှင့် ကုန်သည်များကို ထိခိုက်စေနိုင်ကြောင်း ပြောသည်။

စစ်ကောင်စီက ငွေကြေးမူဝါဒကို မကြာခဏ ပြောင်းလဲမှုကြောင့် နယ်စပ်ဒေသများတွင် နေထိုင်သူများသည် ကျပ်ငွေအပေါ် ယုံကြည်မှုနည်း ပါးလာကြပြီး ယွမ်ကိုင်ဆောင်ရသည်ကို ပိုမိုနှစ်သက်ကြသည်။ mizzima

တနင်္သာရီတိုင်း၊ မြိတ်မြို့မှာ ဆိုင်ကယ်စီးပြီး အလုပ်ကပြန်လာတဲ့ မြို့ခံနှစ်ယောက်ကို စစ်ကောင်စီက သေနတ်နဲ့ပစ်ခတ်ခဲ့လို့ ဆိုင်ကယ်မောင်းနှင်သူနဲ့ အခင်းဖြစ် ပတ်ဝန်းကျင်မှာ နေထိုင်သူ အမျိုးသားတယောက် ကျည်ထိမှန်သေဆုံးခဲ့တယ်လို့ မြို့ခံတွေက ပြောပါတယ်။

ဩဂုတ် ၂၄ ရက် ညနေ ၆ နာရီလောက်က ဆိပ်ငယ်တံတားနဲ့ ပြည်တော်သာတံတားအကြား အလုပ်ကပြန်လာတဲ့ အမျိုးသားနှစ်ယောက်ကို စစ်ကောင်စီက ဆိုင်ကယ်တစီးတည်း အမျိုးသားနှစ်ယောက် စီးလာလို့ ရပ်တန့်ဖို့ တားဆီးစဉ် ဆိုင်ကယ်ရပ်မပေးလို့ ပစ်ခတ်ခဲ့တာလို့ ဆိုပါတယ်။

မြို့ခံတယောက်က “စစ်တာက ဆိပ်ငယ်မှာ စစ်နေတာပေါ့။ ဆိုင်ကယ်မရပ်ပေးတော့ မိုးပေါ်ကို ထောင်ပစ်တယ်။ သေနတ်နဲ့ပစ်တယ်ဆိုတော့ ကြောက်ပြီးပြေးတာပေါ့။ ပြည်တော်သာဘက်မှာ ရှိနေတဲ့ အဖွဲ့က ပစ်လိုက်တာ” လို့ ပြောပါတယ်။

အဆိုပါပစ်ခတ်မှုကြောင့် ဆိုင်ကယ်မောင်းသူ အမျိုးသားတယောက်နဲ့ အခင်းဖြစ်ရာအနီး ထိုင်ပြီး ဂိမ်းဆော့နေတဲ့ အသက် ၄၀ အရွယ် ဦးငြိမ်း ချမ်း (ခ) အပ္ပဒူလာ ဆိုသူတို့ သေဆုံးခဲ့ပြီး ဆိုင်ကယ်နောက် ထိုင်လိုက်လာသူက ထွက်ပြေးလွတ်မြောက်သွားတယ်လို့ သိရပါတယ်။

သေဆုံးသူအလောင်းတွေကို အရေးပေါ်လူနာတင်ယာဉ်နဲ့ စစ်တပ်က သယ်ယူသွားပြီး ဒီနေ့မနက်ပိုင်းမှာ ဦးငြိမ်းချမ်းအလောင်း ပြန်ရတယ်လို့ ဒေသခံတယောက်က ဆိုပါတယ်။

ဩဂုတ် ၂၀ ရက် ည ၉ နာရီလောက်က မြိတ်မြို့နယ် ကလွင်ကျေးရွာအုပ်စု ရှမ်းချောင်းလမ်းမကြီးရှိ ဓနိရည်ချိုလမ်းထိပ်မှာ ဆိုင်ကယ်စီးလာတဲ့ အသက် ၃၇ နှစ်အရွယ် သုဘရာဇာလူငယ်များ နာရေးကူညီမှုအသင်း အဖွဲ့ဝင် ကိုထွန်းထွန်း (ခ) သားဖြူ ဆိုသူကို ကင်းလှည့်လာတဲ့ စစ်ကောင်စီတပ်ဖွဲ့ဝင်တွေက ကားနဲ့ တိုက်သတ်ခဲ့ပါသေးတယ်။ DVB

မွန်ပြည်နယ်၊ ရေးမြို့နယ်ရှိ ရေးတံတားကြီး စစ်ဆေးရေးဂိတ်ကို ယနေ့ ဩဂုတ်လ ၂၅ရက် နံနက် ၁၀ နာရီခွဲခန့်တွင် ရေးဘီလူးအဖွဲ့မှ ဝင်ရောက် စီးနင်းပစ်ခတ်ခဲ့ရာ စစ်ကောင်စီတပ်ဘက်က ငါးဦး သေဆုံးပြီး ကိုးဦး ထိခိုက် ဒဏ်ရာရရှိခဲ့ကြောင်း ယင်းအဖွဲ့၏ ဦးဆောင်သူထံက သိရသည်။

ရေးမြို့နယ် အခြေစိုက် ရေးဘီလူးအဖွဲ့ ခေါင်းဆောင် တစ်ဦးက“ အဲ့ဒီ စစ်ဆေးရေးဂိတ်က ပြည်သူ့အပေါ်မှာ တအားကြီး အနိုင်ကျင့်တယ်။ ငွေတွေလည်း မတရားကောက်တယ်။ ဒါကြောင့် ကျွန်တော်တို့က အဲ့ဒီနေရာ မစ်ရှင်အနေနဲ့ မသွားဘဲ စခန်းသိမ်းပွဲ ပုံစံမျိုးနဲ့ သွားရောက် တိုက် ခိုက်ခဲ့တယ်”ဟု ပြောသည်။

ယင်းသို့ ဝင်ရောက် တိုက်ခိုက်မှုကြောင့် ထိခိုက်ဒဏ်ရာ ရရှိခဲ့သူ ကိုးဦးအနက် လေးဦးတွင် ပြင်းထန်ဒဏ်ရာ ရရှိထားကြောင်း သိရသည်။

အဆိုပါ ရေးတံတားကြီး စစ်ဆေးရေး ဂိတ်တွင် စစ်ကောင်စီ တပ်သားများနှင့် ပျူစောထီးအဖွဲ့များ စောင့်ကြပ်သည်ဟု သိရသည်။ mizzima

စစ်ကိုင်းတိုင်း၊ အရာတော်မြို့နယ်၊ ကမ်းဖြူရွာအနီးမှာ ဒီနေ့ ဩဂုတ် ၂၅ ရက် မနက် ၈ နာရီခွဲလောက်က စစ်ကောင်စီကားနှစ်စီး မိုင်းဆွဲခံရတယ်လို့ ဒေသခံ ပြည်သူ့ကာကွယ်ရေးတပ် တာဝန်ရှိသူက ပြောပါတယ်။

မိုင်းဆွဲခံရတဲ့ စစ်ကောင်စီကား ၂ စီးဟာ ပရိုဘောက်ကားလေးနှစ်စီးဖြစ်ပြီး အရာတော် အမြောက်တပ်ထဲကနေ ထွက်လာတာလို့ ဆိုပါတယ်။

Zero ပြောက်ကျားတပ်ဖွဲ့ တာဝန်ရှိသူ ကိုသက်ကြီးက “ကျနော်တို့ ဆွဲမိုင်း ၅ လုံး၊ ရှေ့ထွက်မိုင်း ၂ လုံး အသုံးပြု တိုက်ခိုက်ခဲ့တာဗျ။ စ(–)တွေကတော့ အသေများမယ်။ အတိအကျတော့ မသိရဘူး။ မိုင်းအဆွဲခံရတဲ့နေရာမှာ စ(–)တွေ ကားခဏရပ်နေသေးတယ်။ နောက်ပြီး သစ်ကျင်းကြီးရွာထဲ မောင်းဝင်သွားတယ်” လို့ ပြောပါတယ်။

အခုမိုင်းဆွဲတိုက်ခိုက်ခဲ့တာဟာ Zero‌ ‌ပြောက်ကျားတပ်ဖွဲ့နဲ့ မဟာမိတ် Danger Force က တိုက်ခိုက်ခဲ့တာလို့ ဆိုပါတယ်။

ပြီခဲ့တဲ့ရက်ပိုင်းကလည်း အရာတော်မြို့နယ် ကမ်းဖြူရွာ စာသင်ကျောင်းမှာ တပ်စွဲထားတဲ့ စစ်ကောင်စီတပ်ကို Zero ပြောက်ကျားတပ်ဖွဲ့က ဒရုန်းအသုံးပြုပြီး တိုက်ခိုက်ခဲ့လို့ စစ်ကောင်စီဘက်က ထိခိုက်ဒဏ်ရာရခဲ့တယ်လို့ ဒေသခံ ရွာသားတွေရဲ့ ပြောပြချက်အရ သိရပါတယ်။ DVB

နေပြည်တော်ကောင်စီနယ်မြေ ဒက္ခိဏခရိုင်တရားရုံးမှာ သြဂုတ် ၂၄ ရက် ည ၈ နာရီက ဗုံးလေးကြိမ်ပေါက်ခဲ့ပြီး ရဲတယောက်နဲ့ ရုံးစောင့်တယောက်တို့ ထိခိုက်ဒဏ်ရာ ရရှိခဲ့တယ်လို့ မြို့ခံတွေက ပြောပါတယ်။

နေပြည်တော်ကောင်စီနယ်မြေ ပုဗ္ဗသီရိမြို့နယ် အောင်သုခကျေးရွာအနီးရှိ ဒက္ခိဏခရိုင် တရားရုံးမှာ မနေ့ည ၈ နာရီက ဗုံးလေးကြိမ် ဆက် တိုက်ပေါက်ခဲ့တာလို့ ကျေးရွာနေသူတယောက်က ပြောပါတယ်။

“ဗုံးက တလုံးကို ငါးမိနစ်စီပဲ ခြားတယ်။ ပေါက်တာ ထောင်ထားလို့ ပေါက်တာမဟုတ်ဘဲ ဗုံးနဲ့ပစ်နေသလိုမျိုး ပေါက်တာ။”

ဒက္ခိဏခရိုင် တရားရုံးကို ကားတစီးနဲ့ အမည်မသိ အမျိုးသားတွေက ဗုံးတွေနဲ့ လေးကြိမ်တိတိ ပစ်ခတ်ခဲ့ရာ အဆောက်အဦတချို့၊ ရဲတပ်ဖွဲ့ဝင်တယောက်နဲ့ ရုံးစောင့်တယောက် ထိခိုက်ဒဏ်ရာ ရရှိခဲ့တယ်လို့ အုပ်ချုပ်ရေးနဲ့ နီးစပ်သူတယောက်က ပြောပါတယ်။

“အဆောက်အဦလည်း ပျက်စီးသွားတယ်။ ရဲဒုတပ်ကြပ်တဦးရယ်၊ ရုံးစောင့်ဝန်ထမ်းရယ် ဒဏ်ရာရတယ်။ အခု ဆေးရုံပို့ထားရတယ်။”

ဒဏ်ရာရရှိသူ နှစ်ယောက်ကို စစ်ကောင်စီတပ်က လူနာတင်ယာဥ်တွေနဲ့ လာရောက်သယ်ဆောင်ကာ နေပြည်တော် ခုတင် ၁၀၀၀ ဆေးရုံကို ပို့ဆောင်ထားတယ်လို့ အောင်သုခကျေးရွာနေသူတွေက ပြောပါတယ်။

လတ်တလောမှာ တရားရုံး ဗုံးပေါက်ကွဲမှုနဲ့ပတ်သက်ပြီး ပုဗ္ဗသီရိမြို့နယ်အတွင်း လုံခြုံရေး တိုးမြှင့်ချထားတယ်လို့ မြို့ခံတွေက ဆိုပါတယ်။ DVB

ရခိုင်ပြည် တောင်ကုတ်မြို့နယ် ချောင်းသုံးခွကျေးရွာဖက်တွင် ရက္ခိုင့်တပ်တော် AAနှင့် စစ်ကောင်စီတပ်တို့ ယနေ့သြဂုတ်လ ၂၅ ရက် ညနေပိုင်းအချိန်၌ တိုက်ပွဲဖြစ်ပွားခဲ့ကြကြောင်း ဒေသသတင်းရင်းမြစ်များမှတစ်ဆင့်သိရသည်။

တိုက်ပွဲမှာ ညနေ ၄ နာရီအချိန်ခန့်က ချောင်းသုံးခွနှင့် ကြိမ်တောချောင်းကျေးရွာအနီးတွင် ဖြစ်ပွားခဲ့ခြင်းဖြစ်ကာ ကြာချိန်အားဖြင့် မိနစ် ၂၀ ခန့်ရှိကြောင်း တောင်ကုတ် ချောင်းသုံးခွအနီးတွင် နေထိုင်သူတစ်ဦးကပြောသည်။

“တိုက်ပွဲက ၄ နာရီလောက်ကစဖြစ်တယ်။ မိနစ် ၂၀ လောက်ကြာပါ်တယ်။ အဲ့ဖက်မှာတော့ ချောင်းသုံးခွရယ်၊ ကြိမ်တောချောင်းနဲ့ တစ်ခြားကျေးရွာတွေရှိပါတယ်။ အထိအခိုက်ကျဆုံးမှုကို မသိရဘူး”ဟုပြောသည်။

သတင်းရင်းမြစ်ပြောဆိုချက်အရ ရက္ခိုင့်တပ်တော် AA တပ်စခန်းရှိသည်နေရာကို စစ်ကောင်စီဖက် ဝင်ရောက် တိုက်ခိုက်ရာတွင် သတင်းပေးမြန်ဆန်သည့်အတွက် ကြားဖြတ်ဝင်ရောက်တိုက်ခိုက်ရာ စစ်ကောင်စီဖက်မှ ၁၄ ဦးခန့်ကျဆုံးရှိခဲ့ပြီး AA ဖက်ကညအနည်းငယ် ထိခိုက်ဒဏ်ရာရရှိကြောင်း AA၏ သတင်းရင်းမြစ်က ပြောသည်။

တိုက်ပွဲဖြစ်ပွားခဲ့သည့်နေရာမှာ သံတွဲမြို့သို့အထွက် ကားလမ်းဖက်တွင်ဖြစ်ပြီး တောင်ကုတ်မြို့နှင့် ၁၀ မိုင်ခန့်အကွာအဝေးရှိကြောင်း သိရသည်။ စစ်ကောင်စီတပ်နှင့် ရက္ခိုင့်တပ်တော်တို့မှာ ပလက်ဝ၊ မောင်တော၊ ရသေ့တောင်ဖက်တို့တွင်သာ တိုက်ပွဲများဆက်တိုက်ဖြစ်ပွားနေပြီး ထပ်တိုးအနေဖြင့် တောင်ကုတ်ဖက်တွင်လည်း ဖြစ်ပွားလာခြင်းဖြစ်သည်။

အမည်မဖော်လိုသည့် ဒေသခံတစ်ဦးက”AA က သတင်းရလို့ ဖြတ်တိုက်တာဗျ။ အဲ့ဒီမှာ စစ်ကောင်စီဖက်က အကျများတယ်။ အရေအတွက်တော့ ၁၄ ဦးထက်မနည်းဘူး။ လက်နက်တွေလည်း သိမ်းဆည်းရမိတယ်”ဟုပြောသည်။

၎င်းတိုက်ပွဲသတင်းနှင့် ပတ်သက်၍ ရက္ခိုင့်တပ်တော် AA ပြောရေးဆိုခွင့်ရှိသူ ခိုင်သုခနှင့်စစ်ကောင်စီ အဖွဲ့ဝင် လုံခြုံရေးနှင့် နယ်စပ်ရေးရဝန် ကြီး ဗိုလ်မှူးကြီးကျော်သူရ တို့ကို ဆက်သွယ်ခဲ့သော်လည်း ဖုန်းလက်ခံဖြေဆိုခဲ့ခြင်း မရှိခဲ့ပေ။

ကျောက်တော်နယ်နှင့် မြောက်ဦးနယ်စပ်ကြားရှိ ကျောက်ကျပ်ကျေးရွာသို့ အင်အား ၁၀၀ ကျော်ခန့်ရှိသည့် စစ်ကောင်စီတပ်စစ်ကြောင်းတစ်ခုက ယနေ့ ဩဂုတ် ၂၅ ရက်နေ့ မွန်လွဲပိုင်းအချိန်ခန့်တွင် ကျေးရွာအတွင်းသို့ ဝင်ရောက်လာခဲ့သည်။

အဆိုပါကျောက်တော် စကခ(၉) မှထွက်လာသည့် စစ်ကောင်စီ စစ်ကြောင်းကို နံနက် ၉ နာရီခွဲဝန်းကျင်က ကျောက်တော်မဟာမုနိသို့ ကား ၆ စီးဖြင့်လာရောက်ချထားခဲ့ခြင်းဖြစ်ပြီး ထိုမှတစ်ဆင့် မဟာမုနိစစ်ဘေးရှောင်စခန်းကို ဖြတ်ကာ ညောင်ချောင်းမှ တစ်ဆင့် ကျောက်ကျပ်ကျေး ရွာသို့ ရောက်သွားခြင်းဖြစ်ကြောင်း ကျောက်တော်ဒေသခံတစ်ဦးကပြောသည်။

စစ်ကောင်စီနှင့် ရက္ခိုင့်တပ်တော် AA တို့ နှစ်ဖက် စစ်ရေးအခြေအနေ တင်းမာနေသည့် ရသေ့တောင်မြို့နယ်၊ ပြားချောင်းကြီးအုပ်စုအတွင်းရှိသော ရက္ခိုင့်တပ်တော် AA၏ စခန်းများနှင့် စစ်ဆေးရေးဂိတ်စခန်းနေရာများကို ဩဂုတ် ၂၅ ရက်နေ့ နောက်ဆုံးဆုတ်ခွါဖို့ ကျေးရွာအုပ်ချုပ်ရေး မှူးများအား စစ်ကောင်စီမှ ခေါ်ယူသတိပေးခဲ့သည်။ khit thit

ချင်းပြည်နယ်၊ ထန်တလန်မြို့နယ် ပညာရေးဌာနမှ ကြားကာလပညာသင်ကြားနိုင်ရေးအတွက် ကျောင်းသင်ခန်းစာ ပုံနှိပ်စာအုပ်များစတင်ပုံနှိပ် ဖြန့်ဝေနေပြီဖြစ်ကြောင်း Public Administration , Thantlang မှ ဩဂုတ်လ ၂၄ ရက်နေ့တွင် ထုတ်ပြန်သည်။

ပုံနှိပ်စာအုပ်များထုတ်ဝေခြင်းသည် အလွန်အလုပ်များပြီး အစိုးရပိုင်ပုံနှိပ်တိုက်များတွင် အလုပ်အလွန်ရှုပ် သောအလုပ်အား အခက်အခဲများကြားမှ ကြိုးစားလုပ်ဆောင်မှုအပေါ် ထန်တလန်ပြည်သူ့အုပ်ချုပ်ရေး အဖွဲ့မှ ပညာရေးဌာနအား လေးစားချီးကျူးကြောင်း ဆိုသည်။

ရောင်စုံပုံနှိပ်နိုင်ရေးအတွက် စက်ပစ္စည်း၊ ကုန်ကြမ်း၊ ဖလင် စသောလိုအပ်ချက်များ ပြည့်စုံမှဖြစ်နိုင် သော် လည်း လတ်တလောတွင် roso စက်များဖြင့်၊ အဖြူအမဲစာလုံးများဖြင့် စတင်ပုံနှိပ်ထုတ်ဝေနိုင်ပြီဖြစ် ကြောင်း သိရသည်။

ထန်တလန်မြို့နယ်ပြည်သူ့အုပ်ချုပ်ရေး၊ မြို့နယ်ပညာရေးဌာနအနေဖြင့် မြို့နယ်အတွင်းရှိ ကျေးရွာ ၅၁ ရွာ၌ အလယ်တန်းအဆင့်ထိ ကျောင်း သားပေါင်း ၈,၀၀၀ ကျော် ကိုပညာ သင်ကြားပေးလျက်ရှိကြောင်း ထုတ်ပြန်ချက်တွင် ဖော်ပြထားသည်။

ယင်းကဲ့သို့ လုပ်ဆောင်နိုင်မှုများသည် ပြည်သူများပါဝင်မှုကြောင့်ဖြစ်ပြီး နယ်စွန်နယ်ဖျားမှ စစ်ပွဲဒဏ် ပြင်း ထန်စွာသင့်နေသော ထန်တလန်မြို့နယ်တွင် ပညာရေးပုံနှိပ်စာအုပ်ထုတ်ဝေနိုင်ရေးအတွက် ပါဝင်လှူ ဒန်းနိုင်ပါကြောင်း အသိပေးထားသည်။

၂၀၂၂ ဇန်နဝါရီလ ၂၀ရက်နေ့က CDF – Thantlang ထိန်းချုပ်နယ်မြေအတွင်းရှိ ရွာပေါင်း ၅၁ ရွာတွင် ဖက်ဒရယ်ပညာရေးစနစ်ဖြင့် ကြားကာ လပညာရေး ပထမအဆင့်(၆)လစီမံချက်ဖြင့် စတင်ဖွင့်လှစ်ခဲ့ ကြောင်း သိရသည်။

စက်တင်ဘာလ ၁ ရက်နေ့ ၂၀၂၂ တွင် ဒုတိယအဆင့် ကြားကာလပညာရေးစီမံချက်အရ ကျောင်းများ ပြန်လည်ဖွင့်လှစ်မည်ဖြစ်ကြောင်း ထန်တလန်မြို့ပညာရေးဌာနမှ ထုတ်ပြန်ထားသည်။

အဆိုပါထုတ်ပြန်ချက်တွင် မူလတန်းကျောင်းသားကျောင်းသူ ၄,၉၀၀ဦး၊ အလယ်တန်း ကျောင်းသား၊ ကျောင်းသူ ၂,၃၁၆ ဦးနှင့် စစ်ဘေးရှောင်ကျောင်းသား ကျောင်းသူ ၃,၀၀၀ ဦးခန့်ရှိကြောင်း သိရှိရသည်။ mizzima