SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မြန်မာနိုင်ငံတွင်းက နိုင်ငံတကာကုမ္ပဏီများသည် အမေရိကန်ဒေါ်လာ ရှားပါးပြတ်လပ်မှု ကြီးထွားလာနေခြင်းနှင့် ရုန်းကန်နေရသည်။ စစ်အစိုးရ၏ ခုတစ်မျိုး တော်ကြာတစ်မျိုး နိုင်ငံခြားငွေအား ထိန်းချုပ်မှုများကြောင့် အခြေအနေ ပိုမို ဆိုးဝါးစေကာ စီးပွားရေးလုပ်ငန်းကိုင်ငန်းများကို ဘေးအန္တရာယ်ဆီ ဆက်လက်တွန်းပို့နေတော့သည်။

“နိုင်ငံခြားငွေ မရရှိခြင်းက ကျွန်တော်တို့ရဲ့ အကြီးမားဆုံး ပြဿနာပါပဲ”ဟု မြန်မာနိုင်ငံတွင် လုပ်ငန်းဆောင်ရွက်နေသည့် ဂျပန်ကုမ္ပဏီတစ်ခုမှ ပြည်တွင်း အမှုဆောင်တစ်ဦးက ပြောသည်။

မြန်မာနိုင်ငံတွင်းက နိုင်ငံခြားကုမ္ပဏီများသည် ကုန်ကြမ်းနှင့် သွင်းကုန်များ ဝယ်ယူရာ၌ ၎င်းတို့ လုပ်ငန်းဆောင်ရွက်မှုမှ ရရှိသော ကျပ်ငွေကို အမေရိကန်ဒေါ်လာနှင့် လဲလှယ်ကြရသည်။

သို့ရာတွင် ၂၀၂၁ ဖေဖော်ဝါရီ၌ စစ်တပ်က အာဏာသိမ်းလိုက်ချိန်မှစကာ ဘဏ်များမှ ဒေါ်လာ ရရှိရေးက ၎င်းတို့အတွက် အလွန်ခက်ခဲလာတော့သည်။

အရပ်သား ဦးဆောင်သော အစိုးရထံမှ အာဏာသိမ်းယူခဲ့သော မြန်မာစစ်တပ်သည် နိုင်ငံ၏ နိုင်ငံခြားငွေ မူဝါဒကို ဆုံးဖြတ်ပေးသော နိုင်ငံခြားငွေ လဲလှယ်ရေး ကြီးကြပ်မှု ကော်မတီ FESC ကို ဧပြီလအတွင်းက ဖွဲ့စည်းခဲ့သည်။ ယင်းလထဲမှာပင် ဗဟိုဘဏ်သည် အချို့‌သော အမိန့်ရ ကုမ္ပဏီများနှင့် အခြားသော အစုအဖွဲ့များမှ လွဲ၍ နိုင်ငံခြားငွေ ကိုင်ဆောင်သူများအနေဖြင့် ဒေါ်လာအား ကျပ်ငွေသို့ လဲလှယ်ကြရန် လိုအပ်ကြောင်း ဆုံးဖြတ်ချက်ကို ကြေညာခဲ့သည်။ ယင်း မူဝါဒသစ်အရ အစိုးရသည် နိုင်ငံခြားငွေကို ဗဟိုမှ ချုပ်ကိုင်ထားပြီး သွင်းကုန်လုပ်ငန်းရှင်များကိုလည်း တရားဝင် ငွေလဲလှယ်နှုန်းတစ်ရပ်မှာ လဲလှယ်စေသည်။

ကုမ္ပဏီများသည် သွင်းကုန်အတွက် ပေးချေမှု အပါအဝင် ပြည်ပသို့ ငွေပေးပို့ရာ၌ FESC ၏ အတည်ပြုချက် ယူရသည်။ မြန်မာစစ်အစိုးရသည် သွင်းကုန်လိုင်စင် လိုအပ်သည့် တော်တော်များများသော ကုန်စည်များကို တိုးမြှင့်သတ်မှတ်ပြီး ကုမ္ပဏီတိုင်းအတွက်လည်း သွင်းကုန်ကန့်သတ်မှုများ ချမှတ်ခဲ့သည်။

အမှန်တကယ် လုပ်ငန်းဆောင်ရွက်နေကြသော ယင်း အခြေအနေများထဲ ထဲထဲဝင်ဝင် ရှိသူတို့၏ အဆိုအရ တရားဝင်နှုန်းဖြင့် ဒေါ်လာ လဲလှယ်ရခြင်းသည် လောင်စာနှင့် စားသုံးဆီ တင်သွင်းသူများအတွက် အကန့်အသတ်များ များစွာ ဖြစ်နေစေသည်ဟု သိရသည်။

ဩဂုတ်လမှ စတင်ပြီး အခြားသော သွင်းကုန်လုပ်ငန်းများကိုလည်း ဒေါ်လာလဲလှယ်မှု စည်းကြပ်မှုအောက် တရားဝင် ထည့်သွင်းခဲ့သကဲ့သို့ လက်ဝယ်ရှိ ဒေါ်လာကို တင်ပြရန် ချမှတ်ခဲ့သည်။ ယင်းအစား ပို့ကုန်လုပ်ငန်းရှင်များ ရရှိသော နိုင်ငံခြားငွေ၏ ၃၅ ရာခိုင်နှုန်းကို ကျပ်ငွေဖြင့် လဲလှယ်ရခြင်းမှ ကင်းလွတ်ခွင့်ပြုခဲ့ရာ ကုမ္ပဏီများကြား အချင်းချင်း ငွေကြေးဖလှယ်ခြင်းများ ဖြစ်လာစေတော့သည်။

ဘဏ္ဍာရေးလုပ်ငန်း တာဝန်ရှိသူတစ်ဦးက အပြောင်းအလဲများကို ရည်ရွယ်ပြီး “အနည်းဆုံးတော့ FESC အနေနဲ့ အစစအရာရာကို မထိန်းချုပ်နိုင်ဘူးဆိုတာ နားလည်သွားတာပေါ့”ဟု ပြောသည်။

“ဒီ မူဝါဒတွေရဲ့ ထိရောက်မှုကတော့ အာဏာပိုင်တွေဟာ မှောင်ခိုဈေးကွက်နဲ့အတူ ဒေါ်လာဈေးကွက်နှစ်ရပ်ဆိုတာမျိုး ဖွင့်လှစ်ပေးမိတော့တာပဲ”ဟု အခြေအနေအား ကျွမ်းဝင်သူတစ်ဦးက ပြောဆိုသည်။ ပုံမှန်လမ်းကြောင်းမှ ဒေါ်လာမဝယ်ယူလည်း ငွေသားဖြင့် ဒေါ်လာရနိုင်သည့် နည်းလမ်းများ ရှိနေကြောင်း ၎င်းက ဖြည့်စွက်ပြောသည်။

သို့ရာတွင် ငွေသားစီးဆင်းမှုအတွင်း ဒေါ်လာ ရှားပါးပြတ်လပ်နေဆဲပဲ ဖြစ်ရာ မှောင်ခိုဈေးကွက်၌ ဒေါ်လာနှုန်းထား ထိုးတက်စေသည်။

ဗဟိုဘဏ်က တစ်ဒေါ်လာကို ကျပ် ၂၁၀၀ တရားဝင်နှုန်းထား သတ်မှတ်ထားသော်လည်း ဗုဒ္ဓဟူးနေ့ မှောင်ခိုပေါက်ဈေးတွင် တစ်ဒေါ်လာ ၃၄၀၀ မှ ၃၆၀၀ ကျပ်အထိ ရှိသည်။ အခြားတစ်ဖက်က ကြည့်မည်ဆိုလျှင် မြန်မာကျပ်ငွေ တန်ဖိုးသည် ၂၀၂၁ ဖေဖော်ဝါရီလ နိုင်ငံရေး ကသောင်းကနင်း မဖြစ်မီက နှုန်းထား၏ ထက်ဝက်ကျော်မက ထိုးဆင်းနေသည်။

မြန်မာနိုင်ငံသည် ငွေကြေးခဝါချမှုနှင့် အကြမ်းဖက် ရန်ပုံငွေ မတည်မှုများကို လျှော့ချနိုင်ခြင်း မရှိ၍ ကမ္ဘာ့လုံးဆိုင်ရာ ဘဏ္ဍာရေးစောင့်ကြည့်ရေးအဖွဲ့ FATF ၏ နာမည်ပျက်စာရင်း သွင်းခံရမည့် ဘေးတွင် ရှိနေပြီ ဖြစ်သည်။ ယင်းသည် နိုင်ငံ၏ နိုင်ငံခြားရင်းနှီးမြုပ်နှံမှု ဆွဲဆောင်နိုင်ရေး၊ ရရှိရေး စွမ်းရည်ကို နောက်ထပ် ထိခိုက်စေမည်ဖြစ်သကဲ့သို့ ကျပ်ငွေကိုလည်း ထပ်တိုး တန်ဖိုးကျဆင်းစေမည်ဖြစ်ကာ ဒေါ်လာရရှိမှု ပို၍ ကျပ်တည်းခက်ခဲလာမည် ဖြစ်သည်။

ဩဂုတ်လကုန်၌ ဒေါ်လာဈေး ကျပ် ၄၀၀၀ ကျော်အထိ ထိုးတက်သွားသည့်နောက်တွင် ဗဟိုဘဏ်သည် နိုင်ငံခြားငွေလဲလှယ်မှု ဈေးကွက်ထဲသို့ ဒေါ်လာ သန်း ၂၀၀ ထည့်သွင်းမည်ဟု ပြောခဲ့သည်။

သို့ရာတွင် ဒေါ်လာ ရှားပါးပြတ်လပ်မှုနှင့် အကျိုးဆက်ဖြစ်သော ကျပ်ငွေတန်ဖိုး ထိုးဆင်းနေမှုကို အချိန်တိုဖြင့် ကုစားနိုင်ရန် ဖြစ်နိုင်ဖွယ် မရှိပေ။ မတည်ငြိမ်သော စီးပွားရေး အခင်းအကျင်း ဆက်လက်ဖြစ်ပေါ်နေဦးမည်ဟု ယူဆရလျက် မြန်မာနိုင်ငံက နိုင်ငံခြား လုပ်ငန်းကိုင်ငန်းများသည် ၎င်း၏ လုပ်ငန်း လည်ပတ်နိုင်ရေးအတွက် တိုးများလာသော ဖိအားများအောက် ကျရောက်လျက် ရှိနေတော့သည်။ mizzima

စစ်ကိုင်းတိုင်း၊ ဘုတလင်မြို့နယ်၊ စီပါရွာအနီးမှာ ဒီနေ့ စက်တင်ဘာ ၈ ရက် မနက် ၈ နာရီခွဲလောက်က စစ်ကောင်စီတပ်နဲ့ ပြည်သူ့ကာကွယ် ရေးတပ်တို့ တိုက်ပွဲဖြစ်ပွားနေတယ်လို့ ဒေသခံတွေက ပြောပါတယ်။

အဲဒီစစ်ကောင်စီတပ်ဟာ ဘုတလင်မြို့ကနေ ကူတော်ရွာကို သွားနေရင်း ပြည်သူ့ကာကွယ်ရေးအဖွဲ့နဲ့ ထိပ်တိုက်တွေ့ပြီး အခုလို တိုက်ပွဲဖြစ်တာလို့ ဆိုပါတယ်။

ဘုတလင်ဒေသခံ ရွာသားတယောက်က “စီပါရွာအနီးမှာ ဖြစ်နေကြတာ။ လက်နက်သံတွေကတော့ ဆူညံနေတုန်းပဲ။ မိုင်းကွဲသံတွေရော၊ စက်လက်သံတွေရော ကြားနေရတယ်။ တိုက်ပွဲက ရုတ်တရက်ကြီး ဖြစ်တာဆိုတော့ ဒေသခံတွေ ပိတ်မိတာတွေလည်း ရှိနိုင်တယ်။ အခုထိ တိုက်ပွဲက မပြီးသေးဘူးဆိုတော့ အထိအခိုက်၊ အပျက်အစီးတွေကို ဘာမှ မပြောနိုင်သေးဘူး” လို့ ပြောပါတယ်။

အခုတိုက်ပွဲမှာ စစ်ကောင်စီအင်အား ၁၅၀ နဲ့ စစ်ကြောင်းသုံးကြောင်းခွဲလာပြီး အကျအဆုံးများစွာနဲ့ ဘုတလင်ဘက် ပြန်ဆုတ်သွားတယ်လို့ ဘုတလင်ဒုံးပျံအဖွဲ့ ခေါင်းဆောင်က ပြောပါတယ်။

“သူတို့က ဘုတလင်စခန်းကနေ ကူတော်စခန်းကို ခြေလျှင်စစ်ကြောင်းတကြောင်း ပထမ စထွက်တယ်။ နောက်တော့ အဲဒီစစ်ကြောင်းနောက်ကို ထပ်ပြီး ခြေလျှင်တကြောင်း ထပ်လိုက်တယ်။ အဲဒီကနေ စီပါအနီးမှာ တိုက်ပွဲဖြစ်ပွားနေတာဗျ။ နောက်တကြောင်းကတော့ ဘုတလင်-မောင်းထောင်-ကူတော် ကတ္တရာလမ်းအတိုင်း စစ်ကားသုံးစီးနဲ့ ထပ်ထွက်လာတယ်။ အဲ့ကားကိုလည်း မိုင်းဆွဲလိုက်တာ ကားတစီးကတော့ အတော်လေး ပျက်စီးတယ်။ ကားပေါ်မှာပါတဲ့ စ(–)တွေလည်း အတော်လေး ထိခိုက်သွားတယ်။ အဲလိုဖြစ်ပြီး ကူတော်ရွာဘက် မသွားတော့ဘဲ ဘုတလင်မြို့ဘက် ပြန်မောင်းပြေးသွားတယ်။”

နှစ်ဖက်အကျအဆုံး အထိအခိုက် အရေအတွက်ကိုတော့ ဒီဗွီဘီအနေနဲ့ သီးခြားအတည်ပြုချက် ရယူနိုင်ခြင်း မရှိသေးပါဘူး။

စစ်ကောင်စီတပ်ကတော့ အခုစက်တင်ဘာလ ပထမအပတ်မှာတင် ဘုတလင် ပြည်သူ့ကာကွယ်ရေးတပ်နဲ့ ၆ ကြိမ်ထက်မနည်း တိုက်ပွဲဖြစ်ပွားခဲ့ပြီး စစ်ကောင်စီတပ်က မောင်းထောင်ရွာနဲ့ တွင်းရွာကို မီးရှို့တာတွေ လုပ်ဆောင်ခဲ့ပါတယ်။ အခု ဒီနေ့ စီပါရွာအနီး တိုက်ပွဲဟာ မပြီးဆုံးသေးဘဲ နှစ်ဖက် စစ်ရေးအခြေအနေ တင်းမာနေဆဲပဲလို့ ဘုတလင်‌မြို့နယ် ဒေသခံတွေက ပြောပါတယ်။ DVB

ရေနံနှင့် ဓာတ်ငွေ့ဆိုင်ရာ လုပ်ငန်းများ အပါအဝင် နိုင်ငံခြားစီးပွားရေးလုပ်ငန်းကုမ္ပဏီများ မြန်မာနိုင်ငံတွင် လာရောက်ရင်းနှီးမြှုပ်နှံကြရန် မြန်မာအာဏာသိမ်းစစ်ကောင်စီခေါင်းဆောင် မင်းအောင်လှိုင်က စက်တင်ဘာ ၇ ရက်၌ ရုရှဖိုရမ်တစ်ခု တက်ရောက်စဉ် ဖိတ်ခေါ်ခဲ့သည်။

ရုရှအရှေ့ပိုင်း ဗလာဒီဗိုစတော့ခ် မြို့တွင် ရုရှသမ္မတ ဗလာဒီမာပူတင်က အိမ်ရှင်အဖြစ် ဆောင်ရွက်သည့် အရှေ့ဖျား စီးပွားရေးဖိုရမ်တွင် ပြောကြားရာတွင် မင်းအောင်လှိုင်က မြန်မာနိုင်ငံသို့ နိုင်ငံခြားရင်းနှီးမြှုပ်နှံမှုများ ဝင်ရောက်ရေး ဖိတ်ခေါ်ခဲ့ခြင်း ဖြစ်သည်။

ထို့ပြင် အမေရိကန်ဒေါ်လာ၏ နေရာတွင် တရုတ်ယွမ်၊ ရုရှ ရူဘယ်လ်နှင့် အိန္ဒိယ ရူပီးငွေများဖြင့် အစားထိုးအသုံးပြုရေးကိုလည်း ၎င်းက အ ကြံပြုခဲ့သည်။

မြန်မာသည် ရုရှထံမှ စက်သုံးဆီကို ဝယ်ယူနေပြီ ဖြစ်ပြီး ရူဘယ်လ်ငွေဖြင့် ပေးချေမည် ဖြစ်ကြောင်း၊ အကြောင်းမှာ အခြားသော ငွေကြေးများ အသုံးပြုရာတွင် အခက်အခဲရှိခြင်းကြောင့် ဖြစ်ကြောင်း မင်းအောင်လှိုင်က ပြောသည်။

မြန်မာအာဏာသိမ်းစစ်ကောင်စီသည် ဒေသတွင်း ထိပ်သီးအစည်းအဝေး အများစုကနေ ပိတ်ပင်တားမြစ်ခံထားရသည့်အတွက် သီးခြားအထီး ကျန်ဖြစ်နေခဲ့ရာတွင် ယခုအခါ သံတမန်ရေး ထောက်ခံမှုနှင့် စစ်ဖက်လက်နက်ပစ္စည်းများ ရနိုင်ရေးအတွက် ရုရှနှင့် ဆက်ဆံမှုကို တိုးမြှင့်လာနေခဲ့သည်။

မြန်မာနိုင်ငံတွင် ၂၀၂၁ ဖေဖေါ်ဝါရီလက မင်းအောင်လှိုင် ဦးဆောင်သော စစ်တပ်က နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည်၏ အ စိုးရထံမှ အာဏာသိမ်းယူပြီး အရပ်သားအစိုးရခေါင်းဆောင်များ၊ ထောင်ချီသော တက်ကြွလှုပ်ရှားသူများနှင့် ဆန္ဒပြသူများကို ဖမ်းဆီးထိန်းသိမ်းခဲ့ပြီးနောက် နိုင်ငံသည် ဝရုန်းသုန်းကား အခြေအနေအောက် ကျရောက်နေခဲ့သည်။ mizzima

စစ်ကိုင်းတိုင်း၊ ကန့်ဘလူမြို့နယ်၊ ကိုးတောင်ဘို့တိုက်နယ်အတွင်း စက်တင်ဘာ ၇ ရက် နေ့လယ် ၂ နာရီလောက်မှာ စစ်ကောင်စီတပ်က ဂျက်တိုက်လေယာဉ်တစင်းနဲ့ နာရီဝက်ခန့်ကြာ လာရောက်ပစ်ခတ်ခဲ့တယ်လို့ ဒေသခံတွေက ပြောပါတယ်။

ကိုးတောင်ဘို့တိုက်နယ် ဇီးကနားအုပ်စု ကျေးရွာတွေအနီးကို ဂျက်တိုက်လေယာဉ်နဲ့ ပစ်ခတ်ခဲ့ပြီး Mi 17 ထောက်ပို့ရဟတ်ယာဉ် နှစ်စင်းနဲ့ တပ်ဖွဲ့ဝင်အင်အား ၁၃၀ ခန့်ကို ၄ ကြိမ် ချပေးသွားတယ်လို့ ဆိုပါတယ်။

ဒေသခံတယောက်က “တိုက်ပွဲမရှိဘဲ တိုက်လေယာဉ်နဲ့ ပစ်ခတ်ပြီး လမ်းကြောင်းရှင်းတဲ့ ပုံစံမျိုး လုပ်သွားတာ။ နောက်ပြီး ရဟတ်ယာဉ်နှစ်စင်းနဲ့ နှောကုန်းရွာ အနောက်ဘက်မှာ ၂ ခါ၊ လျှော်ဖြူကုန်းရွာနဲ့ ဇီးကနားရွာ အနောက်ဘက်ကို ၁ ခါစီ၊ စုစုပေါင်း ၄ ခါ လူချသွားတယ်။ အဲ့ဒီချပေးသွားတဲ့ စစ်ကောင်စီတပ်ဖွဲ့ဝင်တွေက ရွာတွေဘက်ကို လက်နက်ကြီး၊ လက်နက်ငယ်တွေနဲ့ ပစ်ခတ်တာတွေလုပ်ပြီး စစ်ကြောင်းထိုးလာတာ။ သူတို့ (စစ်ကောင်စီတပ်ဖွဲ့) က PDF တွေရှိမယ်အထင်နဲ့ ရွာတွေဘက်ကို လာသောင်းကျန်းတာပဲ။ အသေပျောက်တော့ မသိရသေးဘူး။ ရွာကလူတွေတော့ ပြေးနေရတယ်” လို့ ပြောပါတယ်။

စစ်ကောင်စီတပ်ဖွဲ့ဟာ နှောကုန်းကျေးရွာနဲ့ ဇီးကနားကျေးရွာထဲကို လက်နက်ကြီး၊ လက်နက်ငယ်တွေနဲ့ ပစ်ခတ်ဝင်ရောက်ခဲ့တာကြောင့် ကျေး ရွာဒေသခံတွေ ထွက်ပြေး တိမ်းရှောင်နေကြရပြီး ထွက်ပြေးချိန်မရဘဲ ပိတ်မိနေလို့ ဖမ်းဆီးခံထားရတာတွေလည်း ရှိတယ်လို့ သိရပါတယ်။

လက်ရှိမှာ နှောကုန်းနဲ့ ဇီးကနားကျေးရွာမှာ စစ်ကောင်စီတပ်ဖွဲ့က တပ်စွဲထားပြီး ဒေသခံတွေက ကျေးရွာအတွင်း ပြန်မဝင်ရဲဘဲ တောထဲတွေနဲ့ ဘေးကင်းနိုင်မယ့် နီးစပ်ရာ နေရာတွေမှာ ခိုကပ်နေထိုင်ကြရတယ်လို့ ဒေသခံတွေက ပြောပါတယ်။

စစ်ကောင်စီတပ်ဖွဲ့ဟာ ပြီးခဲ့တဲ့ ဩဂုတ် ၂၃ ရက်က စတင်ကာ ကန့်ဘလူမြို့နယ် မြောက်ဘက်ခြမ်းက ကျေးရွာတွေကို စစ်ကြောင်းထိုး ဝင်ရောက်တာတွေ ရှိနေပြီး လေကြောင်းက ပစ်ခတ်တာတွေလည်း ရှိနေပါတယ်။ DVB

စစ်ကိုင်းတိုင်း၊ မုံရွာမြို့နယ်တွင် ချင်းတွင်းမြစ်အတိုင်း စုန်ဆင်းလာသည့် စစ်ကောင်စီ၏ စစ်သင်္ဘော ငါးစီးကို ဒေသကာကွယ်ရေးတပ်ဖွဲ့များ မိုင်းဆွဲတိုက်ခိုက်ခဲ့ကြောင်း Monywa Bandhula People Defence Force က ယနေ့ စက်တင်ဘာလ ၈ ရက်နေ့တွင် သတင်း ထုတ်ပြန်သည်။

ချင်းတွင်းမြစ်အတိုင်း စုန်ဆင်းလာသည့် သင်္ဘောကြီး သုံးစီးတစ်တွဲ နှင့် နှစ်စီးတစ်တွဲ ပါသည့် စစ်ကောင်စီ၏သင်္ဘောများကို ယမန်နေ့ စက်တင်ဘာလ ၇ရက် နေ့က မိုင်းဆွဲတိုက်ခိုက်ခဲ့ခြင်းဖြစ်ကြောင်း သိရသည်။

“သူတို့ (စစ်ကောင်စီတပ်) က မုံရွာဂိတ်ကနေ ထွက်လာတာပါ၊ မုံရွာဘက်က သတင်း လှမ်းပေးတာဗျ၊ လူအင်အားနဲ့စားနပ်ရိက္ခာ လက်နက်ပစ္စည်းတွေ ပါတယ်၊ လာမှာကို သတင်းကြိုရထားလို့ တိုက်ခိုက်ခဲ့တာပါ” ဟု Monywa Bandhula- PDF မှတာဝန်ရှိသူက မဇ္ဈိမ ကိုပြော သည်။

မိုင်းဆွဲတိုက်ခိုက်မှုဖြစ်ပွားပြီးနောက် စစ်ကောင်စီတပ်သည် ကာကွယ်ရေးတပ်ဖွဲ့များထံသို့ ဒရုန်းများ လွှတ်လာသည့်အပြင် လက်နက်ကြီးများဖြင့်လည်း ပစ်ခတ် တိုက်ခိုက်ခဲ့ကြောင်း တာဝန်ရှိသူထံက သိရသည်။

အဆိုပါတိုက်ခိုက်မှုကို Monywa Bandhula People Defence Force နှင့် Farmers Revolution Force တို့ပူးပေါင်း လုပ်ဆောင်ခဲ့ခြင်းဖြစ်ပြီး ဒေသကာကွယ်ရေး ပူးပေါင်းတပ်ဖွဲ့ဘက်မှ အထိခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။

မိုင်းဆွဲတိုက်ခိုက်မှုကြောင့် စစ်ကောင်စီ၏ သင်္ဘောများ ထိခိုက်ပျက်စီးမှု အခြေအနေကိုမူ မသိရှိရသေးပေ။

လက်ရှိ နောက်ဆုံးရရှိထားသည့် မြေပြင်သတင်းအချက်အလက်များအရ ဆားလင်းကြီး မြို့နယ်ဘက်ကို စစ်ကြောင်းထိုးဝင်ရောက်ခဲ့သည့် စစ်ကောင်စီတပ်သည် ယခုမိုင်းဆွဲ တိုက်ခိုက်ခံရသည့် စစ်ကောင်စီတပ်သားများဖြစ်နိုင်ကြောင်း Monywa Bandhula- PDF မှတာဝန်ရှိသူက ပြောကြားသည်။ mizzima

ရန်ကုန်မြို့၊ သင်္ဃန်းကျွန်းမြို့နယ်နေ အခြေခံလူတန်းစားတွေအတွက် Aladdin Men Fashion ဆိုင်က စက်တင်ဘာ ၇ ရက် မနက်ပိုင်းက ဆန်တပြည် ၁၀၀ ကျပ်၊ ကြက်ဥတကတ် ၁၀၀ ကျပ်နဲ့ လူဦးရေ ၇၀၀ ကို ရောင်းချပေးခဲ့ပါတယ်။

လေးထောင့်ကန်လမ်းမကြီးပေါ်က Aladdin Men Fashion ဆိုင်က ရောင်းချပေးတာဖြစ်ပြီး ဝယ်ယူသူတွေဟာ မနက်အစောပိုင်းကတည်းက လာရောက် စောင့်ဆိုင်းနေကြတယ်လို့  Aladdin Men Fashion ဆိုင် တာဝန်ခံကပြောပါတယ်။

“တချို့ဆို မနက်သုံးနာရီလောက်ကတည်းက လာစောင့်နေတာ၊ ဝယ်ကြမှာပေါ့ဗျာ။ ဆန်တပြည် ၂,၀၀၀ ကျော်နေပြီ။ ကြက်ဥတလုံးကို ၂၅၀ ရှိတယ်။ အဲဒါကြောင့် မိသားစုလိုက် လာဝယ်ကြတာ။”

လာရောက်ဝယ်ယူသူတွေဟာ တောင်ဒဂုံ၊ မြောက်ဒဂုံ၊ သာကေတ၊ လှိုင်သာယာ၊ တောင်ဥက္ကလာ၊ သင်္ဃန်းကျွန်းနဲ့ တခြားမြို့နယ်တွေက ဖြစ်ပါတယ်။

“မနက်အစောကြီးကတည်းက လာတန်းစီနေတော့ အားနာတယ်။ အဲဒါကြောင့် ၁၂ နာရီမှ ရောင်းဖို့လုပ်ထားပေမဲ့ ၁၀ နာရီကနေ စပြီးရောင်းပေးလိုက်တာ။”

အခြေခံလူတန်းစားတွေအပြင် လခစားဝန်ထမ်းတွေလည်း ဆန်တပြည်နဲ့ ကြက်ဥတကတ်ကို ၁၀၀ ကျပ်နဲ့ လာရောက်ဝယ်ယူကြတယ်လို့ တောင်ဥက္ကလာပမြို့နယ်နေသူတယောက်က ဒီဗွီဘီကို ပြောပါတယ်။

“အရင်က ရတဲ့လစာနဲ့ စားလို့ရတယ်။ အခု ကုန်စျေးနှုန်းက တက်နေတော့ လစာနဲ့ ဘယ်လိုမှ မရပ်တည်နိုင်ဘူး။ လင်မယားနှစ်ယောက် က လေးတွေပါခေါ်ပြီး လာတန်းစီတာ။”

Aladdin Men Fashion ကနေ ပြီးခဲ့တဲ့ သြဂုတ် ၁၇ ရက်ကလည်း အခြေခံလူတန်းစား ၄၀၀ လောက်ကို ရောင်းချပေးခဲ့တယ်လို့ ဆိုင်တာဝန်ခံက ဒီဗွီဘီကို ပြောပါတယ်။

“နောက်လည်း လှူနိုင်အောင် ကြိုးစားသွားမယ်။ သူငယ်ချင်းတွေစုပြီးလုပ်တဲ့ အလှူပါ။ ပီတိလည်းဖြစ်တယ်။ မရှိတဲ့လူတွေအတွက်လည်း အ ဆင်ပြေသွားတယ်။”

ပြီးခဲ့တဲ့ စက်တင်ဘာ ၁ ရက်ကလည်း သာကေတမြို့နယ် JP Star ဘေထုပ်လက်က္ကားဖြန့်ချိရေးဆိုင်က ဆန်တပြည် ၁၀၀ ကျပ်၊ ကြက်ဥဆယ်လုံး ၁၀၀ ကျပ်နဲ့ နှစ်ရက်တိုင် ရောင်းချပေးခဲ့ပါသေးတယ်။

လတ်တလောမှာ ဒေါပုံမြို့နယ်ထဲက ရပ်ကွက်တွေကို နွယ်အေးစွန္နီဂျာမေဗလီက ကြက်ဥခြောက်လုံးကို ၁၀၀ ကျပ်နဲ့ အပတ်စဥ် ရောင်းချပေးနေတာလည်း ရှိပါတယ်။

စစ်တပ်အာဏာသိမ်းပြီးနောက် မြန်မာနိုင်ငံမှာ အလုပ်အကိုင် အခွင့်အလမ်း ရှားပါးလာပြီး ကုန်စျေးနှုန်း ကြီးမြင့်လာတာကြောင့် လုပ်ငန်းရှင်တွေနဲ့ လူမှုရေးအဖွဲ့အစည်းတွေက အခုလို ရောင်းချပေးနေတာ ဖြစ်ပါတယ်။ DVB

ကချင်ပြည်နယ် မြစ်ကြီးနားမြို့ သီတာရပ်ကွက်ရှိ အကြမ်းဖက် စစ်တပ် စစ်ဖက်ရေးရာ လုံခြုံရေးတပ်ဖွဲ့(စရဖ)ရုံးကို စက်တင်ဘာလ ၈ ရက်နေ့ နံနက် ၉နာရီ ခန့်တွင် မြစ်ကြီးနား PDF တပ်ဖွဲ့က ဝင်ရောက် တိုက်ခိုက်ခဲ့ကြောင်း ကချင်သတင်းဌာန Kachin News Groupက သတင်းဖော်ပြသည်။

မြစ်ကြီးနားမြို့ ဆုတောင်းပြည့်ဘုရား အနီးရှိ စရဖ ရုံးကို မြစ်ကြီးနား PDF တပ်ဖွဲ့မှ ဗုံးဖြင့် ပစ်ခတ်ခဲ့ပြီးနောက် လက်နက်ငယ်များဖြင့် အပြန် အလှန် ပစ်ခတ်ခဲ့ကာ စရဖ ရုံးရှိ အကြမ်းဖက် စစ်သားများကလည်း ပြန်လည် ပစ်ခတ်ခဲ့ပြီး နှစ်ဖက် ထိတွေ့မှုဖြစ်ပွားကာ အကြမ်းဖက် စစ် တပ်ဘက်မှ ထိခိုက်သေဆုံးမှု ရှိ ၊မရှိကို အတည်မပြုနိုင်သေးဘဲ PDF တပ်ဖွဲ့များ အထိအခိုက်မရှိ ဆုတ်ခွာနိုင်ခဲ့ကြောင်း သိရသည်။

“ပစ်ခတ်မှုဖြစ်တယ်။ ပစ်ခတ်သံက ခဏလေးပဲကြားလိုက်ရတာ။ အဲဒီနားကို အခု သွားလာမရဘူး။ အဲဒီရုံးက နဂိုကတည်းက ဘန်ကာတွေနဲ့ သဲအိတ်တွေနဲ့ အစောင့်တွေတော့ ချထားရုံးပဲ။ ပစ်ခတ်သံပဲကြားတာ။ ဘာတွေ ဖြစ်လဲ သွားလည်း မကြည့်ရဲဘူး” ဟု မြစ်ကြီးနားဒေသခံတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။ khit thit

ကချင်ပြည်နယ်၊ ရွှေကူမြို့နယ်၊ သာယာကုန်းကျေးရွာမှာ စက်တင်ဘာ ၆ ရက် မနက်ပိုင်းက ရွာသား ၁၀ ယောက်ထက်မနည်းကို စစ်ကောင်စီတပ်က ဖမ်းဆီးပြီး ကျေးရွာကို မီးရှို့သွားတယ်လို့ ဒေသခံတွေက ပြောပါတယ်။

သာယာကုန်းကျေးရွာမှာ စစ်ကြောင်းထိုးလာတဲ့ စစ်ကောင်စီတပ်ဖွဲ့က ကျေးရွာ ဒေသခံ အမျိုးသား ၁၀‌ ယောက်ထက်မနည်းကို ဖမ်းဆီးခေါ်ဆောင်သွားကာ နေအိမ်တလုံးကို မီးရှို့ဖျက်ဆီးခဲ့တယ်လို့ ဆိုပါတယ်။

ဒေသခံ အမျိုးသားတယောက်က “ဒေသခံ ၁၀ ဦးလောက် ဖမ်းသွားတယ်။ သူတို့က မှိုနှုတ် ဟင်းရွက်ခူး လုပ်နေတဲ့သူတွေ။ ကျနော်ထင်တာကတော့ လက်နက်ပစ္စည်း ထမ်းခိုင်းဖို့ ထင်တယ်။ တပ်ကတော့ ကျောက်ကြီးရွာဘက် ထွက်သွားတယ်။ ရွာက အိမ်တလုံးကိုလည်း မီးရှို့သွားတယ်။ ကျနော်တို့လည်း ဘေးလွတ်ရာ ပြေးနေရတာ” လို့ ပြောပါတယ်။

စစ်ကောင်စီတပ်က နေအိမ်တလုံးကို မီးရှို့ခဲ့တဲ့အပြင် တခြားနေအိမ်နှစ်လုံးအတွင်းက  ပစ္စည်းတွေကို ဝင်ရောက်ရိုက်နှက် ဖျက်ဆီးသွားတယ်လို့ဆိုပါတယ်။

ကချင်ပြည်နယ် ရွှေကူမြို့နယ်မှာ စစ်ကောင်စီတပ်နဲ့ ကချင်လွတ်မြောက်ရေးတပ်မတော် (ကေအိုင်အေ) ဒေသခံ ပြည်သူ့ကာကွယ်ရေး ပူး ပေါင်း တပ်ဖွဲ့တို့ မကြာခဏ တိုက်ပွဲဖြစ်ပွားနေပြီး သြဂုတ် ၁၀ ရက်ကလည်း ကျောက်တလုံးကျေးရွာကို စစ်ကြောင်းထိုးလာတဲ့ စစ်ကောင်စီတပ် မိုင်းဆွဲတိုက်ခိုက်ခံခဲ့ရပါသေးတယ်။ DVB