Monthly Archives: Sep 2022

အရာတော်မြို့နယ်၌ ၁ လအတွင်း စစ်ကောင်စီတပ်မှ အိမ်ခြေ ၁၈၀ မီးရှို့ဖျက်ဆီး ပြည်သူ ၅ ဦး သတ်ဖြတ်ခဲ့ ဟု ပအဖ ထုတ်ပြန်

စစ်ကိုင်းတိုင်း၊ မုံရွာခရိုင် အရာတော်မြို့နယ်တွင် တစ်လတာ အတွင်း အကြမ်းဖက် စစ်ကောင်စီမှ ကျူးလွန်ခဲ့သော စစ်ရာဇဝတ်မှုမှတ်တမ်းအား ပြည်သူအုပ်ချုပ်ရေးအဖွဲ့ အရာတော်မြို့နယ်မှ စက်တင်ဘာလ ၁၂ရက်နေ့တွင် ထုတ်ပြန်သည်။

ယင်းထုတ်ပြန်ချက်တွင် ဇူလိုင်လ ၂၄ရက်မှ ဩဂုတ်လ ၂၃ရက်အတွင်း အရာတော် မြို့နယ်အတွင်းရှိ ကျေးရွာ ခုနစ်ရွာမှ အိမ်ခြေ ၁၈၀ ကို မီးရှို့ဖျက်ဆီးခဲ့ကြောင်း ဆိုသည်။

ဇွန်လ ၂၄ရက်နေ့ ဇီးပင်လည်ရွာတွင် အိမ် တစ်လုံး ၊ ဩဂုတ်လ ၆ရက် မင်းရွာတွင် အိမ် ၁၃၂လုံး ၊ ၇ရက်နေ့ ကောင်းသစ်ရွာ တွင် အိမ် ရှစ်လုံး ၊ ၈ရက်နေ့ ရှောက်ခါးရွာတွင် အိမ် သုံးလုံး ၊ ၁၈ရက်နေ့ နေရာခင်းတွင် အိမ် သုံးလုံး ၊ ၁၉ရက်နေ့ ငြိမ်းစံတွင် အိမ်၂၉လုံးနှင့် ၂၃ရက်နေ့၌ ကျွဲခြံတွင် နေအိမ် လေးလုံး မီးရှို့ဖျက်ဆီးခံရကြောင်း သိရသည်။

ထို့အပြင် စစ်ကောင်စီတပ်ဖွဲ့များသည် ဩဂုတ်လ ၁ရက်နေ့မှ ၃၁ရက်အတွင်း အရာတော်မြို့နယ် ကျေးရွာ ငါးရွာမှ အပြစ်မဲ့ ပြည်သူ ငါးဦးအား သတ်ဖြတ်ခဲ့ကြောင်း ဖော်ပြထားသည်။

ဩဂုတ်လ ၁ရက် လှည်းချောင်းကူးရွာ မှ မသူဇာနွယ် ၊ ၄ရက်နေ့တွင် ကန်ရင်းရွာမှ ကိုကျော်သက်ဦး ၊ ၆ရက်နေ့တွင် မင်းရွာ မှ ဒေါ်ရှင် ၊ ၂၃ ရက်နေ့တွင် ကုန်းသာရွာမှ ကိုဆိတ်ပို နှင့် ၃၁ရက်နေ့၌ ဝါးတန်းရွာမှ ပြည့်ဖြိုးအောင်(ခ) ကိုရှမ်းလေး တို့အား သတ်ဖြတ်ခဲ့ ကြောင်း ဆိုသည်။

စစ်တပ် အာဏာသိမ်းမှုဖြစ်စဉ်မှ ယနေ့အထိ အရာတော်မြို့နယ်အတွင်း အကြမ်းဖက်စစ်ကောင်စီမှ မီးရှို့ဖျက်ဆီးခဲ့သဖြင့် နေအိမ်စုစုပေါင်း ၁,၁၇၅ လုံး ပျက်စီးဆုံး ရှုံးခဲ့ရပြီး အကြောင်းမဲ့ သတ်ဖြတ်ခံရသည့် အပြစ်မဲ့ပြည်သူ ၁၇ဦးရှိခဲ့ပြီဖြစ်ကြောင်း ဖော်ပြထားသည်။

အကြမ်းဖက်စစ်ကောင်စီ၏ လုပ်ရပ်များနှင့်ပတ်သက်ပြီး “အရပ်သားပြည်သူများအပေါ် ပစ်မှတ်ထား၍ တိုက်ခိုက်သော လူမဆန်သည့် အ ကြမ်းဖက်ရာဇဝတ်မှုများ” အဖြစ်မှတ်တမ်းတင်ရှိပြီး ၎င်းပြစ်မှုများအား International Court of Justice (ICJ) ထံတွင် သက်သေအဖြစ် တင်ပြသွားမည်ဖြစ်သည်။

အရာတော်မြို့နယ် ပြည်သူ့အုပ်ချုပ်ရေးအဖွဲ့ သည် စက်တင်ဘာ ၁၁ရက်နေ့ကလည်း မြို့နယ်အတွင်းရှိ Non CDM များ အလင်းဝင်ရန်နှင့် လိုက်နာဆောင်ရွက်ခြင်းမရှိပါက ပြင်းထန်စွာအရေးယူမည်ဖြစ်ကြောင်း သတိပေးထုတ်ပြန်ခဲ့သည်။ mizzima

ပေါက်မြို့နယ်တောင်ပိုင်းတွင် ဈေးထွက်ဝယ်သည့် ပျူစောထီး ၅ ဦးကို ဖမ်းဆီးရာမှ ပစ် ခတ်မှုဖြစ်ပြီး ၅ ဦးသေဆုံး၊ လက်နက်နှင့်ကျည်များ သိမ်းဆည်းရမိ၊ ရေးမြို့တွင်လည်း စစ် တပ်သတင်းပေး ဖိုးစီ ပစ်ခတ်ခံရပြီး သေဆုံး

မကွေးတိုင်း၊ ပေါက်မြို့နယ်တောင်ပိုင်းတွင် ပင်တောင်ပျူစောထီးကျေးရွာမှ ဈေးဝယ်ထွက်လာသည့် ပျူစောထီး ၅ ဦးသည် ရိက္ခာများနှင့်အတူ ကျေးရွာသို့ ပြန်စဉ် PDF များက ဖမ်းဆီးရန် ကြိုးစားရာမှ ပစ်ခတ်မှုဖြစ်ပြီး ပျူစောထီး ၅ ဦးသေဆုံးကြောင်း SPGF တပ်ခွဲ-၁ ၏ တာဝန်ခံ ကိုပေသီးက ပြောသည်။

ယနေ့ စက်တင်ဘာလ ၁၃ ရက်နေ့ မွန်းလွဲ ၁ နာရီ ၃၀ မိနစ်အချိန် ပေါက်မြို့ နယ်တောင်ပိုင်း ပင်တောင်ပျူစောထီးများ သည် ရိက္ခာပြတ်လပ်နေသည့် အတွက် ပေါက်မြို့ပေါ်ဈေးဝယ်သွားရာ် SPGF တပ်ခွဲ-၁ နှင့် National Defense Force-Pauk နှစ်ဖွဲ့ပေါင်းပြီး ဖမ်းဆီးရန် ကြိုးစားခဲ့ကြောင်း၊ သို့ရာတွင် ခုခံပစ်ခတ်သဖြင့် အပြန်အလှန်ပစ်ခတ်မှုဖြစ်ပြီး ပျူစောထီး ၅ ဦး သေဆုံးခြင်းဖြစ်ကြောင်း ၎င်းက ဆိုသည်။

“ပျူစောခွေး ၅ ဦး သေပါတယ်။ ပင်တောင်ပျူစောထီး ၂ ဦး၊ ဝါးတောရွာ ပျူစောထီး ၂ ဦး၊ ကူးကားကျေးရွာ ပျူစောထီး ၁ ဦး စုစုပေါင်း ၅ ဦး သေပါတယ်။ ကျနော်တို့က အေးအေးဆေးဆေး ဖမ်းဖို့လုပ်တာ။ သူတို့က ပစ်တာ။ အပြန် အလှန် ပစ်ခတ်မှုဖြစ်ပါတယ်။ လက်လုပ် ပစ္စတိုတစ်လက်နဲ့ 5.56 ကျည် အတောင့်20 သိမ်းဆည်းရရှိပါတယ်။ကျနော်တို့ လမ်းကြောတွေကို ဒီထပ်ပိုပြီး ထိန်းချုပ်သွားပါ့မယ်” ဟု SPGF တပ်ခွဲ-၁ ၏ တာဝန်ခံ ကိုပေသီးက ရှင်းပြသည်။

အလားတူ မွန်ပြည်နယ်ရေးမြို့နယ်တွင် စစ်ကောင်စီသတင်းပေး ဖိုးစီကို ရေးဘီလူးအဖွဲ့က ယနေ့ စက်တင်ဘာ ၁၃ ရက်နေ့ မွန်းလွဲ ၂ နာရီဝန်းကျင်အချိန် ရေးမြို့လေယာဉ်ကွင်းအနီး သေနတ်ဖြင့် ပစ်ခတ်ခံရှင်းလင်းခဲ့ကြောင်း ရေးဘီလူး အဖွဲ့ခေါင်းဆောင်က ရန်ကုန်ခေတ်သစ်သတင်းဌာနထံသို့ ပြောဆိုသည်။

“သူ့အဖေ မောင်မြင့်ကလည်း အစင်ကျေးရွာရဲ့ ဒလန်အကြီးစားပဲ။ သူ့အဖေကလည်း အရှင်းခံခဲ့ပြီးပြီ။ သားဖြစ်တဲ့ ဖိုးစီကလည်း သူ့အဖေခြေရာအတိုင်း လိုက်တယ်။ အဲဒါကြောင့် ကျနော်တို့ ရှင်းလင်းလိုက်တာပါ” ဟု ရေးဘီလူးအဖွဲ့ခေါင်းဆောင်က ပြောဆိုသည်။ khit thit

ရဟတ်ယာဉ်အမှု အမြဲတမ်းအတွင်း၀န်ကို ဆက်လက်စစ်ဆေး

ရဟတ်ယာဉ်၀ယ်တာ၊ ငှားရမ်းတာ၊ ပြုပြင်ထိန်းသိမ်းတာတွေနဲ့ပတ်သက်ပြီး စွဲဆိုထားတဲ့ အဂတိမှုတွေကို စက်တင်ဘာလ ၁၃ ရက်နေ့က နေ ပြည်တော်အချုပ်ထောင်ရှိ အထူးတရားရုံးမှာ ဆက်လက်ရုံးထုတ်စစ်ဆေးခဲ့တယ်လို့ တရားရုံးနဲ့နီးစပ်တဲ့ အသိုင်းအဝိုင်းကနေ သိရပါတယ်။

“ဒီနေ့ ရဟတ်ယာဉ်နဲ့ပတ်သက်တဲ့ အမှုတွေထဲက ပုဒ်မ ၅၀ အတွက် အမြဲတမ်းအတွင်း၀န် ဦးကိုကိုနိုင်င်ကို အပြန်လှန် စစ်မေးတယ်။ နောက် ပုဒ်မ ၄၆ အတွက် ဦးမျိုးမြင့်ဦး ဆိုသူကို စစ်တယ် ”  လို့ တရားရုံးနဲ့နီးစပ်သူတစ်ဦးက ပြောပါတယ်။

၂၀၂၁ ခုနှစ်အတွင်းမှာ သဘာဝဘေးအန္တရာယ်ကာကွယ်ရေးလုပ်ငန်းတွေ ဆောင်ရွက်တာမှာ အသုံးပြုဖို့ ရဟတ်ယာဉ်တစ်စီး ၀ယ်ယူအသုံးပြုတာ၊ ငှားရမ်းတာ၊ သက်တမ်းတိုးတာ၊ ပြုပြင်ထိန်းသိမ်းတာတွေနဲ့ပတ်သက်ပြီး စစ်ကောင်စီက နိုင်ငံတော်သမ္မတ ဦး၀င်းမြင့်၊ နိုင်ငံတော်အ တိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ဒေါက်တာ၀င်းမြတ်အေးတို့ကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅ နဲ့ တရားစွဲဆိုထားတာ ဖြစ်ပါတယ်။

နိုင်ငံတော်သမ္မတ ဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ရဲ့ ကျန်းမာရေးကောင်းမွန်တယ်လို့ လည်း သိရပါတယ်။

အခြားအမှုတစ်ခုဖြစ်တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဦးမောင်ဝိတ်ဆီကနေ အမေရိကန်ဒေါ်လာ ငါးသိန်းခွဲကို နှစ်ခါခွဲပြီး လက်ခံတယ်လို့ စွပ်စွဲပြီး စွဲဆိုထားတဲ့ အဂတိနှစ်မှုကတော့ သက်သေမလာတဲ့အတွက် မစစ်ဆေး ဖြစ်ဘူးလို့လည်း သိရပါတယ်။ DVB

လောင်းလုံးတွင် ပျူစောထီးနှင့်အဖွဲ့ စီးနင်းလာသည့်ကား ကြားဖြတ်တိုက်ခိုက်ခံရ၊ ၂ ဦးသေဟုဆို

တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်တွင် စက်တင်ဘာလ ၁၂ ရက် ၊ မွန်းလွဲပိုင်း၌ ပျူစောထီးနှင့်အဖွဲ့ စီးနင်းလာသည့်ကား ကြားဖြတ်တိုက်ခိုက်ခံရပြီး နှစ်ဦးသေကာ နှစ်ဦး ဒဏ်ရာရရှိခဲ့ကြောင်းသိရသည်။

ပျူစောထီးအဖွဲ့ စီးနင်းလာသည့်ကားကို ပြည်သူ့ကာကွယ်ရေးအဖွဲ့က အင်းဇောက်ရွာနှင့် ပန္ဒလဲရွာကြား လမ်းပိုင်းတစ်နေရာတွင် ကြားဖြတ် တိုက်ခိုက်ခြင်းဖြစ်ကြောင်း Dawei Defense Team – DDT အဖွဲ့က ထုတ်ပြန်ထားသည်။

” ကျနော်တို့က အရင်လက်ဦးမှုရယူ ပစ်ခတ်ခဲ့လို့ ကားထိုးရပ် သွားတယ်။ နှစ်ဖက် ပြန်လှန် ပစ်ခတ်မှု ဖြစ်ပွား ခဲ့ပြီး နောက် ရဲဘော်တွေ ဘေးကင်းစွာ ပြန်ဆုတ်ခွာ လာခဲ့တယ်”ဟု Dawei Defense Team – DDTတပ်ခွဲမှ တာဝန်ရှိသူ တစ်ဦးက ပြောသည်။

Dawei Defense Team – DDTတပ်ခွဲ (၃) (ထားဝယ်-ပကဖ) ရဲဘော်များ ပစ်ခတ် တိုက်ခိုက်ခဲ့သည့် အိမ်စီး Vigo ကားတွင် ပျူစောထီး ခေါင်း ဆောင် ငဇော်၏ ဇနီးဖြစ်သူ မညိုဝင်းနှင့် တူဖြစ်သူ မောင်နိုင်လင်းအောင်တို့နှစ်ဦး ပွဲချင်းပြီးသေဆုံးကာ ကျန်နှစ်ဦးမှာ ထားဝယ်ဆေးရုံကြီး၊ အရေးပေါ်ဌာနသို့ ရောက်ရှိနေကြောင်း ဒေသခံတစ်ဦးကပြောသည်။

အဆိုပါ ပစ်ခတ်မှုကြောင့် သေဆုံး၊ ဒဏ်ရာ ရရှိသူတို့သည် လက်နက်ကိုင်ဆောင် ပျူစောထီး အဖွဲ့ဝင်များ ဖြစ်ပြီး ကျေးရွာအတွင်းရှိ ပြည်သူ များကိုအကြောင်း မရှိ သတ်ဖြတ်၊ ဖမ်းဆီး၊ ဓားမြတိုက်၊ လုယက် မှုများပြုလုပ်ခဲ့ကြသူများဟု ယင်းအဖွဲ့၏ ထုတ်ပြန်ချက်တွင်ရေးသားထား သည်။

ထိုအပြင် ထားဝယ်-လောင်းလုံးလမ်းမပေါ်တွင် စစ်ကား၊ ရဲကားများအနီးတွင် ခရီးသွားမိဘပြည်သူတို့၏ယာဥ်များ ကပ်မလိုက်ကြရန် မေတ္တာ ရပ်ခံကြောင်းလည်း Dawei Defense Team – DDT တပ်ခွဲ (၃) (ထားဝယ်-ပကဖ) အဖွဲ့သားများမှ အသိပေးခဲ့သည်။ mizzima

KIA စခန်းနှင့် ယာယီ ရုံး ၂ ခုကို စစ်ကောင်စီတပ် မီးရှို့ဖျက်ဆီး

ကချင်ပြည်နယ်၊ တနိုင်းမြို့နယ်၊ ရှဒူဇွပ်ကျေးရွာအနီးရှိ ကချင်လွတ်လပ်ရေးတပ်မတော် (KIA) ၏ ဝခါးစခန်းကုန်းနှင့် ရုံးအဆောက်အအုံတို့ကို ယမန်နေ့ (စက်တင်ဘာ ၁၂) တွင် စစ်ကောင်စီတပ်နှင့် ရှဒူဇွပ်ပြည်သူ့စစ်အဖွဲ့က မီးရှို့ဖျက်ဆီး လိုက်သည်ဟု ဒေသခံများက ပြောသည်။

ဝခါးစခန်းမှ KIA တပ်များ ဆုတ်ခွာသွားသည်မှာ နှစ်ရက်ခန့်ရှိနေပြီဖြစ်သော်လည်း စခန်းအနီးအနား လှုပ်ရှားနေဆဲဖြစ်သည့်အတွက် ယမန်နေ့က ပစ်ခတ်မှုများ ရှိခဲ့သည်။

နံနက် ၁၁ နာရီခန့်တွင် စစ်လေယာဉ်နှစ်စီးက ပစ်ခတ်မှုဖြစ်ပွားသည့် နေရာများကို ဗုံးကြဲတိုက်ခိုက်ခဲ့ကြောင်း ရှဒူဇွပ်ဒေသခံတစ်ဦးက ပြောသည်။

“တိုက်လေယာဉ်နဲ့ လာပစ်မှပဲ တိုက်ပွဲဖြစ်တာ သိတာ၊ ဆက်တိုက်ဖြစ်ပြီးတော့ နေ့လယ် ၂ နာရီလောက်မှာ နောက်ထပ် တစ်ခါ လာပစ်တယ်၊ အသံတွေကတော့ ဆူညံနေတာပဲ” ဟု အသက် ၅၀ ခန့်ရှိသည့် အဆိုပါအမျိုးသားက ပြောသည်။

ထိုစခန်းမှာ တနိုင်းမြို့နယ် လီဒိုလမ်းမကြီးပေါ်ရှိ ရှဒူဇွပ်ရွာ၏ အနောက်ဘက် ၄ မိုင်ခန့်အကွာတွင် တည်ဆောက်ထားသည့်အတွက် တိုက်ပွဲဖြစ်ပွားသံများကို ကြားနေရသည်ဟု အဆိုပါ ဒေသခံက ဆက်ပြောသည်။

စက်တင်ဘာ ၁၁ မှ စတင်၍ ထိုဒေသအတွင်း စစ်ရေးတင်းမာခဲ့ခြင်းဖြစ်ပြီး ယမန်နေ့တိုက်ပွဲတွင် စစ်ကောင်စီတပ်မှ အင်အား ၃၀၀ ခန့်အထိ အသုံးပြုခဲ့ကြောင်း ဒေသခံများကို ကိုးကားပြီး ဒေသတွင်း သတင်းဌာနများက ရေးသားသည်။

တိုက်ပွဲဖြစ်ပွားနေစဉ်တစ်လျှောက်လုံး ရှဒူဇွပ်ရွာတောင်ဘက်ရှိ စစ်ကောင်စီတပ် ခြေလျင်တပ်ရင်း (၂၉၇) က လက်နက်ကြီးပစ်ကူပေးခဲ့သည်ဟု ဒေသခံနောက်တစ်ဦးက ပြောသည်။

တိုက်ပွဲအပြီး စစ်ကောင်စီတပ်က ဝခါးစခန်းအပြင် စခန်းအနီးရှိ KIA တပ်၏ တိုက်နယ်အုပ်ချုပ်ရေးရုံးနှင့် စီးပွားရေးရုံးတို့ကို ဖျက်ဆီးလိုက်သည်ဟု ဆိုသည်။

“အခု မီးရှို့လိုက်တဲ့နေရာတွေက တိုက်နယ်ရုံး၊ အုပ်ချုပ်ရေးပိုင်းပေါ့ဗျာ၊ အရင်တုန်းကလည်း ခဏခဏ ဖြစ်တာပဲ။ အဲဒီရုံးက အမြဲတမ်းတော့မဟုတ်ဘူး၊ ခဏတဖြုတ်လာထိုင်လိုက် ပြန်သွားလိုက် လုပ်တဲ့ရုံးပေါ့” ဟု ရှဒူဇွပ်ဒေသမှ အသက် ၃၀ အရွယ် အဆိုပါ အမျိုးသားက ပြောသည်။

ည ၈ နာရီခန့်တွင် စခန်းမီးရှို့သည့် စစ်ကောင်စီတပ်များနှင့် ပြည်သူ့စစ်အဖွဲ့တို့ ရွာအတွင်း ပြန်ရောက်လာကြသည်ဟု ၎င်းက ပြောသည်။

ယနေ့နံနက်တွင် တိုက်ပွဲများငြိမ်သက်နေပြီး နှစ်ဖက်တပ်များ စစ်ရေးလှုပ်ရှားမှုလည်း မတွေ့ရကြောင်း ဒေသခံအချို့က ပြောသည်။

ရှဒူဇွပ်ရွာအနီးတစ်ဝိုက်သည် KIA တပ်မဟာ (၂) လက်အောက်ခံ တပ်ရင်း (၁၄) တပ်များ လှုပ်ရှားသည့်ဒေသဖြစ်ပြီး စစ်ကောင်စီတပ်က ရှဒူးဇွပ်ပြည်သူ့စစ်အဖွဲ့၏ ကူညီမှုဖြင့် KIA တပ်များကို အဆိုပါဒေသမှ တိုက်ထုတ်ရန် ကြိုးပမ်း နေသည်။

ယမန်နေ့က ဖြစ်ပွားသည့် တိုက်ခိုက်မှုများနှင့် ပတ်သက်ပြီး မေးမြန်းရန် KIA ပြန်ကြားရေးတာဝန်ခံ ဗိုလ်မှူးကြီးနော်ဘူကို ဖုန်းဖြင့် ဆက်သွယ်မေးမြန်းသော်လည်း လက်ခံဖြေကြားခြင်းမရှိပေ။

စစ်တပ်က ရွေးကောက်ခံ အရပ်သားအစိုးရကို ဖြုတ်ချပြီး အဏာသိမ်းလိုက်သည့်နောက် တိုက်ပွဲ ပြန်လည်ဖြစ်ပွားလာသည့် တိုင်းရင်းသားဒေသများတွင် KIA လှုပ်ရှားနယ်မြေလည်း ပါဝင်သည်။

စစ်အာဏာရှင်စနစ်ကို အမြစ်ဖြတ်ရန်အတွက် ဗမာပြည်သူ ဗမာအဖွဲ့အစည်းများနှင့် လက်တွဲဆောင်ရွက်သွားမည်ဟု KIO ဥက္ကဋ္ဌ ဗိုလ်ချုပ်ကြီးအင်ဘန်လက ပြောကြားထားပြီး ကချင်ပြည်နယ်နှင့် စစ်ကိုင်းတိုင်းအတွင်း လှုပ်ရှားနေသည့် PDF များကို ထောက်ပံ့ပေးနေသည်။ myanmar now

အောင်လံမြို့နယ်တွင် MEC သံမဏိစက်ရုံအတွက် မြေဧက ၈၀နီးပါးကို ကာကွယ်ရေးဝန်ကြီးဌာန သိမ်းယူ

မကွေးတိုင်း၊ အောင်လံမြို့နယ်တွင် မြန်မာ့စီးပွားရေးကော်ပိုရေးရှင်း (MEC)၊ အမှတ်(၁) သံမဏိစက်ရုံ(ကျောက်စွယ်ကျိုး) မြေနေရာအဖြစ် အသုံးပြုရန်အတွက် မြေဧရိယာ ၇၈ ဒသမ ၇၄ဧက ကို စစ်ကောင်စီ၏ ကာကွယ်ရေးဝန်ကြီးဌာနက အမိန့်ကြော်ငြာစာအမှတ်(၆၅၃/၂၀၂၂)ကို ထုတ်ပြန်ပြီး သိမ်းယူလိုက်ကြောင်း သိရသည်။

၁၈၉၄ခုနှစ်၊ မြေသိမ်းအက်ဥပဒေပုဒ်မ ၄၊ ပုဒ်မခွဲ(၁)အရ အောင်လံမြို့နယ်၊ ငါ့ပြင်း၊ ကွမ်းလောင်း၊ မြင်းကပိုင် ကျေးရွာအုပ်စုရှိ ကွင်းပေါင်း ရှစ်ကွင်း၊ ဦးပိုင်ပေါင်း ၇၇ခု၊ ​မြေဧရိယာ ၇၈ ဒသမ ၇၄ဧကကို အများပြည်သူအကျိုးငှာ အလိုရှိကြောင်း ပြီးခဲ့သည့် ဇူလိုင်လအတွင်းက ကြေညာခဲ့ခြင်းဖြစ်သည်။

အမိန့်ကြော်ငြာစာ ထုတ်ပြီးနောက် ၁၅ ရက်ကုန်ဆုံးသည့်အခါ အဆိုပါမြေကို သိမ်းယူပြီး အမှတ်(၁) ၊ သံမဏိစက်ရုံ(ကျောက်စွယ်ကျိုး)အဖြစ် အသုံးပြုရန်အတွက် ကာကွယ်ရေးဝန်ကြီးဌာနသို့ လွှဲပြောင်းပေးရန်ဖြစ်ပြီး ကာကွယ်ရေးဝန်ကြီးဌာနက အသုံးမပြုသောနေ့တွင် နိုင်ငံတော်သို့ ပြန်လည်အပ်နှံရမည်ဟုလည်း ပါရှိသည်။

မြေသိမ်းရာတွင် မြေသိမ်းအက်ဥပဒေပုဒ်မ ၁၇၊ ပုဒ်မခွဲ (၁)အရနှင့် မြေသိမ်းအက်ဥပဒေပုဒ်မ ၉ ပုဒ်မခွဲ (၁)နှင့် (၃)တို့ကိုလည်း ရည်ညွှန်းဖော်ပြထားသည်ကို တွေ့ရသည်။

ပုဒ်မ ၁၇၊ ပုဒ်မခွဲ(၁)တွင် အရေးပေါ်ကိစ္စများအတွက် အစိုးရက ညွှန်ကြားသည့်အခါ ကော်လိတ်တော်အရာရှိသည် ယင်းသို့သော လျော်ကြေးငွေကို သတ်မှတ်ပေးရခြင်းမရှိသည့်တိုင်အောင် အများပြည်သူ အကျိုးစီးပွား ကြံရွယ်ချက်အတွက် (သို့မဟုတ်) ကုမ္ပဏီတစ်ခုအတွက် မြေ လွတ်မြေလပ် (သို့မဟုတ်) စိုက်ပျိုးထွန်ယက်နိုင်သော မြေတစ်စုံတစ်ရာကို ပုဒ်မ ၉၊ ပုဒ်မခွဲ (၁) တွင် ဖော်ပြထားသည့်အတိုင်း နို့တစ်ကြော်ငြာစာကို ထုတ်ပြန်ပြီးနောက် ၁၅ ရက် မြောက်သောနေ့တွင် လက်ရောက်ရယူနိုင်သည်။ ယင်းမြေသည် အစိုးရအတွက် နှောင့်ယှက်ခြင်း၊ ဝန် တင်ခြင်းကင်းစွာ ရရှိရမည်ဟု ​ဖော်ပြထားသည်။

အမှတ်(၁) သံမဏိစက်ရုံ(ကျောက်စွယ်ကျိုး)ကို ၁၉၉၇ခုနှစ်ခန့်တွင် စတင်တည်ဆောက်ခဲ့ပြီး ယခင်က အဆိုပါ စက်ရုံမြေနေရာအတွက် ကားလမ်းနှင့် မီးရထားလမ်း ဖောက်လုပ်ရန် လယ်ယာမြေများကို လျော်ကြေးပေးအပ်ခြင်းမရှိဘဲ သိမ်းယူခဲ့သည့်အတွက် သမ္မတဟောင်း ဦးသိန်းစိန် အစိုးရလက်ထက်တွင် တောင်သူများက လျော်ကြေးရရန် တိုင်ကြားသည့် ဖြစ်စဉ်များရှိခဲ့သည်။

ထို့နောက် စက်ရုံဘက်က ၂၀၁၈ခုနှစ် မေလအတွင်းတွင် လယ်တစ်ဧကလျှင် ငွေကျပ် ၁၈သိန်းနှုန်း၊ ယာတစ်ဧကလျှင် ငွေကျပ် ၁၅သိန်းနှုန်းဖြင့် မြေသိမ်းခံခဲ့ရသည့် တောင်သူများထဲမှ တောင်သူ ၉၀ ကျော်ကို ဒုတိယအကြိမ်အဖြစ် လျော်ကြေးပေးအပ်မှု ပြုလုပ်ခဲ့သည်။

လယ်ယာမြေနှင့် အခြားမြေများ သိမ်းဆည်းခံရမှုများကြောင့် ပြည်သူများ နစ်နာမှုမရှိစေရေးအတွက် မြေသိမ်းမှုပြဿနာများကို လျင်မြန်စွာဖြေရှင်းဆောင်ရွက်နိုင်ရန် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဗဟိုကော်မတီကို NLDအစိုးရလက် ထက်တွင် ဖွဲ့စည်းခဲ့ပြီး ​မြေယာပြဿနာများကို ဖြေရှင်းဆောင်ရွက်ခဲ့သည်။ mizzima

မုံရွာတွင် ရဲတစ်ဦးကို လက်နက်နှင့်အတူ ဖမ်းမိပြီး ခုခံထွက်ပြေးသဖြင့် ပစ်ခတ်ရာမှ သေဆုံး၊ ဘုတလင်တွင် PDF ၅ ဦးကို စစ်တပ်က အလစ်အငိုက် ဝင်ပစ်သဖြင့် သေဆုံး

စစ်ကိုင်းတိုင်း၊ မုံရွာမြို့နယ်တွင် စက်တင်ဘာလ ၁၂ ရက်နေ့တွင် ရဲတစ်ဦး ဖမ်းမိခဲ့ပြီး ခုခံထွက်ပြေးရန် ကြိုးစားဖြင့် လိုက်လံ ပစ်ခတ် ဖမ်းဆီးရာမှ သေဆုံးသွားကြောင်း ဒေသကာကွယ်ရေးတပ်ဖွဲ့များထံမှ သိရှိရသည်။

စက်တင်ဘာလ ၁၂ ရက်နေ့ နံနက် ၁၁ နာရီ ၄၅ မိနစ်အချိန် မုံရွာမြို့နယ်၊ ညောင်ချေထောက်ကျေးရွာထိပ်တွင် အကြမ်းဖက်စစ်ကောင်စီလက် အောက်ခံ ရဲတစ်ဦးကို မုံရွာမြို့ပြပျောက်ကျားတပ်ဖွဲ့ဝင်များက ဖမ်းဆီး ရမိခဲ့ကြောင်း၊ အဆိုပါ ရဲထံမှ BA 63 သေနတ်တစ်လက်နှင့်အတူ ကျည်ဘောက် ၃ ခု၊ ကျည် ၁၁၉ တောင့် သိမ်းဆည်းရမိခဲ့ကြောင်း၊ ထွက်ပြေးပြီး ခုခံရန်ကြိုးစားသဖြင့် လိုက်လံ ပစ်ခတ်ဖမ်းဆီးရာမှ အဆိုပါရဲ သေဆုံးသွားကြောင်း သိရှိရသည်။

ထို့ပြင် စစ်ကိုင်းတိုင်း၊ ဘုတလင်မြို့နယ်အပိုင် ပဲပစ်ကျေးရွာကု စစ်ကောင်စီတပ်က ယနေ့ နံနက်အစောပိုင်းတွင် ဝင်ရောက်စီးနင်းပြီး PDF ထောက်ပို့ ၁ ဦးနှင့် ပြည်သူ့ကာကွယ်ရေးတပ်သား ၄ ဦးကို ပစ်ခတ်သတ်ဖြတ်သွားကြောင်း ဒေသခံများထံမှ သိရှိရသည်။

စက်တင်ဘာလ ၁၃ ရက်နေ့ နံနက် ၅ နာရီအချိန် ဘုတလင်မှ စစ်ကားတန်း လာသဖြင့် ဒေသကာကွယ်ရေးတပ်ဖွဲ့များက အဆင်သင့်စောင့်နေစဉ် အနောက်ဘက်မှ တောတိုးလာသည့် စစ်ကြောင်းက ရွာအတွင်းသို့ ဝင်ပစ်သွားခြင်း ဖြစ်ကြောင်း၊ အလစ်အငိုက်တိုက်ခံရခြင်းဖြစ်သဖြင့် ပူးပေါင်းတပ်ဖွဲ့များက နံနက် ၅ နာရီလောက်တွင် ပြန်လည်ဆုတ်ခွာခဲ့ပြီး အကြမ်းဖက်စစ်တပ်က ပဲပစ်တော ရွာကို စီးနင်းထားခဲ့ကြောင်း သိရှိရသည်။

ပဲပစ်ကျေးရွာကို စီးနင်းထားစဉ် နေအိမ်နှစ်လုံးကို မီးရှိုံသွားပြီး၊ နွားတစ်ကောင်ကို သတ်သွားခဲ့ကြောင်း၊ နံနက်လင်းချိန်တွင် PDFပူးပေါင်းတပ်များက ပဲပစ်တောရွာကို ပြန်လည်ချီတက်တိုက်ခိုက်ရာ အကြမ်းဖက်စစ်တပ်က နောက်ပြန်ဆုတ်သွားပြီး ဘုတလင်မြို့ထဲ ပြန်ဝင်သွားကြောင်း သိရှိရသည်။ khit thit

တရက်တည်း စစ်ကောင်စီအကြမ်းဖက်တပ်ဖွဲ့ဝင်အယောက် ၆၀ သေဆုံးဟု NUG ထုတ်ပြန်

စက်တင်ဘာ ၁၂ ရက် မနေ့က တရက်တည်း ဖြစ်ပွားခဲ့တဲ့တိုက်ပွဲတွေမှာ စစ်ကောင်စီ အကြမ်းဖက်တပ်ဖွဲ့ဝင်အယောက် ၆၀ သေဆုံးခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။

ခုထုတ်ပြန်ထားတဲ့ အချက်အလက်ဟာ မြေပြင်အခြေအနေမှာ ပိုများနိုင်ပြီး တရက်တည်း ထိခိုက်ဒဏ်ရာရရှိတဲ့သူ အရေအတွက်ကတော့အယောက် ၂၀ ထိရှိခဲ့တယ်လို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံပြည်သူ့ကာကွယ်ရေးတပ်တွေ၊ တိုင်းရင်းသားလက် နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

NUG အစိုးရကတော့ ပြည်သူ့ခုခံတွန်းလှန်စစ်ပွဲစတင်ခဲ့တဲ့ ၁ နှစ်အတွင်း အကြမ်းဖက် စစ်ကောင်စီဘက်က တပ်ဖွဲ့ဝင်ပေါင်း ၂၀,၁၅၀ ကျော်သေဆုံးကာ ဒဏ်ရာရသူ ၇၀၀၀ ကျော်လောက်ရှိလာပြီး စစ်ကောင်စီ စိုးမိုးအုပ်ချုပ်နိုင်တဲ့နေရာဟာ တိုင်းပြည် နယ်မြေအကျယ်အဝန်းရဲ့ ထက် ဝက်တောင် မရှိတော့ဘူးလို့  NUG ယာယီသမ္မတ ဒူဝါလရှီးလက ပြောကြားထားပါတယ်။

ပြီးခဲ့တဲ့ စက်တင်ဘာ ၇ ရက်နေ့ ပြည်သူ့ခုခံတော်လှန်စစ် ကြေညာခြင်း တစ်နှစ်ပြည့် အထိမ်းအမှတ် အဖြစ် အမျိုးသားညီညွတ်ရေးအစိုးရ ယာ ယီသမ္မတ ဒူဝါလရှီးလက  နိုင်ငံတော်အခြေပြမိန့်ခွန်း ပြောကြားရာမှာ ထည့်သွင်းပြောဆိုခဲ့တာ ဖြစ်ပြီး ၁ နှစ်တာကာလအတွင်း ခန့် မှန်းခြေ စာရင်းအရ  PDF တွေနဲ့ မဟာမိတ်တိုင်းရင်းသားလက်နက်ကိုင် သူရဲကောင်းရဲဘော်တွေ စုစုပေါင်း ၁၅၀၀ ကျော်ကျဆုံးခဲ့တယ်လို့လည်း သူက ပြောပါတယ်။

လူထုသပိတ်တိုက်ပွဲတွေအနေနဲ့ မြေပြင်တိုက်ပွဲတွေ ပြင်းထန်နေတဲ့ စစ်ကိုင်းတိုင်းဒေသကြီးမှာ ၅ ကြိမ်နဲ့ အများဆုံးဖြစ်ပွားခဲ့ပြီး မကွေးတိုင်းဒေသကြီးမှာ ၁ ကြိမ်၊ မန္တလေးတိုင်းဒေသကြီးမှာ ၁ ကြိမ်စီ ဖြစ်ပွားခဲ့ တယ်လို့ ထုတ်ပြန်ချက်မှာ ဖော်ပြပါတယ်။

မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ အကြမ်းဖက်စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်းလမ်းပိုင်းတွေရဲ့ ၉၀ ရာ ခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက ပြီးခဲ့တဲ့ ဇွန် ၂၁ ရက်နေ့ သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။ DVB

ကျေးရွာအတွင်းမှ မထွက်ခွာပါက ရွာကိုမီးရှို့မည်ဟု ဒေသခံများကို စစ်ကောင်စီတပ်ခြိမ်း ခြောက်

ကေအဲန်ယူ-မုန်းမြို့နယ် စီမံအုပ်ချုပ်မှုနယ်မြေအတွင်းရှိ ရွာနှစ်ရွာမှဒေသခံများကို ရွာအတွင်းမှထွက်ခွာရန်နှင့် မထွက်ခွာပါက ရွာကိုမီးရှို့မည်ဟု စစ်ကောင်စီတပ်မှ ဗိုလ်ကြီးအဆင့်ရှိသူက ခြိမ်းခြောက်ခဲ့‌ကြောင်း KNU က သတင်းထုတ်ပြန်သည်။

စက်တင်ဘာ ၁၁ ရက်တွင် အာဏာသိမ်းအကြမ်းဖက်စစ်ကောင်စီတပ်မှ ဗိုလ်ကြီးဇေယျာလင်းဆိုသူက တမာခေါနှင့် တောင်စုကျေးရွာရှိ ရပ်မိရပ်ဖများအား ခေါ်ယူတွေ့ဆုံကာ ခြိမ်း‌ခြောက်ခဲ့ခြင်းဖြစ်သည်။

ဒေသခံများအား ကျေးရွာအတွင်းမှ မထွက်ခွာလျှင် နေအိမ်များကို မီးရှို့ဖျက်ဆီးမည်ဟုခြိမ်းခြောက် ပြောဆိုခဲ့သဖြင့် စက်တင်ဘာ ၁၂ ရက်တွင် တမာခေါကျေးရွာမှ ဒေသခံများထိတ်လန့်ကာ ရွာလုံးကျွတ်ထွက်ခွာခဲ့ရသည်ဟု KNU ကဆိုသည်။

အိမ်ခြေ ၆၁ လုံးနှင့် လူဦးရေ ၃၃၄ ဦးနေထိုင်ခဲ့သည့်တမာခေါကျေးရွာမှ ဒေသခံများအနေဖြင့် စစ်တောင်းမြစ်အနောက်ဘက်ကမ်းရှိ နိုဘိုးခီးကျေးရွာနှင့် အနီးအနားကျေးရွာများသို့ ရွှေ့ပြောင်း နေထိုင်ရကြောင်း KNU သတင်းရင်းမြစ်များထံမှ သိရသည်။

အခြားတစ်ရွာဖြစ်သည့် တောင်စုကျေးရွာမှာမူ မုန်းမြို့နယ်ရှိတာဝန်ရှိခေါင်းဆောင်မှ စီမံထိန်းသိမ်းပြီး မိမိတို့၏ ကျေးရွာတွင်သာ နေထိုင်စေ‌ကြောင်းလည်း ဆိုသည်။

‌ညောင်လေးပင်ခရိုင်၊ မုန်းမြို့နယ်တွင် အာဏာသိမ်းပြီးချိန်မှစ၍ ၂၀၂၂ ခုနှစ် ဇူလိုင်လအထိ စစ်ဘေးရှောင်ရသည့် ကျေးရွာအုပ်စု ၁၇ အုပ်စုမှ ကျေးရွာပေါင်း ၄၆ ရွာ၊ အိမ်ခြေပေါင်း ၂၁၁၆ လုံးနှင့် လူဦးရေ စုစုပေါင်း ၁၂,၄၅၃ ဦး အထိရှိခဲ့သည်။

၂၀၂၂ ခုနှစ် ဩဂုတ်လနှင့် စက်တင်ဘာလ ၁၃ ရက်အတွင်းမှာပင် စစ်ဘေးရှောင်ရသည့် ကျေးရွာပေါင်း ၁၅ ရွာ၊ အိမ်ခြေစုစုပေါင်း ၁၁၂၀ လုံးနှင့် လူဦးရေစုစုပေါင်း ၆၂၁၆ ဦး အထိအများအပြားရှိလာခဲ့သည်။ mizzima

« Older Entries