Monthly Archives: Sep 2022

မင်းကင်းမြို့နယ်တွင် ကာကွယ်ရေးတပ် စနိုက်ပါသမားပစ်ခတ်ရာ စစ်ကောင်စီတပ်သား ၂ ဦးသေ

စစ်ကိုင်းတိုင်း၊မင်းကင်းမြို့နယ် ၊ ကူလဲကျေးရွာအထွက်တွင် စစ်ကောင်စီတပ်နှင့် ဒေသခံကာကွယ်ရေးတပ်ဖွဲ့တို့ ဖြစ်ပွါးသည့် တိုက်ပွဲ၌ စစ်ကောင်စီတပ်သား နှစ်ဦး သေဆုံးကြောင်း သိရသည်။

ယနေ့ စက်တင်ဘာလ ၁၇ ရက် နံနက် ၁၀ နာရီအချိန်တွင် မင်းကင်းမြို့နယ် အရှေ့ဘက် ပျူစောထီး အင်အားကောင်းသည့် ကူလဲကျေးရွာမှ ထုံးမန်ရွာသို့ ထွက်လာသည့် စစ်ကောင်စီတပ်ဖွဲ့အား ကာကွယ်ရေးတပ်ဖွဲ့ ကင်းပုန်းစနိုက်ပါသမားက စတင်ပစ်ခတ်ပြီး တိုက်ပွဲဖြစ်ပွားခြင်း ဖြစ်သည်။

“သူတို့(စစ်ကောင်စီတပ်သားများ)ဘက်ကထွက်လာတာနဲ့ ကိုယ့်ဘက်က စနိုက်ပါသမားနှစ်ယောက်က တစ်ချက်စီပစ်လိုက်တာနဲ့ စပြီးဖြစ်တာ၊ သူတို့ဘက်ကလည်း လက်နက်ကြီးတွေနဲ့ပြန်ပြီး ရမ်းပစ်နေတယ်” ဟု တိုက်ပွဲဖြစ်ပွားပုံကို ရွှေတြိဂံပြည်သူ့ကာကွယ်ရေးတပ် ပြန်ကြားရေးတာဝန်ရှိသူက ပြောသည်။

ကျဆုံးမှုကို ပစ်ခတ်ခဲ့သည့် ကာကွယ်ရေးတပ်ဖွဲ့မှ စနိုက်ပါတပ်သားနှစ်ဦး၏ မျက်မြင်တွေ့ရချက်အရ အတည်ပြုနိုင်ခြင်းဖြစ်ကြောင်း ရွှေတြိဂံပြည်သူ့ကာကွယ်ရေးတပ် ပြန်ကြားရေးတာဝန်ရှိသူက ပြောသည်။

တိုက်ပွဲကြာချိန် မိနစ် ၃၀ ခန့် အပြန်အလှန်ပစ်ခတ်ပြီးနောက် စစ်ကောင်စီတပ်ဘက်မှ လက်ရှိ မွန်းတည့်အချိန်အထိ လက်နက်ကြီးများဖြင့် ရမ်းသန်းပစ်ခတ်နေဆဲဖြစ်ကြောင်း သိရသည်။

စစ်ကောင်စီတပ်ဘက်မှ ပစ်ခတ်သည့် ၁၂၀ မမ လက်နက်ကြီးကျည်အချို့ ညောင်ကိုင်းကျေးရွာအတွင်း ကျရောက်ပေါက်ကွဲမှုရှိပြီး ဒေသခံများထိခိုက်သေဆုံးမှု ရှိ၊ မရှိကို မသိရသေးပေ။

ယနေ့တိုက်ပွဲအား ရွှေတြိဂံပြည်သူ့ကာကွယ်ရေးတပ်ရင်းGTF၊GTFတပ်ခွဲ(၁) Infinite Revolution Force-I.R.F၊GTFတပ်ခွဲ(၄)စစ်ကျွန်မခံမြွေဆိုးတသိုက်၊တိမ်လွှာဒေါင်းမင်း ပကဖအဖွဲ့၊ကူလဲ ပကဖနှင့်မင်းကင်းတပ်ရင်း(၂)တပ်ခွဲ(၂)တို့ကပူးပေါင်းတိုက်ခိုက်ခြင်းဖြစ်ကြောင်း သိရသည်။

စစ်ကိုင်းတိုင်း၊မင်းကင်းနှင့် ကနီနယ်စပ်တွင် စက်တင်ဘာလ ၁၀ ရက်နေ့မှစတင်၍ အင်အား ၁၀၀ ခန့်ဖြင့် စစ်ကောင်စီတပ်က စစ်ကြောင်းထိုးလျက်ရှိနေပြီး ကာကွယ်ရေးတပ်ဖွဲ့များနှင့် ထိတွေ့တိုက်ပွဲများ ဖြစ်ပွါးနေသည်ဟု သိရသည်။

လက်ရှိအချိန်တွင် ထိုနယ်စပ်ရှိ စစ်ကောင်စီတပ်စစ်ကြောင်းသည် ကနီ ဆယ်ရွာချောင်ဒေသ စတေရှင်ကုန်းမှ ထွက်လာပြီး သစ်ခေါင်းတီးရွာအနီးရောက်ရှိနေပြီဖြစ်ကြောင်း သိရသည်။

ကနီနယ်စတေရှင်ကုန်းသည် စစ်ကောင်စီတပ် စခန်းချရာနေရာတစ်ခုဖြစ်ပြီး လက်နက်ခဲယမ်းသိုလှောင်ရာနေရာတစ်ခု ဖြစ်နိုင်ကြောင်း ဒေသ ခံကာကွယ်ရေးတပ်သားတစ်ဦးက သုံးသပ်သည်။

“စစ်ကောင်စီတပ်တွေစစ်ကြောင်းထိုးချိန် ပစ်ခတ်တာနည်းတယ်။ အဲ့ဒီစတေရှင်ကုန်းကို ဝင်ပြီးပြန်ထွက်လာပြီဆိုရင်တော့ နဂိုထက်လေးဆလောက်ပိုပစ်တယ်” ဟု ၎င်းကဆိုသည်။

ထိုသို့စစ်ကြောင်းထိုး ဝင်ရောက်လာမှုကြောင့် ကနီနယ်၊ ဆယ်ရွာချောင်ဒေသရှိ ကျေးရွာပေါင်း ၁၄ ရွာနှင့် မင်းကင်းဒေသမှ ပြည်သူများအပါအ ဝင် ဒေသခံပြည်သူ ဦးရေ ၅,၀၀၀ ကျော်စစ်ဘေးရှောင်နေကြရကြောင်း သိရသည်။ mizzima

ရန်ကုန်တွင် စသုံးလုံးဟောင်း လှိုင်မြို့နယ် ရပ်ကွက်အုပ်ချုပ်ရေးအဖွဲ့ဝင် အောင်စိုး ပစ်သတ်ခံရ၊ နိုင်ငံတစ်ဝန်း အုပ်ချုပ်ရေးမှူး၊ Non-CDM ၊ ပျူစောထီး ၉ ဦးပစ်ခတ်ခံရပြီး သေဆုံး

ရန်ကုန်တွင် စသုံးလုံးဟောင်း လှိုင်မြို့နယ် ရပ်ကွက်အုပ်ချုပ်ရေးအဖွဲ့ဝင် အောင်စိုး ယနေ့နံနက်ပိုင်းပစ်သတ်ခံရမှုအပါအဝင် နိုင်ငံတစ်ဝန်းတွင် အုပ်ချုပ်ရေးမှူး၊ Non-CDM ၊ ပျူစောထီး ၉ ဦးပစ်ခတ်ခံရပြီး သေဆုံး သွားကြောင်း သိရှိရသည်။

လှိုင်မြို့နယ်မှ စသုံးလုံးဟောင်း ရာအိမ်မှူး အောင်စိုး အသတ်ခံရ

===================================

ရန်ကုန်တိုင်း၊ လှိုင်မြို့နယ်တွင် အထူးစုံစမ်းစစ်ဆေးရေးဦးစီးဌာနမှ ဝန်ထမ်းဟောင်း လှိုင်မြို့နယ် ၁၃ ရပ်ကွက် ရာအိမ်မှူး စိုးအောင် ယနေ့ နံနက် ၇ နာရီခွဲကျော်အချိန်တွင် ပစ်ခတ်ခံရပြီး သေဆုံးသွားကြောင်း ဒေသခံများထံမှ သိရှိရသည်။

လှိုင်မြိုနယ်၊ ၁၃ ရပ်ကွက် ၊ ရတနာလမ်းတွင် ယနေ့နံနက် ၇ နာရီခွဲကျော် အချိန် စစ်ကောင်စီခန့် ရာအိမ်မှူး စသုံးလုံးဝန်ထမ်းဟောင်း သေနတ်ပစ်ခတ်ခံရသဖြင့် သေဆုံးသွားပြီးနောက် စစ်တပ်နှင့်ရဲများ ရောက်ရှိလာကာ အလောင်းကို လာရောက်သယ်ဆောင်ကြောင်း၊ ပစ်ခတ်ခံရသည့်နေရာပတ်ဝန်းကျင်ကိုလည်း ရဲနှင့်စစ်တပ်က ပိတ်ဆို့ ရှာဖွေစစ်ဆေးလျက်ရှိကြောင်း သိရှိသည်။

“သေသွားတဲ့ ရာအိမ်မှူး အောင်စိုးက စစ်တပ်သတင်းပေးအစစ်ပါ။ ရပ်ကွက်ထဲမှာတော့ဒလံလို့နာမည်ကြီးတယ်။ လှိုင်မြို့နယ်ထဲဧည့်စာရင်းစစ်ရင်လည်း စခရခတွေနဲ့အတူပါတတ်တယ်။ အဲ့ဒီကောင်က စသုံးလုံးပြုတ်” ဟု ဒေသခံတစ်ဦးက ပြောဆိုသည်။

စစ်တပ်နှင့်ရဲသတင်းပေး မှုခင်းသတင်းထောက် ထွန်းထွန်း ပစ်ခတ်ခံရပြီးသေဆုံး

==========================================

စစ်ကိုင်းတိုင်း၊ တမူးခရိုင်၊ ခမ်းပတ်မြို၊ အမှတ်(၃) ရပ်ကွက်နေ စစ်တပ်နှင့်ရဲသတင်းပေး နေပြည်တော်မှုခင်းနှင့်သတင်းစုံအွန်လိုင်းသတင်းအေဂျင်စီမှ ထွန်းထွန်း အသက် ၄၈ နှစ်သည် နေအိမ်တွင် စက်တင်ဘာလ ၁၆ ရက်နေ့ ပစ်ခတ်ခံရပြီး သေဆုံးသွားကြောင်း သိရှိသည်။

ပေါင်းတည်တွင် စစ်ကောင်စီခန့်အုပ်ချုပ်ရေးမှူး ဉာဏ်ဝင်း အသတ်ခံရ

=======================================

ပဲခူးတိုင်း ပေါင်းတည်မြို့နယ် ရွာသစ်ကြီး ကျေးရွာအုပ်စု အုပ်ချုပ်ရေးမှူ းဥာဏ်ဝင်းကို စက်တင်ဘာလ ၁၄ ရက်နေ့ ညနေ ၆ နာရီခန့်တွင် အမည်မသိ သေနတ်သမားများက ပစ်ခတ် တိုက်ခိုက်ခဲ့ပြီး သေဆုံးသွားကြောင်း သိရသည်။

အုပ်ချုပ်ရေးမှူး ဥာဏ်ဝင်းသည် စစ်မှုထမ်းဟောင်း တစ်ဦးဖြစ်ကြောင်း၊ စိတ်ရောဂါ​ ခံစားရပြီး စစ်တပ်မှ အနားပေးထားသူဖြစ်ကြောင်း၊ လောင်ကစား၊ အရက်ဆိုင်၊ ချဲဒိုင်များ၊ ရုံးထောက်ခံစာနှင့် ဧည့်စာရင်း တိုင်သူများထံမှ အတင်း အဓမ္မ ငွေကြေး တောင်းရမ်းနေသူဖြစ်ကြောင်း၊ လက်ပစ်ဗုံး ခါးချိတ်ကာ ပစ္စတို ကိုင်ဆောင်ထားသူဖြစ်ပြီး ရှမ်းစပ်ကျေးရွာ၌ အမည်မသိ သေနတ်သမားများက ပစ်ခတ် ရှင်းလင်း ခဲ့ခြင်းဖြစ်ကြောင်း သိရသည်။

စစ်ကိုင်းတွင် ပျူစောထီး ၂ ဦး သေဆုံး

=====================

စစ်ကိုင်းတိုင်း စစ်ကိုင်းမြို့နယ် ဆင်မြေရွာတွင် နေထိုင်သည့် ပျူစောထီး အဖွဲ့ဝင် ၂ ဦးကို ဇေယျာညီနောင်အဖွဲ့က စက်တင်ဘာလ ၁၆ ရက်နေ့တွင် ဝင်ရောက် တိုက်ခိုက်ခဲ့ပြီး ပွဲချင်းပြီး သေဆုံးသွားကြောင်း သိရသည်။

စက်တင်ဘာလ ၁၆ ရက်နေ့ နံနက်ပိုင်းတွင် ဆင်မြေရွာတွင် နေထိုင်သော စစ်တပ် ပျူစောထီးအဖွဲ့ဝင် နန်းအောင်သူကို ဇေယျာညီနောင်အဖွဲ့က ရှင်းခဲ့ကြောင်း သိရသည်

ပျူစောထီးအဖွဲ့ဝင် နန်းအောင်သူသည် သမီးဖြစ်သူ မင်္ဂလာပွဲ ကျင်းပရန် စစ်ကောင်စီ တပ်ဖွဲ့ဝင် အင်အား ၂၀ခန့်ကို နှစ်ညတာ ညအိပ်ခေါ်ဆောင်ပြီး မင်္ဂလာပွဲ ကျင်းပခဲ့ခြင်း၊ ဆင်မြေကျေးရွာ အတွင်းရှိ စျေးဆိုင်တစ်ဆိုင်မှ ပစ္စည်းများကို စစ်ကောက်စီ တပ်ဖွဲ့ဝင်နှင့် ပူးပေါင်းပြီး အဓမ္မ ယူဆောင်သွားခြင်း၊ နန်းအောင်သူ သတင်းပေးမှုကြောင့် ဒီမိုကရေစီအရေး တက်ကြွစွာ လှုပ်ရှားသူများ ဖမ်းဆီးခံရခြင်း စသည့် အချက်များကြောင့် ရှင်းလင်းခဲ့ကြောင်း သိရသည်။

ထို့ပြင် ပျူစောထီး အဖွဲ့ဝင် နန်းအောင်သူနှင့် ချိတ်ဆက်၍ စစ်ကောင်စီ ထောက်တိုင်အဖြစ် ဆက်လက် လုပ်ဆောင်နေ​သော ပျူစောထီး အဖွဲ့ဝင် ဖြိုးမင်းသူကို ဇေယျာ ညီနောင်မှ စက်တင်ဘာလ ၁၆ ရက်နေ့တွင် ထပ်မံ ရှင်းလင်းခဲ့ကြောင်း သိရသည်။

မောတောင်မြို့တွင် ပျူစောထီး ၂ ဦးသေဆုံး

=========================

တနင်္သာရီတိုင်း မောတောင်မြို့တွင် အကြမ်းဖက် စစ်တပ်မှ အရာရှိ စစ်မှုထမ်းဟောင်း တစ်ဦး ပိုင်ဆိုင်သည့် ဆီအုန်းခြံ၌ စက်တင်ဘာလ ၁၅ ရက်နေ့ ညပိုင်းတွင် ပျုစောထီး အဖွဲ့ဝင် ၂ ဦးကို တနင်္သာရီ ပြည်သူ့ကာကွယ်ရေးအဖွဲ့မှ ဝင်ရောက် တိုက်ခိုက်ခဲ့ပြီး သေဆုံးခဲ့ကြောင်း သိရသည်။

ပျူစောထီး အဖွဲ့ဝင် ၂ ဦးသည် လက်နက် ကိုင်ဆောင်ထားသူများဖြစ်ပြီး ပျူစောထီး သင်တန်းဆင်းထားသည့် ခြံမန်နေဂျာနှင့် ခြံစောင့်တို့ဖြစ်ကြောင်း၊ ဆီအုန်းခြံသည် ဇဝဲအခြေစိုက် ၅၅၆ တပ်မှ ဗိုလ်ကြီးဟောင်း ကျော်နိုင် ပိုင်ဆိုင်သည့် မောတောင်မြို့ အမှတ် ၃ ရပ်ကွက်ရှိ ခြံဖြစ်ကြောင်း၊ သေဆုံးသူ ၂ ဦးသည် ပျူစောထီးခေါင်းဆောင် ကျော်ထွေးနှင့် ပေါင်းပြီး မောတောင်မြို့ထဲတွင် ရမ်းကားမှုများ လုပ်ဆောင်သူများလည်း ဖြစ်ကြောင်း သိရသည်။

လောင်းလုံးတွင် ပျူစောထီးအဖွဲ့ဝင်တစ်ဦး ပစ်သတ်ခံရ

===============================

တနင်္သာရီတိုင်း၊ ထားဝယ်ခရိုင်၊လောင်းလုံးမြို့နယ်၊ပြင်ကြီးရွာတွင် ပျူစောထီးအဖွဲ့ဝင် ဇော်ဦး နေအိမ်၌ယနေ့နံနက်ပိုင်းကသေနတ်ဖြင့်ပစ်ခတ်ခံရပြီးနောက်သေဆုံးသွားကြောင်း သိရှိရသည်။

စက်တင်ဘာ ၁၇ ရက်နေ့ ၊နံနက် ၇ နာရီကျော်အချိန် ဇော်ဦး အသက် ၄၀ နှစ်ဝန်းကျင်ကို နေအိမ်တွင် အမည်မသိလူတစ်စုက သေနတ်ဖြင့် ပစ်ခတ်ရှင်းလင်းကြောင်းဒေသခံတစ်ဦးကဆိုသည်။

“ပျူအိမ်ထဲက သေနတ်ပစ်ခတ်သံများ ထွက်ပေါ်လာခဲ့ပါတယ်။ခဏကြာမှာလက်နက်ကိုင်ထားတဲ့လူတွေပြန်ထွက် သွားခဲ့တယ်။ပျူတော့​ပစ်တဲ့နေရာ၌ပွဲချင်းပြီးဆုံးပါးကျန်ခဲ့ပါတယ်”ဟု၎င်းကဆိုသည်။

ဇော်ဦးသည် ပျူစောထီးခေါင်းဆောင် လေးလေး ၏တပည့်အရင်း ဖြစ်ပြီး စစ်တပ်နှင့်ပူး ပေါင်းပြီးကျေးရွာထဲဓားမြတိုက်မှု၊ နေအိမ်ဖောက်ထွင်းမှု ၊လူသတ်မှုများတွင်ကိုယ်တိုင်ကျူးလွန်ပါဝင်ဖူးသူတစ်ဦးဖြစ်ကြောင်း ဒေသခံများနှင့်PDFအဖွဲ့များက ရှင်းပြသည်။

အမရပူရ၊ မြစ်ငယ် မီးရထားစက်ရုံ ရုံးအုပ် ကြူကြူစန်း သေဆုံး

===================================

မန္တလေးမြို့၊ အမရပူရမြို့နယ်၊ မြစ်ငယ်မြို့ မီးရထားစက်ရုံ အထွေထွေမန်နေဂျာရုံးမှ ရုံးအုပ်ကြီး ကြူကြူစန်းဟာ စစ်အုပ်စုနှင့် ပေါင်းကာ CDM များကို ဖိနှိပ်ခဲ့သဖြင့် ပစ်ခတ်ရှင်းလင်းလိုက်ကြောင်း မြစ်ငယ် MN PDF မြို့ပြ အထူးပြောက်ကျားတပ်ဖွဲ့က သတင်း ထုတ်ပြန်သည်။

စက်တင်ဘာ ၁၆ ရက်နေ့ ညနေ ၅ နာရီကျော်အချိန် အမရပူရမြို့နယ်၊ စာတိုး စက်ကွေ့ရပ်ကွက်တွင် နေထိုင်သူ မြစ်ငယ်မြို့၊ မြန်မာ့မီးရထားစက်ရုံ၊ လူစီးတွဲနှင့် ကုန်တွဲစက်ရုံ၊ အထွေထွေမန်နေဂျာရုံးမှာ ရုံးအုပ်ကြီး အသက် ၅၀ ကျော်အရွယ် ကြူကြူစန်းကို နေအိမ်ရှေ့တွင်ပင် သေနတ်ဖြင် ပစ်ခတ်ခဲ့ပြီး သေဆုံးသွားခြင်းဖြစ်ကြောင်း သိရှိရသည်။

ကြူကြူစန်းသည် စစ်အုပ်စုနှင့် ပေါင်းပြီး CDM များကို ဖိနှိပ်နေသူ ဖြစ်သည့်အပြင် အမျိုးသား ညီညွတ်ရေးအစိုးရ (NUG) အလုပ်သမား ဝန်ကြီးဌာနက အမည်ပျက်စာရင်း သွင်းကာ ဝန်ထမ်းအဖြစ်မှ ထုတ်ပယ်ခံထားရသူလည်း ဖြစ်ကြောင်း သိရှိရသည်။

“လူစီးတွဲ နှင့် ကုန်တွဲစက်ရုံ မြစ်ငယ်မြို့ ဒေါ်ကြူကြူစန်း ရုံအုပ် (အထွေထွေမန်နေဂျာရုံး) သည် ပြည်သူနဲ့အတူ အမှန်တရားအတွက် ရပ်တည်ထားပြီး CDM ပြုလုပ်ထားသော ဝန်ထမ်းများကို စကစ စက်ယန္တရား လုပ်ငန်း လည်ပတ်နိုင်ရင်အတွက် CDM ဝန်ထမ်းများအား လုပ်ငန်းဆင်းရန် အမျိုးမျိုးဖိအားပေး စခ တို့အကြိုက် ဝန်ထမ်းများကို အမျိုးမျိုး ဒုက္ခပေး‌နေပြီး စက်ရုံထဲတွင်လည်း မင်းမူနေသောကြောင့် နှုတ်ခမ်းနီနှစ်‌တောင့်ဖြင့် ယမမင်းထံ ခစားရန် အရောက်ပို့ပေးလိုက်သည်။ အမျိုးသား ညီညွှတ်ရေးအစိုးရ အလုပ်သမားဝန်ကြီးဌာန အမည်ပျက်စာရင်း ကြောညာခြင်းနှင် ဝန်ထမ်းအဖြစ်မှ ထုတ်ပယ်ခြင်း ခံထားရသူ တစ်ဦး” ဖြစ်ကြောင်း MN PDF (မြစ်ငယ်) မြို့ပြ အထူးပြောက်ကျားတပ်ဖွဲ့က သတင်းထုတ်ပြန်ထားသည်။ khit thit

မြောက်ဦးစစ်ဆေးရေးဂိတ်တွင် ပရဟိတသမား ၁ ဦးကို စစ်ကောင်စီတပ်က ပစ်ခတ်

ရခိုင်ပြည်နယ်၊ မြောက်ဦးရှိ ခမရ ၅၄၀ တပ်စစ်ဆေးရေးဂိတ်မှာ  စက်တင်ဘာ ၁၆ ရက် မနက်ပိုင်းက ပရဟိတသမားတယောက်ကို စစ်ကောင်စီတပ်က ပစ်ခတ်ဖမ်းဆီးဖို့ ကြိုးစားခဲ့တယ်လို့ ဒေသခံတွေထံက သိရပါတယ်။

လတ်တလော တိုက်ပွဲတွေကြောင့် စားနပ်ရိက္ခာပြတ်နေတဲ့ မောင်တောနဲ့ ရသေ့တောင်က စစ်ဘေးရှောင်တွေအတွက် စားနပ်ရိက္ခာ ကူညီထောက်ပံ့ဖို့အစီအစဥ်နဲ့ ကိုအမ်းသားကြီး (ခ) ကိုဦးသန်းရွှေ အပါအဝင်  ပရဟိတသမားတွေ  စစ်တွေကို ဆင်းလာကြစဉ်  စစ်ဆေးရေးဂိတ်က  ပစ်ခတ်ဖမ်းဆီးခဲ့တာဖြစ်ပါတယ်။

ကာယကံရှင် ကိုအမ်းသားကြီးက “မြောက်ဦး ခမရ ၅၄၀ တပ်ဂိတ်က ဘယ်ကားကိုမှ မစစ်ဘူး၊ ကျနော့်ကားတစီးကိုပဲ ရွေးစစ်တာ။ မှတ်ပုံတင်ပြခိုင်းတယ်။ ကားလိုင်စင်ပြခိုင်းတယ်။ အဲဒါ ကျနော့်ကို ဖမ်းတော့မယ်ဆိုတာ သိနေတယ်။ ဒါကြောင့် ကားမောင်းပြီး ထွက်ပြေးတယ်။ စစ် တပ်က သေနတ်နဲ့ လေးချက်လမ်းပစ်တယ်။ ကားမှာ တချက်ထိတယ်။ လူတွေကတော့ ဘာမှဖြစ်မသွားဘူး” လို့ ပြောပါတယ်။

ပစ်ခတ်ခံရတဲ့ကားပေါ်မှာ ကိုအမ်းသားကြီး အပါအဝင် လူသုံးယောက် လိုက်ပါလာပြီး ပစ်ခတ်မှုကြောင့် လူထိခိုက်ဒဏ်ရာရတာ မရှိဘဲ ကားအောက်ပိုင်းမှာ သေနတ်ကျည်တချက် ထိမှန်ခဲ့ပြီး မှတ်ပုံတင်နဲ့ ကားလိုင်စင်တွေ ကျန်ခဲ့တယ်လို့ ကိုအမ်းသားကြီးက ပြောပါတယ်။

အဲဒီပစ်ခတ်မှုနဲ့ပတ်သက်လို့ စစ်ကောင်စီဘက်က တစုံတရာ ရှင်းလင်းထုတ်ပြန်တာ မရှိသေးပေမဲ့ စစ်ကောင်စီရဲ့ ဝါဒဖြန့်ဖေ့စ်ဘွတ်ခ် လူမှုကွန်ရက်တချို့မှာတော့ မြောက်ဦးအဝင် စစ်ဆေးရေးအဖွဲ့က မူးယစ်ဆေးဝါး သယ်ဆောင်လာသူရဲ့ Honda Insight ကားထဲမှာ မူးယစ်ဆေးဝါး တွေ့ရှိတာကြောင့် ပစ်ခတ်ဖမ်းဆီးရာ ထွက်ပြေး လွတ်မြောက်သွားခဲ့ပြီး အဆိုပါ မူးယစ်ဆေးဝါးတရားခံရဲ့ကားမှာ အမ်းသားကြီး ဖေ့စ်ဘွတ်ခ် အကောင့်ပိုင်ရှင် ဦးဦးသန်းရွှေ ဖြစ်ကြောင်း ရေးသားထားတာပါ။

စစ်ကောင်စီ ထောက်ခံသူတွေရဲ့ အွန်လိုင်းပေါ်က စွပ်စွဲရေးသားချက်တွေဟာ မှန်ကန်မှုမရှိဘဲ စစ်ကောင်စီက ပရဟိတသမားတွေကို ပစ်မှတ်ထား ဖမ်းဆီးဖို့ ကြိုးစားတာသာဖြစ်တယ်လို့ ရခိုင်ပရဟိတအဖွဲ့တခုမှ တာဝန်ရှိသူတယောက်က ပြောပါတယ်။

“သူတို့ ဖမ်းချင်တဲ့လူကို ဖမ်းမရတော့ သူတို့စွပ်စွဲချင်သလို စွပ်စွဲရေးသားမှာပဲလေ။ အမှန်တကယ် မူးယစ်ဆေး လုပ်စားနေရင် ကြိုက်တဲ့အချိန်မှာ သွားပြီးရှာဖွေနိုင်တယ်။ စစ်ဆေးနိုင်တာပဲ။”

ကိုအမ်းသားကြီးဟာ ရခိုင်ပြည်နယ်အတွင်း ပရဟိတလုပ်ငန်းတွေ ဆောင်ရွက်နေတဲ့ ပရဟိတသမားတယောက်ဖြစ်ပြီး လူမျိုးဘာသာမရွေး အကူအညီပေးနေသူတယောက်လည်း ဖြစ်ပါတယ်။

ပြီးခဲ့တဲ့ ဇူလိုင် ၈ ရက်က မြောက်ဦး ပေါင်းတုတ်ရွာသစ်နေ ရိုဟင်ဂျာလူငယ်နှစ်ယောက် မိုင်းထိပြီး မင်းပြားဆေးရုံမှာ ဆေးကုသမှု ခံယူရာမှာလည်း ကိုအမ်းသားကြီးကိုယ်တိုင် မင်းပြားဆေးရုံကို သွားရောက် အကူအညီပေးခဲ့ပါတယ်။

လက်ရှိမှာတော့ ကိုအမ်းသားကြီး အပါအဝင် ကားပေါ်မှာ လိုက်ပါလာသူတွေ တိမ်းရှောင်နေကြပြီး မြန်မာစစ်တပ်ဘက်ကလည်း မြောက်ဦးမြို့ထဲမှာ ရှာဖွေစုံစမ်းနေတယ်လို့ ဒေသခံတွေက‌ ပြောပါတယ်။

ပြီးခဲ့တဲ့ စက်တင်ဘာ ၄ ရက်ကလည်း မြောက်ဦးမြို့မှာနေထိုင်တဲ့ ရပ်အဆိုတော် ကိုကျော်ဇံဝေ (ခေါ်) ရင်ဆို့ကို NUG၊ CRPH နဲ့ ဆက်စပ်တယ်ဆိုတဲ့ စွပ်စွဲချက်တွေနဲ့ စစ်ကောင်စီက ဖမ်းဆီးထားပါတယ်။ DVB

ရေစကြိုမြို့နယ် မြေခဲတောင်ရွာရှိ ဒေသခံပြည်သူ ၂ ဦး ကို ဒလန်ဟု စွပ်စွဲ သတ်ဖြတ်

မကွေးတိုင်း၊ ရေစကြို မြို့တောင်ဘက် ၁၀ မိုင် ခန့်အကွာရှိ မြေခဲတောင် ကျေးရွာတွင် နေထိုင်သည့် ဦးအောင်ကိုဝင်းသည် စစ်ကောင်စီ အာဏာသိမ်းပြီးနောက် အုပ်ချုပ်ရေးမှူး ရာထူးမှ နုတ်ထွက်ထားသူ တစ်ဦး ဖြစ်ကြောင်း ဒေသခံများထံက သိရသည်။

ပြီးခဲ့သည့် သြဂုတ်လ ၅ ရက် ည ၁၀ နာရီခန့်တွင် အမည်မသိ လက်နက်ကိုင် အဖွဲ့အစည်း တစ်ခုမှ အင်အား ၄၀ ခန့်ဖြင့် ဝင်ရောက်၍ ဦးအောင်ကိုဝင်း နှင့် ဦးအောင်ကျော်မြင့် (ရပ်ကျေး မီးကော်မတီ) တို့၏ နေအိမ်များကို ရှာဖွေမှုများပြုလုပ်ခဲ့ ကြောင်းသိရသည်။

ထိုသို့ရှာဖွေရာတွင် ဦးအောင်ကိုဝင်း ၏ နေအိမ်တွင် ဦးအောင်ကိုဝင်းအား မတွေ့၍ သားဖြစ်သူ ကိုဇော်မျိုးသန့် အသက်(၃၂)နှစ်ကို သတ်ဖြတ်ခဲ့သည်။ ထို့အပြင် ဖုန်းနှစ်လုံး၊ ဆိုင်ကယ်တစ်စီး ၊ အဝတ်အစားများ နှင့် ပိုက်ဆံများကိုယူ၍ ကိုအောင်ကိုဝင်း၏ နေအိမ်ကို အမည်မသိ လက်နက်ကိုင်များက မီးရှို့ ဖျက်ဆီးခဲ့ကြောင်း လုံခြုံရေးအရ အမည်မဖော်လိုသည့် ဒေသခံပြည်သူ တစ်ဦးက မဇ္ဈိမကို ပြောကြားသည်။

ထို့နောက် ဦးအောင်ကျော်မြင့် ၏ နေအိမ်ကို ရှာဖွေမှုများ ဆက်လက်ပြုလုပ်ခဲ့ပြီး ဦးအောင်ကျော်မြင့် ကို မတွေ့၍ အိမ်နီးချင်း ဖြစ်သူ ဦးတူး (ခ) ဦးသန်းထွန်းအောင် ထံမှ ကားသော့ တောင်းယူသည်ဟု သိရသည်။

ဦးသန်းထွန်းအောင်က “မသိဘူး” ဟု ဆိုသောကြောင့် အိမ်တိုင်တွင် ထောင်ထားသည့် သံတူရွင်းဖြင့် ရိုက်နှက်ထားခဲ့၍ ရွာသားများက ဦးသန်းထွန်းအောင် ကို ညတွင်းချင်း အရေးပေါ် ဆေးရုံသို့ ပို့ဆောင်ပေးခဲ့ကြောင်း ဒေသခံပြည်သူ တစ်ဦးထံက သိရသည်။

“ကျွန်တော်တို့သာ အချိန်မီ ရောက်မသွားရင် ဦးသန်းထွန်းအောင် လည်း သွေးထွက်လွန်ပြီ သေဖို့များတယ်။ ကျွန်တော်တို့ ရောက်သွားတော့ သတိတွေ လစ်နေ ပြီဗျ။ ဒါက မဟုတ်ဘဲ ခံနေရတဲ့ ပြည်သူတွေ။ ကြာလာတော့ ကျွန်တော်တို့က လက်နက်ကိုင်နေတဲ့ ပြည်သူအချင်းချင်း ပြန်ကြောက်နေရတယ်။ ဒီလူတွေ ဆိုရင် ရပ်ကျိုးရွာအကျိုး သယ်ပိုးနေတဲ့ လူတွေဗျ။ ဒါဟာ ပုဂ္ဂိုလ်ရေးအရ သပ်သပ် လုပ်ကြံမှု တွေ။ ကိုဇော်မျိုးသန့် ကတော့ ကျွန်တော်တို့ ရောက်သွားတဲ့ အခါမှာ ပေါင်တွေ ၊ ခြေသလုံးတွေ ၊ ပါးတွေ ၊ လည်းပင်းတွေမှာ ဓားချက်ပေါင်း များစွာ နဲ့ သွေးအိုင်ထဲ မှာ သေနေတာကို တွေ့ခဲ့ရတယ်။ စစ်ကောင်စီတပ်က လုပ်သလိုမျိုး အလောင်းကို နေအိမ်ထဲမှာ ထည့်ပြီး မီးရှို့ ထားခဲ့တယ်။ မီးကိုတော့ ကျွန်တော်တို့ ရွာသားတွေ အချိန်မီ ငြှိမ်းသတ်နိုင်ခဲ့တယ်” ဟု ဒေသခံပြည်သူ တစ်ဦးက မဇ္ဈိမ ကိုပြောသည်။

အလားတူ စက်တင်ဘာလ ၁၄ ရက် နေ့လယ် ၁၂ နာရီခန့်တွင် မြေခဲတောင်ရွာ မှ ဦးမြင့်ဝေ ကို အမည်မသိ လက်နက်ကိုင်တစ်စုက ဆိုင်ကယ် သုံးစီး လူခြောက်ယောက် ဖြင့် လာရောက်၍ သတ်ဖြတ်ခဲ့ကြောင်း ဒေသခံပြည်သူ တစ်ဦးထံက သိရသည်။

“ဦးမြင့်ဝေက ကျနော်တို့ ကျေးရွာမှာ မီးကော်မတီဝင်ထဲ က တစ်ယောက်ပါ။ ဦးမြင့်ဝေ က အသောက်အစားမရှိဘူး။ ခပ်အေးအေး နေထိုင်ပြီး အိမ်ဈေးဆိုင် ဖွင့်ပြီး ဈေးရောင်းနေသူ တစ်ဦးပါ။ ဦးအောင်ကျော်မြင့်(မီးကော်မတီဝင်)ကို လက်နက်ကိုင် တစ်စု သတ်ဖို့ကြံစည်ကတည်းက အုပ်ချုပ်ရေးမှူးဟောင်းနဲ့ မီးကော်မတီဝင်တွေကို ပစ်မှတ်ထားပြီး လုပ်ကြံနေတယ်လို့ သိတယ်။ ဒါကြောင့် ညပိုင်းရောက်ရင် ပခန်းကြီး ကျေး ရွာကိုသွားပြီး အိပ်တယ်။ နေ့ပိုင်း ရောက်မှ သူ့အိမ်က ဈေးဆိုင်ကို လာပြီး ဈေးရောင်းတယ်။ ဒါတွေကို သိထားတဲ့ လက်နက်ကိုင်တစ်စုက နေ့ခင်းပိုင်းမှာ ဆိုင်ကယ် သုံးစီး လူခြောက်ယောက်နဲ့လာတယ်။ ပြီးတော့ ကိုဇော်မျိုးသန့် ကို သတ်ဖြတ်ထားသည့် ပုံစံ အတိုင်း ဦးမြင့်ဝေကိုလည်း ဓားနဲ့ လှီးပြီး သတ်ဖြတ်ခဲ့တယ်”ဟု ဒေသခံပြည်သူ တစ်ဦးက မဇ္ဈိမကို ပြောသည်။

မြေခဲတောင် ကျေးရွာတွင် စစ်ကောင်စီတပ် ၊ ရဲ တို့နှင့် ဆက်သွယ်ထားသည့် သက်သေ အထောက်အထား မရှိဘဲ သတ်ဖြတ်နေမှုများကြောင့် ကျန်ရှိနေသည့် မီးကော်မတီဝင် ၁၄ ဦး အပြင် ရွာသူရွာသားများမှာ ကြောက်လန့်နေကြကြောင်း သိရသည်။

“ကျွန်တော်တို့ရွာက ပြောရရင် အစိမ်းကို မရှိတာ။ ဒလန်သူဘျှို လုပ်ဖို့ဆိုတာဝေး။ အခုကလည်း ရပ်ရွာ အကျိုး သယ်ပိုးနေတဲ့ လူတွေ အ သတ်ခံနေရတာ ။ ညဘက် ခွေးတွေ ဟောင်ရင်ကို လန့်နေရတာဗျ။ မီးကော်မတီ ဝင်ထဲက လူတွေ နဲ့ တစ်ချို့ ရွာသူရွာသားတွေ တော့ ကြောက်ပြီ ရှောင်နေရတယ်” ဟု ဒေသခံပြည်သူတစ်ဦးက ဆိုသည်။ mizzima

ရေစကြို ၊ မြေခဲတောင်ကျေးရွာကိုစစ်တပ်က မီးရှို့ဖျက်ဆီးပြီး လူငယ်နှင့် မိန်းကလေးများကို လူသားဒိုင်းအဖြစ် ကြိုးတုပ်ရိုက်နှက် ဖမ်းဆီးသွား

မကွေးတိုင်း၊ ရေစကြိုမြို့နယ် ၊ မြေခဲတောင်ကျေးရွာကို စစ်တပ်က ယနေ့ နံနက် ပိုင်း မီးရှို့ဖျက်ဆီးပြီး လူငယ်နှင့် မိန်းကလေးများကို ကြိုးတုပ်ရိုက်နှက် ဖမ်းဆီးသွားကြောင်း ဒေသခံများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။

စက်တင်ဘာလ ၁၆ ရက်နေ့ ညနေ ၄ နာရီ ၃၀ မိနစ်အချိန် မြေခဲတောင်ကျေးရွာသို့ အကြမ်းဖက်စစ်ကောင်စီတပ်များက ပခန်းကြီးကျေးရွာမှ တစ်ဆင့် ဝင်ရောက် လာကြောင်း၊ ယင်းနောက် အမျိုးသား ၁၃ ဦးကို ဖမ်းဆီးရိုက်နှက်ကြောင်း၊ ယနေ့နံနက်ပိုင်းတွင် ပြန်လွှတ်ပေးပြီး မြေခဲတောင်ကျေးရွာကို အနောက် ပိုင်းနှင့်တောင်ပိုင်း နှစ်နေရာခွဲ၍ မီးရှို့ကြောင်း၊ မီးရှို့ပြီးနောက် လူငယ်နှင့် မိန်းကလေးများကို လူသားဒိုင်းအဖြစ် ကြိုးတုပ် ရိုက်နှက်ဖမ်းဆီးသွားကြောင်း ဒေသခံများက ဆိုကြသည်။

“စစ်ခွေးတွေက ရေစကြို အနောက်ပိုင်းမြေခဲတောင်ကျေးရွာကို မနေ့ညနေ ၄ နာရီခွဲ ကပခန်းကြီးကနေတဆင့်ခြေလျင် စစ်ကြောင်းဝင်လာတာ။ မြေခဲတောင် ရွာထဲရောက်တော့ ဘုန်းကြီးကျောင်း အနောက်ကျောင်းနှင့်အရှေ့ကျောင်းမှာ လူခွဲပြီး တပ်စွဲတယ်။ ကျေးရွာအတွင်းနေအိမ်တွေကနေ ပစ္စည်းတွေလုတယ်။ တိရစ္ဆာန်များကိုဖမ်းဆီးသတ်ဖြတ်တယ်။ ဖမ်းဆီးခေါ်ဆောင်လာတဲ့ ပြည်သူတွေကို ထမင်းဟင်းချက်ပြုတ်ခိုင်းပြီး စာသောက်နေတယ်။ မနက်ကျတော့ ရွာကို နှစ်နေရာခွဲပြီး မီးရှို့တယ်။ မနေ့ညနေပိုင်းက ဖမ်းထားတဲ့ လူကြီး ၁၃ ဦးကို ထန်းပိုးဂျစ်နဲ့ရိုက်ပြီး ပြန်လွှတ်ပေးတယ်။ အခု ဒီမနက် ရွာကို မီးရှို့ပြီးတော့ လူငယ် နဲ့မိန်းကလေးတွေဖမ်းခေါ်သွားတယ်”ဟု ဒေသခံကျေးရွာသားက ရန်ကုန်ခေတ်သစ်သတင်းဌာနထံသို့ ပြောဆိုသည်။

စစ်တပ်၏ စစ်ကြောင်းထိုး ဝင်ရောက်လာမှုကြောင့် အိမ်ခြေ ၅၀၀ နီးပါးရှိသော မြေခဲတောင်ကျေးရွာမှ ပြည်သူ ထောင်ကျော် ထွက်ပြေးတိမ်းရှောင်နေရကြောင်း သိရှိရသည်။ khit thit

မီးတိုက်စခန်းအား အေအေသိမ်းပိုက်ပြီးနောက် စစ်ကောင်စီတပ်က ဂျက်တိုက် လေယာဉ်ဖြင့် ဗုံးကြဲ

ရခိုင်ပြည်နယ်၊ မောင်တောမြို့နယ်မြောက်ပိုင်း၊ မီးတိုက်ကျေးရွာရှိ နယ်ခြားစောင့်စခန်းကို  ရက္ခိုင့်တပ်တော် (အေအေ)က တိုက်ခိုက်သိမ်းပိုက်ပြီးနောက် စက်တင်ဘာ ၁၆ ရက် ည ၁၀ နာရီကျော်မှာ စစ်ကောင်စီတပ်က ဂျက်တိုက်လေယာဥ် ၂ စီးနဲ့ မီးတိုက်ကျေးရွာအနီး ဗုံးကြဲတိုက်ခိုက်နေပါတယ်။

မီးတိုက်ကျေးရွာသားတစ်ဦးက “ဒီနေ့ ည ၁၀ နာရီမှာ လေယာဥ်တစ်စီးလာပြီး ဗုံးကြဲတယ်။ မြေကြီးတွေတုန်ခါသွားတယ်။ ရွာအနီးတစ်ဝိုက်ကိုကြဲချတာ။ ည ၁၀ နာရီ ၁၀ မိနှစ်မှာ နောက်ထပ်တစ်စီးလာပြီး ရွာနဲ့ တစ်မိုင်လောက်ဝေးတဲ့ နေရာမှချသွားတာ။ ဒေသခံတွေကတော့ ရွာတွေကို ဗုံးချလာမှာ စိုးရိမ်နေကြတယ်။”လို့ပြောပါတယ်။

ပြီးခဲတဲ့ စက်တင်ဘာလ ၉ ရက်က အေအေက အင်အားအလုံးအရင်းနဲ့ မီးတိုက်ကျေးရွာစခန်းကို ဝင်တိုက်ခဲ့ရာ နယ်ခြားစောင့်တပ်ဖွဲ့ဝင်  ၁၃ ယောက် ကျဆုံးခဲ့ပြီး စက်တင်ဘာလ ၁၅ ရက်မှာ အေအေက ဒုတိယအကြိမ်​ထိုးစစ်ဆင်တိုက်ခိုက်နေ​ပြီး စခန်းအားသိမ်းပိုက်နိုင်ခဲ့တာပါ။

လက်ရှိစစ်ကောင်စီတပ်က မောင်တောဒေသကို ကုန်းလမ်း၊ရေးလမ်း အားလုံးဖြတ်တောက်ထားပြီး စစ်အင်အား အလုံးအရင်းတိုးချလာကာ လေကြောင်းကနေ လူနေကျေးရွားတွေအနီး နေ့စဉ် ဗုံးကြဲတိုက်ခိုက်နေတာလည်းဖြစ်ပါတယ်။

ဒေသခံစစ်ရေးလေ့လာသူတစ်ဦးက “တပ်မ ၇၇ တစ်ခုလုံး ရေကြောင်းက မောင်တောကို ရောက်လာပြီး မြောက်ပိုင်းကို စစ်ကူလိုက်သွားကြတယ်။ အခြေအနေက တစ်ရက်ထက်တစ်ရက် ဆိုးလာနိုင်တယ်။ အဓိကလေကြောင်းတိုက်ခိုက်မှုပေါ့။ မောင်တောမြောက်ပိုင်းကျေးရွာအား လုံး ထွက်ပြေးကြရနိုင်တယ်။”လို့ ပြောပါတယ်။

စစ်ကောင်စီရဲ့ ဂျက်တိုက်လေယာဥ်တွေ ကျေးရွာတွေအနီး ဗုံးကြဲတိုက်ခိုက်မှုကြောင့် မောင်တောမြောက်ပိုင်း ကျေးရွာ ၂၀ ကျော်က ဒေသခံတွေ မောင်တော၊ ဘူးတောင် စတဲ့မြို့တွေရှိ ဆွေမျိုးတွေနဲ့ စစ်ဘေးရှောင်ဒုက္ခသည်စခန်းတွေကို ထွက်ပြေးနေကြရပါတယ်။

မနေ့ည စစ်ကောင်စီတပ်က တိုက်လေယာဥ် ဗုံးကြဲ တိုက်ခိုက်မှုကြောင့် ဘင်္ဂလားဒေ့ရှ်၊ ဂေါင်းဒုံးဒေသဒုက္ခသည်စခန်းက  ဒုက္ခသည် ၁ ယောက်  သေဆုံးပြီး ၆ ယောက် ဒဏ်ရာရရှိခဲ့‌ ကြောင်း   ဘင်္ဂလားဒေ့ရှ်အခြေစိုက် Teknaf Today သတင်းမှာ ရေးသားဖော်ပြပါတယ်။  DVB

“အဆုံးသတ် တိုက်ပွဲအချိန် ရောက်ပြီ” ဟု AA ဒုစစ်ဦးချုပ် တပ်လှန့်

ရခိုင်ပြည်နယ်တွင် တစ်ကျော့ပြန်တိုက်ပွဲများ ပြင်းထန်လာသည်နှင့်တပြိုင်နက် အဆုံးအဖြတ်ပေးမည့် အဆုံးသတ်တိုက်ပွဲအချိန်ရောက်ပြီ ဟု ရက္ခိုင့်တပ်တော် (AA) ဒုစစ်ဦးစီးချုပ်၊ ဗိုလ်မှူးချုပ် ဒေါက်တာညိုထွန်းအောင်က အသိပေးတပ်လှန့် လိုက်သည်။

AA က ကြွေးကြော်ထားသည့် ရက္ခိတလမ်းစဉ်ကို အကောင်အထည် ဖော်ဆောင်နိုင်ရန်အတွက် လက်ရှိတကျော့ပြန် ပြင်းထန်လာနေသောတိုက်ပွဲသည် “အဆုံးအဖြတ်နဲ့ အဆုံးသတ်တိုက်ပွဲ” ဖြစ်သည်ဟု ဒေါက်တာညိုထွန်းအောင်က စက်တင်ဘာလ ၁၆ ရက်နေ့တွင် စာရေးသား အသိပေးထားခြင်း ဖြစ်သည်။

ရခိုင်ပြည်နယ်တွင် ၂၀၂၀ ခုနှစ် နိုဝင်ဘာလဆန်းပိုင်းမှစတင်ပြီး စစ်အေးကာလတစ်နှစ်ကျော်ကြာ ဖြတ်သန်းပြီးနောက် လက်ရှိအချိန်၌ ရခိုင်မြောက်ပိုင်းနှင့် ချင်းပြည်နယ် ပလက်ဝဒေသတို့တွင် AA နှင့် အာဏာသိမ်းစစ်ကောင်စီတပ်တို့အကြား တိုက်ပွဲများပြင်းပြင်းထန်ထန် ဖြစ်ပွားနေသည်။

ရခိုင်မြောက်ပိုင်း မောင်တောမြို့နယ်တွင် တိုက်ပွဲအပြင်းထန်ဆုံးဖြစ်ပြီး ရခိုင်−ဘင်္ဂလားဒေ့ရှ်နယ် မိုင်တိုင် (၄၀) စခန်း၊ ခမရ (၃၅၂) တပ်စခန်းနှင့် နယ်ခြားစောင့် မီးတိုက်စခန်းတို့ကို ယခုရက်ပိုင်းအတွင်း AA က တိုက်ခိုက်သိမ်းပိုက်ထားသည်။

တိုက်ပွဲများပြင်းထန်လာမှုနှင့်အတူ စစ်ကောင်စီတပ်၏ လေကြောင်းနှင့် လက်နက်ကြီးရန်ကို ကာကွယ်နိုင်ရန် မိမိနှင့်မလှမ်းမကမ်း၊ နီးစပ်ရာနေရာများတွင် ဗုံးခိုကျင်းများတူးထားကြရန် AA ပြောခွင့်ရသူ ဦးခိုင်သုခကလည်း ဩဂုတ်လနှောင်းပိုင်းကပြုလုပ်ခဲ့သည့် မဇ္ဈိမနှင့်သီးသန့်အင်တာဗျူးတစ်ခုတွင် တိုက်တွန်းထားသည်။

ယင်းအပြင် အာဏာသိမ်း စစ်ကောင်စီဘက်က ၎င်းတို့ဆုံးရှုံးထားသော တပ်စခန်းများကို ပြန်ရယူရန် စစ်အင်အား၊ လက်နက်ခဲယမ်း ဖြည့် တင်း မှုများ ပြုလုပ်နေသည့်အတွက် ရခိုင်ပြည်နယ် နေရာအနှံ့တွင် တိုက်ပွဲကြီးကြီးမားမား ဖြစ်လာနိုင်ကြောင်းလည်း AA ဘက်က အရေးပေါ်ကြေညာချက်ထုတ်ပြန် အသိပေးထားသည်။ mizzima

အာဏာသိမ်းမှုနောက်ဆက်တွဲ သွေးထွက်သံ ယိုမှုများအကြား မြန်မာစစ်တပ်နှင့် ဆက်နွယ်သော ဟိုတယ်များတွင် ဩစတြေးလျအစိုးရက ဒေါ်လာ ၂ ဒသမ ၅ သန်း သုံးစွဲခဲ့

ယမန်နှစ်က နိုင်ငံ၏ဒီမိုကရေစီနည်းလမ်းတကျ ရွေးကောက်တင်မြှောက်ထားသော အစိုးရကို ဖြုတ်ချခဲ့သည့် မြန်မာစစ်တပ်၏ အာဏာသိမ်းမှု ဖြစ်ပွားပြီးကတည်းက သြစတြေးလျအစိုးရသည် အခွန်ထမ်းပြည်သူများ၏ ငွေကြေး ဒေါ်လာ ၂.၅ သန်းကျော်ကို စစ်တပ်နှင့်ပတ်သက်သော ဇိမ်ခံဟိုတယ်များ၌ သုံးစွဲခဲ့ပြီးဖြစ်သည်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း၏ အဆိုအရ ၂၀၂၁ခုနှစ်၊ဖေဖော်ဝါရီ ၁ ရက် အာဏာသိမ်းပြီးချိန်မှစတင်၍ လူပေါင်း ၂,၂၇၃ ဦးကို သတ်ဖြတ်ခဲ့ပြီး ၁၅,၅၀၀ကျော်ကို ဖမ်းဆီးထားသည့် စစ်ကောင်စီ၏လုပ်ရပ်များကို ဩစတြေးလျက အကြိမ်ကြိမ်ပြစ်တင် ရှုတ်ချခဲ့ပြီးဖြစ်သည်။

သို့သော် လွန်ခဲ့သည့် ၁၈ လတာကာလအတွင်း ဝန်ထမ်းများတည်းခိုရန် ရန်ကုန်မြို့ရှိ Shangri-Laအိမ်ရာ ၌ ဒေါ်လာ ၁.၅သန်းကျော်အပြင် Lotte ဟို တယ်၌လည်း ဒေါ်လာ၈၆၂,၀၀၀ ကို ဩစတြေးလျအစိုးရက သုံးစွဲထားခဲ့ပြီး ယင်း ပမာဏမှာ ABC၏သတင်းတွင် ယခင်ပါရှိခဲ့သည့် ဒေါ်လာ ၇၅၀,၀၀၀ ဟူသောကိန်းဂဏန်းထက် ပိုမိုများပြားလျက် ရှိသည်။

ထို့အတူ ဩစတြေးလျအစိုးရသည် Accor ကုမ္ပဏီက လုပ်ငန်းလည်ပတ်နေသော်လည်း Max Myanmar အုပ်စုက ပိုင်ဆိုင်သည့် မြို့တော်နေပြည်တော်ရှိ MGallery ဟိုတယ်၌ ခေတ္တတည်းခိုရန်အတွက်လည်း ဒေါ်လာ ၁၆၂,၀၀၀ သုံးစွဲခဲ့သည်။

Shangri-La နှင့် Max Myanmar တို့သည် တပ်မတော်ဟုခေါ်ဆိုသည့် မြန်မာစစ်တပ်နှင့် ငွေကြေးဆက်ဆံမှုများ ဖြတ်တောက်ရန် ကုလသမဂ္ဂ၏ မြန်မာ နိုင်ငံဆိုင်ရာ အချက်အလက်ရှာဖွေရေးမစ်ရှင်က ၎င်း၏ ၂၀၁၉ ခုနှစ်အစီရင်ခံစာထဲတွင် အမည်ဖော်ပြ တိုက်တွန်းခြင်းခံထားရသော အဖွဲ့များ ဖြစ်သည်။

ဘင်္ဂလားဒေ့ရှ်-မြန်မာနယ်စပ်တစ်လျှောက် ခြံစည်းရိုးကာရံရန် စစ်တပ်သို့ ၂၀၁၇ ခုနှစ်အတွင်း ဧရာဝတီ ဖောင်ဒေးရှင်းမှတစ်ဆင့် ကုမ္ပဏီဥက္ကဋ္ဌ ဦးဇော်ဇော်က အမေရိကန် ဒေါ်လာ ၁ သန်းလှူဒါန်းခဲ့သည့်အတွက် Max Myanmar ကုမ္ပဏီကို ပြစ်မှုဆိုင်ရာစုံစမ်းစစ်ဆေးမှုများပြုလုပ်ရန် အဆိုပါကုလသမဂ္ဂအစီရင်ခံစာက တောင်းဆိုထားသည်။

“နယ်စပ်အုတ်တံတိုင်းအတွက်ငွေကြေးထောက်ပံ့ခြင်းသည် ရခိုင်ပြည်နယ်မြောက်ပိုင်းမှ ရိုဟင်ဂျာများ၏ နေရပ်ပြန်နိုင်မှုကို လူသားချင်းစာနာမှု ကင်းမဲ့သောဟန့်တားမှု တစ်ခုဖြစ်သဖြင့် ၎င်းတို့အား ကြီးမားသည့် ဆင်းရဲဒုက္ခ အတွင်းသက်ဆင်းစေခဲ့ရာတွင် အဓိကအခန်းကဏ္ဍမှ ပါဝင်ခဲ့သည်” ဟုအစီရင်ခံစာက စီစစ်ဖော်ထုတ်ခဲ့သည်။ Max Myanmar မှအရာရှိများသည် လူသားမျိုးနွယ်အပေါ်ကျူးလွန်သည့် ရာဇဝတ်မှုများနှင့် အခြားလူမဆန်သော ပြုမူမှုများတွင် အားပေးကူညီခြင်း၊ ကြံရာပါဖြစ်ခြင်း ၊တစ်နည်းနည်းထောက်ပံ့ခြင်းများ ပြုလုပ်ခဲ့သည်ဟု အစီရင်ခံစာက ကောက်ချက်ချသည်။

စစ်တပ်အတွက် လက်နက်ပစ္စည်းများ ထောက်ပံ့နေသဖြင့် အမေရိကန်ပြည်ထောင်စု၊ ယူနိုက်တက်ကင်းဒမ်းနှင့် ကနေဒါတို့က အရေးယူပိတ်ဆို့ထားသော စစ်ထောက်ချုပ်ရုံးထံမှ ငှားရမ်းထားသည့် မြေပေါ်တွင် Lotte ဟိုတယ်ကို တည်ဆောက်ထားခြင်းဖြစ်သည်ဟု ABCသတင်းဌာနက ယခင်ကတင်ပြခဲ့ဖူးသည်။

Shangri-Laသည်လည်းအလားတူပင် စစ်ထောက်ရုံးထံမှ မြေငှားရမ်းထားသည်။ အဆိုပါမြေငှားရမ်းမှုအတွက် ပေးချေရသည့် ငှားရမ်းခ ငွေကြေးပမာဏကို Shangri-Laကော မြန်မာစစ်တပ်ကပါ ထုတ်ဖော်ပြောကြားခြင်း မရှိကြောင်း Justice For Myanmar တက်ကြွလှုပ်ရှားသူများအဖွဲ့ကဆိုသည်။

“Lotte နဲ့ Shangri-Laတို့ဟာ လူတွေကိုသတ်ဖြတ်ဖို့ ဗုံးတွေ၊ ကျည်ဆံတွေဝယ်နေတဲ့ စစ်တပ်အတွက် ငှားရမ်းခတွေ ပေးချေနေတဲ့ အဖွဲ့တွေဖြစ်ပြီး သူတို့ဟာစစ်တပ်ရဲ့ အဓိကစီးပွားရေး မိတ်ဖက်တွေ ဖြစ်ပါတယ်” ဟု Justice For Myanmarမှ မရတနာမောင်က ပြောကြားသည်။

“ရိုဟင်ဂျာအပေါ် ကျူးလွန်တဲ့လူမျိုးတုံးသတ်ဖြတ်မှုမှာ Max Myanmarက ပါဝင်ပတ်သက်ခဲ့တဲ့အတွက် သူတို့ကို တာဝန်ယူစေရမှာဖြစ်ပါတယ်”ဟု သူကဆက်လက်ပြောဆိုသည်။

“ဩစတြေးလျဟာ မြန်မာပြည်သူတွေအပေါ် တာဝန်ပျက်ကွက်လျက်ရှိပါတယ်။ မြန်မာစစ်ရာဇဝတ်မှုကျူးလွန်သူများနှင့် ၎င်းတို့ရဲ့လုပ်ငန်းများကို အရေးယူပိတ်ဆို့ဖို့ အစဉ်ငြင်းဆန်နေရုံသာမက နိုင်ငံတကာရာဇဝတ်မှုတွေ ဆက်လက်ကျူးလွန်နိုင်စေအောင် မြန်မာစစ်တပ်ကို ကူညီတဲ့နေရာမှာ အခွန်ထမ်းပြည်သူတွေရဲ့ ပိုက်ဆံကိုပင် သြစတြေးလျအစိုးရက သုံးစွဲလျက် ရှိပါတယ်” ဟု သူကထောက်ပြသည်။

သြစတြေးလျ Greens ပါတီမှ အထက်လွှတ်တော်အမတ် Jordan Steele-John ၏ မေးခွန်းကို ဖြေကြားသည့်အချိန်တွင် မြန်မာစစ်တပ်နှင့် ပတ်သက်နေသော အိမ်ခြံမြေများ ငှားရမ်းရာ၌ သြစတြေးလျအစိုးရ၏ သုံးစွဲမှုများကို နိုင်ငံခြားရေးဝန်ကြီး Penny Wongက ထည့်သွင်းပြောကြားခဲ့သည်။

“မြန်မာနိုင်ငံမှာရှိတဲ့ ဩစတြေးလျအစိုးရရဲ့လုပ်ငန်းတွေဟာ မြန်မာစစ်တပ်ကို တိုက်ရိုက်ငွေကြေးထောက်ပံ့ နေခြင်းမရှိပါဘူး” ဟု ဝန်ကြီးဖြစ်သူ အထက်လွှတ်တော်အမတ် Wong ကတုံ့ပြန်ပြောဆိုသည်။

ကုလသမဂ္ဂ၏ မြန်မာနိုင်ငံဆိုင်ရာအချက်အလက်ရှာဖွေရေးမစ်ရှင်မှ Chris Sidoti က Lotte ထံမှ ငွေကြေး များသည် နောက်ဆုံးတွင် စစ်တပ်ဆီသို့သာ ရောက်ရှိသွားသည်ဟု ABC သို့ပြောကြားခဲ့ဖူးရာ အဆိုပါပြောကြား ချက်သည် လူ့အခွင့်အရေးစောင့်ကြည့်ရေးအဖွဲ့မှ ဒေါ်မန်နီမောင်၏အဆိုနှင့် တစ်ထပ်တည်းကျလျက်ရှိသည်။

“ရေဘဝဲကောင်ရဲ့ လက်တံတွေက အလွန်ရှည်တယ် ဆိုတဲ့စကားလိုပါပဲ။ ဩစတြေးလျကနေ ငွေကြေးရယူနေတဲ့ လုပ်ငန်းတွေဟာ မြေပိုင်ရှင်ကို မြေခပေးကောင်းပေးနေရမယ်။ အဲ့ဒီမြေပိုင်ရှင်ဆိုတာ မြန်မာစစ်တပ်ပဲ ဖြစ်ပါတယ်” ဟု ၎င်းကဆိုသည်။

လာမည့်ရက်သတ္တပတ်များအတွင်း တာနယ်လ်အပေါ် စီရင်ချက်ချမှတ်ဖွယ်ရှိ

================

ယမန်နှစ် ဖေဖော်ဝါရီလအာဏာသိမ်းစဉ်ကတည်းက ထိန်းသိမ်းခံထားရသော သြစတြေးလျစီးပွားရေး ပညာရှင် ရှောင်တာနယ်လ်ကို လာမည့်လအတွင်း ပြုလုပ်မည့် လျှို့ဝှက်တရားရုံးစစ်ဆေးမှု၌ စီရင်ချက်ချရန် မျှော်လင့် ရသည်ဟု ပြည်တွင်းမီဒီယာများက ထုတ်ဖော်ရေးသားသည်။

၎င်းတွင် အပြစ်မရှိကြောင်း၊ မိမိလက်ဝယ်သိမ်းဆည်းရမိသော စာရွက်စာတမ်းများသည် လျှို့ဝှက်ချက်များ မဟုတ်ဘဲ ဒေါ်အောင်ဆန်းစုကြည်၏ အစိုးရသို့ ၎င်းကအဆိုပြုထားသည့် စီးပွားရေးအကြံပေးချက်များသာ ဖြစ်ကြောင်း ပြီးခဲ့သည့်အပတ်ကပြုလုပ်သည့် တံခါးပိတ်စစ်ဆေးမှုအတွင်း ပါမောက္ခ တာနယ်လ်က ထွက်ဆိုခဲ့သည်ဟု အမည်မဖော်ပြသော တရားရုံးသတင်းရင်းမြစ်တစ်ခုကို ကိုးကားလျက် ဧရာဝတီသတင်းဌာနက ဖော်ပြထားသည်။

စစ်တပ်နှင့်ပတ်သက်နေသည့် ရန်ပုံငွေများကိုဖယ်ရှားရန်မှာ ပထမဦးစားပေး ဆောင်ရွက်ရမည့်ကိစ္စဖြစ်ကြောင်း အထက်လွှတ်တော်အမတ် Steele-John ကထောက်ပြသည်။

“ဒီလိုဖယ်ရှားခြင်းဟာ ကျွန်တော်တို့ဒေသအနေနဲ့ မြန်မာ့အရေးကို ကိုင်တွယ်ရာမှာ အနိမ့်ဆုံးအနေအထားအဖြစ် ဆောင်ရွက်ရမယ့်ကိစ္စ ဖြစ်ပါတယ်။ မြန်မာစစ်တပ်နဲ့အဆက်အသွယ်ရှိတဲ့ ကုမ္ပဏီတွေနဲ့ ဩစတြေးဟာ စီးပွားရေးပူးပေါင်းဆောင်ရွက်မှုတွေ လုံးဝမပြုလုပ်သင့်ပါဘူး” ဟု ၎င်းကဆိုသည်။

“မြန်မာစစ်တပ်ကို စကားလုံးတွေနဲ့ ပြစ်တင်ရှုတ်ချခဲ့တဲ့ သြစတြေးလျအစိုးရအနေနဲ့ အပြောနဲ့အလုပ် လက်တွေ့ တစ်ထပ်တည်းကျအောင်လုပ်ဖို့ ကျွန်တော်တောင်းဆိုပါတယ်။ အာဏာသိမ်းမှုကို ဆန့်ကျင်နေတုန်းမှာပဲ မြန်မာစစ်တပ်ဆီ ရောက်သွားမယ့် ငွေကြေးဒေါ်လာ ၂.၅ သန်းကို သုံးစွဲခဲ့တယ်ဆိုတဲ့သတင်းဟာ တကယ့်ကိုအပြောနဲ့ အလုပ်တခြားစီ ဖြစ်နေတဲ့လုပ်ရပ်ပါပဲ” ဟု ၎င်းက ဆက်လက်ပြောကြားသည်။

ဝန်ကြီး Wong ကမူ အိမ်ခြံမြေငှားရမ်းပေးအပ်သူများသည် ဩစတြေးလျက ဘဏ္ဍာရေးအရ ပိတ်ဆို့အရေးယူ ခံထားရသူများမဟုတ်ကြောင်း နိုင်ငံခြားရေးနှင့် ကုန်သွယ်ရေးဝန်ကြီးဌာန(DFAT)က အတည်ပြုထားသည်ဟု ပြန်လည်ဖြေကြားသည်။

အာဏာသိမ်းပြီးနောက်ပိုင်းကတည်းက မြန်မာစစ်တပ်အပေါ် ဩစတြေးလျက အရေးယူပိတ်ဆို့မှုအသစ်များ ထပ်မံချမှတ်ခြင်းမရှိသေးပေ။

“မြန်မာနိုင်ငံရှိ ကျွန်ုပ်တို့ဝန်ထမ်းများ၏ ဘေးကင်းလုံခြုံမှုသည် ကျွန်ုပ်တို့၏ ပထမဦးစားပေးတာဝန်ဖြစ်ကာ လက်ရှိ မြန်မာနိုင်ငံလုံခြုံရေး အခြေအနေများအရ သြစတြေးလျဝန်ထမ်းများအတွက် သင့်တော်ပြီးလုံခြုံမှုရှိသည့် နေရာထိုင်ခင်းအရေအတွက်သည် အကန့်အသတ်များ ရှိနေပါသည်” ဟု DFATပြောရေးဆိုခွင့်ရှိသူက ထုတ်ပြန်ချက်တစ်ခုတွင်ဖော်ပြခဲ့သည်။

“သြစတြေးလျဝန်ထမ်းများအတွက် နေရာထိုင်ခင်းစီစဉ်မှုသည် အခြားသံရုံးများနည်းတူ ဆောင်ရွက်ခဲ့ခြင်းဖြစ်ပြီး အချို့သံရုံးများမှာ အလားတူကုမ္ပဏီ သို့မဟုတ် ဝန်ဆောင်မှုပေးသူများထံမှတစ်ဆင့် ငှားရမ်းခများ ပေးချေလျက် ရှိပါသည်။ နေရာထိုင်ခင်း စီစဉ်ပေးနိုင်မည့်ရွေးချယ်စရာများကို ကျွန်ုပ်တို့ဆက်လက်သုံးသပ်နေပါသည်” ဟုလည်း ရေးသားထားသည်။

သြစတြေးလျသံရုံးသည် တရားဝင်ရုံးလုပ်ငန်းများ ဆောင်ရွက်ရန် ရည်ရွယ်ချက်ဖြင့်အသုံးပြုခဲ့သော MGallery ဟိုတယ်နှင့် တိုက်ရိုက်ပတ်သက်မှုရှိသည့် စာချုပ်ချုပ်ဆိုငှားရမ်းထားမှု မရှိကြောင်းလည်း ၎င်းတို့က ဖြည့်စွက် ပြောကြားသည်။

အဆိုပါ အဖွဲ့နှစ်ခုလုံးသည် အရေးယူခံထားရသည့် စာရင်းတွင် မပါဝင်သော်လည်း ၎င်းတို့ကို မြန်မာနိုင်ငံအတွင်း၌ ခရိုနီကြီးများ၊ စစ်တပ်နှင့်ပတ်သက်သူများအဖြစ် အလွန်လူသိများ ကျော်ကြားကြသည်မှာ အမှန်ပင်ဖြစ်ကြောင်း၊ နိုင်ငံခြားသားများအနေဖြင့် ၎င်းတို့နှင့် ခပ်ဝေးဝေးရှောင်ရှားရန် ကြိုးပမ်းရမည်ကို သိရှိထားသင့်ကြောင်း၊ Curtin တက္ကသိုလ်၊ နိုင်ငံတကာစီးပွားရေးဌာနမှ ပါမောက္ခဖြစ်သူ ဒေါက်တာထွေးထွေးသိန်းက ထောက်ပြသည်။

“သူတို့ဒီထက် ပိုကောင်းကောင်း သိရှိထားသင့်တယ်။ ဒီကုမ္ပဏီတွေဟာ စစ်တပ်ထိပ်ပိုင်းဗိုလ်ချုပ်ကြီးတွေနဲ့ ပတ်သက်နေတယ်ဆိုတာ လမ်းဘေးက ကလေးတောင် သိနေတဲ့ကိစ္စမျိုးပါ” ဟု သူကဆိုသည်။

အဆိုပါကိစ္စအတွက် မှတ်ချက်ပြုနိုင်ရန် Max Myanmar နှင့် Shangri-La တို့ကိုလည်း ဤသတင်းဌာနက ဆက်သွယ်မေးမြန်းခဲ့သည်။

ကုလသမဂ္ဂ၏ မြန်မာနိုင်ငံဆိုင်ရာ အချက်အလက်ရှာဖွေရေးမစ်ရှင်၏ အစီရင်ခံစာအရ Max Myanmarအပေါ် မည်သည့်အရေးယူပိတ်ဆို့မှုမျှ မလုပ်ခဲ့သလို မည်သည့်အစိုးရအာဏာပိုင်မျှလည်း တရားဝင် စုံစမ်းစစ်ဆေးမှုများ မပြုလုပ်ခဲ့ဘဲ အစီရင်ခံစာတွင် စွပ်စွဲထားသည့် ကိစ္စများအား အတည်ပြုနိုင်ခြင်း၊ တရားစွဲဆိုနိုင်ခြင်းများ မရှိကြောင်း MGallery ဟိုတယ်နှင့် လုပ်ငန်းများဆောင်ရွက်နေသော Accorကုမ္ပဏီ၏ ပြောရေးဆိုခွင့်ရှိသူတစ်ဦးက ပြောကြား သည်။

“စုံစမ်းစစ်ဆေးမှုတစ်ခုခု စတင်ဆောင်ရွက်ပြီး Max Myanmarအပေါ် အရေးယူပိတ်ဆို့မှုတွေ ရှိလာမယ်ဆိုရင် Accorအနေနဲ့ မိမိတို့ရဲ့ဥပဒေဆိုင်ရာ တာဝန်ဝတ္တရားတွေနဲ့အညီ ဆောင်ရွက်သွားမှာပါ” ဟု ၎င်းကဆက်လက် ပြောဆိုပြီး မြန်မာနိုင်ငံ၌ မိမိတို့စီမံခန့်ခွဲနေသော ဟိုတယ်များတွင် စစ်တပ်၏ အကျိုးစီးပွားများရှိနေသည်ဟု Accor က မသိရှိကြောင်း ဖြေကြားသည်။

“ပြည်တွင်းဖြစ်ပေါ်တိုးတက်မှုတွေကို ကျွန်တော်တို့ နီးကပ်စွာ စောင့်ကြည့်နေတာနဲ့အတူ အခုလိုဖရိုဖရဲဖြစ်နေချိန်မှာ နိုင်ငံခြားသား၊ သတင်းထောက်၊ အင်န်ဂျီအိုအပါအဝင် ဧည့်သည်တွေအားလုံးအတွက် Accor ဟိုတယ်တွေဟာ ခိုလှုံစရာနေရာ ဖြစ်တယ်ဆိုတာလည်း ကျေးဇူးပြုပြီး သတိပြုမိစေချင်ပါတယ်” ဟု ဆက်လက်ပြောဆိုသည်။

ထိန်းသိမ်းထားစဉ် သေဆုံးမှုများနောက်ကွယ်တွင် အဆိုးတကာ့အဆိုးဆုံး အခြေအနေများရှိနေသလား

==================

ဩစတြေးလျအစိုးရ၏ အသုံးစရိတ်ကိစ္စသတင်းသည် စစ်ကောင်စီက ထိန်းသိမ်းထားစဉ် သေဆုံးခဲ့သူ ၆ ဦး အကြောင်းအစီရင်ခံစာအသစ်ကို လူ့အခွင့်အရေးစောင့်ကြည့်သူများအဖွဲ့က ယခုအပတ်အတွင်း ထုတ်ပြန်ခဲ့ချိန်နှင့် တိုက်ဆိုင်လျက်ရှိသည်။

အကျဉ်းထောင်၊ ရဲစခန်း သို့မဟုတ် စစ်တပ်စစ်ကြောရေးစခန်းများ၌ ထိန်းသိမ်းခံထားရစဉ် သေဆုံးသူအနည်းဆုံး ၇၃ ဦး ရှိသည်ဟု နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့က ဖော်ထုတ်ရရှိသော်လည်း ၎င်းမှာ လုံခြုံရေးတပ်ဖွဲ့များ၏ ဖမ်းဆီးခံရပြီး မကြာမီအသတ်ခံရသည်ဟု ယုံကြည်ရသော လူ ၇၀၀ နီးပါးအနက် ရာခိုင်နှုန်းအနည်းငယ်မျှသာ ဖြစ်သည်။

“လူအခွင့်အရေးစောင့်ကြည့်ရေးအဖွဲ့က မှတ်တမ်းတင်ထားတဲ့ သေဆုံးသူ ၆ ယောက်ဆိုတာ မြန်မာစစ်တပ်နဲ့ ရဲတပ်ဖွဲ့ရဲ့ ထိန်းသိမ်းနှိပ်စက်ခြင်းကို ခံစားခဲ့ရသူ အများအပြားအနက် ကနဦးပေါ်ထွက်လာတဲ့ အစွန်းအထွက် ပမာဏလေးမျှသာ ဖြစ်ပါတယ်” ဟု မရတနာမောင်ကဆိုသည်။

အများအပြားမှာ ညဖက်အချိန်၌ ဖမ်းဆီးခံခဲ့ရခြင်းဖြစ်တာ ရိုက်နှက်၍နှိပ်စက်ခံရမည်ကို မိသားစုများက စိုးရိမ်လျက်ရှိပြီး “သက်သေဖျောက်ဖျက်ရန် ရည်ရွယ်ချက်ဖြင့်” အချို့အလောင်းများကို ချက်ခြင်းမီးသင်္ဂြိုလ်ခဲ့ဖွယ်ရှိ သည်ဟု သတင်းများကဆိုသည်။

၎င်းဖမ်းဆီးခံရသူများအနက်တစ်ဦးမှာ အာဏာသိမ်းမှုဆန့်ကျင်ရေးကို ထောက်ခံသည့် Facebook ပို့စ်တစ်ခုကို မျှဝေသောကြောင့် “သတင်းအတုများ” ဖြန့်ဝေသည်ဟူသော စွပ်စွဲချက်ဖြင့် အဖမ်းခံခဲ့ရသော အသက် ၅၅နှစ်အရွယ် ဦးကျော်ဆွေငြိမ်းဖြစ်သည်။

“ကျွန်မအရမ်း စိတ်ပူတယ်။[သူ ထောင်ထဲမှာ သေဆုံးရတာဟာ] သွေးရိုးသားရိုး ဓမ္မတာအတိုင်းသေတာဆိုရင် ကျွန်မဖြေသာပါသေးတယ်။ ဒါပေမဲ့ ဘာကြောင့်မှန်းမသိရတော့ ကျွန်မစိတ်တွေ ဂယောက်ဂယက် ဖြစ်နေရတယ်” ဟု ၎င်း၏မိသားစုဝင်တစ်ဦးက လူ့အခွင့်အရေးစောင့်ကြည့်ရေးအဖွဲ့ကို ပြောသည်။

ထိန်းသိမ်းထားစဉ် သေဆုံးသွားသူနောက်တစ်ဦးမှာ အသက်၄၃ နှစ်အရွယ်ကဗျာဆရာ ခက်သီဖြစ်သည်။ “သူတို့က ခေါင်းကိုပစ်တယ်။ တော်လှန်ရေးက နှလုံးသားမှာရှိတာ သူတို့မသိကြဘူး” ဟူသော၎င်း၏ ရေးသားချက်မှာ စစ်အုပ်ချုပ်မှုဆန့်ကျင်ရေး၏ တိုက်ပွဲဝင်စာသားတစ်ခု ဖြစ်လာခဲ့သည်။

သေဆုံးသွားသူများ၏ ဓာတ်ပုံများကို ဆန်းစစ်အဖြေရှာရန် အရေးပေါ်ကုသရေးဆရာဝန် ဒေါက်တာ Rohini Haar နှင့်လည်း လူ့အခွင့်အရေးအဖွဲ့က မေးမြန်းဆွေးနွေးခဲ့သည်။

“အဆိုပါပုဂ္ဂိုလ်ငါးဦး သေဆုံးပြီးနောက် ဓာတ်ပုံများနှင့် ဗီဒီယိုများကို ကြည့်ရှုသည့်အခါ ၎င်းတို့၏ကိုယ်ခန္ဓာပေါ် တွင် ဒဏ်ရာအမှတ်အသားများကို တွေ့ရှိရပြီး အဆိုပါပုဂ္ဂိုလ်များသည် အပြင်းအထန် ခံစားခဲ့ရကာ ညှင်းပန်း နှိပ်စက်မှုများဖြစ်ပွားခဲ့ကြောင်း အထင်အရှားတွေ့ရှိရသည်” ဟု Dr Haar ၏အစီရင်ခံစာတွင်ဖော်ပြသည်။

“ညှင်းပန်းနှိပ်စက်ခံထားရသည့် လက္ခဏာအများအပြားတွေ့ရှိရကာ မည်သည့်ဒဏ်ရာကြောင့် ၎င်းတို့သေဆုံး ခဲ့ရသည်ကို အတိအကျပြောဆိုရန် ခဲယဉ်းသည်” ဟုလည်းဆက်လက်ရေးသားသည်။

မြန်မာစစ်တပ် သတင်းပြန်ကြားရေးဌာနသို့ ABC ကဆက်သွယ်မေးမြန်းခဲ့သော်လည်း နောက်ဆုံးအချိန်အထိ ပြန်လည်ဖြေဆိုခဲ့ခြင်းမရှိပါ။

ရက်စက်သော အကြမ်းဖက်မှုများရှိသည်ဟူသော စွပ်စွဲမှုများကို မှတ်တမ်းတင်နေသည့်အချိန်၌ သြစတြေးလျအစိုးရ၏ ငွေကြေးသုံးစွဲမှုကိစ္စအကြောင်း ကြားသိရခြင်းမှာ စိတ်မချမ်းမြေ့စရာဖြစ်သည် ဟု လူ့အခွင့်အရေး စောင့်ကြည့်ရေးအဖွဲ့မှ မရတနာမောင်က ဆိုသည်။

“ဒီကိစ္စက ထိတ်လန့်တုန်လှုပ်စရာကောင်းပါတယ်။ စစ်တပ်ရဲ့ဘဏ္ဍာတိုက်ကို ရွှေချပေးနေမယ့်အစား ဩစတြေးလျဟာ အခြားသဘောထားတူညီတဲ့ အစိုးရတွေနဲ့အတူ ဒီအပြစ်သားတွေကို ပိုပြီးချမ်းသာမသွားစေအောင် ပိတ်ဆို့ အရေးယူမှုတွေ ဆောင်ရွက်နေရမှာဖြစ်ပါတယ်” ဟုသူမကပြောကြားသည်။

“ဩစတြေးလျဟာ အပြောတစ်မျိုး အလုပ်တစ်မျိုးနဲ့ အတော့်ကို တလွဲတချော်ဖြစ်နေတဲ့အချက်ကို သိလိုက်ရတာ မြန်မာပြည်သူတွေအတွက် အလွန်အမင်းကို ထိခိုက်နာကျင်ခံစားရပါတယ်” ဟု ၎င်းကဆက်လက်ပြောဆိုသည်။

(ABC NEWS ပါ Erin Handley ၏ “Australian government reveals $2.5 million spend at Myanmar military-linked hotels in bloody aftermath of coup” ဆောင်းပါးကို ဆီလျှော်အောင် ဘာသာပြန်ဆိုထားခြင်း ဖြစ်ပါသည်)။ khit thit

မြောင်မြို့နယ်၌ စစ်တပ်ကပစ်ခတ်သည့် လက် နက်ကြီးကျည်ထိမှန်ပြီး စစ်ရှောင်အဘွားအို ၁ ဦးသေဆုံး

စစ်ကိုင်းတိုင်း၊ မြောင်မြို့နယ်၊ နနွမ်းကိုင်းကျေးရွာကို စက်တင်ဘာ ၁၆ ရက် မနက် ၄ နာရီလောက်က စစ်ကောင်စီတပ်က လက်နက်ကြီး ၊ လက်နက်ငယ်တွေနဲ့ ပစ်ခတ်ဝင်ရောက် စစ်ကြောင်းထိုးလာရာမှာ အသက် ၇၀ အရွယ် အဘွားအိုတယောက် လက်နက်ကြီးကျည်ထိမှန် သေဆုံးသွားတယ်လို့ ဒေသခံတွေထံက သိရပါတယ်။

အဲ့ဒီ မနက်က မြောင်မြို့နယ် ကျောက်ရစ်ရဲစခန်းမှာ တပ်စွဲထားတဲ့ စစ်ကောင်စီတပ်ဖွဲ့က နနွမ်းကိုင်းကျေးရွာကို လက်နက်ကြီး ၊ လက်နက်ငယ်တွေနဲ့ တရစပ် ပစ်ခတ် ဝင်ရောက်လာတာကြောင့် သေဆုံးသူဟာ ကျေးရွာဘုန်းကြီးကျောင်းမှာ ပုန်းခိုနေစဉ် လက်နက်ကြီးထိမှန်ခဲ့တာ ဖြစ်ပါတယ်။

ဒေသခံတစ်ဦးက “ရွာကို ပစ်ဝင်လာတော့ ဘေးလွတ်ရာကို ပြေးကြလွှားကြရင်း ဘုန်းကြီးကျောင်းဝင်းထဲ ပုန်းခိုနေတဲ့ သက်ကြီးရွယ်အိုတယောက် မျက်နှာရော ဗိုက်မှာပါ လက်နက်ကြီး ကျည်စထိမှန်သေဆုံးသွားတာပါ။ အခုတလော ဒီနယ်ဘက်ကို မကြာခဏ စစ်ကောင်စီတပ်က စစ်ကြောင်းဝင်တာတွေ ရှိနေတယ်” လို့ ပြောပါတယ်။

သေဆုံးသွားတဲ့ အဘွားအိုဟာ နနွမ်းကိုင်းကျေးရွာနေ အသက် ၇၀ အရွယ် ဒေါ်ကြည်တင်ဖြစ်ပြီး စစ်ကောင်စီတပ်ဖွဲ့က နနွမ်းကိုင်းကျေးရွာကို တိုက်ပွဲတစုံတရာမရှိပဲ ပစ်ခတ်ဝင်ရောက်လာတာလို့ ဆိုပါတယ်။

မြောင်မြို့နယ် ပြည်သူ့ကာကွယ်ရေးနှင့် လုံခြုံရေးတပ်ဖွဲ့ ( CDSOM ) မှ တာဝန်ရှိသူက “တိုက်ပွဲဖြစ်ပွားတာမျိုးတော့မရှိဘူးဗျ။ သူတို့က အ ကြောင်းမဲ့ ရမ်းသန်းပစ်ခတ်တာ။ အခုလထဲ ဒီတိုင်းပဲ ညဘက်ထွက်လာပြီး မနက်အစောပိုင်းဝင်ပြီးတာနဲ့ ပြန်ထွက်လာ၊ အဲလိုချည်းပဲ”လို့ ပြောပါတယ်။

ပြီးခဲ့တဲ့ ဩဂုတ် ၃၁ ရက်ကလည်း မြောင်မြို့နယ်ရှိ နနွမ်းကိုင်းကျေးရွာအပါဝင် သနပ်ကုန်းနဲ့ ကျောက်ရစ်ကျေးရွာတို့ကို စစ်ကောင်စီတပ်ဖွဲ့က ရေကြောင်းနဲ့ ဝင်ရောက်လာပြီး ဆက်တိုက်စစ်ကြောင်းထိုးခဲ့ပါတယ်။ DVB

« Older Entries