Monthly Archives: Sep 2022

ဒီပဲယင်း လက်ယက်ကုန်းကျေးရွာ စာသင် ကျောင်းကို စစ်တပ်က ရဟတ်ယာဉ်ဖြင့် ပစ် ခတ်မှုကြောင့် ကလေးငယ် ၆ ဦးသေဆုံးမှု စစ်ရာဇဝတ်မှုမြောက်ဟု NUG ထုတ်ပြန်

စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းကျေးရွာရှိ စာသင်ကျောင်းကို အကြမ်းဖက်စစ်ကောင်စီ၏ လေကြောင်းမှတဆင့် ပစ်ခတ်တိုက်ခိုက်မှုကြောင့် ကလေးငယ် ၆ ဦးသေဆုံးပြီး အများအပြား ဒဏ်ရာရရှိမှုကို အမျိုးသားညီညွတ်ရေးအစိုးရ NUG က ပြင်းထန်စွာ ရှုတ်ချပြီး စစ်ကောင်စီက ဖမ်းဆီးသွားသည့် ကျောင်းသားများနှင့် ဆရာ၊ ဆရာမများကို မည်သည့်အန္တရာယ်မှ မကျရောက်စေဘဲ အမြန်ဆုံးပြန်လွှတ်ရန်လိုအပ်ကြောင်း NUG အမျိုးသမီး၊ လူငယ်နှင့် ကလေးသူငယ်ရေးရာ ဝန်ကြီးဌာနက စက်တင်ဘာလ ၁၈ ရက် ယနေ့ ထုတ်ပြန်လိုက်သည်။

စက်တင်ဘာလ ၁၆ ရက်တွင် အကြမ်းဖက်စစ်ကောင်စီ၏ လေကြောင်းတိုက်ခိုက်မှုကြောင့် ဒီပဲယင်းမြို့နယ်၊ လက်ယက်ကုန်းကျေးရွာရှိ ဒေ သခံများ ကိုယ်ထူကိုယ်ထ ဖွင့်လှစ်ထသော စာသင်ကျောင်းတွင် စာသင်နေသည့် ကလေး ၆ ဦးသေဆုံးကာ အများအပြား ဒဏ်ရာရခဲ့ပြီး စစ်ကောင်စီ၏ မြေပြင်တပ်ဖွဲ့များသည် ကျောင်းတွင်းပိတ်မိနေခဲ့သော ကျောင်းသား/ကျောင်းသူများနှင့် ဆရာ/ဆရာမ စုစုပေါင်း ၂၀ ဦးခန့်ကို ရေဦးမြို့နယ်ဘက်သို့ ဖမ်းဆီးသွားကြောင်း သိရှိရသည်။

စာသင်ကျောင်းများကို ပစ်မှတ်ထားတိုက်ခိုက်သည့် စစ်ကောင်စီ၏ လုပ်ရပ်သည် လူမဆန်သည့်၊ ကြမ်းကြုတ်သည့် စစ်ရာဇဝတ်မှုဖြစ်ပြီး အဆိုပါ ဆိုးရွားသည့် လူ့အခွင့်အရေးချိုးဖောက်မှုများကို NUG က အသေးစိတ် မှတ်တမ်းတင်ထားကြောင်း၊ တရားမျှတမှုကို နည်းလမ်းအမျိုးမျိုးဖြင့် ဖော်ဆောင်နိုင်ရန် တစိုက်မတ်မတ် ကြိုးပမ်းဆောင်ရွက်လျှက်ရှိသည်ဟု ဆိုသည်။

ကလေးသူငယ်များ၏ ပညာရေးအခွင့်အရေး (Right to Education) ကို ဆိုးရွာစွာ ချိုးဖောက်မှု၊ စာသင်ကျောင်းများကို ပစ်မှတ်ထားတိုက်ခိုက်သည့် စစ်ရာဇဝတ်မှုများအတွက် တရားမျှတမှု ဖော်ဆောင်ရာတွင် နိုင်ငံတကာအသိုင်းအဝိုင်းအနေဖြင့်လည်း အားဖြည့်ပံ့ပိုးရန် တာဝန်ရှိကြောင်း NUG အမျိုးသမီး၊ လူငယ်နှင့် ကလေးသူငယ်ရေးရာ ဝန်ကြီးဌာနက ထုတ်ပြန်ထားသည်။ khit thit

နွေဦးတော်လှန်ရေးအတွက် မဲဆောက်ဈေးအတွင်း ရွှေ့ပြောင်းအလုပ်သမားများ အလှူခံ 

နွေဦးတော်လှန်ရေးအတွက်ကူညီထောက်ပံ့ပေးဖို့ ထိုင်း-မြန်မာနယ်စပ်ရောက် ရွှေ့ပြောင်းမြန်မာ လုပ်သားတွေက စက်တင်ဘာ ၁၈ ရက် ဒီနေ့မနက် မဲဆောက်မြို့ဈေး အတွင်းမှာ အလှူခံထွက်ခဲ့ကြပါတယ်။

ဒီနေ့ တနင်္ဂနွေနေ့မှာ စက်ရုံအလုပ်ရုံတွေပိတ်ရက် ဈေးဝယ်ထွက်ကြတဲ့ ရွှေ့ပြောင်း မြန်မာအလုပ်သမားတွေဟာ နွေဦးတော်လှန်ရေးအတွက် စိတ်ဝင်တစား အလှူငွေတွေထည့်ခဲ့ကြပြီး တော်လှန်ရေး အမြန်အောင်မြင်စေကြောင်း  ဆုတောင်းပေးသွားကြပါတယ်။

နွေဦးတော်လှန်ရေးအောင်မြင်တဲ့အထိ တတ်နိုင်တဲ့ဘက်ကနေ ကူညီပေးသွားမှာဖြစ်ပြီး ရလာတဲ့ အလှူငွေတွေကို စစ်အာဏာရှင်ဆန့်ကျင်တော် လှန်နေကြတဲ့ PDF ရဲဘော်တွေနဲ့ ပြည်တွင်းစစ်ရှောင်တွေအတွက် လိုအပ်သလို ခွဲဝေလှူဒါန်းသွားမယ်လို့  အလှူခံအဖွဲ့တာဝန်ရှိသူတဦးက ပြောပါတယ်။ DVB

သထုံမြို့နယ်တွင် စစ်ကောင်စီတပ် ပစ်ခတ်မှုကြောင့် အမျိုးသမီး ၂ ဦး ဒဏ်ရာရ

မွန်ပြည်နယ်၊ သထုံမြို့နယ်၊ ဝမ်းဘဲအင်းကျေးရွာမှာ မိုင်းဆွဲတိုက်ခိုက်ခံရတဲ့ စစ်ကောင်စီတပ်က ကျေးရွာအတွင်း ဝင်ရောက်ပြီး လက်နက်ငယ်တွေနဲ့ ပစ်ခတ်ခဲ့တာကြောင့် အမျိုးသမီး ၂ ဦး ဒဏ်ရာတွေ ရရှိခဲ့တယ်လို့ KNU သထုံခရိုင်က ထုတ်ပြန်ပါတယ်။

ပြီးခဲ့တဲ့ စက်တင်ဘာ ၁၆ ရက်နေ့က တပ်အင်အား ၈၀ လောက်ပါတဲ့ စစ်ကောင်စီတပ်ဟာ ပိန္နဲတောစစ်ကောင်စီစခန်းကနေ ဝီယော်စခန်းကိုအပြန်လမ်းမှာ KNLA တပ်ရင်း (၂) ပူးပေါင်းတပ်ဖွဲ့တွေက မိုင်းဆွဲတိုက်ခိုက်ခဲ့တာကြောင့် စစ်ကောင်စီတပ်သား ၂ ဦး သေဆုံးပြီး ၂ ဦး ဒဏ်ရာရရှိခဲ့တာပါ။

အဲဒီနောက်မှာတော့ စစ်ကောင်စီတပ်ဖွဲ့ဝင်တွေဟာ ဝမ်းဘဲအင်းကျေးရွာအတွင်း လက်နက်ငယ်တွေနဲ့ ဝင်ရောက်ပစ်ခတ်ခဲ့တာကြောင့် ကျေး ရွာ နေသူ နော်ဆာမိရဲ့ ညာဖက်ရင်သား ထိမှန်ခဲ့ပြီး သမီးဖြစ်သူ နော်မူမူအေးမှာလည်း ဘယ်ဖက်တင်ပါးနဲ့ ဘယ်ခြေသလုံးတို့မှာ သေနတ် ထိမှန်ခဲ့တာပါ။

မိုင်းဆွဲတိုက်ခိုက်ခံရပြီး အထိနာခဲ့တဲ့ စစ်ကောင်စီတပ်က ကျေးရွာအတွင်း ဝင်ရောက်ပစ်ခတ်မှုကြောင့် အမျိုးသမီး ၂ ဦး ထိမှန် ဒဏ်ရာရရှိခဲ့သလို အိမ်စီးကား Probox ကားတစ်စီးနဲ့ ဘီဒို ၂ လုံး ထိမှန် ပျက်စီးခဲ့တယ်လို့ KNU သထုံခရိုင်ရဲ့ ထုတ်ပြန်ချက်မှာ ဖော်ပြထားပါတယ်။

ကရင်အမျိုးသားအစည်းအရုံး KNU တပ်မဟာ(၁) ထိန်းချုပ်နယ်မြေဖြစ်တဲ့ သထုံခရိုင်ထဲမှာတော့ တိုက်ပွဲမရှိဘဲ စစ်ကောင်စီတပ်ဟာ ကျေး ရွာထဲ လက်နက်ကြီး ပစ်ခတ်တာ၊ ဒေသခံတွေကို ခေါ်ယူခြိမ်းခြောက်တာတွေ ဆက်တိုက်လုပ်ဆောင်နေတာပါ။

လက်ရှိမှာတော့ သထုံခရိုင်ထဲမှာ စစ်ကောင်စီတပ်က စစ်ရေးဝင်ရောက် လှုပ်ရှားနေတာကြောင့် ကရင်အမျိုးသားလွတ်မြောက်ရေးတပ်မ တော် KNLA ပူးပေါင်းတပ်တို့ကြား နှစ်ဖက် စစ်ရေး ဆက်လက်တင်းမာနေပါတယ်။ DVB

တန့်ဆည်တွင် စိတ်ဝေဒနာရှင်ကို စစ်တပ်က ပစ်ခတ် မီးရှို့သတ်ဖြတ်၊ လှည်ကူး၊ မုံရွာ၊ ကျောက်ကြီးမြို့များတွင်လည်း စစ် တပ်၏ သတ်ဖြတ်မှုကြောင့် ပြည်သူ ၃ ဦးသေဆုံး

စစ်ကိုင်းတိုင်း၊ တန့်ဆည်မြို့နယ်၊ အောင်ချမ်းသာကျေးရွာတွင် စိတ်ဝေဒနာရှင်တစ်ဦးကို စစ်တပ်က ပစ် ခတ် မီးရှို့သတ်ဖြတ်လိုက်ကြောင်း ဒေသခံများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။

စက်တင်ဘာလ ၁၇ ရက်နေ့တွင် စစ်ကောင်စီ၏ တပ်မ ၃၃ တပ်က စစ်ကိုင်း တိုင်း၊ တန့်ဆည်မြို့နယ် အောင်ချမ်းသာ ကျေးရွာကို စစ်ကြောင်းထိုးခဲ့ကြောင်း၊ ယင်းသို့ စစ်ကြောင်းထိုးစဉ် ကျေးရွာတွင် စိတ်မနှံ့၍ မပြေးဘဲ ပြေးလွှားကခုန်နေသူ စိတ်ဝေဒနာရှင်တစ်ဦးကို စစ်တပ်က ဖမ်းဆီးသတ်ဖြတ် မီးရှို့လိုက်ကြောင်း ၊ ယင်းနောက် အောင်ချမ်းသာ ကျေးရွာမှ နေအိမ်များကိုလည်း စစ်တပ်က မီးတင်ရှို့သွားကြောင်း သိရှိရသည်။

“စိတ်ကျန်းမာရေးမကောင်းသူကို စစ်တပ်က နားထင်တေ့ပစ်သတ်တာ။ မနေ့က အောင်ချမ်းသာမှာရှိတဲ့ ပြည်သူပိုင် နေအိမ်၁၂လုံး မီးရှို့သွားတယ်။ အရင်တစ်ခါကလည်း စစ်တပ်က အိမ်ခြေ ၁၀၃ လုံးကို မီးရှို့ပြီးသားပါ။ ဘာမှ ကျန်တော့ဘူး” ဟု တန့်ဆည်ဒေသခံတစ်ဦးက ပြောဆိုသည်။

အလားတူ စက်တင်ဘာလ ၁၆ ရက်နေ့ ရန်ကုန်တိုင်း လှည်းကူးမြို့နယ် ဒါးပိန်တွင် ဘေးတွဲဆိုင်ကယ် တစ်စီးကို စစ်ကားဖြင့် ရည်ရွယ်ချက်ရှိရှိ တိုက်ခိုက်သတ် ဖြတ်မှု ဖြစ်ပွားခဲ့ပြီး ဘေးတွဲဆိုင်ကယ်မှ ဆိုင်ကယ်မောင်းသူ ပွဲချင်းပြီး သေဆုံးခဲ့ကြောင်း ဒေသခံများက ပြောဆိုသည်။

“ဆားတလင်း-ဒါးပိန်ကားလမ်းပေါ်မှာ စစ်ကားက ဘေးတွဲဆိုင်ကယ်ကို တမင်ဝင်တိုက်ပစ်တာ။ တစ်ယောက် ပွဲချင်းပြီးသေတယ်။ တစ်ယောက် ဆေးရုံရောက်တာ။ စစ်ခွေးကားက ဘေးတွဲဆိုင်ကယ်ပိုင်ရှင်မိသားစုဆီက အလျော်ထပ်တောင်းတယ်။ ဒါးပိန်မှာ ခွေးတွေ လူပါးဝနေတယ်။ သူတို့ခွေးကားနဲ့တိုက်မိတာလို့ သတင်းထွက်ရင် ဒါးပိန်မြို့ခံတွေ မလွယ်ဘူးလို့လည်း ကြိမ်းဝါးပါသေးတယ်” ဟု ဒေသခံတစ်ဦးက ဆို သည်။

ထို့ပြင် စစ်ကိုင်းတိုင်း၊ မုံရွာမြို့နယ် ၊ သပြေတောကျေးရွာတွင် စက်တင်ဘာလ ၁၄ ရက်နေ့ ည ၁၀ နာရီ ၃၀ မိနစ်အချိန် စစ်တပ်က ပစ်ခတ်ဝင်ရောက်စီးနင်းခဲ့ပြီး အမျိုးသားတစ်ဦးကို ဖမ်းဆီးသွားခဲ့ကြောင်း၊ ပြည်သူပိုင်ပစ္စည်းများကို လု ယက်ယူဆောင်သွားခဲ့ကြောင်း၊ ယင်းနောက် ညပိုင်း စစ်တပ်က ဖမ်းဆီးသွားခဲ့သော ပြည်သူ ၁ ဦး၏ အလောင်းကို စက်တင်ဘာလ ၁၅ ရက်နေ့ သပြေတော ရွာထိပ် ၊သပြေတောရွာဘုန်းကြီး ကျောင်း၏ တောင်ဘက်ပြောင်းခင်းဘေးတွင်နှိပ်စက်သတ်ဖြတ်ဒဏ်ရာနှင့်သေဆုံးနေသည်ကို တွေ့ရကြောင်း ဒေသခံများက ရန်ကုန်ခေတ် သစ်သတင်းဌာနထံသို့ ပြောဆိုသည်။

အလားတူ ပဲခူးတိုင်း၊ ကျောက်ကြီးမြို့နယ်၊ ရွာကြီးအင်းအုပ်စု၊ အနောက် တောင် စုရွာမှ အသက် ၄၀ နှစ်အရွယ် ဒေါ်နော်သူးလေဖောသည် စက် တင်ဘာ ၁၇ ရက်နေ့ စစ်တပ်က ပစ်ခတ်သော လက်နက်ကြီးကျည်ထိမှန်၍ ပွဲချင်းပြီး သေဆုံးသွားကြောင်း ကျေးရွာဒေသခံများက ရန်ကုန်ခေတ်သစ်သတင်းဌာနထံသို့ ပြောဆိုသည်။

“စစ်တပ်က ရွာထဲမှာ ဘယ်သူမှ မနေရဘူးဆိုပြီး ပြောင်းခိုင်းတယ်။ ရွာမှာ ကျွဲနွား ဝက်တွေ များတော့ မပြောင်းဘဲ ရွာနားက တောထဲမှာပဲနေပြီး အိမ်ကကျွဲနွားဝက်တွေကိုစောင့်ရှောက်ကြတာပေါ့။ မနေ့က ဝက်စာကျွေးဖို့ပြန်လာလာပြီး စားစရာ ဆန်အနည်းငယ်ယူပြီးပြန်တဲ့အချိန်မှာ စစ်တပ်က ပစ်လိုက်တဲ့ လက်နက်ကြီးကျဉ်ထိမှန်တာ။ သူ့သားက အရှေ့က သွားတာ။ နော်သူးလေဖောက နောက်ကနေ လိုက်တာ။ နော်သူးလေဖောရဲ့ ဇက်နဲ့ကျောကုန်းကို လက် နက် ကြီးမှန်ပြီး ပွဲချင်းပြီး ဆုံးတယ်” ဟု ဒေသခံတစ်ဦးက ပြောဆိုသည်။ khit thit

မြန်မာစစ်တပ်၏ လက်နက်ကြီးပစ်ခတ်မှု ဘင်္ဂလားဒေ့ရှ်က ကုလကိုတိုင်တန်းနိုင်

ရခိုင်ပြည်နယ်မြောက်ပိုင်းတွင် ဖြစ်ပွားနေသော တိုက်ပွဲများအတွင်း မြန်မာစစ်တပ်က ပစ်ခတ်သော လက်နက်ကြီးကျည်များ ဘင်္ဂလားဒေ့ရှ်နိုင်ငံဘက်သို့ ကျရောက်ပေါက်ကွဲသဖြင့် လူသေဆုံးမှုရှိလာရာ အခြေအနေတင်းမာနေကြောင်း ဒါကာမှလာသော သတင်းများက ဆိုသည်။

မြန်မာစစ်တပ်အနေဖြင့် လက်နက်ကြီးများဆက်လက် ပစ်ခတ်နေပါက ကုလသမဂ္ဂကို တိုင်တန်းသွား မည်ဖြစ်ကြောင်း ဘင်္ဂလားဒေ့ရှ်နိုင်ငံ ပြည်ထဲရေးဝန်ကြီး Asaduzzaman Khan Kamal က ပြောကြား သည်ဟု DhakaTribune သတင်းစာက ယမန်နေ့ (စက်တင်ဘာ ၁၇) တွင် ရေးသားသည်။

နယ်စပ်စည်းမျဉ်း ချိုးဖောက်မှုများအတွက် နိုင်ငံခြားရေးဝန်ကြီးဌာနမှတဆင့် အကြိမ်ကြိမ် သတိပေး ပြီးဖြစ်သော်လည်း မြန်မာဘက်က အလေးမထားကြောင်း ဘင်္ဂလားဒေ့ရှ် ပြည်ထဲရေးဝန်ကြီးက ယမန် နေ့တွင် ထုတ်ဖော်ပြာဆိုသည်။

“သူတို့နိုင်ငံထဲမှာဖြစ်တဲ့ ပဋိပက္ခက သူတို့နယ်မြေထဲမှာပဲ ဖြစ်သင့်တယ်။ နောက်တစ်ကြိမ်တော့ မြန်မာ ဘက်က သတိထားမယ်လို့ မျှော်လင့်ပါတယ်” ဟု ၎င်းက ပြောသည်။

လွန်ခဲ့သည့် သောကြောနေ (စက်တင်ဘာ ၁၆) နေ့တွင် ဘင်္ဂလားဒေ့ရှ်နိုင်ငံထဲသို့ လက်နက်ကြီးကျည် ကျရောက်ပေါက်ကွဲရာ အနည်းဆုံး လူတစ်ဦးသေဆုံးကာ ခြောက်ဦးအပြင်းအထန် ဒဏ်ရာရခဲ့ကြောင်း သိရသည်။

ဘင်္ဂလာဒေ့ရှ်အနေဖြင့် မြန်မာနှင့် စစ်မဖြစ်လိုကြောင်း၊ သံတမန်ရေးနည်းအရသာ ငြိမ်းချမ်းစွာဖြေရှင်း သွားမည်ဖြစ်ကြောင်းလည်း ဘင်္ဂလားဒေ့ရှ် ပြည်ထဲရေးဝန်ကြီးက ပြောသည်။

၂၁၀၇ ခုနှစ်က စတင်ဖြစ်ပွားခဲ့သော ရိုဟင်ဂျာအရေးနှင့် ပတ်သက်၍၍ ဘင်္ဂလားဒေ့ရှ်နှင့် မြန်မာ အကြား သံတမန်ရေးအခြေအနေ တင်းမာခဲ့ဖူးသည်။ စစ်တပ်၏ နယ်မြေရှင်းလင်းရေး စစ်ဆင်ရေး များကြောင့် သိန်းနှင့်ချီသော ရိုဟင်ဂျာများ ဘင်္ဂလားဒေ့ရှ်နိုင်ငံဘက်ခြမ်းကို ထွက်ပြေးခိုလှုံခဲ့ရပြီး အဆိုပါကိစ္စအပေါ် ယနေ့အထိ နှစ်နိုင်ငံအငြင်းပွားနေဆဲဖြစ်သည်။

လက်တလော ရခိုင်ပြည်နယ်မြောက်ပိုင်းတွင် အာဏာသိမ်းမြန်မာစစ်တပ်နှင့် ရက္ခိုင့်တပ်တော် (AA) တို့ တကျော့ပြန် တိုက်ပွဲများဖြစ်ပွားနေ သည်။ ပြီးခဲ့သည့်လတွင် စစ်ကောင်စီ၏ တိုက်လေယာဉ်နှင့် ရဟတ် ယာဉ်များ ဘင်္ဂလားဒေ့ရှ်နိုင်ငံဘက်ခြမ်းကို ကျူးကျော်ပျံသန်းခြင်း၊ လက် နက်ကြီးကျရောက်ပေါက်ကွဲ ခြင်းများကြောင့် ဘင်္ဂလားဒေ့ရှ်အစိုးရက ဒါကာရှိ မြန်မာသံအမတ်ကိုဆင့်ခေါ်ကာ နှစ်ကြိမ်ထက်မနည်း သတိ ပေးခဲ့သည်။

ယင်းသို့သတိပေးသော်လည်း လက်နက်ကြီးကျည်များ ဆက်လက်ကျရောက်နေပြီး လူသေဆုံးအထိ ဖြစ်လာသောကြောင့် ကုလသမဂ္ဂအထိ တိုင်တန်းသွားရန်ရှိကြောင်း ဘင်္ဂလားဒေ့ရှ် ပြည်ထဲရေးဝန်ကြီး ကိုယ်တိုင် ထုတ်ဖော်ပြောလာခြင်းဖြစ်သည်။

မြန်မာစစ်တပ်က နယ်စပ်စည်းမျဉ်းကျော်ကာ လေကြောင်းပျံသန်းမှုနှင့် လက်နက်ကြီးပစ်ခတ်မှုများ ကျူးလွန်နေခြင်းဖြစ်ကြောင်း ဘင်္ဂလားဒေ့ရှ်အစိုးရ အခိုင်အမာ ဆိုပြီးဖြစ်သော်လည်း တစ်ဖက်နိုင်ငံထဲ သို့ လက်နက်ကြီးကျရောက်ခြင်းမှာ AA နှင့် ARSA တို့၏ လက်ချက်ဖြစ် ကြောင်း စစ်ကောင်စီက တုံ့ပြန်သည်။

နယ်စပ်ခြံစည်းရိုးအနီးရှိ လုံခြုံရေးကင်းစခန်းများကို AA နှင့် ARSA အဖွဲ့ ပူးပေါင်းတိုက်ခိုက်နေခြင်း ဖြစ်ကြောင်းလည်း စစ်ကောင်စီက ယနေ့ထုတ် နိုင်ငံပိုင်သတင်းစာများမှတဆင့် စွပ်စွဲပြောဆိုသည်။

၂၀၁၅ ခုနှစ်က ကိုးကန့်လက်နက်ကိုင်အဖွဲ့နှင့် တိုက်ပွဲများအတွင်း မြန်မာစစ်တပ်က ပစ်ခတ်သော လက်နက်ကြီးကျည်များ တရုတ်နိုင်ငံဘက်ခြမ်းသို့ ကျရောက်ပေါက်ကွဲသဖြင့် လေတပ်အဆင့်မြင့် အရာရှိတစ်ဦးကို ရာထူးမှဖယ်ရှားခဲ့ရသည့်အပြင် တရုတ်အစိုးရကို အလျော်ပေးခဲ့ရဖူးသည်။

ထို့ပြင် ယခုနှစ် ဇွန်လအတွင်းက ကရင်ပြည်နယ် မြဝတီမြို့နယ်နယ်၌ တော်လှန်ရေးအင်အားစုများနှင့် တိုက်ပွဲများဖြစ်စဉ် မြန်မာစစ်တပ်၏ တိုက်လေယာဉ်များ ထိုင်းနိုင်ငံလေပိုင်နက်ကို ကျူးကျော်ပျံသန်း ခြင်းနှင့် လက်နက်ကြီးကျည် ကျရောက်ပေါက်ကွဲခြင်းကြောင့် သတိပေးခံခဲ့ရသည်။

လက်ရှိတွင် ဘင်္ဂလားဒေ့ရှ်နယ်စပ်အနီး ရခိုင်ပြည်နယ်မြောက်ပိုင်းတွင AA နှင့် တိုက်ပွဲအပြင်းအထန် ဆက်ဖြစ်နေကာ လေကြောင်းနှင့်လက် နက် ကြီးပစ်ကူ အပါအဝင် အင်အားအလုံးအရင်းဖြင့် တိုက်ခိုက် နေသော်လည်း စစ်ကောင်စီဘက်က ထိခိုက်သေဆုံးမှုများ ရှိသည့်အပြင် စ ခန်းအချို့လည်း ဆုံးရှုံဂ ထားသည်။ myanmar now

လုံရှာယန်ရွာတွင် ရာသီတုပ်ကွေးနှင့် ဝမ်းလျောဝမ်းပျက်ရောဂါ ဖြစ်နေပြီး ဆေးဝါးအကူလိုအပ်

ကချင်ပြည်နယ် ပူတာအိုမြို့နယ် လုံရှာယန်ကျေးရွာမှာ ကလေးငယ်တွေနဲ့ လူကြီးအချို့ ရာသီတုပ်ကွေးနဲ့ ဝမ်းလျောဝမ်းပျက်ရောဂါ ဖြစ်ပွားနေပြီး  ဆေးဝါးကုသမှုအကူအညီ လိုအပ်နေတယ်လို့ သိရပါတယ်။

ကလေးငယ် အများစုနဲ့ လူကြီးအချို့ ရာသီတုပ်ကွေး နဲ့ ဝမ်းလျောဝမ်းပျက်ရောဂါ ဖြစ်နေကြပေမဲ့ ဆေးရုံ ဆေးခန်းတွေမှာ ဆေးကုသမှု မခံယူရဘဲ ဆေးမြီးတိုတွေနဲ့သာ ကုသနေရတယ်လို့ ဒေသခံတွေက ပြောပါတယ်။

“တုပ်ကွေးပုံစံမျိုးနဲ့ ဖျားနေတာက ကြာပြီ၊ သြဂုတ် လလောက်ကတည်းက စဖြစ်တာ။ ကလေး အများစု နဲ့ လူကြီးအချို့မှာ အဲ့လိုရောဂါတွေဖြစ်နေတာ။ အချို့ဆို ဝမ်းပျက် ဝမ်းလျော အဆစ်အမြစ်ကိုက်ပြီး လမ်းမလျောက်နိုင်တဲ့ပုံစံမျိုးဖြစ်သွားတယ်။ ဆေးခန်းမရှိတော့ ဆေးမြှီးတိုနဲ့ပဲ ကုသနေရတယ်” လို့ ဒေသခံ အမျိုးသားဦးက ပြောပါတယ်။

လုံရှာယာန်ကျေးရွာမှာ ဆေးရုံ ဆေးခန်း မရှိတဲ့အတွက်  တုပ်ကွေးရောဂါဝေဒနာ ခံစားနေရသူ အများစုဟာ ဆေးမြှီးတို၊ တိုင်းရင်းဆေးတွေနဲ့သာ ကုသနေရတာပါ။

“ကျေးရွာက ဖျားနာသူတွေ  မြို့ပေါ်နဲ့ဝေးတော့ ဆေးရုံဆေးခန်း မသွားနိုင်ဘူး။ ကျေးလက် ကျန်းမာရေးဆေးခန်း ရှိပေမယ့်လည်း စမ်းသပ်ကုသပေးမယ့်သူ (ဝန်ထမ်း)မရှိဘူး။ အဲ့ဒီတော့ တိုင်းရင်းဆေး (ဆေးမြစ်စုံ) ဆေးမြှီးတို စတာတွေနဲ့ ကုနေရတယ်။ အချို့လည်း ရောဂါ ပျောက်သွားတဲ့သူရှိသလို အချို့လည်း မပျောက်ဘူး” လို့ ဒေသခံ အမျိုးသမီးတဦးက ပြောပါတယ်။

တုပ်ကွေးရောဂါ ဖြစ်ပွားသူများပြားလာပြီး ဆေးဝါးမပြည့်စုံတဲ့အတွက် ကျန်းမာရေးနဲ့ ပတ်သက်ပြီး စောင့်ရှောက်ပေးဖို့ အဖွဲ့အစည်းတွေရဲ့ အကူအညီလို အပ်နေတယ်လို့လည်း ဆိုပါတယ်။

လုံရှာယာန်ကျေးရွာဟာ ပူတာအိုမြို့နဲ့ ၂၁ မိုင်ကျော် ဝေးကွာကာ ပြီးခဲ့တဲ့ ဖေဖာ်ဝါရီလက တိုက်ပွဲတွေဖြစ်ပွားခဲ့တဲ့အတွက် ဒေသခံတွေ ဘေးလွတ်ရာ တောတောင်တွေထဲ ရှောင်တိမ်းနေကြရပြီး ဧပြီလလောက်မှ ကျေးရွာကို ပြန်လည်ဝင်ရောက်နေထိုင်ခဲ့ကြရတာပါ။ DVB

ပူတင်ရှိခိုး ပြည်ပအားကိုး ပုဆိန်ရိုးခဲ့သော မင်းအောင်လှိုင်၏ ရုရှားခရီး 

မြန်မာနိုင်ငံသည် ကမ္ဘာ့အလယ်တွင် ဂုဏ်သိက္ခာရှိရွာ ရပ်တည်နိုင်ခဲ့သော နိုင်ငံဖြစ်သည်။ ဗြိတိသျှနယ်ချဲ့နှင့် ဖက်ဆစ်ဂျပန်တို့၏ သူ့ကျွန်ဘဝမှ လွတ်လပ်သော အချုပ်အခြာအာဏာပိုင် နိုင်ငံတစ်ခုဖြစ်ရန် ဗိုလ်ချုပ် အောင်ဆန်းနှင့် တိုင်းရင်းသားခေါင်းဆောင်ကြီးများ စုစည်းညီညွတ်စွာ ကြိုးပမ်းခဲ့ကြရသည်။​

လွတ်လပ်သော နိုင်ငံဖြစ်လာချိန် နိုင်ငံတကာဆက်ဆံရေးတွင် နိုင်ငံ၏ဥပဓိရုပ်နှင့် ဂုဏ်သိက္ခာမြင့်မားရေးကို တိုင်းပြုပြည်ပြု ခေါင်းဆောင်ကြီးများ လွန်စွာအလေးထားခဲ့သည်။ အင်အားကြီးနိုင်ငံဖြစ်၍ မျက်နှာချိုသွေး အောက်ကျို့ဆက်ခံခဲ့ခြင်း အလျင်းမရှိပေ။​

အိမ်နီးချင်းဖြစ်သော အိန္ဒိယဝန်ကြီးနေရူး၊ တရုတ်ဝန်ကြီးချုပ်ချူအင်လိုင်းတို့ ကဲ့သို့သော ခေါင်းဆောင်ကြီးများ ကပင် တလေးတစား ဆက်ဆံခြင်းခံခဲ့ရသော နိုင်ငံဖြစ်သည်။ နိုင်ငံငယ်များဖြင့် စုဖွဲ့ထားသော ဘက်မလိုက်အ သင်းကြီး စတင်တည်ထောင်ရန် ဦးဆောင်ကြိုးပမ်းခဲ့သည့်နိုင်ငံများတွင် မြန်မာပါဝင်ခဲ့သည်။

မြန်မာနိုင်ငံအနေဖြင့် ခေတ်အဆက်ဆက်တွင် အင်အားကြီးငယ်မရွေး ဘက်မလိုက်သော ကြားနေဆက်ဆံရေးမူ ဖြင့်သာ သိက္ခာရှိရှိ ရပ်တည်ခဲ့သည်။ တက်ကြွ၍ ဘက်မလိုက်သော နိုင်ငံခြားရေးမူဝါဒကို။ ကျင့်သုံးခဲ့သည်။ 

စစ်အာဏာရှင်ဟောင်းများဖြစ်သော ဦးနေဝင်းနှင့် ဦးသန်းရွှေတို့သည်ပင်လျှင် အင်အားကြီးနိုင်ငံ ခေါင်းဆောင် တစ်ဦးဦး၏ အရေးပေးထောက်ခံမှု ရရှိရေးမျှော်ကိုးကာ လူပုံအလယ် အလွန်အကျွံချီးမွမ်းခမ်းဖွင့်ခြင်း၊ မျက်နှာ လိုမျက်နှာရလုပ်ကာ အခြားနိုင်ငံများကို အပုပ်ချခြင်းမျိုး မလုပ်ခဲ့ကြပေ။ အမှန်စင်စစ် ထိုအပြုအမူမျိုးသည် အလွန်အောက်တန်းကျ ကျင့်ဝတ်သိက္ခာမဲ့ကာ သာမန်လူတစ်ဦးပင်လျှင် မပြုမူသင့်ပေ။

သို့သော် တိုင်းပြည်အာဏာကို အတင်းအဓမ္မလုယူထားပြီး သမ္မတလုပ်ချင်လွန်း၍ ဂနာမငြိမ်ဖြစ်နေသော မင်း အောင်လှိုင်သည် မြန်မာ့သမိုင်းတွင် အလွန်သိမ်ဖျင်းသော အပြုအမူကို မရှက်မကြောက်ပြုမူခဲ့သည်။ ရုရှားခရီး စဉ်အတွင်း လူပုံအလယ် ထိုသို့ပြုမူသည်ကို မြန်မာပြည်သူများသာမက ကမ္ဘာကပါ တွေ့မြင်ခဲ့ရသည်။

အပယ်ခံ မင်းအောင်လှိုင်ကို စင်တင်ခဲ့သော ပူတင်၏စီးပွားရေးဖိုရမ် 

မင်းအောင်လှိုင်အနေဖြင့် ရုရှားသမ္မတပူတင်နှင့် တွေ့ဆုံခွင့်ရသည့်အပြင် အရှေ့ဖျားစီးပွားရေးဖိုရမ်ကိုပါ တက် ရောက်ခွင့်ရသည့် ရုရှားခရီးစဉ်မှာ အာဏာသိမ်းပြီးနောက် တတိယအကြိမ်မြောက်ခရီးစဉ်ဖြစ်သည်။​ မိတ်ဆွေ နိုင်ငံများ၏ ထောက်ခံမှုလိုအပ်နေသော ပူတင်သည် အပယ်ခံမင်းအောင်လှိုင်ကို ဖိုရမ်တွင် စင်တင်ပေးခဲ့သည်။​

အရှေ့ဖျားစီးပွားရေး ဖိုရမ်ဆိုသည်မှာ  ရုရှားနိုင်ငံ၏အရှေ့ဖျားဒေသ စီးပွားရေးဖွံ့ဖြိုးတိုးတက်စေရေးနှင့် အာ တိတ်ဒေသ သယံဇာတရှာဖွေတူးဖော် ထုတ်လုပ်ရေးအတွက် နိုင်ငံခြားရင်းနှီးမြှုပ်နှံမှုများ ဆွဲဆောင်ရန် ပူတင် စီစဉ်သောပွဲဖြစ်သည်။ ရုရှားနိုင်ငံ၏ အရှေ့ဖက်ကမ်းရိုးတန်းရှိ ဗလာဒီဘော့စတော့ခ်မြို့တွင် နှစ်စဉ်ကျင်းပလာ သည်မှာ ၇ ကြိမ်ရှိပြီဖြစ်သည်။​

ယူကရိန်းနိုင်ငံကို ကျူးကျော်တိုက်ခိုက်ခြင်းကြောင့် ကမ္ဘာတဝန်း၏ ဝိုင်းဝန်းဒဏ်ခတ်ပိတ်ဆို့မှုများကို ရင်ဆိုင်နေ ရပြီး အပယ်ခံဖြစ်နေသည့် ရုရှားသမ္မတပူတင်အနေဖြင့် မိတ်ဆွေမရှားကြောင်း သက်သေပြရန် ထိုစီးပွားရေး ဖိုရမ်မှတဆင့် ကြိုးပမ်းခဲ့သည်ကို လေ့လာတွေ့ရှိရသည်။ 

ထိုဖိုရိမ်တက်ရောက်ခဲ့သော နိုင်ငံတကာ အဆင့်မြင့်ကိုယ်စားလှယ်အဖြစ် တရုတ်ပြည်သူ့ကွန်ဂရက် အမြဲတမ်း ကော်မတီဥက္ကဋ္ဌ၊ မွန်ဂိုလီးယားဝန်ကြီးချုပ်နှင့် အာမေးနီးယားဝန်ကြီးချုပ်တို့ သုံးဦးသာ လူကိုယ်တိုင်တက်ရောက် ခဲ့သည်။ ရုရှားနှင့်ဆက်ဆံရေး မကင်းသော အိန္ဒိယ၊ ဗီယက်နမ်နှင့် မလေးတို့က ကြိုတင်ရိုက်ကူးထားသော ဗီဒီယို မိန့်ခွန်းများသာ ပေးပို့ခဲ့ကြသည်။​

စစ်ကောင်စီ၏ ဝါဒဖြန့် မြန်မာ့အလင်း သတင်းစာကမူ နိုင်ငံပေါင်း ၉၀ ကျော်မှ ကိုယ်စားလှယ်များတက်ရောက် သည်ဟု ကြွားလုံးထုတ်သည်။ လေးရက်ကြာ ဖိုရမ်တွင် ရုရှားနိုင်ငံ အစိုးရဌာနအသီးသီးမှ အလယ်အလတ်အ ဆင့်ရှိ အရာရှိများ၊ စီးပွားရေးလုပ်ငန်းများမှ ဒါရိုက်တာများ၊ မီဒီယာများနှင့် ရုရှားတက္ကသိုလ်များမှ ပုဂ္ဂိုလ်များ သာ လွှမ်းမိုးထားခဲ့သည်။

မင်းအောင်လှိုင်၏ ဖော်လံဖား ပူတင်ချီးမွမ်းခန်းကို မြန်မာ့အလင်း ဆင်ဆာဖြတ်တောက် 

ရုရှားသမ္မတပူတင်သည် စီးပွားရေးဖိုရမ် တက်ရောက်လာသော အခြားဧည့်သည်များနည်းတူ မင်းအောင်လှိုင်ကို လည်း စက်တင်ဘာ ၇ ရက်တွင် လက်ခံတွေ့ဆုံသည်။

အာဏာသိမ်းမှုကြောင့် အဖက်လုပ်သူမရှိဖြစ်နေချိန် ပူတင်နှင့်တွေ့ခွင့်ရသဖြင့် မင်းအောင်လှိုင်မှာ အိန္ဒြေမဆည် နိုင်ဖြစ်နေသည်။ ရုရှားသည် ကမ္ဘာ့နံပါတ် ၁ နိုင်ငံဖြစ်ကြောင်း၊ ပူတင်သည် ရုရှားနိုင်ငံ၏ ခေါင်းဆောင်မျှသာမက ကမ္ဘာကြီးတည်ငြိမ်အေးချမ်းရေး ဦးဆောင်နေသည့် ကမ္ဘာ့ခေါင်းဆောင်အကြီး အလွန်အမင်း မြှောက်ပင့်ပြောဆို တော့သည်။ 

ရုရှားက ယူကရိန်းကို ကျူးကျော်စစ် ဆင်နွှဲသဖြင့် ကမ္ဘာ့ငြိမ်းချမ်းရေး ထိခိုက်ပျက်ပြားနေသည့် ပကတိအခြေအ နေနှင့် ဆန့်ကျင်ကာ လွန်လွန်ကျူးကျူး ဖော်လံဖားလိုက်ခြင်းဖြစ်သည်။​ မင်းအောင်လှိုင်၏ မြှောက်ပင့်ပြောဆိုမှု ကို ပူတင်ကလည်း ကျေနပ်အားရဟန်ရှိသည်။ ရုရှားသမ္မတရုံး၏ ထုတ်ပြန်ချက်တွင်လည်း မင်းအောင်လှိုင်ပြော ဆိုသည့်အတိုင်း ဖော်ပြထားသည်။​

ရုရှားသမ္မတရုံး ထုတ်ပြန်ချက်အဆုံးတွင် သမ္မတပူတင် ခွင့်ပြုမည်ဆိုပါက သူ့အနေဖြင့် ပြောချင်ပါသေးသည်ဟု အစချီကာ မင်းအောင်လှိုင်က ပူတင်ကို ခွင့်တောင်း၍ ယူကရိန်းအရေး ဆက်ပြောသည်။ သို့သော် ပြောဆိုချက် အပြည့်အစုံကိုမူ ဖော်ပြမထားပေ။ လူမှုကွန်ရက်တွင် တွေ့ရှိရသော ဗီဒီယိုမှတ်တမ်းတစ်ခုတွင် မင်းအောင်လှိုင် ပြောနေသည့် အသံတဝက်တပြတ်သာ ကြားရပြီးဖြတ်တောက်ထားသည်။ 

ပူတင်၏ ယူကရိန်းကျူးကျော်စစ်ကို ထောက်ခံကြောင်း မင်းအောင်လှိုင် ထုတ်ပြောသည်မှာ သေချာသည်။

စက်တင်ဘာ ၈ ရက်နေ့ထုတ် မြန်မာ့အလင်း သတင်းစာတွင်မူ ပူတင်နှင့်တွေ့ဆုံမှုအကြောင်း ဖော်ပြရာ၌ မင်းအောင်လှိုင်က သမ္မတပူတင်ကို ဖော်လံဖားကာ အလွန်အကျူး အမွှမ်းတင်ပြောဆိုထားသည်ကို မဖော်ပြဘဲ ဆင်ဆာဖြတ်တောက်ထားသည်ကို တွေ့ရသည်။ 

ခရီးစဉ်တွင် အတူလိုက်ပါသွားခဲ့သော စစ်ကောင်စီ၏ သတင်းထုတ်ပြန်ရေးအဖွဲ့ ခေါင်းဆောင် ဇော်မင်းထွန်း ကိုယ်တိုင် ၎င်း၏အကြီးအကဲက အလွန်အကျွံ ဖော်လံပြောဆိုသည်ကို စစ်တပ်အတွင်း ပြန်လည်အသိမပေးရဲ သဖြင့် ဖုံးကွယ်ခဲ့ဟန်တူသည်။

စစ်ဗိုလ်ချုပ်များသည် ၎င်းတို့လောက် မျိုးချစ်စိတ်ဓာတ် ပြင်းထန်သူ မရှိလေဟန် ပြူမူပြောဆိုလေ့ရှိသည်။ ဒီမို ကရေစီလိုလားသူများကို “ပြည်ပအားကို ပုဆိန်ရိုး” ဟု စွပ်စွဲအပုပ်ချလေ့ရှိသော စစ်ဗိုလ်စစ်သားများအနေဖြင့် ၎င်းတို့အကြီးအကဲကိုယ်တိုင် ပုဆိန်ရိုးဖြစ်နေသည်ကို မျက်ဝါးထင်ထင် တွေ့မြင်ရပြီဖြစ်သည်။​

ပူတင်ကိုမျက်နှာလုပ်ရင်း အမေရိကန်ကို ရဲရဲကြီးအပုပ်ချခဲ့သူ 

စီးပွားရေးဖိုရမ်တွင် ပူတင်နှင့် ဘေးချင်းယှဉ်ထိုင်ခွင့် ရရှိခဲ့သူ မင်းအောင်လှိုင်က ပူတင်မိန့်ခွန်းပြောအပြီး စားနပ် ရိက္ခာဖူလုံခေါင်းရေး အစချီကာ ရှည်လျားထွေပြားစွာ ပြောဆိုရာတွင် “ဒေါ်လာအနိုင်ကျင့်မှု” ဟု ရည်ညွှန်းလျက် အမေရိကန်ကို စောင်းမြောင်းအပုပ်ချခဲ့သည်။   

“စားနပ်ရိက္ခာလုံခြုံရေးမှာ အဓိကကျတဲ့ စိုက်ပျိုးရေးမှာ လိုအပ်တဲ့လောင်စာဆီ၊ ဓာတ်မြေဩဇာ အပါအဝင် အထောက်အကူပြု ပစ္စည်းများရောင်းဝယ်ရာမှာ အချို့သော နိုင်ငံကြီးများဟာ ဘဏ္ဍာလုံခြုံမှုနှင့် ယှဉ်တွဲပြီး ဖြစ်ပေါ်လာတဲ့ ဒေါ်လာကို လက်နက်သဖွယ် အသုံးချလျက်ရှိတဲ့အတွက် နိုင်ငံတွေငယ်တွေဟာ နိုင်ငံကြီးများရဲ့ ဒေါ်လာအနိုင်ကျင့်မှု ခံနေရပြီး၊ နိုင်ငံရေးစီးပွားရေးကိစ္စရပ်တွေမှာ နိုင်ငံကြီးတွေကို လွန်ဆန်နိုင်ခြင်း မရှိတာကို လည်းတွေ့ရှိရပါတယ်” ဟု မင်းအောင်လှိုင်က ထည့်သွင်းပြောဆိုခဲ့သည်။​

လက်တွေ့၌မူ မြန်မာပြည်သူများ၊ စီးပွားရေးလုပ်ငန်းရှင်များနှင့် ပုဂ္ဂလိကဘဏ်လုပ်ငန်းရှင်များထံမှ အမေရိကန် ဒေါ်လာများကို အမိန့်အာဏာသုံး ခြိမ်းခြောက်အနိုင်ကျင့်ကာ နှိမ်ဈေးဖြင့် လုယက်ယူငင်နေသည်မှာ မင်းအောင် လှိုင်နှင့် အပေါင်းအပါ စစ်ဗိုလ်ချုပ်များဖြစ်သည်။

“ကျွန်တော်တို့အနေနဲ့ ကမ္ဘာ့ကုန်သွယ်ရေးမှာ ရူဘယ်၊ ယွမ်နဲ့ ရူပီးငွေကြေးများကို ဒေါ်လာအစားထိုး အသုံးပြု သွားလို့ရနိုင်ပါတယ်။ ဒါ့အပြင် ကုန်စည်ဖလှယ်မှုစနစ်ကိုလည်း ဒေါ်လာအစားထိုး ဆောင်ရွက်သွားနိုင်ပါတယ်။ ဒီလိုအစားထိုး ဆောင်ရွက်သွားလို့ရှိရင် နိုင်ငံငယ်များအနေနဲ့ ဒေါ်လာအနိုင်ကျင့်ခံရမှုကို ကျော်လွှားနိုင်မှာ ဖြစ်ပါတယ်” ဟုလည်း မင်းအောင်လှိုင်က ရုရှားနှင့်တရုတ်တို့ အလိုကျ သံယောင်လိုက်ပြောဆိုခဲ့သည်။​

ပြည်တွင်း၌ ဒေါ်လာကို အသာငမ်းငမ်း အလုအယက် သိမ်းဆည်းနေသော မင်းအောင်လှိုင်သည် တရုတ်၊ အိန္ဒိယ၊ ထိုင်းတို့နှင့် နယ်စပ်ကုန်သွယ်ရေးတွင် ယွမ်၊ ရူပီးနှင့် ထိုင်းဘတ်ငွေတို့ဖြင့် တိုက်ရိုက်ပေးချေကာ ကုန်သွယ်မှု ပြုစေခဲ့သည်။ သို့သော် အလုပ်မဖြစ်သဖြင့် ဒေါ်လာနှင့်သာ ကုန်သွယ်ရမည်ဟု စည်းကမ်းထုတ်ပြန်သည်။ 

ထိုကဲ့သို့ ပြည်တွင်း၌ တစ်မျိုးလုပ်ကာ နိုင်ငံတကာတွင် တစ်မျိုးပြောနေသော မင်းအောင်လှိုင်၏ အပြုအမူကို မြန်မာနိုင်ငံရှိ နိုင်ငံခြားသံတမန် အသိုင်းအဝိုင်းက မသိရှိဘဲနေမည် မဟုတ်ပါ။ အထူးသဖြင့် မြန်မာစကားကောင်း ကောင်းပြောတတ်သော မင်းအောင်လှိုင်နှင့် ပူတင်တွေ့စဉ် ဘာသာပြန်လုပ်ပေးခဲ့သည့် ရုရှားသံအမတ်ကြီး သိရှိ နေပါလိမ့်မည်။

ဒေါ်အောင်ဆန်းစုကြည် ဦးဆောင်မှုအောက်တွင် စီးပွားရေး တည်ငြိမ်တိုးတက်ခဲ့သော မြန်မာနိုင်ငံအခြေအနေ သည် အာဏာသိမ်းပြီး တစ်နှစ်ခွဲအတွင်း မင်းအောင်လှိုင်နှင့် စစ်တပ်က ရစရာမရှိအောင် ဖျက်ဆီးခဲ့ပုံကို ရုရှား သံအမတ်ကြီး အသိဆုံးဖြစ်ပေလိမ့်မည်။

အာဏာသိမ်းစစ်တပ်က တိုင်းပြည်မတည်ငြိမ်အောင် ဖန်းတီးသည့်အပြင် စီးပွားရေးကို စိတ်ထင်တိုင်း အမိန့် အမျိုးမျိုးထုတ်ပြန်ကာ လွဲလွဲမှားမှားစီမံနေခြင်း၊ အာဏာသိမ်းမှု ဆန့်ကျင်သည့် ပြည်သူတစ်ရပ်လုံးကို ရန်သူ အဖြစ်သတ်မှတ်ကာ ဖမ်းဆီးနှိပ်စက်ခြင်း၊ ရွာလုံးကျွတ်မီးရှို့ဖျက်ဆီးများကြောင့် ပြည်သူသန်းနှင့်ချီ အိုးမဲ့အိမ်မဲ့ ထွက်ပြေးနေရကာ ပြည်တွင်းစစ်မီး တောက်လောင်နေသည်။​

အာဏာသိမ်းမှုကြောင့် တိုင်းပြည်စီးပွားပျက်ကပ်ဆိုက်ကာ ကျပ်ငွေတန်ဖိုးကျဆင်းနေသော်လည်း ပူတင်နှင့် အခြားခေါင်းဆောင်များ ရှေ့ မှောက်တွင် အမေရိကန်ကပင် ဒေါ်လာဈေးကစားနေသယောင် အနိုင်ကျင့်နေသ ယောင် လိမ်ညာပြောဆိုရဲသော မင်းအောင်လှိုင်၏ ဉာဏ်ရည်နှင့် ကိုယ်ကျင့်တရားကို အထင်အရှား တွေ့မြင် ရသည်။​

ယနေ့အချိန်ထို မြန်မာပြည်သူများ၏ ဆန္ဒနှင့်ဆန်ကျင်ပြီး မင်းအောင်လှိုင်ကို ထိတွေ့ဆက်ဆံခဲ့သော နိုင်ငံများ တွင် တရုတ်၊ ရုရှား၊ အိန္ဒိယနှင့် အာဆီယံအလှည့်ကျဥက္ကဋ္ဌ ကမ္ဘောဒီးယားနိုင်ငံတို့ဖြစ်သည်။

သမ္မတပူတင် သိသင့်သည်မှာ မင်းအောင်လှိုင်က ရုရှားလုပ် တိုက်လေယာဉ်များ၊ ရဟတ်ယာဉ်များ၊ ဒုံးကျည်များ အသုံးပြုလျက် နိုင်ငံအနှံ့ လက်နက်မဲ့ပြည်သူများကို နေ့စဉ်သတ်ဖြတ်နေသည့်အချက်ဖြစ်သည်။ မင်းအောင်လှိုင် ကို လူသတ်လက်နက်များ ရောင်းနေသည့် ရုရှားကို မြန်မာပြည်သူများ မေ့လျော့သွားလိမ့်မည် မဟုတ်ပေ။​

ထို့အတူ မြန်မာပြည်သူများသည် စစ်မိစ္ဆာမင်းအောင်လှိုင်ကို အားပေးအားမြှောက်ပြုနေသည့် မည်သည့်နိုင်ငံကို မဆို မေ့လျော့သွားမည် မ ဟုတ်ပေ။​ myanmar now

စစ်ကောင်စီက မိုးကုတ်ပြည်သူ ၄ ဦးအား ဖမ်းဆီးပြီး နေအိမ်တအိမ်ကို ထပ်မံချိပ်ပိတ်

မန္တလေးတိုင်း မိုးကုတ်မြို့အရှေ့ပိုင်းက ပြည်သူ ၄ ဦးကို စစ်ကောင်စီတပ်က စက်တင်ဘာ ၁၆ ရက်နေ့ညမှာ ဖမ်းဆီးသွားပြီး စည်ပင်သာယာရပ်ကွက်ရှိ နေအိမ်တအိမ်ကိုလည်း ချိပ်ပိတ်သွားတယ်လို့ ဒေသခံတွေက ပြောပါတယ်။ 

“ဖမ်းသွားတာက PDF တွေကို ထောက်ပံ့တယ် ပတ်သက်တယ်ဆိုပြီး ဖမ်းသွားတာ၊ ဖမ်းခံရသူတွေကအများကြီးပဲ။ လိုင်းကလည်း မရတော့ ဘယ်သူမှလည်း သိပ်မတင်ကြလို့သာမသိကြတာ။ သတင်းမတင်တော့ ဘယ်သူဖမ်းခံရလဲဆိုတာလည်း မသိကြဘူးလေ၊ အဲ့တော့ အများကြီးဖမ်းခံရတာ” လို့ ဒေသခံတဦးက ပြောပါတယ်။ 

မိုးကုတ်မြို့ စည်ပင်သာယာရပ်ကွက်ရှိ ဖမ်းဆီးခံထားရတဲ့ CDM ဝန်ထမ်း လင်မယားအိမ်ကိုလည်း စစ်ကောင်စီတပ်က စက်တင်ဘာ ၁၂ ရက်နေ့က ထပ်မံချိပ်ပိတ်သွားခဲ့တယ်လို့ ဒေသခံတွေက ပြောပါတယ်။ 

ဖမ်းဆီးခံထားရပြီး ပုဒ်မ ၅၂ ညနဲ့ အမှုဖွင့်ခံထားရတဲ့ CDM ဝန်ထမ်း လင်မယားအိမ်က ပစ္စည်း တွေ အကုန်သယ်ဆောင်သွားပြီးနောက် အိမ်ကိုစာလာကပ်သွားတာလို့ ပြောပါတယ်။DVB

ကိုဗစ်ဖြစ်ပွားမှု ပြန်လည်မြင့်တက်၊ အသေအ ပျောက်ရှိလာ

လက်ရှိအခြေအနေအရ ကိုဗစ်ရောဂါ မျိုးရိုးဗီဇပြောင်း အိုမီခရွန် မျိုးစိတ်သစ် BA.4 နှင့် BA.5 သည်  အစုလိုက်အပြုံလိုက် ကူးစက်မှုများ ဖြစ်ပေါ်နေကြောင်း ရန်ကုန်မြို့တွင် ဆေးခန်းဖွင့်ထားသည့် အထွေထွေရောဂါကုဆရာဝန် ဒေါက်တာကျော်မင်းထွန်းက ဆိုသည်။

သူ့၏ဆေးခန်း၌  ဖျားနာခြင်းနှင့်ပတ်သက်ပြီး လာရောက်ကုသသည့် လူနာ ၁၀ ဦးကို စစ်ဆေး ကြည့်လျှင် ၈ ဦး ၉ ဦးခန့်က ကိုဗစ် ၁၉ ရောဂါဖြစ်နေကြောင်း ဒေါက်တာကျော်မင်းထွန်းက ဆိုသည်။

“အခုက Outbreak ဖြစ်ပြီလို့ ပြောလို့ရတယ် တစ်အိမ်မှာ တစ်ယောက်ဖြစ်ပြီဆိုရင် နောက်ရက် အကုန် ဆက်ဖြစ်ကြတာပဲ” ဟုပြောသည်။

စစ်ကောင်စီလက်အောက်ရှိ ကျန်းမာရေးဝန်ကြီးဌာနကလည်း စက်တင်ဘာ ၁ ရက်နေ့မှ စက်တင်ဘာ ၁၅ ရက်နေ့အထိ ၁၅ ရက်တာကာလအတွင်း ကူးစက်ခံထားရသည့် လူနာ ၂၆၈၃ ဦးရှိပြီး သေဆုံးသူ ၆ ဦးအထိ ရှိလာနေကြောင်း ထုတ်ပြန်ထားသည်။

အဆိုပါ ကိန်းဂဏန်းအချက်အလက်များသည် စစ်ကောင်စီ ထိန်းချုပ်မှုအောက်ရှိ ဆေးရုံ ဆေးခန်း များ၌ လာရောက်ပြသသူများကို စစ်ဆေးထားသည့် ရလဒ်ဖြစ်ပြီး ပြင်ပ ဆေးရုံဆေးခန်းများတွင် ရှိနေသည့် လူနာများ မပါဝင်ပေ။

စက်တင်ဘာလဆန်းပိုင်းကစပြီး ကိုဗစ်ရောဂါ အဖြစ်များလာနေခြင်းကြောင့် အသင်းအနေဖြင့် လူနာများကို ဆေးရုံများသို့ ကူညီပို့ဆောင်ပေးနေသည်ဟု တောင်ဒဂုံမြို့နယ် အခြေစိုက် ရှင်သန်ခွင့် လူမှုကူညီရေးအသင်း ဥက္ကဋ္ဌ ဒေါ်သန်းသန်းစိုး ကဆိုသည်။

လက်ရှိ စားဝတ်နေရေး ကျပ်တည်းမှုများကြောင့် ပြည်သူများအနေဖြင့် ဈေးလျော့ရောင်းချ ပေးနေသည့် စားအုန်းဆီများကို တိုးဝှေ့ဝယ်ယူနေရခြင်း၊ အစားအသောက် ဆန်ဆီလှူဒါန်းပေးသည့် နေရာများတွင် လူစုလူဝေးများ ဖြစ်နေခြင်းကြောင့် ကိုဗစ်ကူးစက်မှု ပိုမိုမြင့်တက်လာမည်ကို စိုးရိမ်ကြောင်းလည်း သူကပြောသည်။

“လူတွေက စီးပွားရေးကျပ်တည်းလာတော့ ဒီလိုမျိုးတွေ ဝေပေးရင် ယူကြ တာပဲလေ တန်းစီတိုးဝှေ့နေပြီး Mask တွေက မတပ်တော့ ရောဂါပိုဆိုးလာမှာ ကြောက်နေရတယ်” ဟု ဒေါ်သန်းသန်းစိုးက ပြောသည်။

ကူးစက်မှုနှုန်း တဖြည်းဖြည်းမြင့်တက်လာနေခြင်းကြောင့် ကိုဗစ်စည်းကမ်းများကို လိုက်နာရန် စစ်ကောင်စီ လက်အောက်ရှိ ဝါဒဖြန့်မီဒီယာများ က ထုတ်ပြန်ပေးနေသော်လည်း ပြည်သူလူထုက အယုံအကြည် မရှိကြောင်း စမ်းချောင်းမြို့နယ်တွင် နေထိုင်သည့် အသက် ၂၅ နှစ်အရွယ် မချောချောဆိုသူက ပြောသည်။

“သူတို့(စစ်ကောင်စီ) ထုတ်ပြန်တာ ဘယ်သူမှ မကြည့်ဘူးလေ။ သတင်းကို ဘယ်တုန်းကမှ အမှန် မရဘူးလေ။ တောက်လျှောက်လိမ်လာခဲ့တော့ အမှန်ပြောနေပါစေဦး ဘယ်သူမှ မယုံတော့ဘူး” ဟု ၎င်းကဆိုသည်။

ယင်းအပြင် အခြေခံစားသောက်ကုန်အပါအဝင် ကုန်ပစ္စည်းများ ဈေးနှုန်းမြင့်တက်လာခြင်းကြောင့် ပြည်သူများသည် စားဝတ်နေရေးအဆင် ပြေရန် ကြိုးစားနေရပြီး ကိုဗစ်ရောဂါကို ဂရုမစိုက်နိုင်ခြင်းကြောင့် ရောဂါ ပိုမိုပြန့်နှံ့လာမည်ကိုလည်း စိုးရိမ်နေရသည်။

ယခုနှစ်ဆန်းပိုင်းတွင် ကိုဗစ်မျိုးပွား အိုမီခရွန်ရောဂါ ပြန့်နှံ့လာချိန်တွင် လူသေဆုံးခြင်း မရှိသည့်အတွက် လက်ရှိဖြစ်ပွားနေသည့် ကိုဗစ်ရောဂါအပေါ် ပြည်သူများအနေဖြင့်  သာမန် ရာသီတုပ်ကွေး ကဲ့သို့သာ သဘောထားနေကြောင်း ဒေါက်တာကျော်မင်းထွန်းက မှတ်ချက်ပြုသည်။

“လူအသေအပျောက်တွေတော့ တွေ့တယ် ဘာကြောင့်လဲဆိုတော့ ပေါ့ဆလို့ပါ အိုမီခရွန်က အားပျော့ပါတယ် ဘာမှမဖြစ်ပါဘူးဆိုပြီး ပေါ့ကြတယ်ပေါ့နော် အောက်ဆီဂျင် ကျလို့ကျမှန်းမသိ ကိုဗစ်ဖြစ်လို့ဖြစ်မှန်းမသိ ပေါ့ပေါ့နေကြတာပေါ့ အချိန်မှီ ကုသမှုခံယူဖို့သင့်တယ်” ဟုပြော သည်။

ကိုဗစ်ရောဂါဖြင့် ပတ်သက်ပြီး ကာကွယ်ထိန်းသိမ်းနိုင်သည့် စွမ်းရည်အပြည့်ရှိကြောင်း NLD အစိုးရလက်ထက်တွင် အမြဲလိုလို ကြွားလုံးထုတ် ပြောဆိုလေ့ရှိသည့် စစ်တပ်သည် အာဏာသိမ်းပြီးနောက် ဖြစ်ပွားခဲ့သည့် ကိုဗစ်တတိယလှိုင်းတွင် စီမံခန့်ခွဲမှု အလွဲများ ပြုလုပ်ခဲ့ခြင်းကြောင့် နောက်ဆက်တွဲအနေဖြင့် ပြည်သူများ အသေအပျောက်များခဲ့သည်။

စစ်ကောင်စီ၏ စီမံခန့်ခွဲမှု အလွဲများကြောင့် အောက်ဆီဂျင် မလုံလောက်ခြင်း ဆေးဝါးများ အဆမတန် ဈေးမြင့်မားခြင်းတို့ကို ဝန်မခံဘဲ အာ ဏာဖီဆန်ရေး လှုပ်ရှားမှုတွင် ပါဝင်ခဲ့သည့် ကျန်းမာရေးဝန်ထမ်းများကြောင့်ဟု ဆိုကာ စစ်ကောင်စီက အပြစ်ပုံချခဲ့သည်။

လက်ရှိ ကိုဗစ်ကာကွယ်ထိန်းချုပ်ရေး လုပ်ငန်းဆောင်ရွက်မှုတွေကို သိရှိနိုင်ရန် စစ်ကောင်စီ ကျန်းမာရေးဝန်ကြီးဌာန ပြောခွင့်ရ ဒေါက်တာသန်းနိုင်စိုးကို Myanmar Now က ဆက်သွယ် မေးမြန်းခဲ့သော်လည်း ဖုန်းလက်ခံဖြေဆိုခြင်းမရှိပေ။

မြန်မာနိုင်ငံတွင် ကာကွယ်ဆေးထိုးပြီးသူ ၁၈ နှစ်နှင့် အထက် သန်း ၃၀ ကျော် (၃၀,၄၆၁,၀၆၃) နှင့် ၁၈ နှစ်အောက် ခြောက်သန်းကျော် (၆,၅ ၁၅,၅၂၂) စုစုပေါင်း ၃၆ သန်းကျော် ရှိပြီဖြစ်ကြောင်း စစ်ကောင်စီကျန်းမာရေးဝန်ကြီး ဌာနက စက်တင်ဘာ ၁၄ ရက်နေ့တွင် ထုတ်ပြန်ထား သည်။

အာဏာသိမ်းခေါင်းဆောင် မင်းအောင်လှိုင်နှင့် သူ၏အစိုးရအဖွဲ့ဝင်များ ပြီးခဲ့သည့် ဩဂုတ်လ ၂၂ ရက်က တွေ့ဆုံသည့် အစည်းအဝေးတွင် ကိုဗစ်ရောဂါပြန်လည်ဖြစ်ပွာနိုင်ကြောင်း သတိပေးထားသည်ကို တွေ့ရသည်။ ကိုဗစ်စတင်ဖြစ်ပွားချိန်မှစ၍ ယခုနှစ် ဩဂုတ်လ ၂၁ ရက်အထိ လူပေါင်း ၁၉,၀၀၀ သေဆုံးခဲ့သည်ဟုလည်း အာဏာသိမ်းခေါင်းဆောင်က ထည့်ပြောသွားသည်။ myanmar now

« Older Entries