SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ မြောင်မြို့နယ် ကျောက်ရစ်စခန်းရှိ စစ်ကောင်စီတပ်အား ကာကွယ်ရေးတပ်ဖွဲ့မှ ၄၀ မမ များဖြင့် သွားရောက်ပစ်ခတ်ခဲ့ပြီး စစ် ကူလာသည့် စစ်ကောင်စီတပ်မှာလည်း ထပ်မံ တိုက်ခိုက်ခံရ သဖြင့် ကိုဦး ဒဏ်ရာရရှိသွားကြောင်း Natogyi Regional Defence Force – NRDF မှ အောက်တိုဘာလ ၂၂ ရက်နေ့က သတင်းထုတ်ပြန်ထားသည်။

အောက်တိုဘာလ ၂၁ ရက်နေ့ ညအချိန်တွင် ကျောက်ရစ်ကျေးရွာအနီးပတ်ဝန်းကျင်ရှိ ကျေးရွာများမှ ပစ္စည်းများကို အဓမ္မသိမ်းယူလာပြီး အောက်တိုဘာလ ၂၂ ရက်နေ့ နံနက်ပိုင်းတွင် ကျောက်ရစ်အနောက် ရွာမှ စခန်းအတွင်းသို့ဝင်နေစဉ် ကာကွယ်ရေးပူးပေါင်းတပ်မှ ၄၀ မမ များဖြင့် သွားရောက်ပစ်ခတ်ခဲ့ ခြင်းဖြစ်သည်။

“ပထမမစ်ရှင်က ရွာထိပ်ထိသွားပစ်တာ စခန်းထဲကိုရောက်လောက်မဲ့အကွာအဝေးထိဗျ။ ဒုတိယ မိုင်းဆွဲ တာ ပိုထိမယ်။ Point ပေါ်ထိ ပြေးတက်လာတာ။ တခြားပြောချင်တာကတော့ နောက်လုပ်ဖို့ ဆွဲထားတဲ့ Mission တွေ မြန်မြန်အကောင်အထည်ဖော်နိုင်ဖို့ ထောက်ပံ့မှုတွေပဲလိုအပ်နေတာ” ဟု MSPDF ပြန်ကြား ရေးတာဝန်ခံက လူထုနွေဦးကို ဖြေကြားထားသည်။

၄၀ မမ များဖြင့်သွားရောက်ပစ်ခတ်ခဲ့သော ရဲဘော်များအား အကြမ်းဖက်စစ်ကောင်စီ၏ ကင်းသမားများမှ လက်နက်ငယ်များဖြင့်ပြန်လည်ပစ်ခတ်ခဲ့ကြပြီး ပစ်ခတ်နေစဉ်အတွင်း စစ်ကောင်စီစခန်းအတွင်းမှ တပ်ကူများရောက်ရှိလာ၍ အင်အားသုံးကာ လိုက်လံပစ်ခတ်မှုကြောင့် ပြည်သူ့ကာကွယ်ရေးရဲဘော်များမှ ကာပစ် ပစ်ပြီးဆုတ်ခွာလာခဲ့ရသည်။

အပြန်အလှန်ပစ်ခတ်မှုမှာ ငါးမိနစ်ခန့်ကြာမြင့်ခဲ့ပြီး ဒေသကာကွယ်ရေးပူးပေါင်းတပ်ဖွဲ့၏ စနိုက်ပါတပ်ဖွဲ့ မှလည်း စနိုက်ပါဖြင့် ပစ်ခတ်တိုက် ခိုက်ခဲ့ကြောင်း သိရသည်။

လိုက်လံပစ်ခတ်သည့် အကြမ်းဖက်စစ်ကောင်စီတပ်များကို အသင့်ချထားသော MSPDF ထုတ် ပြင်းအား မြင့်မိုင်းများဖြင့် နေရာနှစ်နေရာတွင် မိုင်းဆွဲတိုက်ခိုက်မှု ထပ်မံပြုလုပ်ခဲ့သည်ဟု ဆိုသည်။

အကြမ်းဖက်စစ်ကောင်စီတပ်ဘက်မှ အထိနာသောကြောင့် ဘေးပတ်ဝန်းကျင်အိမ်များအား မွှေနှောက် ဖျက်ဆီးမှုများလည်းပြုလုပ်ခဲ့ကြောင်းသိရပြီး ပြည်သူ့ရဲဘော်များ အထိအခိုက်မရှိ ဆုတ်ခွာလာနိုင်ခဲ့ ကြောင်း သိရသည်။

အဆိုပါ တိုက်ခိုက်မှုအား Natogyi Regional Defence Force – NRDF နှင့်အတူ ညီနောင်မဟာမိတ်များ ဖြစ်ကြသည့် စစ်ကိုင်းခရိုင် တပ် ရင်း အမှတ် (၄) – MSPDF ၊ ဓာတ်ကြီးလေးပါ (Four Elements)၊ ပြောက် ကျားလင်းယုန်အဖွဲ့တို့မှ ပူးပေါင်းတိုက်ခိုက်ခဲ့ခြင်းဖြစ်သည်။mizzima

စစ်ကိုင်းတိုင်း ကသာမြို့နယ်အတွင်း ဆန်တက်လာသော အကြမ်းဖက် စစ်တပ် ရေယာဥ်များ၏ ပစ်ခတ်မှုကြောင်း အသက် ၁၂ နှစ် မနှင်းအိလွင် သေဆုံးခဲ့ကြောင်း သိရသည်။

အောက်တိုဘာလ ၂၃ ရက်နေ့ နံနက် ၈ နာရီခန့်တွင် မိုးတားလေးရေဆိပ်မှ ဖျားနာ ထိခိုက်ဒဏ်ရာရ စစ်သားများကိုတင်ဆောင်လာသော စစ်ရေ​ယာဥ်များက ဆင်ကုန်တိုင်ရွာဘက်သို့ လက်နက်မျိုးစုံဖြင့် ပစ်ခတ်ခဲ့သောကြောင့် အသက် ၁၂ နှစ်အရွယ်ကလေးငယ် ကျည်ထိမှန်သေဆုံးခြင်းဖြစ်ကြောင်း သိရသည်။

အသက် ၁၂ နှစ်အရွယ် ၄ တန်းကျောင်းသူ မနှင်းအိလွင်ကို လက်နက်ကြီး ထိမှန်ခဲ့ကြောင်း ညာဘက်ရင်ဘတ် နှင့် ခြေထောက်တို့တွင် လက် နက်ကြီးစများ ထိမှန်သေဆုံးခဲ့ပြီး မဇင်မာဦးဆိုသူ အမျိုးသမီးကြီးမှာမူ ဘယ်နားရွက်ကို လက်နက်ကျည်စ ထိမှန်ခဲ့ပြီး (မစိုးရိမ်ရ) ဒဏ်ရာရရှိခဲ့ကြောင်း၊ နွားလှည်းနှင့် နေအိမ်များကိုပါ ကျည်စများ ထိမှန်ခဲ့ကြောင်း သိရသည်။

စစ်ရေယာဉ်အုပ်စုသည် အောက်တိုဘာလ ၂၁ ရက်နေ့ ညနေ ၆ နာရီဝန်းကျင်တွင် မိုးတားလေးကျေးရွာ ဆိပ်ကမ်းတွင် ရပ်နားခဲ့ကြောင်း၊ အောက် တိုဘာလ ၂၂ ရက်နေ့ မွန်းလွဲပိုင်းတွင် ခလရ ၇၇ တပ်မှ တပ်သား ကျော်စွာ၊ လည်ပင်းတွင် မိုင်းစဒဏ်ရာရ သည့် အရာခံဗိုလ်တစ်ဦး အပါအဝင် စုစုပေါင်း ၂ ဦးကို မိုးတားလေးကျေးရွာ သုဿာန်တွင် မီးသဂြိုလ်ခဲ့ကြောင်း သိရှိရသည်။ ၊

မိုးတားလေးကျေးရွာ၊ မန်ကျည်ပင်ကျောင်းတွင် စစ်ရေယာဉ်အုပ်စု ရပ်နားကြစစဉ် ဖျားနာသေဆုံးသော စစ်သားများကို ဘုန်း​​ကြီးကျောင်း အနီးနာမှာတွင်ပင် မြေမြုပ်သွားကြောင်း သိရသည်။

မန္တလေးမှ ထွက်လာသည့် စစ်ရေယာဥ် ၇ စီးသည် အောက်တိုဘာလ ၂၀ ရက်နေ့ ညနေပိုင်းတွင် ကသာမြို့၌ ညအိပ် ရပ်နားခဲ့ကြောင်း၊ အောက် တိုဘာလ ၂၁ ရက်နေ့ မွန်းလွဲ ၁၀ နာရီ ၃၀ မိနစ်ခန့်တွင် အထက်သို့ ဆက်လက် ဆန်တက်လာ​ကြောင်း၊ ကပ္ပလိပ်ကျေးရွာမှ စတင်ပြီး လက် နက် ကြီး ငယ်မျိုးစုံဖြင့် ပစ်ခတ်ဆန်တက်ခဲ့ပြီး ရေယာဥ်အုပ်စုကို ဂျက်လေယာဥ်နှင့် တိုက်ခိုက်ရေး ရဟတ်ယာဥ်များမှ အလှည့်ကျ ဝဲပျံပြီး လိုက်ပါကြောင်း သိရှိရသည်။

ဧရာဝတီမြစ်ဘေးရှိ ကျေးရွာများကို စစ်တပ် ရေယာဥ်များက ရမ်းသမ်း ပစ်ခတ်နေသဖြင့် ပြည်သူများ သတိထားကြရန် ကသာမြို့နယ် ပြည်သူ့ကာကွယ်ရေးတပ်ဖွဲ့က သတိပေးထုတ်ပြန်ထားသည်။ khit thit

နိုင်ငံတကာငွေကြေးခဝါချမှုစောင့်ကြည့်ရေးအဖွဲ့ (FATF)က အောက်တိုဘာ ၂၁ ရက်က   မြန်မာနိုင်ငံကို အမည်မည်း စာရင်းသတ်မှတ်လိုက်ပြီးနောက်မှာ ပြည်တွင်းစားအုန်းဆီ စျေးဟာ လက်လီ တစ်ပိဿာကို ကျပ် ၁ သောင်းဝန်းကျင်အထိ မြင့်တက်လာတယ်လို့ စားသုံးသူတွေဆီက သိရပါတယ်။

မြန်မာနိုင်ငံကို အခုလို အမည်မည်းစာရင်းသတ်မှတ်ပြီးနောက်ပိုင်း စားသုံးဆီစျေးမှာ အဆမတန် မြင့်တက်လာတာလို့ အိမ်ရှင်မတဦးက ပြောပါတယ်။

“မနေ့ကဆို မနက်ကအထိ ဆီစျေးက ၆၆၀၀ ပဲရှိသေးတယ်။ ညနေဘက်ရောက်တော့ ၈၅၀၀ ဖြစ်သွားတယ်။ အခုမနက် ၁ သောင်းပေးဝယ်ရတယ်”

ပြည်တွင်းစားသုံးဆီစျေးနှုန်းမှာ မနေ့မနက်ပိုင်းက စတင်ကာ တစ်ပိဿာကို ကျပ် ၄၂၀၀ မှ ၆၆၀၀ ထိုမှ ၇၂၀၀၊ ၈၀၀၀၊ ၈၄၀၀၊ ၉၀၀၀ မှ ၁၀၀၀၀ အထိ တဖြည်းဖြည်းမြင့်တက်လာတာလို့ စားသောက်ဆိုင်ပိုင်ရှင်က ပြောပါတယ်။

“၄၂၀၀ ဆိုတာ တခါတလေ ဆီလုပ်ငန်းရှင်အသင်းက ကားနဲ့လာရောင်းတာကိုပြောတာ။ ကျန်တာက ဆိုင်တွေကပဲ ဝယ်ရတာ စားသောက်ဆိုင်ဆို ဆီက အမြဲဝယ်ရတာ။ အဲဒါကြောင့် စျေးတွေသိတာ တက်လည်း ဝယ်ရတာပဲ။ မဝယ်လို့မှမရတာ အများကြီးတော့ ဝယ်လှောင်မ ထားဘူး။”

စားသုံးသူတွေဘက်က စျေးနှုန်းမြင့်တက်မှု့ကြောင့် ပြောဆိုမှုတွေရှိသလို ဆိုင်ရှင်တွေဘက်ကလည်း ဆီကို အကန့်အသတ်နဲ့သာ ဝယ်ယူရောင်းချနေရတယ်လို့ ဆီရောင်းချသူတဦးက  ပြောပါတယ်။

“ဝယ်တဲ့သူကလည်း စျေးကြီးလို့၊ ရောင်းတဲ့သူတွေဘက်ကလည်း စျေးနှုန်းကို စောင့်ကြည့်နေရတယ်။ ကျမှာလား မကျဘူးလား။ အများကြီးဝယ်မလှောင်ရဲဘူး။ တချို့ဆိုင်တွေ ဆို အရောင်းခဏနားထားပြီး စျေးနှုန်းကြည့်နေတာ။ လက်ရှိပေါက်စျေး ကိုးထောင်ပါ။ ဒါတောင် ဝယ်ချင်တိုင်းဝယ်မရဘူး။”

မြန်မာနိုင်ငံဆီကုန်သည်နဲ့ ဆီလုပ်ငန်းရှင်းအသင်းက ရန်ကုန်တိုင်းအတွင်းရှိ ရပ်ကွက်နဲ့ကျေးရွာ တွေကို စားအုန်းဆီ တပိဿာကို ၄၂၀၀ ကျပ်နဲ့ လိုက်လံရောင်းချပေးတာမျိုး ရှိခဲ့ပေမဲ့ အောက်တိုဘာ ၂၂ ရက်မှစပြီး မရောင်းတော့ဘူးလို့ ဆီရောင်းဝယ်ရေးလုပ်သူတဦးက ပြောပါတယ်။

“လှည်းကူးမှာလည်း လာရောင်းတယ်။ ၂၁ ရက်က လှိုင်သာယာမှာ ရောင်းတယ်။ ၂၂ ရက်ကစပြီး ရောင်းတာမတွေ့ရဘူး။ သူတို့က ကျပ် ၄၂၀၀ တန်တယ်။ ဒါပေမဲ့ လူတိုင်းကို ရောင်းတာမဟုတ်ဘူး။  ရပ်ကွက်တိုင်း လမ်းတိုင်း မရောင်းဘူး။ သူရောက်တဲ့နေရာ ရောင်းတယ်။ အဲဒါကြောင့် အောက်ခြေက သူတွေက စျေးကြီးပေမဲ့ ဝယ်စားနေရတာ။”

လက်တလောမှာ စီးပွားကူးသန်း ဝန်ကြီးဌာနလက်အောက်ရှိ စက်သုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီက စားသုံးဆီ တပိဿာကို ၃၈၀၀ ကျပ်နဲ့ ရောင်းချဖို့ အောက်တိုဘာ ၁၁ ရက်မှာ  ထုတ်ပြန်ထားပါတယ်။ DVB

ကရင်ပြည်နယ်၊ ကော့ကရိတ်မြို့တွင် အောက်တိုဘာလ ၂၁ ရက်နေ့ နံနက် ၈ နာရီဝန်းကျင်က စစ်ကောင်စီတပ်နှင့် KTLA,KNLA,PDF တော်လှန် ရေးအင်အားစုတို့ တိုက်ပွဲပြင်းထန်စွာဖြစ်ပွားခဲ့ရာတွင် စစ်ကောင်စီ၏မြို့စောင့်တပ်သည် တိုက်ပွဲဖြစ်ပွားသည့်အချိန်က ၎င်းတို့စခန်းကုန်းကို စွန့်ခွာထွက်ပြေး သွားကြောင်း သိရသည်။

“သူတို့က ဘုန်းကြီးကျောင်းမှာတပ်စွဲထားတဲ့ တပ်ဖွဲ့ပါ။ သူတို့ ပြန်ဆုတ်သွားတဲ့အချိန်မှာ တပ်ရင်း (၁၈)နဲ့ ဒေါနစစ်ကြောင်းက နယ်မြေရှင်း လင်းရေးလုပ်ရင်း စခန်းကို မီးရှို့ခဲ့တာပါ သူတို့အင်အားက ၂၀ ကျော် ၃၀ လောက်ရှိတယ်”ဟု ဒေါနစစ်ကြောင်း စစ်ကြောင်းမှူးဗိုလ်တာလော က ပြောသည်။

ကော့ကရိတ်မြို့သည် အမှတ်(၁၂) စစ်ဆင်ရေးကွပ်ကဲမှုဌာနချုပ်မှထိန်းချုပ်ထားသည့် မြို့ဖြစ်ပြီး မြို့အနီး ဝန်ကျင်တွင် တပ်ရင်း(၁၃)ရင်း ရှိကြောင်းသိရသည်။ တော်လှန်ရေးအင်အားစုများ တိုက်ခိုက်ခဲ့သည့် ခလရ(၉၇)တပ်ရင်းသည် ရှမ်းပြည်နယ် လောက်ကိုင်ဒေသကို အဓိကစစ် ဆင်ရေးပြုလုပ်ရသည့် တပ်ရင်း ဖြစ်သည်။ အဆိုပါ တပ်ရင်းသည် KNU တပ်မဟာ(၅)ထိန်းချုပ်နယ်မြေတွင် ပြီးခဲ့သည့် မတ်လအတွင်းက တိုက်ပွဲအတွင်း သုံးဦးသေဆုံးကာ ၂၇ ဦးဖမ်းဆီးခံခဲ့ရပြီး ၎င်းတို့စစ်ဆင်ရေးပြုလုပ်သည့် နေရာများတွင် သေဆုံး၊ ဖမ်းဆီးခံရမှုရှိခဲ့သည့်အ တွက် တပ်ရင်းအတွင်းမှစစ်သည်မိသားစုများမှ စစ်ကောင်စီကို ဆန့်ကျင် ဆန္ဒထုတ်ဖော်မှုဖြစ်ပွားခဲ့သေးသည်။

ကော့ကရိတ်မြို့ရှိ စစ်ကောင်စီအခြေစိုက်စခန်းများကို ဗိုလ်ကျော်သက်၊ ဗျူဟာမှူး စောအယ်ဆေးဝါး ဦးဆောင်သော Lion Battalion ဗျူဟာစစ်ကြောင်း၊ ကော်သူးလေတပ်မတော်(KTLA) ၊ KNLA ၊ ကျားဖြူ စစ်ကြောင်း၊ ဒေါနစစ်ကြောင်း၊ Eagle Brigade ၊ Black Panther Colum ၊ KNLA တပ်ရင်း ၁၈ ၊ Angry Bird Drone အဖွဲ့၊ ARMS Drone အဖွဲ့၊ Federal Wings ၊ PDF ပူးပေါင်းတပ်ဖွဲ့တို့ ဝင်ရောက်တိုက်ခိုက်ခဲ့ပြီး ပြင်းထန်တိုက်ပွဲဖြစ်ပွားခဲ့ကြခြင်းဖြစ်သည်။

ကော့ကရိတ်မြို့တွင်းတိုက်ပွဲတွင် စစ်ကောင်စီတပ်က လေကြောင်းမှတိုက်ခိုက်မှု ၅၄ ကြိမ်ထက်မနည်း ပြုလုပ်ခဲ့ပြီး တော်လှန်ရေးပူးပေါင်းတပ်ဖွဲ့အနေဖြင့် MA လေးလက်၊ M 16 တစ်လက်၊ ၄၀ မမ ကျည် ၅၀ နှင့် ကျည်ဆံ ၃၀၀ သိမ်းဆည်းရမိခဲ့ပြီး စစ်ကောင်စီတပ်မှ ရှစ်ဦးခန့်ကျဆုံးခဲ့ကြောင်း Lion Battalion စစ် ကြောင်းမှ အောက်တိုဘာလ ၂၂ ရက်နေ့တွင် ထုတ်ပြန်ထားသည်။mizzima

ဧရာဝတီတိုင်း၊ ကြံခင်းမြို့နယ် စစ်ဖက်ရေးရာလုံခြုံရေးတပ်ဖွဲ့ (စရဖ) ရုံးမှာ အောက်တိုဘာ ၂၂ ရက်နေ့ညပိုင်းက ဗုံးပေါက်ကွဲမှုဖြစ်ပွား ခဲ့တယ်လို့ ဒေသခံတွေဆီက သိရပါတယ်။

ကြံခင်းမြို့၊ ရွာသစ်ရပ်ကွက်၊ သာယာ ၅ လမ်းမှာရှိတဲ့ စရဖ ရုံးမှာ ည ၉ နာရီခွဲလောက်က ဗုံးပေါက်ကွဲခဲ့တာလို့ ဒေသခံတွေက ပြောပါတယ်။

မြို့ခံတဦးက “အုံး ဆိုပြီးတော့ ကြားလိုက်တာ ပထမကားဘီးကွဲတာထင်လို့ နောက်မှ အဲ့ဘက်က ဗုံးကွဲတယ်ဆိုတာ သိရတာ။ ဖြစ်တဲ့အချိန်ကနောက်ကျနေတော့ ဘယ်သူမှလည်း မထွက်တော့ဘူး၊ ဒဏ်ရာရတဲ့သူတော့ ရှိနိုင်တယ်၊ သေချာတော့မသိသေးဘူး”လို့ ပြောပါတယ်။

ဗုံးပေါက်ကွဲပြီးနောက်ပိုင်း စစ်ကောင်စီတပ်သားတွေနဲ့ လက်အောက်ခံရဲတွေက မြို့တွင်း ကားနဲ့လှည့်လည်ပြီး ဗုံးပေါက်ကွဲတဲ့ရပ်ကွက်မှာလည်း ပိတ်ဆို့စစ်ဆေးခဲ့တယ်လို့ ဆိုပါတယ်။

ကြံခင်းမြို့ စစ်ဖက်ရေးရာလုံခြုံရေးတပ်ဖွဲ့(စရဖ)ရုံးဗုံးပေါက်ကွဲမှုနဲ့ ပတ်သက်ပြီး ဘယ်အဖွဲ့အစည်းက ပြုလုပ်တယ်ဆိုတာကိုလည်း မသိရသေးပါဘူး။ DVB

မကွေးတိုင်း ဂန့်ဂေါမြို့နယ်တွင် စစ်တပ် စစ်ကြောင်း တိုက်ခိုက်ခံရပြီး ထိခိုက်သေဆုံးမှုရှိကြောင်း ဂန့်ဂေါခရိုင် အမှတ်(၁)တပ်ရင်းထံမှ သိရသည်။

အောက်တိုဘာလ၂၂ ရက်နေ့ နံနက် ၇ နာရီ ၃၀ မိနစ်တွင် ဂန့်ဂေါမြို့နယ် ကန်ရွာမှ ဂန့်ဂေါမြို့ဘက်သို့ ပြန်လည် ဆုတ်ခွာလာသော အင်အား ၁၀၀ ခန့်ရှိ အကြမ်းဖက် စစ်တပ် တပ်မ ၅၅ ခြေလျင်စစ်ကြောင်းကို ကျွဲနန်းရွာအရှေ့ဘက် ရိုးမတောင်ကြောပေါ်တွင် စောင့်ကြို တိုက်ခိုက်ခဲ့ပြီး ၄၅ မိနစ်ကြာ ထိတွေ့ တိုက်ပွဲဖြစ်ပွားခဲ့ကြောင်း သိရသည်။

အကြမ်းဖက် စစ်တပ် စစ်ကြောင်းကို ဂန့်ဂေါခရိုင် အမှတ်(၁) တပ်ရင်း တပ်ခွဲ ၁ တပ်ခွဲမှူးဦးစီးသည့် အင်အား ၆၀ ရှိ PDF တပ်ရင်း၊ ABSDF၊ KKG၊ ၊၇၀၅ ၊ပကဖ ပူးပေါင်းကာ တိုက်ခိုက်ခဲ့ပြီး အကြမ်းဖက် စစ်တပ်ဘက်မှ ထိခိုက် သေဆုံးမှုရှိသော်လည်း အရေအတွက် အတည်မပြုနိုင်သေးကြောင်း ဂန့်ဂေါခရိုင် အမှတ်(၁)တပ်ရင်းက ထုတ်ပြန်ထားသည်။

အလားတူ စစ်ကိုင်းတိုင်း မြောင်မြို့နယ် ကျောက်ရစ် ရဲစခန်းမှ ထွက်လာသော စစ်ကောင်စီတပ်သားများ ဖောက်ခွဲ တိုက်ခိုက်ခဲ့ကြောင်း သိရသည်။

အောက်တိုဘာလ ၂၂ ရက်နေ့ ည ၁၁ နာရီ ၃၅ မိနစ်ခန့်တွင် ကျောက်ရစ် ရဲစခန်းမှ ထွက်လာသော စစ်ကောင်စီတပ်ဖွဲ့များကို ဗိုလ်နေတိုး ဦးဆောင်သည့် ကာကွယ်ရေး အဖွဲ့က မိုင်းဆွဲ တိုက်ခိုက် ခဲ့ကြောင်းသိရသည်။

” ကျောက်ရစ်ခွေးခြံက ထွက်လာတဲ့ စစ်ခွေးတွေကို မိုင်းဆွဲ တိုက်ခိုက်ခဲ့ပါတယ်။ အဲ စစ်ခွေးတွေထဲမှာ အမျိုးသမီးတွေလည်းပါတယ်။ ကျွန်တော်တို့ ဖောက်ခွဲလိုက်တဲ့ ချိန်မှာ သေပါပီတော့လို့ အော်တဲ့အသံတွေကြားရတယ်။ စစ်ခွေးကောင်တွေကလည်း ဆဲတာတွေရှိတယ်။ ဖောက်ခွဲမှုပြီးတာနဲ့ ရမ်းပြီးကို ပစ်တော့တာပဲ” ဟု ဗိုလ်နေတိုးက ရန်ကုန်ခေတ်သစ် မီဒီယာသို့ ပြောဆိုသည်။ khit thit

ဧရာဝတီတိုင်း၊ အင်္ဂပူမြို့ အမှတ် ၁ အခြေခံပညာ အထက်တန်းကျောင်းမှာ အောက်တိုဘာ ၁၆ ရက် မနက်အစောပိုင်းက မီးလောင်ကျွမ်းခဲ့တာနဲ့ ပတ်သက်ပြီး စစ်ကောင်စီတပ်သားတွေနဲ့ ရဲတွေက ကျောင်းမှာစာသင်တဲ့ ဆရာ ဆရာမတွေကို ခေါ်ယူစစ်ဆေးနေပါတယ်။

စာသင်ကျောင်းမီးလောင်မှုနဲ့ပတ်သက်ပြီး ကျောင်းအုပ်အပါဝင် ဆရာ ဆရာမ ၄၀ ကျော်ကို အလှည့်ကျစနစ်နဲ့ ခေါ်ယူစစ်ဆေးနေတာလို့  ဒေ သခံကျောင်းသားမိဘတွေက ပြောပါတယ်။

“ဆရာ ဆရာမအားလုံး ၄၀ ကျော်လောက်ရှိမယ်ထင်တယ် အဲ့တာအကုန်အစစ်ခံရမယ်ပြောတယ်။ ခုလည်း သူတို့အလှည့်ကျအစစ်ခံနေရတာ အဖမ်းခံရတာမျိုးတော့ မရှိသေးဘူး”လို့ ကျောင်းသားမိဘတဦးက ပြောပါတယ်။

စာသင်ကျောင်းမီးလောင်မှုကိစ္စ စစ်ကောင်စီလက်အောက်ခံတပ်သားတွေနဲ့ ရဲတွေက စစ်ကောင်စီခန့် တိုင်းအစိုးရအဖွဲ့ကိုတင်ပြခဲ့လို့ ခုလိုမျိုး ဆရာ ဆရာမတွေကို ကြိမ်းမောင်း စစ်ဆေးနေတာဖြစ်နိုင်တယ်လို့ ဆိုပါတယ်။

စာသင်ကျောင်းမီးလောင်မှုဟာ လျှစ်မီးဝါယာရှော့ဖြစ်ပြီးလောင်ကျွမ်းတာမျိုးဖြစ်နိုင်တယ်လို့ အင်္ဂပူမြို့မှာ မီးသတ်တာဝန်ထမ်းဆောင်နေတဲ့ လုံခြုံရေးအရ အမည်မဖော်လိုတဲ့ မီးသတ်တပ်ဖွဲ့အရာရှိတဦးက ခန့်မှန်းပြောပါတယ်။ DVB

ကရင်ပြည်နယ်ရှိ ကော့ကရိတ်မြို့ကို KNU ဦးဆောင်သော ပူးပေါင်းတပ်များက ဝင်ရောက်တိုက်ခိုက်ပြီးနောက် ခြောက်လကျော်ကြာ တပ်စွဲထားသည့် စခန်းများမှနေ၍ စစ်ကောင်စီတပ် ပြန်ဆုတ်ခွာသွားပြီဖြစ်ကြောင်း သိရသည်။

ကော့ကရိတ်မြို့ရှိ အထွေထွေအုပ်ချုပ်ရေးမှူးရုံးနှင့် ခရိုင်ရဲတပ်ဖွဲ့ရုံးတို့ကို အောက်တိုဘ ၂၁ ရက်တွင် ကရင်အမျိုးသားအစည်းအရုံး (KNU) လက်အောက်ခံ KNLA ဦးဆောင်သော ပူးပေါင်းတပ်များက ဝင်ရောက်စီးနင်းတိုက်ခိုက်ပြီးနောက် ယမန်နေ့အထိ စစ်ရေးတင်းမာနေခဲ့သော် လည်း ယနေ့တွင် စစ်ကောင်စီတပ်များ ပြန်ဆုတ်သွားကာ ရက်အတန်အကြာ ပိတ်ထားသည့် အာရှလမ်းမလည်း ပြန်ပွင့်သွားဖြစ်သည်။

စစ်ကောင်စီတပ်က ခြောက်လကျော်ကြာ တပ်စွဲခဲ့သော ကော့ကရိတ်မြို့နယ်တောင်ပိုင်း ကမိုင်ကုန်း၊ ကော့နွဲရွာနှင့် တတန်ကူးရွာတို့ရှိ စခန်းများမှနေ၍ ပြန်လည်ဆုတ်ခွာသွားပြီဖြစ်ကြောင်း KNU ၏ ကရင်အမျိုးသားတပ်မတော် (KNLA) မှ ဒုတိယဗိုလ်မှူးကြီး စောရန်နိုင်က ပြော သည်။​

“အခု ကော့ကရိတ်တောင်ပိုင်း၊ အပြင်ဘက်ပတ်လည်မှာတော့ စစ်ကောင်စီဘက်က မရှိတော့ဘူး။ မြို့ထဲမှာ ပြန်ထိုင်နေကြတယ်။ အာရှလမ်းလည်း ပြန်ဖွင့်ပေးလိုက်ပါပြီ။ ကျွန်တော်တို့တပ်တွေကတော့ လမ်းဘေးတစ်ဖက်တစ်ချက်ကို ပြန်ဆုတ်ပေးထားပါတယ်” ဟု ပြောသည်။

အဆိုပါစခန်းများမှနေ၍ စစ်ကောင်စီတပ်ပြန်ဆုတ်ရန် KNLA က လွန်ခဲ့သည့်ခြောက်လတွင် စာထုတ်ပြန်၍ အကြောင်းကြားခဲ့သည်ဟုလည်း သိရသည်။

“ကျွန်တော်တို့ကလည်း ကော့ကရိတ် မြောက်ဘက်ခြမ်းမကျော်ဖို့နဲ့ သူတို့ကလည်း အာရှလမ်းတောင်ဘက်ခြမ်းကို မကျော်ဖို့။ နောက်ပိုင်းတိုက်ပွဲတွေဖြစ်လာတော့ သူတို့က တောင်ဘက်ခြမ်းကို ကျော်လာပြီး ရွာတွေထဲ စောနကပြောတဲ့ နေရာသုံးခုမှာ တပ်စွဲထားတော့ အဲဒီပတ်ဝန်းကျင်ရွာကဒေသခံတွေ အိမ်ကို မပြန်နိုင်ကြတာ ၆ လ ၇ လ ရှိလာပြီ” ဟု KNLA ဗိုလ်မှူးကြီးစောရန်နိုင်က ပြောသည်။

“အဲဒါကို ပြန်ဆုတ်ပေးဖို့ ခရိုင်က တရားဝင်စာထုတ်ပြီး ပြောခဲ့တယ်။ သူတို့ပြန်မဆုတ်တော့ တိုက်ပွဲဖြစ်လာပြီး အခုတော့ အဲဒီစခန်းတွေ ပြန်ဆုတ်သွားကြပြီ”

ယမန်နေ့တွင် စစ်ကောင်စီတပ်က လက်နက်ကြီးပစ်ခတ်မှုကြောင့် ကော့ကရိတ်မြို့နယ်ရှိ တောင်ကြာအင်းကျေးရွာတွင် အရပ်သား ၂ ဦး ဒဏ် ရာရရှိခဲ့ပြီး မြောက်ကြာအင်းကျေးရွာဘုန်းကြီးကျောင်းလည်း လက်နက်ကြီးထိမှန်ကာ ဘုန်းကြီးတစ်ပါးနှင့် အရပ်သားတစ်ဦးသေဆုံးခဲ့ပြီး ကိုရင် ၂ ပါးဒဏ်ရာရရှိခဲ့ကြောင်း ဒုတိယဗိုလ်မှူးကြီးစောရန်နိုင်ထံမှ သိရသည်။

ထို့အပြင် စစ်ကောင်စီတပ်၏ ဗုံးကြဲတိုက်ခိုက်မှုကြောင့် ကော့ကရိတ်မြို့၊ ဝါဆိုဦးဘုန်းကြီးကျောင်းမှ ကိုရင် ၂ ဦး ထိခိုက်ဒဏ်ရာရရှိကာ လက် နက်ကြီးပစ်ခတ်မှုကြောင့် ၁၃ နှစ်အောက်ကလေး ၆ ဦးအပါအဝင် ၂၀ ဦး ထိခိုက်ဒဏ်ရာရရှိခဲ့ပြီး အရပ်သား ၄ ဦး သေဆုံးခဲ့သည်။

လတ်တလောတွင် စစ်ကောင်စီဘက်မှ သေဆုံးမှုနှင့် ဒဏ်ရာရရှိမှုများရှိသော်လည်း မြေပြင်အချက်အလက်များ စုစည်းနေဆဲဟု သိရသည်။ ကော့ကရိတ်မြို့တွင်း တိုက်ပွဲအတွင်း လက်နက်များလည်း သိမ်းဆည်းရမိခဲ့ကြောင်း ဒုတိယဗိုလ်မှူးကြီးစောရန်နိုင်က ဆိုသော်လည်း အသေး စိတ်ကို ထုတ်ဖော်ပြောခြင်းမရှိပါ။

ကော့ကရိတ်တိုက်ပွဲအပြီး ထိုင်း-မြန်မာနယ်စပ်ကုန်သွယ်ရေးတွင် အဓိကအရေးပါသည့် အာရှလမ်းမကြီး (ကော့ကရိတ်− မြဝတီလမ်းပိုင်း) မှာ ငါးရက်ကြာ ပိတ်ထားပြီးနောက် ယနေ့ နံနက်ပိုင်းတွင် ပြန်လည်ဖွင့်ပေးလိုက်ပြီဖြစ်ကြောင်း ဗိုလ်မှူးကြီး စောရန်နိုင်က အတည်ပြုသည်။

“အာရှလမ်းလည်း ပြန်ဖွင့်ပေးလိုက်ပါပြီ။ ကျွန်တော်တို့တပ်တွေကတော့ လမ်းဘေး တစ်ဖက်တစ်ချက်ကို ပြန်ဆုတ်ပေးထားပြီး ဖွင့်ပေးထားပါတယ်” ဟု ဆိုသည်။

အာရှလမ်းမကြီး ပြန်ပွင့်သွားပြီဖြစ်သဖြင့် ပိတ်မိနေသည့် ခရီးသည်တင်ယာဉ်နှင့် ကုန်တင်ယာဉ် အစီးရေ ၁၀၀၀ ကျော် ပြန်လည်သွားလာနေပြီဖြစ်ကြောင်း နယ်စပ်ကုန်စည်ပို့ဆောင်ရေးလုပ်ကိုင်နေသူ အချို့ထံမှလည်း သိရသည်။

“မနေ့ညကစပြီး နည်းနည်းစီ ပြန်တက်လာတယ် ဒီနေ့မနက်တော့ မြဝတီကို အတော်များများ တက်လာနေကြပြီလို့ အကြောင်းကြားတယ်” ဟု ကုန်စည်ပို့ဆောင်ရေး လုပ်ကိုင်နေသူ မြဝတီမြို့ခံတစ်ဦးက ပြောသည်။myanmar now

ဧရာဝတီတိုင်း၊ ပုသိမ်မြို့အခြေစိုက် မြို့ပြပြောက်ကျားတပ်ဖွဲ့အတွက် သတင်းထောက်လှမ်းရေးတပ်သား စတင်ခေါ်ယူနေတယ်လို့ မြို့ပြပြောက်ကျားတပ်ဖွဲ့က အောက်တိုဘာ ၂၀ ရက်နေ့က အသိပေးကြေညာထားပါတယ်။

တော်လှန်ရေးကိုပါဝင်လိုတဲ့ ဒေသခံပြည်သူတွေအနေနဲ့ မိမိတို့နေအိမ်ထဲမှာနေထိုင်ရင်း စစ်ကောင်စီတပ်သားတွေနဲ့ လက်အောက်ခံရဲတွေရဲ့ မြေပြင်လှုပ်ရှားမှုသတင်းတွေကို တော်လှန်ရေးအင်အားစုတွေဆီ ပေးပို့ပေးရမယ်လို့ မြို့ပြပြောက်ကျားတပ်ဖွဲ့တာဝန်ရှိသူက ဒီဗွီဘီကို ပြောပါတယ်။

“အိမ်ထဲနေပြီးတော့ ဒီစကစ တပ်သားတွေနဲ့ ရဲတွေသတင်းကို ပို့ပေးဖို့ တော်လှန်ရေးတပ်သားခေါ်ယူတာပါ။ အစ်ကိုတို့အဖွဲ့အနေနဲ့ စကစ ယာဉ်တန်းမိုင်းဆွဲတာ၊ ရေကြောင်းရဲတပ်ဖွဲ့ကို ဝင်တိုက်တာတွေလုပ်ထားတဲ့ အဖွဲ့ဖြစ်တယ်။ အဲ့ဒီလိုလုပ်ဖို့အတွက်လည်း ဒေသခံတွေရဲ့ သ တင်းပေးပူးပေါင်းဖို့ လိုအပ်ပါတယ်။” 

ပုသိမ်မြို့ပြပြောက်ကျားတပ်ဖွဲ့အနေနဲ့ တော်လှန်ရေးစတင်ချိန်ကနေ အောက်တိုဘာအထိ မစ်ရှင်ပေါင်း ၃၅ ခု ဆောင်ရွက်နိုင်ခဲ့တယ်လို့ ဆိုပါတယ်။

လက်ရှိအချိန်မှာ အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနရဲ့ ချမှတ်ထားတဲ့ စည်းမျဉ်းစည်းကမ်းတွေနဲ့အညီ စစ်အာဏာရှင်ကို တော်လှန်နေတဲ့အဖွဲ့အစည်းဖြစ်ပြီး MOD ရဲ့ ချမှတ်ထားတဲ့ စစ်ရေး ၁ နှစ်တာ ကာလဟာ အလွန်အရေးကြီးတာကြောင့် ပုသိမ်ခရိုင်အတွင်းက ပြည်သူတွေကို သတင်းထောက်လှမ်းရေး တပ်သားအဖြစ်ပါဝင်ဖို့ ဖိတ်ခေါ်ရတာလို့ ပြောပါတယ်။

ပုသိမ်မြို့ပြပြောက်ကျားတပ်ဖွဲ့ဟာ အောက်တိုဘာ ၂ ရက်နေ့က စစ်အုပ်စုပိုင် မိုင်တဲလ်ရုံးကို ဗုံးခွဲတိုက်ခိုက်ခဲ့တယ်လို့ သိရပါတယ်။ DVB