SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မန္တလေးတိုင်းအတွင်း ဝန်ထမ်းအိမ်ရာတွေမှာ နေထိုင်တဲ့ CDM ဝန်ထမ်းတွေကို ဖမ်းဆီးအရေးယူဖို့ မန္တလေးတိုင်းစစ်ကောင်စီက လျှို့ဝှက်ညွှန်ကြားချက်ကို နိုဝင်ဘာလ တတိယပတ်ထဲမှာ ထုတ်ခဲ့ပါတယ်။

မန္တလေးတိုင်းရှိ အရပ်ဘက် ဌာနဆိုင်ရာတွေမှာ CDM ဝန်ထမ်းတွေကို ပြန်လည်စိစစ်နိုင်မှု အားနည်းချက်အပေါ် အခွင့်ကောင်းယူကာ CDM ဝန်ထမ်းတွေဟာ ဝန်ထမ်းအိမ်ရာတွေမှာ ပြန်လည်ဝင်ရောက် နေထိုင်တာတွေ ရှိတယ်ဆိုပြီး ညွှန်ကြားချက်မှာ ဖော်ပြထားပါတယ်။

CDM ဝန်ထမ်းတဦးက “ဝန်ထမ်းအိမ်ရာမှာ နေထိုင်တဲ့သူ မရှိနိုင်ဘူး။ ဘာလို့လဲဆိုတော့ CDM ဝန်ထမ်းက နဂိုကတည်းကမှ စိုးရိမ်နေကြတာ၊ ဘာလို့ ဝန်ထမ်းအိမ်ရာတွေမှာ နေမှာလဲ” လို့ မှတ်ချက်ပေးပါတယ်။

CDM ဝန်ထမ်းတွေကို ဌာနဆိုင်ရာ ဝန်ထမ်းအိမ်ရာတွေမှာ ဝင်ရောက်နေထိုင်မှု မရှိစေရေးအတွက် စစ်ဆေးဆောင်ရွက်ကာ ဝင်ရောက်နေထိုင်ပါက ဖမ်းဆီးနိုင်ရေး စီမံဆောင်ရွက်သွားဖို့ ကာကွယ်ရေးဦးစီးချုပ်ရုံး (ကြည်း) ကလည်း အကြောင်းကြားလာတာ ရှိတယ်လို့ သိရပါတယ်။ DVB

မင်္ဂလာဒုံက အိမ်ဖျက်ခံလိုက်ရတဲ့ သူတွေ ရန်ကုန်၊ မြောက်ဥက္ကလာပမြို့နယ်၊  (ည)ရပ်ကွက်၊ ရွှေပေါက္ကံမြို့သစ်နဲ့ ပုရွက်ဆိတ်ကုန်းရပ်ကွက်တွေမှာ ရွှေ့ပြောင်းနေထိုင်နေတယ်ဆိုပြီး နိုဝင်ဘာ ၂၉ ရက်ညပိုင်းက စစ်ကောင်စီအုပ်ချုပ်ရေးနဲ့ လ.ဝ.က အဖွဲ့ဝင်တွေ ဧည့်စာရင်းဝင်စစ်ခဲ့ပေမဲ့ ဖမ်းဆီးခံရသူတော့ မရှိဘူးလို့ ဒေသခံတွေက ပြောပါတယ်။ 

မြောက်ဥက္ကလာပ၊ ည ရပ်ကွက်ရှိ ဘုမ္မာလမ်းသွယ်တွေကို ည ၁၀ နာရီခွဲဝန်းကျင်နဲ့ ရွှေ‌ပေါက္ကံမြို့သစ်နဲ့ ပုရွက်ဆိတ်ကုန်းရပ်ကွက်တွေမှာတော့ ည ၁၂ နာရီလောက်မှာ ဝင်စစ်ဆေးခဲ့တာဖြစ်ပါတယ်။

ဧည့်စာရင်းမတိုင်သူတွေထဲက တချို့ကို စစ်ဆေးစရာရှိတယ်လို့ဆိုကာ ရုံးခေါ်သွားပြီး အဲဒီညပဲ ပြန်လွှတ်ပေးခဲ့တယ်လို့ သိရပါတယ်။

မြောက်ဥက္ကလာဒေသခံတစ်ဦးက “သူတို့က သတင်းအတိကျနဲ့ကို လာတာ၊ ဘယ်လမ်း၊ ဘယ်အိမ်မှာ ဘယ်သူ‌တွေ ပြောင်းလာသလဲပေါ့။ ဒီက လမ်းမှူးနဲ့ အုပ်ချုပ်ရေးမှူးတွေတောင် မသိရကောင်းမလား ဆိုပြီး အော်ငေါက်သွားသေးတယ်”လို့ ပြောပါတယ်။ 

လက်နက်ကိုင် ၈ ယောက်လောက် လိုက်ပါလာပြီး ရပ်ကွက်အုပ်ချုပ်ရေးနဲ့ လ.ဝ.က ဝန်ထမ်းတွေဟာ ရပ်ကွက်တွေထဲ ညပိုင်း ဝင်စစ်ဆေးခဲ့တာဖြစ်ပါတယ်။

ပုရွက်ဆိတ်ကုန်းရပ်ကွက်က ရပ်ကွက်ဓမ္မာရုံနဲ့ သံလမ်းဟောင်းက အိမ်တွေကို  ဒီဇင်ဘာလအတွင်း ဖျက်သိမ်းဖို့ သတ်မှတ်ထားတဲ့ နောက်ဆုံးရက်မှာ  မဖျက်ပေးပါက ဖျက်ခ ကျပ် ၃ သိန်းပေးရမယ်လို့  ခြိမ်းခြောက်‌သွားကြောင်း သိရပါတယ်။  

ရပ်ကွက်နေသူတဦးက “ဟိုတလောက ပျဉ်းမပင်မှာ ဖျက်တဲ့အိမ်တွေ ဒီဘက် ပြောင်းလာလား မေးတယ်။ ဒီရပ်ကွက်ထဲ မရှိသေးဘူးလို့ ပြောတော့ ရောက်လာတာနဲ့ သူတို့ကို အကြောင်းကြားဖို့ ပြောတယ်။ ဧည့်စာရင်းကိုလည်း စာအုပ်နဲ့အပြင် ဓာတ်ပုံနဲ့ပါ တိုင်ဖို့ ပြောသွားတယ်”လို့ ပြောပါတယ်။ 

ပြီးခဲ့တဲ့ နိုဝင်ဘာ ၂၅ ရက်ကစပြီး မြောက်ဥက္ကလာပမြို့နယ်အတွင်းက ရပ်ကွက်တချို့မှာ မင်္ဂလာဒုံမြို့နယ်က လာနေသူတွေကို ဧည့်စာရင်းမပေးဖို့နဲ့ အိမ်တွေ၊ အဆောင်တွေ ငှားရမ်းနေထိုင်ခွင့် မပေးဖို့ ညွှန်ကြားထားခံရတယ်လို့ အုပ်ချုပ်ရေးအဖွဲ့ထံက သိရပါတယ်။ DVB

စျေးကွက်အတွင်း မိုးစပါးဆန်အသစ်တွေ ဝင်ရောက်နေပေမဲ့ အမျိုးအစားအလိုက် ဆန်တအိတ်ကို ကျပ် ၂,၀၀၀ ကနေ  ၃,၀၀၀ အထိ စျေးနှုန်း ထပ်မံမြင့်တက်လာတယ်လို့ ဆန် လက်လီအရောင်းဆိုင်တွေဆီက သိရပါတယ်။

ပြည်တွင်း ဆန်လက်လီစျေးကွက်အတွင်းမှာ ပြီးခဲ့တဲ့ နိုဝင်ဘာ ဒုတိယပတ်က  ဧရာဝတီပေါ်ဆန်း ဆန်ဟောင်း (၁၀၈ ပေါင်) တအိတ်ကို ကျပ် ၇၅,၀၀၀ ရှိခဲ့ရာက အခုအခါ ၇၈,၀၀၀ ကျပ်ထိ စျေးနှုန်းမြင့်တက်လာပါတယ်။ အလားတူ ရက် ၉၀ ဆန်ဟောင်း တအိတ်ကို ၅၆,၀၀၀ ကျပ်ကနေ အခု ၅၈,၀၀၀ ကျပ်၊ ရွှေဘိုပေါ်ဆန်းဆန် တအိတ်ကို အရင် ၉၉,၀၀၀ ကျပ်ကနေ  အခု ၁၀၂,၀၀၀ ကျပ်အထိ အသီးသီး စျေးနှုန်းမြင့်တက် နေပါတယ်။

ပြည်တွင်းဆန်စျေးနှုန်း မြင့်တက်နေတဲ့ အဓိကအကြောင်းရင်းက အခုနှစ်မှာ မိုးစပါး အထွက်နည်းပြီး စံချိန်တင် စပါးစျေးကောင်းနေတာ၊ မိုးစပါးပေါ်ချိန် ကုန်သည် လှောင်လက်တွေက ဝယ်ယူစုဆောင်းတာတွေ ရှိနေတာ၊ စစ်ကောင်စီက တပ်ရိက္ခာအတွက် ဝယ်ယူနေတာ၊ ပြည်ပကို ဆန်တင်ပို့မှု အားကောင်းနေတာ စတဲ့အချက်တွေကြောင့် ဖြစ်တယ်လို့ ဆန်စပါးလုပ်ငန်းရှင်တဦးက သုံးသပ်ပါတယ်။

ပြီးခဲ့တဲ့ မိုးစပါးအသစ်ပေါ်ချိန်က စပါးတင်း ၁၀၀ ကို အမြင့်ဆုံး ကျပ် ၈ သိန်းကျော်သာ ရှိခဲ့ပေမဲ့ အခုနှစ် မိုးစပါးမှာတော့ တင်း ၁၀၀ ကို အ မျိုး အစားအလိုက် ကျပ် ၁၂ သိန်းအထက်ကနေ အမြင့်ဆုံး ကျပ် ၁၄ သိန်းကျော်ထိ ရှိနေပါတယ်။ တနှစ်အတွင်း စပါးစျေး ၇၀ ရာခိုင်နှုန်းကနေ ၈၀ ရာခိုင်နှုန်းထိ မြင့်တက်နေတာပါ။

ဧရာဝတီတိုင်းက စပါးစိုက်တောင်သူတဦးက “စပါးစျေးကတော့ ဒီနှစ် အကျမရှိဘူး။ တက်ပြီးရင်း တက်နေတာ။ အဝယ်လည်းရှိတယ်။ တက်မှလည်းဖြစ်မှာ၊ ဒီနှစ် စိုက်ပျိုးစရိတ် ကုန်ကျစရိတ်က များတယ်လေ။ ဧရာဝတီတိုင်းမှာတော့ လှောင်လက်တွေ တောက်လျှောက်ဝယ်နေတယ်” လို့ ပြောပါတယ်။

အခုလို စပါးစျေးရော၊ ဆန်စျေးပါ စံချိန်တင် စျေးမြင့်တက်နေပေမဲ့ တောင်သူလယ်သမားများ အခွင့်အရေး ကာကွယ်ရေးနှင့် အကျိုးစီးပွားမြှင့်တင်ရေး ဦးဆောင်အဖွဲ့က အခုနှစ် မိုးစပါး စပါးတင်း ၁၀၀ ရဲ့ အခြေခံဈေးနှုန်းကို ကျပ် ၆၃၀,၀၀၀ သာ သတ်မှတ်ခဲ့ပါတယ်။

၂၀၂၁ ခုနှစ်ကထွက်ရှိတဲ့ မိုးစပါးကို အခြေခံရည်ညွှန်းစျေး ၅၄၀,၀၀၀ သာ သတ်မှတ်ခဲ့ပြီး အခုနှစ် မိုးစပါးမှာ ကျပ်တသိန်းဝန်းကျင် တိုးမြှင့်သတ်မှတ်ခဲ့ပေမဲ့ ဒီစျေးနှုန်းက လယ်သမားတွေအတွက် တွက်ခြေကိုက်တဲ့စျေး မဟုတ်ပါဘူး။

အခုနှစ် မိုးစပါးစိုက်ပျိုးချိန်မှာ သွင်းအားစုတွေဖြစ်တဲ့ ဓာတ်မြေသြဇာ၊ မြေဆီ၊ ပိုးသတ်ဆေး၊ အပင်အားဆေး အစရှိတဲ့ သွင်းအားစုစျေးနှုန်းတွေ ကြီးမြင့်နေတာကြောင့် တောင်သူတွေဟာ စိုက်ပျိုးစရိတ်ငွေ ပိုကုန်ကျခဲ့ရပြီး အများစုက သွင်းအားစုကို လျှော့ချသုံးစွဲခဲ့ရတာဖြစ်လို့  အခုစပါးပေါ်ချိန်မှာ အထွက်နှုန်းကျဆင်းတဲ့ အခြေအနေတွေကို ရင်ဆိုင်နေရတာပါ။ DVB

စစ်ကိုင်းတိုင်း မူးမြစ်နှင့် ဧရာဝတီမြစ်ကြားရှိ ခင်ဦးဒေသကို စစ်ကောင်စီက စစ်ကြောင်း သုံးကြောင်းအပြင် ‌လေတပ်သုံးပြီး စီးနင်းတိုက်ခိုက်နေရာ သီတင်းပတ်နှစ်ပတ်အတွင်း ကလေးတစ်ဦး၊ အရပ်သားများ၊ တော်လှန်ရေးသမားများ သေဆုံးသူ စုစုပေါင်း ၂၃ ဦးအထိ ရှိနေသည်။

နိုဝင်ဘာ ၂၃ တွင် ၁၄ နှစ်အရွယ် ငါးတန်းကျောင်းသား မောင်ရဲမင်းနောင်သည် ခင်ဦးမြို့ မြောက်ဘက်၂ မိုင်ခွဲခန့်အကွာ ကံသာယာရွာအနီး စစ်ရှောင်နေစဉ် စစ်သားများက ပစ်သတ်ခဲ့သည်ဟု ဒေသခံတို့က ပြောသည်။ 

ထိုစစ်ကြောင်းမှာ ခင်ဦးမြို့ပေါ်မှ တိုက်ပွဲဖြစ်ရာ မုံလှကျေးရွာကို စစ်ကူလာခြင်းဖြစ်ပြီး စစ်ကြောင်းပါ စစ်သားများက ပစ်သတ်ခဲ့သည်ဟု ကံသာယာကျေးရွာဒေသခံတစ်ဦးက ပြောသည်။

“ကြောက်အားလန့်အားနဲ့ တောထဲမှာ ပုန်းနေကြတာဗျာ၊ စစ်ကောင်စီက သေနတ်ဖောက်သံကြားတော့ ကြောက်အားလန့်အားနဲ့ ပြေးတဲ့အချိန် ကလေး (မောင်ရဲမင်းနောင်) ကို ပစ်လိုက်တာ” ဟု အသက် ၃၀ ဝန်းကျင် အဆိုပါ ဒေသခံအမျိုးသားက ပြောသည်။

ယခုလ ၁၅ ရက်မှစပြီး မူးမြစ်အနောက်ဘက် ရေဦးမြို့မှ ထွက်လာသည့် စစ်ကြောင်းတစ်ခုသည် ခင်ဦးမြို့နယ် အနောက်တောင်ပိုင်းသို့ စတင်ဝင်ရောက်လာပြီး ကန့်ဘလူမြို့နယ်ဘက်မှ ထွက်လာသည့် စစ်ကြောင်းနှစ်ခုသည် နိုဝင်ဘာ ၁၉ နှင့် ၂၃ တို့တွင် ခင်ဦးမြို့နယ်မြောက်ခြမ်းကို စီးနင်းခဲ့ခြင်း ဖြစ်သည်။

လေကြောင်းမှ ပစ်ခတ်မှု၊ လက်နက်ကြီးကျရောက်ပေါက်ကွဲမှုကြောင့် အရပ်သား ၁၃ ဦး သေဆုံးကြောင်း၊ တော်လှန်ရေးသမား ၁၀ ဦး တိုက် ပွဲအတွင်း သေဆုံးကြောင်း ခင်ဦးမြို့နယ် ပြည်သူ့ကာကွယ်ရေးအဖွဲ့ (ပကဖ) ပြန်ကြားရေးအရာရှိက အတည်ပြုသည်။

“သက်ကြီးရွယ်အိုတွေ မီးထဲပါသွားတာတွေ ရှိတယ်။ ဖမ်းဆီးသတ်ဖြတ်တာတွေရှိတယ်၊ ကလေးသူငယ်တွေဆိုလည်း ပြေးဟယ်လွှားဟယ်နဲ့ ပစ်သတ်ခံရတာတွေရှိတယ်။ မြစ်တော်ရွာက ၆၅ နှစ်အရွယ် အဖိုးကြီးဆို တောင်ဝှေးနဲ့ သွားနေတာကို နောက်ကနေ ပစ်သတ်သွားတာ” ဟု ကိုလူချောက ပြောသည်။

ပြည်သူ့ကာကွယ်ရေးတပ်မတော် (PDF) ရွေဘိုခရိုင်တပ်ရင်း ၃ အခြေစိုက်ရာ ခင်ဦးမြို့နယ်တွင် ဒေသခံကာကွယ်ရေးတပ်ပေါင်းစုများနှင့် စစ်ကောင်စီတပ်တို့ နေ့စဉ် တိုက်ပွဲများဖြစ်နေပြီး ယခုလ ၂၃ ရက်က ဖြစ်ပွားခဲ့သည့် မုံလှရွာအနီးတိုက်ပွဲသည် အပြင်းထန်ဆုံးဖြစ်ကာ စစ်ရဟတ်ယာဉ်လည်း သွားရောက်တိုက်ခိုက်ခဲ့သည်ဟု သိရသည်။

“ဒါက ခင်ဦးမြို့နယ်မှာ အကြီးဆုံးတိုက်ပွဲလို့ ပြောလို့ရတယ်၊ အပြင်းဆုံးတိုက်ပွဲပဲ၊ လေကြောင်းက တစ်နာရီနီးနီး ဆက်တိုက်ပစ်ပြီး အောက်ကခြေလျင်က ဆက်တိုက်တက်တာ” ဟု တိုက်ပွဲတွင် ပါဝင်ခဲ့သည့် မုံလှကျေးရွာကာကွယ်ရေးအဖွဲ့ဝင်တစ်ဦးက ဆိုသည်။

ထိုရွာသည် ကက်သလစ်သာသနာပိုင် ချားလ်စ်မောင်ဘို၏ ဇာတိရွာဖြစ်သည်။

ငါးတန်းကျောင်းသား ပစ်သတ်ခံရသည့်နေရာနှင့်မနီးမဝေးတွင် ကံသာယာကျေးရွာ ကာကွယ်ရေး အဖွဲ့ဝင် အသက် ၂၅ နှစ် အရွယ် ကိုထွန်းထွန်းဝင်း ဖမ်းဆီးခံရပြီး ခေါင်းဖြတ်သတ်ဖြတ်ခံရသည်။ 

ထို့နောက် အဆိုပါစစ်ကြောင်းနှစ်ကြောင်းသည်  မုံလှကျေးရွာအနီးရှိ သာဝတ္ထိကျေးရွာတွင် ပေါင်းသွား ပြီး အနီးရှိကျေးရွာများကို စီးနင်းမီးရှို့ခဲ့ပြီး နိုဝင်ဘာ ၂၈ တွင် မြင်းဒေါင်းကျေးရွာ မှတစ်ဆင့် ရေဦးမြို့နယ်ဘက်သို့ပြန်ဆုတ်သွားကြောင်း ရွာခံများထံမှ သိရသည်။

စစ်သားများပြန်ထွက်သွားသဖြင့် မြင်းဒေါင်းကျေးရွာအတွင်း ရွာသားများက ဝင်ရောက်ကြည့်ရှုရာ ဈေးဆိုင်တစ်ခုအတွင်း မီးလောင်ထားသည့် ရုပ်အလောင်း ၃ လောင်း တွေ့ရကြောင်း ထိုရွာခံတစ်ဦး က မြင်တွေ့ခဲ့ရပုံကို ပြောသည်။

“ဈေးဆိုင်တစ်ဆိုင်ထဲ ထည့်ပြီး မီးရှို့သွားတာ၊ မသေမရှင် ရှို့တာနဲ့တူတယ်ဗျ၊ တစ်ယောက်နဲ့ တစ်ယောက် ဖက်လျက်လေးတွေ ဖြစ်နေတာ၊ ရုပ်တွေတော့ မသဲကွဲတော့ဘူး”ဟု ရုပ်အလောင်းများကို သွားရောက်ကြည့်ရှုခဲ့သည့် အထက်ပါရွာခံ အမျိုးသားက ဆိုသည်။

သို့သော်လည်း ထို ၃ ဦးမှာ ကာကွယ်ရေးအဖွဲ့ဝင်များမဟုတ်ဘဲ စစ်ကြောင်း စဝင်သည့်နေ့က ဖမ်းဆီးခံလိုက်ရသည့် မြင်းဒေါင်းရွာသားများသာဖြစ်ကြောင်း ၎င်းက အခိုင်အမာပြောသည်။

အဆိုပါစစ်ကြောင်းများ သီတင်းပတ် နှစ်ပတ်အတွင်း စီးနင်းမီးရှို့မှုကြောင့် ခင်ဦးမြို့နယ်ရှိ ‌ပေါင်းလဲကုန်း၊ လက်ပံကြီး၊ မဒေါင်းကြီး၊ ရွှေကာ၊ ဆီဆုံလေး၊ နှဲတွင်း၊ စောကြီး၊ သနပ်စိန်၊ မုံလှ၊ မြင်းဒေါင်း၊ မြစ်တော် စသည့် ကျေးရွာ ၁၁ ရွာမှ နေအိမ် ၇၀၀ ကျော် မီးလောင်ပြာကျခဲ့သည်။

ဒေသခံ နှစ်သောင်းကျော် ထွက်ပြေးနေရပြီး အရေးပေါ်အကူညီများလည်း လိုအပ်နေသည်၊ ဒေသခံ ကာကွယ်ရေးအဖွဲ့ များလည်း  နှစ်ပတ်ကြာ ခုခံမှုအပြီး ကျည်ဆန်ကုန်နေသည်ဟု ဒေသခံကာကွယ်ရေးအဖွဲ့ ခေါင်းဆောင်တစ်ဦးက ပြောသည်။ 

“အခက်အခဲတွေကတော့ ကျည်ဆန် မရှိတာပဲ၊ တိုက်ပွဲတစ်ပွဲဖြစ်ပြီးရင်တောင် နောက်ထပ်ထိပ်တိုက် တွေ့နေရင် မပစ်ရဲတဲ့အခြေအနေပေါ့။ ပစ်ရဲတဲ့သတ္တိတော့ ရှိတယ်၊ ပစ်ဖို့ ကျည်ဆန် မရှိတာပေါ့ဗျာ”‌ ဟု သူက ပြောသည်။ myanmar now

စစ်ကိုင်းတိုင်း၊ ရွှေဘိုခရိုင်အတွင်းရှိ မီးဘေးသင့်ပြည်သူ အိမ်ထောင်စု ၅၀၀ ကျော်အတွက် လိုအပ်နေတဲ့ စောင်နဲ့ အနွေးထည်တွေကို S&C မီးဘေး စစ်ဘေး ပညာရေး ကူညီစောင့်ရှောက်ရေးအဖွဲ့က နိုဝင်ဘာ ၂၈ ရက်မှာ သွားရောက်လှူဒါန်းခဲ့တယ်လို့ သိရပါတယ်။

ပြည်သူတွေရဲ့ ထောက်ပံ့မှုနဲ့ အညာဒေသရဲ့ ဆောင်းတွင်းကာလကို အန်တုနိုင်ဖို့ လတ်တလော လိုအပ်နေတဲ့ စောင်အထည် ၄၁၀ နဲ့ အနွေး ထည် ၂၇၀ ထည်တို့ကို လှူဒါန်းထားနိုင်ပြီး အိမ်ထောင်စုတိုင်းကို နေအိမ်ဆောက်လုပ်ပေးနိုင်ဖို့နဲ့ စောင်နဲ့ အနွေးထည်တွေ လှူဒါန်းပေးနိုင်ဖို့ အလှူရှင်တွေ လိုအပ်နေသေးတယ်လို့ S&C မှ တာဝန်ရှိသူက ပြောပါတယ်။

“အိမ်ထောင်စု ၆၀၀ နီးပါးအတွက် စောင်နဲ့ အနွေးထည် အပြည့်လှူမှာပါ။ အိမ်ထောင်တစုကို စောင်တထည်နဲ့ အနွေးထည်တထည်နှုန်းပေါ့။ တချို့တဝက်တော့ သွားလှူပြီးပါပြီ။ ကျန်တာတွေအတွက်လည်း ငွေချေထားပြီးပြီ။ လောလောဆယ် အိမ် ၆၅ လုံး ထပ်ဆောက်ပေးဖို့ လုပ်နေပါတယ်။ ဒီဇင်ဘာလထဲမှာ အပြီး ဆောက်လုပ်နိုင်မယ်လို့ ယုံကြည်ပါတယ်။”

ပြီးခဲ့တဲ့ရက်ပိုင်းကလည်း မီးဘေးသင့်ပြည်သူတွေအတွက် S&C အဖွဲဲ့က ထန်းရွက်မိုး ထရံကာ တဲအိမ်တလုံးကို ၂ သိန်းနှုန်းနဲ့ အိမ် ၅၀ ကျော် ဆောက်လုပ်ပေးထားပါတယ်။

ရွှေဘိုခရိုင်အတွင်းရှိ ကျေးရွာတွေကို စစ်ကောင်စီတပ်က ပြီးခဲ့တဲ့ ဩဂုတ်လ ပထမပတ်မှာ မီးရှို့ဖျက်ဆီးခဲ့တာကြောင့် အိမ်ခြေ ၆၀၀ နီးပါး မီးလောင်ပျက်စီးကာ လူဦးရေ ၂,၀၀၀ ကျော် အိုးမဲ့အိမ်မဲ့ ဖြစ်ခဲ့ရပါတယ်။ DVB

စစ်ကိုင်းတိုင်း၊ ထီးချိုင့်မြို့နယ်ရှိ ကျေးရွာ ၅ ရွာကို အကြမ်းဖက် စစ်တပ်က ၃ ရက်ဆက်တိုက် မီးရှို့ဖျက်ဆီးနေကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

နိုဝင်ဘာလ ၂၈ ရက်နှင့် ၂၉ ရက်နေ့တွင် အကြမ်းဖက် စစ်တပ်က ထီးချိုင့်မြို့နယ်အတွင်းရှိ အလယ်တောရွာ၊ ဆားတွင်းရွာ၊ အင်ကြင်းကုန်းရွာနှင့် အင်းတိန်ရွာ တို့ကို မီးရှို့ဖျက်ဆီးခဲ့ကြောင်း၊ ယနေ့ နိုဝင်ဘာလ ၃၀ ရက်နေ့တွင် အင်းတိန်ရွာနှင့် လေသာရွာတို့ကို ထပ်မံမီးရှို့ဖျက်ဆီးနေ သည်ဟု သိရှိရသည်။

” လေသာရွာကို စစ်တပ်က ဒီနေ့ နိုဝင်ဘာ၃၀ရက်နေ့ မွန်းလွဲပိုင်းမှာ မီးရှို့နေတယ်။ နံနက်ပိုင်းကလည်း အင်းတိန်ရွာကို မီးရှို့ခဲ့တယ်။ ရွာထဲကနေ မီးခိုးတွေကတော့ မြင်မကောင်းအောင်ကိုမြင်နေရတယ်။ ရွာထဲကို နံနက်ခင်း ၉ နာရီ အချိန်တည်းက စစ်ခွေးတွေ ရွာထဲဝင်လာတယ်။ မွန်း လွဲပိုင်း ရောက်တော့ မီးရှို့တာဘဲ မီးလောင်အရေအတွက်ကတော့ အတိကျ မသိရသေးဘူး။ ရွာထဲကလည်း စစ်ခွေးတွေက မထွက်သေးဘူး။ အလယ်တောရွာအနီးမှာ PDFနဲ့တိုက်ပွဲဖြစ်ပြီး စစ်ခွေးတွေဘက်က အကျဆုံးများလို့ အခုလိုရွာတွေကို မီးရှို့နေတာဖြစ်နိုင်တယ်” ဟု ဒေသခံပြည်သူတစ်ဦးက​ပြောဆိုသည်။

နိုဝင်ဘာလ ၂၈ ရက်နေ့ မွန်းလွဲ ၂ နာရီ ၁၅ မိနစ်က အလယ်တော စံပြကျေးရွာကို အကြမ်းဖက် စစ်တပ် မီးရှို့ဖျက်ဆီးခြင်းကြောင့် ပြည်သူပိုင် နေအိမ် ၈၆ လုံးမီးလောင်ပြာကျပြီး ကျွဲ၊ နွား၊ လယ်ယာသုံးစက်ကိရိယာများ နှင့်အိမ်မွေးတိရိစ္ဆာန်များ ၊ဆန်၊စပါး တင်းပေါင်း ထောင်ချီလောင် ကျွမ်း ဆုံးရှုံးခဲ့ကြောင်း သိရသည်။ khit thit