ကျောက်ဖြူတွင် ရပ်ကျေးအုပ်ချုပ်ရေးတာ ဝန်ရှိသူ ၃ ဦးကို စစ်ကောင်စီတပ်က ဖမ်းဆီး
ရခိုင်ပြည်နယ်၊ ကျောက်ဖြူမြို့မှာ ရပ်ကျေးအုပ်ချုပ်ရေး တာဝန်ရှိသူ သုံးယောက်ကို စစ်ကောင်စီတပ်က အောက်တိုဘာ ၃၁ ရက်မှာ ဖမ်းဆီးသွားတယ်လို့ ကျောက်ဖြူမြို့ခံတွေက ပြောပါတယ်။
ကျောက်ဖြူမြို့ စေတီယျရပ်ကွက် အုပ်ချုပ်ရေးမှူး ဦးစိုးလှထွန်း၊ ထွေအုပ်စာရေး ဦးစိုးမင်းနိုင်နဲ့ ရာအိမ်မှူးတယောက်တို့ကို စစ်တပ်က ဖမ်းဆီးသွားတာလို့ ကျောက်ဖြူမြို့ခံတဦးက ပြောပါတယ်။
“အဖမ်းခံလိုက်ရတာက စေတီယျ အုပ်ချုပ်ရေးမှူး၊ ထွေအုပ်ဝန်ထမ်း ရပ်ကွက်စာရေးနဲ့ ရာအိမ်မှူးတဦးတို့ဖြစ်တယ်။ အုပ်ချုပ်ရေးမှူးကိုတော့ ၃၁ ရက်နေ့ မနက်ပိုင်းက နေအိမ်မှာ ဖမ်းဆီးခံလိုက်ရတာဖြစ်ပြီး ထွေအုပ်စာရေးကတော့ ညနေပိုင်းမှာ ဖမ်းဆီးခံလိုက်ရတာ ဖြစ်တယ်။ နောက် ရာအိမ်မှူးကတော့ ညအချိန်မှာ ဖမ်းသွားတာလို့ သိရတယ်။ ဘယ်မှာထိန်းသိမ်းထားတယ် ဆိုတာတော့ မသိရသေးဘူး။ ခမရ ၃၄ တပ်ရင်းမှာ ဖြစ်ဖို့တော့ များတယ်။”
ကျောက်ဖြူမြို့နယ်မှာ ပြီးခဲ့တဲ့လတွေကလည်း ခရိုင်ငါးလုပ်ငန်းဦးစီး အပါအဝင် မြို့ခံ ၂၀ ကျော်လောက်ကို စစ်ကောင်စီက ဖမ်းဆီးထားပြီး ပုဒ်မအမျိုးမျိုးဖွင့်ကာ တရားစွဲဆိုထားပါတယ်။
ရခိုင်ပြည်နယ်မှာ စစ်ကောင်စီနဲ့ အေအေတို့အကြား တိုက်ပွဲပြင်းထန်လာပြီးနောက် စစ်ကောင်စီက ရခိုင်ပြည်နယ်ရှိ မြို့နယ်တချို့က နိုင်ငံရေးတက်ကြွလှုပ်ရှားသူတွေနဲ့ လူမှုရေးတက်ကြွလှုပ်ရှားသူတွေကို လိုက်လံဖမ်းဆီးတာတွေ ရှိနေပါတယ်။ DVB
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 