ကုမ္ပဏီများကို စိစစ်မှုများ တိုးမြှင့်လုပ်ဆောင်မည်ဖြစ်၍ ဥပဒေမလိုက်နာကြောင်း တွေ့ရှိပါက အရေးယူမှုများ ပြုလုပ်မည်ဟု စစ်ကောင် စီလက်အောက်ခံ DICA ထုတ်ပြန်
ကုမ္ပဏီများကို စိစစ်မှုများ တိုးမြှင့်လုပ်ဆောင်သွားမည်ဖြစ်ပြီး ဥပဒေမလိုက်နာကြောင်း တွေ့ရှိပါက အရေးယူမှုများ ပြုလုပ်သွားမည်ဖြစ်ကြောင်း စစ်ကောင်စီလက်အောက်ခံ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DICA) က ယမန်နေ့ နိုဝင်ဘာလ ၄ရက်နေ့ ရက်စွဲဖြင့် ထုတ်ပြန်ထားသည်။
ကုမ္ပဏီများနှင့် ကုမ္ပဏီဒါရိုက်တာများ၊ ကုမ္ပဏီတွင် ပါဝင်သူများအနေဖြင့် မြန်မာနိုင်ငံ ကုမ္ပဏီများ ဥပဒေကို ပိုမိုလိုက်နာစေရန်အတွက် အ ရည်အသွေးမြင့်သော စိစစ်မှုများကို တိုးမြှင့်လုပ်ဆောင်သွားမည်ဖြစ်ပြီး လိုက်နာမှုမရှိကြောင်း တွေ့ရှိပါက သတ်မှတ်ထား သောဒဏ်ကြေးငွေချမှတ်ခြင်းနှင့် အခြားသောအရေးယူမှုများကို ပြုလုပ်မည်ဖြစ် ကြောင်း ထုတ်ပြန်ခဲ့ခြင်းဖြစ်သည်။
လက်ရှိတွင်ကုမ္ပဏီများနှင့် ကုမ္ပဏီတွင်ပါဝင်သူ တချို့သည် မြန်မာနိုင်ငံ ကုမ္ပဏီ များဥပဒေတွင် ပြဌာန်းပါရှိသည့် ဒါရိုက်တာများနှင့် ပါဝင်သူ များ၏ တာဝန်များကို သိလျက်နှင့်ဖြစ်စေ၊ မသိ၍ဖြစ်စေ လိုက်နာဆောင်ရွက်ရန် ပျက်ကွက်နေသည်ဟု အဆိုပါ ထုတ်ပြန်ချက်တွင် ဖော်ပြထားသည်။
မှတ်ပုံတင်စာရင်း တင်သွင်းထားသော ကုမ္ပဏီ၏ မှတ်ပုံတင်ရုံးခန်းလိပ်စာသည် မြေပြင်တွင် အမှန်တကယ် တည်ရှိမနေခြင်း၊ ဥပဒေအရ ပြုစုထားရှိရန် လိုသော မှတ်ပုံတင်စာရင်းစာအုပ်နှင့် အခြားလိုအပ်သော အချက်အလက်များကို ပြုစု၍ သိမ်းဆည်းထားရမည့် လိုအပ်ချက်ကို သိ လျက်နှင့်ဖြစ်စေ မသိ၍ ဖြစ်စေ လိုက်နာ ဆောင်ရွက်ရန် ပျက်ကွက်ခြင်းနှင့် အချို့သော ကုမ္ပဏီအဖွဲ့အစည်းများသည် ငွေကြေးဆိုင်ရာ ကိစ္စများဆောင်ရွက်ရာတွင် ဘဏ်များ၌ သီးခြားငွေစာရင်း ဖွင့်လှစ်ရ မည့်အစား လူပုဂ္ဂိုလ်ဆိုင်ရာ ဘဏ်စာရင်းများကို အသုံးပြု၍လုပ်ငန်းဆောင် ရွက် နေကြသည်ကို တွေ့ရှိရကြောင်း ဆိုထားသည်။
လက်ရှိတွင် နှစ်စဉ်အစီရင်ခံစာတင်ပြရန် ပျက်ကွက်သဖြင့် ဆိုင်းငံ့ခံရခြင်း၊ မှတ်ပုံတင်စာရင်းမှ ပယ်ဖျက်ခံရခြင်း စသည်ဖြင့် အရေးယူခံရသော ကုမ္ပဏီအရေ အတွက် အများအပြားရှိနေကြောင်း သိရသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 