SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ပဲခူးတိုင်း၊ အင်းတကော်မြို့နယ်တွင် ရဲလိုက်ဖမ်းခံရသည့် ဆိုင်ကယ်သူခိုးသည် ပျူစောထီးဟုနာမည်ထွက်နေသူ၏ နေအိမ်အတွင်း ဝင်ပြေးကာ ထွက်ပြေးလွတ်မြောက်သွားကြောင်း ဒေသခံများက မဇ္စျိမပြောသည်။

ပြီးခဲ့သည့် နိုဝင်ဘာလ ၁၄ ရက်နေ့က ပဲခူးမြို့မှ ဆိုင်ကယ်ခိုးယူမောင်းနှင်လာသည့် အမျိုးသားတစ်ဦးကို အင်းတကော်မြို့နယ် အရောက်တွင် စစ်ကောင်စီတပ်လက်အောက်ခံ ရဲတပ်ဖွဲ့များက လိုက်လံဖမ်းဆီးခဲ့ခြင်း ဖြစ်သည်။

ထိုသို့ လိုက်လံဖမ်းဆီးစဉ် ဆိုင်ကယ်ခိုးယူလာသူက အင်းတကော်မြို့မစျေးအနီးရှိ ပျူစောထီးဟု နာမည်ထွက်နေသည့် ကိုနေအောင်ဆိုသူ၏ နေအိမ်အတွင်း ဝင်ပြေးသွားခဲ့ခြင်း ဖြစ်သည်။

“ပဲခူးကနေ ဆိုင်ကယ် ခိုးလာတဲ့ သူခိုးက အင်းတကော်ကို မောင်းပြေးလာတာ။ သူ ခိုးလာတဲ့ ဆိုင်ကယ်က GPS ပါတယ်။ ပိုင်ရှင်က အပိုင်စခန်းကို လှမ်းပြောပြီး ဖမ်းခိုင်းတာနဲ့တူပါတယ်။ အဲ့မှာ လိုက်ဖမ်းကြတာ။ သူခိုးက မောင်းပြေးရင်း မလွတ်တော့ နေအောင်ရဲ့ အိမ်ထဲ ဝင်ပြေးသွားတာ “ ဟု ဒေသခံတစ်ဦးက မဇ္စျိမကို ပြောသည်။

ထိုသို့ နေအိမ်အတွင်း ပြေးဝင်သည့် ဆိုင်ကယ်ခိုးယူသူကို စစ်ကောင်စီ လက်အောက်ခံ ရဲတပ်ဖွဲ့က အနောက်မှ လိုက်ကာ သေနတ်ဖြင့် ပစ်ခတ်ခဲ့ခြင်း ဖြစ်သည်။

ယင်းသို့ ပစ်ခတ်မှုကြောင့် ပျူစောထီးဟုဆိုသူ၏ နေအိမ်အတွင်းမှ သေနတ်သံများ ထွက်ပေါ်ခဲ့ပြီး ထိုဖြစ်ရပ်အပေါ် ကာကွယ်ရေးတပ်ဖွဲ့က ဝင်ရောက် ရှင်းလင်းခြင်းဖြစ်ကြောင်း ဒေသတွင်းသတင်းထွက်ပေါ်မှုများ ရှိခဲ့သည်။

“အင်းတကော်စျေးအနီးက နေအောင်ဆိုတဲ့ ပျူ အိမ်ထဲကနေ ညဘက်ကြီး သေနတ်သံ လေးငါးဆယ်ချက်ကြားရတယ်။ပထမက PDFပဲလုပ်သလိုလို အချင်းချင်းချသလိုထင်နေကြတာ။ ပြီးမှ ဆိုင်ကယ် သူခိုးကို ပစ်ပြီး ဖမ်းမှန်းသိတယ်” ဟု နောက်ထပ်ဒေသခံတစ်ဥိိးက ပြောသည်။

ထို နေအိမ် ပိုင်ရှင် ကိုနေအောင်ဆိုသူသည် ဒေသအတွင်း ဖွဲ့စည်းထားသည့် ပျူစောထီးအဖွဲ့တွင်ပါဝင်နေသည်ဟု နာမည်ထွက်နေသူဖြစ်ပြီး ကာကွယ်ရေးတပ်ဖွဲ့များနှင့် မြို့ခံလူထုက စောင့်ကြည့်နေသူဖြစ်ကြောင်း သိရသည်။

ထိုဖြစ်စဉ်ဖြစ်ပွါးပြီး နောက်တစ်ရက် နိုဝင်ဘာလ ၁၅ ရက်နေ့တွင် ကိုနေအောင်ဆိုသူ၏ နေအိမ်သို့ ရဲတပ်ဖွဲ့ဝင်များက သွားရောက်ကာ ညှိနှိုင်းတောင်းပန်မှုများ ပြုလုပ်ခဲ့ကြောင်း ဒေသခံများထံက သိရသည်။ mizzima

ဧရာဝတီတိုင်း၊ ကန်ကြီးထောင့်မြို့နယ်တွင် ယနေ့ နိုဝင်ဘာလ ၁၆ ရက် နေ့လယ် ၁၂ နာရီအချိန်ခန့်က ၂၀၂၀ ခုနှစ် ရွေးကောက်ပွဲ အနိုင်ရ NLD လွှတ်တော်ကိုယ်စားလှယ် ဦးဝေလင်းထွဋ် နေအိမ်ကို စစ်ကောင်စီတပ်များနှင့်ရဲများက ဝင်ရောက်ရှာဖွေခဲ့ကြောင်း ဒေသခံများထံက သိရသည်။

ကျွန်းကြီးကျေးရွာအုပ်စု၊ ကျောက်သံကျွန်းကျေးရွာရှိ ၎င်း၏ နေအိမ်ကို စစ်ကောင်စီတပ်နှင့်ရဲအင်အား ၁၆ ဦးခန့်က ဝင်ရောက်ရှာဖွေခဲ့ခြင်းဖြစ်သည်ဟု ဒေသခံတစ်ဦးကပြောသည်။

“မဂူကျွန်းဘက်ကနေ စစ်ကားတွေနဲ့လာပြီး ကိုဝေလင်းထွဋ်ရဲ့အိမ်ရှေ့တံခါးတွေ၊ အိမ်နောက်ဖေး တံခါးတွေကိုဖျက်ပြီး ဝင်ရှာတာပါ။ဘာမှ ယူသွားတာမျိုးတော့မရှိဘူး။ဘာကြောင့်လာရှာတယ်ဆိုတာတော့ မပြောတတ်ဘူး”ဟု ဒေသခံကဆိုသည်။

ဦးဝေလင်းထွဋ်သည် စစ်အာဏာသိမ်းပြီးနောက်ပိုင်း စစ်ကောင်စီတပ်နှင့် ရဲများက လိုက်လံဖမ်းဆီးနေသည့်အတွက် ရှောင်တိမ်းနေသည်ဟုလည်း ဒေသခံ၏ ပြောပြချက်အရ သိရသည်။

ထို့အပြင် စစ်အာဏာသိမ်းပြီး လပိုင်းအကြာက ကန်ကြီး ထောင့်မြို့၊အမှတ်(၇)ရပ်ကွက်၊ ဘဲဂရက် အရပ်ရှိ NLD ပြည်သူ့လွှတ်တော်ကိုယ် စားလှယ် ဦးဝေယံအောင်၏ နေအိမ်ကို စစ်ကောင်စီတပ် နှင့်ရဲများက လာရောက်ချိပ်ပိတ်သွားသည်ဟု ကန်ကြီးထောင့်မြို့ပေါ်နေ ဒေသခံများက ပြောသည်။

ကန်ကြီးထောင်မြို့တွင် စစ်ကောင်စီတပ်များနှင့် ရဲများက ညအချိန်ဧည့်စာရင်း စစ်ခြင်းများ၊ မာလာကုန်းလမ်းခွတွင် ပိတ်ဆို့စစ်ဆေးခြင်းများကို မကြာခဏဆိုသလိုပြုလုပ်နေသည်ဟု ဒေသခံများကပြောသည်။mizzima

ကယား(ကရင်နီ)ပြည်နယ် လွိုင်ကော်မြို့နယ်ရှိ တပ်စခန်းကုန်းတစ်ခုကို ပြီးခဲ့သည့် ရက်ပိုင်းက လက်လွှတ် ဆုံးရှုံးခဲ့ရကြောင်း ပအိုဝ်းအမျိုးသားကာကွယ်ရေးတပ်ဖွဲ့ (PNDF) ပြောရေးဆိုခွင့်ရှိသူက ပြောသည်။

လွိုင်ကော်မြို့မြောက်ဘက်ရှိ အဆိုပါ စခန်းကို နိုဝင်ဘာ ၄ ရက် ညနေ ၄ နာရီခန့်တွင် စစ်ကောင်စီတပ်သား အင်အား ၂၀၀ ခန့်က စစ်ကြောင်းသုံးကြောင်းခွဲကာ ဝင်ရောက်စီးနင်းခဲ့သဖြင့် လက်လွှတ်ခဲ့ရခြင်းဟု PNDF ပြောရေးဆိုခွင့်ရှိသူ ခွန်သီဟထူးဇော်က ပြောသည်။

“အင်အားတော်တော်များတာပေါ့ စခန်းမှာလည်း ကျည်မရှိဘူး အဲဒါ ဘယ်လိုလုပ်ကြမလဲပေါ့။ ချက်ချင်းတော့ မတက်လာသေးဘူး။ သူတို့က အပြန်အလှန်ချိတ်ဆက်ကြတာပေါ့။ ထွက်ပေါက်တွေလိုက်ပိတ်ပေမဲ့လည်း အဲဒီဘက်တစ်ကြောက တောလည်း ထူတော့ ကျွန်တော်တို့ ဆုတ်ခွာလာတယ်” ဟု ၎င်းက ဆိုသည်။

စခန်းသည် တောင်ပေါ်တွင်ရှိခြင်းကြောင့် ပြန်ခုခံလျှင် ရသော်လည်း ကျည်မလုံလောက်ခြင်း၊ စစ်ကောင်စီဘက်က သာလွန်အင်အားဖြင့် ထွက်ပေါက်များကို ပိတ်ဆို့ပြီး အချိန်ယူ ဝင်စီးသည့်အတွက် ခုခံခြင်းမပြုဘဲ ဆုတ်ခွာခဲ့ရသည်ဟု ဆိုသည်။

စခန်းဝင်မစီးခံရမီ တစ်ရက်အလို နိုဝင်ဘာ ၃ တွင် လွိုင်ကော်မြို့နယ် နွားလဝိုးကျေးရွာအနီးတွင် စစ်ကောင်စီစစ်ကြောင်းကို PNDF က မိုင်းထောင်တိုက်ခိုက်ခဲ့သဖြင့် PNDF စခန်းတည်နေရာကို သတိပြုမိသွားခြင်း ဖြစ်နိုင်ကြောင်း ၎င်းက ဆက်ပြောသည်။

“စစ်အသုံးအဆောင်ပစ္စည်းတွေ လက်နက်ခဲယမ်းတွေ ကျွန်တော်တို့ အကုန်ယူလာနိုင်တယ်။ ကျန်တဲ့ ရိက္ခာခြောက်တို့ ယူနီဖောင်းအသစ်တွေ ဘက်တံဆိပ်တွေကတော့ ကျန်ခဲ့တယ်” ဟုလည်း ခွန်သီဟထူးဇော်က ပြောသည်။

စခန်းဝင်စီးခံရပြီး နောက်တစ်နေ့ နိုဝင်ဘာ ၅ တွင် စစ်တပ်က စခန်းကို မီးရှို့ဖျက်ဆီးခဲ့သည်ဟု ဆိုသည်။

“အဲဒီစခန်းက ရန်သူတွေလည်း ဝင်ထားတော့ ကျွန်တော်တို့ ပြန်ပြီးတော့ထိုင်ဖို့ အနေအထားလည်း မရှိဘူး။ ဒေသခံ မဟာမိတ်အဖွဲ့တွေကိုလည်း ကျွန်တော်တို့ လှမ်းပြောထားတယ် ကျွန်တော်တို့ မရှိတော့ဘူးဆိုတာ” ဟု ၎င်းက ပြောသည်။

နိုဝင်ဘာ ၁၄ တွင် စခန်း၏ အရှေ့မြောက်ဘက်၌ PNDF ဘက်တံဆိပ်ယူနီဖောင်းဖြင့် အမျိုးသားတစ်ဦးကို မြေမြှုပ်ထားသည်ကို ၎င်းတို့၏ မဟာမိတ်ဖြစ်သည့် ကရင်နီတပ်ဖွဲ့တစ်ခုက တွေ့ရှိခဲ့ပြီး မည်သူမည်ဝါမှန်း စုံစမ်းမရသေးကြောင်း ခွန်သီဟထူးဇော်က ဆိုသည်။

ရုပ်အလောင်းမှာ သေဆုံးထားသည်မှာ ၂ ရက်ခန့်သာရှိမည်ဟု ခန့်မှန်းရပြီး စခန်းဝင်စီးချိန်က အသတ်ခံရခြင်း မဟုတ်နိုင်ကြောင်း ပြောသည်။

ပအိုဝ်းအမျိုးသား ကာကွယ်ရေးကာကွယ်ရေးတပ်ဖွဲ့ (PNDF) ကို စစ်အာဏာသိမ်းပြီး ၃ လအကြာ ၂၀၂၁ ခုနှစ် မေလတွင် ဖွဲ့စည်းခဲ့ပြီး ရှမ်း ပြည်နယ်တောင်ပိုင်းရှိ တောင်ကြီးနှင့် ရွာငံဒေသတို့ရှိ တော်လှန်ရေးအဖွဲ့များနှင့် မဟာမိတ်ဖွဲ့ထားသည်။

ထို့အပြင် ပအိုဝ်းပြည်သူ့ကာကွယ်ရေးတပ်ဖွဲ့ (ခမ်းဒွမ်) လည်းရှိပြီး အဆိုပါအဖွဲ့မှာ မြန်မာနိုင်ငံတောင်ပိုင်း ပအိုဝ်းလူမျိုးများ နေထိုင်ရာဒေသတွင် လှုပ်ရှားသည်။ myanmar now

စစ်ကိုင်းတိုင်း၊ အရာတော်-မုံရွာ ကားလမ်းပေါ် သစ်ကျင်းကြီးလမ်းခွဲအနီးတွင် ကင်းပုန်းဝတ်နေသော စစ်ကောင်စီတပ်ကို ယမန်နေ့ နိုဝင် ဘာလ၁၅ရက် နေ့လယ်၂နာရီ ၃၅မိနစ် အချိန်ခန့်တွင် ကာကွယ်ရေးတပ်ဖွဲ့က လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း သိရသည်။

စစ်ကောင်စီ အရာရှိလမ်းကြောင်းလာရန်ရှိသောကြောင့် အရာတော်-မုံရွာလမ်းပေါ် သစ်ကျင်းကြီးလမ်းခွဲအနီးတွင် စစ်ကောင်စီတပ်ဖွဲ့ အင် အား ၇၀နီးပါး ကင်းပုန်းဝပ် စောင့်ဆိုင်းနေစဥ် ကာကွယ်ရေးတပ်ဖွဲ့က လက်နက်ကြီးဖြင့် ပစ်ခတ်တိုက်ခိုက်ခဲ့ခြင်းဖြစ်သည်ဟု သိရသည်။

“အင်အားများတယ်ဗျ။ ၇၀လောက်ရှိတယ်။ အရာတော်တပ် ၊သစ်ကျင်းကြီးတပ်က စစ်သားတွေပါ။ ပြန်ပစ်တာမျိုးတော့ရှိပါတယ်”ဟု Danger Force LPDF အဖွဲ့ တာဝန်ရှိသူက ပြောသည်။

လက်နက်ကြီးဖြင့် ပစ်ခတ်တိုက်ခိုက်မှုကြောင့် စစ်ကောင်စီတပ်ဖွဲ့ဘက်မှ ငါးဦးသေဆုံးကာ အများအပြား ဒဏ်ရာရရှိခဲ့ပြီး ကာကွယ်ရေးတပ်ဖွဲ့ဘက်မှ အန္တရာယ်ကင်းစွာ ဆုတ်ခွာနိုင်ခဲ့ကြောင်း သိရသည်။

နိုဝင်ဘာလ ၁၅ရက်နေ့မှ စတင်ကာ ကြေညာချက် တစ်စုံတစ်ရာ မထုတ်ပြန်မချင်း အရာတော်-မုံရွာလမ်းပိုင်းအား အသုံးပြုခြင်းရပ်နားရန် ပြည် သူ့ကာကွယ်ရေးတပ်ဖွဲ့က ထုတ်ပြန်ထားသည်။

စစ်ကောင်စီတပ်က အရာတော်-မုံရွာလမ်းပေါ်ရှိ ကမ်းပျူချောင်းတစ်ဝိုက်နှင့် ကျွန်းဖိုပင်ရွာတွင် ရောက်ရှိနေပြီး မုံရွာဘက်အခြမ်းတွင်လည်း တားဆီးစစ်ဆေးမှုများ ရှိနေသောကြောင့် ထုတ်ပြန်ခြင်းဖြစ်ကြောင်း သိရသည်။ mizzima

တောင်ကုန်း တောင်တန်းပေါများရာ မကွေးတိုင်း ယောဒေသအတွင်း ရွာစဉ်လှည့် စစ်ရေးလှုပ်ရှားနေသည့် စစ်ကောင်စီအဖွဲ့ လက်ချက်ဖြင့် ယမန်နေ့တွင် ဆောမြို့နယ် လက်ပန်းရွာနှင့် ပဆုပ်ရွာမှ ဒေသခံများ နေအိမ် ၁၅၀ ကျော် မီးလောင်ဆုံးရှုံးသည်။ 

ကျောက်ထုမြို့အခြေစိုက် အမြောက်တပ်မှ အင်အား ၉၀ ပါ စစ်ကြောင်းသည် အရှေ့တောင်ဘက် ၁၀ မိုင်ကျော်ရှိ ဆောမြို့နယ် လက်ပန်းရွာကို ယမန်နေ့(နိုဝင်ဘာ ၁၅) နံနက် ၁၁ နာရီခွဲဝန်းကျင်တွင် စတင်မီးရှို့သည်ဟု ဒေသတွင်း သတင်းရင်းမြစ်တို့ထံမှ သိရသည်။

မွန်းလွဲပိုင်းတွင် ကပ်လျက်ရှိ ပဆုပ်ရွာကို စစ်ကောင်စီက ထပ်မံမီးရှို့ကြောင်း၊ အိမ်ခြေ ၂၄၀ နီးပါးရှိ လက်ပန်းရွာနှင့် အိမ်ခြေ ၁၅၀ ဝန်းကျင်ရှိ ပဆုပ်ရွာတို့မှ နေအိမ် ထက်ဝက်နီးပါး ပျက်စီးသွားကြောင်း ဒေသခံတို့က ပြောသည်။

“မီးရှို့ပြီးတော့ သူတို့ထွက်သွားတဲ့အချိန်မှာ မီးငြှိမ်းသတ်ဖို့ ရွာထဲကို ဝင်တဲ့အချိန်မှာ ရေအိုး၊ ရေကန်တွေပါ ဖောက်ထားခဲ့တာ။ မီးငြှိမ်းလို့မရ အောင်။ အဲဒီတော့ မီးက ဘယ်လိုမှ ငြှိမ်းသတ်လို့မရဘဲနဲ့ တခြားမလောင်သေးတဲ့ အိမ်တွေကို မကူးအောင်ပဲ လုပ်နိုင်တာပေါ့” ဟု ဒေသကာကွယ်ရေးအဖွဲ့ဝင်တစ်ဦးက ဆိုသည်။

ရွာနှစ်ရွာကို မီးဝင်ရှို့သည့် စစ်ကောင်စီတပ်ဖွဲ့ကို တော်လှန်ရေးအဖွဲ့ ၇ ဖွဲ့ပေါင်း၍ နှစ်နာရီ နီးပါးကြာ ဝိုင်းဝန်းတိုက်ခိုက်ခဲ့ကြောင်း၊ ၎င်းတို့ဘက်က ထိခိုက်မှု မရှိကြောင်း၊ စစ်ကောင်စီ တပ်ဖွဲ့အခြေအနေကိုမူ အတည်မပြုနိုင်သေးကြောင်းလည်း ကျောက်ထု PDF တာဝန်ရှိသူက ပြော သည်။

ပဆုပ်ရွာမှ ယမန်နေ့ ညပိုင်းက ပြန်လည်ဆုတ်ခွာသွားသည့် စစ်ကြောင်းနှင့် ယနေ့ (နိုဝင်ဘာ ၁၆) နံနက် ၉ နာရီဝန်းကျင်မှစတင်ကာ တိုက်ပွဲဆက်လက်ဖြစ်ပွားနေကြောင်း ဒေသကာကွယ်ရေးအဖွဲ့များထံမှ သိရသည်။

မကွေးတိုင်းမြောက်ပိုင်း ဂန့်ဂေါ၊ ထီလင်း၊ ကျောက်ထု၊ ဆော မြို့နယ်တို့ပါဝင်သည့် ယောဒေသသည် တောင်တန်းဒေသ ချင်းပြည်နယ်နှင့် နယ်နိမိတ်ချင်း ထိစပ်နေပြီး တော်လှန်ရေးအဖွဲ့များ အားကောင်းရာနယ်မြေဖြစ်သည်။

ချင်းပြည်နယ်သို့ ရိက္ခာနှင့် လက်နက်ခဲယမ်းများ ပို့ဆောင်ရာတွင် ကျောက်ထုမြို့ကို တစ်ထောက်နားရာအဖြစ် စစ်ကောင်စီတပ်က အသုံးပြုလေ့ရှိပြီး ကျောက်ထု-PDF နှင့် ဒေသခံ တော်လှန်ရေးအဖွဲ့ များက ကျောက်ထုမြို့နယ်အတွင်း မကြာခဏ ကြားဖြတ်တိုက်ခိုက်လေ့ရှိသည်။

စစ်ကောင်စီကလည်း ရှမ်းပြည်နယ် ကလောမြို့အခြေစိုက် တပ်မ (၅၅)၊ ရန်ကုန်တိုင်း၊ အင်းတိုင်အခြေစိုက် တပ်မ (၁၁)၊ မကွေးတိုင်း၊ ပခုက္ကူမြို့အခြေစိုက် တပ်မ (၁၀၁) တို့မှ တပ်များကို ထုတ်နုတ်ကာ ကျောက်ထုတွင် စစ်ရေးလှုပ်ရှားနေသည်မှာ လနှင့်ချီ ကြာနေပြီဟု ဒေသကာ ကွယ်ရေးအဖွဲ့များထံမှ သိရသည်။

လက်ရှိအချိန်တွင် ကျောက်ထုဒေသတွင်း စစ်ရေးတင်းမာနေသည့်အတွက် ဒေသခံများမှာ တောတောင်နှင့် နီးစပ်ရာ ကျေးရွာများတွင် ကြို တင်စစ်ရှောင်နေရသည်ဟု ဒေသတွင်းသတင်းများက ဆိုသည်။

အာဏာသိမ်းပြီး တစ်နှစ်ခွဲကျော်အတွင်း စစ်ကောင်စီလက်ချက်ဖြင့် နိုင်ငံအနှံ့ ပြည်သူပိုင် အိုးအိမ် ၂၀,၀၀၀ ကျော် ပျက်စီးခဲ့ကာ မြန်မာနိုင်ငံအလယ်ပိုင်းမှ စစ်ကိုင်းနှင့် မကွေးတိုင်းတို့တွင် အများဆုံး ပျက်စီးသည်ဟု အရပ်ဘက် အချက်အလက်ကောက်ယူရေးအဖွဲ့ Data for Myanmar က ဩဂုတ်လကုန်ပိုင်းတွင် ထုတ်ပြန်ထားသည်။

စစ်ကောင်စီကမူ ငြင်းလေ့ရှိသည်။ သို့သော် ၂၀၁၇၊ ၁၈ တွင် ရခိုင်ပြည်နယ်အတွင်း အလားတူ ကျူးလွန်မှုများဖြင့် အပြည်ပြည်ဆိုင်ရာတရား ရုံးတွင် စစ်ကောင်စီ အမှုရင်ဆိုင်နေရသည်။ myanmar now

NLD အစိုးရလက်ထက်က နေပြည်တော်မြို့တော်ဝန်ဒေါက်တာမျိုးအောင်နှင့် ဒုတိယမြို့တော်ဝန် ဦးရဲမင်းတို့၏ အယူခံအမှု ၁၀ မှုကို ပြည် ထောင်စုတရားလွှတ်တော်ချုပ်က ယနေ့ နိုဝင်ဘာလ ၁၆ ရက် တွင် ပလပ်လိုက်ကြောင်း သိရသည်။

အဆိုပါအမှုများကို ပြည်ထောင်စုတရားလွှတ်တော်ချုပ်တွင် လက်ခံရန် သင့်၊ မသင့် လျှောက်လဲချက် ကြားနာပြီးနောက် ပလပ်ခဲ့ခြင်းဖြစ် သည်။

ဒေါက်တာမျိုးအောင်၊ ဦးရဲမင်းဦး၊ နေပြည်တော်စည်ပင်သာယာရေးကော်မတီအဖွဲ့ဝင် ဦးမင်းသူနှင့် ပြည် ထောင်စုအစိုးရအဖွဲ့ရုံးဝန်ကြီးဌာန ပြည်ထောင်စုဝန်ကြီးဦးမင်းသူတို့အပေါ် အမိန့်ချမှတ်ထားသည့်အမှု များနှင့်ပတ်သက်ပြီး ပြည်ထောင်စုတရားလွှတ်တော်ချုပ်အထိ အယူခံ အဆင့်ဆင့်တက်ခဲ့ခြင်းဖြစ်သည်။

ယနေ့ ပြည်ထောင်စုတရားလွှတ်တော်ချုပ်က ပလပ်လိုက်သည့် အဂတိအမှုပေါင်း ၁၂ မှုရှိပြီး ဒေါက်တာ မျိုးအောင် ငါးမှု၊ ဦးရဲမင်းဦး ငါးမှု၊ ပြည်ထောင်စုဝန်ကြီး ဦးမင်းသူ တစ်မှုနှင့် စည်ပင်သာယာရေးကော်မတီ အဖွဲ့ဝင် ဦးမင်းသူ အမှုတစ်မှုပါဝင်သည်။

အဆိုပါ အယူခံများကို ပလပ်လိုက်ကြောင်း ပြည်ထောင်စုတရားလွှတ်တော်ချုပ်က ယနေ့ ညနေပိုင်းတွင် ထုတ်ပြန်ခဲ့သည့်အတွက် အထူးအယူခံ ဆက်တက်မည်ဖြစ်ကြောင်း တရားရုံးနှင့်နီးစပ်သူများကပြော သည်။ mizzima

ကချင်ပြည်နယ်၊ ဖားကန့်မြို့နယ်တွင် စစ်ကောင်စီတပ်က စစ်ကြောင်းထိုးလာစဉ် ကချင်လွတ်လပ်ရေးတပ်မတော် (KIA) နှင့် PDF ပူးပေါင်းတပ်ဖွဲ့များက ခုခံတိုက်ခိုက်ခဲ့သော်လည်း နောက်ဆုတ်ပေးလိုက်ရသည်ဟု သိရသည်။

ယခုလ ၁၅ ရက် မွန်းလွဲ ၁ နာရီခန့်က ဖားကန့်၊ မိုးညှင်းမြို့အကြား ညောင်ထောက်ကုန်း ဆိုသည့်နေရာ အနီးတွင် အင်အား ၁၀၀ ကျော်ဖြင့် စစ်ကြောင်းသုံးကြောင်းခွဲပြီးတက်လာသည့် စစ်ကောင်စီတပ်နှင့် KIA,PDF ပူးပေါင်းတပ်များ တိုက်ပွဲဖြစ်ပွားသည်။

သုံးနာရီကြာ တိုက်ပွဲဖြစ်ပွားပြီးနောက် PDF စစ်ဆေးရေးဂိတ်နှင့် ရှေ့တန်းစခန်းငယ်တချို့ လက်လွှတ်လိုက်ရသည်ဟု PDF အဖွဲ့နှင့် နီးစပ်သူ အသက် ၄၀ ကျော်အရွယ် ဖားကန့်ဒေသခံ အမျိုးသားတစ်ဦးက ပြောသည်။

“သူတို့ (စစ်ကောင်စီ) နောက်ပြန်ဆုတ်တာလား နေရာပြန်ယူတာလားတော့ မသိဘူး၊ ဒီဘက်ကတော့ နောက်ပြန်ဆုတ်တယ်။ အတွင်းသတင်းအရတော့ ဒီဘက်က အခြေအနေသိပ်မကောင်းဘူးပေါ့။ ရှေ့ပွိုင့်တွေနည်းနည်းတော့ လွှတ်ပေးလိုက်ရတယ်ပေါ့” အထက်ပါ အမျိုးသားက ဆိုသည်။

အဆိုပါစစ်ကြောင်းမှာ အင်းတော်ကြီးဒေသမှ စစ်ကြောင်းထိုးလာသည့်တပ်ဖြစ်ပြီး ဖားကန့်နှင့် မိုးညှင်းမြို့နယ်အကြားရှိ PDF အခြေစိုက်စခန်းအချို့ကို သိမ်းဆည်းရန် ကြိုးစားခြင်းဖြစ်နိုင်ကြောင်း ၎င်းက ဆက်ပြောသည်။

အဆိုပါ တိုက်ပွဲတွင် စစ်ကောင်စီတပ်မှ ထိခိုက်ကျဆုံးမှုများသည်ဟု သိရသော်လည်း မြေပြင်အချက်အလက်များကို အတိအကျမသိရသေးကြောင်း ဆိုသည်။ 

တိုက်ပွဲဖြစ်ပွားမှု အခြေအနေများကို သိနိုင်ရန် KIA ပြန်ကြားရေးတာဝန်ခံ ဗိုလ်မှူးကြီးနော်ဘူကို ဖုန်းဖြင့် ဆက်သွယ် မေးမြန်းသော်လည်း လက်ခံဖြေကြားခြင်း မရှိသေးပေ။

တိုက်ပွဲဖြစ်ပွားသည့်ဒေသသည် KIA တပ်မဟာ(၉) လက်အောက်ခံနယ်မြေဖြစ်ပြီး စစ်ကောင်စီတပ်မှ တပ်မ ၁၁ လက်အောက်ခံ ခြေလျင်တပ်ရင်း ခလရ (၄၂) မှတပ်များနှင့် တိုက်ပွဲဖြစ်ပွားခြင်းဖြစ်သည်ဟု ဒေသတွင်းသတင်းဌာနအချို့က ရေးသားထားသည်။

တိုက်ပွဲဖြစ်ပွားစဉ် ဖားကန့်မြို့ပေါ်ရှိ စစ်တပ်ဗျူဟာကုန်းမှလည်း လက်နက်ကြီးပစ်ကူများပေးခဲ့ပြီး ည ၈ နာရီခန့်တွင်လည်း ထပ်မံပစ်ခတ်ခဲ့သည်ဟု ဒေသခံအချို့က ပြောသည်။

တိုက်ပွဲဖြစ်ပွားပြီးနောက် ည ၇ နာရီခန့်တွင် ဖားကန့်ရှိ ကျောက်လုပ်ကွက်အချို့ ယာယီပိတ်သွားခဲ့သည်ဟု ဖားကန့်ဒေသခံအချို့က ဆိုသည်။

“နတ်မှော် ကချင်(လုပ်ကွက်)ဆိုက်က တစ်ခါမှ မပိတ်ဖူးဘူး၊ မနေ့ကတော့ ပိတ်သွားတယ်၊ ညပိုင်း ၇ နာရီ ၁၅ လောက်မှာ ပိတ်သွားတာ၊ တစ်ခါမှ မပိတ်ဖူးတဲ့ ဆိုက်တွေကလည်း ပိတ်တယ်၊ နတ်မှော်ကရော မှော်ထဲရှိသမျှ လုပ်ကွက်တွေ အကုန်တက်ပြေးကြတာ” ဟု အထက်ပါ ဖားကန့် ဒေသခံအမျိုးသားက ပြောသည်။

ယနေ့နံနက် ဖားကန့်မြို့ပေါ်တွင် ပုံမှန်အတိုင်း သွားလာလှုပ်ရှားဆဲဖြစ်ပြီး အစစ်အဆေးများလည်း မရှိသေးကြောင်း ဖားကန့်ဒေသခံ အသက် ၄၀ အရွယ် အမျိုးသမီးတစ်ဦးကလည်း ပြောသည်။

တိုက်ပွဲများလည်း ငြိမ်သက်နေဆဲဖြစ်သော်လည်း စစ်ကောင်စီတပ်က ရှေ့ဆက်တိုးလာပါက တိုက်ပွဲ ဆက်လက်ဖြစ်ပွားနိုင်ခြေရှိသည်ဟု ဖားကန့်ဒေသခံအချို့က ခန့်မှန်းကြသည်။

ဖားကန့်ဒေသတွင် စစ်တပ်က အာဏာသိမ်းပြီးချိန်မှစ၍ ဖမ်းဆီးသတ်ဖြတ်မှုများနှင့်အတူ တိုက်ပွဲများ မကြာခဏဖြစ်ပွားနေသည်မှာ ယနေ့အထိဖြစ်သည်။

အောက်တိုဘာ ၂၃ ရက်က ဖားကန့်နယ်အတွင်းရှိ အနန့်ပါဒေသ ဗုံးကြဲတိုက်ခိုက်မှုပြီးသည့်နောက် စစ်ရေးအခြေအနေ ပိုမိုတင်းမာလာကာ အပြန်အလှန်ဖမ်းဆီးမှုများလည်း ဆက်တိုက်ဖြစ်နေသည်။ ကချင်လွတ်လပ်ရေးအဖွဲ့ (KIO) ၏ ၆၂ ပြည့်အကြို ဂီတဖျော်ဖြေပွဲ ပြုလုပ်နေစဉ် စစ်ကောင်စီက တိုက်လေယာဉ် သုံးစီးဖြင့် ဗုံးကြဲတိုက်ခိုက်ရာ လူပေါင်းရာဂဏန်းမျှ သေဆုံးခဲ့သည်။

ပြီးခဲ့သည့်ရက်ပိုင်းအတွင်း KIA/KIO အရာရှိ ၁၀ ဦးထက်မနည်း မြစ်ကြီးနားမြို့တွင် ဖမ်းဆီးခံထားရသည်။myanmar now 

စစ်ကိုင်းတိုင်း၊ ကောလင်းခရိုင်၊ ကောလင်းမြို့ စက်ရုံလယ်ပြင်ရပ်ကွက်၊ ကောလင်း-ကိုးတောင်ဘိုကားလမ်းဘေးရှိ နေအိမ်ပိုင်ရှင်သည် PDFများအား ထောက်ပံ့သည် ဟုဆိုကာ ထိုနေအိမ်ကို စစ်ကောင်စီတပ်က ချိပ်ပိတ်သွားကြောင်း ဒေသခံသတင်းရင်းမြစ်ထံက သိရသည်။

ယမန်နေ့ နိုဝင်ဘာ ၁၅ရက်နေ့ မွန်းလွှဲ ၃နာရီတွင် စစ်ကောင်စီလက်အောက်ခံ ကောလင်းမြို့နယ် အထွေထွေအုပ်ချုပ်ရေးမှူး၊ ရဲဝန်းထမ်းများနှင့် စစ်သားများက ဒေါ်ကြာနှင့် ဦးအောင်ငွေ (ခ) ဖိုးသေး ပိုင်ဆိုင်သည့် အိမ်ရှိ တန်ဖိုးကြီးပစ္စည်း အချို့ကို ယူဆောင်သွားပြီး အိမ်ပိုင်ရှင်များ အပါအဝင် လူလေးဦးကို ဖမ်းဆီးကာ နေအိမ်ကို ချိပ်ပိတ်သွားသည်ဟု ဆိုသည်။

“မကြာတို့ အိမ်လို့ သိထားပါတယ်ဗျ။ အိမ်က လေးဦးဖမ်းသွားပြီး ရေခဲသေတ္တာ ပန်ကာနဲ့အခြားတန်ဖိုးရှိ ပစ္စည်းတွေ သယ်သွားပါတယ်။မကြာနဲ့ ဖိုးသေးတို့ လေးယောက် ပြန်မလွတ်သေးပါ မောင်နှမတွေဟုသိရပါတယ်ဗျ” ဟု KawLin Revolution – KR မှ တာဝန်ရှိသူတစ်ဦးက မဇ္ဈိမကို ပြောသည်။

အကြမ်းဖက်စစ်ကောင်စီတပ်များသည် ထိုနေအိမ်ချိပ်ပိတ်နေစဉ်နေအိမ်တွင် ရောက်ရှိနေသည့် ဒေါ်ကြာ၏ ဆွေမျိုးများဖြစ်သည့် မမေဇင်ဦးနှင့် ကိုထွန်းဝင်းတို့ကိုလည်း ဖမ်းဆီးထားသည်ဟု စစ်ကောင်စီဝါဒဖြန့် မီဒီယာများတွင် ဖော်ပြထားသည်။

ထို့အပြင် စစ်ကောင်စီလက်အောက်ခံ ဝန်ထမ်းများက ငွေသား ကျပ် သိန်း ၃၀ ကျပ်၊ ဆိုင်ကယ် လေးစီးနှင့် ကား တစ်စီးသိမ်းဆည်းခဲ့ကြောင်း ဝါဒဖြန့်မီဒီယာများတွင် ပါရှိသည်။

“ကောလင်းက တစ်မြို့လုံးက စကစ(စစ်ကောင်စီ)ကို တွန်းလှန်နေတဲ့မြို့ပါ။ ဘယ်နေရာပဲဖြစ်ဖြစ် တော်လှန်ရေး စိတ်ရှိသူတွေ အများဆုံးနေ ထိုင်ကြတဲ့မြို့ပါ ” ဟုလည်း KawLin Revolution – KR မှ တာဝန်ရှိသူက ပြောသည်။

ပြီးခဲ့သည့် နိုဝင်ဘာလ ၁၃ ရက်တွင် စစ်ကောင်စီတပ်က ကပ္ဖလူးရွာရှိ လူနေအိမ် သုံးလုံး မီးရှို့ခဲ့ရာ ဒေါ်ကြာ၏ မိဘအိမ်လည်း မီးလောင်ပြာကျသွားကြောင်း KR မှ တာဝန်ရှိသူက ပြောသည်။mizzima

ချင်းပြည်နယ်၊ ဟားခါးမြို့၊ ကျောဘုတ်ရပ်ကွက်မှာ နိုဝင်ဘာ ၁၅ ရက် ည ၁၀ နာရီခွဲလောက်က စစ်ကောင်စီတပ် ပစ်ခတ်လိုက်တဲ့ လက် နက်ကြီးကျည်‌ ကျရောက်ပေါက်ကွဲမှုကြောင့် အသက် ၁၄ နှစ်အရွယ် ယောက်ျားလေးတယောက် သေဆုံး‌ခဲ့ပြီး  လူ နှစ်ယောက် ထိခိုက်ဒဏ်ရာရသွားတယ်လို့ ဒေသခံတွေက ပြောပါတယ်။

လက်နက်ကြီးကျည်ဟာ ကျောဘုတ်ရပ်ကွက်ရှိ မိုးဟိန်းသောက်ရေသန့်ကုမ္ပဏီအတွင်း ကျရောက်ခဲ့ပြီး အသက် ၁၄ နှစ်အရွယ် Salai Shalom Van အမည်ရှိ ‌ယောက်ျားလေးတဦး သေဆုံးခဲ့တာလို့ ဆိုပါတယ်။

ဒေသခံတဦးက “သေဆုံးသွားတဲ့ ကောင်လေးနဲ့ ရေသန့်စက်ရုံက ဝန်ထမ်း နှစ်ယောက်က ညစောင့်အိပ်တာလို့ သိရတယ်။ စစ်ကောင်စီတပ်က လက်နက်ကြီး ရမ်းသန်းပစ်ခတ်ခဲ့တာပါ။ စက်ရုံဝန်ထမ်း နှစ်ယောက်လည်း ဒဏ်ရာရလို့ ဆေးရုံပို့ထားတယ်” လို့ ပြောပါတယ်။

နိုဝင်ဘာ ၁၆ ရက် မနက် ၁ နာရီလောက်ကလည်း ဟားခါးမြို့အတွင်း စစ်ကောင်စီတပ်ဖွဲ့နဲ့ ချင်းအမျိုးသားတပ်တော် (CNA ) တို့ ထိတွေ့တိုက် ခိုက်မှုတွေ ရှိခဲ့တယ်လို့ သိရပါတယ်။

အဲ့ဒီတိုက်ပွဲအခြေအနေ အသေးစိတ်ကိုတော့ ဒီဗွီဘီအနေနဲ့ သီးခြားအတည်ပြုနိုင်ခြင်း မရှိသေးပါဘူး။

ပြီးခဲ့တဲ့ အောက်တိုဘာ ၁၉ ရက်ကလည်း ဟားခါးမြို့နယ် ဘွန်လုံးကျေးရွာမှာ စစ်ကောင်စီတပ်ဖွဲ့က ဒရုန်းနဲ့ ဗုံးသီးချ တိုက်ခိုက်မှုကြောင့် မူလတန်းပညာသင်ကြား‌နေတဲ့ အသက် ၆ နှစ်နဲ့ ၇ နှစ်အရွယ် ယောက်ျားလေးနှစ်ဦး သေဆုံးခဲ့ပြီး အသက် ၇ နှစ်အရွယ် မိန်းကလေးတဦး အပြင်းအ ထန် ဒဏ်ရာရရှိခဲ့ပါတယ်။ DVB