SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ ပုလဲမြို့နယ်၊ ဇီးဖြူကုန်းကျေးရွာက ပျူစောထီးတွေနဲ့ ဒေသခံပြည်သူ့ကာကွယ်ရေးတပ်တို့ နိုဝင်ဘာ ၂၁ ရက်နေ့ ညနေ ၃ နာရီကျော်လောက် တိုက်ပွဲဖြစ်ပွားခဲ့တယ်လို့ ဒေသခံ‌တော်လှန်ရေးအင်အားစုတွေဆီက သိရပါတယ်။

အဲဒီဇီးဖြူကုန်းကျေးရွာဟာ စစ်ကောင်စီထောက်ခံသူတွေ စုပေါင်းပြီး ပြည်သူစစ်အဖွဲ့ကို ဖွဲ့စည်းထားတဲ့ ကျေးရွာတရွာဖြစ်တယ်လို့လည်း သိရပါတယ်။

ပုလဲ LPDF ဗိုလ်ဂဠုန်က “ပထွေးအားကိုးပြီး အနီးအနားက ကျေးရွာတွေဆီ ဓားပြတိုက်တယ်။ နောက်ပြီး ပြည်သူတွေရဲ့ လယ်ယာအတွင်းက သီနှံတွေ အနိုင်ကျင့် ရိတ်သိမ်းယူတာတွေလည်း ရှိတယ်။ အခုတိုက်ပွဲကတော့ ပထမ လက်နက်ကြီးနဲ့ အချက်ပေါင်း ၃၀ ကျော်ထက်မနည်း ပစ် တယ်။ အဲဒါပြီးတော့ ထိပ်တိုက်အပြန်အလှန်ပစ်ကြတယ်။ အသေအဆုံးကတော့ အတိအကျ မသိရသေးဘူး။ ဒဏ်ရာရတာကတော့ ၅ ဦးကျော် ရှိတယ်လို့ သိရတယ်။ ကျနော်တို့ဘက်ကတော့ နေရာ အသာစီးရခဲ့လို့ အထိအခိုက်မရှိခဲ့ဘူး” လို့ ပြောပါတယ်။

အခုတိုက်ပွဲမှာ ဒေသခံပြည်သူ့ကာကွယ်ရေးအဖွဲ့ပေါင်းစုံက အင်အား ၁၀၀ ကျော်နဲ့ ဇီးဖြူကုန်းပျူစခန်းကို ပစ်ခတ်ခဲ့တာလို့ သိရပါတယ်။

စစ်ကိုင်းတိုင်း ကလေးမြို့နယ်  ဆည်ကြီးရွာထဲ စစ်ကောင်စီတပ်ပစ်ခတ်တဲ့ လက်နက်ကြီး ကျရောက် ပေါက်ကွဲပြီး အသက် ၆၃ နှစ်ရှိ အမျိုး သမီး ၁ ယောက် သေဆုံးခဲ့တယ်လို့ ရွာသားတွေက ပြောပါတယ်။

ကလေးမြို့နယ် မြောက်ပိုင်းရှိကျေးရွာတွေကို နိုဝင်ဘာ ၂၁ ရက် မနက်ပိုင်းကစပြီး စစ်ကောင်စီတပ်က မြို့တွင်းကနေ လက်နက်ကြီးတွေနဲ့ အဆက်မပြတ်  ပစ်ခတ်ခဲ့တာကြောင့်  မွန်းတည့် ၁၂ နာရီလောက် ဆည်ကြီးရွာက ဒေါ်ရွန်းနိပ်ကင်းမ်ရဲ့ နေအိမ်ပေါ် ကျရောက်ပေါက်ကွဲခဲ့ပြီး အိမ်ဝန်းအတွင်းရှိ သစ်ပင်တွေ၊ အိမ်ခေါင်မိုးနဲ့ အကာအရံတွေလည်း ပျက်စီးသွားခဲ့ပါတယ်။

ချင်းတိုင်းရင်းသူ ဒေါ်ရွန်းနိပ်ကင်းမ်ဟာ အစာအိမ်ရောဂါခံစားနေရပြီး အိပ်ယာထဲလဲနေကာ လက်နက်ကြီးကျရောက်ပေါက်ကွဲခဲ့တာကြောင့် ဝမ်းဗိုက်ပွင့်ထွက် ဒဏ်ရာနဲ့ သေးဆုံးခဲ့တယ်လို့ ရွာခံတွေက ပြောပါတယ်။ 

အရင်ကလည်း စစ်ကောင်စီတပ်‌တွေဟာ မြို့တွင်းကနေ ကလေးမြို့နယ်တောင်ပိုင်းကို လက်နက်ကြီးနဲ့ ပစ်ခတ်လေ့ရှိပြီး အခုအခါ မြောက်ပိုင်းကျေးရွာတွေနဲ့ တောင်ခြေတွေကို တိုက်ပွဲမဖြစ်ဘဲ လက်နက်ကြီးနဲ့ ပစ်ခတ်နေတာ လေးရက်လောက်ရှိပြီလို့ ဆိုပါတယ်။ DVB

စစ်ကိုင်းတိုင်းအထက်ပိုင်း၊ ဟုမ္မလင်းမြို့နယ်တွင် ဒေသကာကွယ်ရေးအဖွဲ့များနှင့် စစ်ကောင်စီတပ်၊ ရှမ်းနီအမျိုးသားများတပ်မတော် ( SNA)ပူးပေါင်းအဖွဲ့တို့အကြား ဖြစ်ပွားခဲ့သည့် အပြန်အလှန်ပစ်ခတ်သည့် ထိတွေ့တိုက်ပွဲများကြောင့် ဒေသခံ ၈၀၀နီးပါး စစ်ရှောင်နေရပြီး အကူအညီလိုအပ်လျက်ရှိကြောင်း သိရသည်။

“အခုလောလောဆယ် စစ်ရှောင်တွေဟာ ဆေးဝါး၊ ရိက္ခာ၊ စောင် ၊အနွေးထည်တွေ လိုအပ်လျက်ရှိပါတယ်။ ဖုန်းနံပါတ် ၀၉၇၀၃၃၁၇၈၈ကို ဆက်သွယ်လှူဒါန်းနိုင်ပါတယ်ဗျ။ ဘေးနားရွာတွေနဲ့ ပအဖအဖွဲ့တွေ၊ ပီဒီအက်တွေက ဝိုင်းဝန်းပြီးဖြေရှင်းပေးနေပါတယ်။” ဟု ခန္တီးခရိုင်ပြည်သူ့ကာကွယ်ရေးတပ်ရင်း(၁)-ဟုမ္မလင်း မှ တာဝန်ရှိသူက မဇ္ဈိမကို ပြောသည်။

ဟုမ္မလင်းမြို့နယ် ပင်ခုတ်ကျေးရွာ၊ တုံခေါ်ကျေးရွာ၊ နန့်နန်းရွာ စသည့် ကျေးရွာများမှ ဒေသခံများဖြစ်ပြီး နိုဝင်ဘာလ ၁၁ ရက်နေ့မှစ၍ ဖြစ်ပွားခဲ့သည့် တိုက်ပွဲများကြောင့် စစ်ဘေးရှောင်နေရခြင်းဖြစ်သည်။

ပင်ခုတ်ကျေးရွာသည် ဟုမ္မလင်းမြို့နှင့် မိုင်တစ်ရာခန့်အကွာတွင်တည်ရှိပြီး လူဦးရေ ၁,၀၀၀ခန့်နေထိုင်ကာ လက်ရှိတွင် အဆိုပါဒေသ၌ အင်တာနက်လိုင်းများ ဖြတ်တောက်ထားသည့်အပြင် ဖုန်းလိုင်းများလည်း မကြာခဏ ပြတ်တောက်မှုများ ဖြစ်ပေါ်လျက်ရှိသည်ဟု ၎င်းတာဝန်ရှိသူက ဆိုသည်။

နိုဝင်ဘာလ ၁၈ရက်နေ့တွင် ဟုမ္မလင်းမြို့နယ် နန့်နန်းရွာ၌ တပ်စွဲထားသည့် အင်အား ၁၀၀ခန့်ပါ စစ်ကောင်စီတပ်နှင့် ရှမ်းနီအမျိုးသားများတပ် မတော် ( SNA)ပူးပေါင်းအဖွဲ့ကို ဟုမ္မလင်းမြို့နယ်တွင် ဒေသကာကွယ်ရေးအဖွဲ့များက တိုက်ခိုက်ခဲ့ရာ နန့်နန်းရွာ နယ်မြေရဲစခန်းကို သိမ်းပိုက်လိုက်သည့်အပြင် စက်လတ်အငယ်တစ်ခုနှင့်အတူ ဆက်သွယ်ရေးစက်အမြောက်အများကို သိမ်းဆည်းနိုင်ခဲ့သည်။

ပြီးခဲ့သည့် ရက်ပိုင်းအတွင်းကလည်း ဟုမ္မလင်းပြည်သူ့ကာကွယ်ရေးတပ်ဖွဲ့ (HPDF)မှ ၎င်းတို့တပ်ရင်း နှင့် မဟာမိတ် တပ်ရင်းများသည် ဒေသ ခံ ရှမ်းနီလူမျိုးအများစုဖြင့် ဖွဲ့စည်းတည်ထောင်ထားပါကြောင်း၊ ဌာနေ ရှမ်းနီလူမျိုးများအနေဖြင့် အကြမ်းဖက်စစ်တပ်အား ခုခံတွန်းလှန်မှုတွင် မိမိတို့နှင့်အတူ ရပ်တည်တော်လှန်ရန် ဖိတ်ခေါ်ပါကြောင်း ထုတ်ပြန်ထားသည်။mizzima

စစ်ကိုင်းတိုင်း၊ ခင်ဦးနှင့် ရွှေဘိုတို့တွင် အကြမ်းဖက် စစ်တပ် စစ်ကြောင်းများကို ဒရုန်းဖြင့် ဗုံးသီးချ တိုက်ခိုက်မှု စစ်ကောင်စီ တပ်သား ၆ ဦးသေဆုံးခဲ့ကြောင်း သိရသည်။

နိုဝင်ဘာလ ၁၇ ရက်နေ့တွင် ရေဦးမြို့မှ ခင်ဦးမြို့နယ်ဘက်သို့ ထွက်လာသော အင်အား ၁၀၀ ခန့်ရှိသည့် အကြမ်းဖက် စစ်တပ် စစ်ကြောင်းသည် ကုန်းသာရွာအရှေ့တွင် ပြည်သူပိုင် ဆိုင်ကယ် ၅ စီးကို မီးရှို့ဖျက်ဆီးပြီး တောတဲများမှ ပြည်သူ ၂ ဦးကို ဖမ်းဆီး ခေါ်ဆောင်သွားကြောင်း၊ ညနေ ၄ နာရ ၂၀ မိနစ်တွင် ရွှေယမင်းကျေးရွာ အရောက်၌ ကာကွယ်ရေး တပ်ဖွဲ့ဝင်များက Drone ဖြင့် ဗုံးသီးချ တိုက်ခိုက်ခဲ့ပြီး စစ်သား ၄ ဦး ထိခိုက် ဒဏ်ရာ ရရှိခဲ့ကြောင်း သိရသည်။

နိုဝင်ဘာလ ၁၈ ရက်နေ့ မွန်းလွဲ ၂ နာရီ ၃၁ မိနစ်ခန့်တွင် ရွှေဘိုမြို့နယ်၊ စိုက်ပျိုးရေး သိပ္ပံကျောင်းမှ ထွက်လာသော စစ်သားနှင့် ပျူစ​ောထီးများသည် ညောင်ပင်သာ ကျေးရွာဘက်သို့ ၆၀ မမ ၃ လုံးဖြင့် ပစ်ခတ်ပြီး လမ်းဘေးဂိုထောင်တွင် ကင်းပုန်းဝပ်နေစဥ် ကာကွယ်ရေး တပ်ဖွဲ့များက ဒရုန်းဖြင့် ဗုံးသီး ၅ လုံးချ၍ တိုက်ခိုက်ခဲ့ပြီး စစ်သား ၄ ဦးသေဆုံးကာ ၃ ဦး ထိခိုက် ဒဏ်ရာ ရရှိကြောင်း သိရသည်။

နိုဝင်ဘာလ ၂၀ ရက်နေ့ မွန်းလွဲ ၃ နာရီ ၃၅ မိနစ် ခန့်တွင် ရွှေဘိုမြို့နယ်၊ ဆင်အင်းကျေးရွာ ရဲစခန်းအား ဒရုန်းဖြင့် ဗုံးသီး ၈ လုံးချ၍ တိုက်ခိုက်ခဲ့ပြီး စစ်သားနှင့် ပျူစောထီး ၂ ဦးသေဆုံးခဲ့ကာ ၄ ဦး ထိခိုက် ဒဏ်ရာ ရရှိခဲ့ကြောင်း သိရသည်။

အဆိုပါ တိုက်ခိုက်မှုကို D.U.G.F (KU Dragon)၊ Fire Dragon (Khin-U)၊ Wolf Guerrilla (Ye-U)၊ Northern Tigers Group (NTG)၊ Burmese Revolution Youth (BRY)၊ Brothers of Lands Defence Force(BLDF) နှင့် One Day Revoltion (Shwe Bo)တို့မှ ပူးပေါင်း ပြုလုပ်ခဲ့ခြင်းဖြစ်ကြောင်း သိရသည်။ khit thit

စစ်ကိုင်းတိုင်း၊ တမူးမြို့မှ ကလေးမြို့ဘက်ကို ထွက်ခွာလာတဲ့ ခြေလျင်စစ်ကြောင်းကို တမူး ပြည်သူ့ကာကွယ်ရေးတပ်ဖွဲ့၊ တပ်ရင်း(၃)က ပ ဒေသာမိုင်းနဲ့ မိုင်းဆွဲတိုက်ခိုက်ခဲ့ရာမှာ စစ်ကောင်စီတပ်သား ၁၀ ယောက် ထက်မနည်းသေဆုံးပြီး အများအပြား ဒဏ်ရာရရှိခဲ့တယ်လို့ တမူး PDF တပ်ရင်း (၃ ) က သိရပါတယ်။

နိုဝင်ဘာ ၂၁ ရက်၊ ညနေပိုင်းက ထင်းဇင်ရွာနဲ့ ကမ္မကြီးရွာကြားမှာ ပဒေသာမိုင်း ၁၁ လုံးနဲ့ မိုင်းဆွဲ တိုက်ခဲ့တာဖြစ်ပြီး တိုက်ခိုက်မှုအပြီး ထင်းဇင်ရွာမှ နေအိမ် ၅ လုံးကို  စစ်တပ်က မီးရှို့ ဖျက်ဆီးသွားတယ်လို့  တပ်ရင်း (၃ ) တာဝန်ရှိသူက ပြောပါတယ်။

မိုင်းဆွဲတိုက်ခိုက်ခံရလို့  သေဆုံးသွားတဲ့ အလောင်းတွေကို ထင်းဇင်ရွာနဲ့ ကမ္မကြီးရွာကြားမှာ ညတွင်းချင်း သင်္ဂြိုဟ်ပြီး ဒီမနက်အစောပိုင်းမှာ ကလေးမြို့ကို ဆက်လက် ထွက်ခွာသွားတယ်လို့ ဆိုပါတယ်။ 

တမူးခရိုင်အတွင်း ပြည်သူ့ကာကွယ်ရေးတပ်ဖွဲ့နဲ့ စစ်ကောင်စီတပ်ကြား စစ်ရေးအခြေအနေ တင်းမာနေတာကြောင့် တမူး၊ ခမ်းပတ်၊ ကလေး အာရှလမ်းမကို အရေးပေါ်ကျန်းမာရေး ကိစ္စက လွဲပြီး သွားလာတာ မလုပ်ဖို့ ကာကွယ်ရေးတပ်ဖွဲတွေက တားမြစ်ထားပြီး တပတ်အကြာမှာ အခုလို မိုင်းဆွဲတိုက်ခိုက်ခဲ့တာ ဖြစ်ပါတယ်။

စစ်ကိုင်းတိုင်း မြောင်မြို့နယ်မှာလည်း ကင်းပုန်းစောင့်ဖို့လာတဲ့ စစ်ကောင်စီတပ်ဖွဲ့ဝင်တွေကို ပဒေသာမိုင်းနဲ့ ဖောက်ခွဲတိုက်ခိုက်ခဲ့ရာ ၂ ဦးသေ ဆုံးပြီး ၃ ဦးထိခိုက်ဒဏ်ရာရသွားတယ်လို့ ဗိုလ်တောက်ထွန်း – ပြည်သူ့ကာကွယ်ရေးအထူးတပ်ဖွဲ့က နိုဝင်ဘာ ၂၁ ရက်နေ့မှာ ထုတ်ပြန်ထားပါတယ်။

နိုဝင်ဘာ ၂၀ ရက်နေ့ ည ၇ နာရီလောက်က မြောင်မြို့နယ် ကျောက်ရစ်ရဲကင်းစခန်းမှ ကင်းပုန်းစောင့်ဖို့ထွက်ခွာလာတဲ့ စစ်ကောင်စီတပ်ဖွဲ့ဝင် ၁၀ ဦးကို ကျောက်ရစ်နဲ့ သရက်သာကျေးရွာကြားမှာ ပဒေသာမိုင်း ၂ လုံးနဲ့ ဖောက်ခွဲတိုက်ခိုက်ခဲ့တာဖြစ်ပြီး စစ်သား ၂ ဦးနေရာမှာတင်သေဆုံးကာ ၃ ဦးထိခိုက်ဒဏ်ရာရရှိခဲ့တယ်လို့ ကာကွယ်ရေးတပ်ဖွဲ့က ဆိုပါတယ်။

“ကျောက်ရစ်စခန်းကနေ ရွာတွေဘက်ကို ညပိုင်းစစ်ကြောင်းထိုးတာတွေ အမြဲလုပ်လေ့ရှိတယ်။ ကံဆိုးချင်တော့ အဲ့ဒီနေ့မှာ ဒီကောင်တွေက မိုင်းကွင်းထဲကင်းပုန်းလာဝပ်တာကို တိုက်ခိုက်ခဲ့တာ ” လို့ ဗိုလ်တောက်ထွန်း – ပြည်သူ့ကာကွယ်ရေးအထူးတပ်ဖွဲ့ဝင်တဦးက ပြောပါတယ်။

တိုက်ခိုက်မှုအတွင်း ထိခိုက်ဒဏ်ရာရသွားတဲ့ စစ်သား ၃ ဦးကိုတော့ စစ်ကောင်စီတပ်ဖွဲ့က ချင်းတွင်းမြစ်ကြောင်းဘေးရှိ ကျောက်တန်းကျေးရွာကို ညတွင်းချင်းပို့ဆောင်လိုက်တယ်လို့ သိရပါတယ်။

နိုဝင်ဘာ ၁၄ ရက်နေ့ကလည်း မြောင်မြို့နယ် ကျောက်ရစ်ရဲကင်းစခန်းကို ဒေသကာကွယ်ရေးပူးပေါင်းအဖွဲ့က RPG နဲ့ ပစ်ခတ်ခဲ့တာကြောင့် စခန်းဝင်းအတွင်း အထိုင်ချတပ်စွဲထားတဲ့ စစ်သား ၂ ဦးသေဆုံးပြီး ၅ ဦး အပြင်းထန် ဒဏ်ရာရရှိခဲ့တယ်လို့ သိရပါတယ်။ DVB

စစ်ကိုင်းတိုင်း၊ ခင်ဦးမြို့နယ်အတွင်းရှိကျေးရွာများကို စစ်ကောင်စီတပ်များက စစ်ကြောင်းထိုး မီးရှို့ခြင်းများပြုလုပ်နေသည့်အတွက် ဒေသခံပြည်သူ ဦးရေ ၂၀,၀၀၀ ခန့်မှာ စစ်ဘေးရှောင်နေရကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့ ထံကသိရသည်။

“အရင်ကတည်းက ရှောင်နေရတာကော။ ပြီးခဲ့တဲ့ နိုဝင်ဘာ ၁၅ ရက်နေ့က စဝင်လာတဲ့ စစ်ကောင်စီ စစ်ကြောင်းကြောင့်လည်းပါတယ်။ နောက်ပြီး ခင်ဦးနယ်မှာ စစ်ကောင်စီ တပ်ရဲ့ စစ်ကြောင်းက နှစ် ကြောင်းဖြစ်နေတယ်။ ပြီးခဲ့တဲ့ ၁၉ ရက်နေ့ လောက်ကလည်း ကန့်ဘလူဘက်က စစ်ကြောင်းတစ်ကြောင်းထပ်ရောက်လာတယ်။ အဲ့ဒီစစ်ကြောင်းက ခင်ဦး မြောက်ခြမ်းက ဆီဆုံလေးကိုရွာကို ရောက်ရောက်ချင်းမှာပဲ ညတစ်ကြိမ်၊ မနက် တစ်ကြိမ်မီးရှို့တယ်။ နောက်ထပ် အဲ့ဒီနားက ရွာ နှစ် ရွာကိုလည်း လက်နက်ကြီး နဲ့ ပစ်ပြီးဝင်တယ်။ ပြီးတော့ မီးရှို့သွားတယ်” ဟု ခင်ဦးမြို့နယ်သတင်းမှန်ပြန်ကြားရေး အဖွဲ့တာဝန်ရှိသူက ပြောသည်။

ရေဦး မြို့ဘက်မှ ခင်ဦးမြို့နယ်အတွင်းသို့ နိုဝင်ဘာ ၁၅ ရက်နေ့ မှ စတင်ကာ ဝင်ရောက်လာသည့် စစ်ကောင်စီ၏ စစ်ကြောင်းတစ်ခုရှိနေပြီး အ ဆိုပါ စစ်ကြောင်း သည် နိုဝင်ဘာ ၁၈ ရက်နေ့ နှင့် ၁၉ ရက်နေ့တွင် ပေါင်းလဲကုန်း ရွာကို မီးရှို့ဖျက်ဆီးခဲ့ရာ အိမ်ခြေ ၂၀၀ ခန့် ဆုံးရှုံးခဲ့ရသည်။

ယင်းနောက် ရွှေဘိုမြို့နယ်အတွင်းက လက်ယာကုန်းကျေးရွာကို မီးရှို့ဖျက်ဆီးခဲ့ပြီး ခင်ဦးမြို့နယ်အတွင်းသို့ ပြန်လည်ဝင်ရောက်ကာ လက်ပံကြီး ရွာကို မီးရှို့ ဖျက်ဆီး၍ ထွက်ခွာသွားကြောင်းသိရသည်။ ပြည်သူ့ကာကွယ်ရေး တပ်ဖွဲ့များသည် မီးရှို့ဖျက်ဆီးခံရသည့် လက်ပံကြီးရွာသို့ မီးငြှိမ်းသတ်ရန် ရောက်ရှိလာချိန်တွင် စစ်ကောင်စီ တပ်က လက်နက်ကြီးများ ဖြင့်ပစ်ခတ်ခဲ့၍ ရဲဘော်တစ်ဦး ဒဏ်ရာရရှိခဲ့ကြောင်းသိရသည်။

လက်ရှိအချိန်တွင် ခင်ဦးမြို့နယ်အတွင်း ရောက်ရှိနေသည့ စစ်ကောင်စီတပ် စစ်ကြောင်း နှစ် ခုကြောင့် မြို့မြောက်ခြမ်းရှိ ကျေးရွာ သုံး ရွာ၊ မြို့တောင်ခြမ်းရှိ ကျေးရွာ သုံး ရွာ စုစုပေါင်း ကျေးရွာ ခြောက် ရွာ မှ ပြည်သူ များ စစ်ဘေးရှောင်နေရကြောင်း သိရသည်။

ယခုကာလသည် ဆောင်းရာသီဖြစ်သောကြောင့် ခင်ဦးမြို့နယ်အတွင်းရှိ စစ်ဘေးရှောင် ပြည်သူများအတွက် စောင်၊ အနွေးထည်၊ ဆေးဝါးများ နင့် စားနပ်ရိက္ခာများ လိုအပ်လျက်ရှိ နေကြောင်း သိရသည်။

စစ်တပ်က အာဏာသိမ်းပြီး ချိန်မှ စ၍ ခင်ဦးမြို့နယ်အတွင်းရှိ ရွာပေါင်း ၄၇ ရွာခန့် မီးရှို့ဖျက်ဆီးခံထားရပြီး ကျေးရွာ ၁၅ ရွာခန့်မှ ဒေသပြည်သူတွေများသည် နေရပ်သို့ ပြန်နိုင်ခြင်းမရှိတော့ဘဲ အမြဲတမ်း စစ်ရှောင်အဖြစ် နေထိုင်နေရကြောင်းသိရသည်။ mizzima

မင်းအောင်လှိုင် ခေါင်းဆောင်သော မြန်မာ အကြမ်းဖက်စစ်တပ်က မှာယူထားသော တရုတ်နိုင်ငံလုပ် FTC 2000 G တိုက်လေယာဉ် ၆ စီးသည် နိုဝင်ဘာလ ၂၂ ရက်နေ့မှ နိုဝင်ဘာလ ၂၄ ရက်နေ့အထိ နှစ်သုတ်ခွဲ၍ နမ့်စန်လေတပ်စခန်းဌာနချုပ်သို့ ရောက်ရှိမည်ဖြစ်ကြောင်း ရန်ကုန်ခေတ် သစ်၏ သတင်း ရင်းမြစ်က ပြောသည်။

မြန်မာလေတပ်က တရုတ်နိုင်ငံ၊ Guizhou Aviation Industries Corporation (GAIC) က ထုတ် လုပ်သည့် FTC 2000 G အမျိုးအစား ၂ ယောက်မောင်း Fighter လေယာဉ် ၆ စီးကို မှာယူခဲ့ကြောင်း၊ ယင်းလေယာဉ် များကို တရုတ်ပြည်၊ ယူနန်ပြည်နယ်၊ Xishuangbanna Gasa လေ ဆိပ်မှ နမ့်စန် လေတပ်စခန်းဌာနချုပ်ထံသို့ နိုဝင်ဘာ ၂၂ ရက်နေ့မှ နိုဝင်ဘာလ ၂၄ ရက်နေ့အထိ တစ်ကြိမ်လျှင် လေယာဉ် ၃ စီးဖြင့် တစ်အုပ်စုအဖြစ် အုပ်စုဖွဲ့၍ ၂ ကြိမ် လေယာဉ် ၆ စီး ပျံသန်းလာမည်ဖြစ်ကြောင်း သိရှိရသည်။

တံတားဦးလေတပ်စခန်းမှ A-5 တိုက်လေယာဉ်မောင်း အမှတ် ၆၄ အုပ်မှ ပိုင်း လော့ တချို့လည်း တရုတ် နိုင်ငံလုပ် FTC 2000 G တိုက်လေ ယာဉ်မောင်း သင် တန်းများ တက်ရောက်ရန် တရုတ်ပြည်သို့ သွား ရောက်ခဲ့ကြကြောင်း၊ တရုတ် လုပ် FTC 2000 G တစ်စီးလျှင် အမေရိကန်ဒေါ်လာ ၈ သန်းခွဲဝန်းကျင် ကျသင့် ကြောင်း သိရှိရသည်။ khit thit

မကွေးတိုင်း မြိုင်နဲ့ ပေါက်မြို့နယ်က ကျေးရွာ ၂ ရွာကို စစ်ကောင်စီတပ်က နှစ်ရက်ဆက် ဝင်ရောက်မီးရှို့ခဲ့တာကြောင့် အိမ်ခြေ ၂၃၀ ကျော် ဆုံးရှုံးခဲ့တယ်လို့ ဒေသခံတွေက ပြောပါတယ်။

မြိုင်မြို့နယ် ဗဟင်းကျေးရွာကို နိုဝင်ဘာ ၂၁ ရက် မနက် ၉ နာရီလောက်က စပြီး စစ်ကောင်စီ စစ်ကြောင်းက မီးရှို့ခဲ့လို့ နေအိမ် ၁၀ လုံးထက်မနည်း မီးလောင်ခဲ့ပြီး ဒေသခံတွေ ဘေးလွတ်ရာ ထွက်ပြေးနေရတယ်လို့ ဗဟင်းကျေးရွာသားတဦးက ပြောပါတယ်။

“အင်အား ၁၀၀ လောက်နဲ့ နိုဝင်ဘာ ၂၀ ရက်မှာ ဝင်လာတယ်။ ညအိပ်စခန်းချပြီး မနေ့ မနက်ပိုင်းမှာ မီးရှို့ခဲ့တာ။ အိမ်ခြေ ဘယ်လောက် မီး လောင်တယ်ဆိုတာကိုတော့ ရွာထဲ ဝင် မကြည့်ရသေးဘူး။ ဗဟင်းနဲ့ ထနောင်းကုန်းက ရွာချင်းဆက်။ အိမ်ခြေ ၁၀၀၀ ကျော် လောက် ရှိတယ်။ ဒီနေ့မနက်ပိုင်တော့ အဲဒီစစ်ကြောင်းက ရွာထဲက ပြန်ထွက်နေပြီလို့ သတင်းကြားတယ်”

နိုဝင်ဘာ ၂၀ ရက်ကလည်း ပေါက်မြို့နယ် ကျွန်းတိုင်းရွာကို နိုဝင်ဘာ ၂၀ ရက် ညနေ ၃ နာရီ ကျော်လောက်မှာ တကြိမ်၊ နိုဝင်ဘာ ၂၁ ရက် မနက်ပိုင်းမှာ တကြိမ် မီးရှို့ခဲ့လို့ အိမ်ခြေ ၂၃၀ ကျော်  မီးလောင်ခဲ့တယ်လို့ ကျွန်းတိုင်းရွာခံ တဦးက ပြောပါတယ်။

ပေါက်မြို့နယ်မှာ နိုဝင်ဘာ ၂၀ ရက် မွန်းလွဲပိုင်းက ကျွန်းတိုင်းရွာနားမှ စစ်ကောင်စီတပ်နဲ့ ဒေသကာကွယ်ရေးတပ်ဖွဲ့ တွေ တိုက်ပွဲဖြစ်ပွားကာ စစ်ကောင်စီဘက် ၆ ယောက် သေဆုံးကာ ၉ ယောက်လောက် ဒဏ်ရာရပြီး အထိနာသွားတဲ့အတွက် ကျွန်းတိုင်းကျေးရွာကို မီးရှို့ဖျက်ဆီးခဲ့တာ လို့ သိရပါတယ်။ DVB

စစ်ကောင်စီက အကျဉ်းသား ၅,၇၇၄ ဦးကိုလွတ်ပေးခဲ့ရာ နိုင်ငံရေးအကျဉ်းသား ဦးရေ ၄၀၀ ကျော် ပါဝင်ခဲ့သည်ဟု နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က နိုဝင်ဘာ ၂၁ ရက်တွင် အတည်ပြုထုတ်ပြန်သည်။

မြန်မာတစ်နိုင်ငံလုံးတွင် အကျဉ်းထောင် ၅၀ ကျော်ရှိသည့်အနက် ၁၉ ခုမှ နိုင်ငံရေးအကျဉ်းသား ၄၀၂ ဦးကို နိုဝင်ဘာ ၁၇ ရက်တွင်ပြန်လွတ်ပေးခဲ့ခြင်းဖြစ်သည်။ အခြား ပြန်လွတ်လာသူအများစုမှာ ရာဇဝတ်မှုဖြင့် ကျခံနေရသူများဟု သိရသည်။

ပြန်လည်လွတ်မြောက်လာသည့် နိုင်ငံရေးအကျဉ်းသားများစာရင်းကို စစ်ကောင်စီမှ ပွင့်လင်းမြင်သာစွာ ကြေညာခဲ့ခြင်းမရှိသည့်အတွက် နိုဝင်ဘာ ၂၁ ရက် မွန်းလွဲ ၃ နာရီအချိန်အထိ နိုင်ငံရေးအကျဉ်းသား ၁၆၁ ဦးကိုသာ AAPP မှ အမည်နှင့်တကွ မှတ်တမ်းပြုထားနိုင်ဆဲ ဖြစ် သည်။

ထို့ကြောင့် အကျဉ်းထောင်အသီးသီးမှ ပြန်လည်လွတ်မြောက်လာသည့် နိုင်ငံရေးအကျဉ်းသားများ၏ စာရင်းကို ဆက်လက်စုံစမ်းနေဆဲဟု သိရသည်။

လွတ်မြောက်လာသည့်နိုင်ငံရေး အကျဉ်းသား စာရင်းများအား AAPP သို့ ပေးပို့ပေးရန်ကြရန်နှင့် ထပ်မံရရှိလာသော အချက်အလက်များကိုလည်း ဆက်လက်ထုတ်ပြန်ပေးသွားမည်ဟု ရေးသားထားသည်။

“ စစ်ကောင်စီဟာ နိုင်ငံရေးထွက်ပေါက်တစ်ခုအနေနဲ့ လာမယ့်နှစ်မှာ ကျင်းပမယ်လို့ ပြောဆိုထားတဲ့ ရွေးကောက်ပွဲကို လူထုအာရုံစိုက်လာအောင် နိုင်ငံရေးအကျဉ်းသား တွေကို နိုင်ငံရေးလက်နက် တစ်ခုအဖြစ် အသုံးချဖို့ရည်ရွယ်ပြီးပြုလုပ်တဲ့ လုပ်ဆောင်မှုသာဖြစ်တယ်” ဟု AAPP က ဆိုထားသည်။

ပြန်လည်လွတ်မြောက်လာသူများတွင် လူသိများသူများဖြစ်ကြသည့် အမျိုးသားဒီမိုကရေစီအဖွဲ့ချုပ် (NLD) ပါတီ၏ ပြောရေးဆိုခွင့်ရှိသူ ဒေါက်တာမျိုးညွန့် ၊ ပါတီဥပဒေအကြံပေး ဦးကျော်ဟိုးအပါအဝင် ရွှေညဝါဆရာတော်၊ စာရေးဆရာမောင်သာချို၊ (၈၈) မျိုးဆက်ကျောင်းသားခေါင်းဆောင် ကိုမြအေးနှင့် အခြားသူတချို့ပါဝင်ခဲ့သည်။ mizzima

အီတလီနိုင်ငံ မီလန်မြို့တွင် နိုဝင်ဘာလ ၂၁ ရက်နေ့က “မသောက်မိသော မိုးခါးရေ” ဇာတ်ကား ဆက်လက်ပြသနေပြီး အီတလီ နိုင်ငံသားများပါ ကြည့်ရှု့ အားပေးလျက်ရှိကြောင်း သိရသည်။

အဆိုပါ ရုပ်ရှင်ဇာတ်ကားကို မီလန်မြို့နှင့် ဝန်းကျင်ဒေသများမှ ဘာသာရေး မိသားစုဝင်များ၊ မြန်မာ မိသားစုများ အင်တိုက်အားတိုက် ပါဝင်တက်ရောက်ခဲ့ရုံသာမ အီတလီလူမျိုးမြောက်မြားစွာ လာရောက်ကြည့်ရှုအားပေးခဲ့ကြကြောင်း၊ တက်ရောက်လာသူများ အားလုံးမှ မသောက်မိသောမိုးခါးရေရုပ်ရှင်ကို တခဲနက် အားပေးခဲ့ကြပြီး ရုပ်ရှင်အပြီး ဒါရိုက်တာကိုပေါက်နှင့် မေးမြန်းဖြေဆိုခြင်းအစီအစဥ်တွင် အီတလီလူမျိုးများကိုယ်တိုင် မြန်မာနိုင်ငံအခြေအနေနှင့် ရင်ဆိုင်နေရသည့် အခက်အခဲများကို မေးခွန်းများစွာနှင့် စိတ်ပါဝင်စားစွာ မေးမြန်းခဲ့ကြောင်း သိရသည်။ khit thit