SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ တမူးမြို့နယ်တွင် ဂေါ်ရခါး လူငယ် ၁ ဦးကို ပျူစောထီးအဖွဲ့ဝင်များက ဖမ်းဆီးသတ်ဖြတ်ပြီး ရူပီးငွေ ၃ သိန်း လုယက်ယူဆောင် သွားကြောင်း ဒေသခံ ပြည်သူများထံမှ သိရသည်။

နိုဝင်ဘာလ ၂၄ ရက်နေ့ ညနေ ၅ နာရီခန့်တွင် တမူးမြို့၊ ကံကြီးဝ တံတားအနီးတွင် ဂေါ်ရခါး အမျိုးသားတစ်ဦးဖြစ်သူ မောင် Raju ကို အကြမ်း ဖက် စစ်တပ် လက်အောက်ခံ ပျူစောထီးအဖွဲ့များက အကြောင်းမဲ့ ဖမ်းဆီးခဲ့ပြီး ဦးခေါင်းကို သေနတ်ဖြင့် ပစ်သတ်ခဲ့ကြောင်း သိရသည်။

ပျူစောထီး အဖွဲ့ဝင်များ သတ်ဖြတ်ခဲ့သော ဂေါ်ရခါးလူငယ် မောင် Raju သည် နန်းဖာလုံတွင် နေထိုင်သူ ဖြစ်ပြီး ကံကြီးဝ တံတားအကျော် ဘုန်းကြီးကျောင်းဘက်၌ ပျူစောထီးအဖွ​ဲ့များက ဖမ်းဆီးသွားပြီး ဘုန်းကြီးကျောင်းအနောက်ရှိ တောတစ်နေတွင် india ရူပီးငွေ ၃ သိန်းကျော်လုယက်ပီး ပစ်သတ်သွားခြင်း ဖြစ်ကြောင်း သိရသည်။ khit thit

တော်လှန်ရေးအဖွဲ့များကို လူမှုကွန်ရက် စာမျက်နှာများတွင် ထောက်ခံမှုပြုလုပ်နေ သူများကို စစ်ကောင်စီက စောင့်ကြည့်နေပြီး ဖမ်းဆီးမှုများလည်း နေ့စဉ်နှင့်အမျှ ရှိနေသည်။

အမျိုးသားညီညွတ်ရေးအစိုးရ(NUG)၊ ပြည်‌ထောင်စုလွှတ်တော်ကိုယ်စားပြုကော်မတီ(CRPH)တို့ကို အား ပေးထောက်ခံကြောင်းနှင့် အခြားတော်လှန်ရေးနှင့်ပတ်သက်သည့်အဖွဲ့များ၏ လုပ်ဆောင်ချက်များကို မျှဝေခြင်း၊ မှတ်ချက်ပေးခြင်းများကို လူမှုကွန်ရက်စာမျက်နှာများတွင် ပြုလုပ်သူများကို စစ်ကောင်စီက လိုက်လံစောင့်ကြည့်နေပြီး နိုဝင်ဘာလ ၁၉ ရက်မှ ၂၅ ရက်နေ့ထိ ၎င်းတို့ ထုတ်ပြန်ထားသော စာရင်းများ အရပင် ၁၈ ဦးကို ဖမ်းဆီးခြင်း၊ အမှုဖွင့်ခြင်းများ ပြုလုပ်ခဲ့ကြောင်း သိရသည်။

စစ်ကောင်စီက လူမှုကွန်ရက်များတွင် ထောက်ခံနေသူများကိုပင် အကြမ်းဖက်တိုက်ဖျက်ရေးဥပဒေ ပုဒ်မ ၅၂(က) ရာဇသတ်ကြီး ဥပဒေပုဒ်မ ၁၂၄- က နှင့် ပုဒ်မ ၅၀၅-က ၊ အီလက်ထရောနစ် ဆက်သွယ်ဆောင် ရွက်ရေးဥပဒေ ပုဒ်မ၃၃(က) တို့ဖြင့် အရေးယူများမှုကို ပြုလုပ်နေသည်ကို တွေ့ရသည်။

ထိုသို့စစ်ကောင်စီ၏လုပ်ရပ်နှင့်ပတ်သက်ပြီး NUG လူ့အခွင့်ရေးဆိုင်ရာဝန်ကြီးဦးအောင်မျိုးမင်းက “ပြည်သူလူထုက ဒီလိုအရေးယူမှုကြောင့် ကြောက်ရွံ့ပြီး လူ့အခွင့်‌ရေးချိုး‌ဖောက်မှုသတင်းတွေ ရာဇဝတ်မှု ကျူးလွန်မှုသတင်းတွေကို မပေးရဲအောင်လုပ်ဆောင်တဲ့ သတင်းတွေကိုအမှောင်ချတဲ့ အရာမျိုးဖြစ်ပါ လိမ့်မယ်။ နောက်တစ်ခုက ပြည်သူအစိုးရနဲ့ ဒီမိုကရေစီလှုပ်ရှားမှုအပေါ်မှာ အားပေးထောက်ခံမှု လျော့ သွားဖို့အတွက် ဒါကို စီစဉ်တာဖြစ်ပါတယ်” ဟု မှတ်ချက်ပြုသည်။

ယခုကဲ့သို့ဖမ်းဆီးရန်အတွက် စစ်ကောင်စီသည် အွန်လိုင်းတွင် ၎င်းတို့ဖွဲ့ထားသောအဖွဲ့များဖြင့် Facebook အကောင့်များကို စောင့်ကြည့်ခြင်း၊ သတင်းဌာနများ၊ တော်လှန်ရေးနှင့်သက်ဆိုင်သည့် စာမျက်နှာများ၊ လူပုဂ္ဂိုလ်များ၏ ရေးသားဖော်ပြချက်များအပေါ် မျှဝေခြင်း၊ မှတ်ချက်ပေးခြင်းများ ပြုလုပ် သည်အထိ စောင့်ကြည့်ပြီး ဖမ်းဆီးမှုများပြုလုပ်နေခြင်းဖြစ်ကြောင်းသိရသည်။

စစ်ကောင်စီ၏ ပြန်ကြားရေးတာဝန်ရှိသူ ဗိုလ်ချုပ်ဇော်မင်းထွန်းကလည်း “ NUG ၊ CRPH ၊ PDF အဖွဲ့တွေရဲ့ စာတွေ ပုံတွေ ဗီဒီယိုတွေ သူတို့ကိုအားပေးထောက်ခံတဲ့သူတွေရဲ့ စာတွေပုံတွေဗီဒီယိုတွေကို Like တစ်ခုပေးလိုက်တာဖြစ်ဖြစ်၊ Share တာပဲဖြစ်ဖြစ်လုပ်ရင် အခုဇယားမှာပါတဲ့ ရာဇသတ်ကြီးပုဒ်မ ၁၂၄ (ခ)နဲ့ ညိစွန်းပါတယ်။ ထောင်ဒဏ် သုံးနှစ်ကနေ ၁၀ နှစ်အထိ ချမှတ်နိုင်ပါတယ်။ ငွေဒဏ်လည်း ချမှတ်နိုင်ပါတယ်” ဟု စက်တင်ဘာလအတွင်းက ပြုလုပ်ခဲ့သည့် စစ်ကောင်စီသတင်းစာ ရှင်းလင်းပွဲတွင် ခြိမ်းခြောက်ပြောဆိုခဲ့သည်။

လူမှုကွန်ရက်စာမျက်နှာများအပေါ်တွင် စစ်ကောင်စီ၏ စောင့်ကြည့်မှုများရှိနေသည့်အတွက် ပြည်သူများ အနေဖြင့် Facebookတွင် Profile Lock ချထားရန်တွက် ဒီမိုကရေစီအရေး တက်ကြွလှုပ်ရှားသူများက တိုက်တွန်းပြောဆိုမှုများရှိသည်။

ပြည်သူလူထုသို့ စောင့်ကြည်သူများထဲတွင် ဟန်ငြိမ်းဦးအပါအဝင် အခြားစစ်ကောင်စီလက်အောက်ခံ လော်ဘီများလည်း ပါဝင်သည်ကို တွေ့ရှိရသည်။

၎င်းတို့၏ တယ်လီဂရမ်ချန်နယ်များတွင် ဒီမိုကရေစီရေး တက်ကြွလှုပ်ရှားသူများ၏ လူမှုကွန်ရက်အကောင့်များ၊ စီးပွားရေးလုပ်ငန်းများနှင့် နေရပ်လိပ်စာများပါ တင်ပေးလေ့ရှိကြသည်။

အကယ်၍ ၎င်းတို့တင်သည့်အချိန်တွင် ဖမ်းဆီးမခံရသေးပါက အဆိုပါပုဂ္ဂိုလ်သည် ရှောင်းတိမ်းရန် အတွက် အရေးတကြီးလိုအပ်သည်ကိုတွေ့ရသည်။ တစ်ခါတရံတွင် ဖမ်းဆီးပြီးမှလည်း ၎င်းတို့၏ ချန်နယ် များတွင် တင်တတ်ကြသည်။

လုံခြုံရေးအရ အမည်မဖော်လိုသည့် မဒီဟူသည့် ရန်ကုန်မြို့နေအမျိုးသမီးငယ်တစ်ဦးသည် ဟန်ငြိမ်ဦး ချန်နယ်တွင် ပါဝင်လာခဲ့သည်။ သိသိချင်းရှောင်းတိမ်းခဲ့သည့်အတွက် ဖမ်းဆီးမခံခဲ့ရကြောင်း သူမက ပြောပြသည်။

“ ညီမတုန်းက ဘညွှန့်မှာပါလာတာ။ ည ၉ နာရီမှာ ပါလာတယ်ဆိုတော့ ၁၁ နာရီမှာ လာရှာတာပေါ့။ ကြိုသိလို့ရှောင်လိုက်တဲ့အတွက် အဖမ်းမခံလိုက်ရဘူး။ ညီမသာအိမ်မှာရှိရင် ဖမ်းခံရမှာပဲ။ အခုဆို FB မှာ post တောင် မတင်ရဲတော့ဘူး” ဟု သူမကဆိုသည်။

အရပ်သားအစိုးရထံမှအာဏာသိမ်းထားသည့် စစ်ကောင်စီသည် အာဏာသိမ်းပြီးနောက် ဖြစ်ပွားလာ သည့် ဒီမိုကရေစီအရေးလှုပ်ရှားမှုများကို ဦးခေါင်းကိုပစ်သတ်သည်အထိ ရက်ရက်စက်စက် ဖြိုခွင်းမှုများ ပြုလုပ်သကဲ့သို့ ဒီမိုကရေစီလှုပ်ရှားမှုများအား ထောက်ခံသူများကို မြေပြင်မှာသာမက လူမှုကွန်ရက် စာမျက်နှာများတွင်ပါ ဖိနှိပ်မှုများကို ဆက်တိုက်ပြုလုပ်နေသည်။

နိုင်ငံ‌ရေးအကျဉ်းသားများကူညီစောင့်‌ရှောက်ရေးအသင်း (AAPP)၏ ထုတ်ပြန်ချက်များအရ အာဏာသိမ်း သည့်နေမှ ယခု နိုဝင်ဘာလ ၂၄ ရက်နေ့အထိ ဒီမိုကရေစီအရေးလှုပ်ရှားမှုများကြောင့် ဖမ်းဆီးခံရသူမှာ ၁၆,၄၂၆ ဦးရှိနေပြီဖြစ်ကြောင်း သိရသည်။mizzima

မြန်မာနိုင်ငံတွင် စစ်အာဏာသိမ်းပြီးနောက်ပိုင်း လက်နက်ကိုင်ပဋိပက္ခ ဖြစ်ပွားရာဒေသများတွင် အမျိုးသမီးများ၊ မိန်းကလေးငယ်များနှင့် လိင်စိတ်ကွဲပြားသူများအပေါ် အကြမ်းဖက်မှုများ ဆိုးဆိုးရွားရွားဖြစ်ပွားနေကြောင်း အမျိုးသားညီညွတ်ရေးအစိုးရ၊ လူ့အခွင့်အရေးဆိုင်ရာ၀န်ကြီးဋ္ဌာန၊ ပြည်ထောင်စု၀န်ကြီး ဦးအောင်မျိုးမင်းက ပြောသည်။

ယနေ့ နို၀င်ဘာ ၂၅ ရက်တွင် ကျရောက်သော အပြည်ပြည်ဆိုင်ရာ အမျိုးသမီးများအပေါ်အကြမ်းဖက်မှု ပပျောက်ရေးနေ့ အထိမ်းအမှတ်ပွဲ၌ ပြည်ထောင်စု၀န်ကြီး ဦးအောင်မျိုးမင်း၏ သုံးမိနစ်စာမိန့်ခွန်းအတွင်း ယင်းသို့ ထည့်သွင်းပြောကြားခဲ့ခြင်း ဖြစ်သည်။

“ မြန်မာနိုင်ငံမှာ ကြည့်မယ်ဆိုရင် အကြမ်းဖက် စစ်ကောင်စီ အာဏာသိမ်းပြီးနောက်ပိုင်း တက်ကြွလှုပ်ရှားသူ အမျိုးသမီးတွေအပေါ်မှာ အ ကြမ်း ဖက်မှုတွေများစွာ ကြုံတွေ့ရပါတယ်။ နိုင်ငံရေးမှာ ပါ၀င်တဲ့ အမျိုသမီးတွေ အပေါ်မှာ အကြမ်းဖက်မှုတင်မကဘဲနဲ့ သာမန်အရပ်သား ပြည်သူတွေဖြစ်တဲ့ အမျိုးသမီးနဲ့ မိန်းကလေးငယ်တွေ အပေါ်မှာပါ အကြမ်းဖက်မှုဟာ ရပ်ရွာပတ်၀န်းကျင်အတွင်းမှာ ၊ အထူးသဖြင့် လက် နက်ကိုင်ပဋိပက္ခတွေ ဖြစ်ပွားနေတဲ့နေရာတွေ ဒီကာလအတွင်းမှာ ဆိုးဆိုးရွားရွား ဖြစ်ပွားလျက်ရှိပါတယ်။ ဒါတွေကို ကျွန်တော်တို့ သည်း ညည်းခံလို့ မရပါဘူး။ အမျိုးသမီးနဲ့ ကလေးငယ်များ၊ ဒါ့အပြင် လိင်စိတ်ကွဲပြားသူများအပေါ်မှာပါ အကြမ်းမှုများဟာ လုံး၀ ကန့်ကွက် ရှုတ်ချရမယ့် အရာဖြစ်ပါတယ်။ ဘယ်လိုနည်းနဲ့ မှ ဘယ်လို အကြောင်းနဲ့ မှ သည်းညည်းခံလို့ရတဲ့ အကြောင်အရာမဟုတ်ပါဘူး။” ဟု ဆိုသည်။

ထို့ကြောင့် အမျိုးသမီးများအပေါ် အကြမ်းဖက်မှုများပပျောက်စေရေးအတွက် လူတစ်ဦးချင်းစီတိုင်းတွင်သာမက အားလုံးစုစည်းလုပ်ဆောင်ကြမည်ဆိုပါက ပပျောက်နိုင်ပြီး၊ ကျူးလွန်သူများကို တရားဥပဒေအရ အရေးယူ ဆောင်ရွက်နိုင်မည်ဖြစ်ကြောင်း တိုက်တွန်းပြောကြားသည်။

အမျိုးသားညီညွတ်ရေးအစိုးရက ယနေ့ကျရောက်သည့် “ အပြည်ပြည်ဆိုင်ရာအမျိုးသမီးများအပေါ် အကြမ်းဖက်မှုပပျောက်ရေးနေ့” အတွက်ဆောင်ပုဒ်မှာ “အမျိုးသမီးနှင့် မိန်းကလေးငယ်များအပေါ် အကြမ်းဖက်မှုပပျောက်ဖို့ အားလုံးစုစည်းလုပ်ဆောင်စို့” ဟု ရွေးချယ်သတ်မှတ်ကြောင်း ကြေညာထားသည်။ mizzima

ရက္ခိုင့်တပ်တော် (AA) နှင့် ပတ်သက်သည်ဆိုသော စွပ်စွဲချက်ဖြင့် ရခိုင်ပြည်နယ်ရှိ ဒေသခံများကို ဖမ်းဆီးအရေးယူနေသည့် စစ်ကောင်စီက သံတွဲမြို့မှ အဝေးပြေးယာဉ်လိုင်းပိုင်ရှင်တစ်ဦးကိုလည်း ဖမ်းပြီး တစ်လအကြာတွင် မတရားအသင်းဆက်သွယ်မှုဥပဒေ ပုဒ်မ ၁၇(၁) ဖြင့် အမှုဖွင့်လိုက်သည်။ 

ရခိုင့်အားမာန် အဝေးပြေးယာဉ်လိုင်းပိုင်ရှင် ဦးစန်းကိုအား နာမည်ကျော် ငပလီကမ်းခြေအနီး သံတွဲမြို့ နယ် ဆပ်လည်မျှော်ရွာရှိ နေအိမ်တွင် အောက်တိုဘာ ၂၃ ရက်က လာရောက်ဖမ်းဆီးခဲ့ခြင်းဖြစ်သည်။ 

ယမန်နေ့ (၂၄) တွင် ၁၇ (၁) ဖြင့် တရားရုံးထုတ်ခံရသည့် ဦးစန်းကိုအား ငပလီမြို့အခြေစိုက် အမှတ် ၅၅ ခြေလျင်တပ်ရင်း (ခလရ ၅၅) မှ ဗိုလ်ကြီးရဲလင်းထွန်းက တရားလိုလုပ်ကာ အမှုဖွင့်ထားသည်ဟု သိရသည်။​ 

“မနေ့က သံတွဲမြို့နယ်တရားရုံးမှာ ရုံးထုတ်ပါတယ်။ အမှုဖွင့်ပြီးတဲ့နောက်ပိုင်းမှာ သံတွဲထောင်ချုပ်မှာ ထိမ်းသိမ်းထားတာဖြစ်တယ်။ ရုံးထုတ်ပြီးတော့ ထောင်ချုပ်ကိုပဲ ပြန်ခေါ်သွားတယ်” ဟု မိသားစုဝင်တစ်ဦးက ပြောသည်။

အာဏာသိမ်းစစ်တပ်နှင့် AA တို့အကြား တစ်ကျော့ပြန်တိုက်ပွဲများ ဖြစ်နေသည့်အပြင် နှစ်ဖက်အပြန်အလှန် ဖမ်းဆီးများလည်း ဆက်တိုက်ဖြစ်ပေါ်နေသည်။

စစ်ကောင်စီက နိုင်ငံ့ဝန်ထမ်းများအပါအဝင် တက်ကြွလှုပ်ရှားသူများနှင့် ဒေသခံများကို အဆက်မပြတ် ဖမ်းဆီးလျက်ရှိပြီး ပြည်နယ်တောင်ပိုင်း သံတွဲမြို့နယ်တွင် အထွေထွေအုပ်ချုပ်ရေးဦးစီးဌာန ဝန်ထမ်း ၂ ဦးအပါအဝင် ဒေသခံ ၉ ဦးကို ဖမ်းဆီးကာ ပုဒ်မ ၁၇ (၁)၊ ပုဒ်မ ၅၀၅ (က) တို့ဖြင့် အမှုဖွင့်ထားသည်။​

ယမန်နေ့တွင် ပုဒ်မ ၁၇ (၁) ဖြင့် အမှုဖွင့်ခံလိုက်ရသည့် ကားလိုင်းပိုင်ရှင် ဦးစန်းကိုမှာ သီချင်းရေးသူတစ်ဦးလည်းဖြစ်ပြီး ရခိုင်လူမှုကွန်ရက်( သံတွဲကမ်းခြေ) ဦးဆောင်ညှိနှိုင်းရေးမှူးများအဖွဲ့တွင် ဥက္ကဋ္ဌအဖြစ် တာဝန်ယူကာ လူမှုရေးနှင့် ဒေသဖွံ့ဖြိုးရေးလုပ်ငန်းများတွင် ပါဝင်ဆောင်ရွက်နေသူဖြစ်သည်ဟုလည်း သိရသည်။​

အဖမ်းခံရပြီးနောက် ဦးစန်းကို ပိုင်ဆိုင်သည့် သံတွဲမြို့နယ်၊ ဂျိတ္တောရွာရှိ ရခိုင့်အားမာန်ကားဂိတ်ကို ခလရ ၅၅ တပ်ရင်းမှ စစ်သားများက ဝင်ရောက်ရှာဖွေခဲ့သေးသည်ဟုလည်း သိရသည်။​

ထို့နောက် သံတွဲခရိုင်အုပ်ချုပ်ရေးဦးစီးဌာနက ကားဂိတ်ပိတ်ထားရန် ညွှန်ကြားခဲ့သည်ဟု ထို​ယာဉ်လိုင်းတာဝန်ရှိသူတစ်ဦးက ဆိုသည်။​

“ကားတွေကတော့ သံတွဲ၊ ကျောက်ဖြူ၊ တောင်ကုတ် ၊ မြောက်ဦး၊ စစ်တွေကို ပြေးဆွဲနေတာပါ။ အခုတော့ ယာယီ ရပ်ထားဖို့ အကြောင်းကြားလာတဲ့အတွက် ရပ်ထားရတာပါ” 

AA နှင့် ပတ်သက်သည်ဟု စွပ်စွဲကာ ဒေသခံများကို အာဏာသိမ်းစစ်တပ်က မနားတမ်း ဖမ်းဆီးနေရာ စက်တင်ဘာလမှ ယခုလလယ်အထိ သံတွဲမြို့နယ်တစ်ခုတည်း၌ပင် အဖမ်းခံထားရသူ ၃၀ နီးပါးရှိသည်။​

ယခုလ ၁၅ ရက်တွင် ငပလီအခြေစိုက် အမှတ် ၅၆၆ ခြေမြန်တပ်ရင်းမှ ဗိုလ်မှူးကြီးသက်ရွှေဝင်းက အုပ်ချုပ်ရေးမှူးများကို အစည်းအဝေးခေါ်ယူပြီး AA ၏ လှုပ်ရှားမှုများအကြောင်း သတင်းမပို့လျှင် ဖမ်းဆီးမည်ဟု ခြိမ်းခြောက်ခဲ့ကြောင်းလည်း သိရသည်။​

“အခုတလော စစ်ကောင်စီတပ်ဖွဲ့တွေဟာ အရပ်ဝတ်တွေနဲ့ ရွာတွေထိ လာရောက် စုံစမ်းနေတာရှိနေတယ်။ တချို့ဆို ရှောင်တိမ်းနေကြရပြီ။ စီးပွားရေးသမားတွေမှ မဟုတ်ဘူး။ အားလုံးက စိုးရိမ်နေရတဲ့အနေအထားပါ” ဟု သံတွဲမြို့ခံတစ်ဦးက ပြောသည်။​ myanmar now

မကွေးတိုင်း၊ ပခုက္ကူမြို့နယ်အတွင်း နိုဝင်ဘာလ၂၄ရက်နေ့မှစတင်ကာ ညနေ ၆နာရီမှ မနက် ၈နာရီအတွင်း ဆိုင်ကယ်စီးနင်းခွင့်ပိတ်ပင်ကြောင်း စစ်ကောင်စီ၏ မြို့နယ်အထွေထွေအုပ်ချုပ်ရေးရုံးမှ ကြေညာချက် စာတစ်စောင် ထုတ်ပြန်ထားသည်။

ယင်းထုတ်ပြန်ချက်အား ထုတ်ပြန်သည့်ရက်မှ ရက်ပေါင်း ၆၀အတွင်းအတည်ဖြစ်ပြီး မလိုက်နာပါက တည်ဆဲဥပဒေအရ အရေးယူမည်ဖြစ် ကြောင်း ထုတ်ပြန်ချက်တွင် ဖော်ပြထားသည်။

“ရပ်ကွက်နဲ့ လမ်းတချို့မှာလည်း လော်စပီကာနဲ့ လိုက်အော်သွားတယ်၊ ပြည်သူတွေ အခက်အခဲဖြစ်မယ်၊ ဒုက္ခရောက်မယ်၊ သွားလာရေးတွေ၊အရေးပေါ်ကိစ္စတွေမှာ ပြဿနာတွေရှိလာနိုင်တာမို့ ပြည်သူတွေအတွက်ကိုပဲ အဆင်မပြေမှာ စားဝတ်နေရေးခက်ခဲမှာ စိုးရိမ်ပါတယ်၊ စကစရဲ့အဓိပ္ပါယ်မဲ့ ထုတ်ပြန်ချက်တွေက တော်လှန်ရေးအင်အားစုတွေအတွက်တော့ ဘာအဟန့်အတားမှ ဖြစ်မနေပါဘူး၊ လုပ်သင့်တာ လုပ်ရမှာတွေ ပုံမှန်ဆက်လုပ်နေမှာပါပဲ”ဟု ပခုက္ကူမြို့နယ် ပြည်သူ့အုပ်ချုပ်ရေးအဖွဲ့တာဝန်ရှိသူက ပြောသည်။

နိုဝင်ဘာလ၂၄ရက် ည ၇နာရီအချိန် တွင် ပခုက္ကူမြို့နယ် ပေါက်လမ်းတစ်လျောက်နှင့် လမ်းမကြီးးတစ်လျောက်တွင် လိုက်လံအော်သွားပြီး နံ နက် ၈နာရီမှ ညနေ ၆နာရီအတွင်းဆိုင်ကယ်စီးနင်းရာတွင်လည်း ဆိုင်ကယ်မောင်းနှင်သူ တစ်ဦးထက်ပိုမစီးနင်းရန် ထုတ်ပြန်ထားသည်။ mizzima

ရန်ကုန်တိုင်း၊ မင်္ဂလာဒုံမြို့၊ ပျဉ်းမပင်ကျေးရွာအုပ်စုရှိ ရပ်ကွက် ၅ ခု၊ အိမ်ခြေ ၁၀၀၀၀ နီးပါးကို တပ်ပိုင်မြေ ကျူး ကျော်သည်ဟုဆိုကာ စစ် တပ်က ဖျက်သိမ်း ခိုင်းထားရာမှ ယနေ့ နံနက်ပိုင်းတွင် စံသမာဓိရပ်ကွက်ကို စစ်တပ်နှင့်ရဲ များက ဘူဒိုဇာ ၄ စီးဖြင့် ဝင်ရောက် ဖျက်ဆီးနေကြောင်း သိရှိရသည်။

နိုဝင်ဘာလ ၂၅ ရက်နေ့ နံနက်ပိုင်းမှစတင်၍ စစ်သားနှင့်ရဲအင်အား ၂၀၀ ကျော်၊ အပြာ ရောင်ဝတ် လူမိုက် အင်အား ၁၀၀ ကျော်ဖြင့် စံသမာဓိရပ် ကွက် အတွင်းသို့ ဝင်ရောက်လာပြီး နေအိမ်များကို ဖျက်ဆီးခြင်းဖြစ်ကြောင်း သိရှိရ သည်။

“ဘူဒိုဇာ ၄ စီးနဲ့ ဝင်လာတာ။ ပျဉ်းမပင်ကျေးရွာအုပ်စု အုပ်ချုပ်ရေးမှူး သိန်း ထွန်း ဦးဆောင်ပြီး ဝင်လာတာ။ လူနေ အိမ်တွေကို ဖျက်ဆီးတာ။ အပြာရောင် ဝတ် လူတွေကလည်း အပြာဝတ်စုံတွေနဲ့ တုတ်တွေ ဓားတွေနဲ့ ။ ဘယ်သူမှ အနားကပ်မခံဘူး။ အိမ်တွေကို မင်းတို့ဖျက်မလား၊ ငါတို့ဖျက်ရင် ဘာမှ ကျန်မှာ မဟုတ်ဘူးဆိုပြီး ဝင်ဖျက်တာပဲ။ အခု မနက်ကတည်းက ဖျက်နေတာ အခု ထက်ထိ ။ အိမ်ခြေ ၅၀၀ ကျော် ဖျက်သွားပြီ” ဟု ဒေသခံတစ်ဦးက ပြောဆို သည်။

နေအိမ်များကို စစ်တပ်နှင့်ရဲများက ဘူဒိုဇာများဖြင့် ဖျက်ဆီးနေရာတွင် ဓာတ်ပုံ ရိုက်သူတစ်ဦး၊ အိမ်ဖျက်သူများကို မေးခွန်းထုတ်ပြီး အိမ်အဖျက်မခံသူ ရခိုင် တိုင်း ရင်းသူ မခိုင်နှင်းဝေနှင့် ၂ နှစ်အရွယ် သားကိုလည်း ရဲနှင့်စစ်တပ်က ဖမ်းဆီးသွားကြောင်း သိရှိရသည်။

“ဓာတ်ပုံလည်း အရိုက်မခံဘူး။ ဓာတ်ပုံရိုက်ရင်လည်း ဖမ်းတယ်။ အဲဒီမှာ အိမ် ဖျက်တဲ့သူတွေကို ဘယ်အဖွဲ့လဲလို့ မေးတော့ ဘယ်အဖွဲ့ကလဲ ဆိုတာ ဖြေဘူး။ အဲဒါကို သွားမေးတဲ့ ရခိုင်တိုင်းရင်းသူ မခိုင်နှင်းဝေနဲ့ သူ့သား ၂ နှစ်သားလေးကို ဖမ်းသွားတယ်။ ဓာတ်ပုံရိုက်တဲ့လူငယ်တစ်ဦး အဖမ်းခံရတယ်။ ကျနော်တို့ တွေမှာ သူတို့ ကိုယ့်အိမ်ကို ဖျက်နေတာကို ငုတ်တုတ်ထိုင်ကြည့်နေရတယ်။ ကိုယ့်မှာ ဘာမှလည်းမရှိတော့ ဘ၀တွေက ပျက်စီးကုန်ပြီ။ ကျနော်တို့ ဘ၀တွေ အသိုက်အမြုံတွေကို ဖျက်နေတာ” ဟု ဒေသခံတစ်ဦးက ဆိုသည်။

စစ်တပ်က ဖျက်ခိုင်းသည့် မင်္ဂလာဒုံမြို့နယ်ရှိ ပျဉ်းမပင်ကျေးရွာအုပ်စုတွင် မြဲမြံအောင်ရပ်ကွက်၊ ဓလပါ လရပ်ကွက်၊ စံသမာဓိရပ်ကွက်၊ ဂုန်ညှင်းနီ ရပ် ကွက်၊ မြဝတီရပ်ကွက် စသည့် ၅ ရပ်ကွက် ပါဝင်ပြီး အိမ်ခြေ ၁သောင်းနီးပါး၊ လူဦးရေ ၅ သောင်းနီးပါးနေထိုင်ကြသည်။ khit thit

တနင်္သာရီတိုင်း ၊ မြိတ်ခရိုင် ၊ တနင်္သာရီမြို့နယ်ရှိ လယ်သစ်ကျေးရွာတွင် ပြီးခဲ့သည့် ရက်ပိုင်းက စစ်ကြောင်းထိုး ဝင်ရောက်လာသည့် စစ်ကောင်စီတပ်နှင့် ပြည်သူ့ကာကွယ်ရေး တပ်ဖွဲ့များ ယနေ့ နိုဝင်ဘာလ ၂၅ ရက်နေ့ နံနက်ပိုင်းမှ စတင်၍ တိုက်ပွဲ ဖြစ်ပွားနေကြောင်း PDF ရဲဘော်များထံက သိရ သည်။

ပြီးခဲ့သည့် နိုဝင်ဘာလ ၂၃ ရက်နေ့က စစ်ကောင်စီတပ်နှင့် ပျူစောထီးပူးပေါင်း အဖွဲ့ အင်အား ၁၀၀ ကျော်သည် တနင်္သာရီမြို့နယ် လယ်သစ်ကျေးရွာဖက်သို့ စစ်ကြောင်းထိုး ဝင်ရောက်လာခြင်း ဖြစ်သည်။

“တိုက်ပွဲက ဒီနေ့ မနက်ပိုင်းက စဖြစ်နေပါတယ်။ စစ်တပ်နဲ့ ပျူတွေက ပြီးခဲ့တဲ့ ရက်ပိုင်း က ရွာနားကိုရောက်လာလို့ ရွာသားတွေ အကုန်လုံး နီးပါး ထွက်ပြေး တိမ်းရှောင် နေရတယ်”ဟု လယ်သစ်ကျေးရွာနေ ဒေသခံ တစ်ဦးက ပြောသည်။

လက်ရှိတွင် စစ်ကောင်စီတပ်နှင့် ပြည်သူ့ ကာကွယ်ရေး တပ်ဖွဲ့များသည် နှစ်ဖက် အပြန် အလှန်ပစ်ခတ်မှုများရှိပြီး စစ်ရေး တင်းမာလျက်ရှိကာ စစ်ကောင်စီဘက်က လက်နက် ကြီးဖြင့် ပစ်ခတ်မှုများ ရှိကြောင်း သိရသည်။

“နှစ်ဖက် စလုံးကတော့ နေရာ အသင့်ယူပြီး ပစ်ခတ်မှုတွေ ရှိနေပါတယ်။ ရွာသားတွေ ရှောင်နေကြလို့ တိုက်ပွဲကတော့ ပိုပြီး ပြင်ထန်လာမယ်လို့ထင်တယ်” ဟု PDF ရဲဘော် တစ်ဦးက ပြော သည်။

ပြီးခဲ့သည့် လပိုင်းမှစတင်၍ တနင်္သာရီမြို့နယ် လယ်သစ်ကျေးရွာတွင် စစ်ကောင်စီတပ်နှင့် တိုက်ပွဲများ မကြာခဏ ဖြစ်ပွားလျက်ရှိသည်။mizzima

၂၀၂၂-၂၃ ပညာသင်နှစ်အတွက် ရန်ကုန်တက္ကသိုလ်နဲ့ ရန်ကုန်နည်းပညာတက္ကသိုလ်မှာ ကျောင်းဝင်ခွင့်ရရှိခဲ့သူတွေထဲက ကျောင်းသူ၊ ကျောင်း သား တဝက်စီလောက် ကျောင်းမအပ်ကြသေးဘူးလို့ အဲဒီတက္ကသိုလ်တွေက စုံစမ်းသိရပါတယ်။

၂၀၂၂ ခုနှစ် တက္ကသိုလ်ဝင်စာမေးပွဲ အောင်မြင်သူတွေထဲက ရန်ကုန်နည်းပညာတက္ကသိုလ်ရဲ့ ပထမနှစ်ဝင်ခွင့်ရ ကျောင်းသားကျောင်းသူ အရေ အတွက် ၄၀၅ ဦးရှိခဲ့ပြီး ကျောင်းအပ်ထားတဲ့ အရေအတွက်ကတော့ ၂၆၂ ဦးသာရှိကာ ကျန်တဲ့ ၁၄၃ ဦးကတော့ ကျောင်းမအပ်ကြသေးဘူးလို့ အဲ့ဒီတက္ကသိုလ် လက်ထောက်ကထိကတဦးက ပြောပါတယ်။

ဒါ့အပြင် ရန်ကုန်တက္ကသိုလ်မှာလည်း ပထမနှစ်သင်တန်းအတွက် ဘာသာရပ် ၂၉ ခုကို ဝင်ခွင့်ရ ကျောင်းသားကျောင်းသူ အရေအတွက် စုစု ပေါင်း ၇၆၆ ဦးရှိပေမဲ့ ကျောင်းအပ်နှံပြီးတဲ့ အရေအတွက်ကတော့ ၃ ပုံ ၂ ပုံလောက်ပဲရှိသေးပြီး အဲ့ဒီထက် နည်းနိုင်တယ်လို့ သိရပါတယ်။

ရန်ကုန်တက္ကသိုလ်မှာ ဒီနှစ်အတွက် ပထမနှစ် နေ့သင်တန်းတွေအဖြစ် မြန်မာစာ၊ အင်္ဂလိပ်စာ၊ သင်္ချာ၊ ဓာတု၊ ရူပ၊ နိုင်ငံတကာဆက်ဆံရေး၊ မြန် မာမှုပညာ စသဖြင့် ဘာသာရပ်ပေါင်း ၂၉ ခုကို သင်တန်းဖွင့်လှစ် သင်ကြားပေးနေတာပါ။

သင်တန်းသားအများဆုံး လက်ခံသင်ကြားပေးတဲ့ ဘာသာရပ်တွေအနေနဲ့ နိုင်ငံတကာဆက်ဆံရေးပညာ ဘာသာရပ်မှာ သင်တန်းသား ၁၀၄ ဦးနဲ့ အများဆုံး ခေါ်ယူထားပြီး သင်တန်းသား အနည်းဆုံး ၁ ဦးနှုန်းနဲ့ မြန်မာမှုပညာနဲ့ မနုဿဗေဒ ပညာရပ်သင်တန်းတွေကို ဖွင့်လှစ်ထားတယ်လို့ သိရပါတယ်။

ရန်ကုန်တက္ကသိုလ်၊ ရန်ကုန်နည်းပညာတက္ကသိုလ်တို့ရဲ့ ၂၀၂၂-၂၃ ပညာသင်နှစ်အတွက် ကျောင်းအပ် နောက်ဆုံးရက်ဟာ နိုဝင်ဘာ ၂၇ ရက်အထိဖြစ်ပေမဲ့ ရန်ကုန်စည်ပင်သာယာ နယ်နိမိတ်အပြင်နဲ့ အကြောင်းအမျိုးမျိုးကြောင့် ကျောင်းအပ်ဖို့ နောက်ကျနေသူတွေအတွက် ရက်တိုးမြှင့်သတ်မှတ်ပေးမယ်လို့ စစ်ကောင်စီလက်အောက်ခံ အဆင့်မြင့်ပညာဦးစီးဌာနက ကြေညာထားပါတယ်။

၂၀၂၂ ခုနှစ်အတွင်းမှာ ဆယ်တန်းအောင်မြင်ခဲ့ကြတဲ့ ကျောင်းသားကျောင်းသူပေါင်း ၁၃၀,၀၀၀ ကျော်ရှိပြီး စစ်တပ်အာဏာသိမ်းထားတဲ့ နိုင်ငံ ရေးအခြေအနေကြောင့် ၂၀၂၂ ခုနှစ်မှာ စာမေးပွဲအောင်မြင်သူတွေကို ၂ နှစ်ကြာပြီးမှသာ ကျောင်းဖွင့်လှစ်ပေးနိုင်ခဲ့တာလည်း ဖြစ်ပါတယ်။

စစ်အာဏာသိမ်းမှုနဲ့ စစ်ကျွန်ပညာရေးကို ဆန့်ကျင်ကန့်ကွက်တဲ့အနေနဲ့ သန်းနဲ့ချီတဲ့ ကျောင်းသူ ကျောင်းသားတွေ စာမေးပွဲမဖြေဘဲ ဘဲ သ ပိတ်မှောက်နေကြတာရှိသလို တက္ကသိုလ် ဆက်မတက်တော့တဲ့ ကျောင်းသားတွလည်း ရှိပါတယ်။

ဒါအပြင် နိုင်ငံတဝန်း တက္ကသိုလ် ပါမောက္ခတွေ၊ ကထိကနဲ့ နည်းပြအပါအဝင် ဆရာ ဆရာမ ထောင်ပေါင်းများစွာဟာလည်း အာဏာဖီဆန် CDM လှုပ်ရှားမှုမှာ ပါဝင်နေကြပါတယ်။DVB

ကချင်ပြည်နယ် ဖားကန့်ဒေသတွင် စစ်ကောင်စီတပ်နှင့် ကချင်လွတ်မြောက်ရေးတပ်မတော် (ကေအိုင်အေ)တို့အကြား တိုက်ပွဲများပြင်းထန်လာပြီး စစ်ရေးတင်းမာလာသည့်အတွက် ကျေးရွာအချို့မှ ပြည်သူများ ဘေးလွတ်ရာသို့ထွက်ပြေးတိမ်းရှောင်နေကြရကြောင်း ဒေသခံများထံမှ သိရသည်။

ယခုရက်ပိုင်းအတွင်း ဖားကန့်မြို့အနှံ့သို့ စစ်ကောင်စီတပ်၏ စစ်ကြောင်းများဝင်ရောက်လာမှု သိသိသာ သာရှိလာသည့်အပြင် စစ်ကောင်စီတပ်က လက်နက်ကြီးများဖြင့် လူနေကျေးရွာများဘက်သို့ ရမ်းသန်း ပစ်ခတ်မှုများကြောင့် ဒေသခံပြည်သူတွေများ ထိခိုက်သေဆုံးမှုရှိလာကြောင်း သိရသည်။

“လောလောဆယ်တော့ စစ်ရေးလှုပ်ရှားမှုတွေရှိလို့ ဘေးလွတ်ရာကိုထွက်ပြေးတိမ်း ရှောင်နေကြတာဖြစ် မယ်။ နောက်ထပ်တိုက်ပွဲတွေကလည်း ဖြစ်လာနိုင်တာကိုး” ဟု ဒေသခံ ကချင်သတင်းရင်းမြစ်တစ်ဦးက ပြောသည်။

ဖားကန့်မြို့နယ် ဆိပ်မူကျေးရွာအုပ်စုအတွင်းမှ ကောင်ဆန်၊ တောင်းကော့၊ ဝှေခါ၊ ဆပ်ပြာချောင်း၊ ကရင် ချောင်၊ ဘွမ်နန်အစရှိသည့် ကျေးရွာများတစ်လျှောက်တွင် စစ်ကောင်စီတပ်က စစ်ရေးလှုပ်ရှားမှုများ ရှိနေ သည့်အတွက် လက်တလောတွင် အဆိုပါကျေးရွာများမှ ပြည်သူ ၅၀၀ နီးပါး ဘေးလွတ်ရာသို့ ရွှေ့ပြောင်း လာကြောင်း ဒေသခံများက ဆိုသည်။

စစ်ကောင်စီတပ်များက လက်နက်ကြီးများဖြင့် ကျေးရွာများဘက်သို့ပစ်ခတ်မှုများ ဆက်တိုက်ဆိုသလို လုပ်ဆောင်နေခြင်းဖြစ်ပြီး တစ်ပတ်ကျော်ခန့်ရှိပြီဖြစ်ကြောင်း ဒေသခံသတင်းရင်းမြစ်များက အခိုင်အမာ ဆိုကြသည်။

ပြီးခဲ့သည့် နိုဝင်ဘာလ ၂၃ ရက်နေ့ ညနေ ၅ နာရီခန့်မှစပြီး ကောင်ဆန်၊ တောင်းကော့ကျေးရွာများဘက် သို့ စစ်ကောင်စီတပ်က လက်နက်ကြီးဖြင့်ပစ်ခတ်ခဲ့ခြင်းကြောင့် နေအိမ်သုံးလုံးထက်မနည်း ထိမှန်မီး လောင်သွားသည့်အပြင် ဒေသခံ ၁၀ ဦးထက်မနည်းထိခိုက်ဒဏ်ရာရရှိခဲ့ကာ တစ်ဦးထိခိုက်သေဆုံးခဲ့ ကြောင်း သိရသည်။

“ကလေးတွေရောလူကြီးတွေရောထိတယ်။ သေတာ တစ်ယောက်ရှိတယ်ကြားရတယ်။ ကလေးတွေကို တော့ ဆေးရုံကြီးမှာ ကုပေးနေတယ်။ နောက်ပြီး ဘုန်းကြီးကျောင်းမှာ ဆေးတွေကုပေးနေရတာလည်း ရှိ တယ်” ဟု သတင်းရင်းမြစ်များက အတည်ပြုပြောကြားသည်။

ယနေ့ နိုဝင်ဘာလ ၂၅ ရက်နေ့ နံနက်ပိုင်းတွင်လည်း ဆိုင်းတောင်ကျေးရွာ၊ ရပ်ကွက်(၃)နှင့် ရပ်ကွက်(၄) အကြားတွင် စစ်ကောင်စီတပ်ဘက်မှ ရမ်းသန်းပစ်ခတ်လိုက်သည့် လက်နက်ကြီးကျည်ကြောင့် ဆိုင်ကယ် စီးနင်းလာသည့်မောင်နှမအားထိမှန်ပြီး အသက်အန္တရာယ်စိုးရိမ်ရသဖြင့် ဖားကန့်ဆေးရုံကြီး၌ အရေးပေါ် ကုသမှုခံယူနေရကြောင်း သိရသည်။

ဖားကန့်မြို့နယ်၊ ဆိပ်မူအုပ်စု၊ ဆပ်ပြာချောင်းကျေးရွာတွင် တပ်စွဲထားသည့် စစ်ကောင်စီတပ်ဖွဲ့ဝင်များကို နိုဝင်ဘာလ ၁၇ ရက်နေ့က ကေအိုင်အေက နှစ်ကြိမ်သွားရောက်တိုက်ခိုက်ခဲ့ပြီး၊ နိုဝင်ဘာလ ၂၃ ရက် နေ့က စပေါ့ကျေးရွာနှင့် ကရင်ချောင်ကျေးရွာအကြား၌ စစ်ကောင်စီတပ်ဖွဲ့ဝင်များစီးနင်းလာသည့် အိမ်စီး ကားနှစ်စီး မိုင်းဆွဲတိုက်ခိုက်ခံရသဖြင့် စစ်ကောင်စီတပ်ဖွဲ့ဝင် အများအပြားသေဆုံးခဲ့ရပြီးနောက်ပိုင်း စစ်ကောင် စီတပ်နဲ့ ကေအိုင်အေတို့အကြား တိုက်ပွဲများဖြစ်ပွားလာခဲ့ခြင်းဖြစ်သည်။ mizzima