မြန်မာပြည်အလယ်ပိုင်း နိုင်ကျဉ်းတချို့ ရာစု နှစ်ချီထောင်ဒဏ်များ ချမှတ်ခံရ

စစ်ကောင်စီကို တော်လှန်ပုန်ကန်မှုဖြင့် ဖမ်းဆီးခံရသည့် မြန်မာနိုင်ငံအလယ်ပိုင်းရှိ အမျိုးသားအချို့ကို စစ်ကောင်စီက ရာစုနှစ်ချီ ထောင်ဒဏ်များချမှတ်ထားကြောင်း သိရှိရသည်။

မကွေးတိုင်း၊ တောင်တွင်းကြီးမြို့နယ်၊ အမျိုးသားဒီမိုကရေစီအဖွဲ့ချုပ် (NLD) မှ တိုင်းဒေသကြီး လွှတ်တော်အမတ်ဟောင်း ဦးဝင်းမြင့်လှိုင်နှင့် စစ်ကောင်စီကို လက်နက်ကိုင်ကာ တော်လှန်သည့် ဒေသခံကာကွယ်ရေးအဖွဲ့တစ်ခုဖြစ်သော ဗိဿနိုးပြည်သူ့ကာကွယ်ရေးအဖွဲ့မှ ကိုအောင်ခန့်ဦးတို့ကို စစ်ကောင်စီ တရားရုံးများက အကြမ်းဖက်မှုတိုက်ဖျက်ရေးဥပဒေများနှင့် စွဲဆိုခဲ့ခြင်း ဖြစ်သည်။

အောက်တိုဘာ ၃၀ တွင် မကွေးခရိုင် တရားရုံးက ၅၂ နှစ်အရွယ် ဦးဝင်းမြင့်လှိုင်ကို အကြမ်းဖက်မှုတိုက် ဖျက်ရေးဥပဒေ ပုဒ်မ ၄ ခုဖြင့် ထောင် ဒဏ် ၁၄၈ နှစ် ချထားသည်။

ယခုနှစ် ဧပြီလကုန်ပိုင်းက ဦးဝင်းမြင့်လှိုင်သည် ရာဇသတ်ကြီး ဥပဒေ ပုဒ်မ ၅၀၅ – က အပါအဝင် ပုဒ်မ ၅ ခုဖြင့် ထောင်ဒဏ် ၂၅ နှစ် ချမှတ်ခံ ထားရပြီးဖြစ်သည်။ ထို့ကြောင့် ထောင်ဒဏ်စုစုပေါင်းမှာ ၁၇၃ နှစ်အထိ ဖြစ်နေသည်။

စစ်အာဏာသိမ်းဆန့်ကျင်ရေးဆန္ဒပြပွဲများတွင် တက်ကြွစွာပါဝင်ခဲ့သည့် ဦးဝင်းမြင့်လှိုင်သည် ၂၀၂၁ ခုနှစ် မတ်လကုန်ပိုင်းမှ စတင်ကာနေရပ်မှ ရှောင်တိမ်းနေရစဉ် ပြီးခဲ့သည့်နှစ် နိုဝင်ဘာလတွင် ရှမ်းပြည်နယ် တောင်ကြီးခရိုင် ရပ်စောက်မြို့အဝင်ဂိတ်တွင် အဖမ်းခံခဲ့ရသည်

စစ်ကောင်စီက သူ့ကို တောင်ကြီးမြို့ စစ်ကြောရေးစခန်းတွင် နှစ်ပတ်ကြာ စစ်ကြောမေးမြန်းပြီးနောက် မကွေးတိုင်း ဒေါင်းနေထောင်သို့ လွှဲ ပြောင်းကာ နိုင်ငံတော်အကြည်ညိုပျက်စေမှု ပုဒ်မ ၅၀၅ – က အပါအဝင် အမှုများဖြင့် စတင်တရားစွဲဆို ခဲ့သည်။

ထို့နောက် သူ့ကို အကြမ်းဖက်မှုတိုက်ဖျက်ရေးဥပဒေများဖြင့် ထပ်မံစွဲဆိုခဲ့ခြင်းဖြစ်ကြောင်း ဦးဝင်းမြင့်လှိုင်၏ မိတ်ဆွေက ပြောသည်။ ထပ်တိုးအမှုများသည်သူထောင်ကျပြီးနောက် ဖြစ်ပျက်ခဲ့သည့် ကိစ္စရပ်များနှင့် ဆက်စပ်နေသည်ဟု လုံခြုံရေးအရ အမည်မဖော်လိုသည့် သူ၏ မိတ် ဆွေတစ်ဦးက Myanmar Now ကို ပြောဆိုသည်။

“သူအထဲ (ထောင်ထဲ)ရောက်ပြီးမှ ဖြစ်တဲ့ကိစ္စတွေ၊ ဒလန်သတ်ခံရတာတွေ၊ ရဲအသတ်ခံရတာတွေကိုပါ အမှုတွဲထားတာ။ နောက်ထပ်ဖမ်းခံရတဲ့(သူ)တွေနဲ့ အမှုတွဲထားတာ။ ဖြစ်သမျှ အကုန်တန်းစီပြီး လုပ်တဲ့သဘောပဲဖြစ်တယ်”ဟု ထိုသူက ပြောသည်။

“ သူက ဒီအမှုဖြစ်တဲ့အချိန်မှာ မြို့မှာမရှိဘူး။ ထောင်ထဲရောက်နေပြီပေါ့။ အဲ့ဒီတော့မှ တရားသူကြီးက ဟုတ်လား တဲ့။ သူကတောင် အံ့ဩနေသေးတယ်”

ဗိဿနိုးပြည်သူ့ကာကွယ်ရေးတပ်မတော်အဖွဲ့ဝင်တစ်ဦးဖြစ်သည့် ကိုအောင်ခန့်ဦးကိုမူ နိုင်ငံတော် အကြည်ညိုပျက်စေမှုအပါအဝင် အကြမ်း ဖက် မှုတိုက်ဖျက် ရေးဥပဒေများဖြင့် တရားရုံးများက နိုဝင်ဘာ ၁၅ တွင် ထောင်ဒဏ် ၂၀၃ နှစ် ချမှတ်လိုက်သည်။

အသက် ၂၉ နှစ်အရွယ် ကိုအောင်ခန့်ဦးကို နိုင်ငံတော် အကြည်ညိုပျက်စေမှု၊ ပေါက်ကွဲစေ တတ်သည့်ဝတ္ထုပစ္စည်းများ အက်ဥပဒေပုဒ်မ ၃ ခုတို့ ဖြင့် တောင်တွင်းကြီးမြို့နယ် တရားရုံးက ၁၀ နှစ် ချထားသည်။ မကွေးခရိုင် တရားရုံးကလည်း သူ့ကို အကြမ်းဖက်မှုတိုက်ဖျက်ရေးဥပ‌ဒေ ပုဒ်မ ၅၀ (က)၊ ၅၁ (ဂ)၊ ၅၂ (က)၊ ၅၄ တို့ဖြင့် ၁၉၃ နှစ် ချသည်။

ကိုအောင်ခန့်ဦးသည်လည်း ယခုနှစ် ဇန်နဝါရီ ၃၀ ရက်နေ့က မကွေးမြို့ပေါ်တွင် ဖမ်းဆီးခံရပြီးနောက်ပိုင်းမှ ပြင်ပတွင် ဖြစ်ပွားခဲ့သည့် ကိစ္စရပ်များကိုပါ ထည့်သွင်းစွဲဆိုခံရခြင်းဖြစ်ကြောင်း လုပ်ဖော်ကိုင်ဘက်တစ်ဦးကပြောသည်။

“ဖေဖော်ဝါရီလကနေ ခုနောက်ပိုင်း ဗိဿနိုးဖြစ်စဉ်တွေမှန်သမျှ အမှုတွဲတွေကိုလည်း အကုန်လုံး သူ့အထဲမှာ ရောထည့်ထားတယ်။ ဗိဿနိုးကဖြစ်စဉ်မှန်သမျှ သူ့အမှုတွဲဆိုပြီး တွဲလိုက်တဲ့အတွက် နှစ်တွေများသွားတာပေါ့။ ဖြစ်စဉ်က ၁၀ ခုအထက်မှာရှိမယ်။ ဖြစ်စဉ်တော်တော်များများကို သူ့ အမှုတွဲထဲထည့်တာပေါ့” ဟု ဗိဿနိုး ပြည်သူ့ကာကွယ်ရေးတပ်မတော် အဖွဲ့ဝင်က ပြောသည်။

နှစ်ရှည်ထောင်ဒဏ်များ ချမှတ်ခံထားရသည့် ဦးဝင်းမြင့်လှိုင်နှင့် ကိုအောင်ခန့်ဦးတို့ မကွေး၊ ဒေါင်းနေထောင်တွင် ထိန်းသိမ်းခံထားရပြီး ရုံးချိန်းကာလအတွင်း ထောင်ဝင်စာတွေ့ခွင့် ရခဲ့သော်လည်း အမိန့်ချပြီးနောက် ထောင်ဝင်စာတွေ့ ခွင့်မရသေးကြောင်း သိရသည်။

စစ်ကောင်စီဘက်က အကြမ်းဖက်မှုတိုက်ဖျက်ရေးဆိုင်ရာဥပဒေဖြင့် ပုဒ်မအမျိုးမျိုးတပ်ပြီး တရားစွဲဆိုခြင်းမှာ ပြစ်မှုကျင့်ထုံးဆိုင်ရာ ဥပဒေနှင့်ညီညွတ်ခြင်းမရှိကြောင်း ရှေ့နေများက ထောက်ပြသည်။

“တစ်နှစ်အတွင်း မျိုးတူပြစ်မှုတွေအပေါ်မှာ ဒီလိုမျိုးခွဲပြီးစွဲလို့မရဘူး၊ အကြမ်းဖက်မှု တိုက်ဖျက်ရေး ဥပဒေ တစ်ခုတည်းပဲ၊ မျိုးတူပြစ်မှုပဲ။ ပြစ်မှုတစ်ခုပေါ်မှာပဲ ခွဲပြီးတော့ ပုဒ်မတွေနဲ့ ပြစ်မှုဆိုင်ရာ ကျင့်ထုံးဥပဒေအရ အဲ့လိုမျိုးခွင့်ပြုမထားဘူး၊ ဒါပေမယ့်လုပ်နေတာပဲ။ ဥပဒေအရတော့ ခွင့်မပြုဘူး။ ဥပဒေမှာလည်း ပြဋ္ဌာန်းထားတာမရှိဘူး” ဟု ဝါရင့်ရှေ့နေတစ်ဦးက ပြောသည်။

မန္တလေးတိုင်း၊ ဝမ်းတွင်းမြို့နယ် တော်လှန်ရေးအင်အားစုအဖွဲ့ဝင် ၂ ဦးဖြစ်သည့် ကိုကျော်သက်နှင့် ကိုနှင်းမောင်တို့ကို မိတ္ထီလာ အကျဉ်းထောင်တရားရုံးက ပြီးခဲ့သည့် အောက်တိုဘာလတွင် သေဒဏ်အပြင် ရာစုနှစ်နှင့်ချီသည့် ထောင်ဒဏ်များ ချမှတ်လိုက်ကြောင်း ဒေသကာကွယ်ရေးအဖွဲဲ့နှင့် ထောင်နှင့်နီးစပ်သူတို့က ဆိုသည်။

အကြမ်းဖက်မှုတိုက်ဖျက်ရေး ပုဒ်မများအပါအဝင် အခြားပုဒ်များတပ်ခံထားရသည့် အသက် ၃၀ နှစ်အရွယ် ကိုကျော်သက်သည် ထောင်ဒဏ် ၂၂၅ နှစ်နှင့် သေဒဏ်၊ အသက် ၃၆ နှစ်အရွယ် ကိုနှင်းမောင်သည် ထောင်ဒဏ် ၉၅ နှစ်နှင့် သေဒဏ် ချခံထားရသည်ဟု သိရကြောင်း WTRF အဖွဲ့နှင့်မဟာမိတ်ဖွဲ့ထားသည့် အလယ်ပိုင်းတိုင်း မဟာမိတ်များတပ်ပေါင်းစု CRC ၏ တာဝန်ရှိသူ ဗိုလ်ကျားရဲကပြောသည်။

မိတ္ထီလာအကျဉ်းထောင်သည် ၁၀ နှစ်အောက် အကျဉ်းသားများကိုသာ ထားရှိသဖြင့် ၎င်းတို့နှစ်ဦးကို မြင်းခြံထောင်သို့ ပို့ဆောင်ထားသည်ဟု သိရကြောင်း ထိုအကျဉ်းထောင်မှ ပြီးခဲ့သည့်နှစ်ကုန်ပိုင်းတွင် ပြန်လည် လွတ်မြောက်လာသည့် မိတ္ထီလာတက္ကသိုလ်ကျောင်းသားများ သမဂ္ဂအဖွဲ့ဝင်တစ်ဦးက ဆိုသည်။

“သေဒဏ်ပြီးရင်တောင် ဝိဥာဉ်ကိုချုပ်ထားတာမျိုးကို ပြောတာဗျ။ တချို့ဆိုရင်ရှိတယ်။ တစ်ယောက်တည်းကို ၃ သေဒဏ်၊ ၄ သေဒဏ်ဆိုတာရှိတယ်လေ” ဟု ၎င်းကဆိုသည်။

ယခုနှစ်အစောပိုင်း ဇန်နဝါရီလတွင် ဝမ်းတွင်းမြို့နယ် တဲစုကျေးရွာအတွင်း စစ်ကောင်စီတပ်က စစ်ဆေးစဉ် ဆိုင်ကယ်စီးနင်းလာသည့် ကိုကျော်သက်၊ ကိုနှင်းမောင်တို့ ဖမ်းဆီးခံခဲ့ရခြင်းဖြစ် ကြောင်း စစ်ကောင်စီ၏ ဝါဒဖြန့်သတင်းဌာနများတွင် ဖော်ပြထားသည်။

ပျမ်းမျှလူ့သက်တမ်းထက် ကျော်လွန်ပြီး နှစ်ရှည်ထောင်ဒဏ်ချမှတ်နေသည့် တရားစီရင်ရေးဆိုင်ရာ ကဏ္ဍမှာ လက်ခံနိုင်ဖွယ်ရာမရှိကြောင်း ရှေ့နေအသိုင်းအဝိုင်းက သုံးသပ်သည်။

“ကြောက်အောင်လုပ်တာပေါ့ဗျာ။ ဒါပေမယ့် လူတွေက မကြောက်ဘူး။ ချတဲ့သူပဲ နာမည်ပျက်တာ”ဟု ဝါရင့်ရှေ့နေတစ်ဦးက မှတ်ချက်ပြုသည်။

အာဏာသိမ်းမှုမတိုင်ခင်က အရောင်းဝန်ထမ်းအဖြစ် လုပ်ကိုင်ခဲ့သည့် ကိုအောင်ခန့်ဦးမှာ စစ်အာဏာသိမ်းမှုဆန့်ကျင်ရေးလှုပ်ရှားမှုများတွင် တက်ကြွစွာပါဝင်ခဲ့သူဖြစ်ပြီး လက်ရှိတွင် ထောင်ဒဏ်ချမှတ်ခံ ထားရသော်လည်း ကျန်းမာရေးကောင်းမွန်သည်ဟု ၎င်း၏ မိတ်ဆွေထံမှ သိရသည်။

“သူကတော့ ကျန်းမာတယ်။ တတ်နိုင်တာမှန်သမျှ ဆက်ပြီးလုပ်ဆောင်ကြဖို့ပေါ့။ ဗိဿနိုးအနေနဲ့ ဆက်လက်လုပ်ဆောင်ဖို့ သူ့အနေနဲ့ အထဲမှာ တောင့်ခံထားတယ်ပေါ့။ အဲ့လိုအမြဲတမ်းပြောတယ်” ဟု အထက်ပါ တာဝန်ခံကပြောသည်။

ဦးဝင်းမြင့်လှိုင်မှာလည်း သွေးတိုးရောဂါကြောင့် နေ့စဉ်ဆေးသောက်နေရကြောင်း၊ အခြား ရောဂါများ မရှိကြောင်း ၎င်း၏မိတ်ဆွေတစ်ဦးက ပြောသည်။

“ပြန်တွေ့ဖို့ဆုံဖို့ မျှော်လင့်ထားတယ်။ ဒီတော်လှန်ရေးက နိုင်မှာလေ။ အဲ့လိုပဲယုံကြည်တယ်” ဟု သူကဆိုသည်။

ဖမ်းဆီးနှိပ်စက်ခံရမှုများကို မှတ်တမ်းတင်နေသည့် နိုင်ငံရေး အကျဉ်းသားများ ကူညီစောင့်ရှောက်ရေးအသင်းက စစ်အာဏာသိမ်းပြီးနောက် အရပ်သားပြည်သူ ၁၂၉၆၇ ဦးထက်မနည်း ဆက်လက် ဖမ်းဆီးခံထားရသည်၊ ထိုအထဲတွင် ၁၆၀၂ ဦး ထောင်ဒဏ်ချမှတ်ခံထားရပြီး သေဒဏ်ချမှတ်ခံထားရသူ ၈၆ ဦးရှိကြောင်း နိုဝင်ဘာ ၂၂ ရက်နေ့က သတင်း ထုတ်ပြန်ထားသည်။

စစ်ဗိုလ်ချုပ်များ၏လက်အောက်ခံ တရားရုံးများသည် ယခင်ကလည်း ဒီမိုကရေစီဘက်တော်သားများကို နှစ်ရှည်ထောင်ဒဏ်များ ချခဲ့ဖူးသည်။

၁၉၉၈ တွင် ဖမ်းဆီးခံရသည့် ရန်ကုန်မြို့မှ ကိုသက်ဝင်းအောင်ကို ထောင်ဒဏ် စုစုပေါင်း ၅၇ နှစ် ချဖူးသည်။ ကိုသက်ဝင်းအောင်သည် ထောင်ကြီးများတွင် အခက်အခဲများ၊ ညှဥ်းပန်းနှိပ်စက်မှုများနှင့် ရင်ဆိုင်ရပြီး ၈ နှစ်အကြာတွင် မန္တလေးထောင်အတွင်း သေဆုံးသည်။

ကိုသက်ဝင်းအောင်ကို ဖမ်းဆီးမှု၊ ထောင်တွင်းသေဆုံးမှုနှင့် ပတ်သက်ပြီး ထိုစဥ်က တာဝန်အရှိဆုံးမှာ စစ်ခေါင်းဆောင် ဗိုလ်ချုပ်မှူးကြီး သန်းရွှေ ဖြစ်သည်။

သူ့လက်ထက်မှာပင် ရှမ်းတိုင်းရင်းသားခေါင်းဆောင်များကို ဖမ်းဆီးပြီး ယခင်က မကြားဖူးခဲ့ကြသော နှစ်ရှည်ထောင်ဒဏ်များ ချမှတ်ခဲ့သည်။

၂၀၀၅ တွင် နိုင်ငံရေးသမားများကို ဖက်ဒရယ်အရေး ဆွေးနွေးသည်ဟူသော အကြောင်းပြချက်ဖြင့် ဗိုလ်ချုပ်ဆေထင်ကို ၁၀၆ နှစ်၊ ခွန်ထွန်းဦးကို ၉၃ နှစ်၊ စိုင်းညွန့်လွင်ကို ၈၄ နှစ် ချခဲ့သည်။

၂၀၀၇ တွင် ၈၈ မျိုးဆက် ကျောင်းသားခေါင်းဆောင်များကို ဖမ်းဆီးပြီး ထောင်ဒဏ် ၆၅ နှစ်စီ ချမှတ်ခဲ့သေးသည်။ myanmar now

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s