မြင်းခြံတွင် PDF များ၏ တိုက်ခိုက်ခြင်းခံရပြီး သေနတ် ၉ လက် ဆုံးရှုံးခဲ့သည့် စစ်ကောင်စီ ခန့် အုပ်ချုပ်ရေးမှူးကို စစ်ကောင်စီကပင် ထောင်ဒဏ်နှစ် ၉၀ ချမှတ် ဟုဆို
မန္တလေးတိုင်း၊ မြင်းခြံမြို့နယ် ပျော်ဘွယ်စံပြကျေးရွာတွင် ဒေသခံပြည်သူ့ ကာကွယ်ရေးတပ်ဖွဲ့ (PDF) များ၏ တိုက်ခိုက်ခြင်းခံရပြီး သေနတ် ကိုး လက် ဆုံးရှုံးခဲ့သည့် စစ်ကောင်စီခန့် အုပ်ချုပ်ရေးမှူးအား စစ်ကောင်စီမှပင် ထောင်ဒဏ် နှစ် ၉၀ ချမှတ်ခဲ့သည်ဟု မြင်းခြံလူထုလှုပ်ရှားမှုကော်မတီက ယမန်နေ့ ဒီဇင်ဘာ ၃ ရက်နေ့ ရက်စွဲဖြင့် ထုတ်ပြန်ထားသည်။
“ယခင်က ဒေသခံPDF တွေရဲ့ တိုက်ခိုက်မှု ခံခဲ့ရပြီး သေနတ် ကိုး လက်ဆုံးရှုံးခဲ့ရတဲ့ စံပြ ကျေးရွာအုပ်ကြီးကို စခ(စစ်ကောင်စီတပ်)များမှ ဖမ်းဆီးခဲ့ပြီး ထောင်ဒဏ်နှစ် ၉၀ အထိ ချခဲ့တယ်လို့သိရ” ဟု မြင်းခြံလူထုလှုပ်ရှားမှုကော်မတီ်၏ ထုတ်ပြန်ချက် တွင်ပါရှိသည်။
ပြီးခဲ့သည့် ၂၀၂၂ ခုနှစ် ဇူလိုင်လ ၂၉ ရက်နေ့က ပထမအကြိမ် သွားရောက်ပစ်ခတ် တိုက်ခိုက်ခဲ့စဉ် ပျော်ဘွယ်စံပြကျေးရွာရှိ အုပ်ချုပ်ရေးမှူး သည် စစ်ကောင်စီ တပ်သား များနှင့် အတူရှိနေပြီး ထွက်ပြေး သွားကာ ၎င်းတို့ကိုင်ဆောင်သည့် ရှော့ဂန်းတစ်လက်နှင့် ကာဘိုင် တစ်လက်တို့ကို သိမ်းဆည်းရမိခဲ့သည်။
ပြီးခဲ့သည့် စက်တင်ဘာ ၂၉ရက်နေ့ မွန်းလွဲ ၁နာရီခန့်တွင် အဆိုပါ အုပ်ချုပ်ရေးမှူးနှင့် စစ်ကောင်စီတပ်သားများကို Natogyi- PDFမှ ဒုတိယအကြိမ် ထပ်မံ ဝင်ရောက် စီးနင်းပစ်ခတ်ရာတွင် ၎င်းတို့ကိုင်ဆောင်သည့် MA1- သုံးလက်၊ ရှော့ဂန်း-တစ်လက်၊ ကာဘိုင်- သုံးလက်အပါအဝင် ကျည်ဘောက်နှင့် ကျည်ဆန်များအား သိမ်းဆည်း ရမိခဲ့ခြင်းဖြစ်သည်။
အဆိုပါ ပျော်ဘွယ်ရွာက အုပ်ချုပ်ရေးမှူးအား ပစ်ခတ်ရှင်းလင်းရန် Natogyi-PDF မှ တိုက်ခိုက်မှု နှစ်ကြိမ်တိုင်လုပ်ဆောင်ခဲ့ပြီး နှစ်ကြိမ်စလုံးတွင် ၎င်းတို့ဘက်မှ ပြန်လည်ခုခံခြင်းမျိုး မရှိဘဲ ထွက်ပြေးသွားကြောင်းသိရသည်။
ပြီးခဲ့သည့် နိုဝင်ဘာ ၃၀ ရက်နေ့ကလည်း မြင်းခြံမြို့နယ်၊ ဗလုံကျေးရွာတွင် ပျူစောထီးများအတွက် ထုတ်ပေးထားသည့် သေနတ် လေးလက်နှင့် ကျည်ဆန်များကို ဒေသခံ PDF များမှ စစ်ကောင်စီလက်အောက်ခံ ရဲဝတ်စုံများဝတ်ဆင်၍ သိမ်းယူခဲ့ သည့်အတွက် အဆိုပါအုပ်ချုပ်ရေးမှူးကို စစ်ကောင်စီတပ်က ဖမ်းဆီး၍ စစ်ဆေးမှုများ ပြုလုပ်နေကြောင်း မြင်းခြံလူထုလှုပ်ရှားမှု ကော်မတီ၏ ထုတ်ပြန်ချက်အရ သိရသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 