SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ပဲခူးတိုင်း၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ကိုကျော်ဇေယျကို စစ်ကောင်စီဩဇာခံ ပြည်ထောင်တွင်းတရားရုံးက   ဒီ ဇင်ဘာ ၁၂ ရက်မှာ  အမှု ၄ မှုအတွက်  ထောင်ဒဏ် ၉ နှစ် ထပ်မံချမှတ်လိုက်တယ်လို့ ပြည်မြို့နယ်တရားရုံးကနေ သိရပါတယ်။

ဦးကျော်ဇေယျကို စစ်ကောင်စီက အရင်ကတည်းက ရွေးကောက်ပွဲ မဲမသမာမှုနဲ့ ထောင် ၃ နှစ်၊ အကြမ်းဖက်မှုနဲ့  ၇ နှစ်နဲ့ ထောင်ဒဏ် ၁၀ နှစ်ချထားပြီး မနေ့ကတော့ ကျန်တဲ့  သဘာ၀ဘေးအန္တရာယ်ပုဒ်မနဲ့ ထောင်ဒဏ်   ၂ နှစ်၊ ယစ်မျိုးဥပဒေနဲ့ ထောင်ဒစ်  ၁ နှစ်၊  ပုဒ်မ(၅၀၅) နှစ်မှုအတွက်ထောင်ဒဏ် ၉ နှစ်ထပ်ချလိုက်ကာ စစ်ကောင်စီက မတရားချမှတ်ထားတဲ့ စုစုပေါင်းထောင်ဒဏ် ၁၉ နှစ်အထိရှိသွားပြီလို့ သူနဲ့ နီးစပ်တဲ့ ပြည်မြို့ခံက ပြောပါတယ်။

လွှတ်တော်အမတ် ဦးကျော်ဇေယျကို စစ်တပ်ကအာဏာသိမ်းပြီးနောက် စစ်ကောင်စီက အကြိမ်ကြိမ် ဖမ်းဆီးဖို့ကြိုးစားခဲ့ပေမဲ့ ထွက်ပြေးလွတ်မြောက်ခဲ့ပြီး လွတ်မြောက်နယ်မြေတွေမှာ မိသားစုနဲ့အတူ တိမ်းရှောင်နေခဲ့ပါတယ်။ သူ့ကိုဖမ်းမမိလို့ စစ်ကောင်စီက သူငှားနေတဲ့အိမ်ကိုလည်း ချိတ်ပိတ်ခဲ့ပါတယ်။

တိမ်းရှောင်နေစဉ် ဇွန် ၉ ရက်က  ကျန်းမာရေးမကောင်းတာကြောင့် ရန်ကုန်မြို့ကို ဆေးကုဖို့ ခေတ္တရောက်နေချိန်မှာ စစ်ကောင်စီ ဒလန်တချို့ရဲ့ သတင်းပေးမှုနဲ့ ရန်ကုန်မှာ ဖမ်းဆီးခံခဲ့ရပါတယ်။

ဖမ်းဆီးခံရပြီးနောက် စစ်ကြောရေးကို ရောက်ခဲ့ပြီး အဲဒီကမှ ပြည်(ဒကစ)ဒေသကွပ်ကဲရေးစစ်ဌာနချုပ်၊ ဒီနောက် ပြည်အကျဉ်းထောင်ကို ပြောင်းရွေ့ခဲ့ပြီး ပြည်ထောင်တွင်း ပြစ်ဒဏ်တိုက်ထဲမှာ သီးခြားအကျဉ်းကျခံနေရာက ရုံးထုတ်စစ်ဆေးပြီး အခုလို နှစ်ရှည် ထောင်ဒဏ် အမိန့်ချလိုက်တာလို့ မိသားစုထံက သိရပါတယ်။ DVB

စစ်ကိုင်းတိုင်း မြောင်မြို့နယ်အတွင်းရှိ လှေတင်ဦးနှင့် ဖွားစောကျေးရွာကို အကြမ်းဖက် စစ်တပ်က ထပ်မံ မီးရှို့ဖျက်ဆီးနေကြောင်း ဒေသခံပြည်သူများက ရန်ကုန်ခေတ်သစ်သို့ ‌ပြောကြားသည်။

ဒီဇင်ဘာလ ၁၃ ရက်နေ့ နံနက် ၉ နာရီခန့်မှ စတင်ကာ အကြမ်းဖက် စစ်တပ်က လှေတင်ဦးနှင့် ဖွားစောကျေးရွာတို့ကို ဆက်တိုက်် ဝင်ရောက် မီးရှို့ ဖျက်ဆီးနေခြင်းဖြစ်ကြောင်း သိရသည်။

“ဖွားစောကျေးရွာကို မီးစတင်ရှို့နေပါပြီ။ ။ တိုက်ပွဲလည်း မဖြစ်ဘဲနဲ့ အနောက်ဘက်ကျေးရွာတစ်ရွာ(လှေတင်ဦးရွာ) ကိုလည်း မီးဝင်ရှို့တယ်။ လက်နက်ကြီးနဲ့လည်း ပစ်တယ်ဗျ။ ကျေးရွာက သက်ကြီးရွယ်အိုတွေကို ကယ်ဆယ်ရေးအဖွဲ့တွေက ကယ်ထုတ်နေပါတယ်” ဟု ဒေသခံ တစ်ဦးက ရန်ကုန်ခေတ်သစ်သို့ ပြောဆိုသည်။

အကြမ်းဖက် စစ်တပ်သည် ဖွားစောရွာကို ၃ ကြိမ်မြောက် မီးရှို့ဖျက်ဆီးနေခြင်းဖြစ်ကြောင်း သိရသည်။ khit thit

စစ်ကိုင်းတိုင်း၊ မုံရွာမြို့နယ်၊ တောပုကျေးရွာမှထွက်လာသည့် ပျူစောထီးအဖွဲ့ဝင်များကို ဒီဇင်ဘာလ ၁၂ ရက်နေ့ နံနက်ပိုင်းက ဒေသကာကွယ် ရေးတပ်ဖွဲ့များမှ ပူးပေါင်းတိုက်ခိုက်ခဲ့ရာ ထိခိုက် သေဆုံးမှုများရှိနိုင်ကြောင်း မုံရွာခရိုင်တပ်ရင်း (၁၁)People’s Defence Force – South Monywa မှ ကိုဒေါင်းကာရံက ပြောသည်။

“မနက်၉နာရီဝန်းကျင်လောက်က တောပုကထွက်လာတဲ့ပျူစောထီးတွေနဲ့ ကျွန်တော်တို့ မဟာမိတ်အဖွဲ့ တွေ ၁၅ မိနစ်ခန့်ကြာ တိုက်ပွဲဖြစ်ပွားခဲ့တာပါ။ အထိအခိုက် စုံစမ်းလို့မရသေးပါဘူး” ဟု ၎င်းကပြောသည်။

တောပုကျေးရွာမှပျူစောထီးအဖွဲ့ဝင်များသည် မုံရွာမြို့နယ်အတွင်း အဆိုးဆုံးအဖွဲ့တစ်ခုဖြစ်ပြီး လက်နက် အားကိုးဖြင့် လမ်းပေါ်တက်၍ ဆက် ကြေးကောက်ခံခြင်း၊ အနီးအနားရှိကျေးရွာများကို ဝင်ရောက်၍ ခိုးဆိုး လုယက်ခြင်းများပြုလုပ်လေ့ရှိကြောင်း ၎င်းကဆိုသည်။

“အဲဒီရွာက စစ်အာဏာသိမ်းမှုဆန့်ကျင်သူတွေကိုလည်း မထင်ရင်မထင်သလို ခေါ်ယူနှိပ်စက်တယ်၊ မထင် ရင်သတ်ပစ်တယ်။ အဲဒါကြောင့် စစ်အာဏာသိမ်းမှုဆန့်ကျင်သူတွေ ရွာထဲမနေရဲကြဘူး အကုန်ရှောင် တိမ်းနေကြရတယ်”ဟု ကိုဒေါင်းကာရံက ဆိုသည်။

ယခုတိုက်ခိုက်မှုကို မုံရွာခရိုင်တပ်ရင်း (၁၁)People’s Defence Force – South MonywaSpecial Forces (11)- PDF (မုံရွာမြို့နယ် ပကဖ) Spring Dove Garuda King Monywa တို့က ပူးပေါင်းဆောင်ရွက်ခဲ့ခြင်း ဖြစ်ကြောင်း သိရသည်။ mizzima

စစ်ကိုင်းတိုင်း၊ ကန့်ဘလူမြို့နယ်၊ ကိုးတောင်ဘို့ စစ်ကောင်စီစခန်းကို ပြည်သူ့ကာကွယ်ရေးအဖွဲ့တွေက ဒီဇင်ဘာ ၁၂ ရက် ဒီနေ့မနက်မှာ စခန်းသိမ်းတိုက်ပွဲ ပြုလုပ်ခဲ့တယ်လို့ တော်လှန်ရေးအဖွဲ့တွေက ပြောပါတယ်။

အဆိုပါတိုက်ပွဲဟာ မနက် ၁ နာရီကနေ ၄ နာရီအထိ ကြာမြင့်ခဲ့တယ်လို့လည်း သိရပါတယ်။

ကန့်ဘလူဒေသခံ ကာကွယ်ရေးအဖွဲ့ဝင်တဦးက “တိုက်ပွဲက စခန်းသိမ်းတိုက်ပွဲပဲ။ အခြေအနေမလှတော့ စစ် (–)တွေက လေယာဉ် ၂ စီးနဲ့ကို လာပစ်ရတယ်။ လေယာဉ်ပစ်လို့ တိုက်ပွဲက ပြီးသွားတယ်။ ကျနော်တို့ဘက်က ၁ ဦးကျတယ်။ ၆ ဦး ဒဏ်ရာရှိတယ်ဗျ။ လေယာဉ်နဲ့ပစ်လို့ ဒေသခံအကျအဆုံးကတော့ မသိရသေးဘူး” လို့ ပြောပါတယ်။

စစ်ကောင်စီတပ်သားတွေ ကိုးတောင်ဘို့အထိုင်ကနေ ကောလင်းမြို့နယ်ဘက်ကို စစ်ကြောင်းထွက်သွားတာကို အခွင့်ကောင်းယူပြီး စစ်ကောင်စီနောက်တန်းစခန်းကို တော်လှန်ရေးအဖွဲ့တွေက ဝင်ရောက် စခန်းသိမ်းတိုက်ပွဲ ပြုလုပ်ခဲ့တာဖြစ်ပြီး စစ်ကောင်စီဘက်က အကျအဆုံးများတာကြောင့် အခုလို လေယာဉ်နဲ့ စစ်ကူလာပစ်တာလို့ ဒေသခံကာကွယ်ရေးအဖွဲ့တွေက ဆိုပါတယ်။

စစ်ကောင်စီဘက်က အကျအဆုံးကိုတော့ သတင်းထုတ်ပြန်တာ မရှိသေးသလို ဒီဗွီဘီ အနေနဲ့လည်း သီးခြား အတည်ပြုမပြုနိုင်သေးပါဘူး။

အဲဒီတိုက်ပွဲကို ဒေသခံ Kotaungbo Revolution KTB-R အပါအဝင် တခြား ညီနောင်မဟာမိတ် ပြည်သူ့ကာကွယ်ရေးအဖွဲ့တွေ ပူးပေါင်းတိုက်ခိုက်ခဲ့တာလို့ သိရပါတယ်။

စစ်ကိုင်းတိုင်း ကသာမြို့နယ် ချောင်းဝကျေးရွာအနီးမှာ ဒီဇင်ဘာ ၁၁ ရက် မနက်ပိုင်းက စစ်ကောင်စီတပ် မိုင်းဆွဲတိုင်ခိုက်ခံရလို့ ၄ ဦးသေဆုံးပြီး ၁၀ ဦးထက်မနည်း ဒဏ်ရာရှိခဲ့တယ်လို့ ဒေသခံတွေက ပြောပါတယ်။

စစ်ကောင်စီတပ် စစ်ကြောင်းဟာ  မိုင်းဆွဲတိုက်ခိုက်ခံရတဲ့ နေရာအနီးမှာပဲ သေဆုံးသူတွေကို မြှုပ်နှံခဲ့တယ်လို့ ဆိုပါတယ်။

“မနက် ၇ နာရီလောက်က စစ်ကောင်စီတပ် အင်အား ၇၀ လောက် ဘူတာရုံဟောင်းနားမှာ မိုင်းဆွဲခံရတာ။ ကျနော် သိသလေါက် မိုင်းဆွဲခံရတဲ့နေရာမှာ ၄ ဦးသေလို့ မြှုပ်ထားခဲ့တယ်။ ခြေပြတ်ပြီး ဒဏ်ရာနဲ့ သယ်သွားတာကလည်း ၁၀ ဦးလောက်တွေ့တယ်။ လမ်းမှာ ၃ ဦးထပ်သေလို့ နောတန်းရွာနားမှာ ဖြစ်သလို မြေမြှုပ်ထားခဲ့တယ်”  လို့  ဒေသခံတဦးက ပြောပါတယ်။

စစ်ကောင်စီ ခလရ ၇၈ အင်အား ၇၀ လောက်ပါအဖွဲ့ဟာ ချောင်းဝရွာကနေ မိုးဒါးလေးကျေးရွာကို စစ်ကြောင်းထိုးလာစဉ် မြို့လှ KPDF ရဲ့ ဗိုလ်မိုးကြိုးအဖွဲ့က တိုက်မိုင်း ရှေ့ထွက်မိုင်းတွေနဲ့ မိုင်းဆွဲတိုက်ခိုက်ခဲ့တာလို့ Myo Hla PDF က ထုတ်ပြန်ထားပါတယ်။

စစ်ကောင်စီတပ်ရဲ့ စစ်ကြောင်းကို  ချောင်းဝရွာနဲ့ နောတန်းအနီးမှာ KPDF  မိုင်းဆရာ ဗိုလ်ဂုဏ်မာန်နဲ့အဖွဲက မိုင်းဆွဲတိုက်ခိုက်ခဲ့တာလို့ ဆိုပါတယ်။ DVB

စစ်ကိုင်းတိုင်း၊ ကန့်ဘလူမြို့နယ်၊ ဆူးတပ်ကျေးရွာနှင့် တန့်ဆည်မြို့နယ်၊ ပေချောင်ရွာနှင့်ပုတီးရွာကို စစ်တပ်က ယနေ့ နံနက်ပိုင်း မီးတင်ရှို့ဖျက်ဆီးလျက်ရှိကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။

စစ်ကိုင်းတိုင်းဒေသကြီး ကန့်ဘလူမြို့နယ် ဆူးတပ်ကျေးရွာကို ယနေ့ နက် ၁၀နာရီခွဲအချိန်တွင် စစ်တပ်က လက်နက်ကြီးများဖြင့် ပစ်ခတ်ဝင်ရောက်လာပြီး ဝင်ရောက်မီးရှို့ခြင်းဖြစ်ကြောင်း၊ တိုက်ပွဲဖြစ်ပွားခြင်းမရှိဘဲ မီးရှို့ ခြင်းဖြစ်ကြောင်း သိရှိရသည်။

“အခုအချိန်အထိ ဆူးတပ်ကျေးရွာကို မီးရှို့နေပါတယ်။ ပြည်သူတွေအားလုံးလည်း ထွက်ပြေး တိမ်းရှောင်နေရတယ်။ လက်နက်ကြီးတွေနဲ့လည်း ပစ်နေပါတယ်။ အခြေအနေ အတော်ကိုဆိုးပါတယ်။ ပြည်သူတွေအားလုံး အဝတ်တစ်ထည်ကိုယ်တစ်ခုနဲ့ အသက်ဘေးလွတ်အောင် ပြေးနေရတယ်” ဟု ဒေသပြည်သူတစ်ဦးက ပြောဆိုသည်။

အလားတူ ဒီဇင်ဘာလ ၁၃ ရက်နေ့ နံနက် ၁၀ နာရီအချိန် စစ်ကိုင်းတိုင်း၊ တန့်ဆည်မြို့နယ် ပုတီးရွာ ကိုလည်း စစ်တပ်က မီးတင်ရှို့နေကြောင်း ဒေသပြည်သူများက ပြောဆိုကြသည်။

“အကြမ်းဖက်စစ်တပ်က လက်နက်ကြီးတွေနဲ့ရမ်းထုပြီး ရွာထဲကိုဝင်တယ်။ သူတို့လာတော့ရွာသားတွေ အကုန်ထွက်ပြေးရတယ်။ အခုရွာကိုမီးရှို့နေပြီ။ ရွာထဲကနေ မီးခိုးတွေအလုံးလိုက်တက်လာတယ်။ တစ်ရွာလုံးပြာကျမယ့်ကိန်းပါပဲ” ဟု ဒေသ ပြည်သူတစ်ဦးက ပြောသည်။

တန့်ဆည်မြို့နယ်၊ ပုတီးရွာကို မီးရှို့နေသည့် စစ်တပ်သည် တပ်မ ၃၃ လက်အောက်ခံ ခမရ၃၆၁ နှင့် ခမရ၃၆၉ စစ်ကြောင်းဖြစ်ပြီး ဒီဇင်ဘာ လ၁၁ရက်နေ့တွင်လည်း ပေချောင်ရွာကို မီးရှို့ခဲ့ကြောင်း သိရှိရသည်။

စစ်ကိုင်းတိုင်း၊ မြောင်မြို့နယ်အတွင်းရှိ ကျေးရွာများကိုလည်း ယနေ့ နံနက်ပိုင်းတွင် စစ်တပ်က မီးတင်ရှို့နေကြောင်း သိရှိရသည်။khit thit

ဒါရိုက်တာကိုပေါက်၏ အနုပညာဖန်တီးမှုဖြစ်သော “မသောက်မိသောမိုးခါးရေ”(The Road Not Taken) ရုပ်ရှင်ဇာတ်လမ်းတိုကို အွန်လိုင်းမှကြည့်ရှုနိုင်ရန် လက်မှတ်ရောင်းချပြီး ပြသသွားမည် ဖြစ်ကြောင်း သိရသည်။

ဒါရိုက်တာ ကိုပေါက်က “မကြာမီ ရုပ်ရှင်ကြည့်လို့ရပါတော့မယ်။ လက်မှတ် ၁ စောင် ၁၀၀၀၀ ကျပ် “မသောက်မိသော မိုးခါးရေ” page တွင် ဝင်ဝယ်ပါ” ဟု ယနေ့ ဒီဇင်ဘာလ ၁၃ ရက်နေ့တွင် ၎င်း၏ လူမှုကွန်ရက်စာမျက်နှာတွင် အသိပေးရေးသားထားသည်။

“မသောက်မိသောမိုးခါးရေ”ဇာတ်လမ်းတိုကို အွန်လိုင်းမှပြသမည့်ရက်မှာ ဒီဇင်ဘာလ ၂၅ ရက်နေ့ (ခရစ် စမတ်နေ့)ဖြစ်ပြီး လက်မှတ်များကို မိုးခါးရေ Page မှသော်လည်ကောင်း၊ နိုင်ငံတကာကိုယ်စားလှယ် များထံမှသော်လည်ကောင်း ဝယ်ယူနိုင်မည်ဖြစ်သည်။

လက်မှတ်ဝယ်ယူသူများအနေဖြင့် လက်မှတ်တွင်ပါဝင်သော QR Code ကို Scan ဖတ်၍ ရုပ်ရှင်ကြည့်ရှု နိုင်မည့် Website သို့ ရောက်ရှိမည်ဖြစ်ပြီး လက်မှတ်တွင်ပါဝင်သောနံပါတ်၏ နောက်ဆုံးခြောက်လုံးကို ရိုက်ထည့်ကာ ကြည့်ရှုနိုင်မည်ဖြစ်သည်။

အဆိုပါရုပ်ရှင်ကို ဒီဇင်ဘာလ ၂၅ ရက်၊ နံနက် ၆ နာရီမှ စတင်ကြည့်ရှုနိုင်မည်ဖြစ်ပြီး ၄၈ နာရီအကြာမှ အလိုအလျောက်ပိတ်သွားမည်ဖြစ် ကြောင်းလည်း အသိပေးထားသည်။

“မသောက်မိသောမိုးခါးရေ” ရုပ်ရှင်လက်မှတ်ကို တစ်စောင်လျှင် မြန်မာနိုင်ငံသားများအတွက် ၁၀,၀၀၀ ကျပ်ဖြင့်ဝယ်ယူနိုင်ပြီး နိုင်ငံအလိုက်လက်မှတ်တန်ဖိုးများကို မိုးခါးရေ Page တွင် ဖော်ပြထားသည်။

“မသောက်မိသော မိုးခါးရေ” ရုပ်ရှင်ဇာတ်လမ်းတိုကို ဒါရိုက်တာကိုပေါက်က တောတွင်းတစ်နေရာတွင် ဖုန်းကင်မရာကို အသုံးပြုကာ CDM စစ်ဗိုလ်တစ်ဦး၏ ဖြစ်ရပ်မှန်ကို အခြေခံ၍ ရိုက်ကူးထားခြင်းဖြစ်သည်။

၎င်းရုပ်ရှင်ကို အောက်တိုဘာလ ၂ ရက်နေ့တွင် အင်္ဂလန်နိုင်ငံ၊ လန်ဒန်မြို့တွင် စတင်ပြသခဲ့ပြီး အဖွင့်ပွဲတွင် ရုံပြည့်ရုံလျှံ အားပေးခဲ့ကြပြီးနောက် အမေရိကန်၊ ဂျပန်၊ ပြင်သစ်၊ အီတလီ၊ ဂျာမနီ၊ နယူး ဇီလန်၊ ဆွစ်ဇာလန်၊ ဩစတေးလျ၊ နယ်သာလန်၊ ကိုရီယား၊ ထိုင်ဝမ်၊ ထိုင်း၊ မလေးရှား၊ အိန္ဒိယ၊ ဂျမေကာ၊ ကနေဒါအစရှိသော နိုင်ငံပေါင်း ၂၀ ကျော်မှ မြို့ကြီး(၅၀)တွင်ပြသခဲ့သည်။

“မသောက်မိသောမိုးခါးရေ” နိုင်ငံတကာတွင် ရုံတင်ပြသခြင်းနောက်ဆုံးပွဲစဉ်ကို မလေးရှားနိုင်ငံ၊ ဂျိုဟို ဘာရူးမြို့တွင် ဒီဇင်ဘာလ ၁၁ ရက်နေ့က ကျင်းပခဲ့သည်။

မသောက်မိသောမိုးခါးရေရုပ်ရှင်မှ ရရှိလာသောဝင်ငွေများကို အမျိုးသားညီညွတ်ရေးအစိုးရ၊ ကာကွယ် ရေးဝန်ကြီးဌာနှင့်တော်လှန်ရေးအဖွဲ့များကို တိုက်ရိုက်လှူဒါန်းထားကြောင်း မိုးခါးရေ Page မှ အသိပေး ထားသည်။

အဆိုပါငွေများကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာမှ ပထမအကြိမ်အဖြစ် ကျပ် သိန်း ၄၆၀၀ ကို ပြည်သူ့ကာကွယ်ရေးတပ်မတော်(MOD)၊ ကော်ပရာစစ်ကြောင်း၊ စစ်ကိုင်းခရိုင် တပ်ရင်း အမှတ်(၄) MSPDF ၊ မြင်းခြံခရိုင်တပ်ရင်းအမှတ်(၁)၊ မိုးဗြဲပြည်သူ့ကာ ကွယ် ရေးတပ်ရင်း(၁၀၀၇)၊ ဖယ်ခုံ ပြည်သူ့ကာကွယ်ရေးတပ်ရင်း(၁၀၀၂)၊ မင်းတုန်းမြို့နယ်တော်လှန်ရေးအဖွဲ့(ပျံလွှား)၊ ပခုက္ကူခရိုင်တပ်ရင်း (၁၀)တပ်ခွဲ(၁)၊ သိန်းငှက်ပြောက်ကျားတပ်ဖွဲ့၊ မြင်းခြံတပ်ရင်း အမှတ်(၃)၊ ကျေးရွာတပ်ပေါင်းစု(ရေစကြို)၊ Chin defense force (ကန်ပက် လက်)၊ ပဲခူးတိုင်းစစ်ဒေသခွဲ အတွင်းမှ တပ်ရင်း(၆)ရင်း၊ ရန်ကုန် UG (နန်းထိုက်အောင်)၊ ရန်ကုန်UG-Yangon liberation force တို့အား နိုဝင် ဘာလ ၂၄ ရက်နှင့် ၂၅ ရက် ညနေ ၆ နာရီ ၃၀ မိနစ်တွင် Zoom ဖြင့် နှစ်ကြိမ်တွေ့ဆုံ၍ ပေးအပ်ခဲ့ကြကြောင်း သိရသည်။

ထပ်မံ၍ပေးအပ်လာသော ကူညီငွေများကိုလည်း သက်ဆိုင်ရာတာဝန်ခံများထံသို့ အဆက်မပြတ်ပေးပို့ လျှက်ရှိကြောင်း အသိပေးထားသည်။mizzima

ရန်ကုန်၊  ဒဂုံမြို့သစ်(မြောက်ပိုင်း)မြို့နယ်၊  မြယမုံအိမ်ရာရှေ့မှာ  ဒီဇင်ဘာ ၁၂ ရက်ညပိုင်းက ဗုံးပေါက်ကွဲပြီး  အမျိုးသား တယောက် ထိခိုက်ဒဏ်ရာရရှိခဲ့တယ်လို့ မြို့ခံတွေဆီက သိရပါတယ်။

မနေ့ည ၇ နာရီက မြယမုံအိမ်ရာရှေ့ တစ်ဖက်ကားလမ်းမှာ ဗုံးပေါက်ကွဲခဲ့တာဖြစ်ပြီး ဒဏ်ရာရတဲ့ အမျိုးသားကို လူနာတင်ယာဥ်နဲ့လာသယ်သွားတယ်လို့ ဒေသခံတယောက်က ပြောပါတယ်။

“ဗုံးပေါက်တာ ည ၇ နာရီကျော်တယ်။ လူတစ်ဦးသွေးတွေနဲ့ လဲကျနေတယ်။ ခဏနေတော့ စစ်ကားတွေရောက်လာပြီး လူနာတင်ယာဥ်နဲ့သယ်သွားတာတွေ့တယ်။”

ဗုံးထိမှန်ခဲ့တဲ့ အမျိုးသားကို လူနာတင်ယာဥ်နဲ့ မြောက်ဥက္ကလာမြို့နယ်ဆေးရုံကြီးကို ပို့ဆောင်ပေးခဲ့တယ်လို့ ပရဟိတအဖွဲ့နဲ့ နီးစပ်သူတစ်ဦးက ပြောပါတယ်။

“ဒဏ်ရာကတော့ အတော်များတယ်။ စိုးရိမ်ရတယ်။ တက္ကစီနဲ့ သင်္ဃန်းကျွန်းဘက်က ပြန်လာတာ မြယမုံအိမ်ယာရှေ့ ကားလမ်းတစ်ဖက်မှာ အ ပေါ့သွားရင်း ဗုံးပေါက်တာ။”

ဗုံးပေါက်ကွဲပြီးနောက် စစ်ကောင်စီတပ်တွေဟာ မြယမုံအိမ်ရာ အနီးတဝိုက်မှာ လက်ကျန်ဗုံးရှိမရှိ စစ်ဆေးခဲ့ပါတယ်။

ရန်ကုန်က မြို့နယ်တချို့မှာ ဒီဇင်ဘာ ၁ ရက်မှ ၁၂ ရက်အတွင်း ဗုံးပေါက်ကွဲမှုနဲ့ပစ်ခတ်မှု ၁၆ ကြိမ်ဖြစ်ခဲ့ပြီး ထိခိုက်ဒဏ်ရာရသူ ၁၂ ဦး အထိရှိပါတယ်။ DVB

စစ်ကိုင်းတိုင်း၊ စစ်ကိုင်းမြို့နယ်၊ ကြွယ်ပုံ(ပျူစောထီး)ရွာရှိ အကြမ်းဖက်စစ်သားပျူစောထီးများကို မနေ့ က ဒီဇင်ဘာလ ၁၂ ရက် နေ့လည် ၁၂ နာရီမှ ညနေ ၅ နာရီအထိ ဒေသခံကာကွယ်ရေးတပ်ဖွဲ့များ ပူးပေါင်းကာ ဝင်ရောက်တိုက်ခိုက်ခဲ့ကြောင်း သိရသည်။

အဆိုပါတိုက်ခိုက်မှုကို Demo Pauk Kwe(ဒီမိုပေါက်ကွဲ)PDF တပ်ဖွဲ့မှ မဟာမိတ်တပ်ဖွဲ့များဖြင့် ပူးပေါင်း ကာ ၆၀ မမ လက်နက်ကြီး ၃၅ လုံး၊ မဟာမိတ်တပ်ဖွဲ့မှ လက်နက်ကြီး အလုံး (၁၀၀)ကျော်ဖြင့် ပစ်ခတ် တိုက်ခိုက်ခဲ့ကြောင်း Demo Pauk Kwe(ဒီမိုပေါက်ကွဲ)PDF ထံက သိရသည်။

“စခ ထိခိုက်သေဆုံးတာရှိနိုင်ပါတယ်၊ အခုလို တိုက်ခိုက်နိုင်အောင် Farmers Revolution Force – မုံရွာ ခရိုင်တပ်ရင်း (၈)က နည်းပညာအကူအညီပေးထားပါတယ်။ ဒီထက် ပိုမိုတော်လှန်နိုင်ဖို့ မိဘပြည်သူ တွေ အနေနဲ့ တတ်နိုင်သမျှ ကူညီပေးပါကြလို့ မေတ္တာရပ်ခံပါတယ်ဗျ” ဟု Demo Pauk Kwe(ဒီမိုပေါက် ကွဲ) PDF က ပြောသည်။

အလားတူ စစ်ကိုင်းတိုင်း၊ မင်းကင်းမြို့နယ်၊ ဇနဗျင်းကျေးရွာအနီးတဝိုက်၌ ကင်းပုန်းဝပ်နေသော အကြမ်း ဖက်စစ်သား ပျူစောထီးများအား ဒီဇင်ဘာလ ၅ ရက် နံနက်ပိုင်းက ဝင်ရောက်ရှင်းလင်း တိုက်ခိုက်ခဲ့ကြောင်း Independence Army – IA ထံမှ သိရသည်။

ဇနဗျင်း(ပျူစောထီး)ရွာတွင် တပ်စွဲပြီး ဒေသခံပြည်သူများကို ဒုက္ခပေးနေသော အကြမ်းဖက်စစ်သား၊ ပျူ စောထီးများကို ယင်းမာပင်ခရိုင် တပ် ရင်း ၂၅ ၊ တပ်ခွဲ ၃ (ကနီ) (IA – KGF) ၊ မင်းကင်းတပ်ရင်း ၄ နှင့် သံမဏိ Force – MPDF တပ်ခွဲ ၊ မဟူရာ ပြည်သူ့ကာကွယ်ရေးတပ်ဖွဲ့ တို့မှ အီနာဂါ ၊ ၈၀ မမ၊ လက်နက် ငယ်များဖြင့် ပစ်ခတ်တိုက်ခိုက်ရှင်းလင်း ခဲ့ခြင်းဖြစ်ကြောင်း သိရသည်။

ထို့ပြင် စစ်ကိုင်းတိုင်း၊ထီးချိုင့်မြို့နယ်၊ မြတောင်လမ်းဆုံမှ ထီးချိုင့်ဘက်သို့ စစ်ကူလာသည့် အကြမ်း ဖက် စစ်ကောင်စီဝင်များကို ဒီဇင်ဘာ ၁၂ ရက်နေ့ ည ၉ နာရီဝန်းကျင်တွင် မိုင်းဆွဲတိုက်ခိုက်ခဲ့ကြောင်း Special.9.HPDF က သတင်း ထုတ်ပြန်သည်။

အကြမ်းဖက်စစ်ကောင်စီဝင်များသည် မြတောင်လမ်းဆုံမှ ကားသေးတစ်စီး ၊ ၆ ဘီးကားတစ်စီးဖြင့် ထီး ချိုင့် ဘက်သို့ ထွက်စဉ် ကက္ကူသင်္ချိုင်း အနီးအရောက် မိုင်းဆွဲတိုက်ခိုက်ခဲ့ခြင်းဖြစ်ပြီး ပထမအကြိမ် မိုင်း ဆွဲချိန်၌ ကားသေးအနည်းငယ်ထိခိုက်ကာ နှစ်စီးလုံးရပ်သွားချိန်၌ ဒုတိယအကြိမ်မိုင်းဆွဲ တိုက်ခိုက် ခဲ့ခြင်းဖြစ်ကြောင်း၊ စစ်ကောင်စီဝင်များ ထိခိုက် အကျအဆုံးများနိုင်ကြောင်း ထုတ်ပြန်ချက်အရသိရှိရ သည်။

မိုင်းဆွဲတိုက်ခိုက်ခံရသည့် စစ်ကောင်စီဝင်များသည် ၁၀ မိနစ်ခန့် ပြန်မတုံ့ပြန်နိုင်ဘဲ ငြိမ်ကျသွားပြီးမှ ပြန်လည် ပစ်ခတ်ကာ မြတောင်လမ်းဆုံသို့ ပြန်ခေါက်သွားခဲ့ကြောင်း၊ မြတောင်လမ်းဆုံရောက်မှ မိုင်း ဆွဲခံရ သည့် နေရာသို့ လက်နက်ကြီး လက်နက်ငယ်များနှင့်လှမ်းပစ်ခတ်ခဲ့ကြောင်း ၊ တော်လှန်ရေး ရဲဘော်များ အထိအခိုက်အကျအဆုံးမရှိ ပြန်လည် ဆုတ်ခွာနိုင်ခဲ့ကြောင်း Special.9.HPDF အဖွဲ့မှ သတင်းထုတ် ပြန်သည်။ khit thit

စစ်ကိုင်းတိုင်း၊ ကောလင်းမြို့နယ်၊ ကျောက်ပြင်သာတိုက်နယ်တွင် လေးရက်အတွင်းစစ်ကောင်စီ တပ်ဖွဲ့က ကျေးရွာ ငါးရွာမှ အိမ်ခြေ ၂၀၀ကျော် မီးရှို့ဖျက်ဆီးခဲ့ပြီး စစ်တပ်ပြန်လည်ထွက်ခွာချိန်တွင် ပေပင်ချောင်ရွာ၌ သေဆုံးအလောင်း ငါးလောင်းတွေ့ရှိခဲ့သည်ဟု ဒေသခံများထံမှ သိရသည်။

ယမန်နေ့ ဒီဇင်ဘာ၁၂ရက်နေ့တွင် သေဆုံးသည့် ပေပင်ချောင်ရွာသားများသည် စစ်ကောင်စီတပ်သားများနှင့် တိုက်ပွဲဖြစ်၍သေဆုံးခြင်းမဟုတ်ဘဲ ကျန်းမာရေးမကောင်းသည့်အတွက် မပြေးနိုင်သည့် ဦးဉာဏ်ဝင်းဆိုသူအား ကယ်ထုတ်နေချိန်တွင် အကြမ်းဖက်စစ်သားများနှင့်တိုးကာ ပစ်သတ်ခံရခြင်းဖြစ်သည်ဟု ဒေသခံသတင်းရင်းမြစ်က မဇ္ဈိမသို့ ပြောသည်။

“ဦးဉာဏ်ဝင်းဆိုသူ ကျန်းမာရေး မကောင်းလို့ မပြေးနိုင်သူကို သယ်ထုတ်ချိန် စခ(စကစတပ်သား)တွေ နဲ့တိုးတာပါ။ ကြောက်တော့ ထွက်ပြေးကြတာကို ပစ်တာဗျ။ ဆွေမျိုးတွေပါ။ ဦးဉာဏ်ဝင်းကိုတော့ လှဲနေတာမို့မပစ်ဘူးလို့သိပါတယ်။” ဟု အမည်မဖော်လိုသူ ဒေသခံသတင်းရင်းမြစ်က ဆိုသည်။

ပေပင်ချောင်ရွာတွင် ပိတ်မိနေသည့် ဦးဉာဏ်ဝင်းကို ကယ်ထုတ်ရင်း ပစ်ခတ်ခံ၍ သေဆုံးသူများသည် ဦးသိန်းအောင်၊ ဦးအဲမောင်၊ ကိုနိုင်ဝင်းထွန်း၊ ကိုကံမင်းစိုး၊ ဦးမြင့်စိုး တို့ဖြစ်ပြီး ကျန်ရစ်သူမိသားစုဝင်များလည်းရှိနေသည်ဟု သိရသည်။

ဒါ့အပြင် ကျောက်ပြင်သာရွာတွင် စစ်ဘေးရှောင်နေသည့် ဒေါ်ကျွဲ(၇၈နှစ်)သည် သူ့သား ပစ်သတ်ခံရတာကြားပြီး သွေးတက်သေဆုံး၍ ကျောက်ပြင်သာရွာ၌ သင်္ဂြိုဟ်ခဲ့ရသည်ဟု သိရသည်။

လျှော်ဖြူကုန်းရွာတွင်လည်း စစ်ကောင်စီတပ်သားများ ထွက်သွားပြီးချိန် ရွာထဲပြန်ဝင်လာနေသည့် ကိုမောင်မြင့် (အသက်၄၀နှစ်)သည် စစ်ကောင်စီ ကင်းပုန်းနှင့်တွ့ပြီး ပဲစင်းငုံခင်းထဲတွင် ပစ်သတ်ထားကြောင်း သိရသည်။

မီးရှို့ခံရသည့် ကျေးရွာများသည် ကုက္ကိုကုန်း ၈၇အိမ်၊ ပေပင်ချောင် ၃၉ အိမ်၊ ညောင်ကုန်း ၂၉အိမ်၊ ဇီးဖြူကုန်းက ၄၅အိမ်၊ လျော်ဖြူကုန်း၂၄ အိမ်၊ စုစုပေါင်း လူနေအိမ် ၂၂၄လုံး မီးရှို့ဖျက်ဆီးခံခဲ့ရသည်။

ကောလင်းမြို့နယ်တွင် ခမရ (၃၆၁)၊ (၃၆၃)၊ (၃၆၉) တို့မှ စစ်ကြောင်းထိုး အကြမ်းဖက်မီးရှို့နေခြင်းဖြစ်ပြီး ယခုလက်ရှိတွင် အဆိုပါစစ်ကြောင်းတစ်ကြောင်းသည် ကိုးတောင်ဘို့သို့ ပြန်လည်ဆုတ်ခွာသွားပြီး အခြားစစ်ကြောင်း တစ်ခုသည် အောက်တဲရွာဝန်းကျင်သို့ ရောက်ရှိနေကြောင်းသိရသည်။ mizzima