SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း ၊ မုံရွာမြို့နယ် တောပုကျေးရွာမှ ပျူစောထီးအဖွဲ့ဝင်များ ကင်းပုန်းဝပ်နေသောနေရာသို့ လက်နက်ကြီးဖြင့် ပစ်ခတ်တိုက်ခိုက်ခဲ့ရာ ငါးဦးသေဆုံးပြီး သုံးဦးဒဏ်ရာရရှိသွားကြောင်း မုံရွာခရိုင်တပ်ရင်း(၇)-Lightning People Defence Force က ဒီဇင်ဘာလ ၂၂ရက်နေ့တွင် ထုတ်ပြန်သည်။

ဒီဇင်ဘာလ ၂၁ရက်နေ့ ညနေ ၄နာရီ ၄၅မိနစ်အချိန်တွင် တောပုရွာအနောက်တွင် ကင်းပုန်းလာဝပ်သော ပျူစောထီးအဖွဲ့ဝင် ၂၀ကျော် ကို ၄၀မမ ဖြင့် ပစ်ခတ်တိုက်ခိုက်ခဲ့ခြင်းဖြစ်ကြောင်း ဆိုသည်။

“ပျူတွေက နှစ်ဖွဲ့ခွဲပြီးကင်းပုန်းဝပ်တာ သတင်းအတိအကျရလို့သွားထုကြတာ ၊ ပထမ တစ်ချက်က သူတို့ကျော်သွားတယ် ၊ သူတို့ဘက်က ပြန်ပစ်တဲ့အတွက် နေရာသိပြီး ပြန်ပစ်တော့မှ မှန်တာ” ဟု Lightning PDF မှ ရဲဘော် တစ်ဦးမှ မဇ္စျိမ ကို ပြောသည်။

အဆိုပါ ပစ်ခတ်တိုက်ခိုက်မှုကြောင့် ပျူစောထီးအဖွဲ့ဝင်များ ထိခိုက်သေဆုံးကြောင်းကို ခိုင်လုံသော သတင်းအရင်းမြစ်များထံမှ ပြန်လည်သိရှိရခြင်းဖြစ်ကြောင်း ဆိုသည်။

တောပုရွာ ပျူစောထီးများဘက်မှလည်း လက်နက်ငယ်များဖြင့် ပြန်လည်ပစ်ခတ်သော်လည်း ကာကွယ်ရေးတပ်ဖွဲ့ရဲဘော်များမှ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။

အဆိုပါ ပစ်ခတ်မှုကို မုံရွာခရိုင်တပ်ရင်း(၇)-Lightning People Defence Force နှင့် အတူ Dragon Brothers People Defence Force မှ ပူးပေါင်းတိုက်ခိုက်ခဲ့ခြင်းဖြစ်ကြောင်း‌ ဖော်ပြထားသည်။

ဒီဇင်ဘာလ ၂၂ရက် မနက်အစောပိုင်းတွင် မုံရွာမြို့ရှိ အနောက်မြောက်တိုင်း စစ်ဌာနချုပ် (နမခ) မှ စစ်ကားကြီး နှစ်စီးဖြင့် ပျူစောထီးအ လောင်း များကို လာရောက်သယ်ဆောင်သွားကြောင်း ဆိုသည်။

အဆိုပါ တောပုရွာတွင် နေထိုင်နေသည့် ပျူစောထီးအဖွဲ့ဝင်မဟုတ်သော ပြည်သူများအနေဖြင့် ယင်းကျေးရွာမှ အခြားလုံခြုံသည့် ဒေသသို့ပြောင်းရွှေ့နေထိုင်ပေးကြရန် ပြည်သူ့ကာကွယ်ရေးတပ်ဖွဲ့ ၁၇ဖွဲ့မှ အသိပေးထုတ်ပြန်ထားသည်။

ဒီဇင်ဘာလ ၂၂ရက် နေ့ ရက်စွဲဖြင့် ထုတ်ပြန်သော ကြေညာချက်တွင် တောပုကျေးရွာသည် စစ်ကောင်စီအုပ်စု၏ စစ်ကြောင်းတွင် စစ်အင်အားဖြည့်တင်းရာဖြစ်ပြီး ပျူစောထီးအဖွဲ့ဝင် အများစုနေထိုင်သောကျေးရွာဖြစ်ကြောင်းဖော်ပြထားသည်။

ကာကွယ်ရေးတပ်ဖွဲ့များ၏ အဓိက ပစ်မှတ်ထား တိုက်ခိုက်ရမည် ရန်သူ့ကျေးရွာတစ်ခု ဖြစ်နေသောကြောင့် ထိုးစစ်ဆင်မှုများ ပြုလုပ်ခဲ့ပါက အပြစ်မဲ့ပြည်သူများ ထိခိုက်မှု မရှိစေရန်အတွက် ပြောင်းရွှေ့နေထိုင်ပေးကြပါရန် အသိပေးထားခြင်းဖြစ်ကြောင်း ဆိုသည်။

ထုတ်ပြန်ချက်တွင်ပါဝင်သော အဖွဲ့အစည်းများမှာ Special ဒိတ်ဒိတ်ကြဲ PDF Monywa ၊ Black Dragon Special Task Force ၊ Monywa Fighter Group ၊ ဗန္ဓုလနှင့်အဖွဲ့သားများ PDF ၊ Hrban Hunter Force ၊ The Ants PDF ၊ Sun King Envoy LPDF ၊ Golden Eagle Force Monywa ၊ Brave Heart Army ၊ Democratic Gueerrilla Force ၊ Wara Zein ၊ Monywa Force ၊ Peacock Brothers ၊ The Brightness Monywa ၊ PTTF ၊ Monywa Ranger Group ၊ Area 71 PDF တို့ဖြစ်ကြောင်း သိရှိရသည်။

တောပု ကျေးရွာအတွင်းတွင် တောင်မြောက် ကွဲပြားနေပြီး မြောက်ပိုင်းအခြမ်းဘက်တွင်ရှိသောသူများမှာ ပျူစောထီးအဖွဲ့ဝင်များဖြစ်ကြကြောင်း ကာကွယ်ရေးတပ်ဖွဲ့ ဝင်များထံမှ သိရှိရသည်။ mizzima

စစ်ကိုင်းတိုင်း ကန့်ဘလူမြို့နယ် ဂါးဂလော်ကျေးရွာတွင် ဒီဇင်ဘာလလ ၁၇ ရက်နေ့က စစ်ကောင်စီတပ်က မီးရှို့သဖြင့် နေအိမ် ၂၃ လုံး မီး လောင်ပျက်စီးခဲ့သည့်အပြင် အမျိုးသားသုံးဦးကိုလည်း သတ်ဖြတ်သွားကြောင်း ကျွန်းလှတက်ကြွလှုပ်ရှားသူများအဖွဲ့ က သတင်းထုတ်ပြန်ထားသည်။

စစ်ကောင်စီတပ်များသည် ဂါးဂလော်ကျေးရွာအတွင်းသို့ လက်နက်ကြီးများဖြင့် ပစ်ခတ်ဝင်ရောက်လာပြီး နောက် နေအိမ်များအပြင် ကျေး လက်ဆေးပေးခန်းနှင့် ဘုန်းကြီးကျောင်းတို့ကိုပါ မီးရှို့ဖျက်ဆီးခဲ့ကြောင်း သိရသည်။

စစ်ကောင်စီတပ်များသည်း ဒေသခံအမျိုးသားသုံးဦးနှင့် အမျိုးသမီးနှစ်ဦးကို ဖမ်းဆီးခဲ့ပြီး အမျိုးသားသုံးဦး ကိုသတ်ဖြတ်ထားခဲ့ပြီး အမျိုးသမီးနှစ်ဦးမှာမူ ပြန်လည်တွေ့ရှိသေးခြင်းမရှိကြောင်း ကျွန်းလှတက်ကြွ လှုပ်ရှားသူများအဖွဲ့ ကဆိုသည်။

“အမျိုးသားတစ်ဦးက ရက်ရက်စက်စက်ညှင်းပန်းနှိပ်စက်ထားတဲ့ ဒဏ်ရာများနဲ့သေဆုံးနေတာကို တွေ့ရှိ ရပြီး ကျန်နှစ်ဦးကို မီးရှို့သတ်ဖြတ်ထားတယ်လို့ ခန့်မှန်းရတဲ့ မီးလောင်ပြာကျနေတဲ့ အရိုးစုနှစ်ခုအဖြစ် ပြန်လည်တွေ့ရှိရပါတယ်။ ကျန်အမျိုးသမီးနှစ်ဦးကိုတော့ အခုအချိန်အထိ ပြန်မတွေ့သေးပါဘူး” ဟု ကျွန်းလှတက်ကြွလှုပ်ရှားသူများအဖွဲ့က ပြောသည်။

စစ်ကောင်စီတပ်များနှင့် ပျူစောထီးများ စုပေါင်းထားသည့် ထိုစစ်ကြောင်းသည့် အင်အား ၁၂၀ နီးပါးရှိပြီး အခြားကျေးရွာများဖြစ်သည့် လွှဲဆိပ်၊ လက်ခုပ်ကုန်းနှင့် ဘောရွာတို့ကိုလည် မီးရှို့ဖျက်ဆီး ခဲ့ကြကြောင်း သိရသည်။ mizzima

တနင်္သာရီတိုင်း၊ ​ထားဝယ်ခရိုင်၊ လောင်းလုံးမြို့မှာ စစ်ကောင်စီတပ်ဖွဲ့ဝင်တွေက ဒီဇင်ဘာ ၂၂ ရက် ည ၈ နာရီလောက်မှာ နေအိမ်တချို့ကို ဝင်ရောက်စစ်ဆေးပြီး မြို့ခံ ၆ ဦးကို ဖမ်းဆီးသွားတယ်လို့ ဒေသခံတွေက ပြောပါတယ်။

အဖမ်းခံရသူတွေဟာ အသက် ၄၀ နဲ့ ၆၀ အကြား အမျိုးသား ၂ ဦးနဲ့ အမျိုးသမီး ၄ ဦးတို့ ဖြစ်ကြပြီး ဘာလို့ အခုလို ဖမ်းဆီးခံရလဲ ဆိုတာကိုတော့ အတိအကျ မသိရပါဘူး။

လောင်းလုံးမြို့ခံတဦးက “ဖမ်းသွားတဲ့အထဲ ထမင်းဆိုင်ပိုင်ရှင်တယောက်လည်း ပါတယ်။ အရင်တုန်းက သပိတ်လုပ်တဲ့သူတွေ သူ့ဆိုင်မှာ ထ မင်းသွားဝယ်စားတာတွေ ရှိတယ်။ ဒါကြောင့်ပဲ ဖမ်းတာလားမသိဘူး။ ကျန်တဲ့သူတွေလည်း သာမန်ပြည်သူတွေပဲ။ ရဲစခန်းနားမှာ နေတဲ့သူတွေလည်း ပါတယ်၊ အဖမ်းခံရတာ” လို့ ဒီဗွီဘီကို ပြောပါတယ်။

အဖမ်းခံရသူတွေထဲက အသက် ၄၀ ဝန်းကျင် ဒေါ်မီးထွေးဆိုသူ အမျိုးသမီးကတော့ အမျိုးသားဖြစ်သူကို လာရောက်ဖမ်းဆီးရာ အမျိုးသားက ထွက်ပြေးလွတ်မြောက် သွားတာကြောင့် သူ့ကို ဖမ်းခေါ်သွားတာလို့ သိရပါတယ်။

မြို့ခံလူငယ်တဦးက “လာဖမ်းတာက သူ့ယောကျ်ားကို လာဖမ်းတာ။ အဖမ်းမခံဘဲ ထွက်ပြေးလို့ သေနတ်နဲ့ လိုက်ပစ်သေးတယ်၊ မိတော့မမိဘူး။ ဒါကြောင့် သူ့ယောကျ်ားကို မမိလို့ ဇနီးကိုဖမ်းသွားတာ” လို့ ပြောပါတယ်။

ဖမ်းသွားတဲ့သူတွေကိုတော့ လောင်းလုံးမြို့မရဲစခန်းမှာ ထားပြီး မိသားစုဝင်တွေနဲ့လည်း တွေ့ခွင့်မရကြသေးပါဘူး။

လောင်းလုံးမြို့ကို ဒီဇင်ဘာ ၂၂ ရက် ညနေ ၅ နာရီလောက်က ထားဝယ်မြို့ဘက်ကနေ မြေသယ်ကားတစီး၊ ဗီဂိုးကား ၂ စီးနဲ့ စစ်ကောင်စီတပ်ဖွဲ့ဝင် အင်အား ၅၀ ကျော်လောက် ရောက်ရှိလာပြီး အခုလိုဖမ်းဆီးတာတွေအပြင် လက်ရှိမှာလည်း လောင်းလုံးမြို့နဲ့ အနီးတဝိုက် တောတောင်တွေထဲမှာ လှုပ်ရှားသွားလာနေတယ်လို့ ဒေသခံတွေက ပြောပါတယ်။

ပြီးခဲ့တဲ့ အောက်တိုဘာလအတွင်းကလည်း CDM ဝန်ထမ်းနဲ့ လောင်းလုံးမြို့ခံတွေ အပါအဝင် ဒေသခံ ၁၄ ဦးလောက်ကို စစ်ကောင်စီတပ်ဖွဲ့ဝင်တွေက နေအိမ်အသီးသီးကနေ ဖမ်းဆီးသွားခဲ့ပြီး ဘာလို့ဖမ်းဆီးတာလဲ ဆိုတာကိုတော့ အတိအကျ မသိရပါဘူး။

လောင်းလုံးမြို့နယ်အတွင်း လက်ရှိအချိန်ထိ စစ်အာဏာရှင်စနစ်ဆန့်ကျင်ရေး လှုပ်ရှားမှုတွေ အဆက်မပြတ်ရှိနေပြီး အခုလို စစ်ကောင်စီတပ်ဖွဲ့ဝင်တွေရဲ့ ဖမ်းဆီးမှုတွေလည်း မကြာခဏ ရှိနေပါတယ်။DVB

ဧရာဝတီတိုင်း၊ ပုသိမ်အကျဥ်းထောင်တွင် မတရားဖမ်းဆီးခံထားရသည့် ကြံခင်းမြို့နယ်မှ ရဲညီအစ်ကို နှစ်ဦးကို ဒီဇင်ဘာလ ၁၉ ရက်နေ့ မနက် ၃နာရီကျော်ခန့်အချိန်က ပုသိမ်အကျဥ်းထောင်မှ ခေါ်ထုတ်သွားကြောင်း ထောင်ဝန်ထမ်းတချို့ထံက သိရသည်။

အကျဥ်းထောင်ညွှန်မှူး ဦးဇော်စစ်အောင်နှင့် ထောင်ဝန်ထမ်းများက အကြောင်းပြချက်မရှိဘဲ ၎င်းတို့နှစ်ဦးကို ခေါ်ထုတ်သွားခြင်းဖြစ်သည်ဟုဆိုသည်။

“နိုင်ငံရေးအကျဥ်းသားတွေ အိပ်နေတဲ့အချိန်မှာ ညွှန်မှူးနဲ့ သူတပည့်တွေ က နံပါတ်တုတ်တွေနဲ့ဝိုင်းပြီး ခေါ်ထုတ်သွားတာပါ။ ဘာမှမပြောဘဲ ခေါ်ထုတ်သွားကြတာဆိုတော့ အခုထိဘာမှ ရေရေရာရာ မသိရသေးဘူး။ ထောင်ပြောင်းတယ်လို့တော့ သတင်းထွက်နေတယ်”ဟု ထောင်ဝန်ထမ်းတစ်ဦးက ပြောသည်။

စစ်ကောင်စီသည် နှစ်ရှည်ထောင်ဒဏ်များချမှတ်ခံရသည့် နိုင်ငံရေးအကျဥ်းသားများကိုသာ ထောင်ပြောင်းလေ့ရှိသည်ဟု သိရသည်။

စစ်အာဏာရှင်ဆန့်ကျင်မှုဖြင့် ဖမ်းဆီးခံထားရသည့် ရဲတပ်သား သူရိန်လင်းမှာ ထောင်မှပြန်လည်လွတ်မြောက်ရန် ၃၁လကျန်ရှိပြီး ၊ ဒုတပ် ကြပ် တာရာလင်းမှာ ၂၅လခန့်သာကျန်ရှိကြောင်း ၎င်းတို့၏ဖခင်ဖြစ်သူ ဦးသန့်စင်ကပြောသည်။

“ဒီဇင်ဘာလ ၆ ရက်နေ့၊ ညပိုင်းက ရဲညီအစ်နှစ်ယောက်ထဲက အကြီးကောင် သူရိန်လင်း ကို ထောင်ညွှန်မှူး ဇော်စစ်အောင်က ရိုက်နှက်တာတွေလုပ်တယ်။ ပြီးတော့ တရားရုံးထုတ်ပြီး ပုဒ်မ ၄၂ နဲ့ ထောင် ခြောက်လထပ်ချတယ်။ သူရိန်လင်းက ညွှန်မှူးကိုပြန်ပြီး တရားစွဲဖို့လုပ်တော့ တရား သူကြီးနဲ့ ရဲတွေက တရားစွဲခွင့်မပေးဘူးဆိုပြီး ငြင်းတယ်။ ညွှန်မှူးက သူ့ကို တရားထပ်စွဲမှာစိုးလို့ ထောင်ပြောင်းလိုက်တာထင်တယ်”ဟု ထောင်ဝန်ထမ်းတစ်ဦးက ဆိုသည်။

၎င်းတို့ ညီအစ်ကိုနှစ်ဦးသည် စစ်အာဏာသိမ်းပြီး နောက်တစ်ရက်ဖြစ်သည့် ၂၀၂၁ ခုနှစ် ဖေဖော်ဝါရီလ ၂ ရက်နေ့တွင် လူမှုကွန်ရက် စာမျက် နှာ ၌ စစ်အာဏာရှင် အလိုမရှိကြောင်းရေးသားခဲ့မှုကြောင့် ဖေဖော်ဝါရီလ ၃ ရက်နေ့တွင် ဖမ်းဆီးခံခဲ့ရသည်။

ထို့နောက် ရဲကျင့်ဝတ်ဖောက်ဖျက်မှုဖြင့် ပုသိမ်အကျဥ်းထောင်တွင် ထောင်ဒဏ် တစ်နှစ်စီကျခံခဲ့ရပြီး လွတ်ရက်နီးကပ်စဥ် ပုဒ်မ ၅၀၅(က)ဖြင့် ထောင်ဒဏ် သုံးနှစ်စီ ထပ်မံချမှတ်ခံခဲ့ရသည်ဟု သိရသည်။

လက်ရှိတွင် ကြံခင်းမြို့နယ်မှ ရဲလုပ်သက် ခုနစ်နှစ်ကျော်ရှိ ရဲတပ်သား သူရိန်လင်းနှင့် ရဲလုပ်သက် လေးနှစ်ကျော်ရှိ ဒုတပ်ကြပ် တာရာလင်းတို့ ညီအစ်ကိုနှစ်ဦးကို မည်သည့်နေရာသို့ ခေါ်ဆောင်သွားသည်ကို မသိရသေးသည့်အတွက် မိသားစုဝင်များစိုးရိမ်နေကြကြောင်း ၎င်းတို့၏ ဖခင်ဖြစ်သူ ကပြောသည်။ mizzima

မန္တလေးတိုင်း၊ ငါန်းဇွန်မြို့နယ်မှ စစ်ကောင်စီခန့် ညောင်လေးပင်ကျေးရွာ အုပ်ချုပ်ရေးမှူး မင်းဆန်း ပစ်ခတ်ခံရပြီး သေဆုံးသွားကြောင်း သိရှိရသည်။

မန္တလေးတိုင်း၊ ငါန်းဇွန်မြို့နယ်၊ ငါန်းဇွန်-သားကြင်လမ်းမပေါ် တောင်ရွာဘိုရွာ နှင့် မြောက် ရွာဘိုရွာအကြားတွင် ယနေ့ ဒီဇင်ဘာလ ၂၃ ရက်နေ့ နံနက် ၉ နာရီ ၃၅ မိနစ် ခန့်အချိန် ညောင်လေးပင်ရွာအုပ်ချုပ်ရေးမှူး မင်းဆန်းကို ပစ် ခတ်ခဲ့ ရာ နေရာတွင်ပင်ပွဲချင်းပြီး သေ ဆုံးသွားကြောင်း TGYR – Youth Guerilla Counter Revolution က ရန်ကုန်ခေတ်သစ်သတင်းဌာနကို ပြောသည်။

အဆိုပါအုပ်ချုပ်ရေးမှူး မင်းဆန်းသည် အကြမ်းဖက်စစ်ကောင်စီနှင့်ပူးပေါင်း ကာ ကျေးရွာနေ ပြည်သူ လူထုကို မတရားဖမ်းဆီးညှင်းပန်းနှိပ် စက်နေပြီး ၎င်းကြောင့် ဒုက္ခရောက်ကြရသည့် ပြည်သူများစွာရှိ ကြောင်း၊ထို့ပြင် ပြည်သူ့ ကာကွယ်ရေးတပ်ဖွဲ့ဝင်များထောင် ထားသည့် မိုင်းများကိုလည်း အကြမ်း ဖက်စစ်ကောင်စီထံအပ်နှံခဲ့ကြောင်း သိရသည်။

“သူ့ကြောင့် ဒုက္ခရောက်ကြရတဲ့မိသားစုတွေရှိတယ်ဗျ၊ အဖမ်းခံရသူတွေလည်း ရှိတယ်၊ ဖမ်းခံရပြီး ငွေ တောင်းပြန်လွှတ်တဲ့သူလဲရှိတယ်၊ သူ က စကစနဲ့ ပေါင်းပြီး ကြံနေတာ၊ ရွားနားမှ စစ်ခွေးတွေကို တိုက်ဖို့ ဆင်ထားတဲ့ ကျနော်တို့ မိုင်း ၅ အပါအဝင် အလုံး ၃၀ ကျော်ကို စကစဆီအပ်ခဲ့ဖူးတယ်။ အဲဒါကြောင့် ပစ်ခတ်ရှင်းလင်းခဲ့တာ၊ ကျည်နှစ်တောင့်(နှုတ်ခမ်းနီ)နဲ့။” ဟု TGYR အဖွဲ့ခေါင်း ဆောင် CEO က ရန်ကုန် ခေတ်သစ်သတင်းဌာနသို့ ပြောကြားသည်။

ယင်းတိုက်ခိုက်မှုကို TGYR – Youth Guerilla Counter Revolution(LPDF)၊ BHGF- Black Hero Guerilla Force နှင့် မာန်စွယ်ကျား ပြည်သူ့ကာကွယ် ရေးတပ်ဖွဲ့တို့မှ ပူးပေါင်းပစ်ခတ်ရှင်းလင်းခဲ့ခြင်းဖြစ် ပြီး လက်ပစ်ဗုံးတစ်လုံးပါ သိမ်းဆည်းရရှိခဲ့ကြောင်း၊ ၎င်းပစ်ခတ်ခံရသည့်နေရာသို့ အကြမ်းဖက်စစ် ကေင်စီတပ်သားအများအပြားရောက်ရှိလာကာ စစ်ဆေးခဲ့ကြောင်း သိရသည်။

အလားတူ ယနေ့နံနက်ပိုင်း ငါးဇွန်မြို့နယ်၊ ကုလရွာကြီး မှ စစ်တပ် သတင်းပေး ဟု သတ်မှတ်ခံရသူ ပျူစောထီး ရန်အေး ကို ရွာအရှေ့ဘက် တောထဲတွင် အသတ်ခံထားရသည်ကို တွေ့ရှိရကြောင်း‌ ဒေသသတင်းရင်းမြစ်က ဆိုသည်။

ထို့အတူ တနင်္သာရီတိုင်း၊ လောင်းလုံးမြို့နယ်၊ ဝေဒီရွာလမ်းပိုင်းတွင် ယနေ့ ဒီဇင်ဘာလ ၂၃ ရက် နံနက် ၁၀ နာရီ ခန့်က အကြမ်းဖက် စစ်ကောင်စီ လက် အောက်ခံ လောင်းလုံးရဲစခန်းမှ ပြန်လာသော ပျူစောထီးအဖွဲ့ဝင် တစ်ဦး ပစ်သတ်ခံခဲ့ရကြောင်း ဒေသတွင်းသတင်းရင်းမြစ်ထံမှ သိရသည်။

လောင်းလုံးမြို့ရဲစခန်းတွင် အစည်းအဝေးလုပ်ပြီး ဝေဒီရွာရှိ နေအိမ်သို့ ပြန်လာ သော ပျူစောထီးအဖွဲ့ဝင် နေလင်း ထွန်း ကို ပြည်သူ့ကာကွယ် ရေး တပ်ဖွဲ့ တစ်ခုက သေနတ်ဖြင့် ပစ်ခတ်ခဲ့ရာ ဒဏ်ရာ ၆ ချက်ရရှိ ပြီးပွဲချင်း ပြီး သေဆုံး သွားကြောင်း၊ မည်သည့်အဖွဲ့အစည်းက ပစ်ခတ်သွားသည်ကို မသိရသေး ကြောင်း Dawei Information Center က ပြောသည်။

ပစ်ခတ်ခံရပြီး သေဆုံးသူနေလင်းထွန်းသည် အကြမ်းဖက်စစ် ကောင်စီ တပ် သားများနှင့်ပူးပေါင်းကာ သတင်းပေးခြင်း၊ ပြည်သူများကို ခြိမ်း ခြောက်ခြင်း၊ အကြမ်းဖက်စစ်တပ်က ပြုလုပ်မည့် ရွေးကောက်ပွဲ အတွက် ရွာထဲတွင် မဲစာရင်း များ လိုက်ကောက်ပေးခြင်းတို့ လုပ်ဆောင်နေသူဖြစ်ကြောင်း သိရသည်။khit thit

စစ်ကိုင်းတိုင်း၊ မုံရွာမြို့နယ်ရှိ သာစည်ထောင်အတွင်း တပ်စွဲထားသည့် စစ်ကောင်စီတပ်သားများ ကို ဒေသခံပြည်သူ့ကာကွယ်ရေးတပ်ဖွဲ့များက ဒီဇင်ဘာလ ၂၁ ရက်နေ့ ည ၉ နာရီခွဲခန့်တွင် လက်နက်ကြီး ဖြင့် ပစ်ခတ်တိုက်ခိုက်ခဲ့ကြောင်း အာဏာရှင်တော်လှန်ရေးပြည်သူ့တပ်မ တော်(DRPA) မှ ထုတ်ပြန်ထား သည်။

“ သာစည်ထောင်ထဲမှာက အကျဉ်းသားတွေမရှိဘူး စစ်သားတွေပဲ တပ်စွဲနေကြတာဗျ။ စျေးသွားစျေးလာ ပြည်သူတွေကိုစစ်တာဆေးတာတွေလုပ်ပြီး မထင်ရင်မထင်သလို ပိုက်ဆံတောင်းတာတွေလုပ်နေကြ တာ။ ဒါကြောင့် ဒေသခံပကဖတွေဆီကနေခွင့်ပြုချက်ယူပြီးတော့ လက်နက် ကြီးတွေနဲ့ ပစ်ခတ်တိုက်ခိုက် ခဲ့တာဖြစ်ပါတယ်” ဟု ပစ်ခတ်မှုပြုလုပ်ခဲ့သည့် DRPA သတင်းနှင့်ပြန်ကြားရေးက ဆိုသည်။

အသုံးပြုခဲ့သည့် လက်နက်ကြီးအမျိုးအစားမှာ ၆၀ မမ၊ ၁၂၀ မမ တို့ဖြစ်ပြီး ပစ်ခတ်မှုကြောင့် ထောင် အတွင်းရှိ ကင်းတဲစခန်းမီးလောက်ပျက်စီးသွားသည်ဟု သတင်းကြားသိရကြောင်း ၎င်းကဆိုသည်။

သို့သော် စစ်ကောင်စီတပ်သား ထိခိုက်၊ သေဆုံးမှုကိုမသိရသေးကြောင်းလည်း DRPA တာဝန်ရှိသူက ပြောသည်။

ယင်းပစ်ခတ်မှုကို DRPA (မုံရွာ) မြို့ပြပြောက်ကျားတပ်ခွဲ၊ မုံရွာခရိုင် တပ်ရင်း24-MONYWA RANGER TRUTH ARMY၊ MACT ပြောက်ကျားတပ်ဖွဲ့၊ ပုဏ္ဏကပြောက်ကျားတပ်ဖွဲ့၊ FUTURE STAR( L.P. D. F)၊ Thousand Of Silver Stars နယ်မြေစည်းမခြားပြောက်ကျား တပ်ဖွဲ့တို့မှ ပူးပေါင်း ပြုလုပ်ခဲ့ခြင်း ဖြစ် သည်။ mizzima

မကွေးတိုင်း၊ မြိုင်မြို့နယ်မှာ ဒီဇင်ဘာ ၂၂ ရက် မနက်ပိုင်းက စစ်ကောင်စီကင်းပုန်းနဲ့ ထိတွေ့တိုက်ပွဲဖြစ်ပွားပြီး PDF ရဲဘော် ၃ ယောက် ကျဆုံးကာ ၂ ယောက် ဒဏ်ရာရရှိခဲ့တယ်လို့ Young Force-UG ကနေ သိရပါတယ်။

မြိုင်မြို့နယ် ကြံစိမ့်ကြီးကျေးရွာနားမှာ ဒီဇင်ဘာ ၂၂ ရက် မနက်ပိုင်းက စစ်ကောင်စီစစ်ကြောင်းကို မစ်ရှင်ပြုလုပ်ဖို့သွားတဲ့ PDF ရဲဘော် ၅ ယောက်ဟာ စစ်ကောင်စီတပ် ကင်းပုန်းနဲ့ တည့်တည့်တိုးပြီး ထိတွေ့တိုက်ပွဲဖြစ်ပွားကာ ရဲဘော် ၃ ယောက် ကျဆုံးပြီး ၂ ယောက်ကတော့ ဒဏ်ရာတွေနဲ့ ထွက်ပြေးလွတ်မြောက်ခဲ့တယ်လို့ Young Force-UG ရဲ့ ပြန်ကြားရေးတာဝန်ခံ ကို YT က ဒီဗွီဘီကို ပြောပါတယ်။

ကျဆုံးခဲ့တဲ့ ရဲဘော်တွေကတော့ အသက် ၁၈ နှစ်ဝန်းကျင် အရွယ်တွေဖြစ်တဲ့ ရဲဘော်အာဒံ၊ ရဲဘော်တေမိနဲ့ ရဲဘော်တက်ပုတို့ဖြစ်ပြီး သူတို့ရဲ့ရုပ်အလောင်းတွေကို သယ်ထုတ်ကာ ဒီနေ့ ဒီဇင်ဘာ ၂၃ ရက်မှာ စစ်ရေးပြအခမ်းအနားနဲ့ စျာပနပြုလုပ်မယ်လို့ ဆိုပါတယ်။

“ဒဏ်ရာရရှိတဲ့ ရဲဘော် ၂ ယောက်ကိုလည်း ကျနော်တို့တပ်ဖွဲ့ဝင်တွေက သွားရောက် ကယ်ထုတ်ခဲ့ရပြီး အဲဒီတိုက်ပွဲအတွင်းမှာ သေနတ် ၂ လက်နဲ့ ခဲယမ်းတွေ ဆုံးရှုံးခဲ့ရကာ ခဲရောင် မစ်စူဘီရှီ ကားတစီးလည်း ဆုံးခဲ့ရတယ်” လို့ ကိုYT က ပြောပါတယ်။

မြိုင်မြို့နယ်မှာ ပြည်သူ့ကာကွယ်ရေးတပ်ဖွဲ့ PDF ထိန်းချုပ်နယ်မြေတွေ များပြားလာလို့ စစ်ကောင်စီတပ်က အင်အားအလုံးအရင်းနဲ့ ထိုးစစ်ဆင်ပြီး နယ်မြေ ပြန်လည်ထိန်းချုပ်ဖို့ အသည်းအသန် ကြိုးစားလာသလို ပြည်သူတွေကို မတရား ဖမ်းဆီးသတ်ဖြတ်တာတွေ၊ နေအိမ်တွေကို မီးရှို့ဖျက်ဆီးတာတွေ ဆက်တိုက်ကျူးလွန်နေတယ်လို့ သိရပါတယ်။ DVB

ရန်ကုန်မြို့၊ ကမာရွတ်မြို့နယ်၊ အမှတ် (၁)ရပ်ကွက်၊ ဆီစက်လမ်းရှိ မြို့နယ်စာရင်းစစ်ရုံးကို လက်ပစ်ဗုံးဖြင့် ပစ်ကာ ဖောက် ခွဲကာ တိုက်ခိုက်ခဲ့ကြောင်း ရန်ကုန် မြို့ပြပြောက်ကျားတပ်ဖွဲ့ထံမှ သိရသည်။

ယနေ့ ဒီဇင်ဘာလ ၂၃ ရက်​နေ့ မွန်းလွဲ ၁ နာရီဝန်း ကျင် အချိန် အ ကြမ်းဖက်စစ်ကောင်စီလက် အောက်ခံ ကမာရွတ်မြို့နယ်စာရင်းစစ်ရုံးကို လက်ပစ်ဗုံးဖြင့် ဖောက်ခွဲတိုက်ခိုက်ခဲ့ရာ ထိခိုက်မှုရှိနိုင်ပြီး အသေးစိတ်အခြေအနေ မသိရသေးကြောင်း Freeland Attack Force က ထုတ်ပြန်ထားသည်။

“ကမာရွတ်ဘက်မှာ အစစ်အ​ဆေး​တွေတအားများတယ်။ စစ်သားနဲ့ရဲ​တွေလည်း ပတ်​နေကြတယ်။ ဗုံးကွဲတာ​တော့ မသိလိုက်ဘူး။ လုံခြုံ​ရေး​တော့ တအား များတယ်” ဟု ကမာရွတ်​မှ ပြည်သူတစ်ဦးက ​ပြောသည်။

ဗုံးပစ်တိုက်ခိုက်မှုကို Freeland Attack Force ၊ Emerald Girl Army (EGA) ၊ Revolution of 21 Century အဖွဲ့တို့ပူးပေါင်းကာ တိုက်ခိုက်ခဲ့ခြင်းဖြစ်ကြောင်း၊ ပြည်သူ့ကာကွယ်ရေးမြို့ပြပြောက် ကျားတပ်ဖွဲ့ဝင်များအထိအခိုက်မရှိပြန်လည်ဆုတ်ခွာနိုင်ခဲ့ကြောင်း သိရသည်။

ပြည်သူများအနေဖြင့် အကြမ်းဖက်စစ်ကောင်စီတပ်စွဲထားသောနေရာများ၊ ၎င်းတို့နေထိုင်ရာ ရုံးများ၊ အကြမ်းဖက်စစ်သားများ၊ ထောက်တိုင်များနှင့် ဝေးကွာစွာ ရှောင်ရှားသွား လာနေထိုင်ပေးကြပါရန် ရန်ကုန်မြို့ပြပြောက်ကျားတပ်ဖွဲ့များက ထုတ်ပြန်သတိပေးထားသည်။khit thit

ကြာသပတေးနေ့နံနက်ပိုင်းက စမ်းချောင်းမြို့နယ် ဝေဠုဝန်မြောက်ရပ်ကွက်တွင်ဖြစ်ပွားသော သေနတ်ဖြင့်ပစ်ခတ်မှုတွင် နှစ်ဦးသေဆုံးကာ တစ်ဦးဒဏ်ရာရရှိသွားကြောင်း မဇ္ဈိမက ထပ်မံစုံစမ်းသိရှိရပြီး သေဆုံးသူထဲတွင် နိုင်ငံခြားသင်္ဘောသား အင်ဂျင်နီယာချုပ်တာဝန်ထမ်းဆောင်နေသူလည်းပါဝင်သည်ကို သိရသည်။

ရန်ကုန်တိုင်း စမ်းချောင်းမြို့နယ် ဝေဠုဝန်မြောက်ရပ်ကွက် သဇင်လမ်းရှိ ဆူပါလဘက်ရည်ဆိုင်အတွင်း ဒီဇင်ဘာ ၂၂ ရက်နေ့ နံနက် ၁၀ နာရီဝန်းကျင်က သေနတ်သမားက လုပ်ကြံသတ်ဖြတ်မှုတွင် ရပ်ကွက်အုပ်ချုပ်ရေးမှူး ကိုဝေဖြိုးအောင်နှင့် အသက် ၅၁ နှစ်အရွယ် ဝါရင့်သင်္ဘော သား ဦးထွန်းထွန်းဦးတို့သေဆုံးသွားခဲ့ပြီး အခြားသူတစ်ဦး (အမည်မသိ)ဒဏ်ရာဖြင့် ကုသမှုခံယူနေရသည်။

ရန်ကုန်အခြေစိုက် မြို့ပြပြောက်ကျားအဖွဲ့တစ်ခုက ပစ်ခတ်ခဲ့သည်ဟု မီဒီယာများတွင်ထုတ်ဖော်ပြောဆိုထားသော်လည်း လုံခြုံရေးစိုးရိမ်မှုဖြင့် အမည်ထုတ်ဖော်ပြောဆိုခြင်းတော့မရှိပါ။

အဆိုပါအမှုနှင့်ပတ်သက်၍ မဇ္ဈိမအပါအဝင် မီဒီယာများက အုပ်ချုပ်ရေးမှူးနှင့် ရာအိမ်မှူးတို့သေဆုံးခဲ့သည်ဟု (အမည်မတပ်ထားသော်လည်း) ရေးသားခဲ့ကြရာ ဦးထွန်းထွန်းဦးကို ရာအိမ်မှူးဟု စာဖတ်သူများ အထင်မှားစရာဖြစ်ခဲ့သည်။ မဇ္ဈိမအနေဖြင့် ကာယကံရှင်မိသားစုကို တောင်း ပန်အပ်ပါသည်။

Chief Engineer ဦးထွန်းထွန်းဦးနောက်ဆုံးအခေါက်သင်္ဘောလိုက်သည်မှာ လေးနှစ်ကြာမြင့်ပြီး ယခုနှစ် ဇန်နဝါရီလတွင် သင်္ဘောဆင်းခဲ့သည်။ နောက်တစ်ကြိမ်သင်္ဘောလိုက်ဖို့ပြင်ဆင်နေချိန်တွင် ကြမ္မာဆိုးဝင်ခဲ့သည်။

အခင်းဖြစ်ပွားပုံ

သင်္ဘောလိုက်သက်တမ်း ၂၅ နှစ်ဝန်းကျင်ရှိပြီဖြစ်သော ဦးထွန်းထွန်းဦးက လဘက်ရည်ဆိုင်တွင် တစ်ယောက်တည်းထိုင်နေစဉ် ယခင်က သိ ကျွမ်းခဲ့ဖူးသူ အုပ်ချုပ်ရေးမှူး ကိုဝေဖြိုးအောင်ရောက်လာကာ နှုတ်ဆက်ပြီး တစ်စားပွဲတည်းလာထိုင်သည်။

များမကြာမီတွင် သေနတ်သမားရောက်လာပြီး ကိုဝေဖြိုးအောင်ကိုဦးတည်ပြီး သေနတ်ဖြင့်လေးချက်ပစ်ခတ်ရာ အခင်းဖြစ်ရာနေရာမှာပင် သေဆုံးသွားခဲ့သည်။ ပစ်ခတ်မှုဖြစ်နေစဉ် အထိတ်တလန့်ဖြင့် ဦးထွန်းထွန်းဦးက မတ်တပ်ရပ်လိုက်ရာ သူပါပစ်ခတ်ခံရသည်။

အခင်းဖြစ်ပွားစဉ်က လဘက်ရည်ဆိုင်တွင်ရှိနေခဲ့သော ” ပြန်ခုခံတယ်လို့ အထင်မှားသွားပုံရတယ်” ဟု ဒေသခံတစ်ဦးက မဇ္ဈိမကိုပြောသည်။

ဆေးစစ်ချက်အရ ဦးထွန်းထွန်းဦး၏ အဆုတ်ကိုသေနတ်ကျည်ဖောက်ဝင်သွားခဲ့ပြီး အခင်းဖြစ်ရာနေရာမှာပင် လဲကျသေဆုံးသွားခဲ့သည်။

အသက် ၃၅ ဝန်းကျင်ရှိသော ဒဏ်ရာရသွားသူမှာ ကမာရွတ်မြို့နယ်နေသူဖြစ်ပြီး ဝေဠုဝန်မြောက်ရပ်ကွက်တွင် စက်ဘီးပြင်ရန်လာရာ ပြင်ဆိုင်မဖွင့်သေးသဖြင့် ဦးထွန်းထွန်းဦးထိုင်နေသော စားပွဲဝိုင်းနှင့်ကပ်လျက်ဝိုင်းတွင် လဘက်ရည်သောက်ရန် ထိုင်နေစဉ် ဦးထွန်းထွန်းဦးကို ဖောက်ထွက်လာသောကျည်က ရှပ်မှန်သွားခြင်းဖြစ်သည်ဟု မဇ္ဈိမက စုံစမ်းသိရှိရသည်။

အခင်းဖြစ်ပွားချိန်က လျှပ်စစ်မီးပြတ်တောက်နေချိန်လည်းဖြစ်သည်။

အုပ်ချုပ်ရေးမှူး ဦးဝေဖြိုးအောင်မှာ ရဲဝန်ထမ်းဟောင်းဖြစ်ပြီး စစ်တပ်အာဏာသိမ်းပြီးနောက်ပိုင်း အုပ်ချုပ်ရေးမှူးဖြစ်လာခဲ့သည်ဟု Myanmar Now သတင်းတွင်ပါရှိသည်။

ပစ်ခတ်မှုဖြစ်ပွားပြီးနောက် လမ်းကိုပိတ်ဆို့ကာ တစ်ဦးတစ်ယောက်မှ လမ်းအတွင်းဝင်ခွင့်မပြုဘဲ စစ်ကောင်စီတပ်၊ ရဲနှင့် အရပ်ဝတ်လုံခြုံရေးများက စုံစမ်းစစ်ဆေးမှုများ တစ်နာရီခန့်လုပ်ဆောင်ခဲ့သည်။ ထို့နောက် အရေးပေါ်ကားများရောက်လာပြီး သေဆုံးသူများ၏ရုပ်အလောင်းကို ရန်ကုန်ဆေးရုံကြီးသို့သယ်ဆောင်သွားခဲ့သည်။

ဦးထွန်းထွန်းဦးတွင် အစ်မဖြစ်သူနှင့် သမီးဖြစ်သူတစ်ဦးကျန်ရစ်သည်။ mizzima