Monthly Archives: Jan 2023

မြန်အောင်မြို့နယ်တွင် CDM ကျောင်းဆရာအား ပုဒ်မ ၃ ခုဖြင့် သေဒဏ်ချမှတ်

ဧရာဝတီတိုင်း၊ ဟင်္သာတခရိုင်၊ မြန်အောင်မြို့နယ် သပြေကုန်းကျေးရွာနေ အသက် ၂၇ နှစ်အရွယ် CDM ကျောင်းဆရာ ဦးကောင်းခန့်ကျော်ဆိုသူကို စစ်ကောင်စီလက်အောက်ခံ ဟင်္သာတထောင်တွင်း တရားရုံးက သေဒဏ်ချမှတ်လိုက်ကြောင်း သိရသည်။

အကြမ်းဖက်မှုတိုက်ဖျက်ရေးဥပဒေ ပုဒ်မ ၅၀(ည)၊ ပုဒ်မ ၅၁(က)အပြင် လူသတ်မှု ပုဒ်မ ၃၀၂(၁) ဂ တို့ဖြင့် မြန်အောင်မြို့နယ်တရားသူကြီး ဦးဝင်းထွဋ်အောင်က ဒီဇင်ဘာလ ၃၀ ရက်နေ့တွင် အမိန့်ချခဲ့ခြင်းဖြစ် သည်ဟု မိသားစုနှင့်နီးစပ်သူတစ်ဦးကပြောသည်။

“၂၀၂၂ ၊ ၈ လပိုင်းမှာ ကောင်းခန့်ကျော်ကို ပုဒ်မ ၅၀(ည)နဲ့ ဟင်္သာတ ဒုခရိုင်တရားသူကြီး ဒေါ်စိုးမာအေးက ထောင်ဒဏ် ငါးနှစ်ချထားတယ်။အဲ့ ဒီတုန်းကတော့ ပုဒ်မ ၅၁(က) နဲ့ ပုဒ် မ ၃၀၂(က)အမှုတွေ အမိန့်ချဖို့ ကျန်တယ်လို့ပြောတယ်။ အခုအမိန့်ချတော့မှ ၃၀၂(၁)ဂ ဆိုပြီး ပြောင်းသွားတာပါ” ဟုဆိုသည်။

CDM ကျောင်းဆရာ ဦးကောင်းခန့်ကျော်အား မြန်အောင်မြို့နယ် သပြေကုန်းရွာမှ စစ်ကောင်စီသတင်းပေး ဦးဝင်းညွန့်အောင်(ဂျပ်ကြီး)ဆိုသူ အသတ်ခံရမှုတွင်ပါဝင်ခဲ့သည်ဟုစွပ်စွဲကာ သေဒဏ်ချမှတ်ခဲ့ခြင်းဖြစ် သည်ဟု သိရသည်။

သေဒဏ်ချမှတ်ခံရသူ CDM ကျောင်းဆရာ ဦးကောင်းခန့်ကျော်သည် စစ်အာဏာမသိမ်းမီက မြန်အောင် မြို့နယ်၊ ထိပ်ပုတ်ကုန်းကျေးရွာစာ သင်ကျောင်းတွင် မူလတန်းပြဆရာအဖြစ် တာဝန်ထမ်းဆောင်ခဲ့ပြီး စစ်အာဏာသိမ်းပြီးနောက် CDM လှုပ်ရှားမှုတွင်ပါဝင်ခဲ့သည်ဟု မိသားစုနှင့်နီးစပ်သူက ပြောသည်။

ထို့နောက် မြန်အောင်၊ သပြေကုန်းကျေးရွာ၊ (အထက) ရွှေရတုကျောင်းဆောင်သစ်ရှိ ကိုဗစ်စင်တာတွင် ပရဟိတလုပ်ငန်းများကူညီလုပ် ဆောင်နေရင်း စစ်ကောင်စီသတင်းပေး ဦးဝင်းညွန့်အောင်(ခေါ်)ဂျပ်ကြီး၊ အသတ်ခံရသည့် ၂၀၂၂ ခုနှစ် အောက်တိုဘာလတွင် စစ်အုပ်စုနှင့်ရဲများ၏ ဖမ်းဆီးခံခဲ့ရခြင်းဖြစ်သည်။

“ဆရာကောင်းခန့်ကျော်က ဘိုကလေးမြို့နယ်ထဲက ရွာတစ်ရွာကို မူလတန်းကျောင်းအုပ်နဲ့ ရာထူးတိုး ကျထားပြီးပြီ။ ကိုဗစ်ဖြစ်တာနဲ့ အာဏာ သိမ်းတာတွေဖြစ်သွားလို့ တာဝန်ကျတဲ့ရွာကို မသွားဖြစ်သေး တာ ပါ။ CDM လုပ်ပြီး သူကူညီနေတဲ့ ကိုဗစ်စင်တာမှာပဲ လာဖမ်းသွားတယ်။ သူက အနေအေးပြီး ပျော်ပျော်နေ တတ်တဲ့လူ၊ စကားများရန်ဖြစ်တာတောင် တစ်ခါမှမတွေ့ဖူးဘူး။ ဒလန်သတ်တဲ့လူကိုမဖမ်းနိုင်လို့ မိထား တဲ့ ဆရာကောင်းခန့်ကျော်ကိုပဲ လူသတ်တရား ခံလို့စွပ်စွဲပြီးအမိန့်ချတာပါ” CDM ဆရာမတစ်ဦးက ဆို သည်။

လက်ရှိတွင် သေဒဏ်ချမှတ်ခံရသူ ဦးကောင်းခန့်ကျော်ကို စစ်ကောင်စီလက်အောက်ခံများက ဟင်္သာတ အကျဥ်းထောင်မှ ပုသိမ်အကျဥ်းထောင် သို့ ပြောင်းရွှေ့လိုက်ပြီဖြစ်ကြောင်း သိရသည်။ mizzima

မကွေးတိုင်း မြို့နယ် ၂ ခုတွင် ရဲစခန်းနှင့်ပျူစောထီးစခန်းများ တိုက်ခိုက်ခံရ

မကွေးတိုင်း ရေစကြိုမြို့နယ်မှာ ဒီဇင်ဘာ ၃၁ ရက် မနက်ပိုင်းက နယ်မြေရဲစခန်းတခုနဲ့ ပျူစောထီး စခန်းတခု တိုက်ခိုက်ခံရပြီး ရဲမေတယောက်သေဆုံး၊ အများအပြား ဒဏ်ရာရခဲ့တယ်လို့ ရေစကြို ပ.က.ဖ က သိရပါတယ်။

ပခန်းကြီးနယ်မြေရဲစခန်းနဲ့ ဂွေးချိုရွာပျူစောထီးစခန်းကို ဒီဇင်ဘာ ၃၁ ရက် မနက် ၅ နာရီ လောက်မှာ ဒေသကာကွယ်ရေး ပူးပေါင်းတပ်ဖွဲ့တွေက တပြိုင်နက်တည်း ဝင်ရောက်တိုက်ခိုက်ခဲ့ရာ စစ်ကောင်စီဘက်က ရဲမေတယောက် သေဆုံးခဲပြီး အများအပြား ဒဏ်ရာရရှိခဲ့တယ်လို့ ရေစကြို ပ.က.ဖ ခေါင်းဆောင် ရဲဘော်ဝေကြီးက ပြောပါတယ်။

ပခန်းကြီးနယ်မြေရဲစခန်းကို သိမ်းပိုက်ရရှိဖို့ နီးကပ်နေတဲ့ အချိန်မှာ ပဒေသာမိုင်းတွေနဲ့ လမ်းကြောင်း ဖြတ်တောက်ခဲ့ပေမဲ့လည်း မနက်မိုးလင်းတဲ့ အချိန်မှာ စစ်ကူရောက်လာလို့ ပြန်လည်ဆုတ်ခွာခဲ့ရတယ်လို့ ဆိုပါတယ်။

တိုက်ပွဲအတွင်းမှာ သေဆုံး ထိခိုက်သူတွေ ရှိနိုင်လို့ အတိကျသိရှိနိုင်ဖို့ ဆက်လက်စုံစမ်းနေပြီး ပူပေါင်းအဖွဲ့တွေအနေနဲ့ အထိအခိုက်မရှိ ဆုတ် ခွာနိုင်ခဲ့တယ်လို့ ရဲဘော်ဝေကြီးက ဆိုပါတယ်။

မကွေးတိုင်း စလင်းမြို့နယ် ကံပြားနယ်မြေ ရဲစခန်းကို စလင်းပြည်သူ့ကာကွယ်ရးတပ်မတော်က ဒီဇင်ဘာ ၃၁ ရက် ည ၉ ခွဲ လောက်က လက် နက်ကြီး၊ လက်နက်ငယ်တွေနဲ့ ပစ်ခတ်တိုက်ခိုက်ခဲ့လို့ ၁၀ မိနစ်လောက် အပြန်အလှန် ပစ်ခတ်မှုတွေရှိခဲ့ပြီး စလင်း PDF က ဒရုန်းနဲ့ပါ ဗုံးကြဲ တိုက်ခိုက်ခဲ့တယ်လို့ စလင်း PDF တာဝန်ခံက ပြောပါတယ်။ 

စလင်း PDF တာဝန်ခံက “၁၀ မိနစ်လောက်ကြာတယ်။ လက်နက်ကြီး ၄ လုံးက စခန်းထဲ ကွက်တိ ကျတာပဲ။ ပြည်သူတွေ အတွက် နှစ်သစ်ကူးလက်ဆောင်ရယူပေးတာပါ” လို့ ပြောပါတယ်။ 

စလင်းမြို့နယ် ကံပြားနယ်မြေရဲစခန်းဟာ စစ်ကောင်စီတပ်သားတွေနဲ့ ရဲတွေ အယောက် ၃၀ လောက် အထိုင်ချပြီး ကျေးရွာတွေကို ဖိနှိပ်ရေးယန္တယား အခိုင်အမာ တည်ဆောက်နေတဲ့ အဓိက ထောက်တိုင်ဖြစ်တယ်လို့ စလင်းဒေသခံတွေက ပြောပါတယ်။ 

၂၀၂၂ ခုနှစ်၊ မေ ၁၃ ရက်ကလည်း စလင်း PDF အခြေစိုက်စခန်းကို ကံပြာရဲစခန်းက တဆင့် စစ်ကောင်စီက စစ်ကြောင်းထိုး ဝင်ရောက်လာလို့ ချောင်းဆုံကျေးရွာနားမှာ တိုက်ပွဲတွေ ဖြစ်ပွားခဲ့ပြီး စစ်ကောင်စီတပ်သား အများပြား ထိခိုက်ကျဆုံးခဲ့ပါသေးတယ်။ 

တိုက်ပွဲဖြစ်စဉ်တွေနဲ့ ပတ်သက်ပြီး စစ်ကောင်စီဘက်က သတင်းထုတ်ပြန်ထားတာ မတွေ့သေးပါဘူး။DVB

မြင်းခြံတွင် ပျူစောထီးများ လိုက်ပါလာသော ကားကို မိုင်းဆွဲ တိုက်ခိုက်မှု ၄ ဦးသေဆုံး၊ မတ္တရာတွင် စစ်တပ် တပ်စွဲထားသော နေရာများကို ပစ်ခတ် တိုက်ခိုက်

မန္တလေး၊ မြင်းခြံမြို့နယ်တွင် ပျူစောထီးများ လိုက်ပါသည့် ကားကို မိုင်းဆွဲ တိုက်ခိုက်မှု ၄ ဦးသေဆုံးခဲ့ကြောင်း ရွှေခြံသား ပြောက်ကျားတပ်ဖွဲ့-မြင်းခြံထံမှ သိရသည်။

ဒီဇင်ဘာလ ၃၁ ရက် နံနက် ၆ နာရီ မိနစ် ၂၀ ခန့်တွင် ကျောက်ကန်ရွာမှ ပျူစောထီး ခေါင်းဆောင် လှမိုး ဦး ဆောင်ပြီး မြင်းခြံမြို့သို့ ကားဖြင့် တက်လာစဥ် ရွှေခြံသားပြောက်ကျားတပ်ဖွဲ့က စောင့်ကြိုမိုင်းဆွဲ တိုက်ခိုက်ခဲ့သော​ကြောင့် ပျူစောထီး ခေါင်းဆောင် လှမိုး အပါအဝင် ၄ ဦးသေဆုံးခဲ့ကြောင်း သိရသည်။

ထို့ပြင် မန္တလေးတိုင်း၊ မတ္တရာမြို့နယ်၊ သုံးဆယ်ပေးကျေးရွာတွင် တပ်စွဲထားသော အကြမ်းဖက်စစ်စစ်များကို ဒရုန်း၊ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း Unicorn-ယူနီကွန်း ပြောက်ကျားတပ်ဖွဲ့ထံမှ သိရသည်။

ဒီဇင်ဘာလ ၃၁ ရက် ည ၇ နာရီခန့်က အင်အား ၅၀ ခန့်ဖြင့် တပ်စွဲထားသောအကြမ်းဖက်စစ်သားများ ကို နှစ်သစ်ကူးအကြိုအနေဖြင့် ဒရုန်းဖြင့် ဗုံးသီးတစ်လုံး၊ လက်နက်ကြီးဖြင့် ၉ ချက်ပစ်ခတ်တိုက်ခိုက်ခဲ့ ခြင်းဖြစ်ကြောင်း၊ အကြမ်းဖက်စစ်သားများ ထိခိုက်သေဆုံးမှု အတိအကျမသိရသေးကြောင်း ယူနီကွန်း ပြောက်ကျားတပ်ဖွဲ့က ထုတ်ပြန်ထားသည်။

အဆိုပါတိုက်ခိုက်မှုကို ADRF တော်လှန်ရေးအင်အားစု၊ ကောင်းကင်တော်လှန်ရေးအင်အားစု၊ Unicorn ပြောက်ကျားတပ်ဖွဲ့၊ Sky Hero (Mandalay)၊ Peacok Warrior Force ၊ ဒေါင်းစစ်သည် ပြည်သူ့ကာ ကွယ်ရေးတပ်ဖွဲ့နှင့် မတ္တရာမြို့နယ်အဖွဲ့တို့ပူးပေါင်းကာ တိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေး ရဲဘော်များ အထိအခိုက်မရှိပြန်လည်ဆုတ်ခွာနိုင်ခဲ့ကြောင်း သိရသည်။ khit thit

မြင်းမူမြို့ပေါ်တွင် စစ်ကောင်စီတပ်ဖွဲ့ဝင်များကို ပါဆယ်ဗုံးဖြင့်တိုက်ခိုက်၊ အရာရှိဖြစ်သူ သေဆုံး

မြင်းမူမြို့ပေါ်ရှိ လွတ်လပ်ရေးကျောက်တိုင်အနီးတွင် ဒီဇင်ဘာလ ၃၁ ရက်နေ့ ညပိုင်းက ပါဆယ် ဗုံးချပြီး စစ်ကောင်စီတပ်ဖွဲ့ဝင်များ လာရောက်စစ်ဆေးချိန်၌ ဖေါက်ခွဲတိုက်ခိုက်ခဲ့ခြင်းကြောင့် ဗိုလ်အဆင့် အရာရှိတစ်ဦးသေဆုံးသွားကြောင်း People Army to Fight Dictatorship- PAFD အဖွဲ့ မှ တာဝန်ရှိသူ တစ်ဦးက ပြောသည်။

“အဲဒီနေရာရဲ့အနောက်ဘက်မှာ စစ်ကောင်စီထောက်တိုင် ရုံးတွေရှိတယ်။ စစ်ကောင်စီတပ်က တပ်စွဲထား တဲ့ အထက်တန်းကျောင်းရှိတယ်။ အဲဒီနေရာက ထွက်ပေါက်လမ်းလေ၊ အဲ့ဒါကြောင့် ပါဆယ်ဗုံးချတိုက် ခိုက်ခဲ့တာ ဗိုလ်တစ်ယောက်သေတယ်လို့ ဒီမနက်သတင်းရတယ်” ဟု ၎င်းက ပြောသည်။

ဒီဇင်ဘာလ ၃၀ ရက်နေ့ကလည်း စစ်ကိုင်း တပ်မ(၃၃)မှ စစ်ကောင်စီတပ်သား ၂၀ ဦးသည် မြင်းမူမြို့ အမှတ်(၁)အထက်တန်းကျောင်းသို့ ရောက်ရှိလာပြီးနောက် မုံရွာမြို့သို့ Express ကားဖြင့်ထွက်ခွာချိန်တွင် မိုင်းခွဲတိုက်ခိုက်ခဲ့သည့်အတွက် စစ်ကောင်စီကား ပျက်စီးခဲ့ကြောင်းသိရသည်။

မိုင်းဆွဲတိုက်ခိုက်ခံရပြီးနောက် စစ်ကောင်စီတပ်သားများသည် လက်နက်ကြီးလက်နက်ငယ်များဖြင့် ပစ်ခတ်မှုများပြုလုပ်ခဲ့သော်လည်း ဒေသကာကွယ်ရေးအဖွဲ့များ အထိအခိုက်မရှိပြန်လည် ဆုတ်ခွာလာ နိုင်ခဲ့ကြောင်း သိရသည်။

တိုက်ခိုက်မှုအတွင်း စစ်ကောင်စီတပ်ဖွဲ့ဝင်များ၏သေဆုံးထိခိုက်မှုကို အတည်မပြုနိုင်သော်လည်း ကားမှာ လုံး၀ပျက်စီးသွားသည့်အတွက် ရှေ့ ဆက်မသွားနိုင်ဘဲ ကားကိုဆွဲကာ နောက်ကြောင်းပြန်လှည့်သွား ကြောင်းဆိုသည်။

တိုက်ခိုက်မှုများကို People Army to Fight Dictatorship-PAFD ၊ တပ်ခွဲ DK PDF(MMU)၊ People Knight Defense Force- Myin Mu ၊ TAUNGTHA People Defense Force၊ D.B.B.F-MMU ၊ အဖွဲ့များက ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။mizzima

မင်းကင်းမြို့နယ် ရွာ ၂ ရွာကို စစ်တပ်မီးရှို့၊ ပုလဲနှင့်ယင်းမာပင်ရှိ စစ်တပ်တပ်စွဲသည့်နေရာကို PDF အဖွဲ့များ လက်နက်ကြီးဖြင့် ပစ်ခတ်

စစ်ကိုင်းတိုင်း ကလေးခရိုင်၊ မင်းကင်းမြို့နယ်၊ မတောရွာနဲ့ လက်ပံဆိပ်ရွာကို ဇန်နဝါရီ ၁ ရက် မနက် ၁၀ နာရီကစတင် မီးရှို့နေတယ်လို ‌မင်းကင်းဒေသခံတွေက ပြောပါတယ်။

စစ်ကောင်စီတွေဟာ ဒီဇင်ဘာ ၃၀ ရက်က မင်းကင်းမြို့ကနေ ချင်းမြစ်အောက်ပိုင်းကို ဆုန်ဆင်းလာပြီး ဒီနေ့မှ အခုလို မီရှို့တာလို့ ဒေသခံတွေက ပြောပါတယ်။

ဒေသခံရွာသူ တဦးက “လက်ပံဆိပ်ရွာကို မီးအရင်ရှို့တာ။ အဲဒီရွာကို ရှို့ပြီး မတောရွာကို ထပ်မီးရှို့တယ်။ ရွာသာတွေကတော့ အကုန်ထွက်ပြေး နေကြရတယ်။ ရွာအနီးလည်းကပ်လို့ မရသေးတော့ အိမ်ဘယ်နှလုံး မီးလောင်တယ်ဆိုတာကိုတော့ အတိကျမပြောနိုင်သေးဘူး”လို့ ပြောဆိုပါတယ်။ 

အခုလို ရွာကို မီးရှို့နေတာကြောင့် ဒေသခံပြည်သူကာကွယ်ရေးအဖွဲ့ PDF တွေ ရောက်ရှိလာပြီး မနက် ၁၁ နာရီခွဲကျော်မှာ စစ်ကောင်စီနဲ့ တိုက် ပွဲဖြစ်ပွားနေဆဲ ဖြစ်တယ်လို့လည်း ဒေသခံတွေက ပြောပါတယ်။

တိုက်ပွဲဖြစ်ပွားနေဆဲဖြစ်တာကြောင့် ဒေသတွင်း ပြည်သူ့ကာကွယ်ရေးခေါင်းဆောင်တွေဆီ ဖုန်းဆက်သွယ်ဖို့ ကြိုးစားနေဆဲဖြစ်ပါတယ်။

စစ်ကိုင်းတိုင်း ပုလဲမြို့နယ်နဲ့ ယင်မာပင်မြို့နယ်အတွင်းက စစ်ကောင်စီတပ်စွဲရာ ကျေးရွာ ၂ ရွာကို ဒေဒသခံပြည်သူကာကွယ်ရေးအဖွဲ့က ဒီ ဇင်ဘာ ၃၁ ရက် ည ၁၂ နာရီကနေ ဇန်နဝါရီ ၁ ရက် မနက်ခင်းအစောပိုင်းအထိ ပစ်ခတ်ခဲ့တယ်လို့ ပြည်သူကာကွယ်ရေးခေါင်ဆောင်တွေက ပြောပါတယ်။

ပုလဲမြို့နယ်က ဇီးဖြူကုန်းရွာနဲ့ ယင်းမာပင်မြို့နယ်က ဘန့်ဘွေးရွာမတို့ကို ပစ်ခတ်ခဲ့တာ လို့ ရိုးမရာဇာအဖွဲ့ တာဝန်ရှိသူက ပြောပါတယ်။ 

“မနေ့က နေ့လယ်ပိုင်းကတော့ ပုလဲမြို့နယ်၊ ဇီးဖြူကုန်းကျေးရွာ ပျူနဲ့စကစတွေ တပ်ဆွဲထားတဲ့ရွာကို လက်နက်ကြီးနဲ့ ပစ်ခတ်ခဲ့တယ်။ သေတာကိုတော့ အတိကျမသိရဘူး။”

ဒေသခံပြည်သူကာကွယ်ရေးအဖွဲ့ဝင်တဦးက “မနေ့က ည ၁၂ နာရီက‌နေ  မနက်လင်းပိုင်းအထိ ယင်းမာပင်မြို့နယ်၊ ဘန့်ဘွေးရွာကို ပစ်ခတ်ခဲ့တယ်။ အသေအပျောက်ကတော့ မသိရသေးဘူး။ စုံစမ်းနေဆဲပဲ”လို ပြောပါတယ်။

စစ်ကောင်စီတပ်ကတော့ ဒေသတွင်းပြည်သူ့စစ်ဆိုတဲ့အသုံးအနှုန်းကို ဖော်ပြပြီး ပြည်သူ အချင်းချင်း သွေးခွဲကာ တိုက်ခိုက်ခိုင်းတာဖြစ်ပြီး သွေး ခွဲအုပ်ချုပ်ရေးစနစ် ဖော်ဆောင်လာနေတာလို့ စစ်ကိုင်းနိုင်ငံရေးသုံးသပ်သူတွေက ပြောပါတယ်။ DVB

မင်းကင်းတွင် တိုက်ပွဲဖြစ်ပွားပြီး စစ်သား ၂ ဦးသေဆုံးကာ PDF ရဲဘော် ၁ ဦးကျဆုံး၊ ပေါက်တွင် စစ်တပ် စစ်ဆေးဂိတ်ကို စနိုက်ပါဖြင့် ပစ် ခတ် တိုက်ခိုက်မှု ၁ ဦးသေဆုံး

စစ်ကိုင်းတိုင်း၊ မင်းကင်းမြို့နယ်တွင် အကြမ်းဖက် စစ်တပ် နှင့် PDF တပ်ဖွဲ့များ တိုက်ပွဲဖြစ်ပွားပြီး စစ်သား ၂ ဦးသေဆုံးခဲ့ကြောင်း Student Revolutionary Force SRF တပ်ဖွဲ့ထံမှ သိရသည်။

ဇန်နဝါရီ ၁ ရက်နေ့ မွန်းလွဲ ၁၁ နာရီခန့်တွင် မင်းကင်းမြို့မှ အင်အား ၈၀ ခန့်ဖြင့် လက်ပံဆိပ်ကျေးရွာသို့ မော်တော်ဖြင့် စစ်ကြောင်းထိုးလာပြီး ပြည်သူပိုင် စပါးကျည်များကို မီးရှို့နေစဥ် SRF တပ်ဖွဲ့က မော်တော်များကို ပစ်ခတ်တိုက်ခိုက်ခဲ့ကြောင်း၊ အကြမ်းဖက် စစ်တပ်က မတောကျေး ရွာကို ထပ်မံ မီးရှို့နေစဉ် SRF တပ်ဖွဲ့မှ ထပ်မံ ပစ်ခတ် တိုက်ခိုက်ခဲ့ပြီး တိုက်ပွဲဖြစ်ပွားကာ စစ်သား ၂ ဦးသေဆုံးပြီး PDF ရဲဘော် မီးခဲ ကျဆုံးခဲ့ကြောင်း သိရသည်။

တိုက်ပွဲအတွင်း အကြမ်းဖက် စစ်တပ်ဘက်မှ ၄၀ မမ၊ RPG၊ စက်လက်များဖြင့် အဆက်မပြတ် တိုက်ခိုက်ခဲ့သောကြောင့် လက်နက် အင်အား မမျှတသောကြောင့် PDF ရဲဘော် ၁ ဦး ကျဆုံးခဲ့ခြင်းဖြစ်ကြောင်း Student Revolutionary Force SRF တပ်ဖွဲ့မှ တာဝန်ရှိသူ တစ်ဦးကပြေ ာဆိုသည်။

ထို့ပြင် မကွေးတိုင်း၊ ပေါက်မြို့နယ်၊ ကိုင်းလယ်ရဲစခန်းနှင့် တပ်ကုန်းရွာသစ်(ပျူရွာ)ကြားတွင် ဂိတ်ချစစ်ဆေးနေ သော ရဲနှင့်ပျူစောထီးများကို စနိုက်ပါဖြင့် ပစ်ခတ်တိုက်ခိုက်ခဲ့ရာ ၁ ဦးသေဆုံးသွားကြောင်း Pauk Revolution Front မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနကို ပြောကြားသည်။

ယနေ့ ဇန်နဝါရီလ ၁ ရက် မွန်းတည့် ၁၂ နာရီအချိန်က လမ်းမပေါ်တွင် ဂိတ်ချထားသော ရဲနှင့် ပျူစော ထီး အဖွဲ့အား စနိုက်ပါဖြင့် ပစ်ခတ်ခဲ့ရာ နေရာမှာပင် ပွဲချင်းပြီးတစ်ဦးသေဆုံးသွားကြောင်း၊ အကြမ်းဖက် စစ်တပ်လက်အောက်ခံ ရဲနှင့်ပျူစောထီးများမှ သေနတ်များဖြင့် ပြန်လည်ပစ်ခတ်ကာ ၆၀ မမ ဖြင့် ပြန် လည်ပစ်ခတ်သဖြင့် ဆုတ်ခွာခဲ့ရကြောင်း သိရသည်။

“သူတို့နယ်မြေ ဆိုတော့ ၃ ယောက်လောက်နဲ့ လမ်းပေါ်တက်ဂိတ်ချ ဆတ်ကြေးကောက်နေတာ၊ အပိုင် တစ်ကောင်ရအောင်ပစ်ခဲ့တာ၊ ၆၀ မမနဲ့က နှစ်ပြန်ထုတယ်၊ ရဲဘော်တွေ အထိအခိုက်မရှိ ပြန်လည် ဆုတ် ခွာနိုင်ခဲ့ပါတယ်”ဟု Pauk Revolution Front မှ တာဝန်ရှိသူတစ်ဦးက ရန်ကုန်ခေတ်သစ်ကို ပြောဆို သည်။ khit thit

ရေစကြိုမြို့နယ်တွင် ပျူစောထီးစခန်းနှင့် ရဲစခန်း တပြိုင်နက်တိုက်ခိုက်ခံရပြီး ရဲမေသေဆုံး

မကွေးတိုင်း၊ ရေစကြိုမြိုနယ်၊ ဂွေးချိုကျေးရွာရှိ ပျူစောထီးစခန်းနှင့် ပခန်းကြီးရဲစခန်းတို့ကို ဒေသကာကွယ်ရေးအဖွဲ့များက ယမန်နေ့ ဒီဇင် ဘာလ ၃၁ ရက် မနက်အစောပိုင်းတွင် တစ်ပြိုင်တည်း တိုက်ခိုက်ခဲ့ရာ ရဲမေတစ်ဦးသေဆုံးပြီး ဒဏ်ရာရရှိသူများလည်းရှိနိုင်ကြောင်း ရေစကြိုမြို့နယ် ပြည်သူ့ ကာကွယ်ရေးတပ်ဖွဲ့မှတာဝန်ရှိသူတစ်ဦးက ပြောသည်။

“ဂွေးချိုပျူစခန်းနဲ့ ပခန်းကြီးရဲစခန်းကို တစ်ပြိုင်တည်းတိုက်တာပါ။ ရဲမေတစ်ဦးသေတယ် ဆိုတာလောက် ပဲသိတယ် ကျန်တာက မသိရသေးဘူး” ဟု ၎င်းကပြောသည်။

ပခန်းကြီးရဲစခန်းသည် ရဲတပ်ဖွဲ့ဝင်များ၊ စစ်ကောင်စီတပ်ဖွဲ့ဝင်များနှင့် ပျူစောထီးများ ပူးပေါင်းအခြေချ နေထိုင်သည့် စခန်းတစ်ခုဖြစ်ပြီး ရဲစ ခန်းရှေ့တွင် ဂိတ်ဖွင့်၍ ခရီးသွားပြည်သူများထံမှ ငွေကြေးကောက်ခံ လေ့ရှိကြောင်း သိရသည်။

ဂွေးချိုရှိ ပျူစောထီးစခန်းတိုက်ခိုက်မှုတွင် ပျူစောထီးအဖွဲ့ဝင်များ ထိခိုက်သေဆုံးမှု ရှိမရှိကို အတည်ပြု နိုင်ခြင်းမရှိသေးကြောင်း သိရသည်။

“ဂွေးချို ပျူရွာကို လက်နက်ကြီးလက်နက်ငယ်တွေနဲ့ ပစ်ခတ်တိုက်ခိုက်မှုတွေ ပြုလုပ်ခဲ့တယ်။ သူတို့ဘက် ကလည်း ပြန်ပစ်တယ်။ ထိခိုက်မှုအခြေအနေကတော့ မသိရသေးဘူး “ဟု ရေစကြိုပကဖမှ တာဝန်ရှိသူ တစ်ဦးကပြောသည်။

လက်ရှိအချိန်တွင် စစ်ကောင်စီတပ်များသည် ရေစကြိုမြို့နယ်အတွင်းရှိ ကျေးရွာများကို စစ်ကြောင်းထိုး ဝင်ရောက်ခြင်း၊ နေအိမ်များကို မီးရှို့ဖျက်ဆီးခြင်းများလုပ်ဆောင်လျက်ရှိသည့်အတွက် ပြည်သူများ အနေ ဖြင့် စစ်ရေးသတိဖြင့်နေထိုင်ရန်လည်း တိုက်တွန်းထားသည်။

ယခုတိုက်ခိုက်မှုများကို ရေစကြိုမြို့နယ် ပြည်သူကာကွယ်ရေးတပ်ဖွဲ့၊ Salingyi Special Task Force-SSTF ၊ မြိုင်(ပကဖ)တပ်ရင်း(၂)၊ Myanmar Royal Dragon Army-MRDA ၊ ပခုက္ကူခရိုင်တပ်ရင်း အမှတ်(၉) တို့ ပူးပေါင်းတိုက်ခိုက်ခဲ့ခြင်းဖြစ်ကြောင်း သိရသည်။ mizzima

ပဲခူးမြို့တွင် စစ်ကောင်စီဂိတ်စခန်းနှင့်ရဲစခန်း မိုင်းဆွဲတိုက်ခိုက်ခံရ၊ ၂ ဦးသေဆုံးပြီး ၂ ဦးဒဏ်ရာရ

ပဲခူးတိုင်း၊ ပဲခူးမြို့မှာ ဒီဇင်ဘာ ၃၁ ရက် မနက် ၅ နာရီလောက်က စစ်ကောင်စီရဲ့ တပ်ကင်းစခန်း နဲ့ ရဲစခန်းနေရာ ၃ ခု မိုင်းဆွဲတိုက်ခိုက်ခဲ့ရတဲ့အတွက် စစ်ကောင်စီတပ်ဖွဲ့ဝင် ၂ ဦးသေဆုံးပြီး ၂ ဦး ဒဏ်ရာရရှိခဲ့တယ်လို့ မြိုခံတွေက ပြောပါတယ်။

စစ်ကောင်စီရဲ့ ပင်မထောက်ပံ့ပို့ဆောင်ရေး တပ်ကင်းဂိတ်၊ ပဲခူးမြို့နယ် အမှတ်  ၂ ရဲစခန်းနဲ့ ကလိ စစ်ဆေးရေးဂိတ်တွေ မိုင်းဆွဲတိုက်ခိုက်ခံခဲ့ရတဲ့အတွက် ထိခိုက်သေဆုံးသူတွေ ရှိခဲ့တာပါ။

ပဲခူးမြို့ခံပြည်သူတဦးက ”စစ်ကောင်စီလုံခြုံရေးဂိတ် ၂ ခုနဲ့ ရဲစခန်းတိုက်ခိုက်ခံရတာ ဟုတ်တယ်။ ၂ ယောက်သေပြီး ၂ ယောက် ဒဏ်ရာရတယ်လို့ ကြားတယ်။ အခုတော့ လုံခြုံရေးတင်းကြပ်ပြီး စစ်ဆေးတာတွေ ပိုလုပ်နေတယ်”လို့ ပြောပါတယ်။

အဆိုပါ ဂိတ်ကင်းစခန်းတွေ တိုက်ခိုက်ခံရပြီးနောက် ပဲခူးမြို့ဝင် မြို့ထွက်ဂိတ်တွေမှာ စစ်ကောင်စီက လူ၊ ဆိုင်ကယ်နဲ့ မော်တော်ယာဉ်တွေကို ပိုမိုစစ်ဆေးလာတဲ့အပြင် လုံခြုံရေးတင်းကြပ်ထားပါတယ်။

နန်းထိုက်အောင်စစ်ဆင်ရေးအမည်နဲ့ ပဲခူးပြည်သူကာကွယ်ရေးအဖွဲ့နဲ့ ဒိုက်ဦးကာကွယ်ရေးတပ်ဖွဲ့က အဲဒီနေ့ မနက် ၄ နာရီ ၄၅ မိနစ်လောက်က စစ်ကောင်စီရဲ့ ပင်မထောက်ပံ့ပို့ဆောင်ရေး တပ်ကင်းဂိတ်ကို မိုင်းခွဲတိုက်ခိုက်ခဲ့ရာ စစ်ကောင်စီရဲ့ တပ်ဖွဲ့ဝင်တပ်သား ၂ ဦးသေဆုံးခဲ့တယ်လို့ ပဲခူး PDFက သတင်းထုတ်ပြန်ထားပါတယ်။

ဒါ့အပြင် မနက် ၄ နာရီ ၅၀ မိနစ်လောက်မှာ ပဲခူးမြို့ အမှတ်  ၂ ရဲစခန်းကို မိုင်းခွဲတိုက်ခိုက်ခဲ့ရာ ထိခိုက်သေဆုံးမှုအခြေအနေကို စုံစမ်းအတည် ပြုနေဆဲဖြစ်သလို မနက် ၄ နာရီ ၅၅ မိနစ်မှာ ကလိစစ်ဆေးရေးဂိတ်ကို မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂ ဦး ထိခိုက်ခဲ့တယ်လို့ ဆိုပါတယ်။

ပြီးခဲ့တဲ့ ဒီဇင်ဘာ ၂၇ ရက် မနက် ၁၁ နာရီလောက်ကလည်း ပဲခူးတိုင်း၊ တောင်ငူခရိုင်၊ ရေတာရှည်မြို့နယ်၊ နားဂျပ်ပင်ကျေးရွာ၊ ဂူတောင်တေ ာရကျောင်းအနီးမှာ စစ်ကောင်စီ စစ်ကြောင်းနဲ့ တောင်ငူခရိုင် PDF တပ်ရင်း ၃၅၀၁၊ တပ်ခွဲ ၄ တို့တိုက်ပွဲဖြစ်ပွားခဲ့ရာ စစ်ကောင်စီဘက်က အ ရာရှိ ၁ ဦးအပါအဝင် ၆ ဦးသေဆုံးပြီး ၁၂ ဦးဒဏ်ရာရရှိခဲ့တယ်လို့ ပဲခူး PDF က ထုတ်ပြန်ခဲ့ပါတယ်။ DVB

« Older Entries