Monthly Archives: Jan 2023

ကလေး PDF တပ်ဖွဲ့ဝင် ၂ ဦး ဖမ်းဆီးခံရပြီး ၂ ဦး ပစ်သတ်ခံရ

စစ်ကိုင်းတိုင်း၊ ကလေးမြို့မှာ ကလေး PDF အဖွဲ့‌ဝင်တွေ ဖမ်းဆီး ပစ်ခတ်သတ်ဖြတ်ခံရတာတွေ ရှိနေတယ်လို့ ကလေးပြည်သူ့ကာကွယ်ရေးအဖွဲ့ဝင်တွေက ဒီဗွီဘီကို ပြောပါတယ်။

ဇန်နဝါရီ ၂၄ ရက် ညနေပိုင်းက တာဟန်းရပ်ကွက် စစ်ကောင်စီစစ်ဆေးရေးဂိတ်မှာ ကလေး PDF အဖွဲ့ဝင် လာလ်ပန့်ဆန်းငါကို စစ်ကောင်စီတပ်က ဖမ်းဆီးသွားခဲ့သလို ဇန်နဝါရီ ၂၀ ရက်ကလည်း ချမ်းမြေ့အောင်စည်ရပ်ကွက်မှာ ကလေး PDF အဖွဲ့ဝင် ကိုစိုင်းညီညီအောင်လည်း စစ်ကောင်စီတပ်ရဲ့ ဖမ်းဆီးတာကို ခံခဲ့ရပါတယ်။

ဇန်နဝါရီ ၂၄ ရက်ညက စစ်ကောင်စီတပ်စွဲထားရာ တာဟန်းရပ်ကွက်အုပ်ရေးမှူးရုံးကို မိုင်းသွားထောင်းတဲ့ ကလေး PDF အဖွဲ့ဝင် ၂ ဦးလည်း စစ်ကောင်စီရဲ့ ပစ်ခတ်သတ်ဖြတ်မှုကြောင့် ကျဆုံးခဲ့ရပါသေးတယ်။

“ကျဆုံးသွားတဲ့ အဖွဲ့ဝင်ရဲဘော်တွေအတွက် ဂုဏ်ယူပါတယ်။ ဖမ်းဆီးခံရတဲ့ ရဲဘော်တွေအတွက်လည်း ကျနော့်အနေနဲ့ စိတ်မကောင်းဖြစ်မိပါတယ်။ မြိုပေါ်မှာလှုပ်ရှားတဲ့ အဖွဲ့တွေဆိုတော့ ကျနော်တို့လို တောမှာ စစ်ရေးလှုပ်ရှားတဲ့အဖွဲ့တွေထက် အန္တရာယ်ပိုများတယ်” လို့ ကလေး PDF အမှတ်-၁ တပ်ရင်းမှူး ရဲဘော်ဝေနိုင်ဦးက ဒီဗွီဘီကို ပြောပါတယ်။

ဖမ်းဆီးခံရတဲ့ ရဲဘော် ၂ ဦးကိုတော့ စစ်ကောင်စီတပ်ဖွဲ့က ကလေးမြို့ ဒေသကွပ်ကဲမှု စစ်‌ဌာနချုပ်အတွင်း ခေါ်ဆောင်သွားတယ်လို့ သိရပါတယ်။

ကလေး PDF အဖွဲ့ဝင်တွေ ဖမ်းဆီးခံရမှု အခြေအနေနဲ့ ပတ်သက်ပြီး စစ်ကောင်စီဝါဒဖြန့် တယ်လီဂရမ်ချန်နယ်တွေမှာ လုံခြုံရေးအဖွဲ့ဝင်တွေအနေနဲ့ ဉပဒေနဲ့အညီ အရေးယူ ဆောင်ရွက်သွားမယ်လို့ သတင်းထုတ်ပြန်ထားပါတယ်။

လတ်တ‌လော ကလေးမြို့မှာလည်း စစ်ကောင်စီတပ်သားတွေနဲ့ Non CDM ဝန်ထမ်းတချို့က မြို့‌ပေါ်ရပ်ကွက်တွေမှာ ရွေးကောက်ပွဲကျင်းပနိုင်ရေးအတွက် လူဦးရေစာရင်း ကောက်ခံတာတွေ လုပ်ဆောင်နေပါတယ်။DVB

ဝက်လက်ရှိ ကျေးရွာ ၃ ခုကို စစ်တပ် မီးရှို့မှု နေအိမ် ၆၀ ကျော်ပြာကျ၊ ဒီပဲယင်းရှိ အုံးတပင်ရွာကိုလည်း စစ်တပ်က မီးတင်ရှို့နေ

စစ်ကိုင်းတိုင်း၊ ဝက်လက်မြို့နယ်ရှိ ကျေးရွာ ၃ ခုကို အကြမ်းဖက် စစ်တပ် မီးရှို့ဖျက်ဆီးမှု နေအိမ် ၆၀ ကျော်ပြာကျခဲ့ကြောင်း ဒေသခံ ပြည်သူများက ရန်ကုန်ခေတ်သစ်မီဒီယာသို့ ပြောဆိုသည်။

ဇန်နဝါရီလ ၂၃ ရက်၊ ၂၄ ရက်နှင့် ၂၅ ရက်နေ့တို့တွင် အကြမ်းဖက် စစ်တပ်က ဝက်လက်မြို့နယ်အတွင်းရှိ မကျီးတုံကျေးရွာ၊ ပင်းဇင်းကျေးရွာနှင့် မူးကြီးကျေးရွာတို့ကို ဝင်ရောက် စီးနင်း မီးရှို့ခဲ့ပြီး ပြည်သူပိုင်နေအိမ် ၆၀ ကျော်ပြာကျခဲ့ကြောင်း သိရသည်။

“၂၃ ရက်နေ့မှာ စစ်ခွေးတွေ မီးရှို့လို့ မကျီးတုံကျေးရွာက နေအိမ် ၆၀ ပြာကျတယ်။ ၂၄ ရက်နေ့မှာ ပင်းဇင်းရွာကို မီးထပ်ရှို့တယ်။ ပျက်စီးသွားတဲ့ နေအိမ် အရေအတွက်တော့ မသိရသေးဘူး။ ၂၅ ရက်နေ့မှာ မူးကြီးကျေးရွာရှိကို မီးထပ်ရှို့တယ်” ဟု ဒေသခံပြည်သူ တစ်ဦးကပြောဆိုသည်။

အလားတူ အကြမ်းဖက် စစ်တပ်သည် စစ်ကိုင်းတိုင်း၊ ဒီပဲယင်းမြို့နယ်၊ အုံးတပင်ရွာကို ယနေ့ ဇန်နဝါရီလ ၂၆ ရက်နေ့ နံနက် ၁၁ နာရီ ၃၀ မိနစ်တွင် မီးရှို့ဖျက်ဆီးနေကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ပြောဆိုသည်။

လက်ရှိချိန်တွင် အင်္ဂါမြင့်ကျေးရွာ၊ တောက္ကရှပ်ကျေးရွာ၊ တက်ကောင်းကျေးရွာ၊ တနယ်ကြီးကုန်းကျေးရွာနှင့် ဆပ်သွားကျေးရွာများမှ ဒေသခံပြည်သူများကလည်း ဘေးလွတ်ရာသို့ ထွက်ပြေးနေရကြောင်း သိရသည်။

“နံနက် ၈ နာရီလောက်က အုံးတပင်ရွာ အရှေ့ဘက် ချောင်းကမ်းဘေးမှာ ၁ နာရီလောက် တိုက်ပွဲ ဖြစ်ခဲ့တယ်။ အထိခိုက် ကျဆုံးကတော့ မသိရသေးပါဘူး။ လက်နက် အင်အား မမျှလို့ နောက်ဆုတ်ပေးခဲ့ရတယ်လို့ သိရပါတယ်။ အခုတော့ စစ်ခွေးတွေက ရွာကို မီးရှို့နေကြတယ်။ အုံးတပင်ရွာတွေကော ဘေးပတ်ဝန်းကျင်က ပြည်သူတွေပါ အကုန်လုံး ထွက်ပြေးနေရပါတယ်။ အုံးတပင်ရွာမှာ အိမ်ခြေ ၅၀၀ ကျော်ရှိတယ်။ ပျက်စီးဆုံးရှုံးမှု အခြေအနေတော့ မသိရသေးဘူး” ဟု ဒေသခံပြည်သူ တစ်ဦးကပြောဆိုသည်။khit thit

သတင်းသမားများအား ထောင်ချရာ၌ မြန်မာက ကမ္ဘာမှာ တတိယမြောက်အဆိုးဆုံးနိုင်ငံ ဖြစ် 

မြန်မာနိုင်ငံသည် သတင်းသမားများအတွက် အန္တရာယ်အများဆုံး နိုင်ငံတစ်နိုင်ငံ ဖြစ်လာပြီး ထောင်ချထားသည့် သတင်းထောက် ၄၂ ဦး ရှိကြောင်း သတင်းသမားများ ကာကွယ်ပေးရေး ကော်မတီ CPJ အရ သိရသည်။ 

ထိုအတွက် မြန်မာနိုင်ငံသည် အီရန် (သတင်းထောက် ၆၂ ဦး ထောင်ချခံရ)နှင့် တရုတ် (၄၃ ဦး) တို့ပြီးလျှင် တတိယမြောက်နေရာတွင် ရှိနေသည်ဟု CPJ ၏ ၂၀၂၂ အတွင်း သတင်းမီဒီယာများအား တိုက်ခိုက်ခံရမှု နှစ်ပတ်လည် အစီရင်ခံစာတွင် ဖော်ပြသည်။ 

“မြန်မာနိုင်ငံမှာ စစ်တပ်က အာဏာသိမ်းပြီး ရွေးကောက်ခံအစိုးရကို ဖြုတ်ချပြီး သတင်းဖော်ပြတာတွေကို နှိမ်နင်းဖြိုခွင်းတဲ့ ၂၀၂၁ ကတော့ သတင်းသမားတွေကို ထောင်ချရာမှာ ကမ္ဘာ့ဒုတိယအဆိုးဆုံး ဖြစ်ခဲ့တာပါ”ဟု ယင်းအုပ်စုက ရေးသားသည်။ 

ထိုသို့ ဖမ်းဆီးထောင်ချခံရသူများတွင် ဆူပူအောင် သွေးထိုးလှုံ့ဆော်မှုဖြင့် ထောင်ဒဏ် သုံးနှစ် ချခံရသော ကိုစည်သူအောင်မြင့်ကဲ့သို့ အလွတ်တန်းသတင်းသမားများလည်း ပါဝင်သည်။ စစ်အာဏာသိမ်းအုပ်စုက “၂၀၂၁ ခုနှစ် ဒီမိုကရေစီကို အဆုံးသတ်လိုက်သည့် အာဏာသိမ်းပြီးနောက် လွတ်လပ်သည့် သတင်းတင်ဆက်မှုများကို ကျယ်ကျယ်ပြန့်ပြန့် နှိပ်ကွပ်လာကြောင်း” CPJ ၏ တာဝန်ခံတစ်ဦးက ပြောသည်။ 

အခြားသော ထောင်ချခံရသည့် သတင်းသမားများတွင် မဇ္ဈိမမှ မငြိမ်းငြိမ်းအေး၊ DVB မှ ကိုအောင်ဆန်းလင်း၊ Myanmar Pressphoto Agency မှ မသူဇာ၊ Ayeyarwaddy Times မှ ကိုမျိုးမင်းထွန်းနှင့် The Irrawaddy မှ ကိုသောင်းဝင်းတို့လည်း ပါဝင်သည်။ 

ပြီးခဲ့သည့်နှစ်က မြန်မာနိုင်ငံတွင် သတင်းထောက်နှစ်ဦး သတ်ဖြတ်ခံရကြောင်း သတင်းဖော်ပြချက်များကို ကိုးကားပြီး ယခု အစီရင်ခံစာတွင် ဖော်ပြသည်။ 

၂၀၂၂ ဇန်နဝါရီက ချင်းပြည်နယ် မတူပီတွင် Khonumthung Media Group မှ အယ်ဒီတာ Pu Tuidim ကို စစ်သားများက ဖမ်းဆီးခေါ်ဆောင်ပြီး ကွပ်မျက်ခဲ့သည်။ ဆန္ဒပြပွဲများကို ဓာတ်ပုံရိုက်ယူပြီး ဓာတ်ပုံအသင်းတစ်သင်း၏ ဥက္ကဋ္ဌဖြစ်သူ အလွတ်တန်းဓာတ်ပုံသတင်းထောက် ကိုအေးကျော်ကိုလည်း ဇူလိုင် ၃၀ ရက်၌ နေအိမ်တွင် ဖမ်းဆီးသွားခဲ့သည်။ နာရီအတန်ကြာ၌ မိသားစုများအား ကိုအေးကျော် သေဆုံးကြောင်းကို အကြောင်းလာခဲ့သည်။ 

သတင်းလွတ်လပ်ခွင့်သည် အာဏာသိမ်းမှုအတွက် ဦးစားပေး လေးစားစရာ မဟုတ်ပေ။ ၂၀၁၇ ခုနှစ်အတွင်းကလည်း ရခိုင်တွင် ရိုဟင်ဂျာ ၁၀ ဦးအား သတ်ဖြတ်မှုကို စုံစမ်းထောက်လှမ်းခြင်းအတွက် ရိုက်တာသတင်းထောက်နှစ်ဦးကို ဖမ်းဆီးခဲ့သည်။ ၎င်းတို့သည် ရက်ပေါင်း ၅၁၁ ရက် ထောင်ကျခဲ့သည်။ 

အာဏာသိမ်းမှုနောက်တွင် သတင်းမီဒီယာနှင့် လွတ်လပ်စွာ ထုတ်ဖော်ပြောဆိုခွင့်တို့ကို ပြင်းပြင်းထန်ထန် ဖြိုခွင်းခံရပြီး ဂျာနယ်လစ်အများအပြား ဖမ်းဆီးခံရကာ အမျိုးမျိုးသော ပြစ်မှုများဖြင့် တရားစွဲဆိုခံရသည်။ ၂၀၂၁ ဖေဖော်ဝါရီ၌ အာဏာသိမ်းယူခဲ့သော စစ်ကောင်စီသည် မီဒီယာများကို တင်းကြပ်စွာ ဆင်ဆာဖြတ်တောက်ပြီး အင်တာနက်ကိုလည်း တင်းကြပ်ခဲ့သည်။ 

ဖမ်းဆီးခံရသည့် သတင်းသမား အများစုကို ထောင်ဒဏ် ငါးနှစ် အများဆုံး ချမှတ်နိုင်သော မတရားအသင်း ဥပဒေဖြင့် တရားစွဲဆိုသည်။ အခြားသော သတင်းသမားများကို ကြီးလေးသည့် ပြစ်ဒဏ် ချမှတ်နိုင်သော အစိုးရလျှို့ဝှက်ဥပဒေနှင့် ဆက်သွယ်ရေးဥပဒေများဖြင့် ဖမ်းဆီးခြင်း ဖြစ်သည်။ 

မြန်မာနိုင်ငံက အခြေအနေများသည် နိုင်ငံတကာအတွက် စိုးရိမ်ပူပန်စရာ ဖြစ်လာပြီး သတင်းသမားများအား ပြန်လွှတ်ပေးရန် လူ့အခွင့်အရေးအဖွဲ့များနှင့် အစိုးရများက တောင်းဆိုကြသည်။ ထိုသို့ ဖမ်းဆီးမှုများကို ကုလသမဂ္ဂကလည်း ရှုတ်ချကာ ဖမ်းဆီးထိန်းသိမ်းထားသူအားလုံး ချက်ချင်းပြန်လွှတ်ရန် တောင်းဆိုသည်။ 

မြန်မာနိုင်ငံက သတင်းသမားများသည် စစ်တပ်နှင့် ယင်း၏ မဟာမိတ်များ လက်တွင် နှောင့်ယှက်တိုက်ခိုက်ခံရခြင်း၊ ခြိမ်းခြောက်ခံရခြင်းနှင့် အကြမ်းဖက်ခံရခြင်းများ ကြုံတွေ့နေရသည်။ သတင်းသမား တော်တော်များများ နိုင်ငံမှ ထွက်ပြေးကြရကာ သတင်းမီဒီယာအချို့ ပိတ်သိမ်းရသည်။ 

အန္တရာယ်ရှိသော အခြေအနေပင်ဖြစ်လင့်ကစား မြန်မာသတင်းသမား အများစုသည် ပြည်သူသို့ စစ်မှန်ပြီး အရေးပါသော သတင်းများ တင်ဆက်နိုင်ရန် အန္တရာယ်ကြီးသည့်ကြားမှ ဆက်လက်လုပ်ကိုင်နေကြသည်။ ထိုသို့သော သတင်းသမားများကို ကူညီထောက်ပံ့ရန်နှင့် မတရား ဖမ်းဆီးခံရသူများ ပြန်လွတ်ရေးအတွက် ဖိအားပေးရန် နိုင်ငံတကာ အသိုက်အဝန်းအား CPJ က တောင်းဆိုထားသည်။ mizzima

ထောင်ချခံ သတင်းသမားများမှာ-

အမည်သတင်းဌာန                    ဖမ်းဆီခံရသည့်နေ့
ကိုထွန်းသန်းအောင်              Mekong News                 မတ် ၂၊ ၂၀၂၂
ကိုမင်းမင်းအောင်                  အလွတ်တန်း                    မတ် ၁၆၊ ၂၀၂၁ 
ကိုသန်းစိုးအောင်                  အလွတ်တန်း                     မတ် ၇၊ ၂၀၂၂
ကိုတိုးအောင်                        Mekong News                  မတ် ၂၊ ၂၀၂၂
မငြိမ်းငြိမ်းအေး(မေဘယ်လ်)   မဇ္ဈိမ                                ဇန်နဝါရီ ၁၅၊ ၂၀၂၂
မထက်ထက်                           Thingangyun Post          စက်တင်ဘာ ၁၁၊ ၂၀၂၁
ကိုဇော်ရဲထက်(ကိုဇော်မင်းဦး) Dae Pyaw                        နိုဝင်ဘာ ၁၉၊ ၂၀၂၂
ကိုဇော်လင်းထွဋ်(ဖိုးသား)        အလွတ်တန်း                   ဒီဇင်ဘာ ၁၉၊ ၂၀၂၁
မထက်ထက်ခိုင်                      အလွတ်တန်း                    ဩဂုတ် ၁၅၊ ၂၀၂၁
ကိုသူရိန်ကျော်                        Media TOP 4                   ဖေဖော်ဝါရီ ၃၊ ၂၀၂၂
ကိုအောင်ဆန်းလင်း                 DVB                                ဒီဇင်ဘာ ၁၁၊ ၂၀၂၁
ကိုကောင်းဆက်လင်း               Myanmar  Pressphoto Agencyဒီဇင်ဘာ ၅၊ ၂၀၂၁
ကိုအောင်လွင်                          Dawei Watch                  ဧပြီ ၈၊ ၂၀၂၂
ကိုထွန်းလင်း                          မြန်မာ့အလင်း                   စက်တင်ဘာ ၂၂၊ ၂၀၂၁
ကိုဝေလင်း                             Thingangyun Post            စက်တင်ဘာ ၁၁၊ ၂၀၂၁
ကိုမောင်မောင်မျိုး                    Mekong News                  မေ ၁၀၊ ၂၀၂၂
ကိုစည်သူအောင်မြင့်                 အလွတ်တန်း                      ဩဂုတ် ၁၅၊ ၂၀၂၁
ကိုနေနော်                               Karen Information Center မတ် ၂၈၊ ၂၀၂၂
ကိုဒီမြတ်ငြိမ်း                              Zayar Times                       ဇွန်၂၆၊ ၂၀၂၁
ကိုဟန်သာညိမ်း                          Kamayut Media                   မတ် ၉၊ ၂၀၂၁
ကိုဝင်းနိုင်ဦး                               Channel Mandalay                ဩဂုတ် ၃၁၊ ၂၀၂၁
ကိုဝင်းဦး                                   NHP News                            နိုဝင်ဘာ ၁၉၊ ၂၀၂၂
Lway M Phoung                       Shwe Phee Myay News Agencyစက်တင်ဘာ ၂၆၊ ၂၀၂၁
ကိုပြည့်ဖြိုးအောင်                       Zayar Times                         အောက်တိုဘာ ၁၁၊ ၂၀၂၁
ကိုတင့်ဆွေ(မင်းဘူး)                   Magway Post                        မတ် ၂၆၊ ၂၀၂၁
ကိုမျိုးစန်းစိုး             Delta News Agency၊ Ayeyarwaddy Times ဩဂုတ် ၂၉၊ ၂၀၂၁
မယဉ်ယဉ်သိမ်း                       အလွတ်တန်း                                နိုဝင်ဘာ ၁၈၊ ၂၀၂၁
မသံလွင်သူ                             First Weekly News Journal         ဒီဇင်ဘာ ၂၁၊ ၂၀၂၁
မသူဇာ                                   Myanmar Pressphoto Agency     စက်တင်ဘာ ၁၊ ၂၀၂၁
မမှူးရတနာခက်မို့မို့ထွန်း           Myanmar Pressphoto Agency      ဒီဇင်ဘာ ၅၊ ၂၀၂၁
ခိုင်မြင့်သူ(ရွှေလင်းသစ်)            အလွတ်တန်း                                 အောက်တိုဘာ ၂၂၊ ၂၀၂၁
ကိုကျော်စွာထွန်း                      မဇ္ဈိမ                                             စက်တင်ဘာ ၈၊ ၂၀၂၂
ကိုမင်းထိုက်ထွန်း                     Regional News Agency                   ဒီဇင်ဘာ ၁၂၊ ၂၀၂၁
ကိုမျိုးမင်းထွန်း                 Ayeyarwaddy Times၊ Myitmakha News Group အောက်တိုဘာ ၂၂၊ ၂၀၂၁
ကိုစိုင်းကိုကိုထွန်း                        အလွတ်တန်း                                  နိုဝင်ဘာ ၃၀၊ ၂၀၂၁
ကိုစိုးဇေယျာထွန်း                        အလွတ်တန်း                                  မတ် ၁၀၊ ၂၀၂၂
ကိုဇော်ထွန်း                                 အလွတ်တန်း                                   ဒီဇင်ဘာ ၁၀၊ ၂၀၂၁
ဇာနည်ဝါ                                    Sky Net                                          မတ် ၁၆၊ ၂၀၂၂
ငြိမ်းချမ်းဝေ                                 အလွတ်တန်း                                    မေ ၁၅၊ ၂၀၂၁
ကိုသောင်းဝင်း                              The Irrawaddy                             စက်တင်ဘာ ၂၉၊ ၂၀၂၂
ကိုအောင်ဇော်ဇော်                         Mandalay Free Press                   ဇန်နဝါရီ ၁၆၊ ၂၀၂၂
ကိုဇော်ဇော်                                   အလွတ်တန်း                                ဧပြီ ၁၀၊ ၂၀၂၂

တနင်္သာရီမြို့နယ်တွင် တိုက်ပွဲပြင်းထန်နေပြီး ဒေသခံ ၃,၀၀၀ ကျော် တိမ်းရှောင်နေရ

တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်ထဲက တနင်္သာရီမြို့နားမှာ စစ်ကောင်စီတပ်တွေနဲ့ ဒေသခံ ပြည်သူ့ကာကွယ်ရေးပူးပေါင်းတပ်ဖွဲ့တွေ ဇန်နဝါရီ ၂၃ ရက်ကနေ ၂၅ ရက်အထိ တိုက်ပွဲဖြစ်ပွားရာ လူပေါင်း ၃,၀၀၀ ကျော် ထွက်ပြေးတိမ်းရှောင်နေရပြီး စားနပ်ရိက္ခာ၊ ဆေးဝါးနဲ့ နေရာထိုင်ခင်းတွေ အရေးပေါ် လိုအပ်နေတယ်လို့ ဒေသခံတွေက ပြောပါတယ်။

လက်ရှိ စစ်ရှောင်ပြည်သူတွေက မရင်းကြီး၊ ဘန်းလမွတ်၊ ရမ်းဖို၊ ညောင်ပင်ကုန်း၊ ဗောဓိကမ်း၊ ဥယျာဉ်ကမ်း၊ တနင်္သာရီမြို့အောက်ကင်း၊ မော်တုန်း၊ ပနပ်ငယ်၊ ကမ်းတို၊ ထုံနွယ်နဲ့ စတိန်သောင် စတဲ့ရွာသားတွေဖြစ်ပြီး နီးစပ်ရာ တောတောင်တွေထဲ ထွက်ပြေးတိမ်းရှောင်နေရကာ  စားနပ် ရိက္ခာ၊ ဆေးဝါးနဲ့ နေရာထိုင်ခင်းတွေ အရေးပေါ် လိုအပ်နေတာလို့ ထွက်ပြေးတိမ်းရှောင်နေတဲ့ ဒေသခံတဦးက ပြောပါတယ်။

စစ်ကောင်စီဘက်က စစ်ရှောင်ပြည်သူတွေ စစ်ရှောင်နေတဲ့ ဥယျာဉ်တွေ အပါအဝင် ကျေးရွာတွေဘက်ကို လက်နက်ကြီးတွေနဲ့ ပစ်ခတ်နေလို့ ပြည်သူတွေရဲ့နေအိမ် ၂ လုံး မီးလောင်ပြီး အသက် ၈၈ နှစ်ကျော် အဘွားအိုတဦးနဲ့ အသက် ၉ နှစ်အရွယ် ကလေးတဦး သေဆုံးခဲ့တယ်လို့ ဆိုပါတယ်။

တနင်္သာရီမြို့နယ်အတွင်း ဇန်နဝါရီ ၂၃ ရက်ကနေ ၂၅ ရက်နေ့အထိ ပြည်သူ့ကာကွယ်ရေး ပူးပေါင်းတပ်တွေက စစ်ကောင်စီရဲ့ အမြောက်တပ် ၃၀၆ တပ်ရင်း၊ တနင်္သာရီတံတား စစ်ဆေးရေးဂိတ်၊ တနင်္သာရီ စရဖရုံး၊ လဝကဦစီးအရာရှိနေအဆောင်၊ ဗောဓိကမ်းတံတား နေရာတွေကို ဝင်ရောက်တိုက်ခိုက်တာအပြင် ဒရုန်းနဲ့ ဗုံးကြဲတိုက်ခိုက်ခဲ့ပါတယ်။

အခုတိုက်ပွဲမှာ စစ်ကောင်စီဘက်က ထိခိုက်သေဆုံးမှု များပြားတယ်လို့ မြေပြင်မှာ ရောက်ရှိနေတဲ့ ပူးပေါင်းတပ်ဖွဲ့က ရဲဘော်တယောက်က ပြေ ာပေမဲ့ စစ်ကောင်စီဘက်က ထိခိုက်သေဆုံးမှုကိုတော့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။DVB

ဘီးလင်းမြို့နယ်၊ ရွှေရောင်ပြကျေးရွာနှင့် ခ လောက်အင်းကျေးရွာကို စစ်တပ်က လက် နက်ကြီးများဖြင့် ပစ်ခတ်

မွန်ပြည်နယ်၊ ဘီးလင်းမြို့နယ်၊ ရွှေရောင်ပြကျေးရွာနှင့် ခလောက်အင်း ကျေးရွာ ကို စစ်တပ်က လက်နက်ကြီးများဖြင့် ပစ်ခတ်ကြောင်း ဒေသပြည်သူများထံမှ သိရှိရသည်။

ဇန်နဝါရီလ ၂၄ ရက်နေ့ ညပိုင်းတွင် စစ်တပ်က ရွှေရောင်ပြကျေးရွာနှင့် ခ လောက် အင်းကျေးရွာကို လက်နက်ကြီးများဖြင့် ပစ်ခတ်ခဲ့ပြီး ခ လောက်အင်း ကျေးရွာ အနီးတွင် ၁၂၀ မမ ၃ လုံး၊ ရွှေရောင်ပြကျေးရွာအနီးတွင် ၆၀ မမ ၂ လုံး ကျ ရောက်ခဲ့ကြောင်း သိရှိရသည်။

“ရွှေရောင်ပြမုဒ်ဦး အနား ကျောက်ခွဲစက်အနားမှာ ကားနဲ့လာပစ်သွားတာ။ ဘယ် တပ်ရင်းပစ်လဲ အတိအကျ မသိရသေးဘူး။ ရွာသားများစ်ုက်ပျိုးထားသော ရာဘာပင် နဲ့အခြားအပင်တွေပျက်စီးတာ ရှိပါတယ်။ ရွာထဲထိလက်နက်ကြီးစ များ လာရောက်ခဲ့ပေမယ့်လူသေဆုံးထိလိုက်မှုတော့မရှိခဲ့ပါဘူး” ဟု ဒေသ သတင်း ရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။

အကြမ်းဖက်စစ်ကောင်စီတပ်က မွန်ပြည်နယ်နှင့် ကရင်ပြည်နယ်၊ ပြည်သူပိုင် ကျေးရွာများကို လက်နက်ကြီးဖြင့် ပစ်ခတ်ခြင်း၊ ကျေးရွာများကို မီးရှို့ခြင်းများ အရှိန်မြှင့်လုပ်ဆောင်လာသဖြင့် ဒေသပြည်သူများစွာ ထွက်ပြေး တိမ်းရှောင် နေရကြောင်း သိရှိရသည်။khit thit

ရေဖြူမြို့ ကံပေါက်တွင် အုပ်ကြီး ပစ်သတ်ခံရပြီး ဒေသခံ ၁၀ ယောက် နီးပါး စစ်ကောင်စီတပ်က ဖမ်းဆီးထား

တနင်္သာရီတိုင်း၊ ထားဝယ်ခရိုင် ရေဖြူမြို့နယ် ကံပေါက်ဒေသတွင် ယမန်နေ့ ဇန်နဝါရီလ ၂၅ ရက်နေ့က ကျေးရွာအုပ်ချုပ်ရေးမှူး ပစ်သတ်ခံရပြီး အမျိုးသမီးများအပါဝင် ဒေသခံ ၁၀ယောက် နီးပါးကို စစ်ကောင်စီတပ်က အင်အားသုံးဖမ်းဆီးမှု ပြုလုပ်ခဲ့ကြောင်း ဖမ်းဆီးခံ မိသားစုဝင်များထံမှ သိရသည်။

ရေဖြူမြို့ ကံပေါက်ကျေးရွာ အုပ်ချုပ်ရေးမှူး ဦးခင်စိုးနှင့် တပည့်ဖြစ်သူ ဦးလှဌေးတို့ နှစ်ဦးသည် သေနတ်နှင့် ပစ်ခံခဲ့ရပြီးနောက် ယခုလို ဒေသ ခံများ ဖမ်းဆီးခံနေရခြင်းဖြစ်သည်ဟု ဒေသခံများထံမှ သိရသည်။

“ဖမ်းခံရတဲ့လူအားလုံးက ရွာထဲက သာမာန် ပြည်သူတွေ ဖြစ်တယ်၊ မနေ့က ပစ်ခံရတဲ့ အုပ်ကြီးနဲ့ အမျိုးတော်တဲ့ သူတွေလည်း ဖမ်းခံရတယ် ကြားတယ်၊ စစ်စရာရှိလို့ ဆိုပြီး စစ်တပ်က ခေါ်သွားတာပါ၊ အခုထိတော့ ပြန်မလွတ်သေးဘူး”ဟု ပြောသည်။

လက်ရှိတွင် ဖမ်းဆီးခံရသူများထဲတွင် ကံပေါက် မဂ္ဂင်ရပ်ကွက်တွင် နေထိုင်သူ ကိုမင်း၊ ကိုအာကာမာန်နှင့် လှည်းကုန်းရွာတွင် ဦးဆန်းဦး၊ ဒေါ်မာရီ၊ မချိုလတ်၊ မနီ၊ ဒေါ်ပု၊ ဦးထွန်းရှိန် အပါဝင် ၁၀ ဦးခန့် ညပိုင်း၌ နေအိမ်များတွင် မောရ၀တီ ရေတပ်စခန်းမှ စစ်ကောင်စီတပ်သားများ အင် အားအလုံး အရင်းဖြင့် ဝင်ရောက် ဖမ်းဆီးခဲ့ခြင်း ဖြစ်သည်။

ရေဖြူမြို့နယ် အတွင်း ယမန်နေ့က စစ်တပ်ပိုင် မြ၀တီသတင်းထောက်နှင့် အုပ်ကြီးအပါဝင် အမျိုးသား သုံးဦးကို ပြည်သူ့ကာကွယ်ရေး အဖွဲ့က ပစ်ခတ်ရှင်းလင်းခဲ့သည်။mizzima

ရေစကြိုတွင် စိတ်ရောဂါဝေဒနာရှင် ၁ ဦးကို စစ်ကောင်စီတပ် ဖမ်းဆီး

မကွေးတိုင်း၊ ရေစကြိုမြို့မှာ ဇန်နဝါရီ ၂၅ ရက် မနက်ပိုင်းက စိတ်ရောဂါဝေဒနာရှင် တယောက်ကို စစ်အုပ်စုက ဖမ်းဆီးသွားတယ်လို့ ဒေသခံတွေဆီကနေ သိရပါတယ်။

ရေစကြိုမြို့ အမှတ် ၆ ရပ်ကွက်က စိတ်ရောဂါဝေဒနာရှင် ကိုမင်းမင်းထိုက်ကို  ဇန်နဝါ ၂၅ ရက် မနက် ၁၀ နာရီလောက်မှာ မိုင်းထောင်ဖောက်ခွဲဖို့ လုပ်တယ်လို့ စစ်တပ်က စွပ်စွဲပြီး ရိုက်နှက် ဖမ်းဆီးသွားကြတယ်လို့ ရေစကြိုမြို့ ဒေသခံတယောက်က ဒီဗွီဘီကို ပြောပါတယ်။

“သူက စိတ်ဖောက်ပြန်နေတဲ့သူပါဗျ။ မိုင်းထောင်ဖောက်ခွဲဖို့ လုပ်တယ်ဆိုတာ ဘယ်နည်းနဲ့မှ မဖြစ်နိုင်ပါဘူး။ စစ်(…)တွေက ရိုက်နှက်ဖမ်းဆီးတာကြောင့် မျက်နှာတွေ၊ ဒူးခေါင်းတွေနဲ့ လက်တွေမှာ ဒဏ်ရာရရှိခဲ့ပြီး သူ့ကိုတော့ ဘယ်နေရာကို ခေါ်သွားတယ်ဆိုတာကို မသိရသေးဘူး။”

စစ်ကောင်စီတပ်ဖွဲ့ဝင်တွေနဲ့ အပေါင်းပါတွေဟာ ရေစကြိုမြို့နယ်ထဲက ပြည်သူတွေကို အကြောင်းအမျိုးမျိုးပြပြီး မတရားဖမ်းဆီးကာ ငွေညှစ်တာတွေ ပြုလုပ်သလို တရားစွဲ ထောင်ချတာတွေလည်း ပြုလုပ်နေတယ်လို့ ပြောပါတယ်။

ရေစကြိုမြို့နယ်မှာ ဇန်နဝါရီ ၂၀ ရက် မွန်းလွဲပိုင်းကလည်း ဒေသခံပြည်သူတယောက်ကို စစ်အုပ်စုတွေက ဖမ်းဆီးသွားတယ်လို့ ဒေသခံတွေဆီကနေ သိရပါတယ်။

စစ်ကောင်စီက နိုင်ငံတော်အာဏာကို မတရားသိမ်းပိုက်တဲ့ ၂၀၂၁ ခုနှစ် ဖေဖော်ဝါရီ ၁ ရက်ကနေ အခုနှစ် ဇန်နဝါရီ ၂၅ ရက်အထိ နိုင်ငံတဝန်း မတရားဖမ်းဆီးချုပ်နှောင်ခံထားရသူ ၁၃,၆၅၈ ယောက်ရှိပြီး အဲဒီထဲက ၂,၁၇၀ ယောက်ဟာ ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း (AAPP) က ဇန်နဝါရီ ၂၅ ရက်နေ့မှာ ထုတ်ပြန်ထားပါတယ်။DVB

ပေါက်မြို့နယ်ရှိ ကျေးရွာ ၅ ခုကို စစ်တပ်က ၂ ရက်ဆက် မီးရှို့ဖျက်ဆီးမှု နေအိမ် ၇၇ လုံးပြာကျ

မကွေးတိုင်း၊ ပေါက်မြို့နယ်ရှိ ကျေးရွာ ၅ ခုကို အကြမ်းဖက် စစ်တပ်က ၂ ရက်ဆက် မီးရှို့မှု နေအိမ် ၇၇ လုံးပြာကျခဲ့ကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

ဇန်နဝါရီလ ၂၄ ရက်နှင့် ၂၅ ရက်နေ့တွင် အကြမ်းဖက် စစ်တပ်က ပေါက်မြို့နယ်အတွင်းရှိ သီးခြောက်ရွာ၊ ပြစ်ထဲရွာ၊ စမ်းရေခုံရွာ၊ ပန်းတော်ကန်ရွာနှင့် ဇင်ရွှေးခုံရွာတို့ကို မီးရှို့ဖျက်ဆီးခဲ့ကြောင်း သိရသည်။

အကြမ်းဖက် စစ်တပ်က ပြစ်ထဲရွာမှ ပြည်သူပိုင် နေအိမ် ၁၄ လုံး၊ စမ်းရေခုံရွာမှ ပြည်သူပိုင် နေအိမ် ၉ လုံး၊ သီးခြောက်ရွာမှ ပြည်သူပိုင် နေ အိမ် ၉ လုံး၊ ပန်းတော်ကန်ရွာမှ ပြည်သူပိုင် နေအိမ် ၂၆ လုံးနှင့် ဇင်ရွေးခုံရွာမှ ပြည်သူပိုင် နေအိမ် ၁၉ လုံးတို့ကို မီးရှို့ဖျက်ဆီးခဲ့ခြင်း ဖြစ်ကြောင်း သိရသည်။

“ပေါက်မြို့နယ် တောင်ပိုင်းကို စစ်ခွေးတွေ၊ ရဲခွေးတွေနဲ့ တပ်ကုန်းရွာသစ်က ပျူခွေးများက ရွာ ၅ ရွာက နေအိမ် ၇၇ လုံးကို မီးရှို့ ဖျက်ဆီးသွားတယ်။ ပြည်သူတွေလဲ တအား ဒုက္ခရောက်နေပါပြီ ပြည်သူ ၅၀၀၀ ကျော် ဘေးလွတ်ရာကို ပြေးနေရတယ်။ သက်ကြီးရွယ်အို ကလေးအမေ ကလေးတွေလဲ တောတောင်ထဲမှာပဲ နေနေရပါတယ်။ စစ်ခွေးတွေကတော့ ပြန်ဆုတ်ပြီ ပေါက်မြို့ကို ဆုတ်ပြီ တစ်ဖွဲ့ကတော့ တပ်ကုန်းပျူရွာမှာ ကျန်နေသေးတယ် တပ်ကုန်းပျူရွာမှာ စစ်ခွေး အထိုင်စခန်းရှိတယ်” ဟု ဒေသခံ ပြည်သူ တစ်ဦးကပြောဆိုသည်။khit thit

ကော့သောင်းမြို့ ရပ်ကွက်အုပ်ချုပ်ရေးမှူးနဲ့ ဇနီး သေနတ်နဲ့ ပစ်ခံရ

တနင်္သာရီတိုင်း၊ ကော့သောင်းမြို့တွင် ယမန်နေ့ ဇန်နဝါရီလ ၂၅ ရက်နေ့ ညပိုင်းက အပြင်မှပြန်လာသည့် စစ်ကောင်စီခန့် အုပ်ချုပ်ရေးမှူးနှင့် ဇနီးတို့ နှစ်ဦး သေနတ်ဖြင့် ပစ်ခတ်ခံခဲ့ရကြောင်း ယင်းမြို့နေ ဒေသခံများထံမှ သိရသည်။

ပစ်ခတ်ခံရသည့် စစ်ကောင်စီခန့် အုပ်ချုပ်ရေးမှူး ဦးယုလွင်သည် ကော့သောင်းမြို့နယ်ရှိ အေးရိပ်ငြိမ်းရပ်ကွက် အုပ်ချုပ်ရေးမှူးဖြစ်ပြီး ၎င်းကို ဇန်နဝါရီလ ၂၅ ရက်နေ့ ည ၉ နာရီဝန်းကျင်အချိန်တွင် ဘုရားမှ အပြန် နေအိမ်အနီး၌ မြို့ပြပြောက်ကျားအဖွဲ့မှ ပစ်ခတ်ခဲ့သည်ဟု ပြည်သူ့ ကာကွယ်ရေး တပ်ဖွဲ့ဝင်များထံမှ သိရသည်။

ကော့သောင်းမြို့ခံ တစ်ဦးက “ဦးယုလွင်က ကော့သောင်းမှာ စစ်တပ်က ဦးဆောင်ကျင်းပမယ့် ရွေးကောက်ပွဲအတွက် ထဲထဲဝင်ဝင် လုပ်ပေးနေတဲ့ သူဖြစ်တယ်၊ နောက်ပြီး ကော့သောင်းမြို့ရဲ့ စစ်တပ်ဗျူဟာမှူးနဲ့လည်း တိုက်ရိုက် ချိတ်ဆက်ရှိတဲ့ သူတစ်ဦးလည်း ဖြစ်တယ်”ဟု ပြောသည်။

လက်ရှိတွင် သေနတ်ဖြင့် ပစ်ခတ်ခံရသည့် အုပ်ကြီးနှင့် ဇနီးတို့ နှစ်ဦးကို ညတွင်းချင်း စစ်ဆေးရုံသို့ ပို့ဆောင်ခဲ့ပြီး ဆေးကုသမှု ခံယူနေရကာ အသက်သေဆုံးမှု မရှိကြောင်း ဒေသခံအချို့က ပြောသော်လည်း အမျိုးသမီးဖြစ်သူ သေနတ်ဒဏ်ရာ သုံးချက်ထိ၍ သေဆုံးသွားပြီဟု သတင်းများ ထွက်ပေါ်နေ၍ မဇ္ဈိမက အတည်ပြုနိုင်ရန်အတွက် ကြိုးနေဆဲ ဖြစ်သည်။

အခင်း ဖြစ်ပွားသည့် ညပိုင်းတွင်လည်း ကော့သောင်းမြို့ ဗျူဟာမှူးအပါဝင် စစ်ကောင်စီတပ်သားများနှင့် ရဲတပ်ဖွဲ့ဝင်များ လာရောက်စစ်ဆေးခဲ့ကြောင်းသိရသည်။

ထို့အပြင် ယနေ့ ဇန်နဝါရီလ ၂၆ ရက်နေ့တွင်လည်း ကော့သောင်းမြို့နယ် အတွင်း ရှာဖွေစစ်ဆေးမှုများလည်း ပြုလုပ်နေကြောင်း ဒေသခံများထံမှ သိရသည်။mizzima

ခေါတောရွာကို မီးရှို့နေသည့်စစ်တပ် ဒရုန်းဖြင့် တိုက်ခိုက်ခံရပြီး ၄ ဦး သေဟုဆို

စစ်ကိုင်းတိုင်း၊ ဝက်လက်မြို့နယ်ရှိ ခေါတောကျေးရွာအတွင်း စစ်ကြောင်းထိုးလာပြီး မီးရှို့နေသည့် စစ်တပ် ဒရုန်းဖြင့် တိုက်ခိုက်ခံရပြီး ၄ ဦး သေဆုံးခဲ့သည်ဟု Ngwe Dwin Revoluation Force NDRF မှ တာဝန်ရှိသူတစ်ဦးက ပြောသည်။

စစ်ကောင်စီတပ်များသည် ဇန်နဝါရီ ၂၅ ရက်နေ့ နံနက်ပိုင်းတွင် ဝက်လက်မြို့ နယ်၊ မူးကြီးရွာကို လုယက်မီးရှို့ခဲ့သည်။ ထို့နောက် နေ့လယ်ပိုင်းတွင် ခေါတောကျေးရွာကို ဆက်လက် ဝင်ရောက်လာစဉ် တိုက်ခိုက်ခံရခြင်းဖြစ်သည်။

“ ဗုံးသီး ခြောက်လုံးချတယ်။ တောထဲတစ်နေရာမှာ နားနေတဲ့အချိန်ချခဲ့တာ။ ၂၆ ရက်နေ့ မနက် ရွာသားတွေ တွေ့တာ။ သူတို့ နားခဲ့တဲ့တဲထဲမှာ အလောင်း လေးလောင်း တွေ့တယ်လို့ ရွာခံတွေက ပြောတယ်” ဟု Ngwe Dwin Revoluation Force NDRF တာဝန်ရှိသူက ပြောသည်။

စစ်အင်အား ၆၀ နီးပါးရှိသည့် စစ်ကောင်စီစစ်ကြောင်းသည် ဝက်လက်မြို့နယ် အနောက်ခြမ်းရှိ ကျေးရွာများသို့ စစ်ကြောင်းထိုးနေခြင်းဟုသိရသည်။

စစ်ကြောင်းထိုးရာ ရွာများတွင် ပြည်သူပိုင် ပစ္စည်းများကို လုယူခြင်း၊ နေအိမ်များကို မီးရှို့ဖျက်စီးခြင်းများ လုပ်ဆောင်နေသည်မှာ ၃ ရက်ခန့် ကြာမြင့်နေပြီဟု NDRF အဖွဲ့ တာဝန်ရှိသူကဆိုသည်။

လက်ရှိတွင် အဆိုပါစစ်ကောင်စီစစ်ကြောင်းသည် ခေါတောရွာမှ ထိန်ပင်ရွာဘက် သို့ ဦးတည်ထွက်ခွာသွားခဲ့ပြီး ယနေ့ ဇန်နဝါရီလ ၂၆ ရက်တွင် ထိန်ပင်ရွာကို မီးရှို့ ဖျက်စီးနေကြောင်း Wetlet Information Network မှလည်း ဖော်ပြထားသည်။mizzima

« Older Entries