တာတိုင်ကျေးရွာကို မီးရှို့ပြီးပြန်လာသည့် စစ်ကောင်စီတပ် တိုက်ခိုက်ခံရ ၃ ဦးသေဆုံးဟုဆို
စစ်ကိုင်းတိုင်း၊ စစ်ကိုင်းမြို့နယ် ၊ တာတိုင်ကျေးရွာကို မီးရှို့ပြီးပြန်လာသာ စစ်ကောင်စီတပ်အား ပြည်သူ့ကာကွယ်ရေးတပ်များက ပူးပေါင်းတိုက်ခိုက်ရာ စစ်ကောင်စီတပ်သား သုံးဦးသေဆုံးကြောင်း မန္တလေးယက္ခညီနောင် ပြည်သူ့ကာကွယ်ရေးတပ်ဖွဲ့ထံက သိရသည်။
အင်အား ၄၀ ဝန်းကျင်ခန့်ပါသော စစ်ကောင်စီတပ်သည် ညောင်ပင်ဝန်းရဲစခန်းမှအနီးနားရှိ ကျေးရွာများအား စစ်ကြောင်းထိုးပြီး တာတိုင်ကျေးရွာမှ ပြည်သူ့နေအိမ်များကို မီးရှို့ပြီး အပြန်လမ်းကြောင်း၌ ပြည်သူ့ကာကွယ်ရေးတပ်များက ၈၀မမ လက်နက်ကြီးဖြင့် ယမန်နေ့ ဖေဖော်ဝါရီလ ၂ ရက်နေ့က ကြားဖြတ်တိုက်ခိုက်ခဲ့ခြင်း ဖြစ်သည်။
တိုက်ခိုက်မှုအပြီးတွင် စစ်ကောင်စီတပ်မှ သုံးဦးသေဆုံးကြောင်း မန္တလေးယက္ခညီနောင် ပြည်သူ့ကာကွယ်ရေးတပ်ဖွဲ့က ဆိုသည်။
”ညောင်ပင်ဝန်းရဲစခန်းပေါက်ကနေ စစ်ကောင်စီတပ်သား အလောင်း နှစ်လောင်း ဆွဲသွင်းသွားတာရှိတယ်။ တစ်ယောက်ကတော့ စခန်းထဲ လက်နက်ကြီးထိပြီးသေသွားတယ်လို့ ဒေသခံမျက်မြင်တွေဆီက သိရပါတယ်။”ဟု ယက္ခညီနောင် PDF-Mandalay အဖွဲ့ ပြန်ကြားရေးတာဝန်ခံ ကိုညဏ်လင်းက မဇ္ဈိမကိုပြောသည်။
တိုက်ခိုက်မှုကို မန္တလေးယက္ခညီနောင် ပြည်သူ့ကာကွယ်ရေးတပ်ဖွဲ့နှင့် အတူ People Revolution Force Kyaukse (P.R.F.K)၊ အမရစစ်သည်တော်၊ MAHAR ပြည်သူ့ကာကွယ်ရေးတပ်ဖွဲ့ ၊ Dragon Brother Defense Force
ဒေသခံ ပြည်သူ့ကာကွယ်ရေးတပ်ဖွဲ့တို့ ပူးပေါင်းဆောင်ရွက်ခဲ့ကြောင်း သိရသည်။
စစ်ကောင်စီတပ်မှ မီးရှို့မှုကြောင့် တာတိုင်ကျေးရွာမှ လူနေအိမ် ၂၈ လုံးမီးလောင်ပြာကျခဲ့ကြောင်း ယက္ခညီနောင် PDF-Mandalay အဖွဲ့ ပြန်ကြားရေးတာဝန်ခံ ကိုညဏ်လင်းက ဆိုသည်။
တာတိုင်ရွာမှာ အိမ်ခြေ ၁၀၀ ကျော်သာ ရှိသော ကျေးရွာဖြစ်ပြီး ယမန်နေ့ နေ့လယ်ပိုင်းက စစ်ကောင်စီတပ် ဝင်ရောက်စီးနင်း မီးရှို့မှုကြောင့် ဒေသခံများ အနီးအနားရှိကျေးရွာများသို့ ရှောင်တိမ်းနေရကြောင်းသိရသည်။
ထို့အပြင် ယမန်နေ့ နံနက်ပိုင်းတွင် စစ်ကိုင်းမြို့နယ်၊ ညောင်ပင်ဝန်းတိုက်နယ်၊ တံတားဦးရွာကို စစ်ကောင်စီတပ်မှ စီးနင်းဝင်မွှေပြီး ၎င်းတို့၏ ရမ်းသန်း ပစ်ခတ်မှုကြာင့် စာသင်ပြီးပြန်လာသော မူလတန်းကျောင်းသူ ကလေးငယ်တစ်ဦး ခါးကျည်ထိမှန်ပြီး ဆုံးပါးသွားခဲ့ကြောင်း သိရသည်။
ပြီးခဲ့သည့် ဇန်နဝါရီလအတွင်းကလည်း စစ်ကိုင်းမြို့နယ်၊ မြင်းဆည်ရွာနှင့် သုံးလင့်ရွာများကို စစ်ကောင်စီတပ်မှ မီးရှို့ဖျက်ဆီးခဲ့ကြောင်း ယက္ခညီနောင် PDF-Mandalay အဖွဲ့ ပြန်ကြားရေးတာဝန်ခံထံမှ သိရသည်။mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 