စစ်လက်နက်ပွဲစား ဦးထွန်းမင်းလတ်၏ အမှုများတွင် တိုက်ရိုက်ပတ်သက်နေသူ ထိုင်းနိုင်ငံ၏ အကြီးဆုံး အွန်လိုင်းထီလုပ်ငန်းပိုင်ရှင်၏ ပိုင်ဆိုင်မှုများ လွန်ခဲ့သည့် နှစ်ပတ်က ချိပ်ပိတ်ခံရပြီး လက်ရှိတွင် အွန်လိုင်းထီလုပ်ငန်းလည်း အပိတ်ခံထားရကာ အမှုပေါင်း ၉၀ ကျော်ဖြင့် တရားရင်ဆိုင်နေရကြောင်း သိရသည်။
နော့ထ်ဟု ခေါ်သည့် အဆိုပါလုပ်ငန်းပိုင်ရှင်သည် ဦးထွန်းမင်းလတ်၏ မူးယစ်ဆေးဝါးမှု၊ ငွေကြေးခဝါချမှု၊ နယ်စပ်ဖြတ်ကျော်ရာဇဝတ်မှုများတွင် တိုက်ရိုက်ပတ်သက်သူများထဲက တစ်ဦးဖြစ်ကြောင်း ထိုင်းရေးရာကျွမ်းကျင်သူ စတီဗင်စန်းယုက ယနေ့ ရေးသားထားသည်။
“သူက ထိုင်းနိုင်ငံရဲ့ “လိုတလီ” လို့ခေါ်တဲ့ အကြီးဆုံး အွန်လိုင်းထီ လုပ်ငန်းပိုင်ရှင်။ လွန်ခဲ့တဲ့ ၂ ပတ်တုန်းကဘဲ သူ့ရဲ့ပိုင်ဆိုင်မှုအားလုံးကို သိမ်း ဆည်းချိတ်ပိတ်ခံခဲ့ရပြီး၊ ယခု သူ့ရဲ့ အွန်လိုင်းထီလုပ်ငန်းကိုလည်း လုပ်ကိုင်ခွင့်ပိတ်ပင်ထားကာ အမှုပေါင်း ၉၀ ကျော်နဲ့တရားစွဲခံထားရပြီး အမှုရင်ဆိုင်နေရသူ”ဟု ရေးသားဖော်ပြထားသည်။
မြန်မာအာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နှင့်စီးပွါးရေးအရပါပတ်သက်သူ ဦးထွန်းမင်းလတ်၏အမှုတွင် နောက်ထပ်တိုက်ရိုက်ပတ်သက်သူနှစ်ဦးမှာ ဖမ်းဆီးချိန်က မြန်မာနိုင်ငံဘက်ထွက်ပြေးသွားပြီး လက်ရှိ လန်ဒန်တွင် ရောက်ရှိနေကြောင်း သိရသည်။
ထွက်ပြေးသွားသူတစ်ဦးမှာ အွန်လိုင်းထီလုပ်ငန်းလုပ်ကိုင်နေသည့် နော့ထ်ဆိုသူနှင့် သူငယ်ချင်းများဖြစ်ကြောင်း စတီဗင်စန်းယုက ရေးသားထားသည်။
၎င်းတို့နှစ်ဦးအကြား ငွေကြေးခဝါချမှုနှင့် ပတ်သက်သည့် ငွေလွှဲပြောင်းမှုအထောက်အထားများကိုလည်း တွေ့ရှိခဲ့ကြောင်း သိရသည်။
“ခဝါချပေးဖို့ အက်ဒီး(ထွက်ပြေးသွားသူ)ထံ ဥပကစ်အပ်ထားတဲ့ငွေတွေကို အွန်လိုင်းထီလုပ်ငန်းလုပ်ကိုင်နေတဲ့ နော့ထ်ထံလွှဲပြောင်းမှုရှိကြောင်း အထောက်အထားပါ ရရှိထားပါတယ်”ဟု စတီဗင်စန်းယုက ဇန်နဝါရီလ ၂၉ရက်နေ့က ရေးသားခဲ့သည်။
စစ်လက်နက်ပွဲစား ဦးထွန်းမင်းလတ်ကို ပြီးခဲ့သည့် စက်တင်ဘာလ ၁၇ ရက်နေ့က ထိုင်းရဲတပ်ဖွဲ့က ဘန်ကောက်မြို့တွင် ဖမ်းဆီးခဲ့ခြင်းဖြစ် သည်။ ထို့နောက် မူးယစ်ဆေးဝါးရောင်းဝယ်မှု၊ ငွေကြေးခဝါချမှုနှင့် နိုင်ငံဖြတ်ကျော် ရာဇဝတ်မှုများဖြင့် ပြီးခဲ့သည့် ဒီဇင်ဘာ ၁၃ ရက်နေ့က စွဲချက်အတင်ခံခဲ့ရကြောင်း Justice for Myanmarက ထုတ်ပြန်ခဲ့သည်။
ထိုင်းအထက်လွှတ်တော်အမတ် ဥပကစ် ပန်ချာရီယန်ကန် ၏ သားမက်နှင့် အတွင်းရေးမှူးအပါအဝင် လေးဦးတို့မှာလည်း ဦးထွန်းမင်းလတ်နှင့်အတူ စွဲချက်အတင်ခံခဲ့ရပြီး အမှုများရင်ဆိုင်နေရသည်။ ယခင်က ဖမ်းဆီးရမိထားသည့် ဦးထွန်းမင်းလတ်၏ အခြားအပေါင်းအပါခြောက်ဦးကိုမူ ပြီးခဲ့သည့် ဇန်နဝါရီလ ၂၃ ရက်နေ့က ထိုင်းတရားရုံးက သေဒဏ်ချမှတ်ခဲ့သည်။
ဦးထွန်းမင်းလတ်သည် စစ်ကောင်စီခေါင်းဆောင် မင်းအောင်လှိုင်၏ မိသားစုနှင့်လည်းဆက်စပ်နေပြီး ၎င်းထံမှ စစ်အုပ်စုခေါင်းဆောင် ဗိုလ် ချုပ်မှူးကြီးမင်းအောင်လှိုင်၏ သားဖြစ်သူ ဦးအောင်ပြည့်စုံပိုင်ဆိုင်သည့် တန်ဖိုးကြီးကွန်ဒိုအခန်းတစ်ခန်းပိုင်ဆိုင်မှုအထောက်အထားနှင့် သမီးဖြစ်သူ ဒေါ်ခင်သီရိသက်မွန်ဘဏ်စာအုပ်နှစ်အုပ်ကို ထိုင်းရဲများသိမ်းဆည်းရမိခဲ့ကြောင်းJustice For Myanmar က ဇန်နဝါရီလ ၁၁ ရက်နေ့က ထုတ်ပြန်ခဲ့သည်။
ဦးထွန်းမင်းလတ်၏ လုပ်ဖော်ကိုင်ဖက် ထိုင်းအထက်လွှတ်တော်အမတ်ကိုမူ ပြီးခဲ့သည့်အောက်တိုဘာလက မူးယစ်ဆေးဝါးနှင့် ငွေကြေးခဝါချမှု စွဲချက်ဖြင့် ဖမ်းဆီးရန် ဝရမ်းထုတ်ခဲ့ပြီး နာရီပိုင်းအတွင်း ပြန်ရုပ်သိမ်းခဲ့ကြောင်း Justice for Myanmarက ထုတ်ပြန်ခဲ့သည်။mizzima
Like this:
Like Loading...
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 