SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မကွေးတိုင်း၊ သရက်မြို့နယ်အတွင်းတိုက်ပွဲတွင် အရာရှိများသေဆုံးသည့်အပြင် ဒဏ်ရာရရှိသူများတွင်လည်း ထပ်မံသေဆုံးသူများရှိသည့်အတွက် အထိနာခဲ့သော စစ်ကောင်စီတပ်က တပ်အင်အားများ စုစည်းပြီး စစ်ကြောင်းထိုးရန်ပြင်ဆင်ကြောင်း ဒေသခံ ပြောဆိုချက်အရ သိရသည်။

သရက်မြို့နယ်တွင်းရှိ ကျေးရွာအချို့ကို စစ်ကောင်စီတပ်သားများမှ တစ်အိမ်တက်ဆင်းရှာဖွေကာ ငွေနဲ့ ဖုန်းများကို သိမ်းယူခဲ့ကြောင်းလည်း ဒေသခံထံမှသိရှိရသည်။

ဖေဖော်ဝါရီလ ၂၂ရက်နေ့ နံနက်ပိုင်းတွင် သရက်မြို့ ၊ တလဘားကျေးရွာသို့ အင်အား ၄၀ခန့်ရှိ စစ်ကောင်စီတပ်ဖွဲ့များ ဝင်ရောက်လာပြီး နေ အိမ်များကို တစ်အိမ်တက်ဆင်း ရှာဖွေခဲ့ကာ ဒေသခံများ၏ ဖုန်းများအား သိမ်းယူသွားခဲ့ကြောင်း ဆိုသည်။

“ဟိုတလောက သူတို့အတိုက်ခံရတာ တော်တော်သေတယ် ၊ အဲဒါကြောင့် အခုလို ပြည်သူတွေဘက်ကို မဲနေဟန်တူတယ်” ဟု လုံခြုံရေးအရ အမည်မဖော်လို့သည့် ဒေသခံတစ်ဦးက မဇ္စျိမကိုပြောသည်။

အဆိုပါစစ်ကောင်စီတပ်သားများသည် တစ်အိမ်တက်ဆင်းဝင်ရှာပြီး တွေ့ရှိသော ဒေသခံများ၏ ငွေ ကျပ် ၁,၀၀၀,၀၀၀(ဆယ်သိန်း) ခန့်အား အဓမ္မသိမ်းယူသွား ခဲ့ကြောင်းဆိုသည်။

တံခါးဖွင့်မပေးသော အိမ်များတွင် တံခါးများကို ခြေထောက်ဖြင့် ကန်ဖွင့်ပြီး သေနတ်များ ပစ်ဖောက်ကာ ရွာကို မီးရှို့ပစ်မည်ဟု ၍လည်းခြိမ်း ခြောက်ခဲ့ကြောင်း သိရသည်။

လတ်တလောအခြေအနေတွင် သရက်မြို့၌ နယ်မြေခံစစ်ကောင်စီတပ်နှင့် ရဲများ အပါဝင် အခြားတိုက်ခိုက်ရေးတပ်များပါ စုစည်းနေပြီး အင် အား ၂၀၀ခန့်ရှိနေကာ စစ်ကြောင်းထိုးမည့်အခြေအနေရှိကြောင်း အဆိုပါ ဒေသခံ မှ ဆက်လက် ပြောဆို သည်။

ဖေဖော်ဝါရီ ၂၀ရက်နေ့တွင် ဒေသခံကာကွယ်ရေးတပ်ဖွဲ့များမှ သရက်မြို့နယ် ဆင်ကော်ရဲစခန်းကို လောင်ချာဖြင့် ပစ်ခတ်တိုက်ခိုက်ခဲ့ပြီး အင် အား ၂၅ယောက် ခန့်ဖြင့် စစ်ကူလာသော စစ်ကောင်စီ တပ်သားများကိုလည်း မိုင်းဆွဲ ပစ်ခတ် တိုက်ခိုက်ခဲ့ရာ ရဲစခန်းမှူး ၊ ဒုရဲအုပ်အပါအဝင် ရှစ်ဦးသေဆုံးပြီး ဒဏ်ရာရရှိသူများ ပြားခဲ့ကြောင်း သိရသည်။mizzima

တနင်္သာရီတိုင်း၊ ကော့သောင်းမြို့နယ်၊ ဝိုင်ဒင်ကျေးရွာသို့ စစ်ကြောင်းထိုးဝင်ရောက်လာသော အကြမ်း ဖက်စစ်တပ်ကို ခုခံတိုက်ခိုက်ခဲ့ရာ စစ်သား ၈ ဦးသေဆုံးကြောင်း ကော့သောင်းခရိုင်၊ အမှတ် ၁ တပ်ရင်းမှ တာဝန်ရှိသူတစ်ဦးက ရန်ကုန် ခေတ်သစ်သတင်းဌာနထံသို့ ပြောကြားသည်။

ဖေဖော်ဝါရီလ ၂၁ ရက် နေ့လည် ၁၂ နာရီခွဲခန့်က ကော့သောင်းမြို့မှ အကြမ်းဖက်စစ်သား အင်အား ၁၇၀ ခန့်ဖြင့် ခြေလျင်စစ်ကြောင်းထိုးလာသော စစ်ကြောင်းက ဝိုင်ဒင်ကျေးရွာအတွင်းသို့ လက် နက်ကြီး ၂ ချက်ပစ်ခတ် ဝင်ရောက်လာခဲ့သဖြင့် ကော်သူးလေ Army နှင့်ပူးပေါင်းတပ်ဖွဲ့မှ ခုခံ တိုက်ခိုက်ခဲ့ရာ အကြမ်းဖက်စစ်သား ၈ ဦးသေဆုံးပြီး ၅၀ ကျော်ဒဏ်ရာရရှိကာ ညနေ ၃ နာရီခွဲခန့်တွင် ပြန်ဆုတ်သွားကြောင်း သိရသည်။

“စစ်ခွေးတွေဘက် လက်နက်ကြီးနဲ့ ပစ်လို့ နေအိမ်တော်တော်များများတော့ ထိသွားတယ်၊ ပြည်သူတွေတော့ တစ်ယောက်မှ မထိပါဘူး၊ တိုက်ပွဲက ၄ နာရီလောက်ပြင်း ပြင်းထန်ထန် ဖြစ်ခဲ့တာပါ” ဟု ကော့သောင်း ခရိုင်၊ အမှတ် ၁ တပ်ရင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။

အဆိုပါ ဝိုင်ဒင်ကျေးရွာသည် ပြည်သူ့ကာကွယ်ရေးတပ်မတော်၊ ကော့သောင်းခရိုင် အမှတ် ၁ တပ်ရင်း နှင့် ကော်သူလေး Army ပူးပေါင်းစစ်ကြောင်းတို့ အခြေပြုရာကျေးရွာဖြစ်ပြီး တိုက်ပွဲ အတွင်း ကော်သူ လေ Army မှ ရဲဘော်တစ်ဦး၊ PDF ရဲဘော်တစ်ဦး စုစုပေါင်း ၂ ဦး မစိုးရိမ်ရ ဒဏ်ရာရရှိခဲ့ကြောင်း သိရ သည်။

လက်ရှိ တနင်္သာရီတိုင်း၊ ကော့သောင်းမြို့နယ်၊ ထိုင်း – မြန်မာနယ်စပ် ရှမ်းကိုး ရွာဒေသ မှာ စစ်တပ်နှင့် PDF မဟာမိတ်တပ်ဖွဲ့များ အကြား တိုက်ပွဲများ ဆက်တိုက် ဖြစ် ပေါ်နေသဖြင့် စစ်ဘေးရှောင်ဦးရေ ၁၀၀ ကျော် အထိ ထိုင်းဘက်​သို့ ထွက်ပြေးနေရကြောင်း သိရှိရသည်။khit thit

စစ်ကိုင်းတိုင်း၊ အရာတော်မြို့နယ်၊ မင်းရွာအနီးမှာ စစ်ကောင်စီတပ်နဲ့ ပြည်သူ့ကာကွယ်ရေးအဖွဲ့တို့ ဒီနေ့ ဖေဖော်ဝါရီ ၂၃ ရက် မနက် ၉ နာရီလောက်က နှစ်ဖက် တိုက်ပွဲဖြစ်ပွားနေတယ်လို့ ဒေသခံတွေက ပြောပါတယ်။

အခုလို ပြည်သူ့ကာကွယ်ရေးအဖွဲ့တွေနဲ့ စစ်ကောင်စီတပ်တို့ တိုက်ပွဲဖြစ်ပွားနေတာဟာ ဖေဖော်ဝါရီ ၂၁ ရက်ကနေ ဒီနေ့ ဖေဖော်ဝါရီ ၂၃ ရက်အထိ ၃ ရက်ကြာ တိုက်ပွဲ‌ဖြစ်နေတာလို့လည်း ဒေသခံတွေက ပြောပါတယ်။

ဒေသခံရွာသားတဦးက “နွားမသင်းရွာကို သူတို့စဝင်ပြီး အိမ်တွေကို မီးစရှို့တယ်။ အဲလို ရွာကို မီးရှို့လို့ ပြည်သူ့ကာကွယ်ရေးအဖွဲ့တွေက မခံချင်ပြီး တိုက်ပွဲစဖြစ်တယ်။ နောက်နေ့ကျတော့ နွားမသင်းကနေ မင်းရွာဘက် ထပ်ပြီး စစ်ကြောင်းထိုးတယ်။ အဲ့ မင်းရွာမှာလည်း မနေ့က တိုက်ပွဲဖြစ်တယ်။ ဒီနေ့လည်း မင်းရွာမှာ တိုက်ပွဲထပ်ဖြစ်နေတယ်” လို့ ပြောပါတယ်။

အခုလို အ‌ရာတော်တောင်ခြမ်းမှာ ၃ရက်တာ ပြည်သူ့ကာကွယ်ရေးအဖွဲ့တွေနဲ့ စစ်ကောင်စီတပ် တိုက်ပွဲဖြစ်ပွားနေတာကြောင့် နွားမသင်းရွာ၊ မင်းရွာ၊ ငါးကင်းအုပ်စု စတဲ့ကျေးရွာက ဒေသခံတွေ စစ်ဘေးရှောင်နေကြရတယ်လို့လည်း ဒေသခံတွေက ပြောပါတယ်။

အရာတော် Dranger Force LPDF အဖွဲ့ခေါင်းဆောင် ဗိုလ်ရန်ရှင်းက “ဟုတ်ကဲ့၊ တိုက်ပွဲက သုံးရက်အထိ ရှိနေပြီဆိုတာ ဟုတ်ပါတယ်ဗျ။ ပထ မ နွားမသင်းတိုက်ပွဲမှာ စစ်(–) ၉ ကောင်ကျတယ်။ ကျနော်တို့ဘက်က ရဲဘော်တဦး မစိုးရိမ်ရဒဏ်ရာ ရရှိတယ်။ ဒုတိယနေ့ မင်းရွာတိုက်ပွဲမှာတော့ စစ်(–)တွေဘက်က ၁၀ ဦးကျတယ်။ ကျနော်တို့ဘက်ကလည်း ၂ ဦးကျတယ်။ စစ်ကောင်စီအကျအဆုံးကတော့ သူတို့ထဲမှာပါလာတဲ့ ကျနော်တို့ ဖရဲသီးကပြောလို့ သိရတာဗျ။ သေတဲ့စခအလောင်းတွေကို ရွာထဲကအိမ်တွေနဲ့ မီးရှို့ပစ်ခဲ့တယ်လို့လည်း ကျနော်တို့ သိထားရတယ်” လို့ ပြောပါတယ်။

အခု စစ်ကောင်စီနဲ့ ပြည်သူ့ကာကွယ်ရေးအဖွဲ့တွေ တိုက်ပွဲဖြစ်ပွားနေတဲ့ အရာတော်မြို့နယ်ကို စစ်ကောင်စီဘက်က ပြီးခဲ့တဲ့ ဖေဖော်ဝါရီ ၂၂ ရက် နေ့က စစ်အုပ်ချုပ်ရေး ထပ်မံဖြည့်စွက် ကြေညာထားခံရတဲ့ မြို့နယ်တခုလည်း ဖြစ်ပါတယ်။DVB

ဧရာဝတီတိုင်း၊ ဟင်္သာတမြို့နယ် ၊ နိဗ္ဗာန်တိုက်နယ်တွင် ဖေဖော်ဝါရီလ ၂၂ ရက်နေ့၊ ည ၉ နာရီ ၃၀ မိနစ်ခန့်အချိန်က ညကင်းပတ်နေသည့် စစ်ကောင်စီလက်အောက်ခံရဲများ ဗုံးခွဲတိုက်ခိုက်ခံရပြီး ရဲတပ်ဖွဲ့ဝင် နှစ်ဦး ပြင်းထန်ဒဏ်ရာများရရှိခဲ့သည်ဟု သိရသည်။

ဆိုင်ကယ် သုံးစီးဖြင့် ကင်းလှည့်လာသည့် နိဗ္ဗာန်နယ်မြေရဲစခန်းမှ ရဲများအား နိဗ္ဗာန်တိုက်နယ်နှင့် အလယ်စုကျေးရွာကြား အရောက်တွင် နန်းထိုက်အောင် စစ်ဆင်ရေးအဖြစ် အဝေးထိန်းဗုံးဖြင့် ဖောက်ခွဲတိုက်ခိုက်ခဲ့ခြင်းဖြစ်သည်ဟု ဖောက်ခွဲမှုကိုပြုလုပ်ခဲ့သည့် ဟင်္သာတမြို့ ဒေသခံပြည်သူ့ကာကွယ်ရေးအဖွဲ့(HLPDF)တာဝန်ရှိသူတစ်ဦးက ပြောသည်။

“ရဲခွေး(ရဲတပ်ဖွဲ့ဝင်) ငါးယောက် ဆိုင်ကယ်နဲ့ ညကင်းလှည့်လာတဲ့အချိန်မှာ ဖောက်ခွဲခဲ့တာပါ။ ရဲနှစ်ယောက် ဗုံးထိသွားလို့ ဆေးရုံကို ချက်ချင်းခေါ်သွားကြတယ်။ ပြင်းပြင်းထန် ထန်ထိသွားတယ်ဆိုပေမဲ့ သေဆုံးမှု ရှိမရှိကိုတော့ အတည်ပြုလို့ မရသေးပါဘူး”ဟု ဆိုသည်။

ဗုံးခွဲတိုက်ခိုက်မှုအပြီးတွင် တော်လှန်ရေးရဲဘော်များ အထိအခိုက်မရှိ အောင်မြင်စွာဆုတ်ခွာနိုင်ခဲ့ပြီး လုံခြုံရာသို့ပြန်လည်ရောက်ရှိပြီဖြစ်သည်ဟု (HLPDF)တာဝန်ရှိသူက ပြောသည်။

ဗုံးပေါက်ကွဲမှု ဖြစ်ပေါ်ခဲ့သည့် ယမန်နေ့ ညပိုင်းမှစတင်ကာ လက်ရှိအချိန်အထိ ဟင်္သာတမြို့အဝင်အထွက် ဂိတ်များတွင် စစ်ကောင်စီတပ်နှင့် ရဲများက လုံခြုံရေးတင်းကျပ်ထားသည်ဟု ဒေသခံများက ပြောသည်။ mizzima

နေပြည်တော်၊ လယ်ဝေးရှိ အမှတ် ၂၀၃၁ လေကြောင်းရန်ကာကွယ်ရေးတပ်ကို ယနေ့နံနက်ပိုင်း ဒုံးဖြင့် ပစ်ခတ်ခံရကြောင်း စစ်ဘက်သတင်းရင်းမြစ်များ အတည်ပြု ပြောဆိုသည်။

ဖေဖော်ဝါရီလ ၂၃ ရက်နေ့ နံနက် ၉ နာရီ ၃၀ မိနစ်အချိန်တွင် နေပြည်တော်၊ လယ်ဝေးရှိ အမှတ် ၂၀၃၁ လေကြောင်းရန်ကာကွယ်ရေးတပ်ကို ဒုံး ၂ စင်းဖြင့် ပစ်ခတ်ခံရခြင်းဖြစ်ပြီး တပ်အတွင်း အဆောက်အအုံတစ်ခုကို ထိမှန်ခဲ့ကြောင်း တော်လှန်ရေး သတင်းရင်းမြစ်များထံမှ သိရှိရသည်။

“အပစ်ခံရတာမှန်တယ်။ အသေးစိတ်တော့ မသိရသေးဘူး။ အပစ်ခံရတာ ဟုတ် ပါတယ်။ လူထိလား မထိလား အဲဒါလည်း သေချာမသိရသေးဘူး။ တပ် တွေ မတူ တော့ မေးလို့ မြန်းလို့ မကောင်းဘူး” ဟု စစ်ဘက်သတင်းရင်းမြစ်က ပြော ဆိုသည်။

တော်လှန်ရေးသတင်းရင်းမြစ်များက အရာရှိရိပ်သာဟု ယူဆရသော အဆောက် အအုံတစ်လုံးကို ဒုံးကျည်ထိမှန်ကြောင်း၊ စစ်သားများ ထိ ခိုက်သေဆုံးမှုကို စုံ စမ်းနေဆဲဖြစ်ကြောင်း ပြောဆိုထားသည်။

“ဒုံးနှစ်စင်းပစ်တာ နှစ်စင်းလုံးလေကြောင်းရန်တပ်ထဲကျတယ်။ တစ်စင်းက အဆောက် အဦးကို တိုက်ရိုက်မှန်တယ်။ တစ်စင်းက မြေပြင်ကျတယ်။ နေ ပြည် တော် PDFက တိုက်ခိုက် ခဲ့ခြင်းဖြစ်ပါတယ်” ဟု နေပြည်တော်PDF မှ တာဝန် ရှိသူတစ်ဦက ဆိုသည်။

အမှတ် ၂၀၃၁ လေကြောင်းရန်ကာကွယ်ရေးတပ် ပတ်ဝန်းကျင်ရှိ ကျေးရွာများ နှင့် အနီးပတ်ဝန်းကျင်တွင် ယနေ့ညပိုင်း ဧည့်စာရင်းစစ်ခြင်း၊ ကင်းပုန်းဝပ်ခြင်း၊ တပ်ရှေ့ နှင့်ပတ်ဝန်းကျင် သွားလာမှု ပိတ်ပင်ခြင်းများ ပြုလုပ်ရန် ရှိနေကြောင်း သိရှိရသည်။ khit thit

တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့နယ် ရှမ်းကိုးရွာအုပ်စုရှိ ဝိုင်ဒင်းကျေးရွာမှာ ပြီးခဲ့တဲ့ရက်က တိုက်ပွဲဖြစ်ပွားခဲ့ပြီး စစ်ကောင်စီတပ်သား ၈ ယောက်သေဆုံးကာ ၅၀ လောက် ဒဏ်ရာရတယ်လို့ ကော့သောင်းခရိုင် ပြည်သူ့ကာကွယ်‌ရေးတပ်ရဲ့ ထုတ်ပြန်ချက်အရ သိရပါတယ်။

ဖေဖော်ဝါရီ ၂၁ ရက် မွန်းလွဲ ၁၂ နာရီခွဲလောက်က အဆိုပါ ရှမ်းကိုးရွာအုပ်စုထဲက ဝိုင်းဒင်းကျေးရွာကို စစ်ကောင်စီတပ်က လက်နက်ကြီးပစ် ခတ်ပြီး အင်အား ၁၇ဝ လောက်နဲ့ စစ်ကြောင်းထိုး ဝင်ရောက်လာတာကြောင့် ဒေသတွင်း ပြည်သူ့ကာကွယ်ရေး ပူပေါင်းတပ်ဖွဲ့နဲ့ နှစ်ဖက် အ ပြန်အလှန် ပစ်ခတ်မှုဖြစ်ပြီး တိုက်ပွဲပြင်းထန်ခဲ့ပါတယ်။

အဲဒီတိုက်ပွဲမှာ ပြည်သူ့ကာကွယ်ရေးပူးပေါင်းတပ်ဖွဲ့ဘက်ကလည်း ရဲဘော် ၂ ဦး ထိခိုက်ဒဏ်ရာရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။

ဒေသခံပြည်သူတဦးက “လက်ရှိအခြေအနေကတော့ ငြိမ်သက်နေပါပြီ။ ဝိုင်ဒင်းရွာသားတွေကတော့ ထိုင်းနိုင်ငံဘက်ကို ရှောင်တိမ်းနေရတယ်ဗျာ။ ရွာသားတွေ ထိခိုက်မှုမရှိဘူး။ လောလောဆယ်တော့ ထိုင်းဘက်မှာ တိမ်းရှောင်နေကြတုန်းပဲ” လို့ ပြောပါတယ်။

နှစ်ဖက် အပြန်အလှန် ပစ်ခတ်မှုဖြစ်ပြီးနောက် ညနေ ၃ နာရီခွဲလောက်မှာ စစ်ကောင်စီဘက်က အထိနာပြီး ပြန်လည်ဆုတ်ခွာသွားတယ်လို့ သိရပါတယ်။

ဒါ့အပြင် စစ်ကောင်စီတပ်က လက်နက်ကြီးပစ်ခတ်မှုကြောင့် အဲဒီကျေးရွာက ဒေသခံပြည်သူ အများအပြား ထိုင်းနိုင်ငံ ရနောင်းမြို့ဘက်ကို ထွက်ပြေးတိမ်းရှောင်နေရတယ်လို့ သိရပါတယ်။

ကော့သောင်းခရိုင်၊ ခမောက်ကြီးမြို့နယ်ရှိ ဝိုင်ဒင်းကျေးရွာ၊‌‌ အေးမြမင်္ဂလာ‌ကျေးရွာနဲ့ တပ်ဦးမြိုင်ကျေးရွာတွေကို ကေအန်ယူနဲ့ ပြည်သူ့ကာ ကွယ်ရေး ပူးပေါင်းတပ်ဖွဲ့တွေ နယ်မြေစိုးမိုးထားနိုင်ပြီးနောက်ပိုင်း အဆိုပါဒေသတွေမှာ စစ်ရေးတင်းမာလာကာ စစ်ကောင်စီဘက်က အင် အားအများအပြားနဲ့ ဝင်ရောက်တိုက်ခိုက်တာတွေ ပြုလုပ်လာတယ်လို့ သိရပါတယ်။ DVB

ရန်ကုန်တိုင်း၊ ကြည့်မြင်တိုင်မြို့နယ်၊ ဆိပ်ကမ်းသာပန်းခြံနဲ့ ကျောက်တံတားသမ္ဗန်ဆိပ်မှာ မပေါက်ကွဲသေးတဲ့ လက်လုပ်ဗုံးနှစ်လုံးတွေ့ပြီး စစ်တပ်က ဖောက်ခွဲဖျက်ဆီးကာ လမ်းသွားလမ်းလာ လူငယ်တယောက်ကို ဖမ်းဆီးသွားတယ်လို့ မြို့ခံတွေဆီက သိရပါတယ်။

ဖေဖော်ဝါရီ ၂၃ ရက် ဒီနေ့မနက် ၈ နာရီက ကြည့်မြင်တိုင် ကျောက်တံတား သမ္ဗန်ဆိပ်အနီးမှာ မပေါက်ကွဲသေးတဲ့ လက်လုပ်ဗုံးတွေ့လို့ စစ်တပ်က အတားအဆီးတွေလုပ်ပြီး ဖောက်ခွဲခဲ့တယ်လို့ သမ္ဗန်ဆိပ်အနီးနေသူတဦးက ပြောပါတယ်။

“သမ္ဗန်ဆိပ်အဆင်းက ဆိုက်ကားဂိတ်နားမှာ တွေ့တာ၊ စစ်တပ်က အဲ့ဒီလက်လုပ်ဗုံးကို ယူပြီး ကမ်းနားလမ်းပေါ်မှာ ဖောက်ပစ်တယ်။ ညက ပန်းခြံမှာ ဗုံးတွေ့လို့ဆိုပြီး အလုပ်ကပြန်လာတဲ့ ကောင်လေးတယောက် ဖမ်းသွားတယ်။”

မနေ့ည ၈ နာရီကျော်ကလည်း ကြည့်မြင်တိုင်၊ အိုးဘိုရပ်ကွက်၊ ကမ်းနားလမ်းမပေါ်ရှိ ဆိပ်ကမ်းသာပန်းခြံအတွင်းမှာ ဗုံးတွေ့လို့ စစ်ကောင်စီတပ်က ဖောက်ခွဲပြီး လမ်းသွားလမ်းလာ လူငယ်တဦးကို ဖမ်းဆီးခဲ့တယ်လို့ အိုးဘိုရပ်ကွက်နေသူတဦးက ပြောပါတယ်။

“ညက စစ်တပ်က လက်လုပ်ဗုံးကိုခွဲပြီး လမ်းသွားလမ်းလာတွေကို စစ်ဆေးပြီး အလုပ်ကပြန်လာတဲ့ ကောင်လေးတယောက်ကို ဖမ်းသွားတယ်။ ရှင်းပြနေတာတောင် မရဘူး။ ကမ်းနားလမ်းမှာပဲ ဖမ်းသွားတာ။”

စစ်ကောင်စီတပ်က မပေါက်ကွဲသေးတဲ့ လက်လုပ်ဗုံး နှစ်ကြိမ်တွေ့ပြီးနောက် ကမ်းနားလမ်း၊ ဗားကရာလမ်းနဲ့ ကြည့်မြင်တိုင်ငါးစျေးဘက်တွေမှာ လုံခြုံရေးတွေ ချထားတယ်လို့ မြို့ခံတွေဆီက သိရပါတယ်။

ရန်ကုန်က မြို့နယ်တချို့မှာ ဖေဖော်ဝါရီ ၁ ရက်ကနေ ၂၃ ရက်အတွင်း ပစ်ခတ်မှုနဲ့ ဗုံးပေါက်ကွဲမှုတွေကြောင့် ၁၁ ဦး သေဆုံးခဲ့ပြီး ၈ ဦး ထိခိုက်ဒဏ်ရာ ရရှိခဲ့ပါတယ်။ DVB

မွန်ပြည်နယ်၊ ဘီးလင်းမြို့နယ်၊ ဒေါက်ရပ်ကျေးရွာအုပ်စု၊ ခဲမောက်ကျေးရွာတွင် စစ်ကြောင်းထိုး လာသော စစ်ကောင်စီတပ်သားများနှင့် KNLA ၊ PDF ပူးပေါင်းတပ်ဖွဲ့အကြား တိုက်ပွဲဖြစ်ပွားခဲ့ကြောင်း သိရသည်။

ဖေဖော်ဝါရီလ ၂၁ ရက်နေ့ ညနေ ၄ နာရီဝန်းကျင်တွင် ဘီးလင်းအခြေစိုက်တပ်များဖြစ်သည့် ခလရ(၈)၊ အမတ(၃၁၄)နှင့် ခမရ (၃)တို့မှ စစ်ကောင်စီတပ်သား အင်အား ၅၀ ခန့်သည် ဇီးဝန်းကျေးရွာမှတစ်ဆင့် ခဲမောက်ကျေးရွာအတွင်း စစ်ကြောင်းထိုးဝင်ရောက်လာခဲ့ရာ KNU တပ် မဟာ(၁) တပ်ရင်း(၂) KNLA ၊ PDF ပါဝင်သော ပူးပေါင်းတပ်ဖွဲ့အကြား တိုက်ပွဲဖြစ်ပွားခဲ့ကာ တစ်နာရီကျော်ကြာပစ်ခတ်မှုဖြစ်ပွားခဲ့ သည်။

၎င်းတိုက်ပွဲအတွင်း ခဲမောက်ကျေးရွာမှ ဦးမြင့်သန်း၏ ရင်ဘက်၌ RPG ကျည်အစ သုံးချက်ထိမှန်ခဲ့ပြီး ဆေးကုသမှုခံယူနေရကာ စိုးရိမ်ရကြောင်း သိရသည်။

“သူတို့ (စစ်ကောင်စီတပ်သား) တွေက ရွာထဲဝင်လာဖို့လုပ်တဲ့အချိန် ရွာထိပ်မှာ လုံခြုံရေးယူပေးထားတဲ့ ရဲဘော်လေးယောက်ကို အာပီဂျီ (RP G)နဲ့ စပစ်တာ။ RPG က ရွာသားကိုသွားမှန်တော့ ရဲဘော်တွေက အဲ့ဒီ ရွာသားကိုသွားကယ်ဖို့လုပ်ရင်းကနေ စစ်သားတွေက လက်နက်ငယ်တွေနဲ့ဆက်ပစ်လို့ ပူးပေါင်းတပ်ဖွဲ့ထဲ က တစ်ယောက် ပေါင်ကို ကျည်ထိသွားတယ်” ဟု ရဲဘော်တစ်ဦးက မဇ္ဈိမကို ပြောသည်။

တိုက်ပွဲအတွင်း ပူးပေါင်းတပ်ဖွဲ့ဘက်မှတစ်ဦး ပေါင်ကိုကျည်ထိမှန်ခဲ့ကာ စစ်ကောင်စီတပ်မှ အထိအခိုက်၊ အကျအဆုံးရှိပြီး အသေးစိတ်အား စုံစမ်းနေဆဲဖြစ်ကြောင်း အဆိုပါရဲဘော်က ဆိုသည်။

စစ်ကောင်စီက RPG ၊ ၄၀ မမ၊ ၈၁ မမ စိန်ပြောင်း စသည့် လက်နက်ကြီးအမျိုးအစားများ အသုံးပြု၍ ပစ်ခတ်မှုများကြောင့် ခဲမောက်ရွာအ တွင်းရှိ ဒေသခံနေအိမ်အချို့ ကျည်စထိမှန်ခဲ့ကြောင်း သိရသည်။

“တိုက်ပွဲပြီးတော့ အဲ့ဒီစစ်ကြောင်းက ရွာထဲဝင်မွှေသွားသေးတယ်ဗျ။ ဖုန်းဆိုင်ကနေ ဖုန်းတွေပိုက်ဆံတွေ ယူသွားတယ်။ ဖုန်းဆိုင်ကလည်း ထွက်ပြေးတဲ့အချိန် အိမ်နောက်ဖေးတံခါးပိတ်ဖို့မေ့ခဲ့တော့ အိမ်နောက် ဖေးကနေဝင်ပြီးယူသွားတာ” ဟု အခြားရဲဘော်တစ်ဦးကလည်း ပြောသည်။

တိုက်ပွဲအပြီးနောက် ၎င်းစစ်ကြောင်းသည် ခဲမောက်ရွာအတွင်းရှိ ဖုန်းဆိုင်တစ်ဆိုင်မှ ဖုန်းများ၊ ငွေဖြည့် ကတ်များ၊ ပါဝါဘန့် (Power Bank) များယူဆောင်သွားကြောင်း၊ နေအိမ်အချို့ကိုလည်း မွှေနှောက်သွား ကြောင်း ဒေသခံတစ်ဦးထံမှ သိရသည်။

ဘီးလင်းမြို့နယ်ရှိ ခလရ(၈)၊ အမတ (၃၁၄) ၊ ခမရ(၃)ခြေကုတ်စခန်းများအတွင်းသို့ ယမန်နေ့မှစတင်၍ အလုံပိတ်စစ်ကားများ အဝင်အထွက်များပြားနေပြီး စစ်သားအင်အား ထပ်တိုးထားခြင်းဖြစ်ကြောင်း သိရသည်။

ဘီးလင်းမြို့နယ်တွင် စစ်ကောင်စီယာဉ်တန်းများ မကြာခဏမိုင်းဆွဲခံရပြီး စစ်ကောင်စီတပ်မှ ကျေးရွာများ အတွင်းသို့ လက်နက်ကြီးများဖြင့် ပစ်ခတ်လေ့ရှိကာ ထိုလက်နက်ကြီးများကြောင့် ဒေသခံများ ဒဏ်ရာရ ရှိနေပြီး ဘုန်းကြီးကျောင်းများ၊ ဒေသခံပြည်သူများ၏ နေအိမ်များ မ ကြာခဏကျည်ထိမှန်ပျက်စီးလေ့ရှိ သည်။mizzima

ရန်ကုန်တိုင်း၊ လှည်းကူးမြို့နယ်တွင် ယမန်နေ့ညပိုင်း အသက် ၃ နှစ်အရွယ် ကလေး ငယ် အပါအဝင် ပစ်သတ်ခံရသည့် မိသားစုဝင် ၅ ဦးမှာ ကျောင်းဆရာ လက်ရှိ PDF ကိုဝင်းစိုး၏ မိသားစုဝင်များဖြစ်ကြောင်း မိတ်ဆွေ အသိုင်းအ၀ိုင်းက အတည်ပြုပြောဆိုသည်။

ဖေဖော်ဝါရီလ ၂၂ ရက်နေ့ ည ၈ နာရီအချိန်ရန်ကုန်တိုင်း၊ လှည်းကူးမြို့နယ်၊ ရိပ် သာရပ်ကွက်၊ မေဃ၀တီ ၄ လမ်း၊ မြို့ကြီး ကုန်းဘက်တွင် မိသားစုဝင် ၅ ဦး ကို ပျူစောထီးများ ပစ်သတ်သွားခဲ့ကြောင်း၊ ပစ်သတ်ခံရသူများ ဒေါ်စန်းနွဲ့၊ သားဖြစ်သူ ဦးမောင်မောင်၊ သမီးဖြစ်သူ မဝင်းနွယ်၊ မဝင်းနွယ်၏ သား အသက် ၃ နှစ်အရွယ်ကလေးငယ်၊ အသက် ၈၅ နှစ်အရွယ် အဘိုးဦးအောင်မောင်းတို့ကို ပစ်သတ်သွားခြင်းဖြစ် ကြောင်း သိရှိရသည်။

” အသတ်ခံရတာက ကျောင်းဆရာ ကိုဝင်းစိုး PDF ရဲ့ ယောက္ခမ မိသားစုပါ။ မဝင်းနွယ်က ကိုဝင်းစိုးရဲ့ဇနီး။ ကိုဝင်းစိုးရဲ့ သားလေး အသက် ၃ နှစ်အရွယ် ကလေးကိုပါ ပစ်သတ်သွားတာ။ လာသတ်သွားတဲ့ လူတွေက စစ်မှုထမ်း ဟောင်း နဲ့ပျူ စော ထီးဆိုတာ အတည်ပြုနိုင်ပါပြီ။ ဘယ် လို အတည်ပြုနိုင် လဲတော့ မမေးပါနဲ့။ အဘိုး ဦးအောင်မောင်းက သထုံကပါ ။ သထုံပြန်ဖို့ လုပ်နေတုန်း အပစ်ခံရတာ” ဟု မိတ်ဆွေတစ်ဦးက ပြောသည်။

” ဆုံးသွားတဲ့သူတွေမှာ အဘိုး ဦး​အောင်​မောင်း၊ မောင်လေး ကိုမောင်မောင်၊ ညီမငယ်က မိပိတ်(မဝင်းနွယ်)၊ အကြီး စန်းနွဲ့ တို့ပါ။ ပစ်သတ်ခံ လိုက်ရတဲ့ အထဲပါသွားတဲ့ အသက် ၃ နှစ်သားလေးက ကျောင်းဆရာ PDF ကိုဝင်းစိုးနဲ့ မိပိတ် တို့သားလေး။ တကယ်က ကျောင်းဆရာ PDF နဲ့ အကြီးစန်းနွဲ့တို့က အဆက် အသွယ် မရှိကြပါဘူး။ သူက အိမ်က သူထွက်သွားတာ ၂နှစ် ကျော်ရှိ နေပြီ။ အခုနောက်ဆုံး ဘေးပတ်ဝန်းကျင်ကလည်း စစ်မှုထမ်းဟောင်း၊ ပျူစောထီး တွေ ပစ်သတ် သွား တယ်ဆိုတာ အတည်ပြုပါတယ်။ ဒီဘက်ကလည်း ပျူစောထီးတွေ သတ်တယ် ဆိုတာ အတည်ပြုနိုင်တယ်” ဟု ဆွေမျိုးနီးစပ်တစ်ဦးက ပြောဆိုသည်။

စစ်မှုထမ်းဟောင်းနှင့်ပျူစောထီးများက လာရောက်သတ်ဖြတ်ချိန်တွင် ကျောင်းဆရာ PDF မိသားစုဝင်များ ဟုတ်၊ မဟုတ် မေးမြန်း အတည် ပြုပြီးမှ သတ်ဖြတ်သွားခဲ့ခြင်းဖြစ်ကြောင်း သိရှိရသည်။

အကြမ်းဖက်စစ်ကောင်စီထောက်ခံသော စစ်လော်ဘီများက ယမန်နေ့ညပိုင်း ပစ်ခတ်သတ်ဖြတ်မှု လုပ်ဆောင်ပြီးနောက် PDF က သတ်ဖြတ်သည်ဟုဆိုကာ သတင်းမှားများ၊ ဝါဒဖြန့်မှုများ ချက်ချင်း လုပ်ဆောင်ခဲ့ကြသည်။

ယနေ့တွင် လှည်းကူးမှ မိသားစုဝင် ၅ ဦး သတ်ဖြတ်ခံရမှုဖြစ်စဉ်သည် စစ်မှု ထမ်းဟောင်းနှင့် ပျူစောထီးများက PDF မိသားစု ဝင်များကို သတ် ဖြတ်သည့် လူသတ်ဖြစ်စဉ်ဖြစ်ကြောင်း ရန်ကုန်ခေတ်သစ်က အတည်ပြု ဖော် ထုတ်နိုင် ခြင်းဖြစ်သည်။khit thit