ဖားကန့်တွင် လက်ဖက်ရည်ဆိုင်ပိုင်ရှင် အပါ အဝင် ၈ ဦးကို စစ်ကောင်စီတပ် ဖမ်းဆီး
ကချင်ပြည်နယ်၊ ဖားကန့်မြို့နယ်၊ မှော်ဝှမ်းရပ်ကွက်ရှိ ရှုထောင့်သစ် လက်ဖက်ရည်ဆိုင် ပိုင်ရှင် အပါအဝင် ၈ ဦးကို မတ်လ ၇ ရက် ည ၁၀ နာရီလောက်မှာ စစ်ကောင်စီတပ်က လာရောက်ဖမ်းဆီးသွားတယ်လို့ ဒေသခံတွေဆီက သိရပါတယ်။
ဒေသခံတဦးက “ဆိုင်ရှင် စိုးနိုင်၊ သူ့ရဲ့ဇနီး၊ သမီးနဲ့ ဆိုင်ဝန်ထမ်းတွေ အပါအဝင် အားလုံး ၈ ယောက် ဖမ်းသွားတာ။ ည ၁၀ နာရီအချိန်လောက်တုန်းက လာဖမ်းသွားတာ။ လာဖမ်းတဲ့အချိန် ရဲမေတွေလည်း ပါတယ်”လို့ ပြောပါတယ်။
ဖားကန့်မြို့မှာ စစ်ကောင်စီက လတ်တလော လုံခြုံရေးတင်းကျပ်နေပြီး စစ်ဆေးမေးမြန်း ဆောင်ရွက်တာ၊ ဖမ်းဆီးတာတွေ ဆက်တိုက်လုပ် ဆောင်နေတယ်လို့လည်း ဒေသခံတွေက ပြောပါတယ်။
ပြီးခဲ့တဲ့ မတ်လ ၆ ရက်ကလည်း စစ်ကိုင်းကနေ ဖားကန့် မှော်စီဆာမှာ လာရောက်တိမ်းရှောင်နေတဲ့ NLD ပါတီဝင်တဦးကို စစ်ကောင်စီတပ်တွေက ဝင်ရောက်ဖမ်းဆီးခဲ့တာပါ။
မတ်လ ၁ ရက်ကလည်း ဖားကန့်မြို့နယ် ရှရော်ခကျေးရွာမှာ ပြည်သူ ၂၀၀ နီးပါး ဖမ်းဆီးခံခဲ့ရပြီး အများစု ပြန်လွတ်လာပေမဲ့ မသင်္ကာမှုနဲ့ တချို့ ဖမ်းဆီးခံထားရဆဲ ဖြစ်တယ်လို့ သိရပါတယ်။
ဖားကန့်မြို့နယ်အတွင်း စစ်ကောင်စီတပ်တွေနဲ့ ကချင်လွတ်မြောက်ရေးတပ်မတော် (KIA)၊ PDF တို့ကြား တိုက်ပွဲပြင်းထန်နေပြီး အခုနှစ်အတွင်း ဖားကန့်မြို့နယ်မှာ အရပ်သားပြည်သူ ဖမ်းဆီးခံရမှု ပိုမိုများပြားလာတယ်လို့ ဒေသခံတွေက ပြောပါတယ်။ DVB
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 