ဖယ်ခုံမြို့နယ် ၉ ရက်တာတိုက်ပွဲ စစ်ကောင်စီတပ်ဘက်မှ သေဆုံးမှုရှိပြီး လက်နက်ခဲယမ်းများလည်း သိမ်းဆည်းရမိ
ရှမ်းပြည်နယ်၊ ဖယ်ခုံမြို့နယ်၊ ခေါင်အိကျေးရွာအုပ်စုဘက်သို့ စစ်ကြောင်းထိုးဝင်ရောက်လာသည့် စစ်ကောင်စီတပ်နှင့် ပြည်သူ့ကာကွယ်ရေးပူးပေါင်းတပ်များအကြား ထိပ်တိုက်တွေ့ဆုံပြီး မတ်လ ၈ ရက်နေ့မှ စတင်ကာ တိုက်ပွဲများဖြစ်ပွားခဲ့ကြောင်း ပူးပေါင်းအဖွဲ့များက ယနေ့ မတ် လ ၁၇ ရက်နေ့တွင် ထုတ်ပြန်သည်။
မတ်လ ၈ ရက်နေ့မှ ၁၆ ရက်နေ့အထိ ကိုးရက်တာတိုက်ပွဲအတွင်း စစ်ကောင်စီတပ်မှ အရာရှိအပါအဝင် ၄၅ ဦးသေဆုံးခဲ့ပြီး လက်နက်ခဲယမ်းများလည်းသိမ်းဆည်းရမိခဲ့ကြောင်း ဖယ်ခုံ PDFနှင့် ရှမ်းပြည်(တောင်ပိုင်း) ဒေသခံတော်လှန်ရေးတပ်ပေါင်းစု SSLRUတို့က ထုတ်ပြန်ထား သည်။
“စစ်ကောင်စီတပ်က စစ်ကြောင်းတွေပြန်ဆုတ်ခွာတဲ့အချိန်မှာ ကျွန်တော်တို့ ကာကွယ်ရေးတပ်ဖွဲ့တွေက သိမ်းဆည်းရမိတာပါ။ သေဆုံးတဲ့ အ ရာရှိက စာရင်းအတိအကျတော့ သေချာမသိရသေးဘူး။ နှစ်ပွင့်နဲ့တစ်ယောက်တော့ပါတယ်ခင်ဗျ။ ကျွန်တော်တို့ နယ်မြေရှင်းလင်းရင်းနဲ့ သူတို့အလောင်းတွေထားခဲ့တာကို တွေ့ရှိရတာပါ”ဟု SSLRUမှ ပြန်ကြားရေးတာဝန်ခံကပြောသည်။
အဆိုပါ တိုက်ပွဲကို ဖယ်ခုံPDFတပ်ရင်း (1002) နှင့် အတူ KNDF BO 11 ၊ KA ၊ DMO LOCAL PDF၊ ဖယ်ခုံ PDFတပ်ရင်း (1006)၊ PDF မိုးဗြဲ (1001) ၊ SSLRU(1008) ၊ (1004)၊ KRU (1005)စသည့်တို့ ပူးပေါင်းကာ တိုက်ခိုက်ခဲ့ခြင်း ဖြစ်သည်။
တိုက်ပွဲအတွင်း ပူးပေါင်းအဖွဲ့များဘက်မှ ရဲဘော် ရှစ်ဦးထိခိုက်ဒဏ်ရာရရှိခဲ့ပြီး အခြေအနေမစိုးရိမ်ရကြောင်း SSLRUက ပြောသည်။
လက်ရှိတွင်လည်း တိုက်ပွဲများ ပြင်းထန်နေဆဲဖြစ်ပြီး တိုက်ပွဲကာလအတွင်း စစ်ကောင်စီတပ်ဘက်မှ လေကြောင်းပစ်ခတ်မှု၊ လက်နက်ကြီးပစ်ခတ်မှု အကြိမ်ရေမြောက်များစွာ ပြုလုပ်လျက်ရှိကြောင်း သိရသည်။
“နေ့စဥ်နဲ့ အမျှ တိုက်ပွဲကဖြစ်နေတုန်းပါပဲ။ လေကြောင်းပစ်ကူနဲ့ လက်နက်ကြီးနဲ့လည်း နေ့စဥ်ပစ်နေတုန်းပါပဲ။ ဒီကိုးရက်တာကာလမှာ လေကြောင်းပစ်ခတ်မှုကတော့ တစ်ရက်ကို နှစ်ကြိမ်စီရှိတယ်။ အခု ကယားနဲ့ ရှမ်းအစပ်မှာတိုက်ပွဲပြင်းထန်နေတော့ ပြည်သူ့ကာကွယ်ရေးတပ်ဖွဲ့တွေဘက်က ခဲယမ်းလိုအပ်ချက်တွေရှိတယ်။ အဲ့တာကို ပြည်သူတွေအနေနဲ့ ဝိုင်းဝန်းပြီး ကူညီထောက်ပံ့ကြပါဦးလို့ ပြောချင်ပါတယ်”ဟု SSLRU ပြန်ကြားရေး တာဝန်ခံကပြောသည်။
အဆိုပါတိုက်ပွဲကာလအတွင်း စစ်ကောင်စီတပ်ဘက်မှ ထိခိုက်ကျဆုံးမှုနှင့်ပတ်သက်ပြီး မဇ္စျိမအနေဖြင့် သီးခြားအတည်ပြုနိုင်ခြင်းမရှိသေးပေ။
ပြီးခဲ့သည့် မတ်လ ၁၁ ရက်နေ့ကလည်း ဖယ်ခုံမြို့နယ် ကုရင်ကျေးရွာတောင်ကြားတွင် စစ်ကောင်စီတပ်နှင့် ဖယ်ခုံ PDFတို့အကြား တိုက်ပွဲဖြစ်ပွားခဲ့ပြီး စစ်ကောင်စီတပ်ဘက်မှ ၁၉ ဦးသေဆုံးကာ ခြောက်ဦးကို အရှင်ဖမ်းမိခဲ့ကြောင်း PKPDF-2 က သတင်းထုတ်ပြန်ခဲ့သည်။mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 