SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ မုံရွာမြို့နယ် အောင်ဇေယျရပ်ကွက်ရှိ စစ်ကောင်စီတပ်သားများတပ်စွဲထားသည့် အကျိုးကုန်းပေါ်နှင့် အခြားကင်းစခန်းများကို မတ်လ ၂၄ ၇က်နေ့ မနက်အစောပိုင်းတွင် လက်နက်ကြီးလက်နက်ငယ်များဖြင့် ပစ်ခတ်တိုက်ခိုက်ခဲ့ရာ စစ်ကောင်စီတပ်ဘက်တွင် နှစ်ဦးသေ ဆုံးပြီး တစ်ဦးအပြင်းအထန်ဒဏ်ရာရရှိသွားကြောင်း Salingyi Border Task Force -(SBTF) မှ တာဝန်ရှိသူတစ်ဦးက ပြောသည်။

၎င်းက “၆၀မမ၊ ၈၀မမ၊ ၁၂၀မမ လက်နက်ကြီးတွေ နဲ့ အလုံး ၁၀၀ ခန့် နဲ့ သွားရောက်တိုက်ခိုက်ခဲ့တာပါ၊ သူတို့ဘက် လက်နက်ကြီး ၆၀မမ စက်လတ်တွေနဲ့ တရစပ်ပြန်ပစ်တယ်ဗျ။ ကျတော်တို့ဘက် လက်လုပ်တစ်တောင့်ထိုး၊ ရှော့ဂန်းတွေ မောင်းပြန်အချို့ပါမယ်၊ ဂန်းသမားတွေက ခံပစ်ပေးထားပြီး လက်နက်ကြီးသမားတွေ ပြန်လည်ဆုတ်ခွာခဲ့တယ်။ ဂန်းသမားတွေက ပစ်ရင်းဆုတ်ခဲ့တာ ၊ သူတို့ဘက် က နှစ်ဦးသေပြီး တစ်ဦးပြင်းထန်ဒဏ်ရာရတယ်”ဟု ပြောသည်။

တိုက်ခိုက်မှုများ အပြန်အလှန်ဖြစ်ပွားခဲ့သော်လည်း ကာကွယ်ရေးတပ်ဖွဲ့များဘက်တွင် အထိအခိုက်မရှိ ပြန်လည်ဆုတ်ခွာလာနိုင်ခဲ့ကြောင်း SBTF အဖွဲ့ က ဆိုသည်။

မုံရွာမြို့ အောင်ဇေယျရပ်ကွက်သည် ချင်းတွင်းတံတားအနောက်ဘက်တွင် အသစ်ဖော်ထုတ်ထားသည့် ရပ်ကွက်တစ်ခုဖြစ်ပြီး စစ်မှုထမ်း ဟောင်းများ အများစုနေထိုင်သည့် ရပ်ကွက်တစ်ခုဖြစ် ကြောင်းသိရ သည်။

“အဲ့မှာ အထိုင်ချထားတဲ့ စစ်ကောင်စီတပ်သားတွေဟာ ခရီးသွားပြည်သူတွေဆီက ဆက်ကြေးကောက်ခံတာတွေပြုလုပ်ပြီး စစ်ကြောင်းထိုးပြီဆိုလည်း အဲ့က စစ်သားတွေနဲ့ စစ်မှုထမ်းဟောင်းမိသားစုတွေပါ စစ်ကြောင်းနဲ့အတူပါလာတတ်ပြီး ကျေးရွာများရှိ ပြည်သူတွေရဲ့နေအိမ်များကို ဝင်မွှေပြီးခိုးယူသယ်ဆောင်တာတွေ လုပ်လေ့ရှိတယ်” ဟု SBTF အဖွဲ့ မှ တာဝန်ရှိသူတစ်ဦးက ပြောသည်။

ယခုတိုက်ခိုက်မှုကို Salingyi Border Task Force (SBTF) အဖွဲ့ နှင့် ယင်းမာပင်-ဆားလင်းကြီး လက်နက်ကြီးမဟာမိတ်တပ်ပေါင်းစုမှ တပ်ဖွဲ့ ဝင်များဖြင့် ပူးပေါင်းတိုက်ခိုက်ခဲ့ခြင်းဖြစ်ကြောင်း SBTF အဖွဲ့ ကထုတ်ပြန်ထားသည်။mizzima

ရန်ကုန်မြို့မှာ စစ်ကောင်စီလက်အောက်ခံတပ်တွေက  လူငယ်တွေကို ပစ်မှတ်ထားပြီး ရှောင်တခင် လက်ကိုင်ဖုန်းတွေယူပြီး စစ်ဆေးတာတွေ များလာတာကြောင့် သတိထား သွားလာနေကြရတယ်လို့  မြို့ခံတွေထံက သိရပါတယ်။

စစ်ကောင်စီ လက်အောက်ခံ စစ်တပ်နဲ့ရဲတွေဟာ ရန်ကုန်မြို့ရဲ့ လူစည်ကားရာနေရာတွေမှာ လှည့်လည်သွားလာနေပြီး  မထင်ရင် မထင်သလို  စစ်ဆေးမှုတွေ လုပ်နေတာလို့ ဆိုပါတယ်။

ကမာရွတ်မြို့နယ်မှာ နေထိုင်သူတစ်ဦးက “ပြီးခဲ့တဲ့ရက်က လှည်းတန်း ဦးထွန်းလင်းခြံလမ်းမှာ ဖြတ်သွားဖြတ်လာလူငယ်တွေရဲ့ ဖုန်းတွေ ယူစစ်တာ တွေ့တယ်။ ဟိုမေး၊ ဒီမေးတွေလည်း လုပ်တယ်။ ဖမ်းတာပြုတာတော့ မတွေ့ဘူး”လို့ ပြောပါတယ်။

ဖုန်းတွေယူစစ်လို့ တော်လှန်ရေးနဲ့ပတ်သက်တဲ့အချက်အလက်ပုံတွေ တွေ့ရင် ဖမ်းဆီးခေါ်ယူပြီး ငွေညှစ်တာမျိုးတွေလည်း ရှိတယ်လို့လည်း သိရပါတယ်။

ဂျပန်ဘာသာသင်တန်း တက်ရောက်နေသူတစ်ဦးက “သင်တန်းက အသိညီမလေးတစ်ယောက်ရဲ့ ဖုန်းထဲမှာ ဆန္ဒပြတုန်းကပုံ တွေ့လို့ဆိုပြီး ခေါ်သွားတယ်။ ပြီးတော့ အိမ်ကိုဖုန်းဆက်ခိုင်းပြီး ပိုက်ဆံ ငါးသိန်းပေးမှ ပြန်လွှတ်ပေးတယ်”လို့ ပြောပါတယ်။

အဲဒီလို အစစ်အဆေးကြမ်းနေတာကြောင့် မြို့ပြပြောက်ကျားလူငယ်တွေနဲ့ စစ်အာဏာရှင် ဆန့်ကျင်ရေးမှာ ပါဝင်လှုပ်ရှားနေသူတွေအနေနဲ့ ပိုပြီးသတိထားသွားလာနေကြရတယ်လို့လည်း ဆိုပါတယ်။ DVB

ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ တောင်ကြီးခရိုင်၊ ဆီဆိုင်မြို့နယ်ရှိ ကျေးရွာအချို့တွင် ပအိုဝ်းပြည်သူ့စစ်အဖွဲ့ (PNO) မှ တစ်အိမ်လျှင် တစ်ယောက် စစ်သားပေးရန် နှင့် မပေးပါက ဒဏ်ငွေ ဆောင်ရမည်ဟု ခြိမ်းခြောက်နေကြောင်း ကျေးရွာနေ ရွာသားများက မဇ္ဈိမ ကိုပြောသည်။

လွန်ခဲ့သည့် ရက်ပိုင်းမှစတင်ကာ လက်နက်များပါသည့် PNO စစ်သား ၂၀ဦးဝန်းကျင်ခန့်သည် ဆီဆိုင်မြို့ရှိ ကျေးရွာများတွင် တစ်အိမ်လျှင် စစ်သားတစ်ယောက်ပေးရမည်ဖြစ်ပြီး စစ်သားမပေးနိုင်ပါက ဒဏ်ငွေ ၅၀,၀၀၀ ပေးရမည်ဟု လိုက်လံကြေညာခဲ့ကြောင်း ရွာသားများထံမှ သိရသည်။

မတ်လ ၂၂ ရက်နေ့ ညပိုင်းတွင်လည်း PNO ပြည်သူ့စစ်မှ ထပ်မံလာရောက်ကာ နှစ်မျိုးစလုံးမပေးနိုင်ပါက ကြိမ်ဒဏ်ဆောင်ရမည်ဖြစ်ကြောင်း ထပ်မံခြိမ်းခြောက်သွားကြောင်း ဆိုသည်။

“ဒီဘက်မှာ ပအိုဝ်း ကိုယ်ပိုင်အုပ်ချုပ်ခွင့်ရဒေသဆိုတော့ဗျာ ပအိုဝ်းစစ်သားတွေက ပတ်တယ်။ ကျနော်တို့ရွာထဲကိုလာပြီး အုပ်ချုပ်ရေးမှူးနဲ့ အဖွဲ့တွေကို တစ်အိမ် စစ်သားတစ်ယောက်စီ ပေးရမယ်။ မပေးလို့မရဘူး။ မပေးရင် တစ်အိမ်ကို ဒဏ်ငွေအနေနဲ့ ပိုက်ဆံ ၅၀,၀၀၀ ဆီပေးရမယ်လို့ ပြောသွားတယ်။ မနေ့ညကလည်း အစည်းအဝေးပြန်လုပ်တယ်။ ပိုက်ဆံပေးမလား။ တုတ်နဲ့အရိုက်ခံမလားတဲ့ အဲ့လိုတောင် ပြောတယ်ဗျ” ဟု ဆီဆိုင်မြို့နယ်ရှိ ကျေးရွာတစ်ရွာမှ ရွာသားတစ်ဦးက မဇ္ဈိမ ကို ပြောသည်။

အချို့ရွာများမှာ အဆိုပါ PNO မှ အကျပ်ကိုင် ခြိမ်းခြောက်မှုများကြောင့် တစ်အိမ်လျှင် ၅,၀,၀၀၀ကျပ် ပေးဆောင်ပြီးနေပြီဖြစ်ရာ လက်လုပ် လက်စားဖြစ်သည့် ရွာသူရွာသားများ အခက်ကြုံလျက်ရှိကြောင်းဆိုသည်။

“အခုပေးရတဲ့လူတွေကလည်း ပေးရပြီးပြီ။ ကျနော်တို့လည်း ပေးလိုက်ရပြီ။ မပေးလို့လည်း မရဘူး။ ကျနော့်သားဆိုလို့ရှိရင် ဒီနိုင်ငံမှာတောင်မနေဘူး။ သူ ထိုင်းမှာ သွားအလုပ်လုပ်တာ။ ဒီမှာ အိမ်ပဲရှိတယ်။ အိမ်ရှိလို့ဆိုပြီး အဲ့ဒီအိမ်အတွက်လည်း ပေးလိုက်ရတယ်ဗျ” ဟု ၎င်းက ဆက်ပြောသည်။

လွန်ခဲ့သည့် မတ်လ ၇ ရက်နေ့တွင် အာဏာသိမ်းစစ်ခေါင်းဆောင် မင်းအောင်လှိုင်သည် ပအိုဝ်းပြည်သူ့စစ် (PNO) အဖွဲ့ခေါင်းဆောင် ဦးအောင်ခမ်းထီး နေအိမ်သို့ သွားရောက်တွေ့ဆုံခဲ့ပြီး ပအိုဝ်းလူငယ်များ ပအိုဝ်းပြည်သူ့စစ် (PNO/PNA) တွင် စစ်မှုထမ်းကြရန်နှင့် စစ်မှုမထမ်းသူများသည် မျိုးချစ်စိတ်မရှိသူများဖြစ်ကြောင်း အဆိုပါနေ့တွင် ထုတ်ပြန်ထားသည်။ mizzima

အာဏာသိမ်းစစ်ခေါင်းဆောင်က မြန်မာပြည်တွင်းမှာ လျှပ်စစ်စွမ်းအင်သုံး (EV) မော်တော်ယာဉ်တွေနဲ့ အစားထိုးပြောင်းလဲဖို့ ကြိုးပမ်းနေပေမဲ့ လက်ရှိအချိန်ထိ ကြိုက်နှစ်သက်သူ မရှိတာကြောင့် ဈေးကွက်ထဲမှာ ဝယ်မယ့်သူမရှိ ဖြစ်နေတယ်လို့ ကားဝယ်ရောင်းလုပ်ကိုင်သူတွေက ပြောပါတယ်။

ပြည်ပကနေ နှစ်စဉ်တင်သွင်းနေရတဲ့ စက်သုံးဆီပမာဏကို လျှော့ချနိုင်ဖို့အတွက် စစ်ကောင်စီဟာ ကားတင်သွင်းခွင့်ပါမစ်ကို ကန့်သတ်ထားပေမဲ့ လျှပ်စစ်စွမ်းအင်သုံး (EV) မော်တော်ယာဉ်တွေကိုတော့ အကောက်ခွန်ကင်းလွတ်ခွင့် ပေးထားပြီး တင်သွင်းခွင့် ပေးထားတဲ့အပြင် ပြည် တွင်းမှာ လာရောက်ရင်းနှီးမြှုပ်နှံဖို့အတွက်ပါ ဖိတ်ခေါ်ထားပါတယ်။

ဒါကြောင့်ပဲ ပြည်တွင်းမှာ လျှပ်စစ်စွမ်းအင်သုံး (EV) ကားတွေ တင်သွင်းထုတ်လုပ်ဖို့ တရုတ်အခြေစိုက် ကုမ္ပဏီပေါင်း ၂၀ ကျော်က ကမ်းလှမ်းထားရှိတဲ့ထဲက BYD Auto ကားကုမ္ပဏီက ထုတ်လုပ်တဲ့ လျှပ်စစ်စွမ်းအင်သုံး (EV) ကားသစ်တွေဟာ မြန်မာပြည်ဈေးကွက်ထဲ ဝင်ရောက်နေပြီ ဖြစ်ပါတယ်။ ဒါပေမဲ့ လက်ရှိအချိန်ထိ ကြိုက်နှစ်သက်သူ မရှိသေးတာကြောင့် ဈေးကွက်ထဲမှာ ဝယ်မယ့်သူမရှိ ဖြစ်နေသေးတယ်လို့ ရန်ကုန်အခြေစိုက် ကားဝယ်ရောင်းလုပ်ကိုင်နေသူတွေက ဆိုပါတယ်။

ကားဝယ်ရောင်းလုပ်ကိုင်နေသူတဦးက “သူတို့သွင်းတဲ့ (EV) လျှပ်စစ်ကားတွေ ဂွမ်းနေတယ်။ အဆင်မပြေဘူး။ ဈေးကွက်ထဲမှာဆိုရင်လည်း အဲ့ကားတွေကို ဘယ်သူမှမကြိုက်ကြလို့ အရောင်းအဝယ်က မရှိဘူး။ အဲဒီကားတွေကို ၅ နှစ်အတွက် ဘက်ထရီသက်တမ်းက ၇၅ ရာခိုင်နှုန်းအောက် မကျရဘူးဆိုတဲ့ အာမခံနဲ့တော့ သူတို့ရောင်းနေတယ်။ တကယ်လို့ သူတို့ သတ်မှတ်ထားတဲ့နှုန်းအောက် ရောက်ခဲ့ရင် ဘက်ထရီအသစ်တလုံး လဲပေးမယ်။ ဒါမှမဟုတ် ကားအသစ်တစီး ပြန်လဲပေးမယ်။ အဲ့ဒါမျိုးတွေတော့ ရှိတယ်။ ဒါပေမဲ့ လောလောဆယ်တော့ EV ကားတွေက ဈေးကွက်ထဲမှာ လုံးဝ ပေါ်ပြူလာဖြစ်တဲ့ စာရင်းထဲမှာတော့ မရှိသေးဘူး။ ဈေးကွက်က လက်မခံသေးဘူးဆိုတဲ့ သဘောပေါ့။ လျှပ်စစ်အားသွင်းနိုင်တဲ့ Charging station တွေ သူတို့ လိုက်လုပ်နေတယ်။ ဒါပေမဲ့ အဲ့ဒါတွေကလည်း သူတို့ပြောပုံအရ ၁ ယူနစ်အတွက် ဈေးက မသေး ပါဘူး။ ဒီတော့ အရမ်းကြီး မျှော်လင့်ချက်တော့ သိပ်မရှိသေးဘူး” လို့ ဒီဗွီဘီကို ပြောပါတယ်။

ပြည်တွင်းဈေးကွက်ထဲကို ဝင်ရောက်လာတဲ့ တရုတ်ကုမ္ပဏီထုတ် လျှပ်စစ်စွမ်းအင်သုံး (EV) မော်တော်ယာဉ် ၁ စီး တန်ဖိုးက အနည်းဆုံး ကျပ်သိန်း ၆၀၀ ရှိတဲ့အတွက် သာမန်လူတွေ မဝယ်နိုင်တဲ့ အနေအထားမျိုးမှာ ရှိနေတဲ့အပြင် ဘက်ထရီရဲ့ စွမ်းဆောင်ရည် ကျဆင်းလာတာနဲ့အမျှ ကားတန်ဖိုးကလည်း ကျဆင်းလာတဲ့ အားနည်းချက်ကြောင့် မြန်မာပြည်ဈေးကွက်မှာ လူကြိုက်နည်းနေသေးတာပါ။

ကားအရောင်းစင်တာ ဖွင့်လှစ်ထားတဲ့ လုပ်ငန်းရှင်တဦးက “သာမန်လူတန်းစားက ကား ၁ စီးကို သိန်း ၂၀၀ နဲ့ ၃၀၀ ကြားပဲ စဉ်းစားနိုင်တယ်။ ဒါပေမဲ့ EV ကား ၁ စီးတန်ဖိုးက ငွေပမာဏ များတဲ့အပြင် after service ကလည်း ဂျပန် used car ကားလို မဟုတ်ဘူးဗျ။ ပြန်ရောင်းတဲ့အခါ အဲဒီကားက ဘယ်လိုလဲဆိုရင် ကျနော်တို့ Laptop ဘက်ထရီလိုမျိုးပေါ့၊ Apple Macbook တွေကို ဝယ်တဲ့အခါမှာ battery cycle count ဆိုတာရှိတယ်။ ဘယ်လောက်သုံးထားပြီးပြီလဲ ဆိုတာ ကြည့်ပြီး ဈေးဖြတ်ကြတာ။ EV ကားတွေလည်း အဲဒီပုံစံပဲ။ ဘက်ထရီ ဘယ်လောက် သုံးပြီးသွားပြီလဲ ဆိုတဲ့အပေါ် ကြည့်ပြီးတော့ ဖြတ်လိုက်လို့ရှိရင် ကားတန်ဖိုးက ကျသွားပြီ။ ဒါပေမဲ့ Compression car တွေက အဲ့လိုပုံစံမျိုး မဟုတ်ဘူး။ ပိုက်ဆံ ၁၀ သိန်းလောက် ထပ်ထည့်လိုက်ရင် အင်ဂျင်က အသစ်အတိုင်း ပြန်ဖြစ်သွားတာ။ EV ကားတွေကတော့ ဘက်ထရီက သူ့ရဲ့အသက်လို ဖြစ်နေတာ။ အဲဒီဘက်ထရီက အကြိမ်အရေအတွက်နဲ့။ ဥပမာ အကြိမ် ၁,၀၀၀ ပေးထားတယ် ဆိုပါတော့။ အဲဒီမှာ ကျနော်တို့က အကြိမ် ၅၀၀ လောက် သုံးထားပြီးပြီဆိုရင် ပြန်ရောင်းတဲ့အခါ ၅၀၀ ဖိုးပဲရမှာ။ တကယ်လို့ ဘက်ထရီကို အသစ်တလုံးနဲ့ ပြန်လဲမယ်ဆိုရင်လည်း အဲဒီကားရဲ့ တန်ဖိုး သုံးပုံနှစ်ပုံလောက် ကုန်ကျစရိတ်ရှိတယ်” လို့ ဒီဗွီဘီကို ပြောပါတယ်။

စစ်ကောင်စီ လက်အောက်ခံ စွမ်းအင်ဝန်ကြီးဌာနရဲ့ ထုတ်ပြန်ချက်အရ ရန်ကုန်တိုင်းအတွင်းရှိ စက်သုံးဆီ ၂၄ ဆိုင်မှာ လျှပ်စစ်ကားတွေ အားသွင်းနိုင်ဖို့အတွက် EV Charging Point တွေ ထားရှိသွားမယ့်အပြင် နေပြည်တော်မှာ ၄ နေရာနဲ့ ရန်ကုန်-မန္တလေး အမြန်လမ်းပေါ်မှာလည်း ၅ နေရာလောက် Charging Point တွေကို တပ်ဆင်သွားဖို့ စီစဉ်ထားပြီး ဘက်ထရီ အားသွင်းခကိုတော့ ကားပိုင်ရှင်က ကျခံရမှာဖြစ်ပါတယ်။

ဒါပေမဲ့ တဖက်မှာလည်း ပြည်တွင်းမှာ လျှပ်စစ်မီးက အလုံအလောက် မရရှိတဲ့အတွက် အကြမ်းဖက်စစ်ကောင်စီက လျှပ်စစ်မီးကို အချိန်နဲ့သတ်မှတ်ပြီး အပိုင်းလိုက် ပေးနေရတာပါ။DVB

မန္တလေးတိုင်း၊ ပြည်ကြီးတံခွန်မြို့နယ်၊ သင်ပန်းကုန်း ညည (၂၂)ရပ်ကွက်တွင် နေထိုင်သည့် ယာယီ ရပ်ကွက်လူကြီး ၁ ဦးပစ်ခတ်ခံရပြီး သေဆုံးသွားကြောင်း Urban Guerrilla Force-MDY အဖွဲ့မှ တာဝန်ရှိသူ တစ်ဦးက ရန်ကုန် ခေတ်သစ် မီဒီယာသို့ ပြောဆိုသည်။

မတ်လ ၂၄ ရက်နေ့ ပြည်ကြီးတံခွန်မြို့နယ် သင်ပန်းကုန်း ညည (၂၂)ရပ်ကွက်၊ ၅၇(B)လမ်း၊ ၁၁၉လမ်းx ၁၂၀ လမ်းတွင် နေထိုင်သော ယာယီ ရပ်ကွက်လူကြီး ဒေါ်ညွန့်ညွန့်ရွှေကို UG အဖွဲ့များက ပစ်ခတ် တိုက်ခိုက်ခဲ့ပြီး သေဆုံးခဲ့ကြောင်း သိရသည်။

သေဆုံးသွားသော ဒေါ်ညွန့်ညွန့်ရွှေသည် ပြည်သူများကို အတင်းအကျပ် ဧည့်စာ ရင်း တိုင်ခိုင်းခြင်း၊ ဆက်ကြေး ကောက်ခံခြင်း၊ အကြောင်းကိစ္စ တစ်ခုခု ဖြစ် တိုင်း စစ်သားများအား ဖုန်းဆက်ခေါ်၍ ဖမ်းဆီးခိုင်းခြင်း၊ ခြိမ်းခြောက်ခြင်း များ ပြုလုပ်ခြင်းကြောင့် ပစ်ခတ်ရှင်းလင်းခဲ့ခြင်းကြောင်း Urban Guerrilla Force-MDY အဖွဲ့မှ တာဝန်ရှိသူ တစ်ဦးကပြောဆိုသည်။

အဆိုပါ တိုက်ခိုက်မှုကို Urban Guerrilla Force-MDy နှင့် Ranger Urban Guerrillas-RUG တို့က ပူးပေါင်း လုပ်ဆောင်ခဲ့ကြောင်း သိရသည်။

အလားတူ စစ်ကိုင်းတိုင်း၊ တန့်ဆည်မြို့နယ် ကံထူးမ နယ်မြေရဲစခန်းမှ ပျူစောထီး ခေါင်းဆောင်၏ သားမက်ဖြစ်သူ ရဲတပ်သားတစ်ဦး ယနေ့နံနက်ပိုင်း ခွေးရူးပြန်ရောဂါဖြင့် သေဆုံးသွားခဲ့ကြောင်း ဒေသခံများထံမှ သိရသည်။

သေဆုံးသွားသောရဲကို ယနေ့နေ့လယ် ၁၂နာရီခန့်တွင် ကံထူးမနယ်မြေ ရဲစခန်းနှင့် မီးသတ်ရုံးကြားရှိ မြေကွက်လပ်တစ်နေရာတွင် အမိန့်ပြန် တမ်း ရွတ်ဆို၍ သေနတ်ပစ်ဖောက် ‌သင်္ဂြိုလ်ကြကြောင်း မျက်မြင်ဒေသခံတစ်ဦးက ရန်ကုန်ခေတ်သစ်သတင်းဌာနသို့ပြောဆိုသည်။

“သေသွားတဲ့ရဲက သေသွားတဲ့ ပျူခေါင်းဆောင်ရဲ့ သမက်ပါ။ ဟိုတလောက လည်း ခွေးရူးအကိုက်ခံလိုက်ရတယ်။ အဲ့က‌တည်းက ရူးသလိုဖြစ်နေတယ် လို့ကြားတယ်။ ဒီနေ့ကျတော့ အရက်နာကျပြီး သေရော။ သူ့စရိတ်သူယူတာ”ဟု ‌ပြောသည်။

အဆိုပါရဲတပ်သားသည် ၂၀၂၁ခုနှစ်၊ စက်တင်ဘာလကတည်းက သတ်ဖြတ်ခံခဲ့ ရသော ပျူစောထီးခေါင်းဆောင် ရဲမြင့်၏ သမက်ဖြစ်ပြီး ၂၀၂၂ ခုနှစ် ဒီဇင် ဘာလ ၁၂ ရက်နေ့ကတည်းက ခွေးရူးကိုက်ခံရပြီးနောက် ကျန်းမာရေး‌ မကောင်း ဖြစ် နေခဲ့ကြောင်း၊ အရက်အသောက်များသဖြင့် အရက်နာကျပြီး သေဆုံးသွား ခဲ့ခြင်းဖြစ်ကြောင်း ဖရဲသီးသတင်းရင်းမြစ်တစ်ဦးက အတည်ပြုသည်။ khit thit

စစ်ကိုင်းတိုင်း၊ မြောင်မြို့နယ်အတွင်း စစ်ကောင်စီတပ်၏ တပ်မ (၉၉) ဘီလူးစစ်ကြောင်းနှင့် ဒေသကာကွယ် ရေးတပ်ဖွဲ့များအကြား တိုက်ပွဲများပြင်းထန်နေပြီး စစ်ကောင်စီတပ်ဘက်တွင် ထိခိုက်သေဆုံးမှုများနေကြောင်း မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့ထံမှ သိရသည်။

မတ်လ ၁၃ ရက်နေ့ မှစ၍ မြောင်မြို့နယ်အတွင်းသို့ ဝင်ရောက်လာသည့် စစ်ကောင်စီတပ်နှင့် ဒေသကာကွယ်ရေတပ်ဖွဲ့များအကြား ယနေ့ မတ် လ ၂၄ ရက်နေ့အထိ တိုက်ပွဲများဆက်တိုက် ဖြစ်ပွားနေပြီး စစ်ကောင်စီတပ်ဘက်က ၄၀ ဦးထက်မနည်းသေဆုံးထားကြောင်း CDSOM အဖွဲ့ မှ ခေါင်းဆောင် ကိုနွေဦး(မြောင်) က ပြောသည်။

၎င်းက “ စဝင်လာတဲ့ ၁၃ ရက်နေ့ကနေ ဒီနေ့ မတ်လ ၂၄ ရက်နေ့အထိတိုက်ပွဲတွေဖြစ်နေတယ်၊ ခုနကတင် တစ်ပွဲပြီးသွားတာ။ သူတို့ဘက်က ၁၅ ရက်နေ့ မှာ ရှစ်ယောက်သေတယ် ။ ၁၆ ရက်နေ့မှာ ကိုးယောက်သေတယ်၊၂၁ရက်နေ့ မှာ ကိုးယောက်သေတယ်၊ ဒီကနေ့ တိုက်ပွဲမှာ လေးယောက်သေတယ်” ဟု ပြောသည်။

တိုက်ပွဲများအတွင်း ဒေသကာကွယ်ရေးတပ်ဖွဲ့ ဝင် နှစ်ဦး ၊ ပြည်သူ သုံးဦးသတ်ဖြတ်ခံခဲ့ရပြီး နောက်ထပ် ကာကွယ်ရေးတပ်ဖွဲ့ ဝင် နှစ်ဦး လက် နက်ကြီးကျည် ထိမှန်ဒဏ်ရာရရှိခဲ့ကြောင်း ကိုနွေဦးက ဆိုသည်။

စစ်ကောင်စီတပ်၏တပ်မ (၉၉) စစ်ကြောင်းသည် မြောင်နယ်အတွင်းက PDF စခန်းများကို ရှာဖွေစီးနင်းခြင်းများပြုလုပ်နေပြီး ယင်းစစ် ကြောင်းနှင့် ထိပ်တိုက်တွေ့သည့် မည့်သူ့ကိုမဆိုသတ်ဖြတ်သွားကြောင်းကို နွေဦးက ဆိုသည်။

“’ဒီစစ်ကြောင်းက အစုံလုပ်တယ်၊ အဓိကတော့ ရွာတွေကိုရောက်ရင် PDFစခန်းတွေကိုရှာတယ်၊ တွေ့ ရင် သတ်တယ်။ PDF စခန်းလို့ ထင်တဲ့ နေရာတွေကို မီးရှို့တယ်၊ ရွာတွေကိုမီးရှို့တာတော့မရှိဘူး၊ သူတို့ နဲ့တွေ့ သမျှ အကုန်သတ်တာပဲ” ဟု ကိုနွေဦးက ပြောသည်။

ယင်းစစ်ကြောင်းသည် အင်အား ၁၅၀ ကျော်ဖြင့် မြောင်မြို့နယ်သို့ ဝင်ရောက်လာခြင်းဖြစ်ပြီး ဒေသကာကွယ်ရေးတပ်ဖွဲ့ များ၏တိုက်ခိုက်မှုကြောင့် အင်အား ၆၀ ကျော်လောက်သာ ကျန်ရှိနေပြီး ယနေ့ မတ်လ ၂၄ ရက်နေ့ တွင် မြောင်နှင့် မြင်းမူ အစပ်ရှိ လက်ယက်မ ကျေးရွာသို့ ရောက်ရှိနေကြောင်းသိရသည်။

ယင်းစစ်ကြောင်း မြောင်မြို့နယ် ထဲသို့ စတင်ဝင်ရောက်လာသည့်အချိန်မှစ၍ ဒေသခံပြည်သူများ ဘေးလွတ်ရာသို့ထွက်ပြေးတိမ်းရှောင်နေရပြီး စစ်ကြောင်းကို မြောင်နယ်ထဲက ထွက်သွားစေရန် တိုက်ခိုက်သွားမည်ဖြစ်ကြောင်း ကိုနွေဦးက ပြောသည်။

၎င်းက “သူတို့ မြောင်နယ်ထဲစဝင်ကတည်းက တစ်ရက်ကို ခုနစ်ရွာ ရှစ်ရွာလောက်ပြေးရတယ်၊ ညညဆို ပြည်သူတွေလည်း မအိပ်ရဲကြဘူး၊ အခုဆို သောင်းကျော်နေပြီ၊ ပြည်သူတွေကလည်း တအားကြောက်တယ်၊ ဒီစစ်ကြောင်းကိုလည်း ချေမှုန်းစေချင်တယ်၊ ကျတော်တို့လည်း စပြီးဝင်ကတည်းက တောက်လျှောက်တိုက်နေတယ်” ဟု ပြောသည်။

စစ်ကောင်စီတပ်၏ တပ်မ (၉၉) ဘီလူးစစ်ကြောင်းကို မြောင်မြို့နယ်အတွင်းရှိ ဒေသကာကွယ်ရေးတပ်ဖွဲ့များအားလုံးက ပူးပေါင်းတိုက်ခိုက်နေပြီး တိုက်ပွဲရက်ရှည်လာသည်နှင့်အမျှ လက်နက်ခဲယမ်းလိုအပ်ချက်များရှိလာနေသည့်အတွက် လက်နက်ခဲယမ်းများ ပံ့ပိုးပေးဖို့အတွက်ကိုလည်း ကိုနွေဦးက တောင်းဆို သည်။mizzima

ရန်ကုန်မြို့၊ အင်းစိန်အကျဉ်းထောင်မှာ မတ်လ ၂၄ ရက်က ဗုံးပေါက်ကွဲမှုဖြစ်ပြီး လုံခြုံရေးတပ်ဖွဲ့တွေက ထောင်ထဲက မျှော်စင်တွေကနေ အပြင်ဘက် ပေါက်ကွဲမှုဖြစ်တဲ့ နေရာတွေကို မှန်းပြီးပစ်ခတ်ခဲ့တယ်လို့ အင်းစိန်အကျဉ်းထောင်အနီးနေသူတယောက်ထံက သိရပါတယ်။

ထောင်ဝန်ထမ်းမိသားစုဝင်တယောက်ကလည်း “နေ့လယ် ၁၁ နာရီလောက်မှာ ဖြစ်တာ၊ ပေါက်တောဝ အေးစေတီဘက် ဝန်ထမ်းလိုင်းခန်း နောက်ပေါက်ဘက်မှာ ဗုံးကွဲတာပါ။ တချို့ကလည်း အပြင်ကနေ ဗုံးနဲ့လှမ်းပစ်တယ်လို့လည်း ပြောကြတယ်။ ကွဲတာတော့ အသေအချာပဲ၊ အသံအကျယ်ကြီးကို ကြားလိုက်ရတာ။ အဲ့ဒါဖြစ်ပြီးပြီးချင်း အထဲကနေ မျှော်စင်တွေက ပြန်ပစ်ကြတာ၊ ရမ်းသန်းပစ်တာပေါ့” လို့ ပြောပါတယ်။

အဆိုပါ ပေါက်ကွဲမှုနဲ့ ပစ်ခတ်မှုတွေမှာ လူတွေထိခိုက် သေဆုံးမှု အခြေအနေကိုတော့ လတ်တလော မသိရသေးပါဘူး။ 

ဒီနေ့ ဗုံးကွဲမှု ဖြစ်စဉ်နဲ့ပတ်သက်ပြီး စစ်ကောင်စီဘက်က သတင်းမထုတ်ပြန်သေးသလို ဒေသခံ UG အဖွဲ့တွေ၊ ပြည်သူ့ကာကွယ်ရေး တပ်ဖွဲ့တွေ ကလည်း သတင်းထုတ်ပြန်တာ မရှိသေးပါဘူး။

ပြီးခဲ့တဲ့ အောက်တိုဘာ ၁၉ ရက်ကလည်း အင်းစိန်ထောင် ဘူးဝရှေ့ ထောင်ဝင်စာပါဆယ် လက်ခံတဲ့နေရာမှာ ဗုံးနှစ်လုံး ဆက်တိုက်ပေါက်ကွဲခဲ့ပြီး ပေါက်ကွဲမှုဖြစ်တဲ့နေရာကို စစ်ကောင်စီဝန်ထမ်းတွေက ပစ်ခတ်တိုက်ခိုက်ခဲ့တာကြောင့် နိုင်ငံရေးအကျဥ်းသားတွေရဲ့ မိသားစုဝင်တချို့ အ ပါအဝင် လူ ၈ ဦးသေဆုံးပြီး ၁၁ ဦး ဒဏ်ရာရခဲ့ပါတယ်။

အဆိုပါပေါက်ကွဲမှုနဲ့ ပတ်သက်ပြီး စစ်ကောင်စီဘက် ဒီနေ့အထိ ဘယ်သူ့လက်ချက်ဆိုတာကို မဖော်ထုတ်နိုင်သေးပါဘူး။

ဒါနဲ့ပတ်သက်ပြီး ရန်ကုန်အခြေပြု စစ်အာဏာရှင်စနစ်တိုက်ဖျက်ရေး အထွေထွေသပိတ်ကော်မတီ (GSC)၊ စစ်အာဏာရှင်ဆန့်ကျင်ရေး လူထုလှုပ်ရှားမှုကော်မတီ (AJMM)နဲ့ လူမျိုးပေါင်းစုံ အထွေထွေသပိတ်ကော်မတီ (GSCN) အဖွဲ့တွေက အများပြည်သူ သွားလာနေတဲ့ နေရာတွေဟာ စစ်ရေးပစ်မှတ်အဖြစ် မသတ်မှတ်သင့်ကြောင်း၊ အများပြည်သူဆိုင်ရာ နေရာတွေကို တိုက်ခိုက်မှုကို ပြင်းထန်စွာရှုတ်ချကြောင်းနဲ့ ကျူး လွန်သူတွေ တာဝန်ခံရမယ်လို့ ကြေညာထားပါတယ်။DVB

စစ်ကိုင်းတိုင်း၊ အရာတော်မြို့နယ်တွင် စစ်သားများ လိုက်ပါလာသည့် ၁၂ ဘီး ကား ၅ စီးကို မိုင်းဆွဲ တိုက်ခိုက်ခဲ့ကြောင်း Danger Force LPDF အဖွဲ့မှ တာဝန် ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

မတ်လ ၂၃ ရက်နေ့ နံနက် ၆ နာရီ ၅၉ မိနစ်ခန့်တွင် မုံရွာ အနောက်မြောက်တိုင်း စစ်ဌာချုပ်မှ အရာတော်မြို့နယ်ရှိ အမှတ် ၁၀ စစ်အခြေခံ လေ့ ကျင့်ရေးတပ်သို့ စစ်သားများ လိုက်ပါလာသည့် ၁၂ ဘီးကား ၅ စီးဖြင့် ထွက်ခွာလာကြောင်း သိရသည်။

စစ်သားများ လိုက်ပါလာသည့် ၁၂ ဘီးကား ၅ စီးကို အရာတော်မြို့နယ် တုံးတင် က န်ကျေးရွာနှင့် ကမ်းဖြူကျေးရွာ အကြားတွင် ဒေသကာ ကွယ်ရေး တပ်ဖွဲ့ များက ပဒေသာမိုင်း ၆ လုံးဖြင့် ဖောက်ခွဲ တိုက်ခိုက်ခဲ့ကြောင်း၊ ထို့ပြင် လက်နက် ငယ်များဖြင့် ကိုက် ၅၀ အကွာအဝေးမှ ပစ်ခတ် တိုက်ခိုက်ခဲ့ရာ ကား ၁ စီး ထိခိုက် ပျက်စီးခဲ့ပြီး စစ်သားများ ထိခိုက်သေဆုံးမှု ရှိသော်လည်း အရေအတွက် အတည်မပြုနိုင်သေးကြောင်း သိရသည်။

” မိုင်းဆွဲ ပစ်ခတ် တိုက်ခိုက်တာ စစ်ခွေး တွေ ထိခိုက်သေမှုရှိတယ်။ အရေ အတွက် တော့ အတည်မပြုနိုင်သေးဘူး။ စစ်ခွေးတွေက လက် နက်ကြီး တွေနဲ့ ပြန်ပစ်တာတွေ ပေမယ့် ကျွန်ုပ်တို့ ရဲဘော်တွေ အထိအခိုက် အကျအဆုံးမရှိဘဲ ပြန်လည် ဆုတ်ခွာနိုင်ခဲ့တယ်” ဟု Danger Force LPDF အဖွဲ့မှ တာဝန်ရှိသူ တစ်ဦးက ပြောဆိုသည်။

အဆိုပါ တိုက်ခိုက်မှုကို Danger Force LPDF နှင့် လင်းယုန် တပ်ဖွဲ့တို့က ပူး ပေါင်း လုပ်ဆောင်ခဲ့ကြောင်း သိရသည်။

ထို့ပြင် စစ်ကိုင်းတိုင်း၊ ဆားလင်းကြီးမြို့နယ်အတွင်းရှိ ကျားတက် ရဲစခန်းကို လက်နက်ကြီးများဖြင့် ပစ်ခတ် တိုက်ခိုက်ခဲ့ကြောင်း ကာကွယ် ရေး တပ်ဖွဲ့ထံမှ သိရသည်။

မတ်လ ၂၃ ရက်နေ့ ည ၇ ခန့်တွင် ဆားလင်းကြီးမြို့နယ်၊ ကျားတက် ရဲစခန်းကို ဆားလင်းကြီး (ပကဖ) မှ ဦးဆောင်ကာ လက်နက်ကြီးများဖြင့် မိနစ် ၃၀ ကြာ‌ ‌သွားရောက် ပစ်ခတ် တိုက်ခိုက်ခဲ့ပြီး ထိခိုက်သေဆုံးမှု ရှိမရှိကို အတည်မပြု နိုင်သေးကြောင်း သိရသည်။

အဆိုပါ တိုက်ခိုက်မှုကို National Revolutionary Guards (NRG/Salingyi)၊ Chindwin Dynamiteနှင့် WI AG ထုတ်လုပ်ရေးနှင့်တိုက်ခိုက်ရေးတပ် တို့မှ ပူးပေါင်း လုပ်ဆောင်ခဲ့ကြောင်း သိရှိရသည်။khit thit

မန္တလေးတိုင်း စစ်ကောင်စီရုံး အနီးတွင် ယနေ့မတ်လ ၂၄ ရက်နေ့ နံနက်ပိုင်းက ဗုံးပေါက်ကွဲသံများ ဆက်တိုက်ထွက်ပေါ်ခဲ့ကြောင်း ဒေသခံ များထံမှ သိရသည်။

“အသံက အကြီးကြီးပဲ၊ လေးငါးချက်လောက်ဆက်တိုက်ကြားလိုက်ရတာဗျ၊ တိုင်းအစိုးရရုံးက ယာဉ်တန်း မိုင်း ဆွဲခံရတာလို့လည်းကြားတယ်၊ အခု ကျွန်တော်တို့ဘက်က လမ်းတွေအကုန် ပိတ်ပြီးစစ်နေတယ်” ဟု တိုင်းရုံးအနီး နေထိုင်သူတစ်ဦးက ပြောသည်။

မန္တလေး၊ အောင်မြေသာစံမြို့နယ် ၆၄ လမ်း၊ ၂၅ လမ်းနှင့် ၂၆ လမ်းကြားတွင် ပေါက်ကွဲမှု ဖြစ်ပွားခဲ့ခြင်းဖြစ်ပြီး ပေါက်ကွဲသည့်နေရာသည် ၆၄ လမ်း၊ ၂၃ လမ်းနှင့် ၂၄ လမ်းကြားရှိ စစ်ကောင်စီ၏ မန္တလေးတိုင်းရုံးနှင့် နှစ်လမ်းမြောက်တွင် ဖြစ်သည်။

ဗုံးပေါက်ကွဲမှုဖြစ်ခဲ့သော လမ်းနှင့် အနီးတဝိုက်တွင် စစ်ကောင်စီ၏ လက်နက်ကိုင် စစ်သားနှင့် ရဲများက ပိတ်ဆို့ စစ်ဆေးမှုများ တင်းတင်းကျပ်ကျပ် ပြုလုပ်ခဲ့ကြောင်း ဒေသခံတစ်ဦးက ပြောသည်။

အဆိုပါ ပေါက်ကွဲမှုအား မည်သည့်အဖွဲ့အစည်းက လုပ်ဆောင်ခြင်းသည်ကို မသိရသေးပေ။

မန္တလေးမြို့တွင် မတ် ၅ ရက်နေ့မှ ယနေ့ မတ်လ ၂၄ အထိ စစ်ကောင်စီ၏ နေရာ ငါးခုနှင့် အုပ်ချုပ်ရေးအဖွဲ့များ ဆက်တိုက် ပစ်ခတ်တိုက်ခိုက်ခံခဲ့ရပြီး ရဲတပ်သား တစ်ဦးနှင့် ရာအိမ်မှူးနှစ်ဦးသေဆုံးသွားသကဲ့သို့ တိုင်းအဆင့် အပါအဝင် ဝန်ထမ်းလေးဦးနှင့် ရဲတပ်သားတစ်ဦး ဒဏ်ရာရရှိခဲ့သည်။ mizzima