SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

မန္တလေးမြို့တွင် ပြောက်ကျားတိုက်ခိုက်မှုများ တကျော့ပြန် အရှိန်မြင့် လာပြီး မတ်လ ၁ ရက်နေ့မှ ၂၄ ရက်နေ့အထိ ပြောက်ကျား တိုက်ခိုက်မှုပေါင်း ၁၀ ကြိမ်ထက်မနည်း ဖြစ်ပွားခဲ့ကြောင်း ဒေသအခြေစိုက် တော်လှန်ရေး အင်အားစုနှင့် မြို့ခံများက ပြောသည်။

စစ်ကောင်စီနှင့် ဆက်စပ်နေရာများ၊ စစ်ကောင်စီ ထောက်တိုင်များကို ပစ်မှတ်ထား သည့် ပြောက်ကျားတိုက်ခိုက်မှုကို အရှိန်မြှင့် လုပ်ဆောင်နေခြင်း ကြောင့် ပြည်သူများ အသွားအလာ သတိထားကြရန် တော်လှန်ရေးအင်အားစုများက နှိုးဆော်ထားသည်။

“သတိ၊ အသိနဲ့ သွားလာနေထိုင်ကြဖို့ကိုပဲ ကျွန်တော်တို့ တိုက်တွန်းချင်ပါတယ်၊ အထူးသဖြင့် စကစနဲ့ပတ်သက်တဲ့ နေရာတွေ ဒီနောက်ပိုင်း မသွားကြတာ အကောင်းဆုံးပဲ၊ PDF တွေက ဟိုတလောကလေးတင် သတင်းထုတ်ပြန် ထားတာ ရှိတယ်၊ သူတို့ရဲ့ တိုက်ခိုက်မှုတွေကို အရှိန်မြှင့်သွားမှာမို့လို့ ပြည်သူတွေအနေနဲ့ စကစတွေနဲ့ ဝေးဝေးနေ ကြပါလို့ မေတ္တာရပ်ခံထုတ်ပြန်ထားတာပါ” ဟု လုံခြုံရေး အရ အမည်မဖော်ပြလိုသော တော်လှန်ရေးအင်အားစုဝင် တစ်ဦးက ပြောသည်။

မန္တလေးမြို့တွင် ၂၀၂၂ နှစ်ကုန်ပိုင်းမှစ၍ ပြောက်ကျားတိုက်ခိုက်မှု အထိုက် အလျောက် လျော့ကျခဲ့သော်လည်း မတ်လအတွင်း စစ်ကောင်စီနှင့် ဆက်စပ်သည့် နေရာနှင့် လူပုဂ္ဂိုလ်တိုက်ခိုက်ခံရမှု ဆက်တိုက်ဖြစ်ပွားလာနေခြင်း ဖြစ်သည်။

“ဒီတစ်လအတွင်းမှာကို ၁၀ ကြိမ်ထက်မနည်းရှိနေပြီ၊ စကစနေရာတွေ စကစ ဒလန်တွေ သစ္စာဖောက်တွေ ဗုံးနဲ့ပစ်ခံရတယ်၊ လက်ဖက်ရည်ဆိုင်ထဲထိုင်နေရင်း အိမ်ထဲနေနေရင်း သေနတ်နဲ့ပစ်သတ်ခံရတာတွေရှိတယ်၊ ဒါကိုမသိကျိုးကျွံပြုပြီး သွားလာနေရင်၊ အန္တရာယ်ကကိုယ့်အနားရောက်လာလိမ့်မယ်” ဟု မြို့ခံတစ်ဦးက ပြောသည်။

ပြောက်ကျားတိုက်ခိုက်မှုများ တကျော့ပြန် အရှိန်မြင့်လာနေသော မန္တလေးမြို့တွင် စစ်ကောင်စီတပ်က သေနတ်များ ပစ်ဖောက်ခြင်းနှင့် ဧည့်စာရင် ဝင်ရောက် စစ်ဆေးမှုများ ရှိနေကြောင်း သိရသည်။

မန္တလေးမြို့တွင် မတ်လ ၂ ရက်နေ့က မန္တလေးတောင်ခြေ အနီးဆိုင်ကယ်စီး လာသည့် တက္ကသိုလ်ကျောင်းသား တစ်ဦး လမ်းပေါ်ပစ်သတ်ခံခဲ့ရသည်။

၎င်းအ သတ်ခံရမှုနှင့်ပတ်သက်၍ စစ်ကောင်စီထံ အလင်း၀င်ပြီး တော်လှန်ရေး အင်အားစုများအား လက်ထောက်ချနေခြင်းကြောင့် ပစ်သတ်ခဲ့ခြင်းဖြစ်ကြောင်း တော်လှန်ရေး အင်အားစုများဘက်က ဆိုသည်။

လက်ရှိ မန္တလေးမြို့တွင် မတ်လ ၁ ရက်နေ့မှ ယမန်နေ့ မတ် ၂၄ ရက်အထိ စစ်ကောင်စီ၏နေရာ ခြောက်ခုတိုက်ခိုက်ခံထားရပြီး စစ်ကောင်စီနှင့် ပတ်သက် သည့် လူပုဂ္ဂိုလ် တိုက်ခိုက်ခံရမှု လေးကြိမ် ဖြစ်ထားသည်။

အဆိုပါ ဖြစ်စဉ်များအနက် တော်လှန်ရေးသစ္စာဖောက်ဟု စွပ်စွဲကာ ပစ်သတ်ခံရသူ တက္ကသိုလ် ကျောင်းသားတစ်ဦး၊ အမျိုးသမီးရာအိမ်မှူး အ ပါအ၀င် ရာအိမ်မှူးသုံးဦး၊ ရဲတပ်သားတစ်ဦး သေဆုံးခဲ့ပြီး ဒု-ဦးစီးမှူး အပါအ၀င် ၀န်ထမ်းခြောက်ဦးနှင့် ရဲ တစ်ဦး ဒဏ်ရာရခဲ့သည်။

ထိုသို့ ပစ်ခတ်တိုက်ခိုက်မှုများ ခပ်စိတ်စိတ်ဖြစ်လာပြီးနောက်ပိုင်း မန္တလေးမြို့တွင် စစ်ကောင်စီဘက်က လုံခြုံရေးတင်းကြပ်ထားပြီး ယင်းသို့တင်းကြပ်ထားသည့် ကြားက မတ်လ ၂၄ ရက်နေ့ နံနက်ပိုင်းတွင် စစ်ကောင်စီ၏ မန္တလေးတိုင်းရုံးအနီး ဗုံးကွဲမှု ဖြစ်ပွားခဲ့သည်။

ရန်ကုန်၊ မန္တလေးအပါအဝင် မြို့ကြီးများတွင် စစ်ကောင်စီတပ်ကို ပစ်မှတ် ထားသော ပြောက်ကျားတိုက်ခိုက်မှုများ ဆက်ရှိနေပြီး စစ်ကောင်စီ ဘက်ကလည်း မြို့အနှံ့ လက်နက်ကိုင်အစောင့် စစ်သားများချကာ ပစ်ခတ် ဖမ်းဆီးမှုများ ပြုလုပ် နေသည်။mizzima

မသမာတဲ့ နည်းလမ်းနဲ့ လျှပ်စစ်ဓာတ်အား တရားမဝင်သုံးစွဲမှုတွေ ရှိနေတဲ့အတွက်  မြို့နယ်အလိုက် ကွမ်းဆင်းစစ်ဆေးပြီး  အရေးယူသွားမယ်လို့  ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) က  ထုတ်ပြန်သတိပေးထားပါတယ်။

တရားမဝင် ဓာတ်အားသုံးစွဲသူတွေကြောင့် ဓာတ်အားပျောက်ဆုံးမှုတွေ၊ ဗို့အားကျဆင်းမှုတွေ၊ ထရန်စဖော်မာတွေမှာ ဝန်အားမနိုင်နင်းမှုကြောင့် လောင်ကျွမ်းပျက်စီးမှုတွေ ဖြစ်တဲ့အပြင်   လျှပ်စစ်ကဏ္ဍမှာ ဝင်ငွေ လျော့နည်းကျဆင်းမှုတွေ  ဖြစ်ပေါ်နေစေတဲ့အတွက် သက်ဆိုင်ရာ မြို့နယ်အလိုက် အဖွဲ့နဲ့ ကွင်းဆင်းစစ်ဆေးပြီး အရေးယူဆောင်ရွက်သွားမယ်လို့ YESC က ထုတ်ပြန်ထားတာပါ။

လျှပ်စစ်ဓာတ်အားကို ခိုးယူသုံးစွဲတာ၊ ဆင့်ပွားဓာတ်အားဆက်သွယ်အသုံးပြုတာ၊ အထွေထွေ အိမ်သုံးမီတာ၊ အိမ်တွင်းသုံးပါဝါမီတာကနေ စီးပွားရေးလုပ်ငန်းလုပ်ကိုင်တာ၊ အသေးစားစက်မှု လက်မှုလုပ်ငန်းတွေမှာ ခွင့်ပြုဝန်အားထက် ပိုမိုသုံးစွဲတာ၊ မီတာအမျိုးမျိုးကို ပြုပြင်ပြီး ဓာတ်အားခိုးယူသုံးစွဲတာ၊  လျှပ်စစ်ဓာတ်အားအသုံးမပြုဖို့ ကန့်သတ်တားမြစ်ထားတဲ့အချိန်မှာ ဓာတ်အားရယူပြီး စက်မှုလက်မှုလုပ်ငန်းတွေမှာ အသုံးပြုတာ၊ လျှပ်စစ်ဓာတ်အား မလုံလောက်မှုကြောင့် အလှည့်ကျ ဓာတ်အားပိတ်ထားတဲ့ အချိန်မှာ မိမိသဘောနဲ့  လျှပ်စစ်ဓာတ်အားကို ရယူပြီး စက်မှုလက်မှုလုပ်ငန်းတွေမှာ အသုံးပြုတာ အပါအဝင်  နည်းလမ်း ၁၁ ခုနဲ့  လျှပ်စစ်ဓာတ်အားကို တရားမဝင်သုံးစွဲမှုတွေ ပြုလုပ်နေကြတယ်လို့ YESC ရဲ့ ထုတ်ပြန်ချက်မှာ ဖော်ပြထားပါတယ်။

အဲဒီနည်းလမ်းတွေထဲက တခုခုကို ဖောက်ဖျက်ကျူးလွန်ကြောင်း စစ်ဆေးဖော်ထုတ်တွေ့ရှိရင်  မီးသုံးစွဲသူ ကာယကံရှင်နဲ့အတူ ပူးပေါင်းကြံစည်ပါဝင် လုပ်ဆောင်သူတွေကိုပါ ဓာတ်အားဖြတ်တောက်တာ လျော်ကြေးငွေကို တပ်ဆင်ဝန်အားအရ တွက်ချက်တောင်းခံတာ စတဲ့ အရေးယူမှုတွေ လုပ်ဆောင်သွားမယ်လို့ ဆိုပါတယ်။ 

ဒါ့အပြင် ၂၀၁၄ ခုနှစ် လျှပ်စစ်ဥပဒေပုဒ်မ ၅၂၊ ၅၃ အရလည်း အမှုဖွင့် တရားစွဲဆိုသွားမယ်လို့  ဆိုထားပြီး ပြစ်မှုထင်ရှားကြောင်း စီရင်ခြင်းခံရရင် ငွေဒဏ်အပြင် အနည်းဆုံးငါးနှစ်ကနေ အများဆုံးဆယ်နှစ်အထိ ထောင်ဒဏ်ချမှတ်ခံရမယ်လို့လည်း  YESC က သတိပေးထားပါတယ်။ DVB

စစ်ကိုင်းတိုင်းတွင် တိုက်ပွဲဝင်နေကြသော ကျောင်းသားရဲဘော်များအတွက်ရည်ရွယ်၍ ခွပ်ဒေါင်းရဲ့မောင်းပြန် သိန်း၃၀၀ ကမ်ပိန်းကို ရတနာပုံတက္ကသိုလ်ကျောင်းသားများသမဂ္ဂမှ ဦးဆောင်စီစဉ်နေသည်ဟု သတင်းရရှိသည်။

အဆိုပါ ကမ်ပိန်းကို ပြီးခဲ့သည့် မတ်လ ၁၆ရက်မှစတင်ခဲ့ပြီး လာမည့်ဧပြီလ၁၆ရက်အထိ ပြုလုပ်သွားမည်ဟု သိရသည်။ကမ်ပိန်းမှ မောင်းပြန် သေနတ်တလက်စာ ကျပ်သိန်း၃၀၀ မျှော်လင့်ထားသည်ဟု ရတနာပုံတက္ကသိုလ်ကျောင်းသားများသမဂ္ဂမှ ပြန်ကြားရေးတာဝန်ရှိသူက မဇ္စျိမကိုပြောသည်။

၎င်းက”ကျွန်တော်တို့ အချိန်အားဖြင့် တလမှန်းထားပါတယ်။တလအတွင်းမှာရနိုင်မလားပေါ့ ။ တကယ်လို့ လိုအပ်လာရင်လည်း လိုအပ်သလို အချိန်ကိုတိုးမြှင့်သွားဖို့ရှိပါတယ်။ တကယ်လို့ ငွေပြည့်သွားရင် ကျွန်တော်တို့တလအတွင်းပြီးသွားဖို့ ပြင်ဆင်ထားဖို့ရှိပါတယ်”ဟုပြောသည်။

ကမ်ပိန်းအတွက် လှူဒါန်းမှုတွင် ပါဝင်ချင်သူများသည် ရတနာပုံတက္ကသိုလ်ကျောင်းသားများသမဂ္ဂ Facebook Page သို့ ဆက်သွယ်ပြီး ငွေပေးပို့မှုပုံစံအား အသေးမေးမြန်းနိုင်သည်ဟု ဆိုသည်။ လှူဒါန်းမှုကို ကျေးဇူးတုံ့ပြန်သည့်အနေဖြင့် ရတနာပုံတက္ကသိုလ်ကျောင်းသားသမဂ္ဂမှ ဂုဏ်ပြုလွှာများ ပြန်လည်ပေးအပ်သွားမည်ဟုသိရသည်။

” ရတဲ့အလှုငွေတွေကို ကျွန်တော်တို့ လိုအပ်တဲ့နေရာတွေမှာ အသုံးချနေတာဖြစ်ပါတယ်။ လိုအပ်တဲ့အဖွဲ့အစည်းတွေကို တိုက်ရိုက်ထောက်ပံ့ လှူဒါန်းတာမျိုးတွေကို ကျွန်တော်တို့ လုပ်ပါတယ်။ မိဘပြည်သူတွေကလည်း ထဲထဲဝင်ဝင်ပါဝင်ကြတာမျိုးတွေရှိပါတယ်။ မင်းတပ်တို့၊ကရင်နီတို့တုန်းက ထင်မထားလောက်အောင် အလှူငွေရတာမျိုးတွေ ကျွန်တော်တို့ ကြုံခဲ့ရပါတယ်။ ဒီထက်လည်းပိုပြီး များလာနိုင်ဖို့ ကျွန်တော်တို့မျှော်လင့်တယ်။ ဒီတခေါက်ကတော့ ကျွန်တော်တို့အနေနဲ့ ရဲဘော်တွေအတွက်ပေါ့။ နောက်တခေါက်ဆိုရင် စစ်ဘေးရှောင်တွေအတွက်၊ပ ညာရေးအဖွဲ့အစည်းတွေအတွက် ဒါတွေအတွက်လည်း ကျွန်တော်တို့လုပ်ဆောင်ပေးနိုင်ဖို့ အမြဲတမ်းပြင်ဆင်နေပါတယ်။ကျွန်တော်တို့ဆီမှာ အချိန်မရွေး လာရောက်လှူဒါန်းလို့ ရပါတယ်”ဟု အလှူငွေများနှင့် ပတ်သက်၍ လုပ်ဆောင်နေမှုများကို ရတနာပုံတက္ကသိုလ် ကျောင်းသားသမဂ္ဂ ပြန် ကြားရေး တာဝန်ရှိသူက ရှင်းပြသည်။mizzima

ကရင်ပြည်နယ်၊ မြဝတီနှင့် ကော့ကရိတ်မြို့နယ်အတွင်းရှိ စစ်ကောင်စီ တပ်စခန်း၊ ကင်းစခန်းများ ယနေ့ (မတ်လ ၂၅ ရက်) တွင် တိုက်ခိုက်ခံရပြီးနောက် စစ်ကောင်စီက လေကြောင်းနှင့် မြေပြင်မှ ပြန်လည်ပစ်ခတ်စဉ် ကျုံဒိုးမြို့မှ အမျိုးသား ၂ ဦး သေဆုံးကြောင်း ဒေသတွင်း သတင်းရင်းမြစ်များထံမှ သိရသည်။

ကရင်အမျိုးသားလွတ်မြောက်ရေးတပ်မတော် (KNLA) နှင့် ပြည်သူ့ကာကွယ်ရေးတပ်မတော် (PDF) တပ်များ ပူးပေါင်းပြီး သွားရောက်တိုက် ခိုက်ခြင်း ဖြစ်သည်ဟု သိရသည်။

တိုက်ပွဲကြောင့် ဒေသခံတို့ ထွက်ပြေးနေရသည်၊ စစ်ရဟတ်ယာဉ်နှစ်စီးက ကော့ကရိတ်နှင့် ၁၅ မိုင်အကွာရှိ ကျုံဒိုးမြို့အတွင်းသို့ ပစ်ခတ်ခဲ့သည်ဟု ဒေသခံတစ်ဦးက ပြောသည်။

“ဒေသခံ အမျိုးသား ၂ ဦး သေသွားတယ်။ လက်နက်ကြီးကြောင့်လား၊ ရဟတ်ယာဉ်ပေါ်က ပစ်တာကြောင့်လားတော့ မသိလိုက်ဘူး၊ တစ်ပြိုင် တည်းပစ်နေတာဆိုတော့။ အရပ်သား ဒဏ်ရာရတာတွေ ရှိနေတယ်။ ၅ ရွာမကဘူး၊ ပြေးနေရတယ်” ဟု တိုက်ပွဲမှ လွတ်ရာ တိမ်းရှောင်နေရသည့် အထက်ပါ အမျိုးသားက ပြောသည်။

ကျုံဒိုးမြို့အခြေစိုက် စစ်ကောင်စီတပ်ရင်းဖြစ်သည့် အမှတ် (၅၄၅) နှင့် (၅၄၆) တို့ကလည်း လက်နက်ကြီးများဖြင့် ပစ်ခတ်မှုများကြောင့် ဒေ သခံတို့ ဒဏ်ရာရသည့်အထဲတွင် အမျိုးသမီးနှင့် ကလေးငယ်အချို့ ပါဝင်ကြောင်း သိရသည်။

တိုက်ပွဲကြောင့် KNLA ပူးပေါင်းတပ်ဖွဲ့ ကျားဖြူစစ်ကြောင်းက “စစ်ရေး၊ လုံခြုံရေးအခြေအနေများ ရှုပ်ထွေးနေပါသဖြင့်” ယနေ့မှစ၍ ကျုံဒိုးမြို့ နယ်မှ မြဝတီမြို့နယ်ကြား ဖြတ်သန်းသွားလာခြင်း မပြုရန် ဒေသခံတို့ကို အထူးမေတ္တာရပ်ခံသည်ဟု ကြေညာချက် ထုတ်ပြန်ထားသည်။

KNLA စစ်ရေးသတင်းရင်းမြစ်တစ်ခုက နံနက် ၅ နာရီဝန်းကျင်တွင် စတင်တိုက်ခိုက်ခဲ့ရာမှာ ထိုင်း-မြန်မာနယ်စပ် မြဝတီကုန်သွယ်ရေးဇုန်၊ မြဝတီမြို့ အာရှလမ်းမကြီးပေါ်ရှိ ကျုံဒိုးနှင့် ကော့ကရိတ်ဒေသများတွင်ပါ တိုက်ပွဲများဖြစ်နေသည်ဟု ဆိုသည်။

မြဝတီကုန်သွယ်ရေးဇုန်တွင် ရဲတပ်ဖွဲ့၊ ကရင်ပြည်နယ် နယ်ခြားစောင့်တပ်ဖွဲ့ (BGF) တို့ ပူးပေါင်းစစ်ဆေးသည့်ဂိတ်၊ အကောက်ခွန်ရုံးတို့ကို တိုက်ခိုက်ခဲ့သည်ဟု ဆိုသည်။

“မြဝတီ ခလရ ၂၇၅ တစ်ဝိုက်ပေါ့။ မြေပြင်ထိတွေ့မှုက အဲ့နေရာတွေပါ။ စစ်ကောင်စီဘက်က လက်နက်ကြီး ပြန်ပစ်တာကတော့ အခုက မြဝတီမြို့နယ်ထဲမှာပါတဲ့ မဲကနယ်ရွာ တစ်ဝိုက်ထိပါ။ မြဝတီနဲ့ နီးနီးလေးပါပဲ” ဟု အထက်ပါ KNLA အရာရှိက ပြောသည်။

တိုက်ခိုက်မှုကြောင့် သင်္ကန်းညီနောင်အကောက်ခွန်ရုံး မီးလောင်ခဲ့ပြီး မြဝတီမြို့နှင့် ၇ မိုင်ခန့် ဝေးသော သင်္ကန်းညီနောင်ရဲစခန်း၊ ခလရ (၂၇၅) တပ်ရင်းရှိသည့် နေရာများတွင် တိုက်ပွဲများ ဆက်ဖြစ်နေကြောင်း အထက်ပါ သတင်းရင်းမြစ်က မွန်းလွဲပိုင်းတွင် ပြောသည်။

ကျုံဒိုးမြို့အတွင်း တိုက်ပွဲဖြစ်သည့် နေရာများမှာ ကျုံဒိုးရဲစခန်း၊ ညောင်ရိပ်သာကျေးရွာအတွင်းရှိ ခမရ (၅၄၆) တပ်ရင်းရှိနေသည့် နေရာများ ပါဝင်သည်။

ထိုင်းမြန်မာနယ်စပ် ကုန်စည်စီးဆင်းမှုအတွက် အဓိကကျသည့် အာရှလမ်းဟု ခေါ်ကြသော မြဝတီ-ကော့ကရိတ် အဝေးပြေးလမ်းမတွင် ကတ္တရာ အချပ်လိုက် ကြွတက်နေသည့်ပုံမှာ တိုက်ပွဲဖြစ်နေစဉ် အွန်လိုင်းတွင် မျှဝေနေကြသည့် ပုံများထဲတွင် ပါဝင်သည်၊ ကတ္တရာလမ်းအောက် ရေဆင်းပိုက်အတွင်းပိုင်း ဖောက်ခွဲမှုကြောင့် ဖြစ်နိုင်သည်ဟုလည်း တချို့က မှတ်ချက်ပေးနေကြသည်။

ကျုံဒိုးဘက်အခြမ်းတွင် စစ်ရဟတ်ယာဉ် ၂ စင်း ရောက်လာကြောင်း၊ တိုက်ပွဲကြောင့် ကျုံဒိုးမြို့နယ်နှင့် မဲကနယ်ကျေးရွာအတွင်းရှိ ဒေသခံအများအပြား ထွက်ပြေးတိမ်းရှောင်နေရကြောင်း KNLA က ဆိုသည်။

တိုက်ပွဲကြောင့် ကျုံဒိုးမြို့တွင် ကမ်းနီး၊ ညောင်ရိပ်သာ၊ သရက်တော၊ တောင်ကရင်စု၊ မြောက်ကရင်စုကျေးရွာတို့မှ ဒေသခံတို့ ထွက်ပြေးနေရသည်ဟု ၎င်းက ဆက်ပြောသည်။

“လက်နက်ကြီး ပစ်ခတ်တာနဲ့ ရဟတ်ယာဉ်နဲ့ ပစ်နေတာ ဆက်ရှိနေတယ်။ ရဟတ်ယာဉ်က သူတို့ Mi35 နဲ့ သင်္ကန်းညီနောင်ကနေ ကျုံဒိုးအထိ သွားလိုက်လာလိုက် ပစ်တယ်” KNLA အရာရှိက ယနေ့ မွန်းလွဲပိုင်းတွင် Myanmar Now ကို ပြောသည်။

နှစ်ဖက်ဒဏ်ရာရ၊ ကျဆုံးမှု အခြေအနေကို အသေးစိတ် အတည်မပြုနိုင်သေးပေ။

မြဝတီ-မဲဆောက် ချစ်ကြည်ရေး အမှတ် (၁) နှင့် အမှတ် (၂) တံတားတို့မှာ တိုက်ပွဲကြောင့် ပိတ်ထားရပြီး ညနေ ၃ နာရီဝန်းကျင်တွင် ပြန်လည်ဖွင့်လှစ်ခဲ့ကြောင်း နယ်စပ်ကုန်သည်များက Myanmar Now ကို ပြောသည်။

“တံတားက အခုလေးတင်ပဲ ပြန်ဖွင့်တယ်။ တိုက်ပွဲ ခဏငြိမ်သွားလို့ ပြန်ဖွင့်တာလို့ သိရတယ်။” ဟု မြဝတီ-မဲဆောက် ကုန်သည်တစ်ဦးက ဆိုသည်။

ထိုတံတားများသည် ကပ်ဘေးကာလတွင် သုံးနှစ်ကြာ ပိတ်ထားခဲ့ရပြီးမှ ယခုနှစ် ဇန်နဝါရီ ၁၂ တွင် ပြန်လည်ဖွင့်လှစ်ခဲ့ခြင်း ဖြစ်ပြီး ယနေ့ မြန်မာဘက်ခြမ်းတိုက်ပွဲကြောင့် ထိုင်းဘက်တွင် လက်နက်ကိုင်လုံခြုံရေး ထူထူထပ်ထပ် တွေ့ရကြောင်း ကုန်သည်များက ပြောသည်။

စစ်ကောင်စီက တိုက်ပွဲသတင်း ထုတ်ပြန်ခြင်း မရှိပေ။

မြဝတီမြို့တွင် ယနေ့ည ၄ နာရီမှ နောက်တစ်နေ့ (၂၆.၃.၂၀၂၃) နံနက် ၁၀ နာရီထိ အပြင်မထွက်ရန် ယနေ့ နေ့လယ်ပိုင်းတွင် စစ်ကောင်စီ၏ ရပ်ကွက်အုပ်ချုပ်ရေးပိုင်းက အမိန့်ထုတ်ပြန်ထားသည်၊ တိုက်ပွဲကြောင့် လမ်းပေါ်တွင် အသွားအလာ ရှင်းလင်းနေကြောင်း မြဝတီမြို့ခံ အမျိုးသားတစ်ဦးက Myanmar Now ကို ညနေပိုင်းတွင် ပြောသည်။

စစ်ကောင်စီက စစ်ကိုင်းတိုင်း၊ ကယားပြည်နယ် စသည့် ဒေသများကို ထိုးစစ်ဆင်နေစဉ် မြန်မာပြည်တောင်ပိုင်းတွင် တော်လှန်ရေးအဖွဲ့များ၏ တိုက်ခိုက်မှုနှင့် ရင်ဆိုင်ရခြင်း ဖြစ်သည်။

ယခုနှစ် ဇန်နဝါရီ ၂၃ ရက်နေ့က စစ်ကောင်စီယန္တရားလည်ပတ်နေမှု ရပ်တန့်သွားစေရန် ရည်ရွယ်ချက်ဖြင့် ထိုင်း-မြန်မာနယ်စပ်၊ ကြာအင်းဆိပ်ကြီးမြို့နယ်၊ ဘုရားသုံးဆူမြို့လယ်ရှိ စစ်ကောင်စီ၏ ထောက်လှမ်းရေးရုံးအပါအဝင် ဌာနဆိုင်ရာရုံး ၄ ခုကို တော်လှန်ရေးအဖွဲ့များက မီးရှို့ဖျက်ဆီးရာမှ တိုက်ပွဲများ ရက်အတန်ကြာ ပြင်းပြင်းထန်ထန် ဖြစ်ပွားခဲ့သည်။ myanmar now

ပဲခူးတိုင်း အုတ်ဖိုမြို့နယ်မှာ စစ်ကောင်စီတပ်နဲ့ ဗိုလ်မိုးကြိုးဦးဆောင်တပ်တို့ တိုက်ပွဲဖြစ်ပွားရာ စစ်ကောင်စီ တပ်ဖွဲ့ဝင် ၆ ယောက် သေဆုံးကာ အများအပြားဒဏ်ရာ ရရှိခဲ့တယ်လို့ ပဲခူး PDF တွေက ပြောပါတယ်။

ဂမုန်းဆည်နားက တာဝါတိုင်ရွာနားမှာ စစ်ကောင်စီစစ်ကြောင်းကို သာယာဝတီခရိုင် PDF တပ်ရင်း ၃၈၀၁၊ တပ်ခွဲ၅ (ဗိုလ်မိုးကြိုးအဖွဲ့)က ဦး ဆောင်ပြီး ပြည်ခရိုင် PDF တပ်ရင်း ၃၆၀၂၊ တပ်ခွဲ၅ ၊ တပ်စု ၂ နဲ့  ပူးပေါင်းကာ  မတ် ၂၄ ရက် မနက် ၁၀ နာရီကျော်မှာ မိုင်းဆွဲ တိုက်ခိုက်ခဲ့တယ်လို့ သိရပါတယ်။

အဲဒီနောက် တိုက်ပွဲဖြစ်ပွားခဲ့ပြီး စစ်တပ်က ၆ ယောက် သေဆုံးကာ ပူးပေါင်းတပ်ဖွဲ့တွေအနေနဲ့ ထိခိုက်မှု မရှိဘူးလို့ ဆိုပါတယ်။

စစ်ကောင်စီတပ်က တိုက်ပွဲဖြစ်ပွားရာ နေရာတွေကို လက်နက်ကြီး ပစ်ကူပေးခဲ့တယ်လို့ ပဲခူး PDF က သတင်းထုတ်ပြန်ထားပါတယ်။

ပဲခူးတိုင်းထဲမှာ စစ်ကောင်စီတပ်နဲ့ ဒေသကာကွယ်ရေးတပ်တွေကြား နေ့စဥ်လိုလို တိုက်ပွဲ ဖြစ်ပွားနေတယ်လို့ သိရပါတယ်။

မန္တ​လေးတိုင်း စဥ့်ကူးမြို့နယ် ရွာသာယာရွာကို စစ်ကြောင်းထိုးလာတဲ့ စစ်ကောင်စီတပ်ကို မတ် ၂၄ ရက်ည ၇ နာရီလောက် လက်နက်ကြီးလက် နက်ငယ်တွေနဲ့တိုက်ခိုက်ခဲ့တယ်လို့ ဗိုလ်ကျားကြီးအဖွဲ့က ဗိုလ်ကျားကြီးက ပြောပါတယ်။

ကြက်တူရွေးကျေးရွာကနေ အင်အား ၈၀ ဝန်းကျင်နဲ့ ထွက်လာတဲ့ စစ်ကြောင်းကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တာလို့ ပြောပါတယ်။

“ရွာသာယာရွာကို သူတို့စစ်ကြောင်းထိုးလာတာ၊ ရွာသာယာက ပျူရွာဆိုတော့ သူတို့နဲ့ပေါင်းလိုက်ရင် အင်အား ၁၀၀ လောက်ရှိတယ်၊ ည ၇ နာ ရီကနေ ၁၂ နာရီအထိ လက်နက်ကြီးတွေနဲ့ ပစ်ခတ်ခဲ့တာ၊ လက်နက်ငယ်ကတော့ စနိုက်ပါနဲ့ပစ်ခဲ့တာ” လို့ ဗိုလ်ကျားကြီးက ပြောပါတယ်။

ရွာသာယာရွာကို ရောက်နေတဲ့ စစ်သားတွေကလည်း လက်နက်ကြီးနဲ့ ၁၀ ချက်လောက် ပြန်လည်ပစ်ခတ်ခဲ့တယ်လို့ ပြောပါတယ်။

စစ်ကောင်စီတပ်ဘက်က ထိခိုက်သေဆုံးမှု အခြေအနေကို မသိရသေးဘဲ ပြည်သူ့ကာကွယ်ရေးတပ်ဘက်ကတော့ ထိခိုက်ဒဏ်ရာရသူ မရှိဘူးလို့ ဆိုပါတယ်။DVB

မွန်ပြည်နယ် ဘီးလင်းမြို့နယ်ရှိ ကျောက်ပိရဟန္တာ၏ ပုံများကို အသုံးပြုကာ အလောင်းတော်ကဿပဘုရား မျက်လုံးတော်ပွင့်နေကြောင်း သတင်းမှား ဖြန့်ဝေမှုရှိနေသည်။

လူပေါင်း ၅၀၀,၀၀၀ ကျော်မှ ကြိုက်နှစ်သက်ကြောင်းဖော်ပြထားသည့် “TayarMedia” အမည်ရှိဖေ့ဘုတ်စ့်ပေ့ချ်တစ်ခုမှ “အလောင်းတော် ကဿပမြတ်စွာဘုရား မျက်လုံးတော် ဖွင့် ကြယ်နဲ့လနဲ့ကလည်း ထပ် ဘာတွေဖြစ်မယ်မှန်းတော့မသိပေမယ့် တစ်ခုခုတော့ထူးခြားလိမ့်မယ်” ဟုဆိုကာ ပုံများဖြင့် ဖြန့်ဝေထားသည်။ ထို့အပြင် ဒီမှာပါဟုဆို၍ နှစ်လုံး/သုံးလုံး ပေါက်ဂဏန်းများကို ဖော်ပြထားသည့် ပေ့ခ်ျကိုလည်း ညွှန်းဆိုထား‌သည်။ ထိုပိုစ့်တွင် ပြန်လည်မျှဝေမှု “၉,၀၀၀” ကျော်ရှိနေပြီဖြစ်သည်။

မဇ္ဈိမ မှ ဒေသခံများ၏ပြောကြားချက်များ ဓာတ်ပုံများကို စစ်ဆေးခဲ့ပြီး လက်ရှိပျံ့နှံ့နေသည့် ပုံများသည် အလောင်းတော်ကဿပဘုရား၏ မှတ်တမ်းပုံများမဟုတ်ကြောင်း စစ်ဆေးတွေ့ရှိရသည်။

အလောင်းတော်ကဿပဘုရား ဂေါပက တာဝန်ခံများနှင့် နီးစပ်သူတစ်ဦးက “အခု မျက်လုံးတော်ပွင့်တယ်ဆိုတာတွေက ဂျင်းသတင်းပါ၊ ဓာတ်ပုံသွားရိုက်ဖို့မပြောနဲ့၊ အလောင်းတော်ကဿပဘုရားသွားဖူးဖို့တောင် နယ်မြေအခြေအနေ မကောင်းပါဘူး”ဟုဆိုသည်။

မွန်ပြည်နယ်ရှိ ဒေသခံတစ်ဦးမှာလည်း အလောင်းတော်ကဿပဘုရားပုံဟူသည့် ဓာတ်ပုံများသည် မွန်ပြည်နယ် ဘီလင်းမြို့နယ် မဲလံဆံတော်ရှင်ဘုရားရှိ ကျောက်ပိရဟန္တာ၏ ပုံများသာဖြစ်ကြောင်း မဇ္ဈိမသို့ အတည်ပြုပြောကြားသည်။

အလားတူ Google Map တွင် “မဲလံဆံတော်ရှင်ဘုရား” ဟု ရှာဖွေလိုက်သည်နှင့် ထိုဒေသသို့ရောက်ရှိခဲ့သည့် ဘုရားဖူးများမှ ပုံများကို ဖော်ပြထားသည်ကိုတွေ့ရသည်။

လင့် – t.ly/Itqyp

ထို့ကြောင့်လက်ရှိပျံ့နှံနေသည့် “TayarMedia” ဟူသည့်ဖေ့ဘုတ်စ်ပေ့ချ်မှ ဓာတ်ပုံများသည် အလောင်းတော်ကဿပဘုရား၏ လက်ရှိပုံတော်များမဟုတ်ဘဲ မွန်ပြည်နယ် မဲလံ ဆံတော်ရှင် ဘုရားရှိ ကျောက်ပိရဟန္တာပုံ သာဖြစ်ကြောင်း ဖော်ပြလိုက်ပါသည်။

မဇ္ဈိမ၏သတင်းဖတ်ရှုသူများအနေဖြင့် သတင်းတုဟုသံသယရှိသည့် အချက်အလက်များ၊ သတင်းဆောင်း ပါးများ၊ သတင်းမှားများကို ယခုလင့် – https://bit.ly/3x5qnf5 သို့ ဝင်ရောက်ဖြည့်စွက် ရေးသားပေးပို့ မေးမြန်းနိုင်ပါသည်။mizzima

ကရင်ပြည်နယ်၊ မြ၀တီမြို့နယ်၊ ကုန်သွယ်ရေးဇုန်တွင် ယနေ့ နံနက်ပိုင်း KNLA နှင့် PDF ပူးပေါင်းတပ်များက ဝင်ရောက်တိုက်ခိုက်ခဲ့ရာ သွင်း ကုန်ရုံး မီးလောင်သွားခဲ့ပြီး ယင်းရုံးအပါအဝင် ကုန်သွယ်ရေးဇုန်တွင် တာဝန်ထမ်းဆောင်နေသော ဌာနပေါင်းစုံမှ ဝန်ထမ်းတစ်ရာ နီးပါး အချိန်မီ ရှောင်တိမ်းလွတ်မြောက်ခဲ့ကြောင်း သိရှိရသည်။

မတ်လ ၂၄ ရက်နေ့ညကတည်းက မြ၀တီကုန်သွယ်ရေးဇုန်တွင် တာန်ထမ်းဆာင်နေသော ဌာနပေါင်းစုံမှ ဝန်ထမ်း ၁၀၀ နီးပါးက ကြိုတင် သ တင်းရရှိ၍ မြ၀တီမြို့ထဲသို့ ရှောင်တိမ်းနိုင်ခဲ့ကြကြောင်း၊ ယနေ့ နံနက် အစောပိုင်း တိုက်ပွဲဖြစ်ပွားချိန်တွင် ဝန်ထမ်းများအားလုံး ဘေးကင်းကြောင်း သိရှိရသည်။

“Non-CDM ဝန်ထမ်းတွေကတော့ မနက်ပိုင်း လာတိုက်မယ်ဆိုတာ ညကတည်းက သတင်းရလို့ ကုန်သွယ်ရေးဇုန်ကို ညကတည်းက စွန့်ခွာပြီး မြ၀တီမြို့ထဲ ရှောင်ကြတာ။ ဌာနပေါင်းစုံ ၁၀၀ နီးပါးလောက် လွတ်မြောက်ပါတယ်” ဟု ဝန်ထမ်းအသိုင်းအ၀ိုင်းက ပြောသည်။

တိုက်ပွဲမဖြစ်ပွားမီ အရပ်ဘက်ဝန်ထမ်းများ မထိခိုက်စေရေးအတွက် ကြိုတင် သတိပေးချက်များ ရရှိခဲ့ခြင်းဖြစ်ပြီး ယင်းသတိပေးချက်များကြောင့် အရပ်သားဝန်ထမ်းများ ထိခိုက်ခြင်းမရှိဘဲ လွတ်မြောက်ခဲ့ကြခြင်းဖြစ်သည်ဟု သိရှိရသည်။khit thit

စစ်ကိုင်းတိုင်း၊ ဘုတလင်မြိုနယ်အတွင်းက ဆုံကုန်းရွာကို စစ်ကောင်စီက မတ် ၂၅ ရက် မနက် ၈ နာရီခွဲလောက် စတင်မီးရှို့သွားတယ်လို့ ဒေသခံတွေက ပြောပါတယ်။

စစ်ကောင်စီမီးရှို့သွားတဲ့ ဆုံကုန်းရွာဟာ အိမ်ခြေ ၄၅၀ ကျော် ရှိတဲ့ ကျေးရွာဖြစ်တယ်လို့ ဒေသခံတွေက ပြောပါတယ်။

“သူတို့က မနေ့က သားရိုးကုန်းရွာမှာညအိပ်တယ်။ ဒီနေ့မနက်ခင်း ၇ နာရီ ၂၀ မိနစ်လောက်က သားရိုးကုန်းရွာအနောက်ဘက် ရထားလမ်းအ တိုင်း ကျနော်တို့ ဆုံကုန်းရွာကို ဝင်လာတယ်။ အခုလိုရွာကို မီးမရှို့လောက်ဘူးထင်ပြီး မပြေးနိုင်တဲ့ အဘိုးအဘွား ၆ ဦး ရွာထဲမှာထားခဲ့ကြတာ။ အခုတော့ သူတို့က ရွာကိုလည်း မီးရှို့ပြီး အဘိုးအဘွား ၆ ဦးကိုပါ မီးရှို့သတ်ထားခဲ့ကြတယ်။ မီးလောင်တဲ့ အိမ်အလုံးအရေကတော့ ရွာရဲ့သုံးပုံ ၂ ပုံခန့်အထိ မီးလောင်ကျွမ်းတယ်။ အတိအကျ အိမ်အလုံးအရေအတွက်ကတော့ စာရင်းမပြုရသေးဘူး။ အခုထိ မီးငြှိမ်းနေရတယ်။ စစ်သားတွေကတော့ ဘုတလင်မြို့ထဲဝင်သွားပြီ” လို့ ဆုံကုန်ရွာသားတဦးက ပြောပါတယ်။

အဲဒီစစ်ကြောင်းဟာ တပ်မ ၁၁ ကဖြစ်ပြီး ဆုံကုန်းရွာကို အကြောင်းမဲ့မီးရှို့ခဲ့တာလို့ ဒေသခံတွေက ပြောပါတယ်။

ပြီးခဲ့တဲ့ မတ် ၁၉ ရက်နေ့က စစ်ကောင်စီ အကြီးအကဲ မင်းအောင်လှိုင် နမခစစ်တပ်ကို လာစဉ်ကလည်း တပ်မ ၁၁ က အလုံမြို့နယ်နဲ့ ဘုတလင်မြို့နယ်တို့ကို စစ်ကြောင်းထိုးတာတွေ လုပ်ဆောင်ခဲ့တယ်လို့ ဒေသခံတွေက ပြောပါတယ်။

စစ်ကိုင်းတိုင်း အင်းတော်မြို့နယ်၊ မံဟဲရွာကို စစ်ကောင်စီတပ် စစ်ကြောင်းထိုး ဝင်ရောက်ပြီး ကျေးရွာသားအားလုံးကို ခေါ်ယူစစ်ဆေးကာ အမျိုးသား ၅ ယောက်ကို ဖမ်းဆီးသွားတယ်လို့ ဒေသခံတွေက ပြောပါတယ်။

မတ် ၂၃ ရက် ညနေက မံဟဲကျေးရွာကို စစ်ကောင်စီစစ်ကြောင်း ဝင်ရောက်ခဲ့တာဖြစ်ပြီး ၂၄ ရက် မနက်မှာ အမျိုးသား ၅ ယောက်ကို ဖမ်းဆီးသွားခဲ့တာလို့ ဆိုပါတယ်။

ဒေသခံတဦးက  “မတ် ၂၃ ရက် ညနေ ၄ နာရီလောက် စစ်တပ်က ရွာကို ဝင်စီးပြီး ရွာက သူတွေကို အကုန်ခေါ်စစ်တယ်၊ အမျိုးသမီးတွေလည်းပါတယ်။ ဘယ်သူတွေနဲ့ အဆက်အသွယ် ရှိလည်း ပေါ့။ ၂၄ ရက် မနက် အစောကြီး ၃ နာရီလောက် စစ်ကြောင်းပြန်ထွက်တော့ အမျိုးသား ၅ ယောက်ကို ဖမ်းခေါ်သွားတယ်” လို့ ပြောပါတယ်။

အိမ်ခြေ ၂၀၀ ကျော်ရှိတဲ့ မံဟဲရွာဟာ စစ်ကိုင်းတိုင်းနဲ့ ကချင်ပြည်နယ်အစပ်မှာ ရှိနေတာပါ။DVB

ထိုင်း- မြန်မာနယ်စပ်ရှိ ကရင်ပြည်နယ်၊ မြဝတီမြို့ ကုန်သွယ်ရေးဇုန်နှင့် အာရှလမ်းပိုင်းတွင် တိုက်ပွဲဖြစ်ပွားနေ၍ မြဝတီ-မဲဆောက် အမှတ် (၁) တံတားကို ယနေ့ မတ်လ ၂၅ ရက်နေ့၊ နံနက်ပိုင်းတွင် ခေတ္တ ပိတ်ထားခဲ့သော်လည်း မွန်းလွဲ ၁ နာရီ အချိန်မှ စ၍ ပုံမှန်အတိုင်း ပြန်လည်ဖွင့်လှစ်လိုက်ပြီ ဖြစ်သည်။

ထိုင်းနိုင်ငံ မဲဆောက်ဘက်ခြမ်းရှိ အမှတ် (၁) တံတားထိပ်တွင် လုံခြုံရေး ယူထားသော ထိုင်းရဲအချို့ကို တွေ့ရပြီး မဲဆောက်မြို့မှ မြဝတီမြို့သို့ အမှတ် (၁) တံတားပေါ်မှ ဖြတ်သန်းသွားလာသူများကို မွန်းလွဲပိုင်းတွင် မြင်တွေ့ရသည်။

“မနက်ကပဲ၊ ခဏပိတ်ပြီး ထိုင်းရဲတွေရော နယ်စပ်စစ်တပ်တွေရော ရှုပ်နေတာ၊ အခုတော့ ပုံမှန်တိုင်းဖြစ်နေပြီ၊ မနက်ကတော့ လေယာဉ်ဝဲနေတာတွေ တွေ့ရတယ်၊ မြဝတီဘက်က ပစ်သံတွေဆို အတိုင်းသား ကြားရတယ်” ဟု အမှတ် (၁) တံတားအနီး နေထိုင်သူတစ်ဦးက မဇ္ဈိမကို ပြောသည်။

ယနေ့ နံနက်ပိုင်းတွင် မြဝတီဘက်မှ လက်နက်ကြီး၊ လက်နက်ငယ်သံများ ကြားရသော်လည်း မွန်းလွဲပိုင်းတွင် ပစ်ခတ်သံများ ငြိမ်သက်နေကြောင်းလည်း အမှတ် (၁) တံတားအနီးတွင် နေထိုင်သူများက ပြောသည်။

ကရင်ပြည်နယ်၊ မြဝတီမြို့ ၊ နယ်စပ်ကုန်သွယ်ရေးဇုန်နှင့် သင်္ဃန်းညီနောင်ရဲစခန်းကို ယနေ့ မတ်လ၂၅ ရက် နံနက် ၅ နာရီဝန်းကျင်မှ စတင်ပြီး ကရင်တော်လှန်ရေး ပူးပေါင်းတပ်ဖွဲ့က စီးနင်းတိုက်ခိုက်ခဲ့ရာ နှစ်ဘက်တိုက်ပွဲများ ပြင်းထန်ခဲ့သည်။

ယင်းအပြင် မြဝတီ-ကော့ကရိတ်မြို့ အာရှကားလမ်းမကြီး နေရာအချို့တွင်လည်း တိုက်ပွဲများ ဖြစ်ပွားနေပြီး အာရှကားလမ်းမကြီး လမ်းပိုင်းနေရာအချို့ ပျက်စီးကာ ခရီးသည်တင်ကားများနှင့် ကုန်ကားများ ရှေ့ဆက်သွားမရဘဲ ရပ်တန့်ထားရကြောင်း သိရသည်။

တိုက်ပွဲဖြစ်ပွားခြင်းကြောင့် သင်္ဃန်းညီနောင်ရဲစခန်း၊ ကုန်သွယ်ရေးဇုန်အတွင်းရှိ အကောက်ခွန်ရုံးနှင့် စီးပွား‌ကူးသန်းရေးရုံးတို့ မီးလောင်ပျက်စီးမှုရှိခဲ့ကြောင်း သိရသည်။

မြဝတီမြို့သည် ထိုင်း- မြန်မာ နှစ်နိုင်ငံ ကုန်သွယ်နေသော နယ်စပ်ကုန်သွယ်ရေးမြို့ ဖြစ်ပြီး Covid -19 ကပ်ဘေးနှင့် စစ်အာဏာသိမ်းမှုကြောင့် နှစ်နှစ်ကျော်ကြာ ပိတ်ထားခဲ့ရသည့် မြဝတီ- မဲဆောက် အမှတ် (၁) ချစ်ကြည်ရေးတံတားကို ၂၀၂၃ ခုနှစ် ဇန်ဝါရီလ ၁၂ ရက်နေ့တွင် ပြန်လည်ဖွင့်လှစ်ခဲ့ခြင်း ဖြစ်သည်။ mizzima

ကရင်ပြည်နယ်၊ မြ၀တီမြို့နယ်နှင့် ကော့ကရိတ်မြို့နယ်၊ ကျုံဒိုးမြို့အကြား စစ် ရေး အခြေအနေများ ရှုပ်ထွေးနေပါသဖြင့် ပြည်သူများ ဖြတ် သန်းသွား လာ ခြင်း မပြုရန် ကျားဖြူစစ်ကြောင်းမှ ဗိုလ်ကျော်သက်က အရေးပေါ် ကြေညာချက် ထုတ် ပြန်ပြီးနောက် နဂါးဖြူစစ်ကြောင်းကပါ အလားတူ ထပ်မံ၍ သတိပေး ချက် ထုတ်ပြန်သည်။

“ယနေ့ ( ၂၅၊၃၊၂၀၂၃ ) ရက်နေ့မှ စ၍ ကရင်ပြည်နယ် ကျုံဒိုးမြို့နယ် မှ မြဝတီ မြို့နယ်အတွင်း စစ်ရေး၊ လုံခြုံရေးအခြေအနေများ ရှုပ်ထွေးနေပါသဖြင့် ပြည်သူ လူထုအနေဖြင့် အဆိုပါ ကျုံဒိုးမြို့နယ်မှ မြဝတီ မြို့နယ် အထိ မည်သည့်နည်း နှင့်မျှ ဖြတ်သန်းသွားလာခြင်း လုံးဝ( လုံးဝ) မပြုလုပ်ကြပါရန် အထူးမေတ္တာရပ်ခံ အပ်ပါသည်” ဟု နဂါးဖြူစစ်ကြောင်းက ထပ်မံ၍ အရေးပေါ် ကြေညာချက် ထုတ်ပြန်သည်။khit thit