မိုခါမုန်တိုင်းကြောင့် ထွက်ပေါ်လာသည့် ပုံဟောင်းနှင့် ဗီဒီယိုအဟောင်းများ
ရခိုင်ပြည်နယ်နှင့် ဘင်္ဂလားဒေ့ရှ်နိုင်ငံ စစ်တကောင်းဒေသကို ဗဟိုပြု၍တိုက်ခိုက်ခဲ့သည့် မိုခါမုန်တိုင်း တိုက်ခိုက်မှုများနှင့်ပတ်သက်၍ ပုံအဟောင်းများနှင့် ဗီဒီယိုအဟောင်းများ ပျံ့နှံ့ခဲ့သည်။
အခြားနိုင်ငံမှ ပုံဖြင့် ထည့်သွင်းဖြန့်ဝေခြင်း
“ကိုသက်”ဖေ့စ်ဘုတ်အကောင့်မှ မေ ၁၄ ရက်နေ့တွင် “သနားလိုက်တာအဖိုးနဲ့အဖွား ရွာမှာလေတိုက် ကြမ်းလို့နေမရဲဘူးဆိုပြီး ဘုန်းကြီးကျောင်းပြေးခဲ့တယ်” စာသားနှင့်အတူ စစ်တွေတွင် မိုခါမုန်တိုင်းဝင် ရောက်နေကြောင်းရေးသားကာ ဓာတ်ပုံခြောက်ပုံဖြင့် ဖြန့်ဝေထားသည်။
အဆိုပါပို့စ်အား ကြိုက်နှစ်သက်သူ ၁၇,၀၀၀ ကျော်၊ မှတ်ချက်ပေးသူ ၈၅၀ နီးပါးနှင့် ပြန်လည်မျှဝေသူ ၈၀၀ ကျော်ရှိနေသည်။
အလားတူပင် ထိုပုံများကို အသုံးပြု၍ ဖေ့စ်ဘုတ်အသုံးပြုသူများမှ “ဒီတိုင်းသာဆိုရင် စစ်တွေတစ်မြို့လုံး နီးပါး ရေဖုံးတော့မယ်” ဟုဆိုကာ ပြန်လည်ဖြန့်ဝေထားခြင်းများကိုလည်း အများအပြားတွေ့ရသည်။
ထိုပုံများထဲမှ လှိုင်းလုံးများရိုက်ခတ်နေသည့်ပုံမှာ မြန်မာနိုင်ငံမှပုံမဟုတ်ပေ။ ဖိလစ်ပိုင်နိုင်ငံတွင် ၂၀၁၃ ခုနှစ်ကဖြစ်ပွားခဲ့သော တိုင်ဖွန်းမုန်တိုင်းဖြစ်စဉ်ကပုံဖြစ်သည်ကို တွေ့ရသည်။ ထိုပုံကို dreamstime.com တွင် ဖော်ပြထားသည်။ လင့် – https://bit.ly/3OeJxYo
အလားတူပင် ထိုပုံအကြောင်းကို အချက်အလက်စစ်ဆေးရေးအဖွဲ့တခုဖြစ်သည့် Fact Crescendo Myanmar မှ လည်း အချက်အလက်စစ်ဆေးထားသည်။ လင့် – https://bit.ly/3Ods16S
ဗီဒီယိုဖိုင်နှစ်ခုကို ပေါင်းစပ်ပြုပြင်ပြီး ဖြန့်ဝေခြင်း
ထပ်မံ၍ “soesandikyaw718” အမည်ရှိ Tit Tok အသုံးပြုသူတစ်ဦးမှ “တော်ပါတော့ မိုခါရယ်” ဟု ရေး သားထားသည့် လှိုင်းလုံးများနှင့် လေပွေတိုက်ခတ်နေသည့် ဗီဒီယိုဖိုင်တခုကို မေလ ၁၅ ရက်နေ့က ဖော်ပြ ထားသည်။
ထိုဖိုင်မှာ လေပွေတိုက်ခိုက်နေသည့် ဗီဒီယိုဖိုင်နှင့် ရေလှိုင်းဗီဒီယိုဖိုင်တို့ကို ပေါင်းစပ်ပြုပြင်ထားခြင်းသာ ဖြစ်သည်။ လေပွေတိုက်ခတ်နေသည့်ဖိုင်နှင့် နောက်ခံအဆောက်အဦး၊ လေလွှင့်နေသည့်ပစ္စည်းများ ထပ်တူညီသည့်ဖိုင်ကို ၂၀၂၁ ခုနှစ် မတ်လတွင် အစောဆုံးတွေ့ရသည်။ ထိုဖိုင်ကို imgur.com တွင် ဖော်ပြထား သည်။ လင့် – https://imgur.com/gallery/QP3yV3M
ဗီဒီယိုဖိုင်အဟောင်းဖြင့် ဖြန့်ဝေခြင်း
မိုခါမုန်တိုင်းကို ကြံ့ကြံ့ခံနေသည့်ဟန်ဖြင့် “မုန်တိုင်း မိုခါ အေးဆေးပဲ” ဟုဆိုကာ မိုးလေပြင်းထဲတွင် မတ် တပ်ရပ်နေသည့် လူတစ်ဦး၏ ဗီဒီယိုဖိုင်ကို “s..mooth” အမည်ရှိ Tit Tok အကောင့်မှ မေလ ၁၅ ရက် နေ့တွင် ဖြန့်ဝေထားသည်။ ထိုဗီဒီယိုကို ကြည့်ရှုသူ ၈၀,၀၀၀ ကျော် ရှိနေပြီဖြစ်သည်။
ထိုဗီဒီယိုဖိုင်မှာ မိုခါမုန်တိုင်းတိုက်ခတ်ချိန်တွင် ရိုက်ယူထားခြင်းမဟုတ်ဘဲ အစောဆုံးတင်ထားသည်ကို ၂၀၂၀ ခုနှစ် ဧပြီလတွင် Youtube ၌ တွေ့ရသည်။ Imchung Yanger အမည်ရှိ Youtube အသုံးပြုသူ တဦးမှ ဗီဒီယိုဖိုင်အတိုတင်သည့် Shorts အမျိုးအစားဖြင့် ဖော်ပြထားခြင်းဖြစ်သည်။ လင့် – https://youtube.com/shorts/q0wvhJ1GgJU?feature=share
မဇ္ဈိမ၏သတင်းဖတ်ရှုသူများအနေဖြင့် သတင်းတုဟုသံသယရှိသည့် အချက်အလက်များ၊ သတင်းဆောင်းပါးများ၊ သတင်းမှားများကို ယခုလင့် – https://bit.ly/3x5qnf5 သို့ ဝင်ရောက်ဖြည့်စွက် ရေးသားပေးပို့ မေးမြန်းနိုင်ပါသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 