SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

ရန်ကုန်တိုင်း၊ စမ်းချောင်းမြို့နယ်တွင် အရပ်သားပြည်သူများအား စစ်ကောင်စီတပ်ဖွဲ့က ယခုတစ်ပတ်အတွင်း၌ စစ်ဆေးဖမ်းဆီးမှုများ နေ့စဉ် ပြုလုပ်နေကြောင်း စမ်းချောင်းပင်မသပိတ်စစ်ကြောင်းထံက သိရသည်။

“ကျွန်တော်တို့ ဒီရက်ပိုင်း စမ်းချောင်းမှာ အစစ်အဆေးတွေရော ၊ အဖမ်းအဆီးတွေရော များတာတွေ့ရပါတယ်။ ပုံမှန်ဆိုရင် ယာဉ်ထိန်းရဲရယ်၊ ရဲတွေရယ်ပေါင်းပြီး ကားတွေကိုစစ်ပြီး ပိုက်ဆံတောင်းတာလောက်ပဲရှိတယ်။ လမ်းသွားလမ်းလာလူငယ်တွေကို ဖမ်းဆီးတာမရှိဘူး။ အခုနောက်ပိုင်းမှာ ညဘက် သန်းခေါင်စာရင်းစစ်ပြီးတော့ အိမ်ထဲဝင်ဖမ်းတဲ့ဖြစ်စဉ်တွေရှိသလို လမ်းသွားလမ်းလာလူငယ်တွေကိုလည်း စစ်တပ်နဲ့ရဲက တားဆီးစစ်ဆေးတာ ဖမ်းဆီးမှုတွေလုပ်လာတာကို တွေ့ရတယ်” ဟု စမ်းချောင်းပင်မသပိတ်စစ်ကြောင်းမှ ဥက္ကဋ္ဌက မဇ္ဈိမကို ပြောသည်။

ဖမ်းဆီးခံရသူများမှာ အရပ်သားလူငယ်များဖြစ်ပြီး စမ်းချောင်းရှိ တော်လှန်ရေးအဖွဲ့ဝင်များ နှင့် ဆက်စပ်သူများ မဟုတ်ကြောင်းကိုလည်း ဥက္ကဋ္ဌက အတည်ပြုသည်။

ဖမ်းဆီးပုံမှာ လမ်းသွားလမ်းလာလူငယ်များအား ပစ်မှတ်ထားခြင်းဖြစ်ပြီး ညနေပိုင်းနှင့် ညပိုင်းများတွင် အဖမ်းများကြောင်း ၊ ယခင်က ဧည့် စာရင်းစစ်မည်ဟုအကြောင်းပြကာ အိမ်ထဲအထိဝင်ဖမ်းသည့်ဖြစ်စဉ် များသော်လည်း ယခုလက်ရှိတွင် လမ်းမပေါ်တွင်သာ စစ်မေး၍ ဖမ်းဆီးနေခြင်းဖြစ်ကြောင်း ၎င်းကပြောသည်။

“အထက်က ဖိအားကြောင့် UG တို့ ၊ PDF တို့ ၊ သပိတ်က ရဲဘော်တို့ကိုဖမ်းလို့မရလို့ လူငယ်တွေကို လိုက်ဖမ်းနေတဲ့ ပုံစံမျိုးဖြစ်နေတယ်။ ဒါကြောင့် ဒီရက်ပိုင်းမှာ လူငယ်တွေအနေနဲ့ အရေးကြီးတဲ့ကိစ္စမဟုတ်လို့ရှိရင် ညနေပိုင်း၊ ညပိုင်းမှာ အပြင်သွားတာကို ရှောင်ကြဉ်ပေးစေချင်ပါတယ်။ အခန့်မသင့်ရင် စစ်ကောင်စီတပ်က တွေ့ကရာဖမ်းနေတဲ့အတွက် အဖမ်းခံရတဲ့အခြေအနေတွေရှိလာနိုင်ပါတယ်” ဟု စမ်းချောင်းပင်မသပိတ်စစ်ကြောင်းမှ ဥက္ကဋ္ဌက ဆက်ပြောသည်။

ယခုရက်ပိုင်းအတွင်း ရန်ကုန်၌ PDF များ ဝင်ရောက်လာပြီဟူသော ကောလာဟလသတင်းများ ထွက်ပေါ်နေသည့်အတွက် နေရာအများစုတွင် တင်းကျပ်စစ်ဆေးမှုများရှိနေပြီး ဖမ်းဆီးခံရသော်လည်း သတင်းထွက်ပေါ်မှုမရှိသည့် ဖြစ်စဉ်များလည်းရှိကာ ယခုတစ်ပတ်အတွင်း အရပ် သားလူငယ် ၃၀ နီးပါး ဖမ်းဆီးခံထားရသည်ဟု သတင်းရရှိကြောင်း စမ်းချောင်းပင်မသပိတ်စစ်ကြောင်းမှ ဥက္ကဋ္ဌက ပြောသည်။ mizzima

မြန်မာနိုင်ငံတွင် မေလ ၁၄ ရက်နေ့က တိုက်ခတ်ခဲ့သော မိုခါမုန်တိုင်းကြောင့် သေဆုံးခဲ့ရသူများအတွက် မိသားစုနှင့်အတူ ထပ်တူဝမ်းနည်းကြောင်း ဗြိတိသျှ ပြည်ထောင်စု၏ တတိယမြောက်ချားလ်စ်ဘုရင်က ထုတ်ပြန် ပြောဆိုပြီး မုန်တိုင်း သင့် ပြည်သူ ၁၇၅၀၀၀ အတွက် ဒေါ်လာ ၂ သန်းခွဲ အကူ အညီ ပေးမည်ဖြစ်ကြောင်း ရန်ကုန်ရှိဗြိတိန်သံရုံးက သတင်းထုတ်ပြန်သည်။

တတိယမြောက် ချားလ်စ်ဘုရင်က ” အခုလိုအကူအညီများစွာ လိုအပ်နေ တဲ့အချိန်မှာ ကြောက်မက်ဖွယ်ကောင်းတဲ့ သဘာဝဘေးအန္တရာယ် ကြုံတွေ့ခဲ့ ရသူတွေအားလုံးအတွက် ကျွန်တော်တို့ သတိရဆုတောင်းပေးနေပါတယ်။ အခုလို အဖြစ်ဆိုးမှာ မိမိတို့ရဲ့ ချစ်ရသူများ ဆုံးရှုံးခဲ့ရတဲ့အတွက်လည်း နက်ရှိုင်း စွာဝမ်းနည်းကြေကွဲရပါတယ်။’’ဟု သဝဏ်လွှာ တွင် ပြောကြားထားသည်။

မြန်မာနိုင်ငံမှ မိုခါဆိုင်ကလုန်းမုန်တိုင်းသင့် ပြည်သူ ၁၇၅,၀၀၀ အတွက် လူသား ချင်းစာနာထောက်ထားမှုဆိုင်ရာ အထောက်အပံ့များကို ယူကေနိုင်ငံမှ ပေးအပ် သွားမည် ဖြစ်ပြီး ရန်ပုံငွေအသစ်အဖြစ် အမေရိကန်ဒေါ်လာ ၂သန်းခွဲကို အကူ အညီ အများဆုံးလိုအပ်နေသူများအတွက် ရေသန့်နှင့် အမိုးအကာများ ထောက် ပံ့ ပေးအပ်မည်ဖြစ်ကြောင်း၊ နောက်ဆက်တွဲရောဂါ အန္တရာယ် များလျော့ ပါး စေရန် ကူညီပေးမည်ဖြစ် ကြောင်း ဖော်ပြထားသည်။

အဆိုပါ ရန်ပုံငွေကို မြန်မာနိုင်ငံ အနောက်မြောက်ဘက်ရှိ မြေပြင်မှ ပြည်တွင်း ပြည်ပ အဖွဲ့အစည်းများထံသို့ တိုက်ရိုက် ပေးအပ်မည်ဖြစ်ပြီး အသက်ရှင် ကျန် ရစ်သူများ လိုအပ်နေသည့် အသက်ကယ်ထောက်ပံ့မှုကို အမြန်ဆုံး လုပ်ဆောင် မည်ဖြစ်ကြောင်း သိရှိရသည်။ khit thit

စစ်ကိုင်းတိုင်း၊ ကနီမြို့နယ်၊ ချောင်းမစံပြကျေးရွာနှင့် အနီးဝန်းကျင်ရွာများကို စစ်ကောင်စီတပ်က တိုက်လေယာဉ် နှစ်စီးဖြင့် ဗုံးကြဲတိုက်ခိုက်ရာ ကျေးရွာစာသင်ကျောင်းနှင့် ဝန်ထမ်းအိမ်ရာများ ထိခိုက်ပျက်စီးသွားသည်ဟု ဒေသခံများထံမှ သိရသည်။

မေလ ၁၇ ရက် မွန်းလွဲ ၂နာရီ ၄၅မိနစ်အချိန်ခန့်တွင် စစ်ကောင်စီတပ်မှ တိုက်လေယာဉ် နှစ်စင်းဖြင့် ဗုံးကြဲခဲ့၍ ချောင်းမရွာ စာသင် ကျောင်း၊ ဝန်ထမ်းအိမ်ရာများနှင့် အနီးဝန်းကျင်ရှိ နေအိမ်များ ပျက်စီးခဲ့သည်ဟု ဆိုသည်။

“ဗုဒ္ဓဟူးနေ့က တိုက်လေယာဉ်တွေနဲ့ လာပစ်သွားတာပါ။ အဲဒီမှာ ကျနော်တို့ မဟာမိတ်အဖွဲ့ပေါင်းစုံ (ခရိုင်တပ်ရင်း) နဲ့ တိုက်ပွဲဖြစ်တာမှာ သူတို့ဘက်က တော်တော်အထိနာသွားလို့ လေကြောင်းပစ်ကူခေါ်ရတဲ့ အနေအထားပါ။ အခုနေ့တိုင်းနီးပါး ဆက်တိုက်ပါပဲ၊ စစ်ကြောင်းထိုးတယ် မီးရှို့တယ်။ သူတို့ လုပ်ရိုးလုပ်စဉ်ပါ၊ အခုက မဟာမိတ်အဖွဲ့ဘက်က သူတို့အင်အားကို ရင်ဆိုင်ပြီး ထိန်းနိုင်တဲ့အနေအထားမှာ တအားအထိနာလို့ တိုက်လေယာဉ်တွေ၊ လက်နက်ကြီးတွေ သုံးလာတာပါ” ဟု အမည်မဖော်လိုသူ ဒေသခံက မဇ္ဈိမသို့ ပြောသည်။

စစ်ကောင်စီတပ်၏ လေကြောင်းတိုက်ခိုက်မှုကြောင့် ချောင်းမရွာဒေသခံ ဦးပေါ်ထွန်းဆိုသူသည် ခြေထောက်တွင် မစိုးရိမ်ရဒဏ်ရာ ရရှိသည်ဟု သိရသည်။

လွန်ခဲ့သော တစ်ပတ်ခန့်မှစ၍ စစ်ကောင်စီတပ်သားများသည် ကနီမြို့နယ်အတွင်းသို့ အင်အား ၅၀၀ ခန့်ဖြင့် စစ်ကြောင်းနှစ်ကြောင်းခွဲကာ စစ်ကြောင်းထိုးဝင်ရောက်လာပြီး ချင်းတွင်းမြစ် အနောက်ဘက်ခြမ်း ညောင်ပင်ကြီးရွာဘက်မှ အထက်ကို ဆက်တိုက်ထိုးလာရာမှာ ဒေသကာကွယ်ရေး မဟာမိတ်တပ်ပေါင်းစုများနှင့် ထိတွေ့တိုက်ပွဲဖြစ်ပွားခဲ့သည်ဟု သိမ်းငှက်ပြောက်ကျားတပ်ဖွဲ့ တာဝန်ရှိသူထံမှ သိရသည်။

အဆိုပါ ထိတွေ့တိုက်ပွဲတွင် စစ်ကောင်စီတပ်ဘက်မှ ၃၀ ဦးထက်မနည်းသေဆုံးပြီး မဟာမိတ်တပ်ပေါင်းစုဘက်က ရဲဘော် သုံးဦးကျဆုံးကာ ရှစ်ဦး ထိခိုက်ဒဏ်ရာရရှိခဲ့သည်ဟု ၎င်းတာဝန်ရှိသူမှ ပြောသည်။

“ကနီအခြေနေက တော်တော်လေး ဆိုးနေတာပါ ။ ပထမ လာတဲ့ စစ်ကြောင်းက စစ်ကြောင်းမှူးပါ သေဆုံးသွားတဲ့အတွက် တော်တော်လေး ငြိုးနေတာ ရှိပါတယ်။ ကနီခွင် တစ်ခုထဲကို စစ်အင်အား ၅၀၀ လောက်နဲ့ ကုန်းကြောင်းရော စစ်ကြောင်း နှစ်ကြောင်း နဲ့ ရေကြောင်းရောပါ စစ်ကြောင်းထိုးနေတာပါ” ဟုလည်း ကနီမြို့နယ်မှ တခြားဒေသခံတစ်ဦးမှ မဇ္ဈိမသို့ ပြောသည်။

ထိုတိုက်ပွဲအတွင်း စစ်ကောင်စီတပ်သားများနှင့် ဒေသကာကွယ်ရေးမဟာမိတ်တပ်ပေါင်းစု၏ ထိခိုက်သေဆုံးစာရင်းကိုတော့ မဇ္ဈိမအနေဖြင့် သီးခြားအတည်ပြုနိုင်ခြင်း မရှိသေးပေ။

ပြီးခဲ့သည့် မေလအစောပိုင်းမှာလည်း စစ်ကောင်စီတပ်သားများသည် ကနီမြို့နယ် ဘန့်ဘွေးပျူရွာ၌ တပ်စွဲထားပြီး အနီးနားရှိ ကျေးရွာများသို့ တောက်လျှောက်စစ်ကြောင်းထိုးကာ ရွာစဉ်လိုက်မီးရှို့ဖျက်ဆီးနေကြောင်း လည်း သိရသည်။ mizzima

စစ်ကိုင်းတိုင်း၊ ခင်ဦးမြို့နယ်၊ ကံသစ်ရွာကို အကြမ်းဖက် စစ်တပ်က မီးရှို့ဖျက်ဆီးနေကြောင်း ခင်ဦးနယ် ဒေသခံကာကွယ်ရေး မဟာမိတ်အင်အားစု – kurdaf ထံမှ သိရသည်။

မေလ ၁၉ ရက်နေ့ ညနေ ၅ နာရီ ၄၀ မိနစ်တွင် အကြမ်းဖက် စစ်တပ်က ခင်ဦးမြို့နယ်၊ ကံသစ်ကျေးရွာကို မီးရှို့ ဖျက်ဆီးနေခြင်းဖြစ်ပြီး ကျေး ရွာအတွင်းရှိ အခြေအနေများကို အတည်မပြုနိုင်သေးကြောင်း သိရှိရသည်။

“ခင်ဦးမြို့နယ် ကံသစ်ကျေးရွာကို ရွှေဘိုဘက်ကနေ လာတဲ့ အင်အား ၁၀၀ ကျော်ပါ စစ်ခွေး စစ်​ကြောင်းက မီးရှို့နေပါတာ အနီးနားက ​နှောကုန်း၊ မောက်ပြည့်၊ ဂွေးကုန်း ကံသစ်၊ မြစ်တော် စတဲ့ ကျေးရွာတွေက ဒေသ ပြည်သူ ၁၈၀၀ ကျော်လည်း ဘေးလွတ်ရာကို ထွက်ပြေးနေရပါတယ်” ဟု ဒေသပြည်သူ တစ်ဦးက ပြောဆိုသည်။ khit thit

မြန်မာလက်နက်ပွဲစား ခရိုနီ ဦးထွန်းမင်းလတ်နဲ့ ဆက်နွှယ်တဲ့ ထိုင်းအထက်လွှတ်တော်အမတ် နိုင်းဥပကစ် ပါကျရိယန်ကွန်း (၆၁ နှစ်) ကို တရားစွဲဖို့ ထိုင်းက နိုင်ငံတကာရာဇဝတ်မှု နှိမ်နင်းရေးဌာနက သဘောတူလိုက်ပြီလို့  ထိုင်းသတင်းတွေမှာ ဖော်ပြပါတယ်။

အသက် ၆၁ နှစ်အရွယ် နိုင်းဥပကစ် ပါကျရိယကွန်းဟာ လက်ရှိ ထောင်ထဲကနေ အမှုရင်ဆိုင်နေရတဲ့ မြန်မာခရိုနီ ဦးထွန်းမင်းလတ်နဲ့ အကျိုးတူ စီးပွားရေးဆက်နွှယ်မှု ရှိမရှိ နိုင်ငံတကာ ရာဇဝတ်မှုဌာနက စစ်ဆေးပြီးတဲ့နောက် အထက်လွှတ်တော်အမတ်ဖြစ်ပြီး ငွေကြေးခဝါချမှုမှာ ပူးပေါင်းပါဝင်မှု၊ နိုင်ငံတကာရာဇဝတ်မှုလုပ်ငန်းနဲ့ ဆက်နွယ်မှုတွေနဲ့ အရေးယူဖို့ သဘောတူလိုက်ပြီး စာမျက်နှာပေါင်း ၇၉ မျက်နှာရှိ အမှုတွဲကို မူးယစ်ဆေးဝါးနှိမ်နင်းရေးတပ်ဖွဲ့နဲ့ ဗဟိုတရားရုံးကို မေ ၁၈ ရက်က ပေးပို့လိုက်တယ်လို့ ဆိုပါတယ်။

အဆိုပါအမှုတွဲကို လက်ခံရရှိပြီး အမှုစစ်ဆေးဖို့ ဒီလ ၂၆ ရက်နေ့မှာ ချိန်းဆိုထားတယ်လို့ ဗဟိုတရားရုံးချုပ် ပြောရေးဆိုခွင့်ရှိသူ နိုင်းကိုးဆွန်ဝပ် အင်ထုကျန်ယုန်က သတင်းထောက်တွေကို ပြောပါတယ်။

စွပ်စွဲခံရသူ နိုင်းဥပကစ်ကလည်း သူ့ရဲ့ရှေ့နေနဲ့အတူ မူးယစ်ဆေးဝါးနှိမ်နင်းရေးရဲတပ်ဖွဲ့ကို ရောက်ရှိလာပြီး  စွဲဆိုချက်တွေ သိရှိပါကြောင်း သတင်းပို့ခဲ့တယ်လို့ ဆိုပါတယ်။

သူ့ရဲ့ရှေ့နေဖြစ်သူကတော့ နိုင်းဥပကစ်ဟာ ဦးထွန်းမင်းလတ်ရဲ့ စီးပွားရေးတွေနဲ့ ပတ်သက်ခြင်းမရှိဘဲ နိုင်ငံရေးအရ တိုက်ခိုက်ခံရခြင်းသာဖြစ်ကြောင်း၊ တရားမျှတမှုရရှိရေး အဆုံးစွန်ထိ ရင်ဆိုင်သွားမယ်လို့ ပြောပါတယ်။

ထိုင်းနိုင်ငံမှာ လွန်ခဲ့တဲ့ ၃ နှစ်ကျော်က ဖမ်းဆီးရမိတဲ့ မူးယစ်မှောင်ခိုဂိုဏ်းတွေရဲ့ ငွေစာရင်းတွေကို သက်ဆိုင်ရာက ပြန်လည်စစ်ဆေးရာမှာ ထိုင်း-မြန်မာနယ်စပ် လျှပ်စစ်ဓာတ်အားရောင်းဝယ်ရေး လုပ်ကိုင်နေတဲ့ Allure Group ကုမ္ပဏီထဲကို ငွေသန်းပေါင်းများစွာ လွှဲထားတာကို တွေ့ရှိခဲ့ပါတယ်။

ဒါကြောင့် ကုမ္ပဏီဒါရိုက်တာ ဦးထွန်းမင်းလတ်၊ အထွေထွေမန်နေဂျာ (နိုင်းဥပကစ်ရဲ့ သားမက်) နဲ့ ဝန်ထမ်း ၂ ဦးတို့ ပြီးခဲ့တဲ့ ၂၀၂၂ ခုနှစ် စက်တင် ဘာလက အဖမ်းခံခဲ့ရပြီး ဘတ်သန်းပေါင်း ၂,၀၀၀ ကျော်တန်ဖိုးရှိ ကွန်ဒိုတိုက်ခန်း၊ မော်တော်ကား၊ အိမ်ခြံမြေ၊ ဟိုတယ်၊ မီးခံသေတ္တာနဲ့ ဘဏ်ငွေစုစာရင်းစာအုပ်တွေလည်း အသိမ်းခံထားရပါတယ်။

အဆိုပါအမှုထဲမှာ အထက်လွှတ်တော်အမတ် နိုင်းဥပကစ်ပါ ပါဝင်ပတ်သက်နေကြောင်း မူးယစ်ရဲတပ်ဖွဲ့က အမှုဖွင့်ပြီး သွားရောက်ဖမ်းဆီးမယ့်နေ့မှာပဲ ဗဟိုတရားရုံး တာဝန်ရှိသူတွေက ဆိုင်းငံ့ထားဖို့ ပြောတာကြောင့်  မဖမ်းဆီးဖြစ်ပါဘူး။ အဲဒီအမှုတွဲကို ကိုင်တွယ်တဲ့ မူးယစ်ရဲမှူးနဲ့ ရဲတပ်ဖွဲ့ဝင် ၄ ဦးတို့ဟာလည်း တနေရာစီ ရွှေ့ပြောင်းခံထားရပါတယ်။

ဒီအမှု ကြန့်ကြာနေရတာနဲ့ ပတ်သက်ပြီး ထိုင်းဝန်ထမ်းတွေရဲ့ ခြစားမှုတွေ စုံစမ်းဖော်ထုတ်နေတဲ့ ခွန်ချူဝစ် ကမွန်ဝိဆစ်က သတင်းစာရှင်းလင်းကာ မေးခွန်းထုတ်ခဲ့သလို MFP ကလောက်ကိုင်ပါတီ လွှတ်တော်အမတ် နိုင်းရန်းဆီမန်းရိုးကလည်း လွှတ်တော်ထဲမှာ မေးမြန်းခဲ့ပါတယ်။

ဦးထွန်းမင်းလတ်နဲ့ နိုင်းဥပကစ်တို့ဟာ အမှုတွဲတခုတည်း၊ စွဲချက်တခုတည်းဖြစ်ပေမဲ့ တဦးက ထောင်ထဲကနေ အမှုရင်ဆိုင်နေရပြီး နောက်တဦးက အပြင်မှာ လွတ်လပ်စွာ ပုံမှန်သွားလာ နေရတဲ့အပြင် တရားရုံးကလည်း ဘာမှ ရှေ့ဆက်ဆောင်ရွက်တာ မတွေ့ရတော့ နိုင်းဥပကစ် အမှုကကင်းလွတ်အောင် ထိပ်ပိုင်းရာထူးယူထားသူတွေက အကာအကွယ် ပေးထားသလား ဆိုတာလည်း လွှတ်တော်အမတ်က မေးခွန်းထုတ်ထားပါတယ်။

ဗဟိုတရားရုံးကတော့ နိုင်းဥပကစ်ရဲ့ အမှုဟာ နိုင်ငံတကာမှုခင်းနဲ့ပါ ပတ်သက်နေတာကြောင့် နိုင်ငံတကာမှုခင်းရဲတပ်ဖွဲ့က စစ်ဆေးနေပြီး နိုင်ငံ ခြားဘာသာ သက်သေအချက်အလက်တွေကို ထိုင်းလို ဘာသာပြန်ဆိုနေရတာကြောင့် အမှုကြန့်ကြာနေရတာလို့ သတင်းထောက်တွေကို ပြော သွားပါတယ်။ DVB

မန္တလေးတိုင်း၊ မတ္တရာမြို့နယ်မှ ပြည်ခိုင်ဖြိုးပါတီကော်မတီ၀င်တစ်ဦးသည် ယမန်နေ့ မေလ ၁၈ရက်က နေအိမ်အတွင်းသေနတ်ဖြင့်ပစ်ခတ်ခံရပြီး သေဆုံးသွားကြောင်း သတင်းရရှိသည်။

မတ္တရာမြို့နယ်၊၀န်စုကျေးရွာအုပ်စု၊ ရေချောင်းဘို့ကျေးရွာမှ မြို့နယ်အဆင့်ပြည်ခိုင်ဖြိုးပါတီအရန်ကော်မတီ၀င် ဦးကျော်မင်း(အသက် ၆၉ နှစ်) သည်မေလ ၁၈ ရက်၊ နံနက် ၈ နာရီ ၁၅ မိနစ်ခန့်တွင် ၎င်း၏ နေအိမ်၌ ရှိနေစဉ်ဆိုင်ကယ်နှစ်စီးဖြင့် လူလေးဦးရောက်ရှိလာပြီး သေနတ်ဖြင့်ပစ် ခတ်သွားခြင်းဟုသိရသည်။

” မနက်ပိုင်း သူအိမ်ထဲမှာရှိနေတုန်း ၀င်ပစ်သွားတာပါ။ သူ့မိသားစုတော့ အထိအခိုက်မရှိဘူးလို့သိရတယ်၊ သူကတော့ on the spot (ပွဲချင်း ပြီး)ပါပဲ။ ဆေးရုံတောင်မရောက်လိုက်ဘူး” ဟု ဒေသခံတစ်ဦးကပြောသည်။

ဦးကျော်မင်းတွင် သေနတ်ထိမှန်ဒဏ်ရာများရရှိပြီးအခင်းဖြစ်နေရာတွင် သေဆုံးသွားကြောင်း မတ္တရာမြို့နယ် ပြည်ခိုင်ဖြိုးပါတီ၀င် သတင်းရင်းမြစ်ကအတည်ပြုသည်။ဦးကျော်မင်းအား သေနတ်ဖြင့်ပစ်ခတ်သွားသူများမှာ မည်သည့်အဖွဲ့အစည်းမှ ဖြစ်ကြောင်းမသိရသေးပေ။

၎င်းသည် ဒေသအတွင်း၌ စစ်ကောင်စီလမ်းကြောင်းနှင့်အတူသတင်းပေးလမ်းပြအဖြစ်လိုက်ပါနေခြင်းကြောင့် မကြာခဏသတိပေးခံထားရသူဖြစ်ကြောင်း ဒေသခံများက ပြောသည်။

စစ်ကောင်စီနှင့် ပူးပေါင်းနေသူများ၊ သတင်းပေးအဖြစ်ရပ်တည်နေသူများအနေဖြင့် ပြည်သူလူထုနှင့် ပူးပေါင်းရန် တော်လှန်ရေးအင်အားစုများ၊ မြေအောက်ပြောက်ကျားအဖွဲ့များက သတိပေးထားသည်။ mizzima

နယူးဇီလန်နိုင်ငံတွင် ရောက်ရှိနေသည့် NUG အစိုးရ ပြည်ထောင်စု ဝန်ကြီး ဦးအောင်မျိုးမင်းနှင့် နယူးဇီလန် နိုင်ငံ ရှေ့နေချုပ် အပါအဝင် အစိုး ရဝန်ကြီးများ တွေ့ဆုံဆွေးနွေးခဲ့ကြောင်း သိရသည်။

မေလ ၁၇ ရက်နေ့ မွန်းလွဲပိုင်းတွင် နယူးဇီလန်နိုင်ငံ၊ ရှေ့နေချုပ်နှင့် တွေ့ဆုံခဲ့ပြီး ညနေပိုင်းတွင် လူဝင်မှုကြီးကြပ်ရေး ဝန်ကြီးနှင့် တွေ့ဆုံကာ မြန်မာ့အရေးရင်းနှီး ပွင့်လင်းစွာ ဆွေးနွေးခဲ့ကြောင်း၊ မေလ ၁၈ ရက်နေ့ နံနက်ပိုင်းတွင်လည်း နယူးဇီလန်နိုင်ငံ၊ လူ့အခွင့်အရေးဆိုင်ရာ မဟာမင်း ကြီးနှင့် တွေ့ဆုံပြီးမြန်မာနိုင်ငံတွင် အကြမ်းဖက် စစ်တပ်က ကျူးလွန်နေသည့် လူ့အခွင့်အရေး ချိုးဖောက်မှုများကို အလေးထား ဆွေးနွေးခဲ့ကြကြောင်း သိရှိရသည်။

ယင်းနေ့ ညနေပိုင်းတွင်တော့ ပြည်ထောင်စုဝန်ကြီးက အုတ်ကလန်မြို့ကို လေကြောင်းခရီးနှင့် ဆက်လက်ထွက်ခွာခဲ့ပြီး အုတ်ကလန်လေဆိပ် ဆိုက်ရောက်ဆောင်တွင် အုတ်ကလန်မြို့ရှိ မြန်မာတိုင်းရင်းသား မိသားစုများက လှိုက်လှဲစွာ ကြိုဆိုခဲ့ကြကြောင်း သိရသည်။

မေလ ၁၉ ရက်နေ့တွင် ပြည်ထောင်စု၀န်ကြီးက စီစဉ်ထားသည့် အစည်းအဝေးများ တက်ရောက်ခဲ့ပြီး ညနေပိုင်းတွင်အုတ်ကလန်မြို့ရှိ မြန်မာတိုင်းရင်းသား မိသားစုများနှင့်ရင်းရင်းနှီးနှီးတွေ့ဆုံကာ အမျိုးသားညီညွတ်ရေးအစိုးရနှင့် လူ့အခွင့်အရေး ဝန်ကြီးဌာနတို့က ဆောင်ရွက်နေသည့် လုပ်ငန်းများကို ရှင်းလင်း ပြောကြားခဲ့ပြီး သိလိုတာတွေကိုလည်း ပြန်လည် ဖြေကြားပေးခဲ့ကြောင်း သိရှိရသည်။ khit thit

တောင်ငူအကျဥ်းထောင်မှာ မေ ၁၈ ရက် ညနေက ထွက်ပြေးသွားတဲ့ အချုပ်သား ၁၀ ဦးနဲ့ ပတ်သက်ပြီး ထောင်အရာရှိတချို့ စစ်ဆေးခံနေရတယ်လို့ အကျဥ်းဦးစီးနဲ့ နီးစပ်သူတွေဆီက သိရပါတယ်။

မနေ့ညနေ သုံးနာရီက တောင်ငူအကျဥ်းထောင်ရှိ အထူးတရားရုံးမှာ စစ်ဆေးဖို့ ရုံးထုတ်လာတဲ့ အချုပ်သား ၄၁ ဦးမှ ၁၀ ဦးက တံခါးတွေကန်ဖွင့်ကာ ရဲနဲ့ စစ်သားတွေဆီကနေ သေနတ်လုပြီး ပစ်ခတ်ထွက်ပြေးသွားတာလို့ အကျဥ်းဦးစီးနဲ့ နီးစပ်သူတဦးက ပြောပါတယ်။

“ထောင်ကအရာရှိတွေ ပေါ့‌ေလျာ့လို့ ခံရတာဆိုပြီး စစ်တပ်က ဒေါသထွက်နေတယ်။ ရုံးထုတ်လာတဲ့အထဲမှာ အကြမ်းဖက်ပုဒ်မနဲ့ သေဒဏ်ချထားတဲ့သူတွေပါတယ်။ မနေ့က ဖြစ်စဥ်မှာ နှစ်ဦးသေတယ်၊ သေနတ်လေးလက်ပါသွားတယ်။”

အချုပ်သား ၄၁ ယောက်မှာ အမျိုးသား ၃၄ ယောက်နဲ့ အမျိုးသမီး ၇ ယောက် ပါဝင်ပါတယ်။

ထွက်ပြေးလွတ်မြောက်သွားသူ ၁၀ ဦးမှာ အမျိုးသား ၉ ဦးနဲ့ အမျိုးသမီး ၁ ဦး ပါဝင်ပြီး သူတို့ကို စစ်ကောင်စီက အကြမ်းဖက်မှုတိုက်ဖျက်ရေး ဥပဒေပုဒ်မ ၄၉(က) / ၅၀(က) / ၅၀(ည) / ၅၁(ဂ) / ၅၂(က) နဲ့ အမှုဖွင့်ထားသူတွေဖြစ်တယ်လို့ တရားရုံးနဲ့နီးစပ်သူတွေဆီက သိရပါတယ်။

“တယောက်မှ မမိသေးဘူး၊ တောင်ငူမြို့ပေါ်ရော ရွာဘက်တွေပါမကျန် စစ်တပ်နဲ့ ရဲတွေက လိုက်ရှာနေတာ။ ထောင်အရာရှိတွေကို ထိန်းသိမ်းထားတယ်လို့လည်း ကြားတယ်။ ခုံရုံးဖွဲ့ပြီး စစ်နေတယ်လို့လည်း ပြောနေကြတယ်။”

ဒီနေ့မနက် စစ်ကောင်စီက ထုတ်ပြန်ချက်မှာ တောင်ငူအကျဥ်းထောင်ဖြစ်စဥ်အတွင်း အချုပ်သား ၁၀ ဦး ထွက်ပြေးကာ သေနတ်နှစ်လက်ပါ သွားပြီး ပြန်လည်ဖမ်းဆီးရမိအောင် ဆောင်ရွက်နေတယ်လို့ ဖော်ပြထားပါတယ်။

ပဲခူးတိုင်းစစ်ဒေသခွဲ တာဝန်ရှိသူတယောက်က အကျဉ်းထောင်လုံခြုံရေးတွေဆီကနေ သေနတ်လု ထွက်ပြေးလာတဲ့ အကျဉ်းသား ၉ ယောက် လုံး လွတ်‌မြောက်နယ်မြေကို လုံခြုံစွာ ရောက်ရှိနေပြီဖြစ်ပြီး တယောက်ကတော့ ပစ်ခတ်မှုဖြစ်စဉ်မှာ သေဆုံးသွားတယ်လို့ ပြောပါတယ်။

ပြီးခဲ့တဲ့လတွေကလည်း ကျောင်းကုန်းမြို့မရဲစခန်းက အချုပ်သား ၈ ဦး အချုပ်ခန်းကို ဖောက်ပြီး ထွက်ပြေးခဲ့သလို မေ ၁ ရက်ကလည်း ရမည်းသင်းအကျဥ်းထောင်ကနေ ရုံးထုတ်လာတဲ့ အချုပ်သား ၁၁ ဦးက ရဲကို သေနတ်နဲ့ပစ်ခတ်ကာ ထွက်ပြေးခဲ့တဲ့ဖြစ်စဥ်လည်း ရှိခဲ့ပါတယ်။ DVB

မကွေးတိုင်း၊ မြိုင်မြို့နယ် သရက်ကွပျူစောထီးစခန်း မြောက်ဖက်ရှိ လုံခြုံရေးကင်းစခန်းကို ဒေသကာကွယ်ရေးတပ်ဖွဲ့ များက ပူးပေါင်းတိုက်ခိုက်ခဲ့ရာ စစ်ကောင်စီတပ်ဖွဲ့ ဝင်နှင့် ပျူစောထီး ၁၁ ဦးထိ သေဆုံးသွားကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့ ထံမှ သိရသည်။

မေလ ၁၇ ရက်နေ့ ညနေပိုင်းလောက်တွင် အင်အား ၁၃ ဦးခန့် ရှိသည့် သရက်ကွပျူရွာလုံခြုံရေးဂိတ်ကို သွားရောက်တိုက်ခိုက်ခဲ့ခြင်းဖြစ် ကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့ ခေါင်းဆောင် ဗိုလ် လက်ယာက ပြောသည်။

“ ဘုန်ကြီးကျောင်းဘုရားထဲမှာ စစ်သားရော ပျူရောဆို ၁၃ ဦးလောက်ရှိတယ်။ အဲ့ဒါကို ဝင်တိုက်တာ၊ ဒီမနက် ပြန်ပြီး အတည်ပြုတဲ့အခါမှာ စစ်သား ကိုးယောက် ပျူ နှစ်ယောက်သေတယ်၊ နှစ်ယောက်တော့ လွတ်သွားတယ်” ဟုပြောသည်။

မြိုင်မြို့နယ်အတွင်းရှိ ပျူစောထီးရွာများကို ဒေသကာကွယ်ရေးတပ်ဖွဲ့များက တိုက်ခိုက်မှုများ ဆက်တိုက်ပြုလုပ်နေသည့်အတွက် စားနပ် ရိက္ခာကို ပင် ထွက်မယူနိုင်ဘဲ ဖြစ်နေကြသည်ဟု ဗိုလ်လက်ယာက ဆိုသည်။

“ ရိက္ခာတောင်ထွက်မယူရဲဘူး၊ ဟိုနေ့ ကလည်း ရိက္ခာလာပို့တဲ့ကားကို မိုင်းဆွဲပြီး ရိက္ခာတွေ သိမ်းလိုက်သေးတယ်” ဟု ဗိုလ်လက်ယာက ပြောသည်။

လက်ရှိအချိန်တွင် မြိုင်မြို့နယ်အတွင်း အင်အား ၉၀ နီးပါး ပါဝင်သည့် စစ်ကြောင်းတစ်ခုရှိနေပြီး ယင်းစစ်ကြောင်းသည် မနက်မလင်းခင် အချိန်များတွင် ကျေးရွာများကို အလစ်အငိုက် ဝင်ရောက်သည့် ပုံစံမျိုး ဆောင်ရွက်နေသော်လည်း ဒေသကာကွယ်ရေးတပ်များက ပြည်သူတွေကို အချိန်မီ ကယ်ထုတ်နိုင်နေသေးကြောင်း သိရသည်။

ယခုတိုက်ခိုက်မှုကို မြိုင် ပကဖ တပ်ရင်း(၁) ၊ တပ်ရင်း (၂) ၊ တပ်ခွဲ (၁) ရင်း(၁ ) ၊ တပ်ခွဲ (၃ )ရင်း(၁)၊ ကိုအောင်ကြီးတပ်ဖွဲ့ နှင့် စက်ြာအဖွဲ့ (ပေါက်) တို့က ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။ mizzima