ဆားလင်းကြီးမြို့ပေါ်တွင် ကင်းပတ်နေသော စစ်ကောင်စီတပ်ဖွဲ့ တိုက်ခိုက်ခံရ
စစ်ကိုင်းတိုင်း ၊ ဆားလင်းကြီးမြို့ပေါ် တွင် ကင်းပတ်နေသော စစ်ကောင်စီတပ်သားများကို မေလ ၁၈ ရက် ညနေပိုင်းတွင် ဒေသကာကွယ်ရေးတပ်ဖွဲ့များက လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း MRDA တပ်ဖွဲ့ထံက သိရသည်။
အဆိုပါ တိုက်ခိုက်မှုတွင် စစ်ကောင်စီတပ်သား သုံးဦးထိခိုက်ဒဏ်ရာ ရရှိခဲ့ကြောင်း MRDA သတင်းနှင့် ပြန်ကြားရေးက ပြောသည်။
“ ၄၀ မမ ဗုံးသီး သုံးလုံးနဲ့ ကင်းပတ်ရင်း အိမ်ထောင်စုဇယား စစ်နေတဲ့ စစ်သား(စစ်ကောင်စီတပ်သား)တွေကို ပစ်ခတ်တိုက်ခိုက်ခဲ့တာ ဖြစ်ပါတယ် ” ဟု ၎င်းကဆိုသည်။
ထိုတိုက်ခိုက်မှုကို မြန်မာ့တော်ဝင်နဂါးတပ်တော် MRDA ဆားလင်းကြီးတပ်ခွဲ နှင့် MRA တပ်ဖွဲ့တို့ပူးပေါင်း၍ တိုက်ခိုက်ခဲ့ခြင်းဖြစ်ပြီး ဒေသကာကွယ်ရေး ရဲဘော်များ အထိအခိုက်မရှိ ဆုတ်ခွါနိုင်ခဲ့ကြောင်း သိရသည်။
အဆိုပါ စစ်ကောင်စီတပ်ဖွဲ့သည် ဆားလင်းကြီး မြို့ပေါ်တွင် ပတ်ကင်းလှည့်ပြီး ပြည်သူများ၏ အိမ်ထောင်စု ဇယားများကို ရှောင်တခင် ဝင်စစ်၍ ငွေညှစ်တောင်းခံမှုများ ပြုလုပ်ကြကြောင်း ဒေသခံများ၏ ပြောကြားချက်အရ သိရသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 